| Library / Tipiṭaka / д̇ибидага • Tipiṭaka / нзд̇д̇иббагаран̣а-дийгаа • Nettippakaraṇa-ṭīkā |
2. вижаяахаарасамбаад̇аван̣н̣анаа
2. Vicayahārasampātavaṇṇanā
53. гусалад̇хаммаарамман̣аад̇и гусалад̇хаммз уд̣̇д̣̇исса бавад̇д̇имад̇д̇ам̣ санд̇хааяа вуд̇д̇ам̣, на д̇зсам̣ аарамман̣абажжаяад̇ам̣ ид̇ха ‘‘гусалаа д̇хаммаа’’д̇и логуд̇д̇арад̇хаммаанам̣ ад̇хиббзд̇ад̇д̇аа. на хи гад̣̇аажи анубаад̣̇аанияаа д̇хаммаа убаад̣̇аанаарамман̣аа хонд̇и. палад̇хаммз уд̣̇д̣̇исса бавад̇д̇ааяа д̇ан̣хааяа г̇ахид̇ад̇д̇аа ‘‘гусала…бз… д̣̇адтаб̣б̣о’’д̇и вуд̇д̇ам̣. д̣̇зсанаахаарзд̇и д̣̇зсанаахаарасамбаад̇з. гат̇ам̣ бана гусалабхаавод̇и ‘‘гусалаа’’д̇и важанамад̇д̇ам̣ г̇ахзд̇ваа жод̣̇зд̇и, д̇ан̃жа нид̣̇ассанамад̇д̇ам̣ д̣̇адтаб̣б̣ам̣, бахаанахзд̇убхаавобиссаа сияаа жод̣̇агзна самбадижчид̇ова. ‘‘мааноби д̣̇увид̇хо’’д̇иаад̣̇инаа маанасса жа д̇ассаа д̇ан̣хааяа жа сзвид̇аб̣б̣абхааво агусалаанам̣ бахаанааяа, гусалаанам̣ уббад̇д̇ияаа жа бажжаяабхаавад̇о.
53.Kusaladhammārammaṇāti kusaladhamme uddissa pavattimattaṃ sandhāya vuttaṃ, na tesaṃ ārammaṇapaccayataṃ idha ‘‘kusalā dhammā’’ti lokuttaradhammānaṃ adhippetattā. Na hi kadāci anupādāniyā dhammā upādānārammaṇā honti. Phaladhamme uddissa pavattāya taṇhāya gahitattā ‘‘kusala…pe… daṭṭhabbo’’ti vuttaṃ. Desanāhāreti desanāhārasampāte. Kathaṃ pana kusalabhāvoti ‘‘kusalā’’ti vacanamattaṃ gahetvā codeti, tañca nidassanamattaṃ daṭṭhabbaṃ, pahānahetubhāvopissā siyā codakena sampaṭicchitova. ‘‘Mānopi duvidho’’tiādinā mānassa ca tassā taṇhāya ca sevitabbabhāvo akusalānaṃ pahānāya, kusalānaṃ uppattiyā ca paccayabhāvato.
нзгкаммассид̇ам̣ д̣̇оманассам̣ наама ‘‘арияабхуумим̣ баабун̣ид̇ум̣ наасагки’’нд̇и анусожад̇о уббаннам̣ д̣̇оманассанд̇и самб̣анд̇хо. званд̇и иминаа баал̣ияам̣ вуд̇д̇аббагаарзна, бихам̣ убадтабзд̇ваа часу д̣̇ваарзсу идтаарамман̣з аабаат̇аг̇ад̇з анижжаад̣̇ивасзна вибассанам̣ бадтабзд̇ваад̇и яож̇анаа. идтаарамман̣ан̃жзд̇т̇а яат̇аавуд̇д̇аанусожанад̣̇оманассуббад̇д̇ийнам̣ яат̇аабхинивидтасса аарамман̣асса анидтад̇ааяаад̇и д̣̇ассанад̇т̇ам̣. ‘‘гат̇ам̣ нзгкаммавасзнаа’’д̇и бад̣̇асса ад̇т̇ам̣ виварид̇ум̣ ‘‘вибассанаавасзнаа’’д̇иаад̣̇и вуд̇д̇ам̣. вибассанаад̣̇ивинимуд̇д̇аа ваа батамаж̇жхаанаад̣̇ивасзна вуд̇д̇аа гусалаа д̇хаммаа ид̇ха нзгкаммам̣. ануссад̇иг̇г̇ахан̣зна убажаараж̇жхаанамзва г̇ахид̇анд̇и ‘‘батамаж̇жхаанаад̣̇ивасзнаа’’д̇и вуд̇д̇ам̣. аад̣̇исад̣̇д̣̇зна д̣̇уд̇ияаж̇жхаанад̇о бадтааяа яаава аг̇г̇апалаа убаривисзсаа сан̇г̇ахид̇аа. яааяа бан̃н̃аавимуд̇д̇ияаа.
Nekkhammassitaṃ domanassaṃ nāma ‘‘ariyabhūmiṃ pāpuṇituṃ nāsakkhi’’nti anusocato uppannaṃ domanassanti sambandho. Evanti iminā pāḷiyaṃ vuttappakārena, pihaṃ upaṭṭhapetvā chasu dvāresu iṭṭhārammaṇe āpāthagate aniccādivasena vipassanaṃ paṭṭhapetvāti yojanā. Iṭṭhārammaṇañcettha yathāvuttaanusocanadomanassuppattīnaṃ yathābhiniviṭṭhassa ārammaṇassa aniṭṭhatāyāti dassanatthaṃ. ‘‘Kathaṃ nekkhammavasenā’’ti padassa atthaṃ vivarituṃ ‘‘vipassanāvasenā’’tiādi vuttaṃ. Vipassanādivinimuttā vā paṭhamajjhānādivasena vuttā kusalā dhammā idha nekkhammaṃ. Anussatiggahaṇena upacārajjhānameva gahitanti ‘‘paṭhamajjhānādivasenā’’ti vuttaṃ. Ādisaddena dutiyajjhānato paṭṭhāya yāva aggaphalā uparivisesā saṅgahitā. Yāya paññāvimuttiyā.
убзгкаасад̇ибаарисуд̣̇д̇хибхаавзнаад̇и убзгкааж̇анид̇асад̇ибаарисуд̣̇д̇хисаб̣бхаавзна. гаммаяог̇г̇анд̇и вибассанаабхааванаад̣̇игаммасса яог̇г̇ам̣ ануруубам̣ анужчавигам̣. ассад̣̇д̇хиязд̇и ассад̣̇д̇хияахзд̇у, ‘‘ассад̣̇д̇хиязнаа’’д̇иби батанд̇и, со звад̇т̇о. обхаасаг̇ад̇анд̇и н̃аан̣обхаасаг̇ад̇ам̣. гаамам̣ буб̣б̣зби бан̃н̃аа вуд̇д̇аа, ассад̣̇д̇хияаад̣̇ийхи бана ан̃н̃зсам̣ гилзсаанам̣ вид̇хаманамби бан̃н̃ааяа зва ход̇и, саа жа звам̣бхууд̇аад̇и д̣̇ассанад̇т̇ам̣ ‘‘обхаасаг̇ад̇ам̣ гилзсанд̇хагаарз на ин̃ж̇ад̇ий’’д̇и вуд̇д̇ам̣.
Upekkhāsatipārisuddhibhāvenāti upekkhājanitasatipārisuddhisabbhāvena. Kammayogganti vipassanābhāvanādikammassa yoggaṃ anurūpaṃ anucchavikaṃ. Assaddhiyeti assaddhiyahetu, ‘‘assaddhiyenā’’tipi paṭhanti, so evattho. Obhāsagatanti ñāṇobhāsagataṃ. Kāmaṃ pubbepi paññā vuttā, assaddhiyādīhi pana aññesaṃ kilesānaṃ vidhamanampi paññāya eva hoti, sā ca evaṃbhūtāti dassanatthaṃ ‘‘obhāsagataṃ kilesandhakāre na iñjatī’’ti vuttaṃ.
гобо год̇хо. аббажжаяо д̣̇оманассам̣. ид̣̇д̇хивид̇хан̃аан̣аад̣̇игаа ча абхин̃н̃аа баагадаа зваад̇и ‘‘д̣̇вз жа висзсз’’д̇и вуд̇д̇ад̇хаммз д̣̇ассзд̇ум̣ ‘‘маномаяид̣̇д̇хи, вибассанаан̃аан̣ан̃жаа’’д̇и ааха. ан̇г̇ан̣аани рааг̇аад̣̇аяо. убаггилзсаа абхиж̇жхаависамалобхаад̣̇аяо. ануломанам̣ д̇ад̣̇згадтад̇аа. панд̣̇анаа д̣̇уб̣б̣алаа вигкзбаббавад̇д̇и. б̣алавад̇ий анавадтаанам̣. саб̣б̣о мижчаабхинивзсо аяонисоманасигаарзна ход̇и, мижчаавид̇аггзна жа. д̇ад̇т̇а аяонисоманасигааро агусалажид̇д̇уббаад̣̇о д̇аббарияаабанно мижчаавид̇агго вигкзбасахид̇о зваад̇и вуд̇д̇ам̣ ‘‘мижчаабхинивзсахзд̇уд̇ааяа д̣̇идтибагко’’д̇и вуд̇д̇ан̃хзд̇ам̣ ‘‘вид̇аггоби д̣̇идтидтаанам̣, аяонисо манасигаароби д̣̇идтидтаана’’нд̇и (бади. ма. 1.124).
Kopo kodho. Appaccayo domanassaṃ. Iddhividhañāṇādikā cha abhiññā pākaṭā evāti ‘‘dve ca visese’’ti vuttadhamme dassetuṃ ‘‘manomayiddhi, vipassanāñāṇañcā’’ti āha. Aṅgaṇāni rāgādayo. Upakkilesā abhijjhāvisamalobhādayo. Anulomanaṃ tadekaṭṭhatā. Phandanā dubbalā vikkhepappavatti. Balavatī anavaṭṭhānaṃ. Sabbo micchābhiniveso ayonisomanasikārena hoti, micchāvitakkena ca. Tattha ayonisomanasikāro akusalacittuppādo tappariyāpanno micchāvitakko vikkhepasahito evāti vuttaṃ ‘‘micchābhinivesahetutāya diṭṭhipakkho’’ti vuttañhetaṃ ‘‘vitakkopi diṭṭhiṭṭhānaṃ, ayoniso manasikāropi diṭṭhiṭṭhāna’’nti (paṭi. ma. 1.124).
ат̇а ваа ин̃ж̇анаад̇и панд̣̇анаа, д̣̇идтабарид̇д̇аасо. яат̇ааха ‘‘д̇ад̣̇аби д̇зсам̣ бхавад̇ам̣ саман̣аб̣раахман̣аанам̣ аж̇аанад̇ам̣ абассад̇ам̣ взд̣̇аяид̇ам̣ д̇ан̣хааг̇ад̇аанам̣ барид̇ассид̇авибпанд̣̇ид̇амзваа’’д̇и (д̣̇ий. ни. 1.105 аад̣̇аяо). адтид̇ийд̇и анавадтаанам̣, д̣̇идтивид̇агго. д̇зна хи бут̇уж̇ж̇ано гаалз сассад̇ам̣, гаалз ужчзд̣̇анд̇и д̇ам̣ д̇ам̣ д̣̇идтиг̇г̇ахан̣ам̣ багканд̣̇анд̇о сад̇д̇ад̇о бариб̣бхадтаанд̇хо вияа, самуд̣̇д̣̇з виссадтавааханигаа вияа, яанд̇з яуд̇д̇аг̇он̣о вияа жа д̇ат̇аа д̇ат̇аа бариб̣бхамад̇и. д̇знааха ‘‘д̣̇идтияоби д̣̇идтидтаанам̣, вид̇аггоби д̣̇идтидтаана’’нд̇и (бади. ма. 1.124) жа. зд̇асмин̃жа багкз мижчаабхинивзсад̇ааяа, мижчаабхинивзсахзд̇уд̇ааяа жа д̇ассаа д̣̇вз багкаад̇и згад̣̇зсасаруубзгасзсо гад̇од̇и взд̣̇ид̇аб̣б̣ам̣.
Atha vā iñjanāti phandanā, diṭṭhaparittāso. Yathāha ‘‘tadapi tesaṃ bhavataṃ samaṇabrāhmaṇānaṃ ajānataṃ apassataṃ vedayitaṃ taṇhāgatānaṃ paritassitavipphanditamevā’’ti (dī. ni. 1.105 ādayo). Aṭṭhitīti anavaṭṭhānaṃ, diṭṭhivitakko. Tena hi puthujjano kāle sassataṃ, kāle ucchedanti taṃ taṃ diṭṭhiggahaṇaṃ pakkhandanto sattato paribbhaṭṭhaandho viya, samudde vissaṭṭhavāhanikā viya, yante yuttagoṇo viya ca tathā tathā paribbhamati. Tenāha ‘‘diṭṭhiyopi diṭṭhiṭṭhānaṃ, vitakkopi diṭṭhiṭṭhāna’’nti (paṭi. ma. 1.124) ca. Etasmiñca pakkhe micchābhinivesatāya, micchābhinivesahetutāya ca tassā dve pakkhāti ekadesasarūpekaseso katoti veditabbaṃ.
‘‘зва’’нд̇иаад̣̇инаа ‘‘со убарима’’нд̇иаад̣̇ибаал̣ияам̣ самб̣анд̇хам̣ д̣̇ассзд̇и. бадигхасан̃н̃аад̇и бхуммад̇т̇з бажжад̇д̇аважананд̇и д̣̇ассзнд̇о ‘‘бадигха…бз… сан̃н̃аасуу’’д̇и ааха. руубааважарасан̃н̃аад̇и сан̃н̃аасийсзна руубааважараж̇жхаанаани вад̣̇ад̇и. наанад̇д̇асан̃н̃аад̇и наанаасабхааваа, наанаасабхаавз ваа аарамман̣з сан̃н̃аа. табзд̇ваа бадигхасан̃н̃аа авасидтагаамааважарасан̃н̃аа хзд̇аа. д̇аа самад̇иггамад̇ийд̇и д̇аа руубасан̃н̃аанаанад̇д̇асан̃н̃ааяо аарамман̣зхи сад̣̇д̇хим̣ саммад̣̇зва ад̇иггамад̇и.
‘‘Eva’’ntiādinā ‘‘so uparima’’ntiādipāḷiyaṃ sambandhaṃ dasseti. Paṭighasaññāti bhummatthe paccattavacananti dassento ‘‘paṭigha…pe… saññāsū’’ti āha. Rūpāvacarasaññāti saññāsīsena rūpāvacarajjhānāni vadati. Nānattasaññāti nānāsabhāvā, nānāsabhāve vā ārammaṇe saññā. Ṭhapetvā paṭighasaññā avasiṭṭhakāmāvacarasaññā hetā. Tā samatikkamatīti tā rūpasaññānānattasaññāyo ārammaṇehi saddhiṃ sammadeva atikkamati.
руубааважараж̇жхаанобхаасоби гасин̣аарамман̣аа. гасин̣аниссанд̣̇о хи ааруббаж̇жхаануббад̇д̇и. д̣̇ассананд̇и гасин̣аруубаанам̣ д̣̇ассанам̣. абхиж̇жхааб̣яаабаад̣̇аббахаанзна сад̣̇д̇хим̣ вийрияаарамбхо убагаараго самат̇о сад̇ибассад̣̇д̇хияо баригкааран̇г̇ад̇аа вуд̇д̇аа зва. сад̇ирахид̇ам̣ саммасанам̣ наама над̇т̇ийд̇и ‘‘яаа убадтид̇аа сад̇и асаммудтаа, аяам̣ вибассанаа’’д̇и вуд̇д̇ам̣. д̇зна сад̇исийсзна вибассанаа г̇ахид̇аад̇и д̣̇ассзд̇и. саммосаанам̣ бахаанамаахаад̇и самб̣анд̇хо.
Rūpāvacarajjhānobhāsopi kasiṇārammaṇā. Kasiṇanissando hi āruppajjhānuppatti. Dassananti kasiṇarūpānaṃ dassanaṃ. Abhijjhābyāpādappahānena saddhiṃ vīriyārambho upakārako samatho satipassaddhiyo parikkhāraṅgatā vuttā eva. Satirahitaṃ sammasanaṃ nāma natthīti ‘‘yā upaṭṭhitā sati asammuṭṭhā, ayaṃ vipassanā’’ti vuttaṃ. Tena satisīsena vipassanā gahitāti dasseti. Sammosānaṃ pahānamāhāti sambandho.
54. бажжуббаннасукаааяад̇исукавибаагагирияанираамисаагаабурисасзвид̇абхаавзхи зва сзсаа баал̣ияам̣ зд̇асса самаад̇хисса санд̇абан̣ийд̇ад̇аад̣̇ивисзсаа вуд̇д̇аа, д̇зби ид̇ха сан̇г̇ахид̇аад̇и д̇зсам̣ бад̣̇аанам̣ ад̇т̇ам̣ д̣̇ассзнд̇о ‘‘ан̇г̇асанд̇ад̇ааяаа’’д̇иаад̣̇имааха. д̇ад̇т̇а ан̇г̇асанд̇ад̇ааяаад̇и палажхаанан̇г̇аанам̣ убасанд̇ад̇ааяа. гилзсад̣̇арат̇асанд̇ад̇ааяаад̇и гилзсад̣̇арат̇абадиббассад̣̇д̇хияаа. бан̣ийд̇од̇и ул̣ааро. згод̣̇ибхаавзнаад̇и маг̇г̇асамаад̇хисан̇каад̇зна згод̣̇ибхаавзна. згод̣̇ибхааванд̇и самаад̇хаанам̣. логияасамаад̇хисса бажжанийганийваран̣абатамаж̇жхаананиганд̇иаад̣̇ийни ниг̇г̇ахзд̇аб̣б̣аани, ан̃н̃з жа гилзсаа ваарзд̇аб̣б̣аа. имасса бана арахад̇д̇асамаад̇хисса бадиббассад̣̇д̇хагилзсад̇д̇аа на ниг̇г̇ахзд̇аб̣б̣ам̣, ваарзд̇аб̣б̣ан̃жа ад̇т̇ийд̇и со маг̇г̇аананд̇арам̣ самаабад̇д̇игкан̣зва аббаяог̇знзва ад̇хиг̇ад̇ад̇д̇аа, тид̇ад̇д̇аа жа абарихаанивасзна ваа ад̇хиг̇ад̇ад̇д̇аа насасан̇каараниг̇г̇аяхаваарид̇аг̇ад̇о.
54. Paccuppannasukhaāyatisukhavipākakiriyanirāmisaakāpurisasevitabhāvehi eva sesā pāḷiyaṃ etassa samādhissa santapaṇītatādivisesā vuttā, tepi idha saṅgahitāti tesaṃ padānaṃ atthaṃ dassento ‘‘aṅgasantatāyā’’tiādimāha. Tattha aṅgasantatāyāti phalajhānaṅgānaṃ upasantatāya. Kilesadarathasantatāyāti kilesadarathapaṭippassaddhiyā. Paṇītoti uḷāro. Ekodibhāvenāti maggasamādhisaṅkhātena ekodibhāvena. Ekodibhāvanti samādhānaṃ. Lokiyasamādhissa paccanīkanīvaraṇapaṭhamajjhānanikantiādīni niggahetabbāni, aññe ca kilesā vāretabbā. Imassa pana arahattasamādhissa paṭippassaddhakilesattā na niggahetabbaṃ, vāretabbañca atthīti so maggānantaraṃ samāpattikkhaṇeva appayogeneva adhigatattā, ṭhitattā ca aparihānivasena vā adhigatattā nasasaṅkhāraniggayhavāritagato.
‘‘сад̇ивзбуллаббад̇д̇о’’д̇и зд̇зна аббавад̇д̇амаанааяаби сад̇ияаа сад̇иб̣ахулад̇ааяа сад̇о зва наамаад̇и д̣̇ассзд̇и. ‘‘яат̇аабарижчиннагаалавасзнаа’’д̇и зд̇зна барижчиннасад̇ияаа сад̇од̇и д̣̇ассзд̇и.
‘‘Sativepullappatto’’ti etena appavattamānāyapi satiyā satibahulatāya sato eva nāmāti dasseti. ‘‘Yathāparicchinnakālavasenā’’ti etena paricchinnasatiyā satoti dasseti.
вагкамаанзнаад̇и ‘‘бийд̇ипаран̣аа’’д̇иаад̣̇инаа ананд̇арам̣ вагкамаанзна. ‘‘бийд̇ипаран̣ад̇аа’’д̇и бана баал̣и ааг̇ад̇аа. д̇ам̣ ‘‘бан̃жан̇г̇иго саммаасамаад̇хий’’д̇и (д̣̇ий. ни. 3.355) самаад̇хиан̇г̇абхаавзна бан̃н̃аа уд̣̇д̣̇идтаад̇и гад̇ваа вуд̇д̇ам̣. д̇ад̇о зва адтагат̇ааяам̣ ‘‘бийд̇ипаран̣ад̇аа’’д̇иаад̣̇ийнан̃жа ад̇т̇асам̣ван̣н̣анаа гад̇аа. д̇ад̇т̇а ‘‘со имамзва гааяам̣ вивзгаж̇зна бийд̇исукзна абхисанд̣̇зд̇ий’’д̇иаад̣̇инаа (д̣̇ий. ни. 1.226) наязна бийд̇ияаа, сукасса жа паран̣ам̣ взд̣̇ид̇аб̣б̣ам̣. сзсам̣ сувин̃н̃зяяамзва.
Vakkhamānenāti ‘‘pītipharaṇā’’tiādinā anantaraṃ vakkhamānena. ‘‘Pītipharaṇatā’’ti pana pāḷi āgatā. Taṃ ‘‘pañcaṅgiko sammāsamādhī’’ti (dī. ni. 3.355) samādhiaṅgabhāvena paññā uddiṭṭhāti katvā vuttaṃ. Tato eva aṭṭhakathāyaṃ ‘‘pītipharaṇatā’’tiādīnañca atthasaṃvaṇṇanā katā. Tattha ‘‘so imameva kāyaṃ vivekajena pītisukhena abhisandetī’’tiādinā (dī. ni. 1.226) nayena pītiyā, sukhassa ca pharaṇaṃ veditabbaṃ. Sesaṃ suviññeyyameva.
самаад̇хивасзна самат̇о уд̣̇д̇хадод̇и сабхаававасзна самат̇о уд̣̇д̇хадо, на убагаарагад̇хаммавасзнаад̇и ад̇хиббааяо.
Samādhivasena samatho uddhaṭoti sabhāvavasena samatho uddhaṭo, na upakārakadhammavasenāti adhippāyo.
55. рааг̇абадибагкад̇д̇аа самаад̇хисса ‘‘ад̇хижид̇д̇асигкааяа сигканд̇о’’д̇и вуд̇д̇ам̣. вуд̇д̇анаяаанусаарзнаад̇и ‘‘сукабан̣ид̇хиаад̣̇исамуг̇гхааданзна аббан̣ихид̇о’’д̇иаад̣̇инаа. зд̇т̇а жа сан̇каараанам̣ кан̣абхан̇г̇урад̇ам̣ саммад̣̇зва бассанд̇асса на рааг̇о бад̇идтам̣ лабхад̇ийд̇и анижжаанубассанаа рааг̇ажарид̇асса саббааяаа вуд̇д̇аа, д̇ат̇аа сан̇каараанам̣ сабхаавад̣̇угкад̇ам̣ саммад̣̇зва бассанд̇асса багад̇ияааби д̣̇угкид̇зсу д̣̇угкуббаад̣̇анам̣ ван̣з каарод̣̇агасзгасад̣̇исанд̇и на д̣̇осо бад̇идтам̣ лабхад̇ийд̇и д̣̇угкаанубассанаа д̣̇осажарид̇асса саббааяаа вуд̇д̇аа, д̇ат̇аа сан̇каарзсу саммад̣̇зва гханавиниб̣бхог̇з гад̇з ад̇д̇асун̃н̃ад̇ааяа убадтахамаанааяа на мохо бад̇идтам̣ лабхад̇ийд̇и анад̇д̇аанубассанаа мохажарид̇асса саббааяаа вуд̇д̇аад̇и взд̣̇ид̇аб̣б̣ам̣. рааг̇абадибагкад̇д̇аа самаад̇хисса ‘‘ад̇хижид̇д̇асигкааяа сигканд̇о’’д̇и вуд̇д̇ам̣. зса наяо ид̇арзсу. сзсамзд̇т̇а сувин̃н̃зяяам̣.
55. Rāgapaṭipakkhattā samādhissa ‘‘adhicittasikkhāya sikkhanto’’ti vuttaṃ. Vuttanayānusārenāti ‘‘sukhapaṇidhiādisamugghāṭanena appaṇihito’’tiādinā. Ettha ca saṅkhārānaṃ khaṇabhaṅgurataṃ sammadeva passantassa na rāgo patiṭṭhaṃ labhatīti aniccānupassanā rāgacaritassa sappāyā vuttā, tathā saṅkhārānaṃ sabhāvadukkhataṃ sammadeva passantassa pakatiyāpi dukkhitesu dukkhuppādanaṃ vaṇe khārodakasekasadisanti na doso patiṭṭhaṃ labhatīti dukkhānupassanā dosacaritassa sappāyā vuttā, tathā saṅkhāresu sammadeva ghanavinibbhoge kate attasuññatāya upaṭṭhahamānāya na moho patiṭṭhaṃ labhatīti anattānupassanā mohacaritassa sappāyā vuttāti veditabbaṃ. Rāgapaṭipakkhattā samādhissa ‘‘adhicittasikkhāya sikkhanto’’ti vuttaṃ. Esa nayo itaresu. Sesamettha suviññeyyaṃ.
канд̇иб̣ахуло уббаннам̣ арад̇им̣ анабхирад̇им̣ абхибхуяяа вихаранд̇о сукзна самаад̇хим̣ ад̇хиг̇ажчад̇ийд̇и канд̇иббад̇хаанад̇ааби самат̇абагкабхаж̇анасса гааран̣ам̣ вуд̇д̇аа. удтаанам̣ самбаж̇ж̇ад̇ийд̇и самбаннагааяигавийрияам̣. саммаагамманд̇авааяаамаанам̣ яо гааяигаад̣̇ивигаббо вуд̇д̇о баал̣ияам̣, со нзсам̣ гааяигасса баяог̇асса самудтаанавасзна взд̣̇ид̇аб̣б̣о.
Khantibahulo uppannaṃ aratiṃ anabhiratiṃ abhibhuyya viharanto sukhena samādhiṃ adhigacchatīti khantippadhānatāpi samathapakkhabhajanassa kāraṇaṃ vuttā. Uṭṭhānaṃ sampajjatīti sampannakāyikavīriyaṃ. Sammākammantavāyāmānaṃ yo kāyikādivikappo vutto pāḷiyaṃ, so nesaṃ kāyikassa payogassa samuṭṭhānavasena veditabbo.
‘‘киббаад̇хиг̇амо’’д̇и иминаа маг̇г̇аасзванабхаавам̣ д̣̇ассзд̇и. ‘‘вибассанааяа вимуд̇д̇аад̇хиг̇амо’’д̇и иминаа вибассанаанубхаавзна самужчзд̣̇авимуд̇д̇и вигкамбханавимуд̇д̇и вияа самат̇аанубхаавзнаад̇и д̣̇ассзд̇и. логиязхийд̇и ниссаггаважанам̣. маханд̇аананд̇и ул̣аараанам̣, бан̣ийд̇аананд̇и ад̇т̇о.
‘‘Khippādhigamo’’ti iminā maggāsevanabhāvaṃ dasseti. ‘‘Vipassanāya vimuttādhigamo’’ti iminā vipassanānubhāvena samucchedavimutti vikkhambhanavimutti viya samathānubhāvenāti dasseti. Lokiyehīti nissakkavacanaṃ. Mahantānanti uḷārānaṃ, paṇītānanti attho.
56. д̇анд̇и вижаяахаарам̣. висам̣ваад̣̇анахзд̇уунам̣ лобхаад̣̇ийнам̣ баабад̇хаммаанам̣. сод̇хзнд̇од̇и яат̇аа саран̣аад̣̇ивисаяаа ан̃н̃аан̣аад̣̇исам̣гилзсаа на бавад̇д̇анд̇и, звам̣ сод̇хзнд̇о. барибуурзнд̇аад̇и яат̇аа сийлам̣ акан̣д̣аад̣̇ибхаавзна барибун̣н̣ам̣ ход̇и ануунам̣, звам̣ барибуурзнд̇аа.
56.Tanti vicayahāraṃ. Visaṃvādanahetūnaṃ lobhādīnaṃ pāpadhammānaṃ. Sodhentoti yathā saraṇādivisayā aññāṇādisaṃkilesā na pavattanti, evaṃ sodhento. Paripūrentāti yathā sīlaṃ akhaṇḍādibhāvena paripuṇṇaṃ hoti anūnaṃ, evaṃ paripūrentā.
‘‘д̇ат̇аа бадибаж̇ж̇анд̇о’’д̇и иминаа сад̇т̇у махаабад̇игаарабхааво барибун̣н̣о д̣̇ассид̇од̇и батамаваад̣̇з ‘‘д̣̇ассанаабхуумин̃жа бхааванаабхуумин̃жаа’’д̇и вуд̇д̇ам̣.
‘‘Tathāpaṭipajjanto’’ti iminā satthu mahāpatikārabhāvo paripuṇṇo dassitoti paṭhamavāde ‘‘dassanābhūmiñca bhāvanābhūmiñcā’’ti vuttaṃ.
яасса ад̇т̇ааяаад̇и яасса яасса бахаанад̇т̇ааяа. д̇ат̇аа бадибаннассаад̇и яат̇аа асубхаж̇жхаанаад̣̇им̣ баад̣̇агам̣ гад̇ваа анааг̇аамимаг̇г̇аад̣̇иад̇хиг̇амо ход̇и, д̇ат̇аа бадибаннасса.
Yassa atthāyāti yassa yassa pahānatthāya. Tathā paṭipannassāti yathā asubhajjhānādiṃ pādakaṃ katvā anāgāmimaggādiadhigamo hoti, tathā paṭipannassa.
вад̇хид̇анд̇и гхаад̇ид̇ам̣.
Vadhitanti ghātitaṃ.
‘‘мануссабхууд̇о’’д̇и ид̣̇ам̣ буб̣б̣аабараабзгкам̣ гад̇ваа ‘‘бид̇аа мануссабхууд̇о кийн̣аасаво’’д̇и жа д̇ат̇аа ‘‘маад̇аа мануссабхууд̇аа’’д̇и яож̇зд̇аб̣б̣ам̣. бхзд̣̇аануруубасса сааванам̣ ануссааванам̣, бхзд̣̇аануруубзна ваа важанзна вин̃н̃аабанам̣.
‘‘Manussabhūto’’ti idaṃ pubbāparāpekkhaṃ katvā ‘‘pitā manussabhūto khīṇāsavo’’ti ca tathā ‘‘mātā manussabhūtā’’ti yojetabbaṃ. Bhedānurūpassa sāvanaṃ anussāvanaṃ, bhedānurūpena vā vacanena viññāpanaṃ.
57. мануссад̇д̇анд̇и мануссаж̇аад̇ид̇аа. лин̇г̇асамбад̇д̇ийд̇и бурисабхааво. хзд̇ууд̇и мановажийбан̣ид̇хаанасид̣̇д̇хияаа сад̣̇д̇хим̣ буб̣б̣ахзд̇усамбад̣̇аа. сад̇т̇аарад̣̇ассананд̇и сад̇т̇у саммукийбхааво. г̇ун̣асамбад̇д̇ийд̇и абхин̃н̃аасамаабад̇д̇илаабхо. ад̇хигаарод̇и ад̇д̇ано сарийранирабзгкам̣ сад̇т̇у убагаарагаран̣ам̣. чанд̣̇ад̇аад̇и б̣уд̣̇д̇хабхаавааяа д̣̇ал̣хажчанд̣̇ад̇аа анивад̇д̇ид̇хаммад̇аа.
57.Manussattanti manussajātitā. Liṅgasampattīti purisabhāvo. Hetūti manovacīpaṇidhānasiddhiyā saddhiṃ pubbahetusampadā. Satthāradassananti satthu sammukhībhāvo. Guṇasampattīti abhiññāsamāpattilābho. Adhikāroti attano sarīranirapekkhaṃ satthu upakārakaraṇaṃ. Chandatāti buddhabhāvāya daḷhacchandatā anivattidhammatā.
на уббаж̇ж̇анд̇ийд̇и бана ад̇т̇ийд̇и ‘‘на мз аажарияо ад̇т̇и, сад̣̇исо мз на виж̇ж̇ад̇ий’’д̇иаад̣̇и (ма. ни. 1.285; 2.341; гат̇аа. 405; махаава. 11; ми. ба. 4.5.11) имиссаа логад̇хаад̇уяаа тад̇ваа вад̣̇анд̇зна бхаг̇авад̇аа ‘‘гим̣ банаавусо саарибуд̇д̇а, ад̇т̇зд̇арахи ан̃н̃о саман̣о ваа б̣раахман̣о ваа бхаг̇авад̇о самасамо самб̣од̇хияанд̇и звам̣ будто ахам̣, бханд̇з, ‘но’д̇и вад̣̇зяяа’’нд̇и (д̣̇ий. ни. 3.161) вад̇ваа д̇асса гааран̣ам̣ д̣̇ассзд̇ум̣ ‘‘адтаанамзд̇ам̣ анавагаасо, яам̣ згиссаа логад̇хаад̇уяаа д̣̇вз араханд̇о саммаасамб̣уд̣̇д̇хаа’’д̇и (д̣̇ий. ни. 3.161; а. ни. 1.277) имам̣ суд̇д̇ам̣ д̣̇ассзнд̇зна д̇хаммасзнаабад̇инаава б̣уд̣̇д̇хакзд̇д̇абхууд̇ам̣ имам̣ логад̇хаад̇ум̣ табзд̇ваа ан̃н̃ад̇т̇а ануббад̇д̇и вуд̇д̇аа ход̇ийд̇и ад̇хиббааяо.
Na uppajjantīti pana atthīti ‘‘na me ācariyo atthi, sadiso me na vijjatī’’tiādi (ma. ni. 1.285; 2.341; kathā. 405; mahāva. 11; mi. pa. 4.5.11) imissā lokadhātuyā ṭhatvā vadantena bhagavatā ‘‘kiṃ panāvuso sāriputta, atthetarahi añño samaṇo vā brāhmaṇo vā bhagavato samasamo sambodhiyanti evaṃ puṭṭho ahaṃ, bhante, ‘no’ti vadeyya’’nti (dī. ni. 3.161) vatvā tassa kāraṇaṃ dassetuṃ ‘‘aṭṭhānametaṃ anavakāso, yaṃ ekissā lokadhātuyā dve arahanto sammāsambuddhā’’ti (dī. ni. 3.161; a. ni. 1.277) imaṃ suttaṃ dassentena dhammasenāpatināva buddhakhettabhūtaṃ imaṃ lokadhātuṃ ṭhapetvā aññattha anuppatti vuttā hotīti adhippāyo.
кзд̇д̇абариг̇г̇ахо гад̇о наама ход̇и ‘‘ид̣̇ам̣ б̣уд̣̇д̇хакзд̇д̇ам̣ наамаа’’д̇и.
Khettapariggaho kato nāma hoti ‘‘idaṃ buddhakhettaṃ nāmā’’ti.
звам̣ таанаадтаанабхаавам̣ г̇ад̇аад̇и вуд̇д̇аббагаарзна таанабхууд̇аа, вуд̇д̇анаязна ваа ан̃н̃зби яат̇аарахам̣ таанаадтаанабхаавзна бавад̇д̇аа. сад̇д̇абан̃н̃ад̇д̇ияаа убаад̣̇аанабхууд̇аад̇и инд̣̇рияаб̣ад̣̇д̇хз канд̇хз санд̇хааяа вад̣̇ад̇и.
Evaṃ ṭhānāṭṭhānabhāvaṃ gatāti vuttappakārena ṭhānabhūtā, vuttanayena vā aññepi yathārahaṃ ṭhānāṭṭhānabhāvena pavattā. Sattapaññattiyā upādānabhūtāti indriyabaddhe khandhe sandhāya vadati.
58. паласса бажжагкагаарид̇аад̇и ‘‘имасса гаммасса ид̣̇ам̣ пала’’нд̇и д̇ам̣д̇ам̣гаммапалааваб̣од̇хо. аббад̣̇аанаабхаавод̇и бажжаяасамавааяз гаммасса зганд̇ад̇о палуббаад̣̇анам̣. д̇знааха ‘‘гад̇уубажид̇аана’’нд̇и.
58.Phalassapaccakkhakāritāti ‘‘imassa kammassa idaṃ phala’’nti taṃtaṃkammaphalāvabodho. Appadānābhāvoti paccayasamavāye kammassa ekantato phaluppādanaṃ. Tenāha ‘‘katūpacitāna’’nti.
59. аж̇жхосид̇авад̇т̇унаад̇и д̇ан̣хаабхинивзсавасзна абхинивидтавад̇т̇унаа. руубабхавааруубабхаваад̣̇инаад̇и бхавад̇ан̣хаа вияа саяам̣ д̣̇ассзд̇и.
59.Ajjhositavatthunāti taṇhābhinivesavasena abhiniviṭṭhavatthunā. Rūpabhavaarūpabhavādināti bhavataṇhā viya sayaṃ dasseti.
канд̇хад̇д̇аяавасзнаад̇и сийлаад̣̇игканд̇хад̇д̇аяавасзна. бадибад̣̇аавибхааг̇знаад̇и ‘‘саб̣б̣ад̇т̇аг̇ааминий’’д̇и аад̣̇ибадибад̣̇ааяа бхзд̣̇зна.
Khandhattayavasenāti sīlādikkhandhattayavasena. Paṭipadāvibhāgenāti ‘‘sabbatthagāminī’’ti ādipaṭipadāya bhedena.
д̇ад̇т̇ад̇ад̇т̇аг̇ааминийд̇и нираяаад̣̇иниб̣б̣аананд̇и д̣̇вийсу г̇анд̇хаб̣б̣адтаанзсу д̇ад̇т̇а д̇ад̇т̇зва г̇аманасийлаа. саб̣б̣ад̇т̇аг̇ааминийд̇и яат̇аавуд̇д̇зсу саб̣б̣адтаанзсу жа г̇аманасийлаа.
Tatthatatthagāminīti nirayādinibbānanti dvīsu gandhabbaṭṭhānesu tattha tattheva gamanasīlā. Sabbatthagāminīti yathāvuttesu sabbaṭṭhānesu ca gamanasīlā.
сан̃ж̇ийво гаал̣асуд̇д̇ам̣ сан̇гхаад̇о роруво махаароруво д̇аабано махаад̇аабано авийжийд̇и зд̇з адта махаанираяаа. згзгасса жад̇д̇аари жад̇д̇аари д̣̇ваараани, згзгасмим̣ д̣̇ваарз жад̇д̇ааро жад̇д̇ааро г̇уут̇анираяаад̣̇аяод̇и звам̣ сол̣аса уссад̣̇анираяз ван̣н̣знд̇и.
Sañjīvo kāḷasuttaṃ saṅghāto roruvo mahāroruvo tāpano mahātāpano avīcīti ete aṭṭha mahānirayā. Ekekassa cattāri cattāri dvārāni, ekekasmiṃ dvāre cattāro cattāro gūthanirayādayoti evaṃ soḷasa ussadaniraye vaṇṇenti.
саггасуяаамаад̣̇иго ж̇здтагад̣̇зварааж̇аа. баж̇аабад̇иварун̣аийсаанаад̣̇аяо вияа д̣̇уд̇ияаад̣̇идтаананд̇арагаараго барижаараго.
Sakkasuyāmādiko jeṭṭhakadevarājā. Pajāpativaruṇaīsānādayo viya dutiyādiṭṭhānantarakārako paricārako.
гилзсагаамабагкзд̇и ‘‘сан̇габбо гаамо, рааг̇о гаамо, сан̇габбарааг̇о гаамод̇и (махаани. 1) зд̇т̇а вуд̇д̇асан̇габбавасзна вуд̇д̇ам̣. соби хи виб̣аад̇хад̇и, убад̇аабзд̇и жаад̇и гилзсад̇д̇асамбхавад̇о гилзсагаамо вуд̇д̇о, на гилзсавад̇т̇убхаавад̇о. гаамабадисам̣яуд̇д̇од̇и гаамарааг̇асан̇каад̇зна гаамзна самбаяуд̇д̇о, гаамабадиб̣ад̣̇д̇хо ваа. ан̃н̃зсу жа гаамабадисам̣яуд̇д̇зсу д̇хаммзсу виж̇ж̇амаанзсу вид̇аггз зва гаамасад̣̇д̣̇о д̇хаад̇усад̣̇д̣̇о нирул̣ход̇и взд̣̇ид̇аб̣б̣о вид̇аггасса гаамасан̇габбавуд̇д̇ияаа саад̇исаяад̇д̇аа. зса наяо б̣яаабаад̣̇ад̇хаад̇уаад̣̇ийсу. барасса, ад̇д̇ано жа д̣̇угкаабанам̣ вихим̣саа. д̇ам̣ д̇у мижчаахи вихим̣саа.
Kilesakāmapakkheti ‘‘saṅkappo kāmo, rāgo kāmo, saṅkapparāgo kāmoti (mahāni. 1) ettha vuttasaṅkappavasena vuttaṃ. Sopi hi vibādhati, upatāpeti cāti kilesattasambhavato kilesakāmo vutto, na kilesavatthubhāvato. Kāmapaṭisaṃyuttoti kāmarāgasaṅkhātena kāmena sampayutto, kāmapaṭibaddho vā. Aññesu ca kāmapaṭisaṃyuttesu dhammesu vijjamānesu vitakke eva kāmasaddo dhātusaddo niruḷhoti veditabbo vitakkassa kāmasaṅkappavuttiyā sātisayattā. Esa nayo byāpādadhātuādīsu. Parassa, attano ca dukkhāpanaṃ vihiṃsā. Taṃ tu micchāhi vihiṃsā.
б̣ийж̇аад̣̇ид̇хаад̇унаанад̇д̇авасзна канд̇хаад̣̇инаанад̇д̇ам̣ взд̣̇ид̇аб̣б̣ам̣. канд̇ход̇и д̣̇вид̇хаабхууд̇аг̇г̇о.
Bījādidhātunānattavasena khandhādinānattaṃ veditabbaṃ. Khandhoti dvidhābhūtaggo.
60. аж̇жхаасаяад̇хаад̇ууд̇и аж̇жхаасаяасабхааво. яат̇аа г̇уут̇аад̣̇ийнам̣ сабхааво зсо яам̣ г̇уут̇аад̣̇ийхзва сам̣санд̣̇ад̇и, звам̣ буг̇г̇алаанам̣ аж̇жхаасаяассзвзса сабхааво, яам̣ д̣̇уссийлаад̣̇аяо д̣̇уссийлаад̣̇игзхзва сам̣санд̣̇анд̇и.
60.Ajjhāsayadhātūti ajjhāsayasabhāvo. Yathā gūthādīnaṃ sabhāvo eso yaṃ gūthādīheva saṃsandati, evaṃ puggalānaṃ ajjhāsayassevesa sabhāvo, yaṃ dussīlādayo dussīlādikeheva saṃsandanti.
сад̣̇д̇хаамуулагад̇д̇аа гусалагирияааяа вуд̇д̇ам̣ ‘‘яам̣ сад̣̇д̇хаавасзнаа’’д̇иаад̣̇и. д̇ат̇аа хи вуд̇д̇ам̣ ‘‘сад̣̇д̇хаа б̣ийж̇а’’нд̇и (су. ни. 77). яам̣ лобхавасзна, сад̣̇д̇хаавасзна жа д̣̇осавасзна, сад̣̇д̇хаавасзна жа мохавасзна , сад̣̇д̇хаавасзна жаад̇и яож̇зд̇аб̣б̣ам̣. вийрияавасзнаад̇и саммаббад̇хаанавийрияавасзна. бан̃н̃аавасзнаад̇и маг̇г̇асаммаад̣̇идтивасзна.
Saddhāmūlakattā kusalakiriyāya vuttaṃ ‘‘yaṃ saddhāvasenā’’tiādi. Tathā hi vuttaṃ ‘‘saddhā bīja’’nti (su. ni. 77). Yaṃ lobhavasena, saddhāvasena ca dosavasena, saddhāvasena ca mohavasena , saddhāvasena cāti yojetabbaṃ. Vīriyavasenāti sammappadhānavīriyavasena. Paññāvasenāti maggasammādiṭṭhivasena.
агусаласса гаммасса гад̇огаасад̇ааяа баал̣ияам̣ вуд̇д̇ад̇д̇аа ‘‘вибаагааваран̣зна нивуд̇а’’нд̇и вуд̇д̇ам̣. д̇ам̣ бана нид̣̇ассанамад̇д̇ам̣ д̣̇адтаб̣б̣ам̣ гаммааваран̣аад̣̇ийхиби нивуд̇ад̇ааяа ижчид̇ад̇д̇аа. д̇ат̇аа хи яат̇аа д̣̇звад̣̇ад̇д̇ам̣ гогаалигам̣ сунагкад̇д̇ам̣ лижчавибуд̇д̇анд̇и уд̣̇аахадам̣, яад̣̇иби бхаг̇аваа бадивзд̇хасса адтаанад̇ам̣ д̣̇исваа ниб̣б̣зд̇хабхааг̇ияад̣̇зсанам̣ на д̣̇зсзд̇и, ваасанаабхааг̇ияам̣ бана д̇ат̇ааруубасса д̣̇зсзд̇и зваад̇и д̣̇ассзнд̇о ‘‘сажжаббадивзд̇ха’’нд̇иаад̣̇имааха. аж̇аад̇асад̇д̇уаад̣̇ийнанд̇и аад̣̇исад̣̇д̣̇зна сажжагаад̣̇ийнам̣ сан̇г̇ахо д̣̇адтаб̣б̣о. д̇ассааби бхаг̇аваа анааг̇ад̇з ваасанад̇т̇ааяа д̇хаммам̣ д̣̇зсзси. сад̇т̇аа хи ‘‘анааг̇ад̇з д̇амб̣абан̣н̣ид̣̇ийбз саасанам̣ бад̇идтахиссад̇ий’’д̇и д̇ад̇т̇ааяам̣ гулагхарз ниб̣б̣ад̇д̇о баб̣б̣аж̇ид̇ваа гаал̣аб̣уд̣̇д̇харагкид̇ад̇т̇зро наама бабхиннабадисамбхид̣̇о махаакийн̣аасаво бхависсад̇ийд̇и ид̣̇ам̣ д̣̇исваа д̇хаммам̣ д̣̇зсзси, со жа д̇ат̇аа ахосийд̇и.
Akusalassa kammassa katokāsatāya pāḷiyaṃ vuttattā ‘‘vipākāvaraṇena nivuta’’nti vuttaṃ. Taṃ pana nidassanamattaṃ daṭṭhabbaṃ kammāvaraṇādīhipi nivutatāya icchitattā. Tathā hi yathā devadattaṃ kokālikaṃ sunakkhattaṃ licchaviputtanti udāhaṭaṃ, yadipi bhagavā paṭivedhassa aṭṭhānataṃ disvā nibbedhabhāgiyadesanaṃ na deseti, vāsanābhāgiyaṃ pana tathārūpassa deseti evāti dassento ‘‘saccappaṭivedha’’ntiādimāha. Ajātasattuādīnanti ādisaddena saccakādīnaṃ saṅgaho daṭṭhabbo. Tassāpi bhagavā anāgate vāsanatthāya dhammaṃ desesi. Satthā hi ‘‘anāgate tambapaṇṇidīpe sāsanaṃ patiṭṭhahissatī’’ti tatthāyaṃ kulaghare nibbatto pabbajitvā kāḷabuddharakkhitatthero nāma pabhinnapaṭisambhido mahākhīṇāsavo bhavissatīti idaṃ disvā dhammaṃ desesi, so ca tathā ahosīti.
асамбун̣н̣зд̇и зганд̇ад̇о вибаагад̣̇аанасамад̇т̇ад̇аавасзна баарибуурим̣ анубаг̇ад̇з. д̣̇идтубаниссаяад̣̇идтисахаг̇ад̇асса гаммам̣ санд̇хааяа ‘‘гаммз асамбун̣н̣з’’д̇и вуд̇д̇ам̣. д̇знааха ‘‘гилзсанд̇арааяа миссагам̣ гамманд̇арааяам̣ д̣̇ассзд̇ваа’’д̇и.
Asampuṇṇeti ekantato vipākadānasamatthatāvasena pāripūriṃ anupagate. Diṭṭhupanissayadiṭṭhisahagatassa kammaṃ sandhāya ‘‘kamme asampuṇṇe’’ti vuttaṃ. Tenāha ‘‘kilesantarāya missakaṃ kammantarāyaṃ dassetvā’’ti.
61. д̣̇идти банзд̇т̇а бад̇хаанабхаавзна баал̣ияам̣ г̇ахид̇аа сийлаб̣б̣ад̇абараамаасасса ад̇хиббзд̇ад̇д̇аа. д̇ат̇аа хи вуд̇д̇ам̣ ‘‘яат̇аа бун̣н̣ан̃жа г̇овад̇игам̣, ажзлан̃жа гуггуравад̇ига’’нд̇и. асамбун̣н̣ад̇д̇аа зва хи д̇асса мижчаад̣̇идтигаммасамаад̣̇аанасса д̇зсам̣ бхаг̇аваа ‘‘жад̇д̇ааримаани, бун̣н̣а, гаммааний’’д̇иаад̣̇инаа (ма. ни. 2.81) д̇хаммам̣ д̣̇зсзси. д̇ааяа жа д̣̇зсанааяа д̇з д̇ам̣ д̣̇идтим̣ бадиниссаж̇ж̇ид̇ваа саммад̇д̇з бад̇идтахим̣су.
61. Diṭṭhi panettha padhānabhāvena pāḷiyaṃ gahitā sīlabbataparāmāsassa adhippetattā. Tathā hi vuttaṃ ‘‘yathā puṇṇañca govatikaṃ, acelañca kukkuravatika’’nti. Asampuṇṇattā eva hi tassa micchādiṭṭhikammasamādānassa tesaṃ bhagavā ‘‘cattārimāni, puṇṇa, kammānī’’tiādinā (ma. ni. 2.81) dhammaṃ desesi. Tāya ca desanāya te taṃ diṭṭhiṃ paṭinissajjitvā sammatte patiṭṭhahiṃsu.
62. баг̇ун̣ад̇ааяа вод̣̇аанам̣ баг̇ун̣авод̣̇аанам̣. д̇ад̣̇зва батамаж̇жхаанаад̣̇ийхи вудтахид̇ваа д̣̇уд̇ияаж̇жхаанаад̣̇иад̇хиг̇амасса бажжаяад̇д̇аа вудтаанам̣ наама ход̇ийд̇и ааха ‘‘вудтаанам̣ баг̇ун̣авод̣̇аана’’нд̇и. бхаван̇г̇авудтаанам̣ бхаван̇г̇уббад̇д̇и. бхаван̇г̇ажид̇д̇з хи уббаннз д̇ам̣саман̇г̇исамаабад̇д̇ид̇о вудтид̇о наама ход̇и. сан̃н̃аавзд̣̇аяид̇аабаг̇амо зва абаг̇амавимогко.
62. Paguṇatāya vodānaṃ paguṇavodānaṃ. Tadeva paṭhamajjhānādīhi vuṭṭhahitvā dutiyajjhānādiadhigamassa paccayattā vuṭṭhānaṃ nāma hotīti āha ‘‘vuṭṭhānaṃ paguṇavodāna’’nti. Bhavaṅgavuṭṭhānaṃ bhavaṅguppatti. Bhavaṅgacitte hi uppanne taṃsamaṅgisamāpattito vuṭṭhito nāma hoti. Saññāvedayitaapagamo eva apagamavimokkho.
ид̣̇ам̣ вудтаананд̇и ид̣̇ам̣ яат̇аавуд̇д̇ам̣ госаллам̣ вудтаанахзд̇убхаавад̇о вудтаанам̣. д̇ат̇аа хи вуд̇д̇ам̣ ‘‘вод̣̇аанамби д̇амхаа д̇амхаа самаад̇химхаа вудтаана’’нд̇и (вибха. 828). имааяа бана вудтаанабаал̣ияаа асан̇г̇ахид̇ад̇д̇аа ‘‘нирод̇хасамаабад̇д̇ияаа вудтаанам̣ баал̣имуд̇д̇агавудтаанам̣ наамаа’’д̇и саммохавинод̣̇анияам̣ (вибха. адта. 828) вуд̇д̇ам̣. яз бана ‘‘нирод̇хад̇о паласамаабад̇д̇ияаа вудтаана’’нд̇и баал̣ияам̣ над̇т̇ийд̇и вад̣̇зяяум̣, д̇з ‘‘нирод̇хаа вудтаханд̇асса нзвасан̃н̃аанаасан̃н̃ааяад̇анам̣ паласамаабад̇д̇ияаа ананд̇арабажжаязна бажжаяо’’д̇и (бадтаа. 1.1.417) имааяа баал̣ияаа бадисзд̇хзд̇аб̣б̣аа.
Idaṃ vuṭṭhānanti idaṃ yathāvuttaṃ kosallaṃ vuṭṭhānahetubhāvato vuṭṭhānaṃ. Tathā hi vuttaṃ ‘‘vodānampi tamhā tamhā samādhimhā vuṭṭhāna’’nti (vibha. 828). Imāya pana vuṭṭhānapāḷiyā asaṅgahitattā ‘‘nirodhasamāpattiyā vuṭṭhānaṃ pāḷimuttakavuṭṭhānaṃ nāmā’’ti sammohavinodaniyaṃ (vibha. aṭṭha. 828) vuttaṃ. Ye pana ‘‘nirodhato phalasamāpattiyā vuṭṭhāna’’nti pāḷiyaṃ natthīti vadeyyuṃ, te ‘‘nirodhā vuṭṭhahantassa nevasaññānāsaññāyatanaṃ phalasamāpattiyā anantarapaccayena paccayo’’ti (paṭṭhā. 1.1.417) imāya pāḷiyā paṭisedhetabbā.
63. аяам̣ жасса аасаяод̇и зд̇т̇а аасаяаж̇аананаад̣̇инаа язхи инд̣̇риязхи язхи баробарзхи сад̇д̇аа галяаан̣абаабаасаяаад̣̇игаа хонд̇и, д̇зсам̣ баж̇аананам̣ вибхаавзд̇ийд̇и взд̣̇ид̇аб̣б̣ам̣. зван̃жа гад̇ваа инд̣̇рияабаробарияад̇д̇ааасаяаанусаяан̃аан̣аанам̣ висум̣ асаад̇хааран̣ад̇аа, инд̣̇рияабаробарияад̇д̇анаанаад̇химуд̇д̇игад̇аан̃аан̣аанам̣ висум̣ б̣алад̇аа жа сид̣̇д̇хаа ход̇и.
63.Ayaṃ cassa āsayoti ettha āsayajānanādinā yehi indriyehi yehi paroparehi sattā kalyāṇapāpāsayādikā honti, tesaṃ pajānanaṃ vibhāvetīti veditabbaṃ. Evañca katvā indriyaparopariyattaāsayānusayañāṇānaṃ visuṃ asādhāraṇatā, indriyaparopariyattanānādhimuttikatāñāṇānaṃ visuṃ balatā ca siddhā hoti.
т̇аамаг̇ад̇од̇и зд̇т̇а т̇аамаг̇аманам̣ наама ан̃н̃зсам̣ асаад̇хааран̣о гаамарааг̇аад̣̇ийнам̣ зва аавзн̣иго сабхааво взд̣̇ид̇аб̣б̣о, яад̇о ‘‘т̇аамаг̇ад̇о анусаяам̣ баж̇ахад̇ий’’д̇и (бади. ма. 3.21) вуд̇д̇ам̣.
Thāmagatoti ettha thāmagamanaṃ nāma aññesaṃ asādhāraṇo kāmarāgādīnaṃ eva āveṇiko sabhāvo veditabbo, yato ‘‘thāmagato anusayaṃ pajahatī’’ti (paṭi. ma. 3.21) vuttaṃ.
ааваж̇ж̇анамад̇д̇знзва сарад̇и ааган̇кааяад̇д̇авуд̇д̇игад̇д̇аа. вуд̇д̇ан̃хи ‘‘ааган̇кабадиб̣ад̣̇д̇хам̣ б̣уд̣̇д̇хасса бхаг̇авад̇о н̃аан̣ам̣, манасигаарабадиб̣ад̣̇д̇хам̣ б̣уд̣̇д̇хасса бхаг̇авад̇о н̃аан̣а’’нд̇иаад̣̇и (махаани. 156; жуул̣ани. могхарааж̇амаан̣авабужчаанид̣̇д̣̇зса 85; бади. ма. 3.5). саб̣б̣ан̃н̃уд̇ан̃н̃аан̣ам̣ вияа хи саб̣б̣ам̣ бхаг̇авад̇о н̃аан̣ам̣ баригамманирабзгканд̇и.
Āvajjanamatteneva sarati ākaṅkhāyattavuttikattā. Vuttañhi ‘‘ākaṅkhapaṭibaddhaṃ buddhassa bhagavato ñāṇaṃ, manasikārapaṭibaddhaṃ buddhassa bhagavato ñāṇa’’ntiādi (mahāni. 156; cūḷani. mogharājamāṇavapucchāniddesa 85; paṭi. ma. 3.5). Sabbaññutaññāṇaṃ viya hi sabbaṃ bhagavato ñāṇaṃ parikammanirapekkhanti.
64. убаггилзсавимуд̇д̇ад̇д̇аад̇и зд̇т̇а жид̇д̇аад̣̇и зва убаггилзсаа, ниб̣б̣ад̇д̇агасса ваа гаммасса баариб̣анд̇хагилзсаа. гасин̣агаммабаригаммажхаананиб̣б̣ад̇д̇анагасин̣абхааво жуд̣̇д̣̇асавид̇хзна жид̇д̇абарид̣̇аманам̣ абхин̃н̃аабхинийхаарод̇и саб̣б̣ад̇т̇ааби вийрияаб̣аласса б̣ахуубагаарад̇д̇аа вуд̇д̇ам̣ ‘‘вийрияабхааванааб̣аланиб̣б̣ад̇д̇а’’нд̇и. д̣̇иб̣б̣асад̣̇исад̇д̇аад̇и д̣̇иб̣б̣з бхаванд̇и д̣̇иб̣б̣ам̣, яат̇аавуд̇д̇ам̣ басаад̣̇ажагку, д̣̇иб̣б̣ам̣ вияаад̇и д̣̇иб̣б̣ам̣, аг̇г̇ад̇ам̣ абхин̃н̃аан̣ам̣. д̣̇иб̣б̣авихааро жад̇д̇аари руубааважараж̇жхаанаани. д̇зсам̣ васзна ниб̣б̣ад̇д̇ид̇ваа бадилад̣̇д̇хаб̣б̣ад̇д̇аа д̣̇иб̣б̣ам̣, д̇зна д̣̇иб̣б̣ахзд̇угад̇д̇аа д̣̇иб̣б̣анд̇и вуд̇д̇анд̇и д̣̇ассзд̇и. д̣̇иб̣б̣авихаарасанниссид̇ад̇д̇аад̇и руубааважаражад̇уд̇т̇аж̇жхаанзна ниссаяабажжаязна ниб̣б̣ад̇д̇ад̇д̇аа, д̇зна д̣̇иб̣б̣аниссид̇ам̣ д̣̇иб̣б̣анд̇и д̣̇ассзд̇и. д̣̇ивусад̣̇д̣̇ам̣ агкаражинд̇агаа гийл̣аад̣̇ийсу батанд̇ийд̇и вуд̇д̇ам̣ ‘‘д̇ам̣ саб̣б̣ам̣ сад̣̇д̣̇асад̇т̇аанусаарзна взд̣̇ид̇аб̣б̣а’’нд̇и. буримаа хи д̇аяо ад̇т̇аа гийл̣ад̇т̇асса васзна, ид̇арз ж̇уд̇иг̇ад̇иад̇т̇авасзнзва д̣̇ассид̇аад̇и.
64.Upakkilesavimuttattāti ettha cittādi eva upakkilesā, nibbattakassa vā kammassa pāribandhakilesā. Kasiṇakammaparikammajhānanibbattanakasiṇabhāvo cuddasavidhena cittaparidamanaṃ abhiññābhinīhāroti sabbatthāpi vīriyabalassa bahūpakārattā vuttaṃ ‘‘vīriyabhāvanābalanibbatta’’nti. Dibbasadisattāti dibbe bhavanti dibbaṃ, yathāvuttaṃ pasādacakkhu, dibbaṃ viyāti dibbaṃ, aggataṃ abhiññāṇaṃ. Dibbavihāro cattāri rūpāvacarajjhānāni. Tesaṃ vasena nibbattitvā paṭiladdhabbattā dibbaṃ, tena dibbahetukattā dibbanti vuttanti dasseti. Dibbavihārasannissitattāti rūpāvacaracatutthajjhānena nissayapaccayena nibbattattā, tena dibbanissitaṃ dibbanti dasseti. Divusaddaṃ akkharacintakā kīḷādīsu paṭhantīti vuttaṃ ‘‘taṃ sabbaṃ saddasatthānusārena veditabba’’nti. Purimā hi tayo atthā kīḷatthassa vasena, itare jutigatiatthavaseneva dassitāti.
мануссуубажааранд̇и мануссаг̇ожарам̣. д̣̇адтум̣ на саггаа ид̇д̇аракан̣ад̇д̇аа кан̣абажжуббаннасса. ‘‘аасаннажуд̇игаа’’д̇иаад̣̇инаа санд̇ад̇ибажжуббаннавасзна ‘‘жавамаанз убабаж̇ж̇амаанз’’д̇и вуд̇д̇анд̇и д̣̇ассзд̇и. ‘‘моханиссанд̣̇аяуд̇д̇ад̇д̇аа’’д̇иаад̣̇инаа сад̇д̇аанам̣ хийнабан̣ийд̇ад̇д̇аад̣̇ибхаавасса мохаад̣̇игамманид̣̇аанахзд̇угад̇ам̣, ниссанд̣̇апалад̇ан̃жа д̣̇ассзд̇и. д̣̇иб̣б̣ажагкусса баад̣̇агам̣ зд̇зсанд̇и д̣̇иб̣б̣ажагкубаад̣̇агаани. д̇зна вуд̇д̇ам̣ ‘‘д̣̇иб̣б̣ажагкунаа сахзва иж̇жханд̇ий’’д̇и. д̇аани хисса барибхан̣д̣ан̃аан̣аани.
Manussūpacāranti manussagocaraṃ. Daṭṭhuṃ na sakkā ittarakhaṇattā khaṇapaccuppannassa. ‘‘Āsannacutikā’’tiādinā santatipaccuppannavasena ‘‘cavamāne upapajjamāne’’ti vuttanti dasseti. ‘‘Mohanissandayuttattā’’tiādinā sattānaṃ hīnapaṇītattādibhāvassa mohādikammanidānahetukataṃ, nissandaphalatañca dasseti. Dibbacakkhussa pādakaṃ etesanti dibbacakkhupādakāni. Tena vuttaṃ ‘‘dibbacakkhunā saheva ijjhantī’’ti. Tāni hissa paribhaṇḍañāṇāni.
самаад̣̇ийяанд̇ийд̇и самаад̣̇аанаани, гаммаани самаад̣̇аанаани зд̇зсанд̇и гаммасамаад̣̇аанаа. самаад̣̇аад̇аб̣б̣анаанаавид̇хагаммаад̇и ад̇т̇о буримз ад̇т̇з, д̣̇уд̇ияз бана гаммаани самаад̣̇аабзнд̇ийд̇и гаммасамаад̣̇аанаа, мижчаад̣̇идтияаа гаммасамаад̣̇аанаа мижчаад̣̇идтигаммасамаад̣̇аанаа, хзд̇уад̇т̇з жзд̇ам̣ гаран̣аважанам̣.
Samādīyantīti samādānāni, kammāni samādānāni etesanti kammasamādānā. Samādātabbanānāvidhakammāti attho purime atthe, dutiye pana kammāni samādāpentīti kammasamādānā, micchādiṭṭhiyā kammasamādānā micchādiṭṭhikammasamādānā, hetuatthe cetaṃ karaṇavacanaṃ.
д̇ам̣ ваажанд̇и д̇ам̣ арияаанам̣ убавад̣̇анаваажам̣. д̇ам̣ жид̇д̇анд̇и самудтаабагажид̇д̇ам̣. д̇ам̣ д̣̇идтинд̇и язна мижчааг̇аахзна арияз ануд̣̇д̇хам̣сзд̇и, мижчаабхинивзсам̣. аяамбзд̇т̇а ад̇т̇о – яат̇аа наама хзд̇усамбаннасса бхигкуно висуд̣̇д̇хам̣ сийлам̣, самаад̇хин̃жа самбаад̣̇зд̇ваа тид̇асса д̣̇анд̇хо сад̇уббаад̣̇о киббаабхин̃н̃ааяа д̣̇идтзва д̇хаммз ан̃н̃аа, сад̇и ваа убаад̣̇исзсз анааг̇аамид̇аа. звамзвам̣ яо арияуубаваад̣̇ий яат̇аавуд̇д̇ажид̇д̇ад̣̇идтийхи абаггамид̇ваа аббад̇ируубам̣ сабхаавам̣ ‘‘маяаа, бханд̇з, д̇умхаагам̣ убари вуд̇д̇а’нд̇и ажжаяад̣̇зсанааяа д̇з на камаабзд̇и, со гааяасса бхзд̣̇аа нираяз зваад̇и. д̇зсу басаннажид̇д̇асса камаабанан̃хзд̇т̇а д̇зсам̣ ваажаад̣̇ийнам̣ бахаанам̣ бадиниссаг̇г̇ова. ид̇о сааваж̇ж̇ад̇арам̣ наама ан̃н̃ам̣ над̇т̇и саб̣б̣аанад̇т̇авид̇хаанад̇о, саб̣б̣ахид̇асукабарид̇хам̣санад̇о жа.
Taṃ vācanti taṃ ariyānaṃ upavadanavācaṃ. Taṃ cittanti samuṭṭhāpakacittaṃ. Taṃ diṭṭhinti yena micchāgāhena ariye anuddhaṃseti, micchābhinivesaṃ. Ayampettha attho – yathā nāma hetusampannassa bhikkhuno visuddhaṃ sīlaṃ, samādhiñca sampādetvā ṭhitassa dandho satuppādo khippābhiññāya diṭṭheva dhamme aññā, sati vā upādisese anāgāmitā. Evamevaṃ yo ariyūpavādī yathāvuttacittadiṭṭhīhi apakkamitvā appatirūpaṃ sabhāvaṃ ‘‘mayā, bhante, tumhākaṃ upari vutta’nti accayadesanāya te na khamāpeti, so kāyassa bhedā niraye evāti. Tesu pasannacittassa khamāpanañhettha tesaṃ vācādīnaṃ pahānaṃ paṭinissaggova. Ito sāvajjataraṃ nāma aññaṃ natthi sabbānatthavidhānato, sabbahitasukhaparidhaṃsanato ca.
гааяасса бхзд̣̇аад̇и ид̇ха гааяасад̣̇д̣̇о ад̇д̇абхаавабарияааяод̇и ааха ‘‘убаад̣̇иннагканд̇хабарижжааг̇аа’’д̇и. д̇ад̣̇ананд̇аранд̇и д̇асса маран̣асан̇каад̇асса канд̇хабарижжааг̇асса ананд̇арам̣. абхиниб̣б̣ад̇д̇агканд̇хад̇т̇о барасад̣̇д̣̇о, аноримабхууд̇авад̇т̇увисаяо ваа сияаа, авад̇хивисзсанамад̇д̇ам̣ ваа. д̇зсу буримам̣ санд̇хааяааха ‘‘абхиниб̣б̣ад̇д̇агканд̇хаг̇г̇ахан̣з’’д̇и, бажчимасса бана васзна ‘‘жуд̇ид̇о уд̣̇д̇ха’’нд̇и.
Kāyassabhedāti idha kāyasaddo attabhāvapariyāyoti āha ‘‘upādinnakkhandhapariccāgā’’ti. Tadanantaranti tassa maraṇasaṅkhātassa khandhapariccāgassa anantaraṃ. Abhinibbattakkhandhattho parasaddo, anorimabhūtavatthuvisayo vā siyā, avadhivisesanamattaṃ vā. Tesu purimaṃ sandhāyāha ‘‘abhinibbattakkhandhaggahaṇe’’ti, pacchimassa pana vasena ‘‘cutito uddha’’nti.
вуд̇д̇авибарияааязнаад̇и ‘‘судту жарид̇ам̣, собханам̣ ваа жарид̇а’’нд̇иаад̣̇инаа. ханананд̇и гхаад̇анам̣.
Vuttavipariyāyenāti ‘‘suṭṭhu caritaṃ, sobhanaṃ vā carita’’ntiādinā. Hanananti ghātanaṃ.
гааран̣аагааран̣анд̇и таанаадтаанам̣. жзд̇анаажзд̇анаасамбаяуд̇д̇ад̇хаммз нираяаад̣̇иниб̣б̣аанаг̇аамибадибад̣̇аабхууд̇з гамманд̇и г̇ахзд̇ваа ааха ‘‘гаммабарижчзд̣̇амзваа’’д̇и. гаммавибааганд̇арам̣ гаммавибаагависзсо гаммавибаагасса вибхааг̇о. аббзд̇ум̣ на саггод̇и адтаманавамаб̣алаани вияа, д̇ам̣сад̣̇исам̣ ид̣̇д̇хивид̇хан̃аан̣ам̣ вияа вигуб̣б̣ид̇ум̣, зд̇знасса б̣аласад̣̇исад̇ан̃жа ниваарзд̇и. жхаанаад̣̇ин̃аан̣ам̣ вияа ваа аббзд̇ум̣ , вигуб̣б̣ид̇ун̃жа. яад̣̇иби хи жхаанаад̣̇ибажжавзгкан̣аан̃аан̣ам̣ ид̇ха чадтам̣ б̣аланд̇и д̇асса савид̇аггасавижаарад̇аа вуд̇д̇аа, д̇ат̇ааби жхаанаад̣̇ийхи винаа бажжавзгкан̣аа над̇т̇ийд̇и жхаанаад̣̇исахаг̇ад̇ам̣ н̃аан̣ам̣ д̇ад̣̇анд̇ог̇ад̇хам̣ гад̇ваа звам̣ вуд̇д̇ам̣. ат̇а ваа саб̣б̣ан̃н̃уд̇ан̃н̃аан̣ам̣ жхаанаад̣̇игижжам̣ вияа на саб̣б̣ам̣ б̣алагижжам̣ гаад̇ум̣ саггод̇ийд̇и д̣̇ассзд̇ум̣ ‘‘жхаанам̣ худ̇ваа аббзд̇ум̣, ид̣̇д̇хи худ̇ваа вигуб̣б̣ид̇ун̃жа на саггод̇ий’’д̇и (вибха. мууладий. 831) вуд̇д̇ам̣, на бана гассажи б̣аласса жхаанаид̣̇д̇хибхаавод̇и д̣̇адтаб̣б̣ам̣.
Kāraṇākāraṇanti ṭhānāṭṭhānaṃ. Cetanācetanāsampayuttadhamme nirayādinibbānagāmipaṭipadābhūte kammanti gahetvā āha ‘‘kammaparicchedamevā’’ti. Kammavipākantaraṃ kammavipākaviseso kammavipākassa vibhāgo. Appetuṃ na sakkoti aṭṭhamanavamabalāni viya, taṃsadisaṃ iddhividhañāṇaṃ viya vikubbituṃ, etenassa balasadisatañca nivāreti. Jhānādiñāṇaṃ viya vā appetuṃ , vikubbituñca. Yadipi hi jhānādipaccavekkhaṇāñāṇaṃ idha chaṭṭhaṃ balanti tassa savitakkasavicāratā vuttā, tathāpi jhānādīhi vinā paccavekkhaṇā natthīti jhānādisahagataṃ ñāṇaṃ tadantogadhaṃ katvā evaṃ vuttaṃ. Atha vā sabbaññutaññāṇaṃ jhānādikiccaṃ viya na sabbaṃ balakiccaṃ kātuṃ sakkotīti dassetuṃ ‘‘jhānaṃ hutvā appetuṃ, iddhi hutvā vikubbituñca na sakkotī’’ti (vibha. mūlaṭī. 831) vuttaṃ, na pana kassaci balassa jhānaiddhibhāvoti daṭṭhabbaṃ.
вижаяахаарасамбаад̇аван̣н̣анаа нидтид̇аа.
Vicayahārasampātavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / нзд̇д̇иббагаран̣абаал̣и • Nettippakaraṇapāḷi / 2. вижаяахаарасамбаад̇о • 2. Vicayahārasampāto
адтагат̇аа • Aṭṭhakathā / суд̇д̇абидага (адтагат̇аа) • Suttapiṭaka (aṭṭhakathā) / куд̣̇д̣̇аганигааяа (адтагат̇аа) • Khuddakanikāya (aṭṭhakathā) / нзд̇д̇иббагаран̣а-адтагат̇аа • Nettippakaraṇa-aṭṭhakathā / 2. вижаяахаарасамбаад̇аван̣н̣анаа • 2. Vicayahārasampātavaṇṇanā
дийгаа • Tīkā / суд̇д̇абидага (дийгаа) • Suttapiṭaka (ṭīkā) / куд̣̇д̣̇аганигааяа (дийгаа) • Khuddakanikāya (ṭīkā) / нзд̇д̇ивибхаавиний • Nettivibhāvinī / 2. вижаяахаарасамбаад̇авибхааванаа • 2. Vicayahārasampātavibhāvanā
