| Library / Tipiṭaka / திபிடக • Tipiṭaka / நெத்திப்பகரணபாளி • Nettippakaraṇapāḷi |
8. விப⁴த்திஹாரவிப⁴ங்கோ³
8. Vibhattihāravibhaṅgo
33. தத்த² கதமோ விப⁴த்திஹாரோ? ‘‘த⁴ம்மஞ்ச பத³ட்டா²னங் பூ⁴மிஞ்சா’’தி.
33. Tattha katamo vibhattihāro? ‘‘Dhammañca padaṭṭhānaṃ bhūmiñcā’’ti.
த்³வே ஸுத்தானி வாஸனாபா⁴கி³யஞ்ச நிப்³பே³த⁴பா⁴கி³யஞ்ச. த்³வே படிபதா³ புஞ்ஞபா⁴கி³யா ச ப²லபா⁴கி³யா ச. த்³வே ஸீலானி ஸங்வரஸீலஞ்ச பஹானஸீலஞ்ச, தத்த² ப⁴க³வா வாஸனாபா⁴கி³யங் ஸுத்தங் புஞ்ஞபா⁴கி³யாய படிபதா³ய தே³ஸயதி, ஸோ ஸங்வரஸீலே டி²தோ தேன ப்³ரஹ்மசரியேன ப்³ரஹ்மசாரீ ப⁴வதி, தத்த² ப⁴க³வா நிப்³பே³த⁴பா⁴கி³யங் ஸுத்தங் ப²லபா⁴கி³யாய படிபதா³ய தே³ஸயதி, ஸோ பஹானஸீலே டி²தோ தேன ப்³ரஹ்மசரியேன ப்³ரஹ்மசாரீ ப⁴வதி.
Dve suttāni vāsanābhāgiyañca nibbedhabhāgiyañca. Dve paṭipadā puññabhāgiyā ca phalabhāgiyā ca. Dve sīlāni saṃvarasīlañca pahānasīlañca, tattha bhagavā vāsanābhāgiyaṃ suttaṃ puññabhāgiyāya paṭipadāya desayati, so saṃvarasīle ṭhito tena brahmacariyena brahmacārī bhavati, tattha bhagavā nibbedhabhāgiyaṃ suttaṃ phalabhāgiyāya paṭipadāya desayati, so pahānasīle ṭhito tena brahmacariyena brahmacārī bhavati.
தத்த² கதமங் வாஸனாபா⁴கி³யங் ஸுத்தங்? வாஸனாபா⁴கி³யங் நாம ஸுத்தங் தா³னகதா² ஸீலகதா² ஸக்³க³கதா² காமானங் ஆதீ³னவோ நெக்க²ம்மே ஆனிஸங்ஸோதி.
Tattha katamaṃ vāsanābhāgiyaṃ suttaṃ? Vāsanābhāgiyaṃ nāma suttaṃ dānakathā sīlakathā saggakathā kāmānaṃ ādīnavo nekkhamme ānisaṃsoti.
தத்த² கதமங் நிப்³பே³த⁴பா⁴கி³யங் ஸுத்தங்? நிப்³பே³த⁴பா⁴கி³யங் நாம ஸுத்தங் யா சதுஸச்சப்பகாஸனா, வாஸனாபா⁴கி³யே ஸுத்தே நத்தி² பஜானநா, நத்தி² மக்³கோ³, நத்தி² ப²லங். நிப்³பே³த⁴பா⁴கி³யே ஸுத்தே அத்தி² பஜானநா, அத்தி² மக்³கோ³, அத்தி² ப²லங். இமானி சத்தாரி ஸுத்தானி. இமேஸங் சதுன்னங் ஸுத்தானங் தே³ஸனாய ப²லேன ஸீலேன ப்³ரஹ்மசரியேன ஸப்³ப³தோ விசயேன ஹாரேன விசினித்வா யுத்திஹாரேன யோஜயிதப்³பா³ யாவதிகா ஞாணஸ்ஸ பூ⁴மி.
Tattha katamaṃ nibbedhabhāgiyaṃ suttaṃ? Nibbedhabhāgiyaṃ nāma suttaṃ yā catusaccappakāsanā, vāsanābhāgiye sutte natthi pajānanā, natthi maggo, natthi phalaṃ. Nibbedhabhāgiye sutte atthi pajānanā, atthi maggo, atthi phalaṃ. Imāni cattāri suttāni. Imesaṃ catunnaṃ suttānaṃ desanāya phalena sīlena brahmacariyena sabbato vicayena hārena vicinitvā yuttihārena yojayitabbā yāvatikā ñāṇassa bhūmi.
34. தத்த² கதமே த⁴ம்மா ஸாதா⁴ரணா? த்³வே த⁴ம்மா ஸாதா⁴ரணா நாமஸாதா⁴ரணா வத்து²ஸாதா⁴ரணா ச. யங் வா பன கிஞ்சி அஞ்ஞம்பி ஏவங் ஜாதியங், மிச்ச²த்தனியதானங் ஸத்தானங் அனியதானஞ்ச ஸத்தானங் த³ஸ்ஸனப்பஹாதப்³பா³ கிலேஸா ஸாதா⁴ரணா, புது²ஜ்ஜனஸ்ஸ ஸோதாபன்னஸ்ஸ ச காமராக³ப்³யாபாதா³ ஸாதா⁴ரணா, புது²ஜ்ஜனஸ்ஸ அனாகா³மிஸ்ஸ ச உத்³த⁴ங்பா⁴கி³யா ஸங்யோஜனா ஸாதா⁴ரணா, யங் கிஞ்சி அரியஸாவகோ லோகியங் ஸமாபத்திங் ஸமாபஜ்ஜதி, ஸப்³பா³ ஸா அவீதராகே³ஹி 1 ஸாதா⁴ரணா, ஸாதா⁴ரணா ஹி த⁴ம்மா ஏவங் அஞ்ஞமஞ்ஞங் பரங் பரங் ஸகங் ஸகங் விஸயங் நாதிவத்தந்தி. யோபி இமேஹி த⁴ம்மேஹி ஸமன்னாக³தோ ந ஸோ தங் த⁴ம்மங் உபாதிவத்ததி. இமே த⁴ம்மா ஸாதா⁴ரணா.
34. Tattha katame dhammā sādhāraṇā? Dve dhammā sādhāraṇā nāmasādhāraṇā vatthusādhāraṇā ca. Yaṃ vā pana kiñci aññampi evaṃ jātiyaṃ, micchattaniyatānaṃ sattānaṃ aniyatānañca sattānaṃ dassanappahātabbā kilesā sādhāraṇā, puthujjanassa sotāpannassa ca kāmarāgabyāpādā sādhāraṇā, puthujjanassa anāgāmissa ca uddhaṃbhāgiyā saṃyojanā sādhāraṇā, yaṃ kiñci ariyasāvako lokiyaṃ samāpattiṃ samāpajjati, sabbā sā avītarāgehi 2 sādhāraṇā, sādhāraṇā hi dhammā evaṃ aññamaññaṃ paraṃ paraṃ sakaṃ sakaṃ visayaṃ nātivattanti. Yopi imehi dhammehi samannāgato na so taṃ dhammaṃ upātivattati. Ime dhammā sādhāraṇā.
தத்த² கதமே த⁴ம்மா அஸாதா⁴ரணா? யாவ தே³ஸனங் உபாதா³ய க³வேஸிதப்³பா³ ஸெக்கா²ஸெக்கா² ப⁴ப்³பா³ப⁴ப்³பா³தி, அட்ட²மகஸ்ஸ ஸோதாபன்னஸ்ஸ ச காமராக³ப்³யாபாதா³ ஸாதா⁴ரணா த⁴ம்மதா அஸாதா⁴ரணா, அட்ட²மகஸ்ஸ அனாகா³மிஸ்ஸ ச உத்³த⁴ம்பா⁴கி³யா ஸங்யோஜனா ஸாதா⁴ரணா த⁴ம்மதா அஸாதா⁴ரணா. ஸப்³பே³ஸங் ஸெக்கா²னங் நாமங் ஸாதா⁴ரணங் த⁴ம்மதா அஸாதா⁴ரணா. ஸப்³பே³ஸங் படிபன்னகானங் நாமங் ஸாதா⁴ரணங் த⁴ம்மதா அஸாதா⁴ரணா. ஸப்³பே³ஸங் ஸெக்கா²னங் ஸெக்க²ஸீலங் ஸாதா⁴ரணங் த⁴ம்மதா அஸாதா⁴ரணா. ஏவங் விஸேஸானுபஸ்ஸினா ஹீனுக்கட்ட²மஜ்ஜி²மங் உபாதா³ய க³வேஸிதப்³ப³ங்.
Tattha katame dhammā asādhāraṇā? Yāva desanaṃ upādāya gavesitabbā sekkhāsekkhā bhabbābhabbāti, aṭṭhamakassa sotāpannassa ca kāmarāgabyāpādā sādhāraṇā dhammatā asādhāraṇā, aṭṭhamakassa anāgāmissa ca uddhambhāgiyā saṃyojanā sādhāraṇā dhammatā asādhāraṇā. Sabbesaṃ sekkhānaṃ nāmaṃ sādhāraṇaṃ dhammatā asādhāraṇā. Sabbesaṃ paṭipannakānaṃ nāmaṃ sādhāraṇaṃ dhammatā asādhāraṇā. Sabbesaṃ sekkhānaṃ sekkhasīlaṃ sādhāraṇaṃ dhammatā asādhāraṇā. Evaṃ visesānupassinā hīnukkaṭṭhamajjhimaṃ upādāya gavesitabbaṃ.
த³ஸ்ஸனபூ⁴மி நியாமாவக்கந்தியா பத³ட்டா²னங், பா⁴வனாபூ⁴மி உத்தரிகானங் ப²லானங் பத்தியா பத³ட்டா²னங், து³க்கா² படிபதா³ த³ந்தா⁴பி⁴ஞ்ஞா ஸமத²ஸ்ஸ பத³ட்டா²னங், ஸுகா² படிபதா³ கி²ப்பாபி⁴ஞ்ஞா விபஸ்ஸனாய பத³ட்டா²னங், தா³னமயங் புஞ்ஞகிரியவத்து² பரதோ கோ⁴ஸஸ்ஸ ஸாதா⁴ரணங் பத³ட்டா²னங், ஸீலமயங் புஞ்ஞகிரியவத்து² சிந்தாமயியா பஞ்ஞாய ஸாதா⁴ரணங் பத³ட்டா²னங், பா⁴வனாமயங் புஞ்ஞகிரியவத்து² பா⁴வனாமயியா பஞ்ஞாய ஸாதா⁴ரணங் பத³ட்டா²னங். தா³னமயங் புஞ்ஞகிரியவத்து² பரதோ ச கோ⁴ஸஸ்ஸ ஸுதமயியா ச பஞ்ஞாய ஸாதா⁴ரணங் பத³ட்டா²னங் ஸீலமயங் புஞ்ஞகிரியவத்து² சிந்தாமயியா ச பஞ்ஞாய யோனிஸோ ச மனஸிகாரஸ்ஸ ஸாதா⁴ரணங் பத³ட்டா²னங், பா⁴வனாமயங் புஞ்ஞகிரியவத்து² பா⁴வனாமயியா ச பஞ்ஞாய ஸம்மாதி³ட்டி²யா ச ஸாதா⁴ரணங் பத³ட்டா²னங். பதிரூபதே³ஸவாஸோ விவேகஸ்ஸ ச ஸமாதி⁴ஸ்ஸ ச ஸாதா⁴ரணங் பத³ட்டா²னங், ஸப்புரிஸூபனிஸ்ஸயோ திண்ணஞ்ச அவேச்சப்பஸாதா³னங் ஸமத²ஸ்ஸ ச ஸாதா⁴ரணங் பத³ட்டா²னங், அத்தஸம்மாபணிதா⁴னங் ஹிரியா ச விபஸ்ஸனாய ச ஸாதா⁴ரணங் பத³ட்டா²னங், அகுஸலபரிச்சாகோ³ குஸலவீமங்ஸாய ச ஸமாதி⁴ந்த்³ரியஸ்ஸ ச ஸாதா⁴ரணங் பத³ட்டா²னங், த⁴ம்மஸ்வாக்கா²ததா குஸலமூலரோபனாய ச ப²லஸமாபத்தியா ச ஸாதா⁴ரணங் பத³ட்டா²னங், ஸங்க⁴ஸுப்படிபன்னதா ஸங்க⁴ஸுட்டு²தாய ஸாதா⁴ரணங் பத³ட்டா²னங், ஸத்து²ஸம்பதா³ அப்பஸன்னானஞ்ச பஸாதா³ய பஸன்னானஞ்ச பி⁴ய்யோபா⁴வாய ஸாதா⁴ரணங் பத³ட்டா²னங், அப்படிஹதபாதிமொக்க²தா து³ம்மங்கூனஞ்ச புக்³க³லானங் நிக்³க³ஹாய பேஸலானஞ்ச புக்³க³லானங் பா²ஸுவிஹாராய ஸாதா⁴ரணங் பத³ட்டா²னங். தேனாஹ ஆயஸ்மா மஹாகச்சாயனோ ‘‘த⁴ம்மஞ்ச பத³ட்டா²ன’’ந்தி.
Dassanabhūmi niyāmāvakkantiyā padaṭṭhānaṃ, bhāvanābhūmi uttarikānaṃ phalānaṃ pattiyā padaṭṭhānaṃ, dukkhā paṭipadā dandhābhiññā samathassa padaṭṭhānaṃ, sukhā paṭipadā khippābhiññā vipassanāya padaṭṭhānaṃ, dānamayaṃ puññakiriyavatthu parato ghosassa sādhāraṇaṃ padaṭṭhānaṃ, sīlamayaṃ puññakiriyavatthu cintāmayiyā paññāya sādhāraṇaṃ padaṭṭhānaṃ, bhāvanāmayaṃ puññakiriyavatthu bhāvanāmayiyā paññāya sādhāraṇaṃ padaṭṭhānaṃ. Dānamayaṃ puññakiriyavatthu parato ca ghosassa sutamayiyā ca paññāya sādhāraṇaṃ padaṭṭhānaṃ sīlamayaṃ puññakiriyavatthu cintāmayiyā ca paññāya yoniso ca manasikārassa sādhāraṇaṃ padaṭṭhānaṃ, bhāvanāmayaṃ puññakiriyavatthu bhāvanāmayiyā ca paññāya sammādiṭṭhiyā ca sādhāraṇaṃ padaṭṭhānaṃ. Patirūpadesavāso vivekassa ca samādhissa ca sādhāraṇaṃ padaṭṭhānaṃ, sappurisūpanissayo tiṇṇañca aveccappasādānaṃ samathassa ca sādhāraṇaṃ padaṭṭhānaṃ, attasammāpaṇidhānaṃ hiriyā ca vipassanāya ca sādhāraṇaṃ padaṭṭhānaṃ, akusalapariccāgo kusalavīmaṃsāya ca samādhindriyassa ca sādhāraṇaṃ padaṭṭhānaṃ, dhammasvākkhātatā kusalamūlaropanāya ca phalasamāpattiyā ca sādhāraṇaṃ padaṭṭhānaṃ, saṅghasuppaṭipannatā saṅghasuṭṭhutāya sādhāraṇaṃ padaṭṭhānaṃ, satthusampadā appasannānañca pasādāya pasannānañca bhiyyobhāvāya sādhāraṇaṃ padaṭṭhānaṃ, appaṭihatapātimokkhatā dummaṅkūnañca puggalānaṃ niggahāya pesalānañca puggalānaṃ phāsuvihārāya sādhāraṇaṃ padaṭṭhānaṃ. Tenāha āyasmā mahākaccāyano ‘‘dhammañca padaṭṭhāna’’nti.
நியுத்தோ விப⁴த்தி ஹாரோ.
Niyutto vibhatti hāro.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / கு²த்³த³கனிகாய (அட்ட²கதா²) • Khuddakanikāya (aṭṭhakathā) / நெத்திப்பகரண-அட்ட²கதா² • Nettippakaraṇa-aṭṭhakathā / 8. விப⁴த்திஹாரவிப⁴ங்க³வண்ணனா • 8. Vibhattihāravibhaṅgavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / கு²த்³த³கனிகாய (டீகா) • Khuddakanikāya (ṭīkā) / நெத்திப்பகரண-டீகா • Nettippakaraṇa-ṭīkā / 8. விப⁴த்திஹாரவிப⁴ங்க³வண்ணனா • 8. Vibhattihāravibhaṅgavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / கு²த்³த³கனிகாய (டீகா) • Khuddakanikāya (ṭīkā) / நெத்திவிபா⁴வினீ • Nettivibhāvinī / 8. விப⁴த்திஹாரவிப⁴ங்க³விபா⁴வனா • 8. Vibhattihāravibhaṅgavibhāvanā
