| Library / Tipiṭaka / তিপিটক • Tipiṭaka / নেত্তিপ্পকরণপাল়ি • Nettippakaraṇapāḷi |
৮. ৰিভত্তিহারৰিভঙ্গো
8. Vibhattihāravibhaṅgo
৩৩. তত্থ কতমো ৰিভত্তিহারো? ‘‘ধম্মঞ্চ পদট্ঠানং ভূমিঞ্চা’’তি।
33. Tattha katamo vibhattihāro? ‘‘Dhammañca padaṭṭhānaṃ bhūmiñcā’’ti.
দ্ৰে সুত্তানি ৰাসনাভাগিযঞ্চ নিব্বেধভাগিযঞ্চ। দ্ৰে পটিপদা পুঞ্ঞভাগিযা চ ফলভাগিযা চ। দ্ৰে সীলানি সংৰরসীলঞ্চ পহানসীলঞ্চ, তত্থ ভগৰা ৰাসনাভাগিযং সুত্তং পুঞ্ঞভাগিযায পটিপদায দেসযতি, সো সংৰরসীলে ঠিতো তেন ব্রহ্মচরিযেন ব্রহ্মচারী ভৰতি, তত্থ ভগৰা নিব্বেধভাগিযং সুত্তং ফলভাগিযায পটিপদায দেসযতি, সো পহানসীলে ঠিতো তেন ব্রহ্মচরিযেন ব্রহ্মচারী ভৰতি।
Dve suttāni vāsanābhāgiyañca nibbedhabhāgiyañca. Dve paṭipadā puññabhāgiyā ca phalabhāgiyā ca. Dve sīlāni saṃvarasīlañca pahānasīlañca, tattha bhagavā vāsanābhāgiyaṃ suttaṃ puññabhāgiyāya paṭipadāya desayati, so saṃvarasīle ṭhito tena brahmacariyena brahmacārī bhavati, tattha bhagavā nibbedhabhāgiyaṃ suttaṃ phalabhāgiyāya paṭipadāya desayati, so pahānasīle ṭhito tena brahmacariyena brahmacārī bhavati.
তত্থ কতমং ৰাসনাভাগিযং সুত্তং? ৰাসনাভাগিযং নাম সুত্তং দানকথা সীলকথা সগ্গকথা কামানং আদীনৰো নেক্খম্মে আনিসংসোতি।
Tattha katamaṃ vāsanābhāgiyaṃ suttaṃ? Vāsanābhāgiyaṃ nāma suttaṃ dānakathā sīlakathā saggakathā kāmānaṃ ādīnavo nekkhamme ānisaṃsoti.
তত্থ কতমং নিব্বেধভাগিযং সুত্তং? নিব্বেধভাগিযং নাম সুত্তং যা চতুসচ্চপ্পকাসনা, ৰাসনাভাগিযে সুত্তে নত্থি পজাননা, নত্থি মগ্গো, নত্থি ফলং। নিব্বেধভাগিযে সুত্তে অত্থি পজাননা, অত্থি মগ্গো, অত্থি ফলং। ইমানি চত্তারি সুত্তানি। ইমেসং চতুন্নং সুত্তানং দেসনায ফলেন সীলেন ব্রহ্মচরিযেন সব্বতো ৰিচযেন হারেন ৰিচিনিত্ৰা যুত্তিহারেন যোজযিতব্বা যাৰতিকা ঞাণস্স ভূমি।
Tattha katamaṃ nibbedhabhāgiyaṃ suttaṃ? Nibbedhabhāgiyaṃ nāma suttaṃ yā catusaccappakāsanā, vāsanābhāgiye sutte natthi pajānanā, natthi maggo, natthi phalaṃ. Nibbedhabhāgiye sutte atthi pajānanā, atthi maggo, atthi phalaṃ. Imāni cattāri suttāni. Imesaṃ catunnaṃ suttānaṃ desanāya phalena sīlena brahmacariyena sabbato vicayena hārena vicinitvā yuttihārena yojayitabbā yāvatikā ñāṇassa bhūmi.
৩৪. তত্থ কতমে ধম্মা সাধারণা? দ্ৰে ধম্মা সাধারণা নামসাধারণা ৰত্থুসাধারণা চ। যং ৰা পন কিঞ্চি অঞ্ঞম্পি এৰং জাতিযং, মিচ্ছত্তনিযতানং সত্তানং অনিযতানঞ্চ সত্তানং দস্সনপ্পহাতব্বা কিলেসা সাধারণা, পুথুজ্জনস্স সোতাপন্নস্স চ কামরাগব্যাপাদা সাধারণা, পুথুজ্জনস্স অনাগামিস্স চ উদ্ধংভাগিযা সংযোজনা সাধারণা, যং কিঞ্চি অরিযসাৰকো লোকিযং সমাপত্তিং সমাপজ্জতি, সব্বা সা অৰীতরাগেহি 1 সাধারণা, সাধারণা হি ধম্মা এৰং অঞ্ঞমঞ্ঞং পরং পরং সকং সকং ৰিসযং নাতিৰত্তন্তি। যোপি ইমেহি ধম্মেহি সমন্নাগতো ন সো তং ধম্মং উপাতিৰত্ততি। ইমে ধম্মা সাধারণা।
34. Tattha katame dhammā sādhāraṇā? Dve dhammā sādhāraṇā nāmasādhāraṇā vatthusādhāraṇā ca. Yaṃ vā pana kiñci aññampi evaṃ jātiyaṃ, micchattaniyatānaṃ sattānaṃ aniyatānañca sattānaṃ dassanappahātabbā kilesā sādhāraṇā, puthujjanassa sotāpannassa ca kāmarāgabyāpādā sādhāraṇā, puthujjanassa anāgāmissa ca uddhaṃbhāgiyā saṃyojanā sādhāraṇā, yaṃ kiñci ariyasāvako lokiyaṃ samāpattiṃ samāpajjati, sabbā sā avītarāgehi 2 sādhāraṇā, sādhāraṇā hi dhammā evaṃ aññamaññaṃ paraṃ paraṃ sakaṃ sakaṃ visayaṃ nātivattanti. Yopi imehi dhammehi samannāgato na so taṃ dhammaṃ upātivattati. Ime dhammā sādhāraṇā.
তত্থ কতমে ধম্মা অসাধারণা? যাৰ দেসনং উপাদায গৰেসিতব্বা সেক্খাসেক্খা ভব্বাভব্বাতি, অট্ঠমকস্স সোতাপন্নস্স চ কামরাগব্যাপাদা সাধারণা ধম্মতা অসাধারণা, অট্ঠমকস্স অনাগামিস্স চ উদ্ধম্ভাগিযা সংযোজনা সাধারণা ধম্মতা অসাধারণা। সব্বেসং সেক্খানং নামং সাধারণং ধম্মতা অসাধারণা। সব্বেসং পটিপন্নকানং নামং সাধারণং ধম্মতা অসাধারণা। সব্বেসং সেক্খানং সেক্খসীলং সাধারণং ধম্মতা অসাধারণা। এৰং ৰিসেসানুপস্সিনা হীনুক্কট্ঠমজ্ঝিমং উপাদায গৰেসিতব্বং।
Tattha katame dhammā asādhāraṇā? Yāva desanaṃ upādāya gavesitabbā sekkhāsekkhā bhabbābhabbāti, aṭṭhamakassa sotāpannassa ca kāmarāgabyāpādā sādhāraṇā dhammatā asādhāraṇā, aṭṭhamakassa anāgāmissa ca uddhambhāgiyā saṃyojanā sādhāraṇā dhammatā asādhāraṇā. Sabbesaṃ sekkhānaṃ nāmaṃ sādhāraṇaṃ dhammatā asādhāraṇā. Sabbesaṃ paṭipannakānaṃ nāmaṃ sādhāraṇaṃ dhammatā asādhāraṇā. Sabbesaṃ sekkhānaṃ sekkhasīlaṃ sādhāraṇaṃ dhammatā asādhāraṇā. Evaṃ visesānupassinā hīnukkaṭṭhamajjhimaṃ upādāya gavesitabbaṃ.
দস্সনভূমি নিযামাৰক্কন্তিযা পদট্ঠানং, ভাৰনাভূমি উত্তরিকানং ফলানং পত্তিযা পদট্ঠানং, দুক্খা পটিপদা দন্ধাভিঞ্ঞা সমথস্স পদট্ঠানং, সুখা পটিপদা খিপ্পাভিঞ্ঞা ৰিপস্সনায পদট্ঠানং, দানমযং পুঞ্ঞকিরিযৰত্থু পরতো ঘোসস্স সাধারণং পদট্ঠানং, সীলমযং পুঞ্ঞকিরিযৰত্থু চিন্তামযিযা পঞ্ঞায সাধারণং পদট্ঠানং, ভাৰনামযং পুঞ্ঞকিরিযৰত্থু ভাৰনামযিযা পঞ্ঞায সাধারণং পদট্ঠানং। দানমযং পুঞ্ঞকিরিযৰত্থু পরতো চ ঘোসস্স সুতমযিযা চ পঞ্ঞায সাধারণং পদট্ঠানং সীলমযং পুঞ্ঞকিরিযৰত্থু চিন্তামযিযা চ পঞ্ঞায যোনিসো চ মনসিকারস্স সাধারণং পদট্ঠানং, ভাৰনামযং পুঞ্ঞকিরিযৰত্থু ভাৰনামযিযা চ পঞ্ঞায সম্মাদিট্ঠিযা চ সাধারণং পদট্ঠানং। পতিরূপদেসৰাসো ৰিৰেকস্স চ সমাধিস্স চ সাধারণং পদট্ঠানং, সপ্পুরিসূপনিস্সযো তিণ্ণঞ্চ অৰেচ্চপ্পসাদানং সমথস্স চ সাধারণং পদট্ঠানং, অত্তসম্মাপণিধানং হিরিযা চ ৰিপস্সনায চ সাধারণং পদট্ঠানং, অকুসলপরিচ্চাগো কুসলৰীমংসায চ সমাধিন্দ্রিযস্স চ সাধারণং পদট্ঠানং, ধম্মস্ৰাক্খাততা কুসলমূলরোপনায চ ফলসমাপত্তিযা চ সাধারণং পদট্ঠানং, সঙ্ঘসুপ্পটিপন্নতা সঙ্ঘসুট্ঠুতায সাধারণং পদট্ঠানং, সত্থুসম্পদা অপ্পসন্নানঞ্চ পসাদায পসন্নানঞ্চ ভিয্যোভাৰায সাধারণং পদট্ঠানং, অপ্পটিহতপাতিমোক্খতা দুম্মঙ্কূনঞ্চ পুগ্গলানং নিগ্গহায পেসলানঞ্চ পুগ্গলানং ফাসুৰিহারায সাধারণং পদট্ঠানং। তেনাহ আযস্মা মহাকচ্চাযনো ‘‘ধম্মঞ্চ পদট্ঠান’’ন্তি।
Dassanabhūmi niyāmāvakkantiyā padaṭṭhānaṃ, bhāvanābhūmi uttarikānaṃ phalānaṃ pattiyā padaṭṭhānaṃ, dukkhā paṭipadā dandhābhiññā samathassa padaṭṭhānaṃ, sukhā paṭipadā khippābhiññā vipassanāya padaṭṭhānaṃ, dānamayaṃ puññakiriyavatthu parato ghosassa sādhāraṇaṃ padaṭṭhānaṃ, sīlamayaṃ puññakiriyavatthu cintāmayiyā paññāya sādhāraṇaṃ padaṭṭhānaṃ, bhāvanāmayaṃ puññakiriyavatthu bhāvanāmayiyā paññāya sādhāraṇaṃ padaṭṭhānaṃ. Dānamayaṃ puññakiriyavatthu parato ca ghosassa sutamayiyā ca paññāya sādhāraṇaṃ padaṭṭhānaṃ sīlamayaṃ puññakiriyavatthu cintāmayiyā ca paññāya yoniso ca manasikārassa sādhāraṇaṃ padaṭṭhānaṃ, bhāvanāmayaṃ puññakiriyavatthu bhāvanāmayiyā ca paññāya sammādiṭṭhiyā ca sādhāraṇaṃ padaṭṭhānaṃ. Patirūpadesavāso vivekassa ca samādhissa ca sādhāraṇaṃ padaṭṭhānaṃ, sappurisūpanissayo tiṇṇañca aveccappasādānaṃ samathassa ca sādhāraṇaṃ padaṭṭhānaṃ, attasammāpaṇidhānaṃ hiriyā ca vipassanāya ca sādhāraṇaṃ padaṭṭhānaṃ, akusalapariccāgo kusalavīmaṃsāya ca samādhindriyassa ca sādhāraṇaṃ padaṭṭhānaṃ, dhammasvākkhātatā kusalamūlaropanāya ca phalasamāpattiyā ca sādhāraṇaṃ padaṭṭhānaṃ, saṅghasuppaṭipannatā saṅghasuṭṭhutāya sādhāraṇaṃ padaṭṭhānaṃ, satthusampadā appasannānañca pasādāya pasannānañca bhiyyobhāvāya sādhāraṇaṃ padaṭṭhānaṃ, appaṭihatapātimokkhatā dummaṅkūnañca puggalānaṃ niggahāya pesalānañca puggalānaṃ phāsuvihārāya sādhāraṇaṃ padaṭṭhānaṃ. Tenāha āyasmā mahākaccāyano ‘‘dhammañca padaṭṭhāna’’nti.
নিযুত্তো ৰিভত্তি হারো।
Niyutto vibhatti hāro.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / নেত্তিপ্পকরণ-অট্ঠকথা • Nettippakaraṇa-aṭṭhakathā / ৮. ৰিভত্তিহারৰিভঙ্গৰণ্ণনা • 8. Vibhattihāravibhaṅgavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / খুদ্দকনিকায (টীকা) • Khuddakanikāya (ṭīkā) / নেত্তিপ্পকরণ-টীকা • Nettippakaraṇa-ṭīkā / ৮. ৰিভত্তিহারৰিভঙ্গৰণ্ণনা • 8. Vibhattihāravibhaṅgavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / খুদ্দকনিকায (টীকা) • Khuddakanikāya (ṭīkā) / নেত্তিৰিভাৰিনী • Nettivibhāvinī / ৮. ৰিভত্তিহারৰিভঙ্গৰিভাৰনা • 8. Vibhattihāravibhaṅgavibhāvanā
