| Library / Tipiṭaka / တိပိဋက • Tipiṭaka / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) |
၂. ဝိဘတ္တိသုတ္တဝဏ္ဏနာ
2. Vibhattisuttavaṇṇanā
၁၇၂. ဒုတိယေ အတ္ထပဋိသမ္ဘိဒာတိ ပဉ္စသု အတ္ထေသု ပဘေဒဂတံ ဉာဏံ။ ဩဓိသောတိ ကာရဏသော။ ဗ္ယဉ္ဇနသောတိ အက္ခရသော။ အနေကပရိယာယေနာတိ အနေကေဟိ ကာရဏေဟိ။ အာစိက္ခာမီတိ ကထေမိ။ ဒေသေမီတိ ပာကဋံ ကတ္ဝာ ကထေမိ။ ပညာပေမီတိ ဇာနာပေမိ။ ပဋ္ဌပေမီတိ ပဋ္ဌပေတ္ဝာ ပဝတ္တေတ္ဝာ ကထေမိ။ ဝိဝရာမီတိ ဝိဝဋံ ကတ္ဝာ ကထေမိ။ ဝိဘဇာမီတိ ဝိဘဇိတ္ဝာ ကထေမိ။ ဥတ္တာနီကရောမီတိ ဂမ္ဘီရံ ဥတ္တာနကံ ကတ္ဝာ ကထေမိ။ သော မံ ပဉ္ဟေနာတိ သော မံ ပဉ္ဟေန ဥပဂစ္ဆတု။ အဟံ ဝေယ္ယာကရဏေနာတိ အဟမသ္သ ပဉ္ဟကထနေန စိတ္တံ အာရာဓေသ္သာမိ။ ယော နော ဓမ္မာနံ သုကုသလောတိ ယော အမ္ဟာကံ အဓိဂတဓမ္မာနံ သုကုသလော သတ္ထာ, သော ဧသ သမ္မုခီဘူတော။ ယဒိ မယာ အတ္ထပဋိသမ္ဘိဒာ န သစ္ဆိကတာ, ‘‘သစ္ဆိကရောဟိ တာဝ သာရိပုတ္တာ’’တိ ဝတ္ဝာ မံ ပဋိဗာဟိသ္သတီတိ သတ္ထု ပုရတော နိသိန္နကောဝ သီဟနာဒံ နဒတိ။ ဣမိနာ ဥပာယေန သဗ္ဗတ္ထ အတ္ထော ဝေဒိတဗ္ဗော။ ဣမာသု စ ပန ပဋိသမ္ဘိဒာသု တိသ္သော ပဋိသမ္ဘိဒာ လောကိယာ, အတ္ထပဋိသမ္ဘိဒာ လောကိယလောကုတ္တရာတိ။
172. Dutiye atthapaṭisambhidāti pañcasu atthesu pabhedagataṃ ñāṇaṃ. Odhisoti kāraṇaso. Byañjanasoti akkharaso. Anekapariyāyenāti anekehi kāraṇehi. Ācikkhāmīti kathemi. Desemīti pākaṭaṃ katvā kathemi. Paññāpemīti jānāpemi. Paṭṭhapemīti paṭṭhapetvā pavattetvā kathemi. Vivarāmīti vivaṭaṃ katvā kathemi. Vibhajāmīti vibhajitvā kathemi. Uttānīkaromīti gambhīraṃ uttānakaṃ katvā kathemi. So maṃ pañhenāti so maṃ pañhena upagacchatu. Ahaṃ veyyākaraṇenāti ahamassa pañhakathanena cittaṃ ārādhessāmi. Yo no dhammānaṃ sukusaloti yo amhākaṃ adhigatadhammānaṃ sukusalo satthā, so esa sammukhībhūto. Yadi mayā atthapaṭisambhidā na sacchikatā, ‘‘sacchikarohi tāva sāriputtā’’ti vatvā maṃ paṭibāhissatīti satthu purato nisinnakova sīhanādaṃ nadati. Iminā upāyena sabbattha attho veditabbo. Imāsu ca pana paṭisambhidāsu tisso paṭisambhidā lokiyā, atthapaṭisambhidā lokiyalokuttarāti.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၂. ဝိဘတ္တိသုတ္တံ • 2. Vibhattisuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၂. ဝိဘတ္တိသုတ္တဝဏ္ဏနာ • 2. Vibhattisuttavaṇṇanā
