| Library / Tipiṭaka / திபிடக • Tipiṭaka / நெத்திப்பகரணபாளி • Nettippakaraṇapāḷi |
2. விசயஹாரஸம்பாதோ
2. Vicayahārasampāto
53. தத்த² கதமோ விசயோ ஹாரஸம்பாதோ? தத்த² தண்ஹா து³விதா⁴ குஸலாபி அகுஸலாபி. அகுஸலா ஸங்ஸாரகா³மினீ, குஸலா அபசயகா³மினீ பஹானதண்ஹா. மானோபி து³விதோ⁴ குஸலோபி அகுஸலோபி. யங் மானங் நிஸ்ஸாய மானங் பஜஹதி, அயங் மானோ குஸலோ. யோ பன மானோ து³க்க²ங் நிப்³ப³த்தயதி, அயங் மானோ அகுஸலோ. தத்த² யங் நெக்க²ம்மஸிதங் தோ³மனஸ்ஸங் குதா³ஸ்ஸுனாமாஹங் தங் ஆயதனங் ஸச்சி²கத்வா உபஸம்பஜ்ஜ விஹரிஸ்ஸங் யங் அரியா ஸந்தங் ஆயதனங் ஸச்சி²கத்வா உபஸம்பஜ்ஜ விஹரந்தீதி தஸ்ஸ உப்பஜ்ஜதி பிஹா, பிஹாபச்சயா தோ³மனஸ்ஸங், அயங் தண்ஹா குஸலா ராக³விராகா³ சேதோவிமுத்தி, ததா³ரம்மணா குஸலா அவிஜ்ஜாவிராகா³ பஞ்ஞாவிமுத்தி.
53. Tattha katamo vicayo hārasampāto? Tattha taṇhā duvidhā kusalāpi akusalāpi. Akusalā saṃsāragāminī, kusalā apacayagāminī pahānataṇhā. Mānopi duvidho kusalopi akusalopi. Yaṃ mānaṃ nissāya mānaṃ pajahati, ayaṃ māno kusalo. Yo pana māno dukkhaṃ nibbattayati, ayaṃ māno akusalo. Tattha yaṃ nekkhammasitaṃ domanassaṃ kudāssunāmāhaṃ taṃ āyatanaṃ sacchikatvā upasampajja viharissaṃ yaṃ ariyā santaṃ āyatanaṃ sacchikatvā upasampajja viharantīti tassa uppajjati pihā, pihāpaccayā domanassaṃ, ayaṃ taṇhā kusalā rāgavirāgā cetovimutti, tadārammaṇā kusalā avijjāvirāgā paññāvimutti.
தஸ்ஸா கோ பவிசயோ? அட்ட² மக்³க³ங்கா³னி ஸம்மாதி³ட்டி² ஸம்மாஸங்கப்போ ஸம்மாவாசா ஸம்மாகம்மந்தோ ஸம்மாஆஜீவோ ஸம்மாவாயாமோ ஸம்மாஸதி ஸம்மாஸமாதி⁴. ஸோ கத்த² த³ட்ட²ப்³போ³? சதுத்தே² ஜா²னே பாரமிதாய. சதுத்தே² ஹி ஜா²னே அட்ட²ங்க³ஸமன்னாக³தங் சித்தங் பா⁴வயதி பரிஸுத்³த⁴ங் பரியோதா³தங் அனங்க³ணங் விக³தூபக்கிலேஸங் முது³ கம்மனியங் டி²தங் ஆனேஞ்ஜப்பத்தங். ஸோ தத்த² அட்ட²வித⁴ங் அதி⁴க³ச்ச²தி ச² அபி⁴ஞ்ஞா த்³வே ச விஸேஸே, தங் சித்தங் யதோ பரிஸுத்³த⁴ங், ததோ பரியோதா³தங், யதோ பரியோதா³தங் , ததோ அனங்க³ணங், யதோ அனங்க³ணங், ததோ விக³தூபக்கிலேஸங், யதோ விக³தூபக்கிலேஸங், ததோ முது³, யதோ முது³, ததோ கம்மனியங், யதோ கம்மனியங், ததோ டி²தங், யதோ டி²தங், ததோ ஆனேஞ்ஜப்பத்தங். தத்த² அங்க³ணா ச உபக்கிலேஸா ச தது³ப⁴யங் தண்ஹாபக்கோ². யா ச இஞ்ஜனா யா ச சித்தஸ்ஸ அட்டி²தி, அயங் தி³ட்டி²பக்கோ².
Tassā ko pavicayo? Aṭṭha maggaṅgāni sammādiṭṭhi sammāsaṅkappo sammāvācā sammākammanto sammāājīvo sammāvāyāmo sammāsati sammāsamādhi. So kattha daṭṭhabbo? Catutthe jhāne pāramitāya. Catutthe hi jhāne aṭṭhaṅgasamannāgataṃ cittaṃ bhāvayati parisuddhaṃ pariyodātaṃ anaṅgaṇaṃ vigatūpakkilesaṃ mudu kammaniyaṃ ṭhitaṃ āneñjappattaṃ. So tattha aṭṭhavidhaṃ adhigacchati cha abhiññā dve ca visese, taṃ cittaṃ yato parisuddhaṃ, tato pariyodātaṃ, yato pariyodātaṃ , tato anaṅgaṇaṃ, yato anaṅgaṇaṃ, tato vigatūpakkilesaṃ, yato vigatūpakkilesaṃ, tato mudu, yato mudu, tato kammaniyaṃ, yato kammaniyaṃ, tato ṭhitaṃ, yato ṭhitaṃ, tato āneñjappattaṃ. Tattha aṅgaṇā ca upakkilesā ca tadubhayaṃ taṇhāpakkho. Yā ca iñjanā yā ca cittassa aṭṭhiti, ayaṃ diṭṭhipakkho.
சத்தாரி இந்த்³ரியானி து³க்கி²ந்த்³ரியங் தோ³மனஸ்ஸிந்த்³ரியங் ஸுகி²ந்த்³ரியங் ஸோமனஸ்ஸிந்த்³ரியஞ்ச சதுத்த²ஜ்ஜா²னே நிருஜ்ஜ²ந்தி, தஸ்ஸ உபெக்கி²ந்த்³ரியங் அவஸிட்ட²ங் ப⁴வதி. ஸோ உபரிமங் ஸமாபத்திங் ஸந்ததோ மனஸிகரோதி, தஸ்ஸ உபரிமங் ஸமாபத்திங் ஸந்ததோ மனஸிகரோதோ சதுத்த²ஜ்ஜா²னே ஓளாரிகா ஸஞ்ஞா ஸண்ட²ஹதி உக்கண்டா² ச படிக⁴ஸஞ்ஞா, ஸோ ஸப்³ப³ஸோ ரூபஸஞ்ஞானங் ஸமதிக்கமா படிக⁴ஸஞ்ஞானங் அத்த²ங்க³மா நானத்தஸஞ்ஞானங் அமனஸிகாரா ‘‘அனந்தங் ஆகாஸ’’ந்தி ஆகாஸானஞ்சாயதனஸமாபத்திங் ஸச்சி²கத்வா உபஸம்பஜ்ஜ விஹரதி. அபி⁴ஞ்ஞாபி⁴னீஹாரோ ரூபஸஞ்ஞா வோகாரோ நானத்தஸஞ்ஞா ஸமதிக்கமதி படிக⁴ஸஞ்ஞா சஸ்ஸ அப்³ப⁴த்த²ங் க³ச்ச²தி, ஏவங் ஸமாதி⁴ தஸ்ஸ ஸமாஹிதஸ்ஸ ஓபா⁴ஸோ அந்தரதா⁴யதி த³ஸ்ஸனஞ்ச ரூபானங், ஸோ ஸமாதி⁴ ச²ளங்க³ஸமன்னாக³தோ பச்சவெக்கி²தப்³போ³ . அனபி⁴ஜ்ஜா²ஸஹக³தங் மே மானஸங் ஸப்³ப³லோகே, அப்³யாபன்னங் மே சித்தங் ஸப்³ப³ஸத்தேஸு, ஆரத்³த⁴ங் மே வீரியங் பக்³க³ஹிதங், பஸ்ஸத்³தோ⁴ மே காயோ அஸாரத்³தோ⁴, ஸமாஹிதங் மே சித்தங் அவிக்கி²த்தங், உபட்டி²தா மே ஸதி அஸம்முட்டா² 1, தத்த² யஞ்ச அனபி⁴ஜ்ஜா²ஸஹக³தங் மானஸங் ஸப்³ப³லோகே யஞ்ச அப்³யாபன்னங் சித்தங் ஸப்³ப³ஸத்தேஸு யஞ்ச ஆரத்³த⁴ங் வீரியங் பக்³க³ஹிதங் யஞ்ச ஸமாஹிதங் சித்தங் அவிக்கி²த்தங், அயங் ஸமதோ². யோ பஸ்ஸத்³தோ⁴ காயோ அஸாரத்³தோ⁴, அயங் ஸமாதி⁴பரிக்கா²ரோ. யா உபட்டி²தா ஸதி அஸம்முட்டா² அயங் விபஸ்ஸனா.
Cattāri indriyāni dukkhindriyaṃ domanassindriyaṃ sukhindriyaṃ somanassindriyañca catutthajjhāne nirujjhanti, tassa upekkhindriyaṃ avasiṭṭhaṃ bhavati. So uparimaṃ samāpattiṃ santato manasikaroti, tassa uparimaṃ samāpattiṃ santato manasikaroto catutthajjhāne oḷārikā saññā saṇṭhahati ukkaṇṭhā ca paṭighasaññā, so sabbaso rūpasaññānaṃ samatikkamā paṭighasaññānaṃ atthaṅgamā nānattasaññānaṃ amanasikārā ‘‘anantaṃ ākāsa’’nti ākāsānañcāyatanasamāpattiṃ sacchikatvā upasampajja viharati. Abhiññābhinīhāro rūpasaññā vokāro nānattasaññā samatikkamati paṭighasaññā cassa abbhatthaṃ gacchati, evaṃ samādhi tassa samāhitassa obhāso antaradhāyati dassanañca rūpānaṃ, so samādhi chaḷaṅgasamannāgato paccavekkhitabbo . Anabhijjhāsahagataṃ me mānasaṃ sabbaloke, abyāpannaṃ me cittaṃ sabbasattesu, āraddhaṃ me vīriyaṃ paggahitaṃ, passaddho me kāyo asāraddho, samāhitaṃ me cittaṃ avikkhittaṃ, upaṭṭhitā me sati asammuṭṭhā 2, tattha yañca anabhijjhāsahagataṃ mānasaṃ sabbaloke yañca abyāpannaṃ cittaṃ sabbasattesu yañca āraddhaṃ vīriyaṃ paggahitaṃ yañca samāhitaṃ cittaṃ avikkhittaṃ, ayaṃ samatho. Yo passaddho kāyo asāraddho, ayaṃ samādhiparikkhāro. Yā upaṭṭhitā sati asammuṭṭhā ayaṃ vipassanā.
54. ஸோ ஸமாதி⁴ பஞ்சவிதே⁴ன வேதி³தப்³போ³. அயங் ஸமாதி⁴ ‘‘பச்சுப்பன்னஸுகோ²’’தி இதிஸ்ஸ பச்சத்தமேவ ஞாணத³ஸ்ஸனங் பச்சுபட்டி²தங் ப⁴வதி, அயங் ஸமாதி⁴ ‘‘ஆயதிங் ஸுக²விபாகோ’’தி இதிஸ்ஸ பச்சத்தமேவ ஞாணத³ஸ்ஸனங் பச்சுபட்டி²தங் ப⁴வதி, அயங் ஸமாதி⁴ ‘‘அரியோ நிராமிஸோ’’தி இதிஸ்ஸ பச்சத்தமேவ ஞாணத³ஸ்ஸனங் பச்சுபட்டி²தங் ப⁴வதி, அயங் ஸமாதி⁴ ‘‘அகாபுரிஸஸேவிதோ’’தி இதிஸ்ஸ பச்சத்தமேவ ஞாணத³ஸ்ஸனங் பச்சுபட்டி²தங் ப⁴வதி, அயங் ஸமாதி⁴ ‘‘ஸந்தோ சேவ பணீதோ ச படிப்பஸ்ஸத்³தி⁴லத்³தோ⁴ ச ஏகோதி³பா⁴வாதி⁴க³தோ ச ந ஸஸங்கா²ரனிக்³க³ய்ஹவாரிதக³தோ 3 சா’’தி இதிஸ்ஸ பச்சத்தமேவ ஞாணத³ஸ்ஸனங் பச்சுபட்டி²தங் ப⁴வதி. தங் கோ² பனிமங் ஸமாதி⁴ங் ‘‘ஸதோ ஸமாபஜ்ஜாமி ஸதோ வுட்ட²ஹாமீ’’தி இதிஸ்ஸ பச்சத்தமேவ ஞாணத³ஸ்ஸனங் பச்சுபட்டி²தங் ப⁴வதி. தத்த² யோ ச ஸமாதி⁴ பச்சுப்பன்னஸுகோ² யோ ச ஸமாதி⁴ ஆயதிங் ஸுக²விபாகோ அயங் ஸமதோ². யோ ச ஸமாதி⁴ அரியோ நிராமிஸோ, யோ ச ஸமாதி⁴ அகாபுரிஸஸேவிதோ, யோ ச ஸமாதி⁴ ஸந்தோ சேவ பணீதோ படிப்பஸ்ஸத்³தி⁴லத்³தோ⁴ ச ஏகோதி³பா⁴வாதி⁴க³தோ ச ந ஸஸங்கா²ரனிக்³க³ய்ஹவாரிதக³தோ ச யஞ்சாஹங் தங் கோ² பனிமங் ஸமாதி⁴ங் ஸதோ ஸமாபஜ்ஜாமி ஸதோ வுட்ட²ஹாமீதி, அயங் விபஸ்ஸனா.
54. So samādhi pañcavidhena veditabbo. Ayaṃ samādhi ‘‘paccuppannasukho’’ti itissa paccattameva ñāṇadassanaṃ paccupaṭṭhitaṃ bhavati, ayaṃ samādhi ‘‘āyatiṃ sukhavipāko’’ti itissa paccattameva ñāṇadassanaṃ paccupaṭṭhitaṃ bhavati, ayaṃ samādhi ‘‘ariyo nirāmiso’’ti itissa paccattameva ñāṇadassanaṃ paccupaṭṭhitaṃ bhavati, ayaṃ samādhi ‘‘akāpurisasevito’’ti itissa paccattameva ñāṇadassanaṃ paccupaṭṭhitaṃ bhavati, ayaṃ samādhi ‘‘santo ceva paṇīto ca paṭippassaddhiladdho ca ekodibhāvādhigato ca na sasaṅkhāraniggayhavāritagato 4 cā’’ti itissa paccattameva ñāṇadassanaṃ paccupaṭṭhitaṃ bhavati. Taṃ kho panimaṃ samādhiṃ ‘‘sato samāpajjāmi sato vuṭṭhahāmī’’ti itissa paccattameva ñāṇadassanaṃ paccupaṭṭhitaṃ bhavati. Tattha yo ca samādhi paccuppannasukho yo ca samādhi āyatiṃ sukhavipāko ayaṃ samatho. Yo ca samādhi ariyo nirāmiso, yo ca samādhi akāpurisasevito, yo ca samādhi santo ceva paṇīto paṭippassaddhiladdho ca ekodibhāvādhigato ca na sasaṅkhāraniggayhavāritagato ca yañcāhaṃ taṃ kho panimaṃ samādhiṃ sato samāpajjāmi sato vuṭṭhahāmīti, ayaṃ vipassanā.
ஸோ ஸமாதி⁴ பஞ்சவிதே⁴ன வேதி³தப்³போ³ பீதிப²ரணதா ஸுக²ப²ரணதா சேதோப²ரணதா ஆலோகப²ரணதா பச்சவெக்க²ணானிமித்தங். தத்த² யோ ச பீதிப²ரணோ யோ ச ஸுக²ப²ரணோ யோ ச சேதோப²ரணோ, அயங் ஸமதோ². யோ ச ஆலோகப²ரணோ யஞ்ச பச்சவெக்க²ணானிமித்தங். அயங் விபஸ்ஸனா.
So samādhi pañcavidhena veditabbo pītipharaṇatā sukhapharaṇatā cetopharaṇatā ālokapharaṇatā paccavekkhaṇānimittaṃ. Tattha yo ca pītipharaṇo yo ca sukhapharaṇo yo ca cetopharaṇo, ayaṃ samatho. Yo ca ālokapharaṇo yañca paccavekkhaṇānimittaṃ. Ayaṃ vipassanā.
55. த³ஸ கஸிணாயதனானி பத²வீகஸிணங் ஆபோகஸிணங் தேஜோகஸிணங் வாயோகஸிணங் நீலகஸிணங் பீதகஸிணங் லோஹிதகஸிணங் ஓதா³தகஸிணங் ஆகாஸகஸிணங் விஞ்ஞாணகஸிணங். தத்த² யஞ்ச பத²வீகஸிணங் யஞ்ச ஆபோகஸிணங் ஏவங் ஸப்³ப³ங், யஞ்ச ஓதா³தகஸிணங். இமானி அட்ட² கஸிணானி ஸமதோ². யஞ்ச ஆகாஸகஸிணங் யஞ்ச விஞ்ஞாணகஸிணங், அயங் விபஸ்ஸனா. ஏவங் ஸப்³போ³ அரியோ மக்³கோ³ யேன யேன ஆகாரேன வுத்தோ, தேன தேன ஸமத²விபஸ்ஸனேன யோஜயிதப்³போ³. தே தீஹி த⁴ம்மேஹி ஸங்க³ஹிதா அனிச்சதாய து³க்க²தாய அனத்ததாய. ஸோ ஸமத²விபஸ்ஸனங் பா⁴வயமானோ தீணி விமொக்க²முகா²னி பா⁴வயதி. தீணி விமொக்க²முகா²னி பா⁴வயந்தோ தயோ க²ந்தே⁴ பா⁴வயதி. தயோ க²ந்தே⁴ பா⁴வயந்தோ அரியங் அட்ட²ங்கி³கங் மக்³க³ங் பா⁴வயதி.
55. Dasa kasiṇāyatanāni pathavīkasiṇaṃ āpokasiṇaṃ tejokasiṇaṃ vāyokasiṇaṃ nīlakasiṇaṃ pītakasiṇaṃ lohitakasiṇaṃ odātakasiṇaṃ ākāsakasiṇaṃ viññāṇakasiṇaṃ. Tattha yañca pathavīkasiṇaṃ yañca āpokasiṇaṃ evaṃ sabbaṃ, yañca odātakasiṇaṃ. Imāni aṭṭha kasiṇāni samatho. Yañca ākāsakasiṇaṃ yañca viññāṇakasiṇaṃ, ayaṃ vipassanā. Evaṃ sabbo ariyo maggo yena yena ākārena vutto, tena tena samathavipassanena yojayitabbo. Te tīhi dhammehi saṅgahitā aniccatāya dukkhatāya anattatāya. So samathavipassanaṃ bhāvayamāno tīṇi vimokkhamukhāni bhāvayati. Tīṇi vimokkhamukhāni bhāvayanto tayo khandhe bhāvayati. Tayo khandhe bhāvayanto ariyaṃ aṭṭhaṅgikaṃ maggaṃ bhāvayati.
ராக³சரிதோ புக்³க³லோ அனிமித்தேன விமொக்க²முகே²ன நிய்யாதி 5 அதி⁴சித்தஸிக்கா²ய ஸிக்க²ந்தோ லோப⁴ங் அகுஸலமூலங் பஜஹந்தோ ஸுக²வேத³னீயங் ப²ஸ்ஸங் அனுபக³ச்ச²ந்தோ ஸுக²ங் வேத³னங் பரிஜானந்தோ ராக³மலங் பவாஹெந்தோ ராக³ரஜங் நித்³து⁴னந்தோ ராக³விஸங் வமெந்தோ ராக³க்³கி³ங் நிப்³பா³பெந்தோ ராக³ஸல்லங் உப்பாடெந்தோ ராக³ஜடங் விஜடெந்தோ. தோ³ஸசரிதோ புக்³க³லோ அப்பணிஹிதேன விமொக்க²முகே²ன நிய்யாதி அதி⁴ஸீலஸிக்கா²ய ஸிக்க²ந்தோ தோ³ஸங் அகுஸலமூலங் பஜஹந்தோ து³க்க²வேத³னீயங் ப²ஸ்ஸங் அனுபக³ச்ச²ந்தோ து³க்க²வேத³னங் பரிஜானந்தோ தோ³ஸமலங் பவாஹெந்தோ தோ³ஸரஜங் நித்³து⁴னந்தோ தோ³ஸவிஸங் வமெந்தோ தோ³ஸக்³கி³ங் நிப்³பா³பெந்தோ தோ³ஸஸல்லங் உப்பாடெந்தோ தோ³ஸஜடங் விஜடெந்தோ. மோஹசரிதோ புக்³க³லோ ஸுஞ்ஞதவிமொக்க²முகே²ன நிய்யாதி அதி⁴பஞ்ஞாஸிக்கா²ய ஸிக்க²ந்தோ மோஹங் அகுஸலமூலங் பஜஹந்தோ அது³க்க²மஸுக²வேத³னீயங் ப²ஸ்ஸங் அனுபக³ச்ச²ந்தோ அது³க்க²மஸுக²ங் வேத³னங் பரிஜானந்தோ மோஹமலங் பவாஹெந்தோ மோஹரஜங் நித்³து⁴னந்தோ மோஹவிஸங் வமெந்தோ மோஹக்³கி³ங் நிப்³பா³பெந்தோ மோஹஸல்லங் உப்பாடெந்தோ மோஹஜடங் விஜடெந்தோ.
Rāgacarito puggalo animittena vimokkhamukhena niyyāti 6 adhicittasikkhāya sikkhanto lobhaṃ akusalamūlaṃ pajahanto sukhavedanīyaṃ phassaṃ anupagacchanto sukhaṃ vedanaṃ parijānanto rāgamalaṃ pavāhento rāgarajaṃ niddhunanto rāgavisaṃ vamento rāgaggiṃ nibbāpento rāgasallaṃ uppāṭento rāgajaṭaṃ vijaṭento. Dosacarito puggalo appaṇihitena vimokkhamukhena niyyāti adhisīlasikkhāya sikkhanto dosaṃ akusalamūlaṃ pajahanto dukkhavedanīyaṃ phassaṃ anupagacchanto dukkhavedanaṃ parijānanto dosamalaṃ pavāhento dosarajaṃ niddhunanto dosavisaṃ vamento dosaggiṃ nibbāpento dosasallaṃ uppāṭento dosajaṭaṃ vijaṭento. Mohacarito puggalo suññatavimokkhamukhena niyyāti adhipaññāsikkhāya sikkhanto mohaṃ akusalamūlaṃ pajahanto adukkhamasukhavedanīyaṃ phassaṃ anupagacchanto adukkhamasukhaṃ vedanaṃ parijānanto mohamalaṃ pavāhento moharajaṃ niddhunanto mohavisaṃ vamento mohaggiṃ nibbāpento mohasallaṃ uppāṭento mohajaṭaṃ vijaṭento.
தத்த² ஸுஞ்ஞதவிமொக்க²முக²ங் பஞ்ஞாக்க²ந்தோ⁴, அனிமித்தவிமொக்க²முக²ங் ஸமாதி⁴க்க²ந்தோ⁴, அப்பணிஹிதவிமொக்க²முக²ங் ஸீலக்க²ந்தோ⁴. ஸோ தீணி விமொக்க²முகா²னி பா⁴வயந்தோ தயோ க²ந்தே⁴ பா⁴வயதி, தயோ க²ந்தே⁴ பா⁴வயந்தோ அரியங் அட்ட²ங்கி³கங் மக்³க³ங் பா⁴வயதி. தத்த² யா ச ஸம்மாவாசா யோ ச ஸம்மாகம்மந்தோ யோ ச ஸம்மாஆஜீவோ, அயங் ஸீலக்க²ந்தோ⁴, யோ ச ஸம்மாவாயாமோ யா ச ஸம்மாஸதி யோ ச ஸம்மாஸமாதி⁴, அயங் ஸமாதி⁴க்க²ந்தோ⁴, யா ச ஸம்மாதி³ட்டி² யோ ச ஸம்மாஸங்கப்போ, அயங் பஞ்ஞாக்க²ந்தோ⁴.
Tattha suññatavimokkhamukhaṃ paññākkhandho, animittavimokkhamukhaṃ samādhikkhandho, appaṇihitavimokkhamukhaṃ sīlakkhandho. So tīṇi vimokkhamukhāni bhāvayanto tayo khandhe bhāvayati, tayo khandhe bhāvayanto ariyaṃ aṭṭhaṅgikaṃ maggaṃ bhāvayati. Tattha yā ca sammāvācā yo ca sammākammanto yo ca sammāājīvo, ayaṃ sīlakkhandho, yo ca sammāvāyāmo yā ca sammāsati yo ca sammāsamādhi, ayaṃ samādhikkhandho, yā ca sammādiṭṭhi yo ca sammāsaṅkappo, ayaṃ paññākkhandho.
தத்த² ஸீலக்க²ந்தோ⁴ ச ஸமாதி⁴க்க²ந்தோ⁴ ச ஸமதோ², பஞ்ஞாக்க²ந்தோ⁴ விபஸ்ஸனா. யோ ஸமத²விபஸ்ஸனங் பா⁴வேதி, தஸ்ஸ த்³வே ப⁴வங்கா³னி பா⁴வனங் க³ச்ச²ந்தி காயோ சித்தஞ்ச, ப⁴வனிரோத⁴கா³மினீ படிபதா³ த்³வே பதா³னி ஸீலங் ஸமாதி⁴ ச. ஸோ ஹோதி பி⁴க்கு² பா⁴விதகாயோ பா⁴விதஸீலோ பா⁴விதசித்தோ பா⁴விதபஞ்ஞோ. காயே பா⁴வியமானே த்³வே த⁴ம்மா பா⁴வனங் க³ச்ச²ந்தி ஸம்மாகம்மந்தோ ஸம்மாவாயாமோ ச, ஸீலே பா⁴வியமானே த்³வே த⁴ம்மா பா⁴வனங் க³ச்ச²ந்தி ஸம்மாவாசா ஸம்மாஆஜீவோ ச, சித்தே பா⁴வியமானே த்³வே த⁴ம்மா பா⁴வனங் க³ச்ச²ந்தி ஸம்மாஸதி ஸம்மாஸமாதி⁴ ச, பஞ்ஞாய பா⁴வியமானாய த்³வே த⁴ம்மா பா⁴வனங் க³ச்ச²ந்தி ஸம்மாதி³ட்டி² ஸம்மாஸங்கப்போ ச.
Tattha sīlakkhandho ca samādhikkhandho ca samatho, paññākkhandho vipassanā. Yo samathavipassanaṃ bhāveti, tassa dve bhavaṅgāni bhāvanaṃ gacchanti kāyo cittañca, bhavanirodhagāminī paṭipadā dve padāni sīlaṃ samādhi ca. So hoti bhikkhu bhāvitakāyo bhāvitasīlo bhāvitacitto bhāvitapañño. Kāye bhāviyamāne dve dhammā bhāvanaṃ gacchanti sammākammanto sammāvāyāmo ca, sīle bhāviyamāne dve dhammā bhāvanaṃ gacchanti sammāvācā sammāājīvo ca, citte bhāviyamāne dve dhammā bhāvanaṃ gacchanti sammāsati sammāsamādhi ca, paññāya bhāviyamānāya dve dhammā bhāvanaṃ gacchanti sammādiṭṭhi sammāsaṅkappo ca.
தத்த² யோ ச ஸம்மாகம்மந்தோ யோ ச ஸம்மாவாயாமோ ஸியா காயிகோ ஸியா சேதஸிகோ, தத்த² யோ காயஸங்க³ஹோ, ஸோ காயே பா⁴விதே பா⁴வனங் க³ச்ச²தி, யோ சித்தஸங்க³ஹோ, ஸோ சித்தே பா⁴விதே பா⁴வனங் க³ச்ச²தி. ஸோ ஸமத²விபஸ்ஸனங் பா⁴வயந்தோ பஞ்சவித⁴ங் அதி⁴க³மங் க³ச்ச²தி 7 கி²ப்பாதி⁴க³மோ ச ஹோதி, விமுத்தாதி⁴க³மோ ச ஹோதி, மஹாதி⁴க³மோ ச ஹோதி, விபுலாதி⁴க³மோ ச ஹோதி, அனவஸேஸாதி⁴க³மோ ச ஹோதி. தத்த² ஸமதே²ன கி²ப்பாதி⁴க³மோ ச மஹாதி⁴க³மோ ச விபுலாதி⁴க³மோ ச ஹோதி, விபஸ்ஸனாய விமுத்தாதி⁴க³மோ ச அனவஸேஸாதி⁴க³மோ ச ஹோதி.
Tattha yo ca sammākammanto yo ca sammāvāyāmo siyā kāyiko siyā cetasiko, tattha yo kāyasaṅgaho, so kāye bhāvite bhāvanaṃ gacchati, yo cittasaṅgaho, so citte bhāvite bhāvanaṃ gacchati. So samathavipassanaṃ bhāvayanto pañcavidhaṃ adhigamaṃ gacchati 8 khippādhigamo ca hoti, vimuttādhigamo ca hoti, mahādhigamo ca hoti, vipulādhigamo ca hoti, anavasesādhigamo ca hoti. Tattha samathena khippādhigamo ca mahādhigamo ca vipulādhigamo ca hoti, vipassanāya vimuttādhigamo ca anavasesādhigamo ca hoti.
56. தத்த² யோ தே³ஸயதி, ஸோ த³ஸப³லஸமன்னாக³தோ ஸத்தா² ஓவாதே³ன ஸாவகே ந விஸங்வாத³யதி. ஸோ திவித⁴ங் இத³ங் கரோத² இமினா உபாயேன கரோத² இத³ங் வோ குருமானானங் ஹிதாய ஸுகா²ய ப⁴விஸ்ஸதி, ஸோ ததா² ஓவதி³தோ ததா²னுஸிட்டோ² ததா²கரொந்தோ ததா²படிபஜ்ஜந்தோ தங் பூ⁴மிங் ந பாபுணிஸ்ஸதீதி நேதங் டா²னங் விஜ்ஜதி. ஸோ ததா² ஓவதி³தோ ததா²னுஸிட்டோ² ஸீலக்க²ந்த⁴ங் அபரிபூரயந்தோ தங் பூ⁴மிங் அனுபாபுணிஸ்ஸதீதி நேதங் டா²னங் விஜ்ஜதி. ஸோ ததா² ஓவதி³தோ ததா²னுஸிட்டோ² ஸீலக்க²ந்த⁴ங் பரிபூரயந்தோ தங் பூ⁴மிங் அனுபாபுணிஸ்ஸதீதி டா²னமேதங் விஜ்ஜதி.
56. Tattha yo desayati, so dasabalasamannāgato satthā ovādena sāvake na visaṃvādayati. So tividhaṃ idaṃ karotha iminā upāyena karotha idaṃ vo kurumānānaṃ hitāya sukhāya bhavissati, so tathā ovadito tathānusiṭṭho tathākaronto tathāpaṭipajjanto taṃ bhūmiṃ na pāpuṇissatīti netaṃ ṭhānaṃ vijjati. So tathā ovadito tathānusiṭṭho sīlakkhandhaṃ aparipūrayanto taṃ bhūmiṃ anupāpuṇissatīti netaṃ ṭhānaṃ vijjati. So tathā ovadito tathānusiṭṭho sīlakkhandhaṃ paripūrayanto taṃ bhūmiṃ anupāpuṇissatīti ṭhānametaṃ vijjati.
ஸம்மாஸம்பு³த்³த⁴ஸ்ஸ தே ஸதோ இமே த⁴ம்மா அனபி⁴ஸம்பு³த்³தா⁴தி நேதங் டா²னங் விஜ்ஜதி. ஸப்³பா³ஸவபரிக்கீ²ணஸ்ஸ தே ஸதோ இமே ஆஸவா அபரிக்கீ²ணாதி நேதங் டா²னங் விஜ்ஜதி. யஸ்ஸ தே அத்தா²ய த⁴ம்மோ தே³ஸிதோ, ஸோ ந நிய்யாதி தக்கரஸ்ஸ ஸம்மா து³க்க²க்க²யாயாதி நேதங் டா²னங் விஜ்ஜதி. ஸாவகோ கோ² பன தே த⁴ம்மானுத⁴ம்மப்படிபன்னோ ஸாமீசிப்படிபன்னோ அனுத⁴ம்மசாரீ ஸோ புப்³பே³ன அபரங் உளாரங் விஸேஸாதி⁴க³மங் ந ஸச்சி²கரிஸ்ஸதீதி நேதங் டா²னங் விஜ்ஜதி.
Sammāsambuddhassa te sato ime dhammā anabhisambuddhāti netaṃ ṭhānaṃ vijjati. Sabbāsavaparikkhīṇassa te sato ime āsavā aparikkhīṇāti netaṃ ṭhānaṃ vijjati. Yassa te atthāya dhammo desito, so na niyyāti takkarassa sammā dukkhakkhayāyāti netaṃ ṭhānaṃ vijjati. Sāvako kho pana te dhammānudhammappaṭipanno sāmīcippaṭipanno anudhammacārī so pubbena aparaṃ uḷāraṃ visesādhigamaṃ na sacchikarissatīti netaṃ ṭhānaṃ vijjati.
யே கோ² பன த⁴ம்மா அந்தராயிகா, தே படிஸேவதோ நாலங் அந்தராயாயாதி நேதங் டா²னங் விஜ்ஜதி. யே கோ² பன த⁴ம்மா அனிய்யானிகா, தே நிய்யந்தி தக்கரஸ்ஸ ஸம்மா து³க்க²க்க²யாயாதி நேதங் டா²னங் விஜ்ஜதி. யே கோ² பன த⁴ம்மா நிய்யானிகா, தே நிய்யந்தி தக்கரஸ்ஸ ஸம்மா து³க்க²க்க²யாயாதி டா²னமேதங் விஜ்ஜதி. ஸாவகோ கோ² பன தே ஸஉபாதி³ஸேஸோ அனுபாதி³ஸேஸங் நிப்³பா³னதா⁴துங் அனுபாபுணிஸ்ஸதீதி நேதங் டா²னங் விஜ்ஜதி.
Ye kho pana dhammā antarāyikā, te paṭisevato nālaṃ antarāyāyāti netaṃ ṭhānaṃ vijjati. Ye kho pana dhammā aniyyānikā, te niyyanti takkarassa sammā dukkhakkhayāyāti netaṃ ṭhānaṃ vijjati. Ye kho pana dhammā niyyānikā, te niyyanti takkarassa sammā dukkhakkhayāyāti ṭhānametaṃ vijjati. Sāvako kho pana te saupādiseso anupādisesaṃ nibbānadhātuṃ anupāpuṇissatīti netaṃ ṭhānaṃ vijjati.
தி³ட்டி²ஸம்பன்னோ மாதரங் ஜீவிதா வோரோபெய்ய ஹத்தே²ஹி வா பாதே³ஹி வா ஸுஹதங் கரெய்யாதி நேதங் டா²னங் விஜ்ஜதி, புது²ஜ்ஜனோ மாதரங் ஜீவிதா வோரோபெய்ய ஹத்தே²ஹி வா பாதே³ஹி வா ஸுஹதங் கரெய்யாதி டா²னமேதங் விஜ்ஜதி. ஏவங் பிதரங், அரஹந்தங், பி⁴க்கு²ங். தி³ட்டி²ஸம்பன்னோ புக்³க³லோ ஸங்க⁴ங் பி⁴ந்தெ³ய்ய ஸங்கே⁴ வா ஸங்க⁴ராஜிங் ஜனெய்யாதி நேதங் டா²னங் விஜ்ஜதி, புது²ஜ்ஜனோ ஸங்க⁴ங் பி⁴ந்தெ³ய்ய ஸங்கே⁴ வா ஸங்க⁴ராஜிங் ஜனெய்யாதி டா²னமேதங் விஜ்ஜதி, தி³ட்டி²ஸம்பன்னோ ததா²க³தஸ்ஸ து³ட்ட²சித்தோ லோஹிதங் உப்பாதெ³ய்ய, பரினிப்³பு³தஸ்ஸ வா ததா²க³தஸ்ஸ து³ட்ட²சித்தோ தூ²பங் பி⁴ந்தெ³ய்யாதி நேதங் டா²னங் விஜ்ஜதி. புது²ஜ்ஜனோ ததா²க³தஸ்ஸ து³ட்ட²சித்தோ லோஹிதங் உப்பாதெ³ய்ய, பரினிப்³பு³தஸ்ஸ வா ததா²க³தஸ்ஸ து³ட்ட²சித்தோ தூ²பங் பி⁴ந்தெ³ய்யாதி டா²னமேதங் விஜ்ஜதி. தி³ட்டி²ஸம்பன்னோ அஞ்ஞங் ஸத்தா²ரங் அபதி³ஸெய்ய அபி ஜீவிதஹேதூதி நேதங் டா²னங் விஜ்ஜதி, புது²ஜ்ஜனோ அஞ்ஞங் ஸத்தா²ரங் அபதி³ஸெய்யாதி டா²னமேதங் விஜ்ஜதி. தி³ட்டி²ஸம்பன்னோ இதோ ப³ஹித்³தா⁴ அஞ்ஞங் த³க்கி²ணெய்யங் பரியேஸெய்யாதி நேதங் டா²னங் விஜ்ஜதி, புது²ஜ்ஜனோ இதோ ப³ஹித்³தா⁴ அஞ்ஞங் த³க்கி²ணெய்யங் பரியேஸெய்யாதி டா²னமேதங் விஜ்ஜதி, தி³ட்டி²ஸம்பன்னோ குதூஹலமங்க³லேன ஸுத்³தி⁴ங் பச்செய்யாதி நேதங் டா²னங் விஜ்ஜதி. புது²ஜ்ஜனோ குதூஹலமங்க³லேன ஸுத்³தி⁴ங் பச்செய்யாதி டா²னமேதங் விஜ்ஜதி.
Diṭṭhisampanno mātaraṃ jīvitā voropeyya hatthehi vā pādehi vā suhataṃ kareyyāti netaṃ ṭhānaṃ vijjati, puthujjano mātaraṃ jīvitā voropeyya hatthehi vā pādehi vā suhataṃ kareyyāti ṭhānametaṃ vijjati. Evaṃ pitaraṃ, arahantaṃ, bhikkhuṃ. Diṭṭhisampanno puggalo saṅghaṃ bhindeyya saṅghe vā saṅgharājiṃ janeyyāti netaṃ ṭhānaṃ vijjati, puthujjano saṅghaṃ bhindeyya saṅghe vā saṅgharājiṃ janeyyāti ṭhānametaṃ vijjati, diṭṭhisampanno tathāgatassa duṭṭhacitto lohitaṃ uppādeyya, parinibbutassa vā tathāgatassa duṭṭhacitto thūpaṃ bhindeyyāti netaṃ ṭhānaṃ vijjati. Puthujjano tathāgatassa duṭṭhacitto lohitaṃ uppādeyya, parinibbutassa vā tathāgatassa duṭṭhacitto thūpaṃ bhindeyyāti ṭhānametaṃ vijjati. Diṭṭhisampanno aññaṃ satthāraṃ apadiseyya api jīvitahetūti netaṃ ṭhānaṃ vijjati, puthujjano aññaṃ satthāraṃ apadiseyyāti ṭhānametaṃ vijjati. Diṭṭhisampanno ito bahiddhā aññaṃ dakkhiṇeyyaṃ pariyeseyyāti netaṃ ṭhānaṃ vijjati, puthujjano ito bahiddhā aññaṃ dakkhiṇeyyaṃ pariyeseyyāti ṭhānametaṃ vijjati, diṭṭhisampanno kutūhalamaṅgalena suddhiṃ pacceyyāti netaṃ ṭhānaṃ vijjati. Puthujjano kutūhalamaṅgalena suddhiṃ pacceyyāti ṭhānametaṃ vijjati.
57. இத்தீ² ராஜா சக்கவத்தீ ஸியாதி நேதங் டா²னங் விஜ்ஜதி, புரிஸோ ராஜா சக்கவத்தீ ஸியாதி டா²னமேதங் விஜ்ஜதி; இத்தீ² ஸக்கோ தே³வானமிந்தோ³ ஸியாதி நேதங் டா²னங் விஜ்ஜதி, புரிஸோ ஸக்கோ தே³வானமிந்தோ³ ஸியாதி டா²னமேதங் விஜ்ஜதி; இத்தீ² மாரோ பாபிமா ஸியாதி நேதங் டா²னங் விஜ்ஜதி, புரிஸோ மாரோ பாபிமா ஸியாதி டா²னமேதங் விஜ்ஜதி; இத்தீ² மஹாப்³ரஹ்மா ஸியாதி நேதங் டா²னங் விஜ்ஜதி, புரிஸோ மஹாப்³ரஹ்மா ஸியாதி டா²னமேதங் விஜ்ஜதி; இத்தீ² ததா²க³தோ அரஹங் ஸம்மாஸம்பு³த்³தோ⁴ ஸியாதி நேதங் டா²னங் விஜ்ஜதி, புரிஸோ ததா²க³தோ அரஹங் ஸம்மாஸம்பு³த்³தோ⁴ ஸியாதி டா²னமேதங் விஜ்ஜதி.
57. Itthī rājā cakkavattī siyāti netaṃ ṭhānaṃ vijjati, puriso rājā cakkavattī siyāti ṭhānametaṃ vijjati; itthī sakko devānamindo siyāti netaṃ ṭhānaṃ vijjati, puriso sakko devānamindo siyāti ṭhānametaṃ vijjati; itthī māro pāpimā siyāti netaṃ ṭhānaṃ vijjati, puriso māro pāpimā siyāti ṭhānametaṃ vijjati; itthī mahābrahmā siyāti netaṃ ṭhānaṃ vijjati, puriso mahābrahmā siyāti ṭhānametaṃ vijjati; itthī tathāgato arahaṃ sammāsambuddho siyāti netaṃ ṭhānaṃ vijjati, puriso tathāgato arahaṃ sammāsambuddho siyāti ṭhānametaṃ vijjati.
த்³வே ததா²க³தா அரஹந்தோ ஸம்மாஸம்பு³த்³தா⁴ அபுப்³ப³ங் அசரிமங் ஏகிஸ்ஸா லோகதா⁴துயா உப்பஜ்ஜெய்யுங் வா த⁴ம்மங் வா தே³ஸெய்யுந்தி நேதங் டா²னங் விஜ்ஜதி, ஏகோவ ததா²க³தோ அரஹங் ஸம்மாஸம்பு³த்³தோ⁴ ஏகிஸ்ஸா லோகதா⁴துயா உப்பஜ்ஜிஸ்ஸதி வா த⁴ம்மங் வா தே³ஸெஸ்ஸதீதி டா²னமேதங் விஜ்ஜதி.
Dve tathāgatā arahanto sammāsambuddhā apubbaṃ acarimaṃ ekissā lokadhātuyā uppajjeyyuṃ vā dhammaṃ vā deseyyunti netaṃ ṭhānaṃ vijjati, ekova tathāgato arahaṃ sammāsambuddho ekissā lokadhātuyā uppajjissati vā dhammaṃ vā desessatīti ṭhānametaṃ vijjati.
திண்ணங் து³ச்சரிதானங் இட்டோ² கந்தோ பியோ மனாபோ விபாகோ ப⁴விஸ்ஸதீதி நேதங் டா²னங் விஜ்ஜதி, திண்ணங் து³ச்சரிதானங் அனிட்டோ² அகந்தோ அப்பியோ அமனாபோ விபாகோ ப⁴விஸ்ஸதீதி டா²னமேதங் விஜ்ஜதி . திண்ணங் ஸுசரிதானங் அனிட்டோ² அகந்தோ அப்பியோ அமனாபோ விபாகோ ப⁴விஸ்ஸதீதி நேதங் டா²னங் விஜ்ஜதி, திண்ணங் ஸுசரிதானங் இட்டோ² கந்தோ பியோ மனாபோ விபாகோ ப⁴விஸ்ஸதீதி டா²னமேதங் விஜ்ஜதி.
Tiṇṇaṃ duccaritānaṃ iṭṭho kanto piyo manāpo vipāko bhavissatīti netaṃ ṭhānaṃ vijjati, tiṇṇaṃ duccaritānaṃ aniṭṭho akanto appiyo amanāpo vipāko bhavissatīti ṭhānametaṃ vijjati . Tiṇṇaṃ sucaritānaṃ aniṭṭho akanto appiyo amanāpo vipāko bhavissatīti netaṃ ṭhānaṃ vijjati, tiṇṇaṃ sucaritānaṃ iṭṭho kanto piyo manāpo vipāko bhavissatīti ṭhānametaṃ vijjati.
அஞ்ஞதரோ ஸமணோ வா ப்³ராஹ்மணோ வா குஹகோ லபகோ நேமித்தகோ குஹனலபனநேமித்தகத்தங் புப்³ப³ங்க³மங் கத்வா பஞ்ச நீவரணே அப்பஹாய சேதஸோ உபக்கிலேஸே பஞ்ஞாய து³ப்³ப³லீகரணே சதூஸு ஸதிபட்டா²னேஸு அனுபட்டி²தஸ்ஸதி 9 விஹரந்தோ ஸத்த பொ³ஜ்ஜ²ங்கே³ அபா⁴வயித்வா அனுத்தரங் ஸம்மாஸம்போ³தி⁴ங் அபி⁴ஸம்பு³ஜ்ஜி²ஸ்ஸதீதி நேதங் டா²னங் விஜ்ஜதி, அஞ்ஞதரோ ஸமணோ வா ப்³ராஹ்மணோ வா ஸப்³ப³தோ³ஸாபக³தோ பஞ்ச நீவரணே பஹாய சேதஸோ உபக்கிலேஸே பஞ்ஞாய து³ப்³ப³லீகரணே சதூஸு ஸதிபட்டா²னேஸு உபட்டி²தஸ்ஸதி விஹரந்தோ ஸத்த பொ³ஜ்ஜ²ங்கே³ பா⁴வயித்வா அனுத்தரங் ஸம்மாஸம்போ³தி⁴ங் அபி⁴ஸம்பு³ஜ்ஜி²ஸ்ஸதீதி டா²னமேதங் விஜ்ஜதி. யங் எத்த² ஞாணங் ஹேதுஸோ டா²னஸோ அனோதி⁴ஸோ இத³ங் வுச்சதி டா²னாட்டா²னஞாணங் பட²மங் ததா²க³தப³லங்.
Aññataro samaṇo vā brāhmaṇo vā kuhako lapako nemittako kuhanalapananemittakattaṃ pubbaṅgamaṃ katvā pañca nīvaraṇe appahāya cetaso upakkilese paññāya dubbalīkaraṇe catūsu satipaṭṭhānesu anupaṭṭhitassati 10 viharanto satta bojjhaṅge abhāvayitvā anuttaraṃ sammāsambodhiṃ abhisambujjhissatīti netaṃ ṭhānaṃ vijjati, aññataro samaṇo vā brāhmaṇo vā sabbadosāpagato pañca nīvaraṇe pahāya cetaso upakkilese paññāya dubbalīkaraṇe catūsu satipaṭṭhānesu upaṭṭhitassati viharanto satta bojjhaṅge bhāvayitvā anuttaraṃ sammāsambodhiṃ abhisambujjhissatīti ṭhānametaṃ vijjati. Yaṃ ettha ñāṇaṃ hetuso ṭhānaso anodhiso idaṃ vuccati ṭhānāṭṭhānañāṇaṃ paṭhamaṃ tathāgatabalaṃ.
இதி டா²னாட்டா²னக³தா ஸப்³பே³ க²யத⁴ம்மா வயத⁴ம்மா விராக³த⁴ம்மா நிரோத⁴த⁴ம்மா கேசி ஸக்³கூ³பகா³ கேசி அபாயூபகா³ கேசி நிப்³பா³னூபகா³, ஏவங் ப⁴க³வா ஆஹ –
Iti ṭhānāṭṭhānagatā sabbe khayadhammā vayadhammā virāgadhammā nirodhadhammā keci saggūpagā keci apāyūpagā keci nibbānūpagā, evaṃ bhagavā āha –
58.
58.
யதா²கம்மங் க³மிஸ்ஸந்தி, புஞ்ஞபாபப²லூபகா³;
Yathākammaṃ gamissanti, puññapāpaphalūpagā;
நிரயங் பாபகம்மந்தா, புஞ்ஞகம்மா ச ஸுக்³க³திங்;
Nirayaṃ pāpakammantā, puññakammā ca suggatiṃ;
அபரே ச மக்³க³ங் பா⁴வெத்வா, பரினிப்³ப³ந்தினாஸவாதி 13.
Apare ca maggaṃ bhāvetvā, parinibbantināsavāti 14.
ஸப்³பே³ ஸத்தாதி அரியா ச அனரியா ச ஸக்காயபரியாபன்னா ச ஸக்காயவீதிவத்தா ச. மரிஸ்ஸந்தீதி த்³வீஹி மரணேஹி த³ந்த⁴மரணேன ச அத³ந்த⁴மரணேன ச, ஸக்காயபரியாபன்னானங் அத³ந்த⁴மரணங் ஸக்காயவீதிவத்தானங் த³ந்த⁴மரணங். மரணந்தங் ஹி ஜீவிதந்தி க²யா ஆயுஸ்ஸ இந்த்³ரியானங் உபரோதா⁴ ஜீவிதபரியந்தோ மரணபரியந்தோ. யதா²கம்மங் க³மிஸ்ஸந்தீதி கம்மஸ்ஸகதா. புஞ்ஞபாபப²லூபகா³தி கம்மானங் ப²லத³ஸ்ஸாவிதா ச அவிப்பவாஸோ ச.
Sabbesattāti ariyā ca anariyā ca sakkāyapariyāpannā ca sakkāyavītivattā ca. Marissantīti dvīhi maraṇehi dandhamaraṇena ca adandhamaraṇena ca, sakkāyapariyāpannānaṃ adandhamaraṇaṃ sakkāyavītivattānaṃ dandhamaraṇaṃ. Maraṇantaṃ hi jīvitanti khayā āyussa indriyānaṃ uparodhā jīvitapariyanto maraṇapariyanto. Yathākammaṃ gamissantīti kammassakatā. Puññapāpaphalūpagāti kammānaṃ phaladassāvitā ca avippavāso ca.
நிரயங் பாபகம்மந்தாதி அபுஞ்ஞஸங்கா²ரா. புஞ்ஞகம்மா ச ஸுக்³க³திந்தி புஞ்ஞஸங்கா²ரா ஸுக³திங் க³மிஸ்ஸந்தி. அபரே ச மக்³க³ங் பா⁴வெத்வா, பரினிப்³ப³ந்தினாஸவாதி ஸப்³ப³ஸங்கா²ரானங் ஸமதிக்கமனங். தேனாஹ ப⁴க³வா – ‘‘ஸப்³பே³…பே॰… நாஸவா’’தி.
Nirayaṃ pāpakammantāti apuññasaṅkhārā. Puññakammā ca suggatinti puññasaṅkhārā sugatiṃ gamissanti. Apare ca maggaṃ bhāvetvā, parinibbantināsavāti sabbasaṅkhārānaṃ samatikkamanaṃ. Tenāha bhagavā – ‘‘sabbe…pe… nāsavā’’ti.
‘‘ஸப்³பே³ ஸத்தா மரிஸ்ஸந்தி, மரணந்தங் ஹி ஜீவிதங். யதா²கம்மங் க³மிஸ்ஸந்தி, புஞ்ஞபாபப²லூபகா³. நிரயங் பாபகம்மந்தா’’தி ஆகா³ள்ஹா ச நிஜ்ஜா²மா ச படிபதா³. ‘‘அபரே ச மக்³க³ங் பா⁴வெத்வா, பரினிப்³ப³ந்தினாஸவா’’தி மஜ்ஜி²மா படிபதா³. ‘‘ஸப்³பே³ ஸத்தா மரிஸ்ஸந்தி, மரணந்தங் ஹி ஜீவிதங், யதா²கம்மங் க³மிஸ்ஸந்தி, புஞ்ஞபாபப²லூபகா³, நிரயங் பாபகம்மந்தா’’தி அயங் ஸங்கிலேஸோ. ஏவங் ஸங்ஸாரங் நிப்³ப³த்தயதி. ‘‘ஸப்³பே³ ஸத்தா மரிஸ்ஸந்தி…பே॰… நிரயங் பாபகம்மந்தா’’தி இமே தயோ வட்டா து³க்க²வட்டோ கம்மவட்டோ கிலேஸவட்டோ. ‘‘அபரே ச மக்³க³ங் பா⁴வெத்வா, பரினிப்³ப³ந்தினாஸவா’’தி திண்ணங் வட்டானங் விவட்டனா. ‘‘ஸப்³பே³ ஸத்தா மரிஸ்ஸந்தி…பே॰… நிரயங் பாபகம்மந்தா’’தி ஆதீ³னவோ, ‘‘புஞ்ஞகம்மா ச ஸுக்³க³தி’’ந்தி அஸ்ஸாதோ³, ‘‘அபரே ச மக்³க³ங் பா⁴வெத்வா, பரினிப்³ப³ந்தினாஸவா’’தி நிஸ்ஸரணங். ‘‘ஸப்³பே³ ஸத்தா மரிஸ்ஸந்தி…பே॰… நிரயங் பாபகம்மந்தா’’தி ஹேது ச ப²லஞ்ச, பஞ்சக்க²ந்தா⁴ ப²லங், தண்ஹா ஹேது, ‘‘அபரே ச மக்³க³ங் பா⁴வெத்வா, பரினிப்³ப³ந்தினாஸவா’’தி மக்³கோ³ ச ப²லஞ்ச. ‘‘ஸப்³பே³ ஸத்தா மரிஸ்ஸந்தி, மரணந்தங் ஹி ஜீவிதங். யதா²கம்மங் க³மிஸ்ஸந்தி, புஞ்ஞபாபப²லூபகா³, நிரயங் பாபகம்மந்தா’’தி அயங் ஸங்கிலேஸோ, ஸோ ஸங்கிலேஸோ திவிதோ⁴ தண்ஹாஸங்கிலேஸோ தி³ட்டி²ஸங்கிலேஸோ து³ச்சரிதஸங்கிலேஸோதி.
‘‘Sabbe sattā marissanti, maraṇantaṃ hi jīvitaṃ. Yathākammaṃ gamissanti, puññapāpaphalūpagā. Nirayaṃ pāpakammantā’’ti āgāḷhā ca nijjhāmā ca paṭipadā. ‘‘Apare ca maggaṃ bhāvetvā, parinibbantināsavā’’ti majjhimā paṭipadā. ‘‘Sabbe sattā marissanti, maraṇantaṃ hi jīvitaṃ, yathākammaṃ gamissanti, puññapāpaphalūpagā, nirayaṃ pāpakammantā’’ti ayaṃ saṃkileso. Evaṃ saṃsāraṃ nibbattayati. ‘‘Sabbe sattā marissanti…pe… nirayaṃ pāpakammantā’’ti ime tayo vaṭṭā dukkhavaṭṭo kammavaṭṭo kilesavaṭṭo. ‘‘Apare ca maggaṃ bhāvetvā, parinibbantināsavā’’ti tiṇṇaṃ vaṭṭānaṃ vivaṭṭanā. ‘‘Sabbe sattā marissanti…pe… nirayaṃ pāpakammantā’’ti ādīnavo, ‘‘puññakammā ca suggati’’nti assādo, ‘‘apare ca maggaṃ bhāvetvā, parinibbantināsavā’’ti nissaraṇaṃ. ‘‘Sabbe sattā marissanti…pe… nirayaṃ pāpakammantā’’ti hetu ca phalañca, pañcakkhandhā phalaṃ, taṇhā hetu, ‘‘apare ca maggaṃ bhāvetvā, parinibbantināsavā’’ti maggo ca phalañca. ‘‘Sabbe sattā marissanti, maraṇantaṃ hi jīvitaṃ. Yathākammaṃ gamissanti, puññapāpaphalūpagā, nirayaṃ pāpakammantā’’ti ayaṃ saṃkileso, so saṃkileso tividho taṇhāsaṃkileso diṭṭhisaṃkileso duccaritasaṃkilesoti.
59. தத்த² தண்ஹாஸங்கிலேஸோ தீஹி தண்ஹாஹி நித்³தி³ஸிதப்³போ³ – காமதண்ஹாய ப⁴வதண்ஹாய விப⁴வதண்ஹாய. யேன யேன வா பன வத்து²னா அஜ்ஜோ²ஸிதோ, தேன தேனேவ நித்³தி³ஸிதப்³போ³, தஸ்ஸா வித்தா²ரோ ச²த்திங்ஸாய தண்ஹாய ஜாலினியா விசரிதானி. தத்த² தி³ட்டி²ஸங்கிலேஸோ உச்சே²த³ஸஸ்ஸதேன நித்³தி³ஸிதப்³போ³, யேன யேன வா பன வத்து²னா தி³ட்டி²வஸேன அபி⁴னிவிஸதி, ‘‘இத³மேவ ஸச்சங் மோக⁴மஞ்ஞ’’ந்தி தேன தேனேவ நித்³தி³ஸிதப்³போ³, தஸ்ஸா வித்தா²ரோ த்³வாஸட்டி² தி³ட்டி²க³தானி. தத்த² து³ச்சரிதஸங்கிலேஸோ சேதனா சேதஸிககம்மேன நித்³தி³ஸிதப்³போ³, தீஹி து³ச்சரிதேஹி காயது³ச்சரிதேன வசீது³ச்சரிதேன மனோது³ச்சரிதேன, தஸ்ஸா வித்தா²ரோ த³ஸ அகுஸலகம்மபதா². அபரே ச மக்³க³ங் பா⁴வெத்வா, பரினிப்³ப³ந்தினாஸவாதி இத³ங் வோதா³னங்.
59. Tattha taṇhāsaṃkileso tīhi taṇhāhi niddisitabbo – kāmataṇhāya bhavataṇhāya vibhavataṇhāya. Yena yena vā pana vatthunā ajjhosito, tena teneva niddisitabbo, tassā vitthāro chattiṃsāya taṇhāya jāliniyā vicaritāni. Tattha diṭṭhisaṃkileso ucchedasassatena niddisitabbo, yena yena vā pana vatthunā diṭṭhivasena abhinivisati, ‘‘idameva saccaṃ moghamañña’’nti tena teneva niddisitabbo, tassā vitthāro dvāsaṭṭhi diṭṭhigatāni. Tattha duccaritasaṃkileso cetanā cetasikakammena niddisitabbo, tīhi duccaritehi kāyaduccaritena vacīduccaritena manoduccaritena, tassā vitthāro dasa akusalakammapathā. Apare ca maggaṃ bhāvetvā, parinibbantināsavāti idaṃ vodānaṃ.
தயித³ங் வோதா³னங் திவித⁴ங்; தண்ஹாஸங்கிலேஸோ ஸமதே²ன விஸுஜ்ஜ²தி, ஸோ ஸமதோ² ஸமாதி⁴க்க²ந்தோ⁴, தி³ட்டி²ஸங்கிலேஸோ விபஸ்ஸனாய விஸுஜ்ஜ²தி, ஸா விபஸ்ஸனா பஞ்ஞாக்க²ந்தோ⁴, து³ச்சரிதஸங்கிலேஸோ ஸுசரிதேன விஸுஜ்ஜ²தி, தங் ஸுசரிதங் ஸீலக்க²ந்தோ⁴.
Tayidaṃ vodānaṃ tividhaṃ; taṇhāsaṃkileso samathena visujjhati, so samatho samādhikkhandho, diṭṭhisaṃkileso vipassanāya visujjhati, sā vipassanā paññākkhandho, duccaritasaṃkileso sucaritena visujjhati, taṃ sucaritaṃ sīlakkhandho.
‘‘ஸப்³பே³ ஸத்தா மரிஸ்ஸந்தி, மரணந்தங் ஹி ஜீவிதங், யதா²கம்மங் க³மிஸ்ஸந்தி, புஞ்ஞபாபப²லூபகா³, நிரயங் பாபகம்மந்தா’’தி அபுஞ்ஞப்படிபதா³, ‘‘புஞ்ஞகம்மா ச ஸுக்³க³தி’’ந்தி புஞ்ஞப்படிபதா³, ‘‘அபரே ச மக்³க³ங் பா⁴வெத்வா, பரினிப்³ப³ந்தினாஸவா’’தி புஞ்ஞபாபஸமதிக்கமப்படிபதா³, தத்த² யா ச புஞ்ஞப்படிபதா³ யா ச அபுஞ்ஞப்படிபதா³, அயங் ஏகா படிபதா³ ஸப்³ப³த்த²கா³மினீ ஏகா அபாயேஸு, ஏகா தே³வேஸு, யா ச புஞ்ஞபாபஸமதிக்கமா படிபதா³ அயங் தத்த² தத்த² கா³மினீ படிபதா³.
‘‘Sabbe sattā marissanti, maraṇantaṃ hi jīvitaṃ, yathākammaṃ gamissanti, puññapāpaphalūpagā, nirayaṃ pāpakammantā’’ti apuññappaṭipadā, ‘‘puññakammā ca suggati’’nti puññappaṭipadā, ‘‘apare ca maggaṃ bhāvetvā, parinibbantināsavā’’ti puññapāpasamatikkamappaṭipadā, tattha yā ca puññappaṭipadā yā ca apuññappaṭipadā, ayaṃ ekā paṭipadā sabbatthagāminī ekā apāyesu, ekā devesu, yā ca puññapāpasamatikkamā paṭipadā ayaṃ tattha tattha gāminī paṭipadā.
தயோ ராஸீ – மிச்ச²த்தனியதோ ராஸி, ஸம்மத்தனியதோ ராஸி, அனியதோ ராஸி, தத்த² யோ ச மிச்ச²த்தனியதோ ராஸி யோ ச ஸம்மத்தனியதோ ராஸி ஏகா படிபதா³ தத்த² தத்த² கா³மினீ, தத்த² யோ அனியதோ ராஸி, அயங் ஸப்³ப³த்த²கா³மினீ படிபதா³. கேன காரணேன? பச்சயங் லப⁴ந்தோ நிரயே உபபஜ்ஜெய்ய, பச்சயங் லப⁴ந்தோ திரச்சா²னயோனீஸு உபபஜ்ஜெய்ய, பச்சயங் லப⁴ந்தோ பெத்திவிஸயேஸு உபபஜ்ஜெய்ய, பச்சயங் லப⁴ந்தோ அஸுரேஸு உபபஜ்ஜெய்ய, பச்சயங் லப⁴ந்தோ தே³வேஸு உபபஜ்ஜெய்ய, பச்சயங் லப⁴ந்தோ மனுஸ்ஸேஸு உபபஜ்ஜெய்ய, பச்சயங் லப⁴ந்தோ பரினிப்³பா³யெய்ய, தஸ்மாயங் ஸப்³ப³த்த²கா³மினீ படிபதா³, யங் எத்த² ஞாணங் ஹேதுஸோ டா²னஸோ அனோதி⁴ஸோ, இத³ங் வுச்சதி ஸப்³ப³த்த²கா³மினீ படிபதா³ ஞாணங் து³தியங் ததா²க³தப³லங்.
Tayo rāsī – micchattaniyato rāsi, sammattaniyato rāsi, aniyato rāsi, tattha yo ca micchattaniyato rāsi yo ca sammattaniyato rāsi ekā paṭipadā tattha tattha gāminī, tattha yo aniyato rāsi, ayaṃ sabbatthagāminī paṭipadā. Kena kāraṇena? Paccayaṃ labhanto niraye upapajjeyya, paccayaṃ labhanto tiracchānayonīsu upapajjeyya, paccayaṃ labhanto pettivisayesu upapajjeyya, paccayaṃ labhanto asuresu upapajjeyya, paccayaṃ labhanto devesu upapajjeyya, paccayaṃ labhanto manussesu upapajjeyya, paccayaṃ labhanto parinibbāyeyya, tasmāyaṃ sabbatthagāminī paṭipadā, yaṃ ettha ñāṇaṃ hetuso ṭhānaso anodhiso, idaṃ vuccati sabbatthagāminī paṭipadā ñāṇaṃ dutiyaṃ tathāgatabalaṃ.
இதி ஸப்³ப³த்த²கா³மினீ படிபதா³ அனேகதா⁴துலோகோ, தத்த² தத்த² கா³மினீ படிபதா³ நானாதா⁴துலோகோ. தத்த² கதமோ அனேகதா⁴துலோகோ? சக்கு²தா⁴து ரூபதா⁴து சக்கு²விஞ்ஞாணதா⁴து, ஸோததா⁴து ஸத்³த³தா⁴து ஸோதவிஞ்ஞாணதா⁴து, கா⁴னதா⁴து க³ந்த⁴தா⁴து கா⁴னவிஞ்ஞாணதா⁴து, ஜிவ்ஹாதா⁴து ரஸதா⁴து ஜிவ்ஹாவிஞ்ஞாணதா⁴து, காயதா⁴து பொ²ட்ட²ப்³ப³தா⁴து காயவிஞ்ஞாணதா⁴து, மனோதா⁴து த⁴ம்மதா⁴து மனோவிஞ்ஞாணதா⁴து, பத²வீதா⁴து, ஆபோதா⁴து, தேஜோதா⁴து, வாயோதா⁴து, ஆகாஸதா⁴து, விஞ்ஞாணதா⁴து, காமதா⁴து, ப்³யாபாத³தா⁴து, விஹிங்ஸாதா⁴து, நெக்க²ம்மதா⁴து, அப்³யாபாத³தா⁴து, அவிஹிங்ஸாதா⁴து, து³க்க²தா⁴து, தோ³மனஸ்ஸதா⁴து , அவிஜ்ஜாதா⁴து, ஸுக²தா⁴து, ஸோமனஸ்ஸதா⁴து, உபெக்கா²தா⁴து, ரூபதா⁴து, அரூபதா⁴து, நிரோத⁴தா⁴து, ஸங்கா²ரதா⁴து, நிப்³பா³னதா⁴து, அயங் அனேகதா⁴துலோகோ.
Iti sabbatthagāminī paṭipadā anekadhātuloko, tattha tattha gāminī paṭipadā nānādhātuloko. Tattha katamo anekadhātuloko? Cakkhudhātu rūpadhātu cakkhuviññāṇadhātu, sotadhātu saddadhātu sotaviññāṇadhātu, ghānadhātu gandhadhātu ghānaviññāṇadhātu, jivhādhātu rasadhātu jivhāviññāṇadhātu, kāyadhātu phoṭṭhabbadhātu kāyaviññāṇadhātu, manodhātu dhammadhātu manoviññāṇadhātu, pathavīdhātu, āpodhātu, tejodhātu, vāyodhātu, ākāsadhātu, viññāṇadhātu, kāmadhātu, byāpādadhātu, vihiṃsādhātu, nekkhammadhātu, abyāpādadhātu, avihiṃsādhātu, dukkhadhātu, domanassadhātu , avijjādhātu, sukhadhātu, somanassadhātu, upekkhādhātu, rūpadhātu, arūpadhātu, nirodhadhātu, saṅkhāradhātu, nibbānadhātu, ayaṃ anekadhātuloko.
தத்த² கதமோ நானாதா⁴துலோகோ? அஞ்ஞா சக்கு²தா⁴து, அஞ்ஞா ரூபதா⁴து, அஞ்ஞா சக்கு²விஞ்ஞாணதா⁴து. ஏவங் ஸப்³பா³. அஞ்ஞா நிப்³பா³னதா⁴து. யங் எத்த² ஞாணங் ஹேதுஸோ டா²னஸோ அனோதி⁴ஸோ, இத³ங் வுச்சதி அனேகதா⁴து நானாதா⁴து ஞாணங் ததியங் ததா²க³தப³லங்.
Tattha katamo nānādhātuloko? Aññā cakkhudhātu, aññā rūpadhātu, aññā cakkhuviññāṇadhātu. Evaṃ sabbā. Aññā nibbānadhātu. Yaṃ ettha ñāṇaṃ hetuso ṭhānaso anodhiso, idaṃ vuccati anekadhātu nānādhātu ñāṇaṃ tatiyaṃ tathāgatabalaṃ.
60. இதி அனேகதா⁴து நானாதா⁴துகஸ்ஸ லோகஸ்ஸ யங் யதே³வ தா⁴துங் ஸத்தா அதி⁴முச்சந்தி, தங் ததே³வ அதி⁴ட்ட²ஹந்தி அபி⁴னிவிஸந்தி, கேசி ரூபாதி⁴முத்தா, கேசி ஸத்³தா³தி⁴முத்தா, கேசி க³ந்தா⁴தி⁴முத்தா, கேசி ரஸாதி⁴முத்தா, கேசி பொ²ட்ட²ப்³பா³தி⁴முத்தா, கேசி த⁴ம்மாதி⁴முத்தா, கேசி இத்தா²தி⁴முத்தா, கேசி புரிஸாதி⁴முத்தா, கேசி சாகா³தி⁴முத்தா, கேசி ஹீனாதி⁴முத்தா , கேசி பணீதாதி⁴முத்தா, கேசி தே³வாதி⁴முத்தா, கேசி மனுஸ்ஸாதி⁴முத்தா, கேசி நிப்³பா³னாதி⁴முத்தா. யங் எத்த² ஞாணங் ஹேதுஸோ டா²னஸோ அனோதி⁴ஸோ, அயங் வேனெய்யோ, அயங் ந வேனெய்யோ, அயங் ஸக்³க³கா³மீ, அயங் து³க்³க³திகா³மீதி, இத³ங் வுச்சதி ஸத்தானங் நானாதி⁴முத்திகதா ஞாணங் சதுத்த²ங் ததா²க³தப³லங்.
60. Iti anekadhātu nānādhātukassa lokassa yaṃ yadeva dhātuṃ sattā adhimuccanti, taṃ tadeva adhiṭṭhahanti abhinivisanti, keci rūpādhimuttā, keci saddādhimuttā, keci gandhādhimuttā, keci rasādhimuttā, keci phoṭṭhabbādhimuttā, keci dhammādhimuttā, keci itthādhimuttā, keci purisādhimuttā, keci cāgādhimuttā, keci hīnādhimuttā , keci paṇītādhimuttā, keci devādhimuttā, keci manussādhimuttā, keci nibbānādhimuttā. Yaṃ ettha ñāṇaṃ hetuso ṭhānaso anodhiso, ayaṃ veneyyo, ayaṃ na veneyyo, ayaṃ saggagāmī, ayaṃ duggatigāmīti, idaṃ vuccati sattānaṃ nānādhimuttikatā ñāṇaṃ catutthaṃ tathāgatabalaṃ.
இதி தே யதா²தி⁴முத்தா ச ப⁴வந்தி, தங் தங் கம்மஸமாதா³னங் ஸமாதி³யந்தி. தே ச²ப்³பி³த⁴ங் கம்மங் ஸமாதி³யந்தி – கேசி லோப⁴வஸேன, கேசி தோ³ஸவஸேன, கேசி மோஹவஸேன, கேசி ஸத்³தா⁴வஸேன, கேசி வீரியவஸேன, கேசி பஞ்ஞாவஸேன. தங் விப⁴ஜ்ஜமானங் து³வித⁴ங் – ஸங்ஸாரகா³மி ச நிப்³பா³னகா³மி ச.
Iti te yathādhimuttā ca bhavanti, taṃ taṃ kammasamādānaṃ samādiyanti. Te chabbidhaṃ kammaṃ samādiyanti – keci lobhavasena, keci dosavasena, keci mohavasena, keci saddhāvasena, keci vīriyavasena, keci paññāvasena. Taṃ vibhajjamānaṃ duvidhaṃ – saṃsāragāmi ca nibbānagāmi ca.
தத்த² யங் லோப⁴வஸேன தோ³ஸவஸேன மோஹவஸேன ச கம்மங் கரோதி, இத³ங் கம்மங் கண்ஹங் கண்ஹவிபாகங். தத்த² யங் ஸத்³தா⁴வஸேன கம்மங் கரோதி, இத³ங் கம்மங் ஸுக்கங் ஸுக்கவிபாகங். தத்த² யங் லோப⁴வஸேன தோ³ஸவஸேன மோஹவஸேன ஸத்³தா⁴வஸேன ச கம்மங் கரோதி, இத³ங் கம்மங் கண்ஹஸுக்கங் கண்ஹஸுக்கவிபாகங். தத்த² யங் வீரியவஸேன பஞ்ஞாவஸேன ச கம்மங் கரோதி, இத³ங் கம்மங் அகண்ஹங் அஸுக்கங் அகண்ஹஅஸுக்கவிபாகங் கம்முத்தமங் கம்மஸெட்ட²ங் கம்மக்க²யாய ஸங்வத்ததி.
Tattha yaṃ lobhavasena dosavasena mohavasena ca kammaṃ karoti, idaṃ kammaṃ kaṇhaṃ kaṇhavipākaṃ. Tattha yaṃ saddhāvasena kammaṃ karoti, idaṃ kammaṃ sukkaṃ sukkavipākaṃ. Tattha yaṃ lobhavasena dosavasena mohavasena saddhāvasena ca kammaṃ karoti, idaṃ kammaṃ kaṇhasukkaṃ kaṇhasukkavipākaṃ. Tattha yaṃ vīriyavasena paññāvasena ca kammaṃ karoti, idaṃ kammaṃ akaṇhaṃ asukkaṃ akaṇhaasukkavipākaṃ kammuttamaṃ kammaseṭṭhaṃ kammakkhayāya saṃvattati.
சத்தாரி கம்மஸமாதா³னானி. அத்தி² கம்மஸமாதா³னங் பச்சுப்பன்னஸுக²ங் ஆயதிங் து³க்க²விபாகங், அத்தி² கம்மஸமாதா³னங் பச்சுப்பன்னது³க்க²ங் ஆயதிங் ஸுக²விபாகங், அத்தி² கம்மஸமாதா³னங் பச்சுப்பன்னது³க்க²ஞ்சேவ ஆயதிங் ச து³க்க²விபாகங், அத்தி² கம்மஸமாதா³னங் பச்சுப்பன்னஸுக²ஞ்சேவ ஆயதிங் ச ஸுக²விபாகங். யங் ஏவங் ஜாதியங் கம்மஸமாதா³னங், இமினா புக்³க³லேன அகுஸலகம்மஸமாதா³னங் உபசிதங் அவிபக்கங் விபாகாய பச்சுபட்டி²தங் ந ச ப⁴ப்³போ³ அபி⁴னிப்³பி³தா⁴ க³ந்துந்தி தங் ப⁴க³வா ந ஓவத³தி. யதா² தே³வத³த்தங் கோகாலிகங் ஸுனக்க²த்தங் லிச்ச²விபுத்தங், யே வா பனஞ்ஞேபி ஸத்தா மிச்ச²த்தனியதா இமேஸஞ்ச புக்³க³லானங் உபசிதங் அகுஸலங் ந ச தாவ பாரிபூரிங் க³தங், புரா பாரிபூரிங் க³ச்ச²தி. புரா ப²லங் நிப்³ப³த்தயதி, புரா மக்³க³மாவாரயதி, புரா வேனெய்யத்தங் ஸமதிக்கமதீதி தே ப⁴க³வா அஸமத்தே ஓவத³தி. யதா² புண்ணஞ்ச கோ³வதிகங் அசேலஞ்ச குக்குரவதிகங்.
Cattāri kammasamādānāni. Atthi kammasamādānaṃ paccuppannasukhaṃ āyatiṃ dukkhavipākaṃ, atthi kammasamādānaṃ paccuppannadukkhaṃ āyatiṃ sukhavipākaṃ, atthi kammasamādānaṃ paccuppannadukkhañceva āyatiṃ ca dukkhavipākaṃ, atthi kammasamādānaṃ paccuppannasukhañceva āyatiṃ ca sukhavipākaṃ. Yaṃ evaṃ jātiyaṃ kammasamādānaṃ, iminā puggalena akusalakammasamādānaṃ upacitaṃ avipakkaṃ vipākāya paccupaṭṭhitaṃ na ca bhabbo abhinibbidhā gantunti taṃ bhagavā na ovadati. Yathā devadattaṃ kokālikaṃ sunakkhattaṃ licchaviputtaṃ, ye vā panaññepi sattā micchattaniyatā imesañca puggalānaṃ upacitaṃ akusalaṃ na ca tāva pāripūriṃ gataṃ, purā pāripūriṃ gacchati. Purā phalaṃ nibbattayati, purā maggamāvārayati, purā veneyyattaṃ samatikkamatīti te bhagavā asamatte ovadati. Yathā puṇṇañca govatikaṃ acelañca kukkuravatikaṃ.
61. இமஸ்ஸ ச புக்³க³லஸ்ஸ அகுஸலகம்மஸமாதா³னங் பரிபூரமானங் மக்³க³ங் ஆவாரயிஸ்ஸதி புரா பாரிபூரிங் க³ச்ச²தி, புரா ப²லங் நிப்³ப³த்தயதி, புரா மக்³க³மாவாரயதி, புரா வேனெய்யத்தங் ஸமதிக்கமதீதி தங் ப⁴க³வா அஸமத்தங் ஓவத³தி. யதா² ஆயஸ்மந்தங் அங்கு³லிமாலங்.
61. Imassa ca puggalassa akusalakammasamādānaṃ paripūramānaṃ maggaṃ āvārayissati purā pāripūriṃ gacchati, purā phalaṃ nibbattayati, purā maggamāvārayati, purā veneyyattaṃ samatikkamatīti taṃ bhagavā asamattaṃ ovadati. Yathā āyasmantaṃ aṅgulimālaṃ.
ஸப்³பே³ஸங் முது³மஜ்ஜா²தி⁴மத்ததா. தத்த² முது³ ஆனேஞ்ஜாபி⁴ஸங்கா²ரா மஜ்ஜ²ங் அவஸேஸகுஸலஸங்கா²ரா, அதி⁴மத்தங் அகுஸலஸங்கா²ரா, யங் எத்த² ஞாணங் ஹேதுஸோ டா²னஸோ அனோதி⁴ஸோ, இத³ங் தி³ட்ட²த⁴ம்மவேத³னீயங், இத³ங் உபபஜ்ஜவேத³னீயங், இத³ங் அபராபரியவேத³னீயங், இத³ங் நிரயவேத³னீயங், இத³ங் திரச்சா²னவேத³னீயங், இத³ங் பெத்திவிஸயவேத³னீயங், இத³ங் அஸுரவேத³னீயங், இத³ங் தே³வவேத³னீயங், இத³ங் மனுஸ்ஸவேத³னீயந்தி, இத³ங் வுச்சதி அதீதானாக³தபச்சுப்பன்னானங் கம்மஸமாதா³னானங் ஹேதுஸோ டா²னஸோ அனோதி⁴ஸோ விபாகவேமத்ததா ஞாணங் பஞ்சமங் ததா²க³தப³லங்.
Sabbesaṃ mudumajjhādhimattatā. Tattha mudu āneñjābhisaṅkhārā majjhaṃ avasesakusalasaṅkhārā, adhimattaṃ akusalasaṅkhārā, yaṃ ettha ñāṇaṃ hetuso ṭhānaso anodhiso, idaṃ diṭṭhadhammavedanīyaṃ, idaṃ upapajjavedanīyaṃ, idaṃ aparāpariyavedanīyaṃ, idaṃ nirayavedanīyaṃ, idaṃ tiracchānavedanīyaṃ, idaṃ pettivisayavedanīyaṃ, idaṃ asuravedanīyaṃ, idaṃ devavedanīyaṃ, idaṃ manussavedanīyanti, idaṃ vuccati atītānāgatapaccuppannānaṃ kammasamādānānaṃ hetuso ṭhānaso anodhiso vipākavemattatā ñāṇaṃ pañcamaṃ tathāgatabalaṃ.
62. இதி ததா² ஸமாதி³ன்னானங் கம்மானங் ஸமாதி³ன்னானங் ஜா²னானங் விமொக்கா²னங் ஸமாதீ⁴னங் ஸமாபத்தீனங் அயங் ஸங்கிலேஸோ, இத³ங் வோதா³னங், இத³ங் வுட்டா²னங், ஏவங் ஸங்கிலிஸ்ஸதி, ஏவங் வோதா³யதி, ஏவங் வுட்ட²ஹதீதி ஞாணங் அனாவரணங்.
62. Iti tathā samādinnānaṃ kammānaṃ samādinnānaṃ jhānānaṃ vimokkhānaṃ samādhīnaṃ samāpattīnaṃ ayaṃ saṃkileso, idaṃ vodānaṃ, idaṃ vuṭṭhānaṃ, evaṃ saṃkilissati, evaṃ vodāyati, evaṃ vuṭṭhahatīti ñāṇaṃ anāvaraṇaṃ.
தத்த² கதி ஜா²னானி? சத்தாரி ஜா²னானி. கதி விமொக்கா²? ஏகாத³ஸ ச அட்ட² ச ஸத்த ச தயோ ச த்³வே ச. கதி ஸமாதீ⁴? தயோ ஸமாதீ⁴ – ஸவிதக்கோ ஸவிசாரோ ஸமாதி⁴, அவிதக்கோ விசாரமத்தோ ஸமாதி⁴, அவிதக்கோ அவிசாரோ ஸமாதி⁴. கதி ஸமாபத்தியோ? பஞ்ச ஸமாபத்தியோ – ஸஞ்ஞாஸமாபத்தி அஸஞ்ஞாஸமாபத்தி நேவஸஞ்ஞானாஸஞ்ஞாஸமாபத்தி விபூ⁴தஸஞ்ஞாஸமாபத்தி 15 நிரோத⁴ஸமாபத்தி.
Tattha kati jhānāni? Cattāri jhānāni. Kati vimokkhā? Ekādasa ca aṭṭha ca satta ca tayo ca dve ca. Kati samādhī? Tayo samādhī – savitakko savicāro samādhi, avitakko vicāramatto samādhi, avitakko avicāro samādhi. Kati samāpattiyo? Pañca samāpattiyo – saññāsamāpatti asaññāsamāpatti nevasaññānāsaññāsamāpatti vibhūtasaññāsamāpatti 16 nirodhasamāpatti.
தத்த² கதமோ ஸங்கிலேஸோ? பட²மஜ்ஜா²னஸ்ஸ காமராக³ப்³யாபாதா³ ஸங்கிலேஸோ. யே ச குக்குடஜா²யீ த்³வே பட²மகா யோ வா பன கோசி ஹானபா⁴கி³யோ ஸமாதி⁴, அயங் ஸங்கிலேஸோ. தத்த² கதமங் வோதா³னங், நீவரணபாரிஸுத்³தி⁴, பட²மஸ்ஸ ஜா²னஸ்ஸ யே ச குக்குடஜா²யீ த்³வே பச்சி²மகா யோ வா பன கோசி விஸேஸபா⁴கி³யோ ஸமாதி⁴, இத³ங் வோதா³னங். தத்த² கதமங் வுட்டா²னங்? யங் ஸமாபத்திவுட்டா²னகோஸல்லங், இத³ங் வுட்டா²னங். யங் எத்த² ஞாணங் ஹேதுஸோ டா²னஸோ அனோதி⁴ஸோ, இத³ங் வுச்சதி ஸப்³பே³ஸங் ஜா²னவிமொக்க²ஸமாதி⁴ஸமாபத்தீனங் ஸங்கிலேஸவோதா³னவுட்டா²னஞாணங் ச²ட்ட²ங் ததா²க³தப³லங்.
Tattha katamo saṃkileso? Paṭhamajjhānassa kāmarāgabyāpādā saṃkileso. Ye ca kukkuṭajhāyī dve paṭhamakā yo vā pana koci hānabhāgiyo samādhi, ayaṃ saṃkileso. Tattha katamaṃ vodānaṃ, nīvaraṇapārisuddhi, paṭhamassa jhānassa ye ca kukkuṭajhāyī dve pacchimakā yo vā pana koci visesabhāgiyo samādhi, idaṃ vodānaṃ. Tattha katamaṃ vuṭṭhānaṃ? Yaṃ samāpattivuṭṭhānakosallaṃ, idaṃ vuṭṭhānaṃ. Yaṃ ettha ñāṇaṃ hetuso ṭhānaso anodhiso, idaṃ vuccati sabbesaṃ jhānavimokkhasamādhisamāpattīnaṃ saṃkilesavodānavuṭṭhānañāṇaṃ chaṭṭhaṃ tathāgatabalaṃ.
63. இதி தஸ்ஸேவ ஸமாதி⁴ஸ்ஸ தயோ த⁴ம்மா பரிவாரா இந்த்³ரியானி ப³லானி வீரியமிதி, தானியேவ இந்த்³ரியானி வீரியவஸேன ப³லானி ப⁴வந்தி, ஆதி⁴பதெய்யட்டே²ன இந்த்³ரியானி, அகம்பியட்டே²ன ப³லானி, இதி தேஸங் முது³மஜ்ஜா²தி⁴மத்ததா அயங் முதி³ந்த்³ரியோ அயங் மஜ்ஜி²ந்த்³ரியோ அயங் திக்கி²ந்த்³ரியோதி. தத்த² ப⁴க³வா திக்கி²ந்த்³ரியங் ஸங்கி²த்தேன ஓவாதே³ன ஓவத³தி, மஜ்ஜி²ந்த்³ரியங் ப⁴க³வா ஸங்கி²த்தவித்தா²ரேன ஓவத³தி, முதி³ந்த்³ரியங் ப⁴க³வா வித்தா²ரேன ஓவத³தி. தத்த² ப⁴க³வா திக்கி²ந்த்³ரியஸ்ஸ முது³கங் த⁴ம்மதே³ஸனங் உபதி³ஸதி, மஜ்ஜி²ந்த்³ரியஸ்ஸ ப⁴க³வா முது³திக்க²த⁴ம்மதே³ஸனங் உபதி³ஸதி, முதி³ந்த்³ரியஸ்ஸ ப⁴க³வா திக்க²ங் த⁴ம்மதே³ஸனங் உபதி³ஸதி. தத்த² ப⁴க³வா திக்கி²ந்த்³ரியஸ்ஸ ஸமத²ங் உபதி³ஸதி, மஜ்ஜி²ந்த்³ரியஸ்ஸ ப⁴க³வா ஸமத²விபஸ்ஸனங் உபதி³ஸதி, முதி³ந்த்³ரியஸ்ஸ ப⁴க³வா விபஸ்ஸனங் உபதி³ஸதி. தத்த² ப⁴க³வா திக்கி²ந்த்³ரியஸ்ஸ நிஸ்ஸரணங் உபதி³ஸதி, மஜ்ஜி²ந்த்³ரியஸ்ஸ ப⁴க³வா ஆதீ³னவஞ்ச நிஸ்ஸரணஞ்ச உபதி³ஸதி, முதி³ந்த்³ரியஸ்ஸ ப⁴க³வா அஸ்ஸாத³ஞ்ச ஆதீ³னவஞ்ச நிஸ்ஸரணஞ்ச உபதி³ஸதி. தத்த² ப⁴க³வா திக்கி²ந்த்³ரியஸ்ஸ அதி⁴பஞ்ஞாஸிக்கா²ய பஞ்ஞாபயதி, மஜ்ஜி²ந்த்³ரியஸ்ஸ ப⁴க³வா அதி⁴சித்தஸிக்கா²ய பஞ்ஞாபயதி, முதி³ந்த்³ரியஸ்ஸ ப⁴க³வா அதி⁴ஸீலஸிக்கா²ய பஞ்ஞாபயதி.
63. Iti tasseva samādhissa tayo dhammā parivārā indriyāni balāni vīriyamiti, tāniyeva indriyāni vīriyavasena balāni bhavanti, ādhipateyyaṭṭhena indriyāni, akampiyaṭṭhena balāni, iti tesaṃ mudumajjhādhimattatā ayaṃ mudindriyo ayaṃ majjhindriyo ayaṃ tikkhindriyoti. Tattha bhagavā tikkhindriyaṃ saṃkhittena ovādena ovadati, majjhindriyaṃ bhagavā saṃkhittavitthārena ovadati, mudindriyaṃ bhagavā vitthārena ovadati. Tattha bhagavā tikkhindriyassa mudukaṃ dhammadesanaṃ upadisati, majjhindriyassa bhagavā mudutikkhadhammadesanaṃ upadisati, mudindriyassa bhagavā tikkhaṃ dhammadesanaṃ upadisati. Tattha bhagavā tikkhindriyassa samathaṃ upadisati, majjhindriyassa bhagavā samathavipassanaṃ upadisati, mudindriyassa bhagavā vipassanaṃ upadisati. Tattha bhagavā tikkhindriyassa nissaraṇaṃ upadisati, majjhindriyassa bhagavā ādīnavañca nissaraṇañca upadisati, mudindriyassa bhagavā assādañca ādīnavañca nissaraṇañca upadisati. Tattha bhagavā tikkhindriyassa adhipaññāsikkhāya paññāpayati, majjhindriyassa bhagavā adhicittasikkhāya paññāpayati, mudindriyassa bhagavā adhisīlasikkhāya paññāpayati.
யங் எத்த² ஞாணங் ஹேதுஸோ டா²னஸோ அனோதி⁴ஸோ அயங் இமங் பூ⁴மிங் பா⁴வனஞ்ச க³தோ, இமாய வேலாய இமாய அனுஸாஸனியா ஏவங் தா⁴துகோ சாயங் அயங் சஸ்ஸ ஆஸயோ அயஞ்ச அனுஸயோ இதி, இத³ங் வுச்சதி பரஸத்தானங் பரபுக்³க³லானங் இந்த்³ரியபரோபரியத்தவேமத்ததா ஞாணங் ஸத்தமங் ததா²க³தப³லங்.
Yaṃ ettha ñāṇaṃ hetuso ṭhānaso anodhiso ayaṃ imaṃ bhūmiṃ bhāvanañca gato, imāya velāya imāya anusāsaniyā evaṃ dhātuko cāyaṃ ayaṃ cassa āsayo ayañca anusayo iti, idaṃ vuccati parasattānaṃ parapuggalānaṃ indriyaparopariyattavemattatā ñāṇaṃ sattamaṃ tathāgatabalaṃ.
இதி தத்த² யங் அனேகவிஹிதங் புப்³பே³னிவாஸங் அனுஸ்ஸரதி. ஸெய்யதி²த³ங், ஏகம்பி ஜாதிங் த்³வேபி ஜாதியோ திஸ்ஸோபி ஜாதியோ சதஸ்ஸோபி ஜாதியோ பஞ்சபி ஜாதியோ த³ஸபி ஜாதியோ வீஸம்பி ஜாதியோ திங்ஸம்பி ஜாதியோ சத்தாரீஸம்பி ஜாதியோ பஞ்ஞாஸம்பி ஜாதியோ ஜாதிஸதம்பி ஜாதிஸஹஸ்ஸம்பி ஜாதிஸதஸஹஸ்ஸம்பி அனேகானிபி ஜாதிஸதானி அனேகானிபி ஜாதிஸஹஸ்ஸானி அனேகானிபி ஜாதிஸதஸஹஸ்ஸானி அனேகேபி ஸங்வட்டகப்பே அனேகேபி விவட்டகப்பே அனேகேபி ஸங்வட்டவிவட்டகப்பே. அமுத்ராஸிங் ஏவங்னாமோ ஏவங்கொ³த்தோ ஏவங்வண்ணோ ஏவமாஹாரோ ஏவங்ஸுக²து³க்க²ப்படிஸங்வேதீ³ ஏவமாயுபரியந்தோ, ஸோ ததோ சுதோ அமுத்ர உத³பாதி³ங். தத்ராபாஸிங் ஏவங்னாமோ ஏவங்கொ³த்தோ ஏவங்வண்ணோ ஏவமாஹாரோ ஏவங்ஸுக²து³க்க²ப்படிஸங்வேதீ³ ஏவமாயுபரியந்தோ, ஸோ ததோ சுதோ இதூ⁴பபன்னோதி, இதி ஸாகாரங் ஸஉத்³தே³ஸங் அனேகவிஹிதங் புப்³பே³னிவாஸங் அனுஸ்ஸரதி.
Iti tattha yaṃ anekavihitaṃ pubbenivāsaṃ anussarati. Seyyathidaṃ, ekampi jātiṃ dvepi jātiyo tissopi jātiyo catassopi jātiyo pañcapi jātiyo dasapi jātiyo vīsampi jātiyo tiṃsampi jātiyo cattārīsampi jātiyo paññāsampi jātiyo jātisatampi jātisahassampi jātisatasahassampi anekānipi jātisatāni anekānipi jātisahassāni anekānipi jātisatasahassāni anekepi saṃvaṭṭakappe anekepi vivaṭṭakappe anekepi saṃvaṭṭavivaṭṭakappe. Amutrāsiṃ evaṃnāmo evaṃgotto evaṃvaṇṇo evamāhāro evaṃsukhadukkhappaṭisaṃvedī evamāyupariyanto, so tato cuto amutra udapādiṃ. Tatrāpāsiṃ evaṃnāmo evaṃgotto evaṃvaṇṇo evamāhāro evaṃsukhadukkhappaṭisaṃvedī evamāyupariyanto, so tato cuto idhūpapannoti, iti sākāraṃ sauddesaṃ anekavihitaṃ pubbenivāsaṃ anussarati.
64. தத்த² ஸக்³கூ³பகே³ஸு ச ஸத்தேஸு மனுஸ்ஸூபகே³ஸு ச ஸத்தேஸு அபாயூபகே³ஸு ச ஸத்தேஸு இமஸ்ஸ புக்³க³லஸ்ஸ லோபா⁴த³யோ உஸ்ஸன்னா அலோபா⁴த³யோ மந்தா³, இமஸ்ஸ புக்³க³லஸ்ஸ அலோபா⁴த³யோ உஸ்ஸன்னா லோபா⁴த³யோ மந்தா³, யே வா பன உஸ்ஸன்னா யே வா பன மந்தா³ இமஸ்ஸ புக்³க³லஸ்ஸ இமானி இந்த்³ரியானி உபசிதானி இமஸ்ஸ புக்³க³லஸ்ஸ இமானி இந்த்³ரியானி அனுபசிதானி அமுகாய வா கப்பகோடியங் கப்பஸதஸஹஸ்ஸே வா கப்பஸஹஸ்ஸே வா கப்பஸதே வா கப்பே வா அந்தரகப்பே வா உபட்³ட⁴கப்பே வா ஸங்வச்ச²ரே வா உபட்³ட⁴ஸங்வச்ச²ரே வா மாஸே வா பக்கே² வா தி³வஸே வா முஹுத்தே வா இமினா பமாதே³ன வா பஸாதே³ன வாதி. தங் தங் ப⁴வங் ப⁴க³வா அனுஸ்ஸரந்தோ அஸேஸங் ஜானாதி, தத்த² யங் தி³ப்³பே³ன சக்கு²னா விஸுத்³தே⁴ன அதிக்கந்தமானுஸகேன ஸத்தே பஸ்ஸதி சவமானே உபபஜ்ஜமானே ஹீனே பணீதே ஸுவண்ணே து³ப்³ப³ண்ணே ஸுக³தே து³க்³க³தே யதா²கம்மூபகே³ ஸத்தே பஜானாதி இமே வத பொ⁴ந்தோ ஸத்தா காயது³ச்சரிதேன ஸமன்னாக³தா வசீது³ச்சரிதேன ஸமன்னாக³தா மனோது³ச்சரிதேன ஸமன்னாக³தா அரியானங் உபவாத³கா மிச்சா²தி³ட்டி²கா மிச்சா²தி³ட்டி²கம்மஸமாதா³னா, தே காயஸ்ஸ பே⁴தா³ பரங் மரணா அபாயங் து³க்³க³திங் வினிபாதங் நிரயங் உபபன்னா.
64. Tattha saggūpagesu ca sattesu manussūpagesu ca sattesu apāyūpagesu ca sattesu imassa puggalassa lobhādayo ussannā alobhādayo mandā, imassa puggalassa alobhādayo ussannā lobhādayo mandā, ye vā pana ussannā ye vā pana mandā imassa puggalassa imāni indriyāni upacitāni imassa puggalassa imāni indriyāni anupacitāni amukāya vā kappakoṭiyaṃ kappasatasahasse vā kappasahasse vā kappasate vā kappe vā antarakappe vā upaḍḍhakappe vā saṃvacchare vā upaḍḍhasaṃvacchare vā māse vā pakkhe vā divase vā muhutte vā iminā pamādena vā pasādena vāti. Taṃ taṃ bhavaṃ bhagavā anussaranto asesaṃ jānāti, tattha yaṃ dibbena cakkhunā visuddhena atikkantamānusakena satte passati cavamāne upapajjamāne hīne paṇīte suvaṇṇe dubbaṇṇe sugate duggate yathākammūpage satte pajānāti ime vata bhonto sattā kāyaduccaritena samannāgatā vacīduccaritena samannāgatā manoduccaritena samannāgatā ariyānaṃ upavādakā micchādiṭṭhikā micchādiṭṭhikammasamādānā, te kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapannā.
இமே வா பன பொ⁴ந்தோ ஸத்தா காயஸுசரிதேன ஸமன்னாக³தா வசீஸுசரிதேன ஸமன்னாக³தா மனோஸுசரிதேன ஸமன்னாக³தா அரியானங் அனுபவாத³கா ஸம்மாதி³ட்டி²கா ஸம்மாதி³ட்டி²கம்மஸமாதா³னா, தே காயஸ்ஸ பே⁴தா³ பரங் மரணா ஸுக³திங் ஸக்³க³ங் லோகங் உபபன்னா, தத்த² ஸக்³கூ³பகே³ஸு ச ஸத்தேஸு மனுஸ்ஸூபகே³ஸு ச ஸத்தேஸு அபாயூபகே³ஸு ச ஸத்தேஸு இமினா புக்³க³லேன ஏவரூபங் கம்மங் அமுகாய கப்பகோடியங் உபசிதங் கப்பஸதஸஹஸ்ஸே வா கப்பஸஹஸ்ஸே வா கப்பஸதே வா கப்பே வா அந்தரகப்பே வா உபட்³ட⁴கப்பே வா ஸங்வச்ச²ரே வா உபட்³ட⁴ஸங்வச்ச²ரே வா மாஸே வா பக்கே² வா தி³வஸே வா முஹுத்தே வா இமினா பமாதே³ன வா பஸாதே³ன வாதி. இமானி ப⁴க³வதோ த்³வே ஞாணானி – புப்³பே³னிவாஸானுஸ்ஸதிஞாணஞ்ச தி³ப்³ப³சக்கு² ச அட்ட²மங் நவமங் ததா²க³தப³லங்.
Ime vā pana bhonto sattā kāyasucaritena samannāgatā vacīsucaritena samannāgatā manosucaritena samannāgatā ariyānaṃ anupavādakā sammādiṭṭhikā sammādiṭṭhikammasamādānā, te kāyassa bhedā paraṃ maraṇā sugatiṃ saggaṃ lokaṃ upapannā, tattha saggūpagesu ca sattesu manussūpagesu ca sattesu apāyūpagesu ca sattesu iminā puggalena evarūpaṃ kammaṃ amukāya kappakoṭiyaṃ upacitaṃ kappasatasahasse vā kappasahasse vā kappasate vā kappe vā antarakappe vā upaḍḍhakappe vā saṃvacchare vā upaḍḍhasaṃvacchare vā māse vā pakkhe vā divase vā muhutte vā iminā pamādena vā pasādena vāti. Imāni bhagavato dve ñāṇāni – pubbenivāsānussatiñāṇañca dibbacakkhu ca aṭṭhamaṃ navamaṃ tathāgatabalaṃ.
இதி தத்த² யங் ஸப்³ப³ஞ்ஞுதா பத்தா விதி³தா ஸப்³ப³த⁴ம்மா விரஜங் வீதமலங் உப்பன்னங் ஸப்³ப³ஞ்ஞுதஞாணங் நிஹதோ மாரோ போ³தி⁴மூலே, இத³ங் ப⁴க³வதோ த³ஸமங் ப³லங் ஸப்³பா³ஸவபரிக்க²யங் ஞாணங். த³ஸப³லஸமன்னாக³தா ஹி பு³த்³தா⁴ ப⁴க³வந்தோதி.
Iti tattha yaṃ sabbaññutā pattā viditā sabbadhammā virajaṃ vītamalaṃ uppannaṃ sabbaññutañāṇaṃ nihato māro bodhimūle, idaṃ bhagavato dasamaṃ balaṃ sabbāsavaparikkhayaṃ ñāṇaṃ. Dasabalasamannāgatā hi buddhā bhagavantoti.
நியுத்தோ விசயோ ஹாரஸம்பாதோ.
Niyutto vicayo hārasampāto.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / கு²த்³த³கனிகாய (அட்ட²கதா²) • Khuddakanikāya (aṭṭhakathā) / நெத்திப்பகரண-அட்ட²கதா² • Nettippakaraṇa-aṭṭhakathā / 2. விசயஹாரஸம்பாதவண்ணனா • 2. Vicayahārasampātavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / கு²த்³த³கனிகாய (டீகா) • Khuddakanikāya (ṭīkā) / நெத்திப்பகரண-டீகா • Nettippakaraṇa-ṭīkā / 2. விசயஹாரஸம்பாதவண்ணனா • 2. Vicayahārasampātavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / கு²த்³த³கனிகாய (டீகா) • Khuddakanikāya (ṭīkā) / நெத்திவிபா⁴வினீ • Nettivibhāvinī / 2. விசயஹாரஸம்பாதவிபா⁴வனா • 2. Vicayahārasampātavibhāvanā
