| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
2. විභත්‌තිසුත්‌තං
2. Vibhattisuttaṃ
172. තත්‍ර ඛො ආයස්‌මා සාරිපුත්‌තො භික්‌ඛූ ආමන්‌තෙසි – ‘‘ආවුසො භික්‌ඛවෙ’’ති. ‘‘ආවුසො’’ති ඛො තෙ භික්‌ඛූ ආයස්‌මතො සාරිපුත්‌තස්‌ස පච්‌චස්‌සොසුං. ආයස්‌මා සාරිපුත්‌තො එතදවොච –
172. Tatra kho āyasmā sāriputto bhikkhū āmantesi – ‘‘āvuso bhikkhave’’ti. ‘‘Āvuso’’ti kho te bhikkhū āyasmato sāriputtassa paccassosuṃ. Āyasmā sāriputto etadavoca –
‘‘අද්‌ධමාසූපසම්‌පන්‌නෙන මෙ, ආවුසො, අත්‌ථපටිසම්‌භිදා සච්‌ඡිකතා ඔධිසො බ්‍යඤ්‌ජනසො. තමහං අනෙකපරියායෙන ආචික්‌ඛාමි දෙසෙමි පඤ්‌ඤාපෙමි පට්‌ඨපෙමි විවරාමි විභජාමි උත්‌තානීකරොමි. යස්‌ස ඛො පනස්‌ස කඞ්‌ඛා වා විමති වා, සො මං පඤ්‌හෙන. අහං වෙය්‍යාකරණෙන සම්‌මුඛීභූතො නො සත්‌ථා යො නො ධම්‌මානං සුකුසලො.
‘‘Addhamāsūpasampannena me, āvuso, atthapaṭisambhidā sacchikatā odhiso byañjanaso. Tamahaṃ anekapariyāyena ācikkhāmi desemi paññāpemi paṭṭhapemi vivarāmi vibhajāmi uttānīkaromi. Yassa kho panassa kaṅkhā vā vimati vā, so maṃ pañhena. Ahaṃ veyyākaraṇena sammukhībhūto no satthā yo no dhammānaṃ sukusalo.
‘‘අද්‌ධමාසූපසම්‌පන්‌නෙන මෙ, ආවුසො, ධම්‌මපටිසම්‌භිදා සච්‌ඡිකතා ඔධිසො බ්‍යඤ්‌ජනසො. තමහං අනෙකපරියායෙන ආචික්‌ඛාමි දෙසෙමි පඤ්‌ඤාපෙමි පට්‌ඨපෙමි විවරාමි විභජාමි උත්‌තානීකරොමි. යස්‌ස ඛො පනස්‌ස කඞ්‌ඛා වා විමති වා, සො මං පඤ්‌හෙන. අහං වෙය්‍යාකරණෙන සම්‌මුඛීභූතො නො සත්‌ථා යො නො ධම්‌මානං සුකුසලො.
‘‘Addhamāsūpasampannena me, āvuso, dhammapaṭisambhidā sacchikatā odhiso byañjanaso. Tamahaṃ anekapariyāyena ācikkhāmi desemi paññāpemi paṭṭhapemi vivarāmi vibhajāmi uttānīkaromi. Yassa kho panassa kaṅkhā vā vimati vā, so maṃ pañhena. Ahaṃ veyyākaraṇena sammukhībhūto no satthā yo no dhammānaṃ sukusalo.
‘‘අද්‌ධමාසූපසම්‌පන්‌නෙන මෙ, ආවුසො, නිරුත්‌තිපටිසම්‌භිදා සච්‌ඡිකතා ඔධිසො බ්‍යඤ්‌ජනසො. තමහං අනෙකපරියායෙන ආචික්‌ඛාමි දෙසෙමි පඤ්‌ඤාපෙමි පට්‌ඨපෙමි විවරාමි විභජාමි උත්‌තානීකරොමි. යස්‌ස ඛො පනස්‌ස කඞ්‌ඛා වා විමති වා, සො මං පඤ්‌හෙන. අහං වෙය්‍යාකරණෙන සම්‌මුඛීභූතො නො සත්‌ථා යො නො ධම්‌මානං සුකුසලො.
‘‘Addhamāsūpasampannena me, āvuso, niruttipaṭisambhidā sacchikatā odhiso byañjanaso. Tamahaṃ anekapariyāyena ācikkhāmi desemi paññāpemi paṭṭhapemi vivarāmi vibhajāmi uttānīkaromi. Yassa kho panassa kaṅkhā vā vimati vā, so maṃ pañhena. Ahaṃ veyyākaraṇena sammukhībhūto no satthā yo no dhammānaṃ sukusalo.
‘‘අද්‌ධමාසූපසම්‌පන්‌නෙන මෙ, ආවුසො, පටිභානපටිසම්‌භිදා සච්‌ඡිකතා ඔධිසො බ්‍යඤ්‌ජනසො. තමහං අනෙකපරියායෙන ආචික්‌ඛාමි දෙසෙමි පඤ්‌ඤාපෙමි පට්‌ඨපෙමි විවරාමි විභජාමි උත්‌තානීකරොමි. යස්‌ස ඛො පනස්‌ස කඞ්‌ඛා වා විමති වා, සො මං පඤ්‌හෙන. අහං වෙය්‍යාකරණෙන සම්‌මුඛීභූතො නො සත්‌ථා යො නො ධම්‌මානං සුකුසලො’’ති. දුතියං.
‘‘Addhamāsūpasampannena me, āvuso, paṭibhānapaṭisambhidā sacchikatā odhiso byañjanaso. Tamahaṃ anekapariyāyena ācikkhāmi desemi paññāpemi paṭṭhapemi vivarāmi vibhajāmi uttānīkaromi. Yassa kho panassa kaṅkhā vā vimati vā, so maṃ pañhena. Ahaṃ veyyākaraṇena sammukhībhūto no satthā yo no dhammānaṃ sukusalo’’ti. Dutiyaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 2. විභත්‌තිසුත්‌තවණ්‌ණනා • 2. Vibhattisuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 2. විභත්‌තිසුත්‌තවණ්‌ණනා • 2. Vibhattisuttavaṇṇanā
