| Library / Tipiṭaka / ತಿಪಿಟಕ • Tipiṭaka / ಅಙ್ಗುತ್ತರನಿಕಾಯ • Aṅguttaranikāya |
೨. ವಿಭತ್ತಿಸುತ್ತಂ
2. Vibhattisuttaṃ
೧೭೨. ತತ್ರ ಖೋ ಆಯಸ್ಮಾ ಸಾರಿಪುತ್ತೋ ಭಿಕ್ಖೂ ಆಮನ್ತೇಸಿ – ‘‘ಆವುಸೋ ಭಿಕ್ಖವೇ’’ತಿ। ‘‘ಆವುಸೋ’’ತಿ ಖೋ ತೇ ಭಿಕ್ಖೂ ಆಯಸ್ಮತೋ ಸಾರಿಪುತ್ತಸ್ಸ ಪಚ್ಚಸ್ಸೋಸುಂ। ಆಯಸ್ಮಾ ಸಾರಿಪುತ್ತೋ ಏತದವೋಚ –
172. Tatra kho āyasmā sāriputto bhikkhū āmantesi – ‘‘āvuso bhikkhave’’ti. ‘‘Āvuso’’ti kho te bhikkhū āyasmato sāriputtassa paccassosuṃ. Āyasmā sāriputto etadavoca –
‘‘ಅದ್ಧಮಾಸೂಪಸಮ್ಪನ್ನೇನ ಮೇ, ಆವುಸೋ, ಅತ್ಥಪಟಿಸಮ್ಭಿದಾ ಸಚ್ಛಿಕತಾ ಓಧಿಸೋ ಬ್ಯಞ್ಜನಸೋ। ತಮಹಂ ಅನೇಕಪರಿಯಾಯೇನ ಆಚಿಕ್ಖಾಮಿ ದೇಸೇಮಿ ಪಞ್ಞಾಪೇಮಿ ಪಟ್ಠಪೇಮಿ ವಿವರಾಮಿ ವಿಭಜಾಮಿ ಉತ್ತಾನೀಕರೋಮಿ। ಯಸ್ಸ ಖೋ ಪನಸ್ಸ ಕಙ್ಖಾ ವಾ ವಿಮತಿ ವಾ, ಸೋ ಮಂ ಪಞ್ಹೇನ। ಅಹಂ ವೇಯ್ಯಾಕರಣೇನ ಸಮ್ಮುಖೀಭೂತೋ ನೋ ಸತ್ಥಾ ಯೋ ನೋ ಧಮ್ಮಾನಂ ಸುಕುಸಲೋ।
‘‘Addhamāsūpasampannena me, āvuso, atthapaṭisambhidā sacchikatā odhiso byañjanaso. Tamahaṃ anekapariyāyena ācikkhāmi desemi paññāpemi paṭṭhapemi vivarāmi vibhajāmi uttānīkaromi. Yassa kho panassa kaṅkhā vā vimati vā, so maṃ pañhena. Ahaṃ veyyākaraṇena sammukhībhūto no satthā yo no dhammānaṃ sukusalo.
‘‘ಅದ್ಧಮಾಸೂಪಸಮ್ಪನ್ನೇನ ಮೇ, ಆವುಸೋ, ಧಮ್ಮಪಟಿಸಮ್ಭಿದಾ ಸಚ್ಛಿಕತಾ ಓಧಿಸೋ ಬ್ಯಞ್ಜನಸೋ। ತಮಹಂ ಅನೇಕಪರಿಯಾಯೇನ ಆಚಿಕ್ಖಾಮಿ ದೇಸೇಮಿ ಪಞ್ಞಾಪೇಮಿ ಪಟ್ಠಪೇಮಿ ವಿವರಾಮಿ ವಿಭಜಾಮಿ ಉತ್ತಾನೀಕರೋಮಿ। ಯಸ್ಸ ಖೋ ಪನಸ್ಸ ಕಙ್ಖಾ ವಾ ವಿಮತಿ ವಾ, ಸೋ ಮಂ ಪಞ್ಹೇನ। ಅಹಂ ವೇಯ್ಯಾಕರಣೇನ ಸಮ್ಮುಖೀಭೂತೋ ನೋ ಸತ್ಥಾ ಯೋ ನೋ ಧಮ್ಮಾನಂ ಸುಕುಸಲೋ।
‘‘Addhamāsūpasampannena me, āvuso, dhammapaṭisambhidā sacchikatā odhiso byañjanaso. Tamahaṃ anekapariyāyena ācikkhāmi desemi paññāpemi paṭṭhapemi vivarāmi vibhajāmi uttānīkaromi. Yassa kho panassa kaṅkhā vā vimati vā, so maṃ pañhena. Ahaṃ veyyākaraṇena sammukhībhūto no satthā yo no dhammānaṃ sukusalo.
‘‘ಅದ್ಧಮಾಸೂಪಸಮ್ಪನ್ನೇನ ಮೇ, ಆವುಸೋ, ನಿರುತ್ತಿಪಟಿಸಮ್ಭಿದಾ ಸಚ್ಛಿಕತಾ ಓಧಿಸೋ ಬ್ಯಞ್ಜನಸೋ। ತಮಹಂ ಅನೇಕಪರಿಯಾಯೇನ ಆಚಿಕ್ಖಾಮಿ ದೇಸೇಮಿ ಪಞ್ಞಾಪೇಮಿ ಪಟ್ಠಪೇಮಿ ವಿವರಾಮಿ ವಿಭಜಾಮಿ ಉತ್ತಾನೀಕರೋಮಿ। ಯಸ್ಸ ಖೋ ಪನಸ್ಸ ಕಙ್ಖಾ ವಾ ವಿಮತಿ ವಾ, ಸೋ ಮಂ ಪಞ್ಹೇನ। ಅಹಂ ವೇಯ್ಯಾಕರಣೇನ ಸಮ್ಮುಖೀಭೂತೋ ನೋ ಸತ್ಥಾ ಯೋ ನೋ ಧಮ್ಮಾನಂ ಸುಕುಸಲೋ।
‘‘Addhamāsūpasampannena me, āvuso, niruttipaṭisambhidā sacchikatā odhiso byañjanaso. Tamahaṃ anekapariyāyena ācikkhāmi desemi paññāpemi paṭṭhapemi vivarāmi vibhajāmi uttānīkaromi. Yassa kho panassa kaṅkhā vā vimati vā, so maṃ pañhena. Ahaṃ veyyākaraṇena sammukhībhūto no satthā yo no dhammānaṃ sukusalo.
‘‘ಅದ್ಧಮಾಸೂಪಸಮ್ಪನ್ನೇನ ಮೇ, ಆವುಸೋ, ಪಟಿಭಾನಪಟಿಸಮ್ಭಿದಾ ಸಚ್ಛಿಕತಾ ಓಧಿಸೋ ಬ್ಯಞ್ಜನಸೋ। ತಮಹಂ ಅನೇಕಪರಿಯಾಯೇನ ಆಚಿಕ್ಖಾಮಿ ದೇಸೇಮಿ ಪಞ್ಞಾಪೇಮಿ ಪಟ್ಠಪೇಮಿ ವಿವರಾಮಿ ವಿಭಜಾಮಿ ಉತ್ತಾನೀಕರೋಮಿ। ಯಸ್ಸ ಖೋ ಪನಸ್ಸ ಕಙ್ಖಾ ವಾ ವಿಮತಿ ವಾ, ಸೋ ಮಂ ಪಞ್ಹೇನ। ಅಹಂ ವೇಯ್ಯಾಕರಣೇನ ಸಮ್ಮುಖೀಭೂತೋ ನೋ ಸತ್ಥಾ ಯೋ ನೋ ಧಮ್ಮಾನಂ ಸುಕುಸಲೋ’’ತಿ। ದುತಿಯಂ।
‘‘Addhamāsūpasampannena me, āvuso, paṭibhānapaṭisambhidā sacchikatā odhiso byañjanaso. Tamahaṃ anekapariyāyena ācikkhāmi desemi paññāpemi paṭṭhapemi vivarāmi vibhajāmi uttānīkaromi. Yassa kho panassa kaṅkhā vā vimati vā, so maṃ pañhena. Ahaṃ veyyākaraṇena sammukhībhūto no satthā yo no dhammānaṃ sukusalo’’ti. Dutiyaṃ.
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಅಙ್ಗುತ್ತರನಿಕಾಯ (ಅಟ್ಠಕಥಾ) • Aṅguttaranikāya (aṭṭhakathā) / ೨. ವಿಭತ್ತಿಸುತ್ತವಣ್ಣನಾ • 2. Vibhattisuttavaṇṇanā
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಅಙ್ಗುತ್ತರನಿಕಾಯ (ಟೀಕಾ) • Aṅguttaranikāya (ṭīkā) / ೨. ವಿಭತ್ತಿಸುತ್ತವಣ್ಣನಾ • 2. Vibhattisuttavaṇṇanā
