| Library / Tipiṭaka / д̇ибидага • Tipiṭaka / нзд̇д̇иббагаран̣а-адтагат̇аа • Nettippakaraṇa-aṭṭhakathā |
8. вибхад̇д̇ихааравибхан̇г̇аван̣н̣анаа
8. Vibhattihāravibhaṅgavaṇṇanā
33. д̇ад̇т̇а гад̇амо вибхад̇д̇ихаарод̇и вибхад̇д̇ихааравибхан̇г̇о. д̇ад̇т̇а д̇хаммавибхад̇д̇ибхуумивибхад̇д̇ибад̣̇адтаанавибхад̇д̇ийд̇и д̇ивид̇хаа вибхад̇д̇и. д̇аасу яасмаа д̇хаммзсу вибхааг̇ад̇о нид̣̇д̣̇идтзсу д̇ад̇т̇а лаб̣бхамаано бхуумивибхааг̇о бад̣̇адтаанавибхааг̇о жа нид̣̇д̣̇исияамаано сувин̃н̃зяяо ход̇и, д̇асмаа д̇хаммавибхад̇д̇им̣ д̇аава нид̣̇д̣̇исанд̇о сол̣асавид̇хз бадтаанз язсам̣ суд̇д̇аанам̣ васзна висзсад̇о вибхаж̇ид̇аб̣б̣аа, д̇аани суд̇д̇аани д̣̇ассзд̇ум̣ ‘‘д̣̇вз суд̇д̇аани ваасанаабхааг̇ияан̃жа ниб̣б̣зд̇хабхааг̇ияан̃жаа’’д̇и вуд̇д̇ам̣. д̇ад̇т̇а ваасанаа бун̃н̃абхааванаа, д̇ассаа бхааг̇о годтаасо ваасанаабхааг̇о, д̇асса хид̇анд̇и ваасанаабхааг̇ияам̣, суд̇д̇ам̣. ниб̣б̣иж̇жханам̣ лобхагканд̇хаад̣̇ийнам̣ бад̣̇ааланам̣ ниб̣б̣зд̇хо, д̇асса бхааг̇од̇и сзсам̣ буримасад̣̇исамзва. яасмим̣ суд̇д̇з д̇ийн̣и бун̃н̃агирияавад̇т̇ууни д̣̇зсид̇аани, д̇ам̣ суд̇д̇ам̣ ваасанаабхааг̇ияам̣. яасмим̣ бана сзгкаасзгкаа д̣̇зсид̇аа, д̇ам̣ ниб̣б̣зд̇хабхааг̇ияам̣. аяан̃жа ад̇т̇о баал̣ияам̣язва ааг̇амиссад̇и.
33.Tatthakatamo vibhattihāroti vibhattihāravibhaṅgo. Tattha dhammavibhattibhūmivibhattipadaṭṭhānavibhattīti tividhā vibhatti. Tāsu yasmā dhammesu vibhāgato niddiṭṭhesu tattha labbhamāno bhūmivibhāgo padaṭṭhānavibhāgo ca niddisiyamāno suviññeyyo hoti, tasmā dhammavibhattiṃ tāva niddisanto soḷasavidhe paṭṭhāne yesaṃ suttānaṃ vasena visesato vibhajitabbā, tāni suttāni dassetuṃ ‘‘dve suttāni vāsanābhāgiyañca nibbedhabhāgiyañcā’’ti vuttaṃ. Tattha vāsanā puññabhāvanā, tassā bhāgo koṭṭhāso vāsanābhāgo, tassa hitanti vāsanābhāgiyaṃ, suttaṃ. Nibbijjhanaṃ lobhakkhandhādīnaṃ padālanaṃ nibbedho, tassa bhāgoti sesaṃ purimasadisameva. Yasmiṃ sutte tīṇi puññakiriyavatthūni desitāni, taṃ suttaṃ vāsanābhāgiyaṃ. Yasmiṃ pana sekkhāsekkhā desitā, taṃ nibbedhabhāgiyaṃ. Ayañca attho pāḷiyaṃyeva āgamissati.
бун̃н̃абхааг̇ияаад̇и бун̃н̃абхааг̇з бхаваа. д̇ат̇аа палабхааг̇ияаа взд̣̇ид̇аб̣б̣аа. паланд̇и бана сааман̃н̃апалам̣. сам̣варасийланд̇и баад̇имогкасам̣варо, сад̇исам̣варо, н̃аан̣асам̣варо, канд̇исам̣варо, вийрияасам̣варод̇и бан̃жа сам̣вараа сам̣варасийлам̣. бахаанасийланд̇и д̇ад̣̇ан̇г̇аббахаанам̣, вигкамбханаббахаанам̣, самужчзд̣̇аббахаанам̣, бадиббассад̣̇д̇хиббахаанам̣, ниссаран̣аббахаананд̇и бан̃жаббахаанаани. д̇зсу ниссаран̣аббахаанаваж̇ж̇аанам̣ бахаанаанам̣ васзна бахаанасийлам̣ взд̣̇ид̇аб̣б̣ам̣. сод̇и яо ваасанаабхааг̇ияасуд̇д̇асамбадиг̇г̇аахаго, со. д̇зна б̣рахмажариязнаад̇и д̇зна сам̣варасийласан̇каад̇зна сздтажариязна гааран̣абхууд̇зна б̣рахмажаарий бхавад̇и. зд̇т̇а жа адтасамаабад̇д̇иб̣рахмажарияасса на бадигкзбо, гзжи бана ‘‘д̇знзва б̣рахмажариязнаа’’д̇и батанд̇и, д̇зсам̣ мад̇зна сияаа д̇асса бадигкзбо.
Puññabhāgiyāti puññabhāge bhavā. Tathā phalabhāgiyā veditabbā. Phalanti pana sāmaññaphalaṃ. Saṃvarasīlanti pātimokkhasaṃvaro, satisaṃvaro, ñāṇasaṃvaro, khantisaṃvaro, vīriyasaṃvaroti pañca saṃvarā saṃvarasīlaṃ. Pahānasīlanti tadaṅgappahānaṃ, vikkhambhanappahānaṃ, samucchedappahānaṃ, paṭippassaddhippahānaṃ, nissaraṇappahānanti pañcappahānāni. Tesu nissaraṇappahānavajjānaṃ pahānānaṃ vasena pahānasīlaṃ veditabbaṃ. Soti yo vāsanābhāgiyasuttasampaṭiggāhako, so. Tena brahmacariyenāti tena saṃvarasīlasaṅkhātena seṭṭhacariyena kāraṇabhūtena brahmacārī bhavati. Ettha ca aṭṭhasamāpattibrahmacariyassa na paṭikkhepo, keci pana ‘‘teneva brahmacariyenā’’ti paṭhanti, tesaṃ matena siyā tassa paṭikkhepo.
бахаанасийлз тид̇од̇и самужчзд̣̇абадиббассад̣̇д̇хиббахаанаанам̣ васзна бахаанасийлз тид̇о. д̇зна б̣рахмажариязнаад̇и д̇зна бахаанасийлзна висзсабхууд̇зна маг̇г̇аб̣рахмажариязна. яз бана ‘‘д̇знзва б̣рахмажариязнаа’’д̇и батанд̇и, д̇зсам̣ аяам̣ баато ‘‘ваасанаабхааг̇ияам̣ наама суд̇д̇ам̣ д̣̇аанагат̇аа, сийлагат̇аа, саг̇г̇агат̇аа, бун̃н̃авибаагагат̇аа’’д̇и. яз бана ‘‘д̇зна б̣рахмажариязнаа’’д̇и батанд̇и, д̇зсам̣ аяам̣ баато – ‘‘ваасанаабхааг̇ияам̣ наама суд̇д̇ам̣ д̣̇аанагат̇аа, сийлагат̇аа, саг̇г̇агат̇аа гаамаанам̣ аад̣̇ийнаво нзгкаммз аанисам̣со’’д̇и. д̇ад̇т̇а гад̇амо баато яуд̇д̇ад̇арод̇и? бажчимо баатод̇и нидтам̣ г̇анд̇аб̣б̣ам̣. яасмаа ‘‘ниб̣б̣зд̇хабхааг̇ияам̣ наама суд̇д̇ам̣ яаа жад̇усажжаббагаасанаа’’д̇и вагкад̇и, на хи махаат̇зро саавасзсам̣ гад̇ваа д̇хаммам̣ д̣̇зсзсийд̇и.
Pahānasīle ṭhitoti samucchedapaṭippassaddhippahānānaṃ vasena pahānasīle ṭhito. Tena brahmacariyenāti tena pahānasīlena visesabhūtena maggabrahmacariyena. Ye pana ‘‘teneva brahmacariyenā’’ti paṭhanti, tesaṃ ayaṃ pāṭho ‘‘vāsanābhāgiyaṃ nāma suttaṃ dānakathā, sīlakathā, saggakathā, puññavipākakathā’’ti. Ye pana ‘‘tena brahmacariyenā’’ti paṭhanti, tesaṃ ayaṃ pāṭho – ‘‘vāsanābhāgiyaṃ nāma suttaṃ dānakathā, sīlakathā, saggakathā kāmānaṃ ādīnavo nekkhamme ānisaṃso’’ti. Tattha katamo pāṭho yuttataroti? Pacchimo pāṭhoti niṭṭhaṃ gantabbaṃ. Yasmā ‘‘nibbedhabhāgiyaṃ nāma suttaṃ yā catusaccappakāsanā’’ti vakkhati, na hi mahāthero sāvasesaṃ katvā dhammaṃ desesīti.
‘‘над̇т̇и баж̇аананаа’’д̇иаад̣̇инаа убхиннам̣ суд̇д̇аанам̣ саад̇исаяам̣ асан̇гарагааран̣ам̣ д̣̇ассзд̇и. д̇ад̇т̇а баж̇аананаад̇и арияамаг̇г̇асса бад̣̇адтаанабхууд̇аа вудтаанаг̇ааминий вибассанаабан̃н̃аа. имаани жад̇д̇аари суд̇д̇аанийд̇и имзсам̣ суд̇д̇аанам̣ ваасанаабхааг̇ияаниб̣б̣зд̇хабхааг̇ияаанам̣ вагкамаанаанан̃жа сам̣гилзсабхааг̇ияаасзгкабхааг̇ияаанам̣ васзна жад̇д̇аари суд̇д̇аани. д̣̇зсанааяаад̇и д̣̇зсанаанаязна. саб̣б̣ад̇о вижаязна хаарзна вижинид̇ваад̇и саб̣б̣ад̇обхааг̇зна згаад̣̇асасу таанзсу багкибид̇ваа вижаязна хаарзна вижинид̇ваа. ‘‘яуд̇д̇ихаарзна яож̇зд̇аб̣б̣ааний’’д̇и зд̇зна вижаяахаараяуд̇д̇ихаараа вибхад̇д̇ихаарасса баригаммадтаананд̇и д̣̇ассзд̇и. ‘‘яаавад̇игаа н̃аан̣асса бхуумий’’д̇и иминаа вибхад̇д̇ихаарасса махаависаяад̇ам̣ д̣̇ассзд̇и.
‘‘Natthi pajānanā’’tiādinā ubhinnaṃ suttānaṃ sātisayaṃ asaṅkarakāraṇaṃ dasseti. Tattha pajānanāti ariyamaggassa padaṭṭhānabhūtā vuṭṭhānagāminī vipassanāpaññā. Imāni cattāri suttānīti imesaṃ suttānaṃ vāsanābhāgiyanibbedhabhāgiyānaṃ vakkhamānānañca saṃkilesabhāgiyaasekkhabhāgiyānaṃ vasena cattāri suttāni. Desanāyāti desanānayena. Sabbato vicayena hārena vicinitvāti sabbatobhāgena ekādasasu ṭhānesu pakkhipitvā vicayena hārena vicinitvā. ‘‘Yuttihārena yojetabbānī’’ti etena vicayahārayuttihārā vibhattihārassa parikammaṭṭhānanti dasseti. ‘‘Yāvatikā ñāṇassa bhūmī’’ti iminā vibhattihārassa mahāvisayataṃ dasseti.
34. звам̣ ваасанаабхааг̇ияаниб̣б̣зд̇хабхааг̇ияабхаавзхи д̇хаммз згад̣̇зсзна вибхаж̇ид̇ваа ид̣̇аани д̇зсам̣ гилзсабхааг̇ияаасзгкабхааг̇ияабхаавзхи саад̇хааран̣аасаад̇хааран̣абхаавзхи вибхаж̇ид̇ум̣ ‘‘д̇ад̇т̇а гад̇амз д̇хаммаа саад̇хааран̣аа’’д̇иаад̣̇и аарад̣̇д̇хам̣. д̇ад̇т̇а гад̇амз д̇хаммаад̇и гад̇амз сабхаавад̇хаммаа. саад̇хааран̣аад̇и ависидтаа, самаанаад̇и ад̇т̇о. д̣̇вз д̇хаммаад̇и д̣̇увз багад̇ияо. багад̇иад̇т̇о хи аяам̣ д̇хамма-сад̣̇д̣̇о ‘‘ж̇аад̇ид̇хаммаанам̣ сад̇д̇аана’’нд̇иаад̣̇ийсу (бади. ма. 1.33) вияа. наамасаад̇хааран̣аад̇и наамзна саад̇хааран̣аа, гусалаагусалаад̇и самаананаамаад̇и ад̇т̇о. вад̇т̇усаад̇хааран̣аад̇и вад̇т̇унаа ниссаязна саад̇хааран̣аа, згасанд̇ад̇ибад̇ид̇ад̇ааяа самаанавад̇т̇угаад̇и ад̇т̇о. висзсад̇о сам̣гилзсабагкз бахаанзгадтаа наамасаад̇хааран̣аа, сахаж̇згадтаа вад̇т̇усаад̇хааран̣аа. ан̃н̃амби звам̣ ж̇аад̇ияанд̇и гижжабажжаяабадибагкаад̣̇ийхи самаанам̣ сан̇г̇ан̣хаад̇и. мижчад̇д̇анияад̇аанам̣ анияад̇аананд̇и ид̣̇ам̣ бут̇уж̇ж̇анаанам̣ убалагкан̣ам̣. д̇асмаа сассад̇аваад̣̇аа ужчзд̣̇аваад̣̇аад̇и аад̣̇иго саб̣б̣о бут̇уж̇ж̇анабхзд̣̇о аахарид̇ваа вад̇д̇аб̣б̣о. д̣̇асанаббахаад̇аб̣б̣аа гилзсаа саад̇хааран̣аа мижчад̇д̇анияад̇аанам̣ анияад̇аанам̣ зва жа самбхавад̇о саммад̇д̇анияад̇аанам̣ асамбхавад̇о жа. иминаа наязна сзсабад̣̇зсуби ад̇т̇о взд̣̇ид̇аб̣б̣о.
34. Evaṃ vāsanābhāgiyanibbedhabhāgiyabhāvehi dhamme ekadesena vibhajitvā idāni tesaṃ kilesabhāgiyaasekkhabhāgiyabhāvehi sādhāraṇāsādhāraṇabhāvehi vibhajituṃ ‘‘tattha katame dhammā sādhāraṇā’’tiādi āraddhaṃ. Tattha katame dhammāti katame sabhāvadhammā. Sādhāraṇāti avisiṭṭhā, samānāti attho. Dve dhammāti duve pakatiyo. Pakatiattho hi ayaṃ dhamma-saddo ‘‘jātidhammānaṃ sattāna’’ntiādīsu (paṭi. ma. 1.33) viya. Nāmasādhāraṇāti nāmena sādhāraṇā, kusalākusalāti samānanāmāti attho. Vatthusādhāraṇāti vatthunā nissayena sādhāraṇā, ekasantatipatitatāya samānavatthukāti attho. Visesato saṃkilesapakkhe pahānekaṭṭhā nāmasādhāraṇā, sahajekaṭṭhā vatthusādhāraṇā. Aññampi evaṃ jātiyanti kiccapaccayapaṭipakkhādīhi samānaṃ saṅgaṇhāti. Micchattaniyatānaṃ aniyatānanti idaṃ puthujjanānaṃ upalakkhaṇaṃ. Tasmā sassatavādā ucchedavādāti ādiko sabbo puthujjanabhedo āharitvā vattabbo. Dasanappahātabbā kilesā sādhāraṇā micchattaniyatānaṃ aniyatānaṃ eva ca sambhavato sammattaniyatānaṃ asambhavato ca. Iminā nayena sesapadesupi attho veditabbo.
арияасаавагод̇и сзгкам̣ санд̇хааяа вад̣̇ад̇и. саб̣б̣аа саа авийд̇арааг̇зхи саад̇хааран̣аад̇и логияасамаабад̇д̇и руубааважараа аруубааважараа д̣̇иб̣б̣авихааро б̣рахмавихааро батамаж̇жхаанасамаабад̇д̇ийд̇и звамаад̣̇ийхи барияааязхи саад̇хааран̣аа. гусаласамаабад̇д̇и бана иминаа барияааязна сияаа асаад̇хааран̣аа , имам̣ бана д̣̇осам̣ бассанд̇аа гзжи ‘‘яам̣ гин̃жи…бз… саб̣б̣аа саа авийд̇арааг̇зхи саад̇хааран̣аа’’д̇и батанд̇и. гат̇ам̣ д̇з од̇хисо г̇ахид̇аа, ат̇а од̇хисо г̇ахзд̇аб̣б̣аа, гат̇ам̣ саад̇хааран̣аад̇и? ануяог̇ам̣ манасигад̇ваа д̇ам̣ висод̇хзнд̇о ааха – ‘‘саад̇хааран̣аа хи д̇хаммаа звам̣ ан̃н̃аман̃н̃а’’нд̇иаад̣̇и. д̇ассад̇т̇о – яат̇аа мижчад̇д̇анияад̇аанам̣ анияад̇аанан̃жа саад̇хааран̣аад̇и вуд̇д̇ам̣, звам̣ саад̇хааран̣аа д̇хаммаа на саб̣б̣асад̇д̇аанам̣ саад̇хааран̣ад̇ааяа саад̇хааран̣аа, гасмаа? яасмаа ан̃н̃аман̃н̃ам̣ барам̣ барам̣ сагам̣ сагам̣ висаяам̣ наад̇ивад̇д̇анд̇и. бадинияад̇ан̃хи д̇зсам̣ бавад̇д̇идтаанам̣, ид̇арат̇аа д̇ат̇аа вохааро зва на сияаад̇и ад̇хиббааяо. яасмаа жа зд̇з зва д̇хаммаа звам̣ нияад̇аа висаяаа, д̇асмаа ‘‘яоби имзхи д̇хаммзхи саманнааг̇ад̇о на со д̇ам̣ д̇хаммам̣ убаад̇ивад̇д̇ад̇ий’’д̇и ааха. на хи мижчад̇д̇анияад̇аанам̣ анияад̇аанан̃жа д̣̇ассанзна бахаад̇аб̣б̣аа гилзсаа на санд̇и, ан̃н̃зсам̣ ваа санд̇ийд̇и звам̣ сзсзби вад̇д̇аб̣б̣ам̣.
Ariyasāvakoti sekkhaṃ sandhāya vadati. Sabbā sā avītarāgehi sādhāraṇāti lokiyasamāpatti rūpāvacarā arūpāvacarā dibbavihāro brahmavihāro paṭhamajjhānasamāpattīti evamādīhi pariyāyehi sādhāraṇā. Kusalasamāpatti pana iminā pariyāyena siyā asādhāraṇā , imaṃ pana dosaṃ passantā keci ‘‘yaṃ kiñci…pe… sabbā sā avītarāgehi sādhāraṇā’’ti paṭhanti. Kathaṃ te odhiso gahitā, atha odhiso gahetabbā, kathaṃ sādhāraṇāti? Anuyogaṃ manasikatvā taṃ visodhento āha – ‘‘sādhāraṇā hi dhammā evaṃ aññamañña’’ntiādi. Tassattho – yathā micchattaniyatānaṃ aniyatānañca sādhāraṇāti vuttaṃ, evaṃ sādhāraṇā dhammā na sabbasattānaṃ sādhāraṇatāya sādhāraṇā, kasmā? Yasmā aññamaññaṃ paraṃ paraṃ sakaṃ sakaṃ visayaṃ nātivattanti. Paṭiniyatañhi tesaṃ pavattiṭṭhānaṃ, itarathā tathā vohāro eva na siyāti adhippāyo. Yasmā ca ete eva dhammā evaṃ niyatā visayā, tasmā ‘‘yopi imehi dhammehi samannāgato na so taṃ dhammaṃ upātivattatī’’ti āha. Na hi micchattaniyatānaṃ aniyatānañca dassanena pahātabbā kilesā na santi, aññesaṃ vā santīti evaṃ sesepi vattabbaṃ.
асаад̇хааран̣о наама д̇хаммо д̇асса д̇асса буг̇г̇аласса бажжад̇д̇анияад̇о ариязсу сзгкаасзгкад̇хаммавасзна анариязсу саб̣б̣аабхаб̣б̣абахаад̇аб̣б̣авасзна г̇авзсид̇аб̣б̣о, ид̇арасса д̇ат̇аа нид̣̇д̣̇исид̇аб̣б̣абхааваабхаавад̇о. со жа ко саад̇хааран̣аавид̇хурад̇ааяа д̇ам̣ д̇ам̣ убаад̣̇ааяа д̇ат̇аавуд̇д̇ад̣̇зсанаанусаарзнаад̇и имамад̇т̇ам̣ д̣̇ассзд̇и ‘‘гад̇амз д̇хаммаа асаад̇хааран̣аа яаава д̣̇зсанам̣ убаад̣̇ааяа г̇авзсид̇аб̣б̣аа сзгкаасзгкаа бхаб̣б̣аабхаб̣б̣аа’’д̇и иминаа. адтамагассаад̇и сод̇аабад̇д̇ипаласажчигирияааяа бадибаннасса. д̇хаммад̇аад̇и д̇хаммасабхааво батамасса маг̇г̇адтад̇аа д̣̇уд̇ияасса паладтад̇аа. батамасса ваа бахийяамаанагилзсад̇аа. д̣̇уд̇ияасса бахийнагилзсад̇аа. буна адтамагассаад̇и анааг̇аамимаг̇г̇адтасса. нааманд̇и сзгкаад̇и наамам̣. д̇хаммад̇аад̇и д̇ам̣д̇ам̣маг̇г̇адтад̇аа хздтимапаладтад̇аа жа. бадибаннагаананд̇и маг̇г̇асаман̇г̇ийнам̣. нааманд̇и бадибаннагаад̇и наамам̣. звам̣ ‘‘адтамагассаа’’д̇иаад̣̇инаа арияабуг̇г̇алзсу асаад̇хааран̣ад̇хаммам̣ д̣̇ассзд̇ваа ид̇арзсу наяад̣̇ассанад̇т̇ам̣ ‘‘звам̣ висзсаанубассинаа’’д̇иаад̣̇и вуд̇д̇ам̣. логияад̇хаммзсу зва хи хийнаад̣̇ибхааво. д̇ад̇т̇а висзсаанубассинаад̇и асаад̇хааран̣ад̇хаммаанубассинаа. мижчад̇д̇анияад̇аанам̣ анияад̇аа д̇хаммаа саад̇хааран̣аа мижчад̇д̇анияад̇аа д̇хаммаа асаад̇хааран̣аа. мижчад̇д̇анияад̇зсуби нияад̇амижчаад̣̇идтигаанам̣ анияад̇аа д̇хаммаа саад̇хааран̣аа. нияад̇амижчаад̣̇идти асаад̇хааран̣аад̇и иминаа наязна висзсаанубассинаа взд̣̇ид̇аб̣б̣аа.
Asādhāraṇo nāma dhammo tassa tassa puggalassa paccattaniyato ariyesu sekkhāsekkhadhammavasena anariyesu sabbābhabbapahātabbavasena gavesitabbo, itarassa tathā niddisitabbabhāvābhāvato. So ca kho sādhāraṇāvidhuratāya taṃ taṃ upādāya tathāvuttadesanānusārenāti imamatthaṃ dasseti ‘‘katame dhammā asādhāraṇā yāva desanaṃ upādāya gavesitabbā sekkhāsekkhā bhabbābhabbā’’ti iminā. Aṭṭhamakassāti sotāpattiphalasacchikiriyāya paṭipannassa. Dhammatāti dhammasabhāvo paṭhamassa maggaṭṭhatā dutiyassa phalaṭṭhatā. Paṭhamassa vā pahīyamānakilesatā. Dutiyassa pahīnakilesatā. Puna aṭṭhamakassāti anāgāmimaggaṭṭhassa. Nāmanti sekkhāti nāmaṃ. Dhammatāti taṃtaṃmaggaṭṭhatā heṭṭhimaphalaṭṭhatā ca. Paṭipannakānanti maggasamaṅgīnaṃ. Nāmanti paṭipannakāti nāmaṃ. Evaṃ ‘‘aṭṭhamakassā’’tiādinā ariyapuggalesu asādhāraṇadhammaṃ dassetvā itaresu nayadassanatthaṃ ‘‘evaṃ visesānupassinā’’tiādi vuttaṃ. Lokiyadhammesu eva hi hīnādibhāvo. Tattha visesānupassināti asādhāraṇadhammānupassinā. Micchattaniyatānaṃ aniyatā dhammā sādhāraṇā micchattaniyatā dhammā asādhāraṇā. Micchattaniyatesupi niyatamicchādiṭṭhikānaṃ aniyatā dhammā sādhāraṇā. Niyatamicchādiṭṭhi asādhāraṇāti iminā nayena visesānupassinā veditabbā.
звам̣ наанаанаязхи д̇хаммавибхад̇д̇им̣ д̣̇ассзд̇ваа ид̣̇аани бхуумивибхад̇д̇им̣ бад̣̇адтаанавибхад̇д̇ин̃жа вибхаж̇ид̇ваа д̣̇ассзд̇ум̣ ‘‘д̣̇ассанабхуумий’’д̇иаад̣̇имааха. д̇ад̇т̇а д̣̇ассанабхуумийд̇и батамамаг̇г̇о. яасмаа бана батамамаг̇г̇агкан̣з арияасааваго саммад̇д̇анияаамам̣ оггаманд̇о наама ход̇и, д̇ад̇о барам̣ огганд̇о , д̇асмаа ‘‘д̣̇ассанабхууми нияаамаавагганд̇ияаа бад̣̇адтаана’’нд̇и вуд̇д̇ам̣. гин̃жааби хздтимо хздтимо маг̇г̇о убариубаримаг̇г̇аад̇хиг̇амасса гааран̣ам̣ ход̇и, саггааяад̣̇идтиаад̣̇ийни аббахааяа гаамарааг̇аб̣яаабаад̣̇аад̣̇иббахаанасса асаггун̣зяяад̇д̇аа. д̇ат̇ааби арияамаг̇г̇о ад̇д̇ано паласса висзсагааран̣ам̣ аасаннагааран̣ан̃жаад̇и д̣̇ассзд̇ум̣ ‘‘бхааванаабхууми уд̇д̇аригаанам̣ палаанам̣ бад̇д̇ияаа бад̣̇адтаана’’нд̇и вуд̇д̇ам̣. сукаа бадибад̣̇аа киббаабхин̃н̃аа н̃аан̣уд̇д̇арасса д̇ат̇аавид̇хабажжаяасамааяог̇з жа ход̇ийд̇и саа вибассанааяа бад̣̇адтаананд̇и вуд̇д̇аа. ид̇араа бана д̇иссоби бадибад̣̇аа самат̇ам̣ ааваханд̇и зва. д̇аасу саб̣б̣амуд̣̇уд̇ааяа д̣̇ассид̇ааяа сзсааби д̣̇ассид̇аа зваад̇и ааха – ‘‘д̣̇угкаа бадибад̣̇аа д̣̇анд̇хаабхин̃н̃аа самат̇асса бад̣̇адтаана’’нд̇и.
Evaṃ nānānayehi dhammavibhattiṃ dassetvā idāni bhūmivibhattiṃ padaṭṭhānavibhattiñca vibhajitvā dassetuṃ ‘‘dassanabhūmī’’tiādimāha. Tattha dassanabhūmīti paṭhamamaggo. Yasmā pana paṭhamamaggakkhaṇe ariyasāvako sammattaniyāmaṃ okkamanto nāma hoti, tato paraṃ okkanto , tasmā ‘‘dassanabhūmi niyāmāvakkantiyā padaṭṭhāna’’nti vuttaṃ. Kiñcāpi heṭṭhimo heṭṭhimo maggo upariuparimaggādhigamassa kāraṇaṃ hoti, sakkāyadiṭṭhiādīni appahāya kāmarāgabyāpādādippahānassa asakkuṇeyyattā. Tathāpi ariyamaggo attano phalassa visesakāraṇaṃ āsannakāraṇañcāti dassetuṃ ‘‘bhāvanābhūmiuttarikānaṃ phalānaṃ pattiyā padaṭṭhāna’’nti vuttaṃ. Sukhā paṭipadā khippābhiññā ñāṇuttarassa tathāvidhapaccayasamāyoge ca hotīti sā vipassanāya padaṭṭhānanti vuttā. Itarā pana tissopi paṭipadā samathaṃ āvahanti eva. Tāsu sabbamudutāya dassitāya sesāpi dassitā evāti āha – ‘‘dukkhā paṭipadā dandhābhiññā samathassa padaṭṭhāna’’nti.
д̣̇аанамаяам̣ бун̃н̃агирияавад̇т̇ууд̇и д̣̇аанамзва д̣̇аанамаяам̣, буж̇ж̇апаланиб̣б̣ад̇д̇анадтзна бун̃н̃ам̣, д̇ад̣̇зва гад̇д̇аб̣б̣ад̇о гирияаа, баяог̇асамбад̇д̇ияаад̣̇ийнам̣ ад̇хидтаанабхаавад̇о вад̇т̇у жаад̇и д̣̇аанамаяабун̃н̃агирияавад̇т̇у. барад̇огхосассаад̇и д̇хаммассаванасса. саад̇хааран̣анд̇и на б̣ийж̇ам̣ вияа ан̇гурасса, д̣̇ассанабхуумиаад̣̇аяо вияа ваа нияаамаавагганд̇иаад̣̇ийнам̣ аавзн̣игам̣, ат̇а ко саад̇хааран̣ам̣, д̇ад̣̇ан̃н̃агааран̣зхиби барад̇огхосасса бавад̇д̇анад̇од̇и ад̇хиббааяо. д̇ад̇т̇а гзжи д̣̇ааяагасса д̣̇аанаанумод̣̇анам̣ аажин̣н̣анд̇и д̣̇аанам̣ барад̇огхосасса гааран̣анд̇и вад̣̇анд̇и. д̣̇ааяаго бана д̣̇агкин̣аависуд̣̇д̇хим̣ ааган̇канд̇о д̣̇аанасийлаад̣̇иг̇ун̣ависзсаанам̣ саванз яуд̇д̇аббаяуд̇д̇о ход̇ийд̇и д̣̇аанам̣ д̇хаммассаванасса гааран̣ам̣ вуд̇д̇ам̣.
Dānamayaṃ puññakiriyavatthūti dānameva dānamayaṃ, pujjaphalanibbattanaṭṭhena puññaṃ, tadeva kattabbato kiriyā, payogasampattiyādīnaṃ adhiṭṭhānabhāvato vatthu cāti dānamayapuññakiriyavatthu. Paratoghosassāti dhammassavanassa. Sādhāraṇanti na bījaṃ viya aṅkurassa, dassanabhūmiādayo viya vā niyāmāvakkantiādīnaṃ āveṇikaṃ, atha kho sādhāraṇaṃ, tadaññakāraṇehipi paratoghosassa pavattanatoti adhippāyo. Tattha keci dāyakassa dānānumodanaṃ āciṇṇanti dānaṃ paratoghosassa kāraṇanti vadanti. Dāyako pana dakkhiṇāvisuddhiṃ ākaṅkhanto dānasīlādiguṇavisesānaṃ savane yuttappayutto hotīti dānaṃ dhammassavanassa kāraṇaṃ vuttaṃ.
сийласамбанно виббадисаараабхаавзна самаахид̇о д̇хаммажинд̇аасамад̇т̇о ход̇ийд̇и сийлам̣ жинд̇аамаяан̃аан̣асса гааран̣анд̇и ааха ‘‘сийламаяа’’нд̇иаад̣̇и. бхааванаамаяанд̇и самат̇асан̇каад̇ам̣ бхааванаамаяам̣. бхааванаамаяияаад̇и убарижхаанасан̇каад̇ааяа вибассанаасан̇каад̇ааяа жа бхааванаамаяияаа. буримам̣ буриман̃хи бажчимасса бажчимасса бад̣̇адтаанам̣. ид̣̇аани яасмаа д̣̇аанам̣ сийлам̣ логияабхааванаа жа на гзвалам̣ яат̇аавуд̇д̇абарад̇огхосаад̣̇ийнам̣язва, ат̇а ко яат̇ааггамам̣ барияад̇д̇иб̣аахусажжагаммадтаанаануяог̇амаг̇г̇асаммаад̣̇идтийнамби бажжаяаа хонд̇и, д̇асмаа д̇амби наяам̣ д̣̇ассзд̇ум̣ буна ‘‘д̣̇аанамаяа’’нд̇иаад̣̇инаа д̣̇зсанам̣ вад̣дхзси. д̇ат̇аа бад̇ируубад̣̇зсаваасаад̣̇аяо гааяавивзгажид̇д̇авивзгаад̣̇ийнам̣ гааран̣ам̣ ход̇ийд̇и имам̣ наяам̣ д̣̇ассзд̇ум̣ ‘‘бад̇ируубад̣̇зсаваасо’’д̇иаад̣̇имааха. д̇ад̇т̇а гусалавиймам̣сааяаад̇и бадисан̇каанубассанааяа. агусалабарижжааг̇од̇и иминаа бахаанабарин̃н̃аа вуд̇д̇аад̇и. самаад̇хинд̣̇рияассаад̇и маг̇г̇асамаад̇хинд̣̇рияасса. сзсам̣ сувин̃н̃зяяамзва.
Sīlasampanno vippaṭisārābhāvena samāhito dhammacintāsamattho hotīti sīlaṃ cintāmayañāṇassa kāraṇanti āha ‘‘sīlamaya’’ntiādi. Bhāvanāmayanti samathasaṅkhātaṃ bhāvanāmayaṃ. Bhāvanāmayiyāti uparijhānasaṅkhātāya vipassanāsaṅkhātāya ca bhāvanāmayiyā. Purimaṃ purimañhi pacchimassa pacchimassa padaṭṭhānaṃ. Idāni yasmā dānaṃ sīlaṃ lokiyabhāvanā ca na kevalaṃ yathāvuttaparatoghosādīnaṃyeva, atha kho yathākkamaṃ pariyattibāhusaccakammaṭṭhānānuyogamaggasammādiṭṭhīnampi paccayā honti, tasmā tampi nayaṃ dassetuṃ puna ‘‘dānamaya’’ntiādinā desanaṃ vaḍḍhesi. Tathā patirūpadesavāsādayo kāyavivekacittavivekādīnaṃ kāraṇaṃ hotīti imaṃ nayaṃ dassetuṃ ‘‘patirūpadesavāso’’tiādimāha. Tattha kusalavīmaṃsāyāti paṭisaṅkhānupassanāya. Akusalapariccāgoti iminā pahānapariññā vuttāti. Samādhindriyassāti maggasamādhindriyassa. Sesaṃ suviññeyyameva.
вибхад̇д̇ихааравибхан̇г̇аван̣н̣анаа нидтид̇аа.
Vibhattihāravibhaṅgavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / нзд̇д̇иббагаран̣абаал̣и • Nettippakaraṇapāḷi / 8. вибхад̇д̇ихааравибхан̇г̇о • 8. Vibhattihāravibhaṅgo
дийгаа • Tīkā / суд̇д̇абидага (дийгаа) • Suttapiṭaka (ṭīkā) / куд̣̇д̣̇аганигааяа (дийгаа) • Khuddakanikāya (ṭīkā) / нзд̇д̇иббагаран̣а-дийгаа • Nettippakaraṇa-ṭīkā / 8. вибхад̇д̇ихааравибхан̇г̇аван̣н̣анаа • 8. Vibhattihāravibhaṅgavaṇṇanā
дийгаа • Tīkā / суд̇д̇абидага (дийгаа) • Suttapiṭaka (ṭīkā) / куд̣̇д̣̇аганигааяа (дийгаа) • Khuddakanikāya (ṭīkā) / нзд̇д̇ивибхаавиний • Nettivibhāvinī / 8. вибхад̇д̇ихааравибхан̇г̇авибхааванаа • 8. Vibhattihāravibhaṅgavibhāvanā
