| Library / Tipiṭaka / তিপিটক • Tipiṭaka / নেত্তিপ্পকরণ-টীকা • Nettippakaraṇa-ṭīkā |
২. ৰিচযহারৰিভঙ্গৰণ্ণনা
2. Vicayahāravibhaṅgavaṇṇanā
১১. জাতিলিঙ্গকালসাধনৰিভত্তিসঙ্খ্যাৰিসেসাদিতো সদ্দতো পদৰিচযো কাতব্বো। তত্থ করিযমানো চ যথাসভাৰনিরুত্তিযা এৰ কতো সুকতো হোতীতি দস্সেন্তো ‘‘ইদং নামপদং …পে॰… অযং সদ্দতো পদৰিচযো’’তি ৰত্ৰা ‘‘সো পনায’’ন্তিআদিমাহ। ৰত্তব্বঅত্থসংৰণ্ণনাতি তংতংপদৰচনীযস্স অত্থস্স ভেদং ৰত্ৰা পরিযাযেহি ৰিৰরিত্ৰা কথনং।
11. Jātiliṅgakālasādhanavibhattisaṅkhyāvisesādito saddato padavicayo kātabbo. Tattha kariyamāno ca yathāsabhāvaniruttiyā eva kato sukato hotīti dassento ‘‘idaṃ nāmapadaṃ…pe… ayaṃ saddato padavicayo’’ti vatvā ‘‘so panāya’’ntiādimāha. Vattabbaatthasaṃvaṇṇanāti taṃtaṃpadavacanīyassa atthassa bhedaṃ vatvā pariyāyehi vivaritvā kathanaṃ.
ৰিচিযমানস্স সুত্তপদস্সাতি পুচ্ছাৰসেন পৰত্তসুত্তপদস্স। ‘‘সুত্তন্তরপদানিপি পুচ্ছাৰসেনেৰ পৰত্তানী’’তি ৰদন্তি ‘‘ন সব্বম্পি সুত্তপদ’’ন্তি। একস্সেৰ পদস্স সম্ভৰন্তানং অনেকেসং অত্থানং উদ্ধারো অত্থুদ্ধারো। একস্সেৰ পন অত্থস্স সম্ভৰন্তানং অনেকেসং পদানং উদ্ধারো পদুদ্ধারো। সব্বে হি সংৰণ্ণিযমানে সুত্তে লব্ভমানে সব্বে পদত্থে। নৰ সুত্তন্তেতি সুত্তগেয্যাদিৰসেন নৰপ্পকারে সুত্তস্মিং আনেত্ৰা ৰিচিনতীতি যোজনা। অথ ৰা ‘‘সব্বে নৰ সুত্তন্তে’’তি ইমিনা পৰিচযলক্খণেন হারেন সুত্তগেয্যাদীনি সব্বানিপি নৰপ্পকারানি সুত্তানি ৰিচিনতীতি অত্থো। তেনাহ ‘‘সুত্তগেয্যাদিকে’’তিআদি।
Viciyamānassa suttapadassāti pucchāvasena pavattasuttapadassa. ‘‘Suttantarapadānipi pucchāvaseneva pavattānī’’ti vadanti ‘‘na sabbampi suttapada’’nti. Ekasseva padassa sambhavantānaṃ anekesaṃ atthānaṃ uddhāro atthuddhāro. Ekasseva pana atthassa sambhavantānaṃ anekesaṃ padānaṃ uddhāro paduddhāro. Sabbe hi saṃvaṇṇiyamāne sutte labbhamāne sabbe padatthe. Nava suttanteti suttageyyādivasena navappakāre suttasmiṃ ānetvā vicinatīti yojanā. Atha vā ‘‘sabbe nava suttante’’ti iminā pavicayalakkhaṇena hārena suttageyyādīni sabbānipi navappakārāni suttāni vicinatīti attho. Tenāha ‘‘suttageyyādike’’tiādi.
‘‘কোসলানং পুরা রম্মা’’তিআদিকা (সু॰ নি॰ ৯৮২) ছপঞ্ঞাস গাথা ৰত্থুগাথা। ‘‘পারাযনমনুগাযিস্স’’ন্তি (সু॰ নি॰ ১১৩৭ আদযো) পন আদিকা একূনৰীসতি গাথা অনুগীতিগাথা। ইদং নামং কতন্তি ইদং ‘‘পারাযন’’ন্তি নামং কতং। তেনাহ ‘‘পারং গমনীযা ইমে ধম্মা, তস্মা ইমস্স ধম্মপরিযাযস্স ‘পারাযনন্ত্ৰেৰ অধিৰচন’’’ন্তি (সু॰ নি॰ পারাযনত্থুতিগাথা; চূল়নি॰ পারাযনত্থুতিগাথা ১৪৯ আদযো)। বুদ্ধিযং ৰিপরিৰত্তমানন্তি ইমস্স ৰিচযহারৰিভঙ্গস্স দেসনাকালে আযস্মা মহাকচ্চানো অত্তনো বুদ্ধিযং ৰত্তমানং কত্ৰা এৰমাহাতি যোজনা।
‘‘Kosalānaṃ purā rammā’’tiādikā (su. ni. 982) chapaññāsa gāthā vatthugāthā. ‘‘Pārāyanamanugāyissa’’nti (su. ni. 1137 ādayo) pana ādikā ekūnavīsati gāthā anugītigāthā. Idaṃ nāmaṃ katanti idaṃ ‘‘pārāyana’’nti nāmaṃ kataṃ. Tenāha ‘‘pāraṃ gamanīyā ime dhammā, tasmā imassa dhammapariyāyassa ‘pārāyanantveva adhivacana’’’nti (su. ni. pārāyanatthutigāthā; cūḷani. pārāyanatthutigāthā 149 ādayo). Buddhiyaṃ viparivattamānanti imassa vicayahāravibhaṅgassa desanākāle āyasmā mahākaccāno attano buddhiyaṃ vattamānaṃ katvā evamāhāti yojanā.
একংসব্যাকরণস্স অযন্তি একংসব্যাকরণীযা, একংসেন ৰা ব্যাকাতব্বত্তা একংসব্যাকরণীযা, একংসব্যাকরণযোগ্গাতি অত্থো। সেসপদদ্ৰযেপি এসেৰ নযো। ঠপনীযাতি ঠপেতব্বত্তা অব্যাকরণীযাতি অত্থো। সমযন্তরপরিচযেন নিৰারণধম্মং পতি সংসযপক্খন্দো পুচ্ছতীতি অধিপ্পাযেনাহ ‘‘ৰিমতিচ্ছেদন’’ন্তি। পকতিযা পন নিৰারণধম্মং অজানন্তো ঞাতুকামতায পুচ্ছতীতি অদিট্ঠজোতনায পুচ্ছাপি সিযা। তথা হি ৰক্খতি ‘‘লোকস্স নিৰারণাদীনি অজানন্তেনা’’তি।
Ekaṃsabyākaraṇassa ayanti ekaṃsabyākaraṇīyā, ekaṃsena vā byākātabbattā ekaṃsabyākaraṇīyā, ekaṃsabyākaraṇayoggāti attho. Sesapadadvayepi eseva nayo. Ṭhapanīyāti ṭhapetabbattā abyākaraṇīyāti attho. Samayantaraparicayena nivāraṇadhammaṃ pati saṃsayapakkhando pucchatīti adhippāyenāha ‘‘vimaticchedana’’nti. Pakatiyā pana nivāraṇadhammaṃ ajānanto ñātukāmatāya pucchatīti adiṭṭhajotanāya pucchāpi siyā. Tathā hi vakkhati ‘‘lokassa nivāraṇādīni ajānantenā’’ti.
একৰত্থুপরিগ্গহাতি একস্স অভিধেয্যত্থস্স গহণতো।
Ekavatthupariggahāti ekassa abhidheyyatthassa gahaṇato.
ৰিমুত্তিপরিপাচকইন্দ্রিযানি ৰিৰট্টপক্খে ঠিতস্স সদ্ধাদযো ধম্মা, কিং পনেত্থ অরিযানম্পি ইন্দ্রিযলোকেন সঙ্গহো হোতীতি আহ ‘‘পরিযাপন্নধম্মৰসেনা’’তিআদি।
Vimuttiparipācakaindriyāni vivaṭṭapakkhe ṭhitassa saddhādayo dhammā, kiṃ panettha ariyānampi indriyalokena saṅgaho hotīti āha ‘‘pariyāpannadhammavasenā’’tiādi.
কাল়পক্খচাতুদ্দসীঘনৰনসণ্ডমেঘপটলচ্ছাদনঅড্ঢরত্তীনং ৰসেন চতুরঙ্গসমন্নাগতেন। ৰিৰিচ্ছাতি ৰিচিকিচ্ছায। তেনাহ ‘‘ৰিচিকিচ্ছাহেতূ’’তি। দুক্খমস্স মহব্ভযন্তি এত্থ ৰুত্তং ‘‘অস্সা’’তি পদং ‘‘জপ্পাভিলেপনং অস্স ব্রূমী’’তি আনেত্ৰা সম্বন্ধিতব্বন্তি দস্সেন্তো ‘‘জপ্পা তণ্হা অস্স লোকস্সা’’তি আহ। ‘‘সব্বসত্তান’’ন্তিআদিনা, ‘‘সব্বসোৰা’’তিআদিনা চ অন্ৰযতো, ব্যতিরেকতো চ সাতিসযং অৰিজ্জায নীৰরণভাৰং দস্সেতি। ‘‘দূরে সন্তো পকাসন্তি (ধ॰ প॰ ৩০৪; নেত্তি॰ ১১), রত্তো অত্থং ন জানাতী’’তি (নেত্তি॰ ১১, ২৭) গাথাদ্ৰযেনাপি অনুগীতিৰিচযং দস্সেতীতি যোজেতব্বং।
Kāḷapakkhacātuddasīghanavanasaṇḍameghapaṭalacchādanaaḍḍharattīnaṃ vasena caturaṅgasamannāgatena. Vivicchāti vicikicchāya. Tenāha ‘‘vicikicchāhetū’’ti. Dukkhamassa mahabbhayanti ettha vuttaṃ ‘‘assā’’ti padaṃ ‘‘jappābhilepanaṃ assa brūmī’’ti ānetvā sambandhitabbanti dassento ‘‘jappā taṇhā assa lokassā’’ti āha. ‘‘Sabbasattāna’’ntiādinā, ‘‘sabbasovā’’tiādinā ca anvayato, byatirekato ca sātisayaṃ avijjāya nīvaraṇabhāvaṃ dasseti. ‘‘Dūre santo pakāsanti (dha. pa. 304; netti. 11), ratto atthaṃ na jānātī’’ti (netti. 11, 27) gāthādvayenāpi anugītivicayaṃ dassetīti yojetabbaṃ.
রূপাৰচরাতি রূপাৰচরসত্তা। ৰিপরিণামদুক্খতায মুচ্চনস্স কারণৰচনন্তি সম্বন্ধো। যতো ৰট্টদুক্খতো মুচ্চনং। তং ৰট্টদুক্খং অনৰসেসপরিযাদানৰসেন সঙ্খারদুক্খতাগহণেন।
Rūpāvacarāti rūpāvacarasattā. Vipariṇāmadukkhatāya muccanassa kāraṇavacananti sambandho. Yato vaṭṭadukkhato muccanaṃ. Taṃ vaṭṭadukkhaṃ anavasesapariyādānavasena saṅkhāradukkhatāgahaṇena.
একাধারন্তি একৰত্থু অধিট্ঠানং। নিৰারণং ৰিক্খম্ভনং পিধানং সমুচ্ছেদোতি অত্থদ্ৰযস্স পুচ্ছিতত্তা ‘‘অনেকাধারং দস্সেতু’’ন্তি ৰুত্তং। তেনাহ ‘‘নিৰারণসঙ্খাতং সংৰরং…পে॰… পিধিয্যন্তি পচ্ছিজ্জন্তী’’তি (সু॰ নি॰ অট্ঠ॰ ২.১০৪১; চূল়নি॰ অট্ঠ॰ ৩)। তস্সত্থো ‘‘নিৰারণসঙ্খাতং ৰিক্খম্ভনং, সংৰরং, পিধানঞ্চ কথেহী’’তি।
Ekādhāranti ekavatthu adhiṭṭhānaṃ. Nivāraṇaṃ vikkhambhanaṃ pidhānaṃ samucchedoti atthadvayassa pucchitattā ‘‘anekādhāraṃ dassetu’’nti vuttaṃ. Tenāha ‘‘nivāraṇasaṅkhātaṃ saṃvaraṃ…pe… pidhiyyanti pacchijjantī’’ti (su. ni. aṭṭha. 2.1041; cūḷani. aṭṭha. 3). Tassattho ‘‘nivāraṇasaṅkhātaṃ vikkhambhanaṃ, saṃvaraṃ, pidhānañca kathehī’’ti.
‘‘ৰোদান’’ন্তি ইমিনা সোতানং ৰিক্খম্ভনৰিসুদ্ধি, ‘‘ৰুট্ঠান’’ন্তি ইমিনা সমুচ্ছেদৰিসুদ্ধি অধিপ্পেতাতি আহ ‘‘পুচ্ছায দুৰিধত্থৰিসযতং ৰিৰরিতুং ‘এৰ’ন্তিআদি ৰুত্ত’’ন্তি। তথা চাহ ‘‘ৰোদাযতি…পে॰… অরিযমগ্গো’’তি।
‘‘Vodāna’’nti iminā sotānaṃ vikkhambhanavisuddhi, ‘‘vuṭṭhāna’’nti iminā samucchedavisuddhi adhippetāti āha ‘‘pucchāya duvidhatthavisayataṃ vivarituṃ ‘eva’ntiādi vutta’’nti. Tathā cāha ‘‘vodāyati…pe… ariyamaggo’’ti.
দিট্ঠিমানাৰিজ্জাসোতাপি তণ্হাসোতানুগাতি আহ ‘‘যেভুয্যেন অনুরোধৰসেনা’’তি। উপচারৰসেনাতি নিস্সিতুপচারৰসেন। সব্বস্মাতি চক্খুতো যাৰ মনতোতি সব্বস্মা দ্ৰারতো। সব্বপ্পকারেনাত্তি তণ্হাযনমিচ্ছাভিনিৰেসনউন্নমনাদিপ্পকারেন।
Diṭṭhimānāvijjāsotāpi taṇhāsotānugāti āha ‘‘yebhuyyena anurodhavasenā’’ti. Upacāravasenāti nissitupacāravasena. Sabbasmāti cakkhuto yāva manatoti sabbasmā dvārato. Sabbappakārenātti taṇhāyanamicchābhinivesanaunnamanādippakārena.
তমেৰ সতিন্তি যাযং সতি পুব্বভাগে সোতানং ৰিক্খম্ভনৰসেন ৰুত্তা, তমেৰ সতিং। মগ্গক্খণে সোতানং সংৰরং পিধানং ব্রূমি। যস্মা পন পিধাযিকাপি সতি মগ্গক্খণে পঞ্ঞানুগা, পঞ্ঞাকিচ্চমেৰেত্থ অধিকং, তস্মা ৰুত্তং ‘‘পঞ্ঞাযেতে পিধীযরে’’তি।
Tameva satinti yāyaṃ sati pubbabhāge sotānaṃ vikkhambhanavasena vuttā, tameva satiṃ. Maggakkhaṇe sotānaṃ saṃvaraṃ pidhānaṃ brūmi. Yasmā pana pidhāyikāpi sati maggakkhaṇe paññānugā, paññākiccamevettha adhikaṃ, tasmā vuttaṃ ‘‘paññāyete pidhīyare’’ti.
সংৰরপিধানানন্তি এত্থ সংৰরসদ্দেন নিৰারণং ৰুত্তং।
Saṃvarapidhānānanti ettha saṃvarasaddena nivāraṇaṃ vuttaṃ.
যস্মিং যস্মিং অরিযমগ্গে অনধিগতে যং যং অভিসঙ্খারৰিঞ্ঞাণং উপ্পজ্জনারহং, তস্মিং তস্মিং অধিগতে তং তং ৰিঞ্ঞাণং অনুপ্পাদনিরোধেন নিরুজ্ঝতি সদ্ধিং অত্তনা সম্পযুত্তনামরূপেনাতি আহ ‘‘তস্স তস্স ৰিঞ্ঞাণস্স নিরোধেন সহেৰা’’তি। অনুপ্পাদনিরোধো হি এত্থ ‘‘নিরোধো’’তি অধিপ্পেতো অনুপাদিসেসনিব্বানস্স অধিপ্পেতত্তাতি। অনুসন্ধীযতি এতেনাতি অনুসন্ধি, ইধ পুচ্ছিযমানো অত্থো।
Yasmiṃ yasmiṃ ariyamagge anadhigate yaṃ yaṃ abhisaṅkhāraviññāṇaṃ uppajjanārahaṃ, tasmiṃ tasmiṃ adhigate taṃ taṃ viññāṇaṃ anuppādanirodhena nirujjhati saddhiṃ attanā sampayuttanāmarūpenāti āha ‘‘tassa tassa viññāṇassa nirodhena sahevā’’ti. Anuppādanirodho hi ettha ‘‘nirodho’’ti adhippeto anupādisesanibbānassa adhippetattāti. Anusandhīyati etenāti anusandhi, idha pucchiyamāno attho.
সহ ৰিসযেন দস্সেতুন্তি এত্থ সচ্চানি এৰ ৰিসযো। পহাতব্বসভাৰং সমুদযসচ্চং, তস্স ৰিসযো দুক্খসচ্চং। ‘‘সংযোজনিযেসু, ভিক্খৰে, ধম্মেসু অস্সাদানুপস্সিনো ৰিহরতো তণ্হা পৰড্ঢতী’’তি (সং॰ নি॰ ২.৫৩, ৫৭) হি ৰুত্তং। পহাযকসভাৰং মগ্গসচ্চং, তস্স ৰিসযো নিরোধসচ্চন্তি আহ ‘‘সহ ৰিসযেন…পে॰… সচ্চেসূ’’তি। কামঞ্চেত্থ ‘‘সমুদযো দ্ৰীসু ভূমীসু পহীযতী’’তি আরদ্ধং, ‘‘দস্সনেন তীণি সংযোজনানি পহীযন্তি, ভাৰনায সত্ত সংযোজনানি পহীযন্তী’’তি পন ৰিভাগৰচনমেৰ ৰত্তন্তি আহ ‘‘পহাযকৰিভাগমুখেন পহাতব্বৰিভাগং দস্সেতু’’ন্তি।
Sahavisayena dassetunti ettha saccāni eva visayo. Pahātabbasabhāvaṃ samudayasaccaṃ, tassa visayo dukkhasaccaṃ. ‘‘Saṃyojaniyesu, bhikkhave, dhammesu assādānupassino viharato taṇhā pavaḍḍhatī’’ti (saṃ. ni. 2.53, 57) hi vuttaṃ. Pahāyakasabhāvaṃ maggasaccaṃ, tassa visayo nirodhasaccanti āha ‘‘saha visayena…pe… saccesū’’ti. Kāmañcettha ‘‘samudayo dvīsu bhūmīsu pahīyatī’’ti āraddhaṃ, ‘‘dassanena tīṇi saṃyojanāni pahīyanti, bhāvanāya satta saṃyojanāni pahīyantī’’ti pana vibhāgavacanameva vattanti āha ‘‘pahāyakavibhāgamukhena pahātabbavibhāgaṃ dassetu’’nti.
নিরৰসেসকামরাগব্যাপাদা ততিযমগ্গেন পহীযন্তি, ইতরে চতুত্থমগ্গেনাতি ৰুত্তং ‘‘ইতরেহি পন নিরৰসেস’’ন্তি। তত্থাতি কম্মৰিপাকৰট্টপ্পভেদেন তেধাতুকে ভৰত্তযে। সংযোজনৰসেনাতি সব্বদা যোজনৰসেন বন্ধনৰসেন।
Niravasesakāmarāgabyāpādā tatiyamaggena pahīyanti, itare catutthamaggenāti vuttaṃ ‘‘itarehi pana niravasesa’’nti. Tatthāti kammavipākavaṭṭappabhedena tedhātuke bhavattaye. Saṃyojanavasenāti sabbadā yojanavasena bandhanavasena.
১২. অগ্গফলঞাণতায একম্পি সমানং তন্নিমিত্তস্স খযানুপ্পাদারম্মণস্স পচ্চৰেক্খণঞাণস্স ৰসেন ফলৰোহারেন দ্ৰে নামানি লভতি।
12. Aggaphalañāṇatāya ekampi samānaṃ tannimittassa khayānuppādārammaṇassa paccavekkhaṇañāṇassa vasena phalavohārena dve nāmāni labhati.
সোমনস্সনামলাভো ইমিনা আরম্মণসঙ্কেতেনাতি তদত্থং ৰিৰরন্তো ‘‘খযে…পে॰… সমঞ্ঞাযা’’তি আহ।
Somanassanāmalābho iminā ārammaṇasaṅketenāti tadatthaṃ vivaranto ‘‘khaye…pe… samaññāyā’’ti āha.
১৩. তগ্গহণেনেৰাতি ফস্সপঞ্চমকপঞ্চরূপিন্দ্রিযগ্গহণেনেৰ। সহচরণাদিনাতি সহজাতাদিঅনন্তরাদিপচ্চযভাৰেন চেৰ নিস্সযারম্মণাদিনা চ। ‘‘সম্পযুত্ত’’ন্তি ইমিনা সহিততা অৰিসিট্ঠতা ইধাধিপ্পেতাতি আহ ‘‘অৰিভাগেন গহণীযভাৰং সন্ধাযা’’তি।
13.Taggahaṇenevāti phassapañcamakapañcarūpindriyaggahaṇeneva. Sahacaraṇādināti sahajātādianantarādipaccayabhāvena ceva nissayārammaṇādinā ca. ‘‘Sampayutta’’nti iminā sahitatā avisiṭṭhatā idhādhippetāti āha ‘‘avibhāgena gahaṇīyabhāvaṃ sandhāyā’’ti.
কথং সমাধিন্দ্রিযং উপ্পাদেতীতি আহ ‘‘সতিগ্গহণেন চেত্থ পরিযুট্ঠানপ্পহানং ইধাধিপ্পেত’’ন্তি। ন হি সমাধিনা পরিযুট্ঠানপ্পহানং সম্ভৰতি।
Kathaṃ samādhindriyaṃ uppādetīti āha ‘‘satiggahaṇena cettha pariyuṭṭhānappahānaṃ idhādhippeta’’nti. Na hi samādhinā pariyuṭṭhānappahānaṃ sambhavati.
পদহতি এতেনাতি পধানং, ৰীরিযং। তেতি ৰীরিযসঙ্খারা। একরসেনাতি যথা ইন্দ্রিযানি একরসানি হোন্তি, এৰং একরসভাৰেন সরণতো পৰত্তনতো। তথা পৰত্তিযা এৰ সুট্ঠু ৰত ৰীরিযং ৰাহেসীতি যোগিনা সঙ্কপ্পেতব্বতো তদুপগৰীরিযৰাহনট্ঠেন ‘‘সম্পহংসনা’’তি ৰুত্তং। তেনাহ ‘‘এৰং মে…পে॰… হেতুভাৰতো’’তি।
Padahati etenāti padhānaṃ, vīriyaṃ. Teti vīriyasaṅkhārā. Ekarasenāti yathā indriyāni ekarasāni honti, evaṃ ekarasabhāvena saraṇato pavattanato. Tathā pavattiyā eva suṭṭhu vata vīriyaṃ vāhesīti yoginā saṅkappetabbato tadupagavīriyavāhanaṭṭhena ‘‘sampahaṃsanā’’ti vuttaṃ. Tenāha ‘‘evaṃ me…pe… hetubhāvato’’ti.
ইদ্ধিসদ্দস্স পঠমো কত্তুঅত্থো, দুতিযো করণত্থো ৰুত্তো, পাদসদ্দস্স একো করণত্থো এৰ। পজ্জিতব্বা চ ইদ্ধী ৰুত্তা, ন চ ইজ্ঝন্তি। পজ্জিতব্বা চ ইদ্ধী পজ্জনকরণেন পাদেন সমানাধিকরণা ন হোন্তীতি ‘‘পঠমেন অত্থেন ইদ্ধি এৰ পাদো’’তি কথং সক্কা ৰত্তুং, তথা ইদ্ধিকিরিযাকরণেন সাধেতব্বা বুদ্ধিসঙ্খাতা ইদ্ধি পজ্জনকিরিযাকরণেন পজ্জিতব্বাতি দ্ৰিন্নং করণানং ন সমানাধিকরণতা সম্ভৰতীতি ‘‘দুতিযেন অত্থেন ইদ্ধিযা পাদো’’তি কথং সক্কা ৰত্তুন্তি চে? সক্কা, পাদস্স ইজ্ঝমানকোট্ঠাস ইজ্ঝনকরণূপাযভাৰতো। অথ ৰা ‘‘পঠমেন অত্থেন ইদ্ধিযা পাদো, দুতিযেন অত্থেন ইদ্ধি এৰ পাদো ইদ্ধিপাদো’’তি এৰং যোজনতো। কথং? অনন্তরত্থো পচ্চাসত্তিঞাযেন ইধ পঠমোতি অধিপ্পেতো, ততো পুরিমো দুতিযোতি।
Iddhisaddassa paṭhamo kattuattho, dutiyo karaṇattho vutto, pādasaddassa eko karaṇattho eva. Pajjitabbā ca iddhī vuttā, na ca ijjhanti. Pajjitabbā ca iddhī pajjanakaraṇena pādena samānādhikaraṇā na hontīti ‘‘paṭhamena atthena iddhi eva pādo’’ti kathaṃ sakkā vattuṃ, tathā iddhikiriyākaraṇena sādhetabbā buddhisaṅkhātā iddhi pajjanakiriyākaraṇena pajjitabbāti dvinnaṃ karaṇānaṃ na samānādhikaraṇatā sambhavatīti ‘‘dutiyena atthena iddhiyā pādo’’ti kathaṃ sakkā vattunti ce? Sakkā, pādassa ijjhamānakoṭṭhāsa ijjhanakaraṇūpāyabhāvato. Atha vā ‘‘paṭhamena atthena iddhiyā pādo, dutiyena atthena iddhi eva pādo iddhipādo’’ti evaṃ yojanato. Kathaṃ? Anantarattho paccāsattiñāyena idha paṭhamoti adhippeto, tato purimo dutiyoti.
‘‘ছন্দং চে ভিক্খু অধিপতিং করিত্ৰা লভতি সমাধি’’ন্তিআদি (ৰিভ॰ ৪৩২) ৰচনতো ছন্দসমাধিপ্পধানসঙ্খারসমন্নাগতং ইদ্ধিপাদং ভাৰেতীতি এত্থাপি ছন্দাধিপতি সমাধি ছন্দসমাধীতি অধিপতিসদ্দলোপং কত্ৰা সমাসো ৰুত্তোতি ৰিঞ্ঞাযতি। অধিপতিসদ্দত্থদস্সনৰসেনেৰ পন ‘‘ছন্দহেতুকো, ছন্দাধিকো ৰা সমাধী’’তি সম্মোহৰিনোদনিযং (ৰিভ॰ অট্ঠ॰ ৪৩১) ৰুত্তং, তস্মা ইধাপি ছন্দাধিপতি সমাধি ছন্দসমাধীতি ৰেদিতব্বো। তং পন ছন্দং ৰুত্তনযেন সদ্ধাসীসেন দস্সেন্তো ‘‘সদ্ধাধিপতেয্যা চিত্তেকগ্গতা’’তি ৰুত্তং। ‘‘ইদং পধান’’ন্তি ৰা ৰীরিযং ৰুত্তং। ৰীরিযসদ্দাপেক্খাসহিতং একৰচনেন ৰত্ৰা চতুব্বিধস্সপি ৰীরিযস্স অধিপ্পেতত্তা নিব্বত্তেতব্বধম্মৰিভাগেন চ ‘‘ইমে সঙ্খারা’’তি ৰুত্তং। তেন পধানভূতা সঙ্খারাতি এৰং সমাসো ৰেদিতব্বো। সঙ্খতসঙ্খারাদিনিৰত্তনত্থঞ্চেত্থ পধানগ্গহণং। অথ ৰা তং তং ৰিসেসং সঙ্খরোতীতি সঙ্খারো, সব্বম্পি ৰীরিযং। তত্থ চতুকিচ্চসাধকতো অঞ্ঞস্স নিৰত্তনত্থং পধানগ্গহণন্তি পধানভূতা সেট্ঠভূতাতি অত্থো।
‘‘Chandaṃ ce bhikkhu adhipatiṃ karitvā labhati samādhi’’ntiādi (vibha. 432) vacanato chandasamādhippadhānasaṅkhārasamannāgataṃ iddhipādaṃ bhāvetīti etthāpi chandādhipati samādhi chandasamādhīti adhipatisaddalopaṃ katvā samāso vuttoti viññāyati. Adhipatisaddatthadassanavaseneva pana ‘‘chandahetuko, chandādhiko vā samādhī’’ti sammohavinodaniyaṃ (vibha. aṭṭha. 431) vuttaṃ, tasmā idhāpi chandādhipati samādhi chandasamādhīti veditabbo. Taṃ pana chandaṃ vuttanayena saddhāsīsena dassento ‘‘saddhādhipateyyā cittekaggatā’’ti vuttaṃ. ‘‘Idaṃ padhāna’’nti vā vīriyaṃ vuttaṃ. Vīriyasaddāpekkhāsahitaṃ ekavacanena vatvā catubbidhassapi vīriyassa adhippetattā nibbattetabbadhammavibhāgena ca ‘‘ime saṅkhārā’’ti vuttaṃ. Tena padhānabhūtā saṅkhārāti evaṃ samāso veditabbo. Saṅkhatasaṅkhārādinivattanatthañcettha padhānaggahaṇaṃ. Atha vā taṃ taṃ visesaṃ saṅkharotīti saṅkhāro, sabbampi vīriyaṃ. Tattha catukiccasādhakato aññassa nivattanatthaṃ padhānaggahaṇanti padhānabhūtā seṭṭhabhūtāti attho.
ৰীরিযিদ্ধিপাদনিদ্দেসে ‘‘ৰীরিযসমাধিপ্পধানসঙ্খারসমন্নাগত’’ন্তি (ৰিভ॰ ৪৩৫) দ্ৰিক্খত্তুং ৰীরিযং আগতং। তত্থ পুরিমং সমাধিৰিসেসনং ‘‘ৰীরিযাধিপতি সমাধি ৰীরিযসমাধী’’তি, দুতিযং সমন্নাগমঙ্গদস্সনত্থং। দ্ৰে এৰ হি সব্বত্থ সমন্নাগমঙ্গানি সমাধি, পধানসঙ্খারো চ। ছন্দাদযো সমাধিৰিসেসনানি। পধানসঙ্খারো পন পধানৰচনেনেৰ ৰিসেসিতো, ন ছন্দাদীহীতি ন ইধ ৰীরিযাধিপতিতা পধানসঙ্খারস্স ৰুত্তা হোতি। ৰীরিযঞ্চ সমাধিং ৰিসেসেত্ৰা ঠিতমেৰ সমন্নাগমঙ্গৰসেন পধানসঙ্খারৰচনেন ৰুত্তন্তি নাপি দ্ৰীহি ৰীরিযেহি সমন্নাগমো ৰুত্তো হোতি। যস্মা পন ছন্দাদীহি ৰিসিট্ঠো সমাধি তথা ৰিসিট্ঠেনেৰ তেন সম্পযুত্তো পধানসঙ্খারো, সেসধম্মা চ, তস্মা সমাধিৰিসেসনানং ৰসেন ‘‘চত্তারো ইদ্ধিপাদা’’তি ৰুত্তা। ৰিসেসনভাৰো চ ছন্দাদীনং তংতংঅপস্সযনৰসেন হোতীতি ছন্দসমাধি…পে॰… ইদ্ধিপাদন্তি এত্থ নিস্সযত্থেপি পাদসদ্দেন উপাযত্থেন ছন্দাদীনং ইদ্ধিপাদতা ৰুত্তা হোতি। তথা হি অভিধম্মে উত্তরচূল়ভাজনীযে ‘‘চত্তারো ইদ্ধিপাদা ছন্দিদ্ধিপাদো’’তিআদিনা (ৰিভ॰ ৪৫৭) ছন্দাদীনমেৰ ইদ্ধিপাদতা ৰুত্তা। পঞ্হাপুচ্ছকে চ ‘‘চত্তারো ইদ্ধিপাদা – ইধ ভিক্খু ছন্দসমাধী’’তি (ৰিভ॰ ৪৬২) আরভিত্ৰাপি পুন ছন্দাদীনংযেৰ কুসলাদিভাৰো ৰিভত্তো। উপাযিদ্ধিপাদদস্সনত্থমেৰ হি নিস্সযিদ্ধিপাদদস্সনং কতং। অঞ্ঞথা চতুব্বিধতাৰ ন হোতীতি। অযমেত্থ পাল়িৰসেন অত্থৰিনিচ্ছযো ৰেদিতব্বো।
Vīriyiddhipādaniddese ‘‘vīriyasamādhippadhānasaṅkhārasamannāgata’’nti (vibha. 435) dvikkhattuṃ vīriyaṃ āgataṃ. Tattha purimaṃ samādhivisesanaṃ ‘‘vīriyādhipati samādhi vīriyasamādhī’’ti, dutiyaṃ samannāgamaṅgadassanatthaṃ. Dve eva hi sabbattha samannāgamaṅgāni samādhi, padhānasaṅkhāro ca. Chandādayo samādhivisesanāni. Padhānasaṅkhāro pana padhānavacaneneva visesito, na chandādīhīti na idha vīriyādhipatitā padhānasaṅkhārassa vuttā hoti. Vīriyañca samādhiṃ visesetvā ṭhitameva samannāgamaṅgavasena padhānasaṅkhāravacanena vuttanti nāpi dvīhi vīriyehi samannāgamo vutto hoti. Yasmā pana chandādīhi visiṭṭho samādhi tathā visiṭṭheneva tena sampayutto padhānasaṅkhāro, sesadhammā ca, tasmā samādhivisesanānaṃ vasena ‘‘cattāro iddhipādā’’ti vuttā. Visesanabhāvo ca chandādīnaṃ taṃtaṃapassayanavasena hotīti chandasamādhi…pe… iddhipādanti ettha nissayatthepi pādasaddena upāyatthena chandādīnaṃ iddhipādatā vuttā hoti. Tathā hi abhidhamme uttaracūḷabhājanīye ‘‘cattāro iddhipādā chandiddhipādo’’tiādinā (vibha. 457) chandādīnameva iddhipādatā vuttā. Pañhāpucchake ca ‘‘cattāro iddhipādā – idha bhikkhu chandasamādhī’’ti (vibha. 462) ārabhitvāpi puna chandādīnaṃyeva kusalādibhāvo vibhatto. Upāyiddhipādadassanatthameva hi nissayiddhipādadassanaṃ kataṃ. Aññathā catubbidhatāva na hotīti. Ayamettha pāḷivasena atthavinicchayo veditabbo.
তদঙ্গসমুচ্ছেদনিস্সরণৰিৰেকনিস্সিতত্তং ৰত্ৰা পটিপ্পস্সদ্ধিৰিৰেকনিস্সিতস্স অৰচনং ‘‘ছন্দসমাধি…পে॰… ইদ্ধিপাদং ভাৰেতী’’তি (ৰিভ॰ ৪৩২) ভাৰেতব্বানং ইদ্ধিপাদানং ৰুত্তত্তা। ভাৰিতিদ্ধিপাদস্স হি সচ্ছিকাতব্বা ফলপরিযাপন্না ইদ্ধিপাদাতি।
Tadaṅgasamucchedanissaraṇavivekanissitattaṃ vatvā paṭippassaddhivivekanissitassa avacanaṃ ‘‘chandasamādhi…pe… iddhipādaṃ bhāvetī’’ti (vibha. 432) bhāvetabbānaṃ iddhipādānaṃ vuttattā. Bhāvitiddhipādassa hi sacchikātabbā phalapariyāpannā iddhipādāti.
ৰোস্সগ্গসদ্দো পরিচ্চাগত্থো, পক্খন্দনত্থো চাতি ৰোস্সগ্গস্স দুৰিধতা ৰুত্তা। যথাৰুত্তেন পকারেনাতি তদঙ্গসমুচ্ছেদপ্পকারেন, তন্নিন্নভাৰারম্মণপ্পকারেন চ। পরিণমন্তং ৰিপস্সনক্খণে।
Vossaggasaddo pariccāgattho, pakkhandanattho cāti vossaggassa duvidhatā vuttā. Yathāvuttena pakārenāti tadaṅgasamucchedappakārena, tanninnabhāvārammaṇappakārena ca. Pariṇamantaṃ vipassanakkhaṇe.
১৪. পুব্বভাগপঞ্ঞাযাতি একাৰজ্জননানাৰজ্জনৰীথীসু পৰত্তউপচারপঞ্ঞায। অধিগমপঞ্ঞাযাতি অপ্পনাপঞ্ঞায। পুন পুব্বভাগপঞ্ঞাযাতি নানাৰজ্জনুপচারপঞ্ঞায, পটিসন্ধিপঞ্ঞায ৰা। উপচারপঞ্ঞাযাতি একাৰজ্জনে, সব্বত্থ ৰা পৰত্তউপচারপঞ্ঞায।
14.Pubbabhāgapaññāyāti ekāvajjananānāvajjanavīthīsu pavattaupacārapaññāya. Adhigamapaññāyāti appanāpaññāya. Puna pubbabhāgapaññāyāti nānāvajjanupacārapaññāya, paṭisandhipaññāya vā. Upacārapaññāyāti ekāvajjane, sabbattha vā pavattaupacārapaññāya.
পুচ্ছাৰিস্সজ্জনৰিচযোপীতি যথাৰুত্তায পুচ্ছায ৰিস্সজ্জনৰিচযোপি। ৰুত্তনযানুসারেনাতি অদিট্ঠজোতনা, ৰিমতিচ্ছেদনা চাতি হেট্ঠা ৰুত্তনযানুগমনেন।
Pucchāvissajjanavicayopīti yathāvuttāya pucchāya vissajjanavicayopi. Vuttanayānusārenāti adiṭṭhajotanā, vimaticchedanā cāti heṭṭhā vuttanayānugamanena.
১৫. সেখে অসেখেতি সেক্খে অরিযপুগ্গলে, অসেক্খে অরিযপুগ্গলে। ৰিপস্সনাপুব্বঙ্গমপ্পহানেতি ৰিপস্সনং পুরেচারিকং কত্ৰা পৰত্তকিলেসপ্পহানে, পহানাভিসমযেতি অত্থো।
15.Sekheasekheti sekkhe ariyapuggale, asekkhe ariyapuggale. Vipassanāpubbaṅgamappahāneti vipassanaṃ purecārikaṃ katvā pavattakilesappahāne, pahānābhisamayeti attho.
‘‘যং অনিচ্চং দুক্খং অনত্তা’’তি পাল়িং দস্সেত্ৰা পুন ‘‘যং অনিচ্চে দুক্খে অনত্তনী’’তি ৰচনং এৰম্পেত্থ পঠন্তীতি দস্সেতুং।
‘‘Yaṃ aniccaṃ dukkhaṃ anattā’’ti pāḷiṃ dassetvā puna ‘‘yaṃ anicce dukkhe anattanī’’ti vacanaṃ evampettha paṭhantīti dassetuṃ.
সেসসংকিলেসৰোদানধম্মাতি গেধতো অৰসিট্ঠসংকিলেসধম্মা চ সব্বৰোদানধম্মা চ। অভাৰেনাতি অভাৰনেন অভাৰকরণেন।
Sesasaṃkilesavodānadhammāti gedhato avasiṭṭhasaṃkilesadhammā ca sabbavodānadhammā ca. Abhāvenāti abhāvanena abhāvakaraṇena.
পযোগপরক্কমন্তি ভুসং যোগো পযোগো, পযোগোৰ পরক্কমো পযোগপরক্কমো, চিত্তং। উক্খিপতীতি কোসজ্জপক্খে পতিতুং অদেন্তো কুসলপক্খে উদ্ধং খিপেন্তো ৰিয পৰত্ততি। পধানৰীরিযন্তি অকুসলানং অনুপ্পাদনট্ঠেন উত্তমৰীরিযং। যোজেতব্বানীতি ‘‘আসেৰমানো ৰাযমতী’’তিআদিনা যোজেতব্বানি। অনুপ্পন্নাতি অৰত্তব্বতং আপন্নানন্তি ভূমিলদ্ধারম্মণাধিগ্গহিতাৰিক্খম্ভিতাসমুগ্ঘাটিতুপ্পন্নানং।
Payogaparakkamanti bhusaṃ yogo payogo, payogova parakkamo payogaparakkamo, cittaṃ. Ukkhipatīti kosajjapakkhe patituṃ adento kusalapakkhe uddhaṃ khipento viya pavattati. Padhānavīriyanti akusalānaṃ anuppādanaṭṭhena uttamavīriyaṃ. Yojetabbānīti ‘‘āsevamāno vāyamatī’’tiādinā yojetabbāni. Anuppannāti avattabbataṃ āpannānanti bhūmiladdhārammaṇādhiggahitāvikkhambhitāsamugghāṭituppannānaṃ.
১৬. ‘‘অট্ঠমকস্স ইন্দ্রিযানী’’তি ৰুত্তত্তা ‘‘পঠমমগ্গে সদ্ধাদযো’’তিআদি ৰুত্তং। ইন্দ্রিযগ্গহণঞ্চ পাল়িযং নিদস্সনমত্তং দট্ঠব্বং।
16. ‘‘Aṭṭhamakassa indriyānī’’ti vuttattā ‘‘paṭhamamagge saddhādayo’’tiādi vuttaṃ. Indriyaggahaṇañca pāḷiyaṃ nidassanamattaṃ daṭṭhabbaṃ.
অসুভানুপস্সনা কাযানুপস্সনাসতিপট্ঠানন্তি আহ ‘‘সতিপট্ঠানভাৰনায সুনিগ্গহিতো কামৰিতক্কো’’তি। সমাধি উপ্পজ্জমানো কামৰিতক্কম্পি নিগ্গহেত্ৰা এৰ উপ্পজ্জতীতি দস্সেন্তো ‘‘অনৰজ্জসুখপদট্ঠানেনা’’তিআদিমাহ। ‘‘কুসলেসু ধম্মেসু আরদ্ধৰীরিযো’’তিআদিনা ধম্মচ্ছন্দতো উপ্পজ্জমানো ৰীরিযচ্ছন্দো খন্তিং পরিব্রূহেতীতি দস্সেতি। অনৰজ্জধম্মানং উপকারকধম্মাসেৰনং ৰিয অনুপকারকধম্মপরিৰজ্জনম্পি পঞ্ঞানিসেৰনেনেৰ হোতীতি আহ ‘‘সমাধিআদীন’’ন্তিআদি।
Asubhānupassanā kāyānupassanāsatipaṭṭhānanti āha ‘‘satipaṭṭhānabhāvanāya suniggahito kāmavitakko’’ti. Samādhi uppajjamāno kāmavitakkampi niggahetvā eva uppajjatīti dassento ‘‘anavajjasukhapadaṭṭhānenā’’tiādimāha. ‘‘Kusalesu dhammesu āraddhavīriyo’’tiādinā dhammacchandato uppajjamāno vīriyacchando khantiṃ paribrūhetīti dasseti. Anavajjadhammānaṃ upakārakadhammāsevanaṃ viya anupakārakadhammaparivajjanampi paññānisevaneneva hotīti āha ‘‘samādhiādīna’’ntiādi.
১৭. সব্বধম্মাধিট্ঠানং দেসনং পুগ্গলাধিট্ঠানেন ৰিভজিতুং ‘‘লোকো নামা’’তিআদি ৰুত্তন্তি দস্সেন্তো ‘‘সব্বধম্মানন্তি…পে॰… দস্সেতু’’ন্তি আহ। মহগ্গতধম্মেসু ঠানং তংসম্পাদনাৰ। তথা সেসেসু। ৰড্ঢিযমানেসূতি যথা ৰিমুত্তিং পরিপাচযন্তি, এৰং ব্রূহিযমানেসু।
17. Sabbadhammādhiṭṭhānaṃ desanaṃ puggalādhiṭṭhānena vibhajituṃ ‘‘loko nāmā’’tiādi vuttanti dassento ‘‘sabbadhammānanti…pe… dassetu’’nti āha. Mahaggatadhammesu ṭhānaṃ taṃsampādanāva. Tathā sesesu. Vaḍḍhiyamānesūti yathā vimuttiṃ paripācayanti, evaṃ brūhiyamānesu.
দস্সনপরিঞ্ঞাতি রূপারূপধম্মানং সলক্খণতো, পচ্চযতো চ পরিজাননা। তেনাহ ‘‘ঞাতপরিঞ্ঞা’’তি। পটিপক্খৰিধমনেন সদ্ধিং লক্খণত্তযৰিভাৰনা ইধ ‘‘ভাৰনাপরিঞ্ঞা’’তি অধিপ্পেতাতি আহ ‘‘ভাৰনা…পে॰… পরিঞ্ঞা চা’’তি । দস্সনত্থা পরিঞ্ঞা দস্সনপরিঞ্ঞা, ভাৰনত্থা পরিঞ্ঞা ভাৰনাপরিঞ্ঞাতি এৰং ৰা এত্থ অত্থো দট্ঠব্বো।
Dassanapariññāti rūpārūpadhammānaṃ salakkhaṇato, paccayato ca parijānanā. Tenāha ‘‘ñātapariññā’’ti. Paṭipakkhavidhamanena saddhiṃ lakkhaṇattayavibhāvanā idha ‘‘bhāvanāpariññā’’ti adhippetāti āha ‘‘bhāvanā…pe… pariññā cā’’ti . Dassanatthā pariññā dassanapariññā, bhāvanatthā pariññā bhāvanāpariññāti evaṃ vā ettha attho daṭṭhabbo.
কক্খল়ফুসনাদীতি কক্খল়াদিফুসনাদি। অভিজানিত্ৰাতি অভিঞ্ঞায পঞ্ঞায জানিত্ৰা, ঠিতস্স অভিজাননহেতু ৰাতি অত্থো। অত্থোতি ফলং। নযোতি ৰুত্তনযো।
Kakkhaḷaphusanādīti kakkhaḷādiphusanādi. Abhijānitvāti abhiññāya paññāya jānitvā, ṭhitassa abhijānanahetu vāti attho. Atthoti phalaṃ. Nayoti vuttanayo.
‘‘যং অসঙ্খত’’ন্তিপি পঠন্তি। চতুনযকোৰিদোতি একত্তনানত্তাদিনযচতুক্কে নিপুণো। দেসনাযুত্তিকুসলোতি ধম্মানং দেসনাৰিধিম্হি কুসলো।
‘‘Yaṃ asaṅkhata’’ntipi paṭhanti. Catunayakovidoti ekattanānattādinayacatukke nipuṇo. Desanāyuttikusaloti dhammānaṃ desanāvidhimhi kusalo.
সদিসী কাতব্বা সংসন্দনৰসেনাতি অধিপ্পাযো। আনেতব্বা ‘‘অযং দেসনা ইমায দেসনায এৰং সংসন্দতী’’তি। অত্থতো অপেতন্তি অযুত্তত্থং। অসম্বন্ধত্থন্তি অঞ্ঞমঞ্ঞং অসম্বন্ধপদত্থং। ননু পট্ঠানৰিচারো নযৰিচারো ৰিয হারেহি অসম্মিস্সো ৰিচারণন্তরোতি চোদনং মনসি কত্ৰা আহ ‘‘যস্মা পনা’’তিআদি। ইধ নিক্খিত্তোতি ইধ সুত্তৰিচযে সুত্তত্থৰিচারভাৰতো নিক্খিত্তো, এতেন ৰা পট্ঠানস্স হারন্তোগধভাৰদস্সনেনেৰ মূলপদানং ৰিয পট্ঠানস্স পদত্থন্তরাভাৰো দস্সিতোতি ৰেদিতব্বং।
Sadisī kātabbā saṃsandanavasenāti adhippāyo. Ānetabbā ‘‘ayaṃ desanā imāya desanāya evaṃ saṃsandatī’’ti. Atthato apetanti ayuttatthaṃ. Asambandhatthanti aññamaññaṃ asambandhapadatthaṃ. Nanu paṭṭhānavicāro nayavicāro viya hārehi asammisso vicāraṇantaroti codanaṃ manasi katvā āha ‘‘yasmā panā’’tiādi. Idha nikkhittoti idha suttavicaye suttatthavicārabhāvato nikkhitto, etena vā paṭṭhānassa hārantogadhabhāvadassaneneva mūlapadānaṃ viya paṭṭhānassa padatthantarābhāvo dassitoti veditabbaṃ.
ইমস্স সুত্তস্সাতি সংৰণ্ণিযমানসুত্তং সন্ধাযাহ। কস্মিং ৰা পদেতি সংৰণ্ণিযমানং গাথং সন্ধাযাহ। তব্বিচযেনাতি পুচ্ছাদিৰিচযেন, অস্সাদাদিৰিচযেন চ।
Imassa suttassāti saṃvaṇṇiyamānasuttaṃ sandhāyāha. Kasmiṃ vā padeti saṃvaṇṇiyamānaṃ gāthaṃ sandhāyāha. Tabbicayenāti pucchādivicayena, assādādivicayena ca.
ৰিচযহারৰিভঙ্গৰণ্ণনা নিট্ঠিতা।
Vicayahāravibhaṅgavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / নেত্তিপ্পকরণপাল়ি • Nettippakaraṇapāḷi / ২. ৰিচযহারৰিভঙ্গো • 2. Vicayahāravibhaṅgo
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / নেত্তিপ্পকরণ-অট্ঠকথা • Nettippakaraṇa-aṭṭhakathā / ২. ৰিচযহারৰিভঙ্গৰণ্ণনা • 2. Vicayahāravibhaṅgavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / খুদ্দকনিকায (টীকা) • Khuddakanikāya (ṭīkā) / নেত্তিৰিভাৰিনী • Nettivibhāvinī / ২. ৰিচযহারৰিভঙ্গৰিভাৰনা • 2. Vicayahāravibhaṅgavibhāvanā
