| Library / Tipiṭaka / ਤਿਪਿਟਕ • Tipiṭaka / ਨੇਤ੍ਤਿਪ੍ਪਕਰਣ-ਅਟ੍ਠਕਥਾ • Nettippakaraṇa-aṭṭhakathā |
੮. વਿਭਤ੍ਤਿਹਾਰવਿਭਙ੍ਗવਣ੍ਣਨਾ
8. Vibhattihāravibhaṅgavaṇṇanā
੩੩. ਤਤ੍ਥ ਕਤਮੋ વਿਭਤ੍ਤਿਹਾਰੋਤਿ વਿਭਤ੍ਤਿਹਾਰવਿਭਙ੍ਗੋ। ਤਤ੍ਥ ਧਮ੍ਮવਿਭਤ੍ਤਿਭੂਮਿવਿਭਤ੍ਤਿਪਦਟ੍ਠਾਨવਿਭਤ੍ਤੀਤਿ ਤਿવਿਧਾ વਿਭਤ੍ਤਿ। ਤਾਸੁ ਯਸ੍ਮਾ ਧਮ੍ਮੇਸੁ વਿਭਾਗਤੋ ਨਿਦ੍ਦਿਟ੍ਠੇਸੁ ਤਤ੍ਥ ਲਬ੍ਭਮਾਨੋ ਭੂਮਿવਿਭਾਗੋ ਪਦਟ੍ਠਾਨવਿਭਾਗੋ ਚ ਨਿਦ੍ਦਿਸਿਯਮਾਨੋ ਸੁવਿਞ੍ਞੇਯ੍ਯੋ ਹੋਤਿ, ਤਸ੍ਮਾ ਧਮ੍ਮવਿਭਤ੍ਤਿਂ ਤਾવ ਨਿਦ੍ਦਿਸਨ੍ਤੋ ਸੋਲ਼ਸવਿਧੇ ਪਟ੍ਠਾਨੇ ਯੇਸਂ ਸੁਤ੍ਤਾਨਂ વਸੇਨ વਿਸੇਸਤੋ વਿਭਜਿਤਬ੍ਬਾ, ਤਾਨਿ ਸੁਤ੍ਤਾਨਿ ਦਸ੍ਸੇਤੁਂ ‘‘ਦ੍વੇ ਸੁਤ੍ਤਾਨਿ વਾਸਨਾਭਾਗਿਯਞ੍ਚ ਨਿਬ੍ਬੇਧਭਾਗਿਯਞ੍ਚਾ’’ਤਿ વੁਤ੍ਤਂ। ਤਤ੍ਥ વਾਸਨਾ ਪੁਞ੍ਞਭਾવਨਾ, ਤਸ੍ਸਾ ਭਾਗੋ ਕੋਟ੍ਠਾਸੋ વਾਸਨਾਭਾਗੋ, ਤਸ੍ਸ ਹਿਤਨ੍ਤਿ વਾਸਨਾਭਾਗਿਯਂ, ਸੁਤ੍ਤਂ। ਨਿਬ੍ਬਿਜ੍ਝਨਂ ਲੋਭਕ੍ਖਨ੍ਧਾਦੀਨਂ ਪਦਾਲਨਂ ਨਿਬ੍ਬੇਧੋ, ਤਸ੍ਸ ਭਾਗੋਤਿ ਸੇਸਂ ਪੁਰਿਮਸਦਿਸਮੇવ। ਯਸ੍ਮਿਂ ਸੁਤ੍ਤੇ ਤੀਣਿ ਪੁਞ੍ਞਕਿਰਿਯવਤ੍ਥੂਨਿ ਦੇਸਿਤਾਨਿ, ਤਂ ਸੁਤ੍ਤਂ વਾਸਨਾਭਾਗਿਯਂ। ਯਸ੍ਮਿਂ ਪਨ ਸੇਕ੍ਖਾਸੇਕ੍ਖਾ ਦੇਸਿਤਾ, ਤਂ ਨਿਬ੍ਬੇਧਭਾਗਿਯਂ। ਅਯਞ੍ਚ ਅਤ੍ਥੋ ਪਾਲ਼ਿਯਂਯੇવ ਆਗਮਿਸ੍ਸਤਿ।
33.Tatthakatamo vibhattihāroti vibhattihāravibhaṅgo. Tattha dhammavibhattibhūmivibhattipadaṭṭhānavibhattīti tividhā vibhatti. Tāsu yasmā dhammesu vibhāgato niddiṭṭhesu tattha labbhamāno bhūmivibhāgo padaṭṭhānavibhāgo ca niddisiyamāno suviññeyyo hoti, tasmā dhammavibhattiṃ tāva niddisanto soḷasavidhe paṭṭhāne yesaṃ suttānaṃ vasena visesato vibhajitabbā, tāni suttāni dassetuṃ ‘‘dve suttāni vāsanābhāgiyañca nibbedhabhāgiyañcā’’ti vuttaṃ. Tattha vāsanā puññabhāvanā, tassā bhāgo koṭṭhāso vāsanābhāgo, tassa hitanti vāsanābhāgiyaṃ, suttaṃ. Nibbijjhanaṃ lobhakkhandhādīnaṃ padālanaṃ nibbedho, tassa bhāgoti sesaṃ purimasadisameva. Yasmiṃ sutte tīṇi puññakiriyavatthūni desitāni, taṃ suttaṃ vāsanābhāgiyaṃ. Yasmiṃ pana sekkhāsekkhā desitā, taṃ nibbedhabhāgiyaṃ. Ayañca attho pāḷiyaṃyeva āgamissati.
ਪੁਞ੍ਞਭਾਗਿਯਾਤਿ ਪੁਞ੍ਞਭਾਗੇ ਭવਾ। ਤਥਾ ਫਲਭਾਗਿਯਾ વੇਦਿਤਬ੍ਬਾ। ਫਲਨ੍ਤਿ ਪਨ ਸਾਮਞ੍ਞਫਲਂ। ਸਂવਰਸੀਲਨ੍ਤਿ ਪਾਤਿਮੋਕ੍ਖਸਂવਰੋ, ਸਤਿਸਂવਰੋ, ਞਾਣਸਂવਰੋ, ਖਨ੍ਤਿਸਂવਰੋ, વੀਰਿਯਸਂવਰੋਤਿ ਪਞ੍ਚ ਸਂવਰਾ ਸਂવਰਸੀਲਂ। ਪਹਾਨਸੀਲਨ੍ਤਿ ਤਦਙ੍ਗਪ੍ਪਹਾਨਂ, વਿਕ੍ਖਮ੍ਭਨਪ੍ਪਹਾਨਂ, ਸਮੁਚ੍ਛੇਦਪ੍ਪਹਾਨਂ, ਪਟਿਪ੍ਪਸ੍ਸਦ੍ਧਿਪ੍ਪਹਾਨਂ, ਨਿਸ੍ਸਰਣਪ੍ਪਹਾਨਨ੍ਤਿ ਪਞ੍ਚਪ੍ਪਹਾਨਾਨਿ। ਤੇਸੁ ਨਿਸ੍ਸਰਣਪ੍ਪਹਾਨવਜ੍ਜਾਨਂ ਪਹਾਨਾਨਂ વਸੇਨ ਪਹਾਨਸੀਲਂ વੇਦਿਤਬ੍ਬਂ। ਸੋਤਿ ਯੋ વਾਸਨਾਭਾਗਿਯਸੁਤ੍ਤਸਮ੍ਪਟਿਗ੍ਗਾਹਕੋ, ਸੋ। ਤੇਨ ਬ੍ਰਹ੍ਮਚਰਿਯੇਨਾਤਿ ਤੇਨ ਸਂવਰਸੀਲਸਙ੍ਖਾਤੇਨ ਸੇਟ੍ਠਚਰਿਯੇਨ ਕਾਰਣਭੂਤੇਨ ਬ੍ਰਹ੍ਮਚਾਰੀ ਭવਤਿ। ਏਤ੍ਥ ਚ ਅਟ੍ਠਸਮਾਪਤ੍ਤਿਬ੍ਰਹ੍ਮਚਰਿਯਸ੍ਸ ਨ ਪਟਿਕ੍ਖੇਪੋ, ਕੇਚਿ ਪਨ ‘‘ਤੇਨੇવ ਬ੍ਰਹ੍ਮਚਰਿਯੇਨਾ’’ਤਿ ਪਠਨ੍ਤਿ, ਤੇਸਂ ਮਤੇਨ ਸਿਯਾ ਤਸ੍ਸ ਪਟਿਕ੍ਖੇਪੋ।
Puññabhāgiyāti puññabhāge bhavā. Tathā phalabhāgiyā veditabbā. Phalanti pana sāmaññaphalaṃ. Saṃvarasīlanti pātimokkhasaṃvaro, satisaṃvaro, ñāṇasaṃvaro, khantisaṃvaro, vīriyasaṃvaroti pañca saṃvarā saṃvarasīlaṃ. Pahānasīlanti tadaṅgappahānaṃ, vikkhambhanappahānaṃ, samucchedappahānaṃ, paṭippassaddhippahānaṃ, nissaraṇappahānanti pañcappahānāni. Tesu nissaraṇappahānavajjānaṃ pahānānaṃ vasena pahānasīlaṃ veditabbaṃ. Soti yo vāsanābhāgiyasuttasampaṭiggāhako, so. Tena brahmacariyenāti tena saṃvarasīlasaṅkhātena seṭṭhacariyena kāraṇabhūtena brahmacārī bhavati. Ettha ca aṭṭhasamāpattibrahmacariyassa na paṭikkhepo, keci pana ‘‘teneva brahmacariyenā’’ti paṭhanti, tesaṃ matena siyā tassa paṭikkhepo.
ਪਹਾਨਸੀਲੇ ਠਿਤੋਤਿ ਸਮੁਚ੍ਛੇਦਪਟਿਪ੍ਪਸ੍ਸਦ੍ਧਿਪ੍ਪਹਾਨਾਨਂ વਸੇਨ ਪਹਾਨਸੀਲੇ ਠਿਤੋ। ਤੇਨ ਬ੍ਰਹ੍ਮਚਰਿਯੇਨਾਤਿ ਤੇਨ ਪਹਾਨਸੀਲੇਨ વਿਸੇਸਭੂਤੇਨ ਮਗ੍ਗਬ੍ਰਹ੍ਮਚਰਿਯੇਨ। ਯੇ ਪਨ ‘‘ਤੇਨੇવ ਬ੍ਰਹ੍ਮਚਰਿਯੇਨਾ’’ਤਿ ਪਠਨ੍ਤਿ, ਤੇਸਂ ਅਯਂ ਪਾਠੋ ‘‘વਾਸਨਾਭਾਗਿਯਂ ਨਾਮ ਸੁਤ੍ਤਂ ਦਾਨਕਥਾ, ਸੀਲਕਥਾ, ਸਗ੍ਗਕਥਾ, ਪੁਞ੍ਞવਿਪਾਕਕਥਾ’’ਤਿ। ਯੇ ਪਨ ‘‘ਤੇਨ ਬ੍ਰਹ੍ਮਚਰਿਯੇਨਾ’’ਤਿ ਪਠਨ੍ਤਿ, ਤੇਸਂ ਅਯਂ ਪਾਠੋ – ‘‘વਾਸਨਾਭਾਗਿਯਂ ਨਾਮ ਸੁਤ੍ਤਂ ਦਾਨਕਥਾ, ਸੀਲਕਥਾ, ਸਗ੍ਗਕਥਾ ਕਾਮਾਨਂ ਆਦੀਨવੋ ਨੇਕ੍ਖਮ੍ਮੇ ਆਨਿਸਂਸੋ’’ਤਿ। ਤਤ੍ਥ ਕਤਮੋ ਪਾਠੋ ਯੁਤ੍ਤਤਰੋਤਿ? ਪਚ੍ਛਿਮੋ ਪਾਠੋਤਿ ਨਿਟ੍ਠਂ ਗਨ੍ਤਬ੍ਬਂ। ਯਸ੍ਮਾ ‘‘ਨਿਬ੍ਬੇਧਭਾਗਿਯਂ ਨਾਮ ਸੁਤ੍ਤਂ ਯਾ ਚਤੁਸਚ੍ਚਪ੍ਪਕਾਸਨਾ’’ਤਿ વਕ੍ਖਤਿ, ਨ ਹਿ ਮਹਾਥੇਰੋ ਸਾવਸੇਸਂ ਕਤ੍વਾ ਧਮ੍ਮਂ ਦੇਸੇਸੀਤਿ।
Pahānasīle ṭhitoti samucchedapaṭippassaddhippahānānaṃ vasena pahānasīle ṭhito. Tena brahmacariyenāti tena pahānasīlena visesabhūtena maggabrahmacariyena. Ye pana ‘‘teneva brahmacariyenā’’ti paṭhanti, tesaṃ ayaṃ pāṭho ‘‘vāsanābhāgiyaṃ nāma suttaṃ dānakathā, sīlakathā, saggakathā, puññavipākakathā’’ti. Ye pana ‘‘tena brahmacariyenā’’ti paṭhanti, tesaṃ ayaṃ pāṭho – ‘‘vāsanābhāgiyaṃ nāma suttaṃ dānakathā, sīlakathā, saggakathā kāmānaṃ ādīnavo nekkhamme ānisaṃso’’ti. Tattha katamo pāṭho yuttataroti? Pacchimo pāṭhoti niṭṭhaṃ gantabbaṃ. Yasmā ‘‘nibbedhabhāgiyaṃ nāma suttaṃ yā catusaccappakāsanā’’ti vakkhati, na hi mahāthero sāvasesaṃ katvā dhammaṃ desesīti.
‘‘ਨਤ੍ਥਿ ਪਜਾਨਨਾ’’ਤਿਆਦਿਨਾ ਉਭਿਨ੍ਨਂ ਸੁਤ੍ਤਾਨਂ ਸਾਤਿਸਯਂ ਅਸਙ੍ਕਰਕਾਰਣਂ ਦਸ੍ਸੇਤਿ। ਤਤ੍ਥ ਪਜਾਨਨਾਤਿ ਅਰਿਯਮਗ੍ਗਸ੍ਸ ਪਦਟ੍ਠਾਨਭੂਤਾ વੁਟ੍ਠਾਨਗਾਮਿਨੀ વਿਪਸ੍ਸਨਾਪਞ੍ਞਾ। ਇਮਾਨਿ ਚਤ੍ਤਾਰਿ ਸੁਤ੍ਤਾਨੀਤਿ ਇਮੇਸਂ ਸੁਤ੍ਤਾਨਂ વਾਸਨਾਭਾਗਿਯਨਿਬ੍ਬੇਧਭਾਗਿਯਾਨਂ વਕ੍ਖਮਾਨਾਨਞ੍ਚ ਸਂਕਿਲੇਸਭਾਗਿਯਅਸੇਕ੍ਖਭਾਗਿਯਾਨਂ વਸੇਨ ਚਤ੍ਤਾਰਿ ਸੁਤ੍ਤਾਨਿ। ਦੇਸਨਾਯਾਤਿ ਦੇਸਨਾਨਯੇਨ। ਸਬ੍ਬਤੋ વਿਚਯੇਨ ਹਾਰੇਨ વਿਚਿਨਿਤ੍વਾਤਿ ਸਬ੍ਬਤੋਭਾਗੇਨ ਏਕਾਦਸਸੁ ਠਾਨੇਸੁ ਪਕ੍ਖਿਪਿਤ੍વਾ વਿਚਯੇਨ ਹਾਰੇਨ વਿਚਿਨਿਤ੍વਾ। ‘‘ਯੁਤ੍ਤਿਹਾਰੇਨ ਯੋਜੇਤਬ੍ਬਾਨੀ’’ਤਿ ਏਤੇਨ વਿਚਯਹਾਰਯੁਤ੍ਤਿਹਾਰਾ વਿਭਤ੍ਤਿਹਾਰਸ੍ਸ ਪਰਿਕਮ੍ਮਟ੍ਠਾਨਨ੍ਤਿ ਦਸ੍ਸੇਤਿ। ‘‘ਯਾવਤਿਕਾ ਞਾਣਸ੍ਸ ਭੂਮੀ’’ਤਿ ਇਮਿਨਾ વਿਭਤ੍ਤਿਹਾਰਸ੍ਸ ਮਹਾવਿਸਯਤਂ ਦਸ੍ਸੇਤਿ।
‘‘Natthi pajānanā’’tiādinā ubhinnaṃ suttānaṃ sātisayaṃ asaṅkarakāraṇaṃ dasseti. Tattha pajānanāti ariyamaggassa padaṭṭhānabhūtā vuṭṭhānagāminī vipassanāpaññā. Imāni cattāri suttānīti imesaṃ suttānaṃ vāsanābhāgiyanibbedhabhāgiyānaṃ vakkhamānānañca saṃkilesabhāgiyaasekkhabhāgiyānaṃ vasena cattāri suttāni. Desanāyāti desanānayena. Sabbato vicayena hārena vicinitvāti sabbatobhāgena ekādasasu ṭhānesu pakkhipitvā vicayena hārena vicinitvā. ‘‘Yuttihārena yojetabbānī’’ti etena vicayahārayuttihārā vibhattihārassa parikammaṭṭhānanti dasseti. ‘‘Yāvatikā ñāṇassa bhūmī’’ti iminā vibhattihārassa mahāvisayataṃ dasseti.
੩੪. ਏવਂ વਾਸਨਾਭਾਗਿਯਨਿਬ੍ਬੇਧਭਾਗਿਯਭਾવੇਹਿ ਧਮ੍ਮੇ ਏਕਦੇਸੇਨ વਿਭਜਿਤ੍વਾ ਇਦਾਨਿ ਤੇਸਂ ਕਿਲੇਸਭਾਗਿਯਅਸੇਕ੍ਖਭਾਗਿਯਭਾવੇਹਿ ਸਾਧਾਰਣਾਸਾਧਾਰਣਭਾવੇਹਿ વਿਭਜਿਤੁਂ ‘‘ਤਤ੍ਥ ਕਤਮੇ ਧਮ੍ਮਾ ਸਾਧਾਰਣਾ’’ਤਿਆਦਿ ਆਰਦ੍ਧਂ। ਤਤ੍ਥ ਕਤਮੇ ਧਮ੍ਮਾਤਿ ਕਤਮੇ ਸਭਾવਧਮ੍ਮਾ। ਸਾਧਾਰਣਾਤਿ ਅવਿਸਿਟ੍ਠਾ, ਸਮਾਨਾਤਿ ਅਤ੍ਥੋ। ਦ੍વੇ ਧਮ੍ਮਾਤਿ ਦੁવੇ ਪਕਤਿਯੋ। ਪਕਤਿਅਤ੍ਥੋ ਹਿ ਅਯਂ ਧਮ੍ਮ-ਸਦ੍ਦੋ ‘‘ਜਾਤਿਧਮ੍ਮਾਨਂ ਸਤ੍ਤਾਨ’’ਨ੍ਤਿਆਦੀਸੁ (ਪਟਿ॰ ਮ॰ ੧.੩੩) વਿਯ। ਨਾਮਸਾਧਾਰਣਾਤਿ ਨਾਮੇਨ ਸਾਧਾਰਣਾ, ਕੁਸਲਾਕੁਸਲਾਤਿ ਸਮਾਨਨਾਮਾਤਿ ਅਤ੍ਥੋ। વਤ੍ਥੁਸਾਧਾਰਣਾਤਿ વਤ੍ਥੁਨਾ ਨਿਸ੍ਸਯੇਨ ਸਾਧਾਰਣਾ, ਏਕਸਨ੍ਤਤਿਪਤਿਤਤਾਯ ਸਮਾਨવਤ੍ਥੁਕਾਤਿ ਅਤ੍ਥੋ। વਿਸੇਸਤੋ ਸਂਕਿਲੇਸਪਕ੍ਖੇ ਪਹਾਨੇਕਟ੍ਠਾ ਨਾਮਸਾਧਾਰਣਾ, ਸਹਜੇਕਟ੍ਠਾ વਤ੍ਥੁਸਾਧਾਰਣਾ। ਅਞ੍ਞਮ੍ਪਿ ਏવਂ ਜਾਤਿਯਨ੍ਤਿ ਕਿਚ੍ਚਪਚ੍ਚਯਪਟਿਪਕ੍ਖਾਦੀਹਿ ਸਮਾਨਂ ਸਙ੍ਗਣ੍ਹਾਤਿ। ਮਿਚ੍ਛਤ੍ਤਨਿਯਤਾਨਂ ਅਨਿਯਤਾਨਨ੍ਤਿ ਇਦਂ ਪੁਥੁਜ੍ਜਨਾਨਂ ਉਪਲਕ੍ਖਣਂ। ਤਸ੍ਮਾ ਸਸ੍ਸਤવਾਦਾ ਉਚ੍ਛੇਦવਾਦਾਤਿ ਆਦਿਕੋ ਸਬ੍ਬੋ ਪੁਥੁਜ੍ਜਨਭੇਦੋ ਆਹਰਿਤ੍વਾ વਤ੍ਤਬ੍ਬੋ। ਦਸਨਪ੍ਪਹਾਤਬ੍ਬਾ ਕਿਲੇਸਾ ਸਾਧਾਰਣਾ ਮਿਚ੍ਛਤ੍ਤਨਿਯਤਾਨਂ ਅਨਿਯਤਾਨਂ ਏવ ਚ ਸਮ੍ਭવਤੋ ਸਮ੍ਮਤ੍ਤਨਿਯਤਾਨਂ ਅਸਮ੍ਭવਤੋ ਚ। ਇਮਿਨਾ ਨਯੇਨ ਸੇਸਪਦੇਸੁਪਿ ਅਤ੍ਥੋ વੇਦਿਤਬ੍ਬੋ।
34. Evaṃ vāsanābhāgiyanibbedhabhāgiyabhāvehi dhamme ekadesena vibhajitvā idāni tesaṃ kilesabhāgiyaasekkhabhāgiyabhāvehi sādhāraṇāsādhāraṇabhāvehi vibhajituṃ ‘‘tattha katame dhammā sādhāraṇā’’tiādi āraddhaṃ. Tattha katame dhammāti katame sabhāvadhammā. Sādhāraṇāti avisiṭṭhā, samānāti attho. Dve dhammāti duve pakatiyo. Pakatiattho hi ayaṃ dhamma-saddo ‘‘jātidhammānaṃ sattāna’’ntiādīsu (paṭi. ma. 1.33) viya. Nāmasādhāraṇāti nāmena sādhāraṇā, kusalākusalāti samānanāmāti attho. Vatthusādhāraṇāti vatthunā nissayena sādhāraṇā, ekasantatipatitatāya samānavatthukāti attho. Visesato saṃkilesapakkhe pahānekaṭṭhā nāmasādhāraṇā, sahajekaṭṭhā vatthusādhāraṇā. Aññampi evaṃ jātiyanti kiccapaccayapaṭipakkhādīhi samānaṃ saṅgaṇhāti. Micchattaniyatānaṃ aniyatānanti idaṃ puthujjanānaṃ upalakkhaṇaṃ. Tasmā sassatavādā ucchedavādāti ādiko sabbo puthujjanabhedo āharitvā vattabbo. Dasanappahātabbā kilesā sādhāraṇā micchattaniyatānaṃ aniyatānaṃ eva ca sambhavato sammattaniyatānaṃ asambhavato ca. Iminā nayena sesapadesupi attho veditabbo.
ਅਰਿਯਸਾવਕੋਤਿ ਸੇਕ੍ਖਂ ਸਨ੍ਧਾਯ વਦਤਿ। ਸਬ੍ਬਾ ਸਾ ਅવੀਤਰਾਗੇਹਿ ਸਾਧਾਰਣਾਤਿ ਲੋਕਿਯਸਮਾਪਤ੍ਤਿ ਰੂਪਾવਚਰਾ ਅਰੂਪਾવਚਰਾ ਦਿਬ੍ਬવਿਹਾਰੋ ਬ੍ਰਹ੍ਮવਿਹਾਰੋ ਪਠਮਜ੍ਝਾਨਸਮਾਪਤ੍ਤੀਤਿ ਏવਮਾਦੀਹਿ ਪਰਿਯਾਯੇਹਿ ਸਾਧਾਰਣਾ। ਕੁਸਲਸਮਾਪਤ੍ਤਿ ਪਨ ਇਮਿਨਾ ਪਰਿਯਾਯੇਨ ਸਿਯਾ ਅਸਾਧਾਰਣਾ , ਇਮਂ ਪਨ ਦੋਸਂ ਪਸ੍ਸਨ੍ਤਾ ਕੇਚਿ ‘‘ਯਂ ਕਿਞ੍ਚਿ…ਪੇ॰… ਸਬ੍ਬਾ ਸਾ ਅવੀਤਰਾਗੇਹਿ ਸਾਧਾਰਣਾ’’ਤਿ ਪਠਨ੍ਤਿ। ਕਥਂ ਤੇ ਓਧਿਸੋ ਗਹਿਤਾ, ਅਥ ਓਧਿਸੋ ਗਹੇਤਬ੍ਬਾ, ਕਥਂ ਸਾਧਾਰਣਾਤਿ? ਅਨੁਯੋਗਂ ਮਨਸਿਕਤ੍વਾ ਤਂ વਿਸੋਧੇਨ੍ਤੋ ਆਹ – ‘‘ਸਾਧਾਰਣਾ ਹਿ ਧਮ੍ਮਾ ਏવਂ ਅਞ੍ਞਮਞ੍ਞ’’ਨ੍ਤਿਆਦਿ। ਤਸ੍ਸਤ੍ਥੋ – ਯਥਾ ਮਿਚ੍ਛਤ੍ਤਨਿਯਤਾਨਂ ਅਨਿਯਤਾਨਞ੍ਚ ਸਾਧਾਰਣਾਤਿ વੁਤ੍ਤਂ, ਏવਂ ਸਾਧਾਰਣਾ ਧਮ੍ਮਾ ਨ ਸਬ੍ਬਸਤ੍ਤਾਨਂ ਸਾਧਾਰਣਤਾਯ ਸਾਧਾਰਣਾ, ਕਸ੍ਮਾ? ਯਸ੍ਮਾ ਅਞ੍ਞਮਞ੍ਞਂ ਪਰਂ ਪਰਂ ਸਕਂ ਸਕਂ વਿਸਯਂ ਨਾਤਿવਤ੍ਤਨ੍ਤਿ। ਪਟਿਨਿਯਤਞ੍ਹਿ ਤੇਸਂ ਪવਤ੍ਤਿਟ੍ਠਾਨਂ, ਇਤਰਥਾ ਤਥਾ વੋਹਾਰੋ ਏવ ਨ ਸਿਯਾਤਿ ਅਧਿਪ੍ਪਾਯੋ। ਯਸ੍ਮਾ ਚ ਏਤੇ ਏવ ਧਮ੍ਮਾ ਏવਂ ਨਿਯਤਾ વਿਸਯਾ, ਤਸ੍ਮਾ ‘‘ਯੋਪਿ ਇਮੇਹਿ ਧਮ੍ਮੇਹਿ ਸਮਨ੍ਨਾਗਤੋ ਨ ਸੋ ਤਂ ਧਮ੍ਮਂ ਉਪਾਤਿવਤ੍ਤਤੀ’’ਤਿ ਆਹ। ਨ ਹਿ ਮਿਚ੍ਛਤ੍ਤਨਿਯਤਾਨਂ ਅਨਿਯਤਾਨਞ੍ਚ ਦਸ੍ਸਨੇਨ ਪਹਾਤਬ੍ਬਾ ਕਿਲੇਸਾ ਨ ਸਨ੍ਤਿ, ਅਞ੍ਞੇਸਂ વਾ ਸਨ੍ਤੀਤਿ ਏવਂ ਸੇਸੇਪਿ વਤ੍ਤਬ੍ਬਂ।
Ariyasāvakoti sekkhaṃ sandhāya vadati. Sabbā sā avītarāgehi sādhāraṇāti lokiyasamāpatti rūpāvacarā arūpāvacarā dibbavihāro brahmavihāro paṭhamajjhānasamāpattīti evamādīhi pariyāyehi sādhāraṇā. Kusalasamāpatti pana iminā pariyāyena siyā asādhāraṇā , imaṃ pana dosaṃ passantā keci ‘‘yaṃ kiñci…pe… sabbā sā avītarāgehi sādhāraṇā’’ti paṭhanti. Kathaṃ te odhiso gahitā, atha odhiso gahetabbā, kathaṃ sādhāraṇāti? Anuyogaṃ manasikatvā taṃ visodhento āha – ‘‘sādhāraṇā hi dhammā evaṃ aññamañña’’ntiādi. Tassattho – yathā micchattaniyatānaṃ aniyatānañca sādhāraṇāti vuttaṃ, evaṃ sādhāraṇā dhammā na sabbasattānaṃ sādhāraṇatāya sādhāraṇā, kasmā? Yasmā aññamaññaṃ paraṃ paraṃ sakaṃ sakaṃ visayaṃ nātivattanti. Paṭiniyatañhi tesaṃ pavattiṭṭhānaṃ, itarathā tathā vohāro eva na siyāti adhippāyo. Yasmā ca ete eva dhammā evaṃ niyatā visayā, tasmā ‘‘yopi imehi dhammehi samannāgato na so taṃ dhammaṃ upātivattatī’’ti āha. Na hi micchattaniyatānaṃ aniyatānañca dassanena pahātabbā kilesā na santi, aññesaṃ vā santīti evaṃ sesepi vattabbaṃ.
ਅਸਾਧਾਰਣੋ ਨਾਮ ਧਮ੍ਮੋ ਤਸ੍ਸ ਤਸ੍ਸ ਪੁਗ੍ਗਲਸ੍ਸ ਪਚ੍ਚਤ੍ਤਨਿਯਤੋ ਅਰਿਯੇਸੁ ਸੇਕ੍ਖਾਸੇਕ੍ਖਧਮ੍ਮવਸੇਨ ਅਨਰਿਯੇਸੁ ਸਬ੍ਬਾਭਬ੍ਬਪਹਾਤਬ੍ਬવਸੇਨ ਗવੇਸਿਤਬ੍ਬੋ, ਇਤਰਸ੍ਸ ਤਥਾ ਨਿਦ੍ਦਿਸਿਤਬ੍ਬਭਾવਾਭਾવਤੋ। ਸੋ ਚ ਖੋ ਸਾਧਾਰਣਾવਿਧੁਰਤਾਯ ਤਂ ਤਂ ਉਪਾਦਾਯ ਤਥਾવੁਤ੍ਤਦੇਸਨਾਨੁਸਾਰੇਨਾਤਿ ਇਮਮਤ੍ਥਂ ਦਸ੍ਸੇਤਿ ‘‘ਕਤਮੇ ਧਮ੍ਮਾ ਅਸਾਧਾਰਣਾ ਯਾવ ਦੇਸਨਂ ਉਪਾਦਾਯ ਗવੇਸਿਤਬ੍ਬਾ ਸੇਕ੍ਖਾਸੇਕ੍ਖਾ ਭਬ੍ਬਾਭਬ੍ਬਾ’’ਤਿ ਇਮਿਨਾ। ਅਟ੍ਠਮਕਸ੍ਸਾਤਿ ਸੋਤਾਪਤ੍ਤਿਫਲਸਚ੍ਛਿਕਿਰਿਯਾਯ ਪਟਿਪਨ੍ਨਸ੍ਸ। ਧਮ੍ਮਤਾਤਿ ਧਮ੍ਮਸਭਾવੋ ਪਠਮਸ੍ਸ ਮਗ੍ਗਟ੍ਠਤਾ ਦੁਤਿਯਸ੍ਸ ਫਲਟ੍ਠਤਾ। ਪਠਮਸ੍ਸ વਾ ਪਹੀਯਮਾਨਕਿਲੇਸਤਾ। ਦੁਤਿਯਸ੍ਸ ਪਹੀਨਕਿਲੇਸਤਾ। ਪੁਨ ਅਟ੍ਠਮਕਸ੍ਸਾਤਿ ਅਨਾਗਾਮਿਮਗ੍ਗਟ੍ਠਸ੍ਸ। ਨਾਮਨ੍ਤਿ ਸੇਕ੍ਖਾਤਿ ਨਾਮਂ। ਧਮ੍ਮਤਾਤਿ ਤਂਤਂਮਗ੍ਗਟ੍ਠਤਾ ਹੇਟ੍ਠਿਮਫਲਟ੍ਠਤਾ ਚ। ਪਟਿਪਨ੍ਨਕਾਨਨ੍ਤਿ ਮਗ੍ਗਸਮਙ੍ਗੀਨਂ। ਨਾਮਨ੍ਤਿ ਪਟਿਪਨ੍ਨਕਾਤਿ ਨਾਮਂ। ਏવਂ ‘‘ਅਟ੍ਠਮਕਸ੍ਸਾ’’ਤਿਆਦਿਨਾ ਅਰਿਯਪੁਗ੍ਗਲੇਸੁ ਅਸਾਧਾਰਣਧਮ੍ਮਂ ਦਸ੍ਸੇਤ੍વਾ ਇਤਰੇਸੁ ਨਯਦਸ੍ਸਨਤ੍ਥਂ ‘‘ਏવਂ વਿਸੇਸਾਨੁਪਸ੍ਸਿਨਾ’’ਤਿਆਦਿ વੁਤ੍ਤਂ। ਲੋਕਿਯਧਮ੍ਮੇਸੁ ਏવ ਹਿ ਹੀਨਾਦਿਭਾવੋ। ਤਤ੍ਥ વਿਸੇਸਾਨੁਪਸ੍ਸਿਨਾਤਿ ਅਸਾਧਾਰਣਧਮ੍ਮਾਨੁਪਸ੍ਸਿਨਾ। ਮਿਚ੍ਛਤ੍ਤਨਿਯਤਾਨਂ ਅਨਿਯਤਾ ਧਮ੍ਮਾ ਸਾਧਾਰਣਾ ਮਿਚ੍ਛਤ੍ਤਨਿਯਤਾ ਧਮ੍ਮਾ ਅਸਾਧਾਰਣਾ। ਮਿਚ੍ਛਤ੍ਤਨਿਯਤੇਸੁਪਿ ਨਿਯਤਮਿਚ੍ਛਾਦਿਟ੍ਠਿਕਾਨਂ ਅਨਿਯਤਾ ਧਮ੍ਮਾ ਸਾਧਾਰਣਾ। ਨਿਯਤਮਿਚ੍ਛਾਦਿਟ੍ਠਿ ਅਸਾਧਾਰਣਾਤਿ ਇਮਿਨਾ ਨਯੇਨ વਿਸੇਸਾਨੁਪਸ੍ਸਿਨਾ વੇਦਿਤਬ੍ਬਾ।
Asādhāraṇo nāma dhammo tassa tassa puggalassa paccattaniyato ariyesu sekkhāsekkhadhammavasena anariyesu sabbābhabbapahātabbavasena gavesitabbo, itarassa tathā niddisitabbabhāvābhāvato. So ca kho sādhāraṇāvidhuratāya taṃ taṃ upādāya tathāvuttadesanānusārenāti imamatthaṃ dasseti ‘‘katame dhammā asādhāraṇā yāva desanaṃ upādāya gavesitabbā sekkhāsekkhā bhabbābhabbā’’ti iminā. Aṭṭhamakassāti sotāpattiphalasacchikiriyāya paṭipannassa. Dhammatāti dhammasabhāvo paṭhamassa maggaṭṭhatā dutiyassa phalaṭṭhatā. Paṭhamassa vā pahīyamānakilesatā. Dutiyassa pahīnakilesatā. Puna aṭṭhamakassāti anāgāmimaggaṭṭhassa. Nāmanti sekkhāti nāmaṃ. Dhammatāti taṃtaṃmaggaṭṭhatā heṭṭhimaphalaṭṭhatā ca. Paṭipannakānanti maggasamaṅgīnaṃ. Nāmanti paṭipannakāti nāmaṃ. Evaṃ ‘‘aṭṭhamakassā’’tiādinā ariyapuggalesu asādhāraṇadhammaṃ dassetvā itaresu nayadassanatthaṃ ‘‘evaṃ visesānupassinā’’tiādi vuttaṃ. Lokiyadhammesu eva hi hīnādibhāvo. Tattha visesānupassināti asādhāraṇadhammānupassinā. Micchattaniyatānaṃ aniyatā dhammā sādhāraṇā micchattaniyatā dhammā asādhāraṇā. Micchattaniyatesupi niyatamicchādiṭṭhikānaṃ aniyatā dhammā sādhāraṇā. Niyatamicchādiṭṭhi asādhāraṇāti iminā nayena visesānupassinā veditabbā.
ਏવਂ ਨਾਨਾਨਯੇਹਿ ਧਮ੍ਮવਿਭਤ੍ਤਿਂ ਦਸ੍ਸੇਤ੍વਾ ਇਦਾਨਿ ਭੂਮਿવਿਭਤ੍ਤਿਂ ਪਦਟ੍ਠਾਨવਿਭਤ੍ਤਿਞ੍ਚ વਿਭਜਿਤ੍વਾ ਦਸ੍ਸੇਤੁਂ ‘‘ਦਸ੍ਸਨਭੂਮੀ’’ਤਿਆਦਿਮਾਹ। ਤਤ੍ਥ ਦਸ੍ਸਨਭੂਮੀਤਿ ਪਠਮਮਗ੍ਗੋ। ਯਸ੍ਮਾ ਪਨ ਪਠਮਮਗ੍ਗਕ੍ਖਣੇ ਅਰਿਯਸਾવਕੋ ਸਮ੍ਮਤ੍ਤਨਿਯਾਮਂ ਓਕ੍ਕਮਨ੍ਤੋ ਨਾਮ ਹੋਤਿ, ਤਤੋ ਪਰਂ ਓਕ੍ਕਨ੍ਤੋ , ਤਸ੍ਮਾ ‘‘ਦਸ੍ਸਨਭੂਮਿ ਨਿਯਾਮਾવਕ੍ਕਨ੍ਤਿਯਾ ਪਦਟ੍ਠਾਨ’’ਨ੍ਤਿ વੁਤ੍ਤਂ। ਕਿਞ੍ਚਾਪਿ ਹੇਟ੍ਠਿਮੋ ਹੇਟ੍ਠਿਮੋ ਮਗ੍ਗੋ ਉਪਰਿਉਪਰਿਮਗ੍ਗਾਧਿਗਮਸ੍ਸ ਕਾਰਣਂ ਹੋਤਿ, ਸਕ੍ਕਾਯਦਿਟ੍ਠਿਆਦੀਨਿ ਅਪ੍ਪਹਾਯ ਕਾਮਰਾਗਬ੍ਯਾਪਾਦਾਦਿਪ੍ਪਹਾਨਸ੍ਸ ਅਸਕ੍ਕੁਣੇਯ੍ਯਤ੍ਤਾ। ਤਥਾਪਿ ਅਰਿਯਮਗ੍ਗੋ ਅਤ੍ਤਨੋ ਫਲਸ੍ਸ વਿਸੇਸਕਾਰਣਂ ਆਸਨ੍ਨਕਾਰਣਞ੍ਚਾਤਿ ਦਸ੍ਸੇਤੁਂ ‘‘ਭਾવਨਾਭੂਮਿ ਉਤ੍ਤਰਿਕਾਨਂ ਫਲਾਨਂ ਪਤ੍ਤਿਯਾ ਪਦਟ੍ਠਾਨ’’ਨ੍ਤਿ વੁਤ੍ਤਂ। ਸੁਖਾ ਪਟਿਪਦਾ ਖਿਪ੍ਪਾਭਿਞ੍ਞਾ ਞਾਣੁਤ੍ਤਰਸ੍ਸ ਤਥਾવਿਧਪਚ੍ਚਯਸਮਾਯੋਗੇ ਚ ਹੋਤੀਤਿ ਸਾ વਿਪਸ੍ਸਨਾਯ ਪਦਟ੍ਠਾਨਨ੍ਤਿ વੁਤ੍ਤਾ। ਇਤਰਾ ਪਨ ਤਿਸ੍ਸੋਪਿ ਪਟਿਪਦਾ ਸਮਥਂ ਆવਹਨ੍ਤਿ ਏવ। ਤਾਸੁ ਸਬ੍ਬਮੁਦੁਤਾਯ ਦਸ੍ਸਿਤਾਯ ਸੇਸਾਪਿ ਦਸ੍ਸਿਤਾ ਏવਾਤਿ ਆਹ – ‘‘ਦੁਕ੍ਖਾ ਪਟਿਪਦਾ ਦਨ੍ਧਾਭਿਞ੍ਞਾ ਸਮਥਸ੍ਸ ਪਦਟ੍ਠਾਨ’’ਨ੍ਤਿ।
Evaṃ nānānayehi dhammavibhattiṃ dassetvā idāni bhūmivibhattiṃ padaṭṭhānavibhattiñca vibhajitvā dassetuṃ ‘‘dassanabhūmī’’tiādimāha. Tattha dassanabhūmīti paṭhamamaggo. Yasmā pana paṭhamamaggakkhaṇe ariyasāvako sammattaniyāmaṃ okkamanto nāma hoti, tato paraṃ okkanto , tasmā ‘‘dassanabhūmi niyāmāvakkantiyā padaṭṭhāna’’nti vuttaṃ. Kiñcāpi heṭṭhimo heṭṭhimo maggo upariuparimaggādhigamassa kāraṇaṃ hoti, sakkāyadiṭṭhiādīni appahāya kāmarāgabyāpādādippahānassa asakkuṇeyyattā. Tathāpi ariyamaggo attano phalassa visesakāraṇaṃ āsannakāraṇañcāti dassetuṃ ‘‘bhāvanābhūmiuttarikānaṃ phalānaṃ pattiyā padaṭṭhāna’’nti vuttaṃ. Sukhā paṭipadā khippābhiññā ñāṇuttarassa tathāvidhapaccayasamāyoge ca hotīti sā vipassanāya padaṭṭhānanti vuttā. Itarā pana tissopi paṭipadā samathaṃ āvahanti eva. Tāsu sabbamudutāya dassitāya sesāpi dassitā evāti āha – ‘‘dukkhā paṭipadā dandhābhiññā samathassa padaṭṭhāna’’nti.
ਦਾਨਮਯਂ ਪੁਞ੍ਞਕਿਰਿਯવਤ੍ਥੂਤਿ ਦਾਨਮੇવ ਦਾਨਮਯਂ, ਪੁਜ੍ਜਫਲਨਿਬ੍ਬਤ੍ਤਨਟ੍ਠੇਨ ਪੁਞ੍ਞਂ, ਤਦੇવ ਕਤ੍ਤਬ੍ਬਤੋ ਕਿਰਿਯਾ, ਪਯੋਗਸਮ੍ਪਤ੍ਤਿਯਾਦੀਨਂ ਅਧਿਟ੍ਠਾਨਭਾવਤੋ વਤ੍ਥੁ ਚਾਤਿ ਦਾਨਮਯਪੁਞ੍ਞਕਿਰਿਯવਤ੍ਥੁ। ਪਰਤੋਘੋਸਸ੍ਸਾਤਿ ਧਮ੍ਮਸ੍ਸવਨਸ੍ਸ। ਸਾਧਾਰਣਨ੍ਤਿ ਨ ਬੀਜਂ વਿਯ ਅਙ੍ਕੁਰਸ੍ਸ, ਦਸ੍ਸਨਭੂਮਿਆਦਯੋ વਿਯ વਾ ਨਿਯਾਮਾવਕ੍ਕਨ੍ਤਿਆਦੀਨਂ ਆવੇਣਿਕਂ, ਅਥ ਖੋ ਸਾਧਾਰਣਂ, ਤਦਞ੍ਞਕਾਰਣੇਹਿਪਿ ਪਰਤੋਘੋਸਸ੍ਸ ਪવਤ੍ਤਨਤੋਤਿ ਅਧਿਪ੍ਪਾਯੋ। ਤਤ੍ਥ ਕੇਚਿ ਦਾਯਕਸ੍ਸ ਦਾਨਾਨੁਮੋਦਨਂ ਆਚਿਣ੍ਣਨ੍ਤਿ ਦਾਨਂ ਪਰਤੋਘੋਸਸ੍ਸ ਕਾਰਣਨ੍ਤਿ વਦਨ੍ਤਿ। ਦਾਯਕੋ ਪਨ ਦਕ੍ਖਿਣਾવਿਸੁਦ੍ਧਿਂ ਆਕਙ੍ਖਨ੍ਤੋ ਦਾਨਸੀਲਾਦਿਗੁਣવਿਸੇਸਾਨਂ ਸવਨੇ ਯੁਤ੍ਤਪ੍ਪਯੁਤ੍ਤੋ ਹੋਤੀਤਿ ਦਾਨਂ ਧਮ੍ਮਸ੍ਸવਨਸ੍ਸ ਕਾਰਣਂ વੁਤ੍ਤਂ।
Dānamayaṃ puññakiriyavatthūti dānameva dānamayaṃ, pujjaphalanibbattanaṭṭhena puññaṃ, tadeva kattabbato kiriyā, payogasampattiyādīnaṃ adhiṭṭhānabhāvato vatthu cāti dānamayapuññakiriyavatthu. Paratoghosassāti dhammassavanassa. Sādhāraṇanti na bījaṃ viya aṅkurassa, dassanabhūmiādayo viya vā niyāmāvakkantiādīnaṃ āveṇikaṃ, atha kho sādhāraṇaṃ, tadaññakāraṇehipi paratoghosassa pavattanatoti adhippāyo. Tattha keci dāyakassa dānānumodanaṃ āciṇṇanti dānaṃ paratoghosassa kāraṇanti vadanti. Dāyako pana dakkhiṇāvisuddhiṃ ākaṅkhanto dānasīlādiguṇavisesānaṃ savane yuttappayutto hotīti dānaṃ dhammassavanassa kāraṇaṃ vuttaṃ.
ਸੀਲਸਮ੍ਪਨ੍ਨੋ વਿਪ੍ਪਟਿਸਾਰਾਭਾવੇਨ ਸਮਾਹਿਤੋ ਧਮ੍ਮਚਿਨ੍ਤਾਸਮਤ੍ਥੋ ਹੋਤੀਤਿ ਸੀਲਂ ਚਿਨ੍ਤਾਮਯਞਾਣਸ੍ਸ ਕਾਰਣਨ੍ਤਿ ਆਹ ‘‘ਸੀਲਮਯ’’ਨ੍ਤਿਆਦਿ। ਭਾવਨਾਮਯਨ੍ਤਿ ਸਮਥਸਙ੍ਖਾਤਂ ਭਾવਨਾਮਯਂ। ਭਾવਨਾਮਯਿਯਾਤਿ ਉਪਰਿਝਾਨਸਙ੍ਖਾਤਾਯ વਿਪਸ੍ਸਨਾਸਙ੍ਖਾਤਾਯ ਚ ਭਾવਨਾਮਯਿਯਾ। ਪੁਰਿਮਂ ਪੁਰਿਮਞ੍ਹਿ ਪਚ੍ਛਿਮਸ੍ਸ ਪਚ੍ਛਿਮਸ੍ਸ ਪਦਟ੍ਠਾਨਂ। ਇਦਾਨਿ ਯਸ੍ਮਾ ਦਾਨਂ ਸੀਲਂ ਲੋਕਿਯਭਾવਨਾ ਚ ਨ ਕੇવਲਂ ਯਥਾવੁਤ੍ਤਪਰਤੋਘੋਸਾਦੀਨਂਯੇવ, ਅਥ ਖੋ ਯਥਾਕ੍ਕਮਂ ਪਰਿਯਤ੍ਤਿਬਾਹੁਸਚ੍ਚਕਮ੍ਮਟ੍ਠਾਨਾਨੁਯੋਗਮਗ੍ਗਸਮ੍ਮਾਦਿਟ੍ਠੀਨਮ੍ਪਿ ਪਚ੍ਚਯਾ ਹੋਨ੍ਤਿ, ਤਸ੍ਮਾ ਤਮ੍ਪਿ ਨਯਂ ਦਸ੍ਸੇਤੁਂ ਪੁਨ ‘‘ਦਾਨਮਯ’’ਨ੍ਤਿਆਦਿਨਾ ਦੇਸਨਂ વਡ੍ਢੇਸਿ। ਤਥਾ ਪਤਿਰੂਪਦੇਸવਾਸਾਦਯੋ ਕਾਯવਿવੇਕਚਿਤ੍ਤવਿવੇਕਾਦੀਨਂ ਕਾਰਣਂ ਹੋਤੀਤਿ ਇਮਂ ਨਯਂ ਦਸ੍ਸੇਤੁਂ ‘‘ਪਤਿਰੂਪਦੇਸવਾਸੋ’’ਤਿਆਦਿਮਾਹ। ਤਤ੍ਥ ਕੁਸਲવੀਮਂਸਾਯਾਤਿ ਪਟਿਸਙ੍ਖਾਨੁਪਸ੍ਸਨਾਯ। ਅਕੁਸਲਪਰਿਚ੍ਚਾਗੋਤਿ ਇਮਿਨਾ ਪਹਾਨਪਰਿਞ੍ਞਾ વੁਤ੍ਤਾਤਿ। ਸਮਾਧਿਨ੍ਦ੍ਰਿਯਸ੍ਸਾਤਿ ਮਗ੍ਗਸਮਾਧਿਨ੍ਦ੍ਰਿਯਸ੍ਸ। ਸੇਸਂ ਸੁવਿਞ੍ਞੇਯ੍ਯਮੇવ।
Sīlasampanno vippaṭisārābhāvena samāhito dhammacintāsamattho hotīti sīlaṃ cintāmayañāṇassa kāraṇanti āha ‘‘sīlamaya’’ntiādi. Bhāvanāmayanti samathasaṅkhātaṃ bhāvanāmayaṃ. Bhāvanāmayiyāti uparijhānasaṅkhātāya vipassanāsaṅkhātāya ca bhāvanāmayiyā. Purimaṃ purimañhi pacchimassa pacchimassa padaṭṭhānaṃ. Idāni yasmā dānaṃ sīlaṃ lokiyabhāvanā ca na kevalaṃ yathāvuttaparatoghosādīnaṃyeva, atha kho yathākkamaṃ pariyattibāhusaccakammaṭṭhānānuyogamaggasammādiṭṭhīnampi paccayā honti, tasmā tampi nayaṃ dassetuṃ puna ‘‘dānamaya’’ntiādinā desanaṃ vaḍḍhesi. Tathā patirūpadesavāsādayo kāyavivekacittavivekādīnaṃ kāraṇaṃ hotīti imaṃ nayaṃ dassetuṃ ‘‘patirūpadesavāso’’tiādimāha. Tattha kusalavīmaṃsāyāti paṭisaṅkhānupassanāya. Akusalapariccāgoti iminā pahānapariññā vuttāti. Samādhindriyassāti maggasamādhindriyassa. Sesaṃ suviññeyyameva.
વਿਭਤ੍ਤਿਹਾਰવਿਭਙ੍ਗવਣ੍ਣਨਾ ਨਿਟ੍ਠਿਤਾ।
Vibhattihāravibhaṅgavaṇṇanā niṭṭhitā.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਖੁਦ੍ਦਕਨਿਕਾਯ • Khuddakanikāya / ਨੇਤ੍ਤਿਪ੍ਪਕਰਣਪਾਲ਼ਿ • Nettippakaraṇapāḷi / ੮. વਿਭਤ੍ਤਿਹਾਰવਿਭਙ੍ਗੋ • 8. Vibhattihāravibhaṅgo
ਟੀਕਾ • Tīkā / ਸੁਤ੍ਤਪਿਟਕ (ਟੀਕਾ) • Suttapiṭaka (ṭīkā) / ਖੁਦ੍ਦਕਨਿਕਾਯ (ਟੀਕਾ) • Khuddakanikāya (ṭīkā) / ਨੇਤ੍ਤਿਪ੍ਪਕਰਣ-ਟੀਕਾ • Nettippakaraṇa-ṭīkā / ੮. વਿਭਤ੍ਤਿਹਾਰવਿਭਙ੍ਗવਣ੍ਣਨਾ • 8. Vibhattihāravibhaṅgavaṇṇanā
ਟੀਕਾ • Tīkā / ਸੁਤ੍ਤਪਿਟਕ (ਟੀਕਾ) • Suttapiṭaka (ṭīkā) / ਖੁਦ੍ਦਕਨਿਕਾਯ (ਟੀਕਾ) • Khuddakanikāya (ṭīkā) / ਨੇਤ੍ਤਿવਿਭਾવਿਨੀ • Nettivibhāvinī / ੮. વਿਭਤ੍ਤਿਹਾਰવਿਭਙ੍ਗવਿਭਾવਨਾ • 8. Vibhattihāravibhaṅgavibhāvanā
