| Library / Tipiṭaka / ཏིཔིཊཀ • Tipiṭaka / ནེཏྟིཔྤཀརཎ-ཊཱིཀཱ • Nettippakaraṇa-ṭīkā |
༢. ཝིཙཡཧཱརཝིབྷངྒཝཎྞནཱ
2. Vicayahāravibhaṅgavaṇṇanā
༡༡. ཛཱཏིལིངྒཀཱལསཱདྷནཝིབྷཏྟིསངྑྱཱཝིསེསཱདིཏོ སདྡཏོ པདཝིཙཡོ ཀཱཏབྦོ། ཏཏྠ ཀརིཡམཱནོ ཙ ཡཐཱསབྷཱཝནིརུཏྟིཡཱ ཨེཝ ཀཏོ སུཀཏོ ཧོཏཱིཏི དསྶེནྟོ ‘‘ཨིདཾ ནཱམཔདཾ …པེ॰… ཨཡཾ སདྡཏོ པདཝིཙཡོ’’ཏི ཝཏྭཱ ‘‘སོ པནཱཡ’’ནྟིཨཱདིམཱཧ། ཝཏྟབྦཨཏྠསཾཝཎྞནཱཏི ཏཾཏཾཔདཝཙནཱིཡསྶ ཨཏྠསྶ བྷེདཾ ཝཏྭཱ པརིཡཱཡེཧི ཝིཝརིཏྭཱ ཀཐནཾ།
11. Jātiliṅgakālasādhanavibhattisaṅkhyāvisesādito saddato padavicayo kātabbo. Tattha kariyamāno ca yathāsabhāvaniruttiyā eva kato sukato hotīti dassento ‘‘idaṃ nāmapadaṃ…pe… ayaṃ saddato padavicayo’’ti vatvā ‘‘so panāya’’ntiādimāha. Vattabbaatthasaṃvaṇṇanāti taṃtaṃpadavacanīyassa atthassa bhedaṃ vatvā pariyāyehi vivaritvā kathanaṃ.
ཝིཙིཡམཱནསྶ སུཏྟཔདསྶཱཏི པུཙྪཱཝསེན པཝཏྟསུཏྟཔདསྶ། ‘‘སུཏྟནྟརཔདཱནིཔི པུཙྪཱཝསེནེཝ པཝཏྟཱནཱི’’ཏི ཝདནྟི ‘‘ན སབྦམྤི སུཏྟཔད’’ནྟི། ཨེཀསྶེཝ པདསྶ སམྦྷཝནྟཱནཾ ཨནེཀེསཾ ཨཏྠཱནཾ ཨུདྡྷཱརོ ཨཏྠུདྡྷཱརོ། ཨེཀསྶེཝ པན ཨཏྠསྶ སམྦྷཝནྟཱནཾ ཨནེཀེསཾ པདཱནཾ ཨུདྡྷཱརོ པདུདྡྷཱརོ། སབྦེ ཧི སཾཝཎྞིཡམཱནེ སུཏྟེ ལབྦྷམཱནེ སབྦེ པདཏྠེ། ནཝ སུཏྟནྟེཏི སུཏྟགེཡྻཱདིཝསེན ནཝཔྤཀཱརེ སུཏྟསྨིཾ ཨཱནེཏྭཱ ཝིཙིནཏཱིཏི ཡོཛནཱ། ཨཐ ཝཱ ‘‘སབྦེ ནཝ སུཏྟནྟེ’’ཏི ཨིམིནཱ པཝིཙཡལཀྑཎེན ཧཱརེན སུཏྟགེཡྻཱདཱིནི སབྦཱནིཔི ནཝཔྤཀཱརཱནི སུཏྟཱནི ཝིཙིནཏཱིཏི ཨཏྠོ། ཏེནཱཧ ‘‘སུཏྟགེཡྻཱདིཀེ’’ཏིཨཱདི།
Viciyamānassa suttapadassāti pucchāvasena pavattasuttapadassa. ‘‘Suttantarapadānipi pucchāvaseneva pavattānī’’ti vadanti ‘‘na sabbampi suttapada’’nti. Ekasseva padassa sambhavantānaṃ anekesaṃ atthānaṃ uddhāro atthuddhāro. Ekasseva pana atthassa sambhavantānaṃ anekesaṃ padānaṃ uddhāro paduddhāro. Sabbe hi saṃvaṇṇiyamāne sutte labbhamāne sabbe padatthe. Nava suttanteti suttageyyādivasena navappakāre suttasmiṃ ānetvā vicinatīti yojanā. Atha vā ‘‘sabbe nava suttante’’ti iminā pavicayalakkhaṇena hārena suttageyyādīni sabbānipi navappakārāni suttāni vicinatīti attho. Tenāha ‘‘suttageyyādike’’tiādi.
‘‘ཀོསལཱནཾ པུརཱ རམྨཱ’’ཏིཨཱདིཀཱ (སུ॰ ནི॰ ༩༨༢) ཚཔཉྙཱས གཱཐཱ ཝཏྠུགཱཐཱ། ‘‘པཱརཱཡནམནུགཱཡིསྶ’’ནྟི (སུ॰ ནི॰ ༡༡༣༧ ཨཱདཡོ) པན ཨཱདིཀཱ ཨེཀཱུནཝཱིསཏི གཱཐཱ ཨནུགཱིཏིགཱཐཱ། ཨིདཾ ནཱམཾ ཀཏནྟི ཨིདཾ ‘‘པཱརཱཡན’’ནྟི ནཱམཾ ཀཏཾ། ཏེནཱཧ ‘‘པཱརཾ གམནཱིཡཱ ཨིམེ དྷམྨཱ, ཏསྨཱ ཨིམསྶ དྷམྨཔརིཡཱཡསྶ ‘པཱརཱཡནནྟྭེཝ ཨདྷིཝཙན’’’ནྟི (སུ॰ ནི॰ པཱརཱཡནཏྠུཏིགཱཐཱ; ཙཱུལ༹ནི॰ པཱརཱཡནཏྠུཏིགཱཐཱ ༡༤༩ ཨཱདཡོ)། བུདྡྷིཡཾ ཝིཔརིཝཏྟམཱནནྟི ཨིམསྶ ཝིཙཡཧཱརཝིབྷངྒསྶ དེསནཱཀཱལེ ཨཱཡསྨཱ མཧཱཀཙྩཱནོ ཨཏྟནོ བུདྡྷིཡཾ ཝཏྟམཱནཾ ཀཏྭཱ ཨེཝམཱཧཱཏི ཡོཛནཱ།
‘‘Kosalānaṃ purā rammā’’tiādikā (su. ni. 982) chapaññāsa gāthā vatthugāthā. ‘‘Pārāyanamanugāyissa’’nti (su. ni. 1137 ādayo) pana ādikā ekūnavīsati gāthā anugītigāthā. Idaṃ nāmaṃ katanti idaṃ ‘‘pārāyana’’nti nāmaṃ kataṃ. Tenāha ‘‘pāraṃ gamanīyā ime dhammā, tasmā imassa dhammapariyāyassa ‘pārāyanantveva adhivacana’’’nti (su. ni. pārāyanatthutigāthā; cūḷani. pārāyanatthutigāthā 149 ādayo). Buddhiyaṃ viparivattamānanti imassa vicayahāravibhaṅgassa desanākāle āyasmā mahākaccāno attano buddhiyaṃ vattamānaṃ katvā evamāhāti yojanā.
ཨེཀཾསབྱཱཀརཎསྶ ཨཡནྟི ཨེཀཾསབྱཱཀརཎཱིཡཱ, ཨེཀཾསེན ཝཱ བྱཱཀཱཏབྦཏྟཱ ཨེཀཾསབྱཱཀརཎཱིཡཱ, ཨེཀཾསབྱཱཀརཎཡོགྒཱཏི ཨཏྠོ། སེསཔདདྭཡེཔི ཨེསེཝ ནཡོ། ཋཔནཱིཡཱཏི ཋཔེཏབྦཏྟཱ ཨབྱཱཀརཎཱིཡཱཏི ཨཏྠོ། སམཡནྟརཔརིཙཡེན ནིཝཱརཎདྷམྨཾ པཏི སཾསཡཔཀྑནྡོ པུཙྪཏཱིཏི ཨདྷིཔྤཱཡེནཱཧ ‘‘ཝིམཏིཙྪེདན’’ནྟི། པཀཏིཡཱ པན ནིཝཱརཎདྷམྨཾ ཨཛཱནནྟོ ཉཱཏུཀཱམཏཱཡ པུཙྪཏཱིཏི ཨདིཊྛཛོཏནཱཡ པུཙྪཱཔི སིཡཱ། ཏཐཱ ཧི ཝཀྑཏི ‘‘ལོཀསྶ ནིཝཱརཎཱདཱིནི ཨཛཱནནྟེནཱ’’ཏི།
Ekaṃsabyākaraṇassa ayanti ekaṃsabyākaraṇīyā, ekaṃsena vā byākātabbattā ekaṃsabyākaraṇīyā, ekaṃsabyākaraṇayoggāti attho. Sesapadadvayepi eseva nayo. Ṭhapanīyāti ṭhapetabbattā abyākaraṇīyāti attho. Samayantaraparicayena nivāraṇadhammaṃ pati saṃsayapakkhando pucchatīti adhippāyenāha ‘‘vimaticchedana’’nti. Pakatiyā pana nivāraṇadhammaṃ ajānanto ñātukāmatāya pucchatīti adiṭṭhajotanāya pucchāpi siyā. Tathā hi vakkhati ‘‘lokassa nivāraṇādīni ajānantenā’’ti.
ཨེཀཝཏྠུཔརིགྒཧཱཏི ཨེཀསྶ ཨབྷིདྷེཡྻཏྠསྶ གཧཎཏོ།
Ekavatthupariggahāti ekassa abhidheyyatthassa gahaṇato.
ཝིམུཏྟིཔརིཔཱཙཀཨིནྡྲིཡཱནི ཝིཝཊྚཔཀྑེ ཋིཏསྶ སདྡྷཱདཡོ དྷམྨཱ, ཀིཾ པནེཏྠ ཨརིཡཱནམྤི ཨིནྡྲིཡལོཀེན སངྒཧོ ཧོཏཱིཏི ཨཱཧ ‘‘པརིཡཱཔནྣདྷམྨཝསེནཱ’’ཏིཨཱདི།
Vimuttiparipācakaindriyāni vivaṭṭapakkhe ṭhitassa saddhādayo dhammā, kiṃ panettha ariyānampi indriyalokena saṅgaho hotīti āha ‘‘pariyāpannadhammavasenā’’tiādi.
ཀཱལ༹པཀྑཙཱཏུདྡསཱིགྷནཝནསཎྜམེགྷཔཊལཙྪཱདནཨཌྜྷརཏྟཱིནཾ ཝསེན ཙཏུརངྒསམནྣཱགཏེན། ཝིཝིཙྪཱཏི ཝིཙིཀིཙྪཱཡ། ཏེནཱཧ ‘‘ཝིཙིཀིཙྪཱཧེཏཱུ’’ཏི། དུཀྑམསྶ མཧབྦྷཡནྟི ཨེཏྠ ཝུཏྟཾ ‘‘ཨསྶཱ’’ཏི པདཾ ‘‘ཛཔྤཱབྷིལེཔནཾ ཨསྶ བྲཱུམཱི’’ཏི ཨཱནེཏྭཱ སམྦནྡྷིཏབྦནྟི དསྶེནྟོ ‘‘ཛཔྤཱ ཏཎྷཱ ཨསྶ ལོཀསྶཱ’’ཏི ཨཱཧ། ‘‘སབྦསཏྟཱན’’ནྟིཨཱདིནཱ, ‘‘སབྦསོཝཱ’’ཏིཨཱདིནཱ ཙ ཨནྭཡཏོ, བྱཏིརེཀཏོ ཙ སཱཏིསཡཾ ཨཝིཛྫཱཡ ནཱིཝརཎབྷཱཝཾ དསྶེཏི། ‘‘དཱུརེ སནྟོ པཀཱསནྟི (དྷ॰ པ॰ ༣༠༤; ནེཏྟི॰ ༡༡), རཏྟོ ཨཏྠཾ ན ཛཱནཱཏཱི’’ཏི (ནེཏྟི॰ ༡༡, ༢༧) གཱཐཱདྭཡེནཱཔི ཨནུགཱིཏིཝིཙཡཾ དསྶེཏཱིཏི ཡོཛེཏབྦཾ།
Kāḷapakkhacātuddasīghanavanasaṇḍameghapaṭalacchādanaaḍḍharattīnaṃ vasena caturaṅgasamannāgatena. Vivicchāti vicikicchāya. Tenāha ‘‘vicikicchāhetū’’ti. Dukkhamassa mahabbhayanti ettha vuttaṃ ‘‘assā’’ti padaṃ ‘‘jappābhilepanaṃ assa brūmī’’ti ānetvā sambandhitabbanti dassento ‘‘jappā taṇhā assa lokassā’’ti āha. ‘‘Sabbasattāna’’ntiādinā, ‘‘sabbasovā’’tiādinā ca anvayato, byatirekato ca sātisayaṃ avijjāya nīvaraṇabhāvaṃ dasseti. ‘‘Dūre santo pakāsanti (dha. pa. 304; netti. 11), ratto atthaṃ na jānātī’’ti (netti. 11, 27) gāthādvayenāpi anugītivicayaṃ dassetīti yojetabbaṃ.
རཱུཔཱཝཙརཱཏི རཱུཔཱཝཙརསཏྟཱ། ཝིཔརིཎཱམདུཀྑཏཱཡ མུཙྩནསྶ ཀཱརཎཝཙནནྟི སམྦནྡྷོ། ཡཏོ ཝཊྚདུཀྑཏོ མུཙྩནཾ། ཏཾ ཝཊྚདུཀྑཾ ཨནཝསེསཔརིཡཱདཱནཝསེན སངྑཱརདུཀྑཏཱགཧཎེན།
Rūpāvacarāti rūpāvacarasattā. Vipariṇāmadukkhatāya muccanassa kāraṇavacananti sambandho. Yato vaṭṭadukkhato muccanaṃ. Taṃ vaṭṭadukkhaṃ anavasesapariyādānavasena saṅkhāradukkhatāgahaṇena.
ཨེཀཱདྷཱརནྟི ཨེཀཝཏྠུ ཨདྷིཊྛཱནཾ། ནིཝཱརཎཾ ཝིཀྑམྦྷནཾ པིདྷཱནཾ སམུཙྪེདོཏི ཨཏྠདྭཡསྶ པུཙྪིཏཏྟཱ ‘‘ཨནེཀཱདྷཱརཾ དསྶེཏུ’’ནྟི ཝུཏྟཾ། ཏེནཱཧ ‘‘ནིཝཱརཎསངྑཱཏཾ སཾཝརཾ…པེ॰… པིདྷིཡྻནྟི པཙྪིཛྫནྟཱི’’ཏི (སུ॰ ནི॰ ཨཊྛ॰ ༢.༡༠༤༡; ཙཱུལ༹ནི॰ ཨཊྛ॰ ༣)། ཏསྶཏྠོ ‘‘ནིཝཱརཎསངྑཱཏཾ ཝིཀྑམྦྷནཾ, སཾཝརཾ, པིདྷཱནཉྩ ཀཐེཧཱི’’ཏི།
Ekādhāranti ekavatthu adhiṭṭhānaṃ. Nivāraṇaṃ vikkhambhanaṃ pidhānaṃ samucchedoti atthadvayassa pucchitattā ‘‘anekādhāraṃ dassetu’’nti vuttaṃ. Tenāha ‘‘nivāraṇasaṅkhātaṃ saṃvaraṃ…pe… pidhiyyanti pacchijjantī’’ti (su. ni. aṭṭha. 2.1041; cūḷani. aṭṭha. 3). Tassattho ‘‘nivāraṇasaṅkhātaṃ vikkhambhanaṃ, saṃvaraṃ, pidhānañca kathehī’’ti.
‘‘ཝོདཱན’’ནྟི ཨིམིནཱ སོཏཱནཾ ཝིཀྑམྦྷནཝིསུདྡྷི, ‘‘ཝུཊྛཱན’’ནྟི ཨིམིནཱ སམུཙྪེདཝིསུདྡྷི ཨདྷིཔྤེཏཱཏི ཨཱཧ ‘‘པུཙྪཱཡ དུཝིདྷཏྠཝིསཡཏཾ ཝིཝརིཏུཾ ‘ཨེཝ’ནྟིཨཱདི ཝུཏྟ’’ནྟི། ཏཐཱ ཙཱཧ ‘‘ཝོདཱཡཏི…པེ॰… ཨརིཡམགྒོ’’ཏི།
‘‘Vodāna’’nti iminā sotānaṃ vikkhambhanavisuddhi, ‘‘vuṭṭhāna’’nti iminā samucchedavisuddhi adhippetāti āha ‘‘pucchāya duvidhatthavisayataṃ vivarituṃ ‘eva’ntiādi vutta’’nti. Tathā cāha ‘‘vodāyati…pe… ariyamaggo’’ti.
དིཊྛིམཱནཱཝིཛྫཱསོཏཱཔི ཏཎྷཱསོཏཱནུགཱཏི ཨཱཧ ‘‘ཡེབྷུཡྻེན ཨནུརོདྷཝསེནཱ’’ཏི། ཨུཔཙཱརཝསེནཱཏི ནིསྶིཏུཔཙཱརཝསེན། སབྦསྨཱཏི ཙཀྑུཏོ ཡཱཝ མནཏོཏི སབྦསྨཱ དྭཱརཏོ། སབྦཔྤཀཱརེནཱཏྟི ཏཎྷཱཡནམིཙྪཱབྷིནིཝེསནཨུནྣམནཱདིཔྤཀཱརེན།
Diṭṭhimānāvijjāsotāpi taṇhāsotānugāti āha ‘‘yebhuyyena anurodhavasenā’’ti. Upacāravasenāti nissitupacāravasena. Sabbasmāti cakkhuto yāva manatoti sabbasmā dvārato. Sabbappakārenātti taṇhāyanamicchābhinivesanaunnamanādippakārena.
ཏམེཝ སཏིནྟི ཡཱཡཾ སཏི པུབྦབྷཱགེ སོཏཱནཾ ཝིཀྑམྦྷནཝསེན ཝུཏྟཱ, ཏམེཝ སཏིཾ། མགྒཀྑཎེ སོཏཱནཾ སཾཝརཾ པིདྷཱནཾ བྲཱུམི། ཡསྨཱ པན པིདྷཱཡིཀཱཔི སཏི མགྒཀྑཎེ པཉྙཱནུགཱ, པཉྙཱཀིཙྩམེཝེཏྠ ཨདྷིཀཾ, ཏསྨཱ ཝུཏྟཾ ‘‘པཉྙཱཡེཏེ པིདྷཱིཡརེ’’ཏི།
Tameva satinti yāyaṃ sati pubbabhāge sotānaṃ vikkhambhanavasena vuttā, tameva satiṃ. Maggakkhaṇe sotānaṃ saṃvaraṃ pidhānaṃ brūmi. Yasmā pana pidhāyikāpi sati maggakkhaṇe paññānugā, paññākiccamevettha adhikaṃ, tasmā vuttaṃ ‘‘paññāyete pidhīyare’’ti.
སཾཝརཔིདྷཱནཱནནྟི ཨེཏྠ སཾཝརསདྡེན ནིཝཱརཎཾ ཝུཏྟཾ།
Saṃvarapidhānānanti ettha saṃvarasaddena nivāraṇaṃ vuttaṃ.
ཡསྨིཾ ཡསྨིཾ ཨརིཡམགྒེ ཨནདྷིགཏེ ཡཾ ཡཾ ཨབྷིསངྑཱརཝིཉྙཱཎཾ ཨུཔྤཛྫནཱརཧཾ, ཏསྨིཾ ཏསྨིཾ ཨདྷིགཏེ ཏཾ ཏཾ ཝིཉྙཱཎཾ ཨནུཔྤཱདནིརོདྷེན ནིརུཛ྄ཛྷཏི སདྡྷིཾ ཨཏྟནཱ སམྤཡུཏྟནཱམརཱུཔེནཱཏི ཨཱཧ ‘‘ཏསྶ ཏསྶ ཝིཉྙཱཎསྶ ནིརོདྷེན སཧེཝཱ’’ཏི། ཨནུཔྤཱདནིརོདྷོ ཧི ཨེཏྠ ‘‘ནིརོདྷོ’’ཏི ཨདྷིཔྤེཏོ ཨནུཔཱདིསེསནིབྦཱནསྶ ཨདྷིཔྤེཏཏྟཱཏི། ཨནུསནྡྷཱིཡཏི ཨེཏེནཱཏི ཨནུསནྡྷི, ཨིདྷ པུཙྪིཡམཱནོ ཨཏྠོ།
Yasmiṃ yasmiṃ ariyamagge anadhigate yaṃ yaṃ abhisaṅkhāraviññāṇaṃ uppajjanārahaṃ, tasmiṃ tasmiṃ adhigate taṃ taṃ viññāṇaṃ anuppādanirodhena nirujjhati saddhiṃ attanā sampayuttanāmarūpenāti āha ‘‘tassa tassa viññāṇassa nirodhena sahevā’’ti. Anuppādanirodho hi ettha ‘‘nirodho’’ti adhippeto anupādisesanibbānassa adhippetattāti. Anusandhīyati etenāti anusandhi, idha pucchiyamāno attho.
སཧ ཝིསཡེན དསྶེཏུནྟི ཨེཏྠ སཙྩཱནི ཨེཝ ཝིསཡོ། པཧཱཏབྦསབྷཱཝཾ སམུདཡསཙྩཾ, ཏསྶ ཝིསཡོ དུཀྑསཙྩཾ། ‘‘སཾཡོཛནིཡེསུ, བྷིཀྑཝེ, དྷམྨེསུ ཨསྶཱདཱནུཔསྶིནོ ཝིཧརཏོ ཏཎྷཱ པཝཌྜྷཏཱི’’ཏི (སཾ॰ ནི॰ ༢.༥༣, ༥༧) ཧི ཝུཏྟཾ། པཧཱཡཀསབྷཱཝཾ མགྒསཙྩཾ, ཏསྶ ཝིསཡོ ནིརོདྷསཙྩནྟི ཨཱཧ ‘‘སཧ ཝིསཡེན…པེ॰… སཙྩེསཱུ’’ཏི། ཀཱམཉྩེཏྠ ‘‘སམུདཡོ དྭཱིསུ བྷཱུམཱིསུ པཧཱིཡཏཱི’’ཏི ཨཱརདྡྷཾ, ‘‘དསྶནེན ཏཱིཎི སཾཡོཛནཱནི པཧཱིཡནྟི, བྷཱཝནཱཡ སཏྟ སཾཡོཛནཱནི པཧཱིཡནྟཱི’’ཏི པན ཝིབྷཱགཝཙནམེཝ ཝཏྟནྟི ཨཱཧ ‘‘པཧཱཡཀཝིབྷཱགམུཁེན པཧཱཏབྦཝིབྷཱགཾ དསྶེཏུ’’ནྟི།
Sahavisayena dassetunti ettha saccāni eva visayo. Pahātabbasabhāvaṃ samudayasaccaṃ, tassa visayo dukkhasaccaṃ. ‘‘Saṃyojaniyesu, bhikkhave, dhammesu assādānupassino viharato taṇhā pavaḍḍhatī’’ti (saṃ. ni. 2.53, 57) hi vuttaṃ. Pahāyakasabhāvaṃ maggasaccaṃ, tassa visayo nirodhasaccanti āha ‘‘saha visayena…pe… saccesū’’ti. Kāmañcettha ‘‘samudayo dvīsu bhūmīsu pahīyatī’’ti āraddhaṃ, ‘‘dassanena tīṇi saṃyojanāni pahīyanti, bhāvanāya satta saṃyojanāni pahīyantī’’ti pana vibhāgavacanameva vattanti āha ‘‘pahāyakavibhāgamukhena pahātabbavibhāgaṃ dassetu’’nti.
ནིརཝསེསཀཱམརཱགབྱཱཔཱདཱ ཏཏིཡམགྒེན པཧཱིཡནྟི, ཨིཏརེ ཙཏུཏྠམགྒེནཱཏི ཝུཏྟཾ ‘‘ཨིཏརེཧི པན ནིརཝསེས’’ནྟི། ཏཏྠཱཏི ཀམྨཝིཔཱཀཝཊྚཔྤབྷེདེན ཏེདྷཱཏུཀེ བྷཝཏྟཡེ། སཾཡོཛནཝསེནཱཏི སབྦདཱ ཡོཛནཝསེན བནྡྷནཝསེན།
Niravasesakāmarāgabyāpādā tatiyamaggena pahīyanti, itare catutthamaggenāti vuttaṃ ‘‘itarehi pana niravasesa’’nti. Tatthāti kammavipākavaṭṭappabhedena tedhātuke bhavattaye. Saṃyojanavasenāti sabbadā yojanavasena bandhanavasena.
༡༢. ཨགྒཕལཉཱཎཏཱཡ ཨེཀམྤི སམཱནཾ ཏནྣིམིཏྟསྶ ཁཡཱནུཔྤཱདཱརམྨཎསྶ པཙྩཝེཀྑཎཉཱཎསྶ ཝསེན ཕལཝོཧཱརེན དྭེ ནཱམཱནི ལབྷཏི།
12. Aggaphalañāṇatāya ekampi samānaṃ tannimittassa khayānuppādārammaṇassa paccavekkhaṇañāṇassa vasena phalavohārena dve nāmāni labhati.
སོམནསྶནཱམལཱབྷོ ཨིམིནཱ ཨཱརམྨཎསངྐེཏེནཱཏི ཏདཏྠཾ ཝིཝརནྟོ ‘‘ཁཡེ…པེ॰… སམཉྙཱཡཱ’’ཏི ཨཱཧ།
Somanassanāmalābho iminā ārammaṇasaṅketenāti tadatthaṃ vivaranto ‘‘khaye…pe… samaññāyā’’ti āha.
༡༣. ཏགྒཧཎེནེཝཱཏི ཕསྶཔཉྩམཀཔཉྩརཱུཔིནྡྲིཡགྒཧཎེནེཝ། སཧཙརཎཱདིནཱཏི སཧཛཱཏཱདིཨནནྟརཱདིཔཙྩཡབྷཱཝེན ཙེཝ ནིསྶཡཱརམྨཎཱདིནཱ ཙ། ‘‘སམྤཡུཏྟ’’ནྟི ཨིམིནཱ སཧིཏཏཱ ཨཝིསིཊྛཏཱ ཨིདྷཱདྷིཔྤེཏཱཏི ཨཱཧ ‘‘ཨཝིབྷཱགེན གཧཎཱིཡབྷཱཝཾ སནྡྷཱཡཱ’’ཏི།
13.Taggahaṇenevāti phassapañcamakapañcarūpindriyaggahaṇeneva. Sahacaraṇādināti sahajātādianantarādipaccayabhāvena ceva nissayārammaṇādinā ca. ‘‘Sampayutta’’nti iminā sahitatā avisiṭṭhatā idhādhippetāti āha ‘‘avibhāgena gahaṇīyabhāvaṃ sandhāyā’’ti.
ཀཐཾ སམཱདྷིནྡྲིཡཾ ཨུཔྤཱདེཏཱིཏི ཨཱཧ ‘‘སཏིགྒཧཎེན ཙེཏྠ པརིཡུཊྛཱནཔྤཧཱནཾ ཨིདྷཱདྷིཔྤེཏ’’ནྟི། ན ཧི སམཱདྷིནཱ པརིཡུཊྛཱནཔྤཧཱནཾ སམྦྷཝཏི།
Kathaṃ samādhindriyaṃ uppādetīti āha ‘‘satiggahaṇena cettha pariyuṭṭhānappahānaṃ idhādhippeta’’nti. Na hi samādhinā pariyuṭṭhānappahānaṃ sambhavati.
པདཧཏི ཨེཏེནཱཏི པདྷཱནཾ, ཝཱིརིཡཾ། ཏེཏི ཝཱིརིཡསངྑཱརཱ། ཨེཀརསེནཱཏི ཡཐཱ ཨིནྡྲིཡཱནི ཨེཀརསཱནི ཧོནྟི, ཨེཝཾ ཨེཀརསབྷཱཝེན སརཎཏོ པཝཏྟནཏོ། ཏཐཱ པཝཏྟིཡཱ ཨེཝ སུཊྛུ ཝཏ ཝཱིརིཡཾ ཝཱཧེསཱིཏི ཡོགིནཱ སངྐཔྤེཏབྦཏོ ཏདུཔགཝཱིརིཡཝཱཧནཊྛེན ‘‘སམྤཧཾསནཱ’’ཏི ཝུཏྟཾ། ཏེནཱཧ ‘‘ཨེཝཾ མེ…པེ॰… ཧེཏུབྷཱཝཏོ’’ཏི།
Padahati etenāti padhānaṃ, vīriyaṃ. Teti vīriyasaṅkhārā. Ekarasenāti yathā indriyāni ekarasāni honti, evaṃ ekarasabhāvena saraṇato pavattanato. Tathā pavattiyā eva suṭṭhu vata vīriyaṃ vāhesīti yoginā saṅkappetabbato tadupagavīriyavāhanaṭṭhena ‘‘sampahaṃsanā’’ti vuttaṃ. Tenāha ‘‘evaṃ me…pe… hetubhāvato’’ti.
ཨིདྡྷིསདྡསྶ པཋམོ ཀཏྟུཨཏྠོ, དུཏིཡོ ཀརཎཏྠོ ཝུཏྟོ, པཱདསདྡསྶ ཨེཀོ ཀརཎཏྠོ ཨེཝ། པཛྫིཏབྦཱ ཙ ཨིདྡྷཱི ཝུཏྟཱ, ན ཙ ཨིཛ྄ཛྷནྟི། པཛྫིཏབྦཱ ཙ ཨིདྡྷཱི པཛྫནཀརཎེན པཱདེན སམཱནཱདྷིཀརཎཱ ན ཧོནྟཱིཏི ‘‘པཋམེན ཨཏྠེན ཨིདྡྷི ཨེཝ པཱདོ’’ཏི ཀཐཾ སཀྐཱ ཝཏྟུཾ, ཏཐཱ ཨིདྡྷིཀིརིཡཱཀརཎེན སཱདྷེཏབྦཱ བུདྡྷིསངྑཱཏཱ ཨིདྡྷི པཛྫནཀིརིཡཱཀརཎེན པཛྫིཏབྦཱཏི དྭིནྣཾ ཀརཎཱནཾ ན སམཱནཱདྷིཀརཎཏཱ སམྦྷཝཏཱིཏི ‘‘དུཏིཡེན ཨཏྠེན ཨིདྡྷིཡཱ པཱདོ’’ཏི ཀཐཾ སཀྐཱ ཝཏྟུནྟི ཙེ? སཀྐཱ, པཱདསྶ ཨིཛ྄ཛྷམཱནཀོཊྛཱས ཨིཛ྄ཛྷནཀརཎཱུཔཱཡབྷཱཝཏོ། ཨཐ ཝཱ ‘‘པཋམེན ཨཏྠེན ཨིདྡྷིཡཱ པཱདོ, དུཏིཡེན ཨཏྠེན ཨིདྡྷི ཨེཝ པཱདོ ཨིདྡྷིཔཱདོ’’ཏི ཨེཝཾ ཡོཛནཏོ། ཀཐཾ? ཨནནྟརཏྠོ པཙྩཱསཏྟིཉཱཡེན ཨིདྷ པཋམོཏི ཨདྷིཔྤེཏོ, ཏཏོ པུརིམོ དུཏིཡོཏི།
Iddhisaddassa paṭhamo kattuattho, dutiyo karaṇattho vutto, pādasaddassa eko karaṇattho eva. Pajjitabbā ca iddhī vuttā, na ca ijjhanti. Pajjitabbā ca iddhī pajjanakaraṇena pādena samānādhikaraṇā na hontīti ‘‘paṭhamena atthena iddhi eva pādo’’ti kathaṃ sakkā vattuṃ, tathā iddhikiriyākaraṇena sādhetabbā buddhisaṅkhātā iddhi pajjanakiriyākaraṇena pajjitabbāti dvinnaṃ karaṇānaṃ na samānādhikaraṇatā sambhavatīti ‘‘dutiyena atthena iddhiyā pādo’’ti kathaṃ sakkā vattunti ce? Sakkā, pādassa ijjhamānakoṭṭhāsa ijjhanakaraṇūpāyabhāvato. Atha vā ‘‘paṭhamena atthena iddhiyā pādo, dutiyena atthena iddhi eva pādo iddhipādo’’ti evaṃ yojanato. Kathaṃ? Anantarattho paccāsattiñāyena idha paṭhamoti adhippeto, tato purimo dutiyoti.
‘‘ཚནྡཾ ཙེ བྷིཀྑུ ཨདྷིཔཏིཾ ཀརིཏྭཱ ལབྷཏི སམཱདྷི’’ནྟིཨཱདི (ཝིབྷ॰ ༤༣༢) ཝཙནཏོ ཚནྡསམཱདྷིཔྤདྷཱནསངྑཱརསམནྣཱགཏཾ ཨིདྡྷིཔཱདཾ བྷཱཝེཏཱིཏི ཨེཏྠཱཔི ཚནྡཱདྷིཔཏི སམཱདྷི ཚནྡསམཱདྷཱིཏི ཨདྷིཔཏིསདྡལོཔཾ ཀཏྭཱ སམཱསོ ཝུཏྟོཏི ཝིཉྙཱཡཏི། ཨདྷིཔཏིསདྡཏྠདསྶནཝསེནེཝ པན ‘‘ཚནྡཧེཏུཀོ, ཚནྡཱདྷིཀོ ཝཱ སམཱདྷཱི’’ཏི སམྨོཧཝིནོདནིཡཾ (ཝིབྷ॰ ཨཊྛ॰ ༤༣༡) ཝུཏྟཾ, ཏསྨཱ ཨིདྷཱཔི ཚནྡཱདྷིཔཏི སམཱདྷི ཚནྡསམཱདྷཱིཏི ཝེདིཏབྦོ། ཏཾ པན ཚནྡཾ ཝུཏྟནཡེན སདྡྷཱསཱིསེན དསྶེནྟོ ‘‘སདྡྷཱདྷིཔཏེཡྻཱ ཙིཏྟེཀགྒཏཱ’’ཏི ཝུཏྟཾ། ‘‘ཨིདཾ པདྷཱན’’ནྟི ཝཱ ཝཱིརིཡཾ ཝུཏྟཾ། ཝཱིརིཡསདྡཱཔེཀྑཱསཧིཏཾ ཨེཀཝཙནེན ཝཏྭཱ ཙཏུབྦིདྷསྶཔི ཝཱིརིཡསྶ ཨདྷིཔྤེཏཏྟཱ ནིབྦཏྟེཏབྦདྷམྨཝིབྷཱགེན ཙ ‘‘ཨིམེ སངྑཱརཱ’’ཏི ཝུཏྟཾ། ཏེན པདྷཱནབྷཱུཏཱ སངྑཱརཱཏི ཨེཝཾ སམཱསོ ཝེདིཏབྦོ། སངྑཏསངྑཱརཱདིནིཝཏྟནཏྠཉྩེཏྠ པདྷཱནགྒཧཎཾ། ཨཐ ཝཱ ཏཾ ཏཾ ཝིསེསཾ སངྑརོཏཱིཏི སངྑཱརོ, སབྦམྤི ཝཱིརིཡཾ། ཏཏྠ ཙཏུཀིཙྩསཱདྷཀཏོ ཨཉྙསྶ ནིཝཏྟནཏྠཾ པདྷཱནགྒཧཎནྟི པདྷཱནབྷཱུཏཱ སེཊྛབྷཱུཏཱཏི ཨཏྠོ།
‘‘Chandaṃ ce bhikkhu adhipatiṃ karitvā labhati samādhi’’ntiādi (vibha. 432) vacanato chandasamādhippadhānasaṅkhārasamannāgataṃ iddhipādaṃ bhāvetīti etthāpi chandādhipati samādhi chandasamādhīti adhipatisaddalopaṃ katvā samāso vuttoti viññāyati. Adhipatisaddatthadassanavaseneva pana ‘‘chandahetuko, chandādhiko vā samādhī’’ti sammohavinodaniyaṃ (vibha. aṭṭha. 431) vuttaṃ, tasmā idhāpi chandādhipati samādhi chandasamādhīti veditabbo. Taṃ pana chandaṃ vuttanayena saddhāsīsena dassento ‘‘saddhādhipateyyā cittekaggatā’’ti vuttaṃ. ‘‘Idaṃ padhāna’’nti vā vīriyaṃ vuttaṃ. Vīriyasaddāpekkhāsahitaṃ ekavacanena vatvā catubbidhassapi vīriyassa adhippetattā nibbattetabbadhammavibhāgena ca ‘‘ime saṅkhārā’’ti vuttaṃ. Tena padhānabhūtā saṅkhārāti evaṃ samāso veditabbo. Saṅkhatasaṅkhārādinivattanatthañcettha padhānaggahaṇaṃ. Atha vā taṃ taṃ visesaṃ saṅkharotīti saṅkhāro, sabbampi vīriyaṃ. Tattha catukiccasādhakato aññassa nivattanatthaṃ padhānaggahaṇanti padhānabhūtā seṭṭhabhūtāti attho.
ཝཱིརིཡིདྡྷིཔཱདནིདྡེསེ ‘‘ཝཱིརིཡསམཱདྷིཔྤདྷཱནསངྑཱརསམནྣཱགཏ’’ནྟི (ཝིབྷ॰ ༤༣༥) དྭིཀྑཏྟུཾ ཝཱིརིཡཾ ཨཱགཏཾ། ཏཏྠ པུརིམཾ སམཱདྷིཝིསེསནཾ ‘‘ཝཱིརིཡཱདྷིཔཏི སམཱདྷི ཝཱིརིཡསམཱདྷཱི’’ཏི, དུཏིཡཾ སམནྣཱགམངྒདསྶནཏྠཾ། དྭེ ཨེཝ ཧི སབྦཏྠ སམནྣཱགམངྒཱནི སམཱདྷི, པདྷཱནསངྑཱརོ ཙ། ཚནྡཱདཡོ སམཱདྷིཝིསེསནཱནི། པདྷཱནསངྑཱརོ པན པདྷཱནཝཙནེནེཝ ཝིསེསིཏོ, ན ཚནྡཱདཱིཧཱིཏི ན ཨིདྷ ཝཱིརིཡཱདྷིཔཏིཏཱ པདྷཱནསངྑཱརསྶ ཝུཏྟཱ ཧོཏི། ཝཱིརིཡཉྩ སམཱདྷིཾ ཝིསེསེཏྭཱ ཋིཏམེཝ སམནྣཱགམངྒཝསེན པདྷཱནསངྑཱརཝཙནེན ཝུཏྟནྟི ནཱཔི དྭཱིཧི ཝཱིརིཡེཧི སམནྣཱགམོ ཝུཏྟོ ཧོཏི། ཡསྨཱ པན ཚནྡཱདཱིཧི ཝིསིཊྛོ སམཱདྷི ཏཐཱ ཝིསིཊྛེནེཝ ཏེན སམྤཡུཏྟོ པདྷཱནསངྑཱརོ, སེསདྷམྨཱ ཙ, ཏསྨཱ སམཱདྷིཝིསེསནཱནཾ ཝསེན ‘‘ཙཏྟཱརོ ཨིདྡྷིཔཱདཱ’’ཏི ཝུཏྟཱ། ཝིསེསནབྷཱཝོ ཙ ཚནྡཱདཱིནཾ ཏཾཏཾཨཔསྶཡནཝསེན ཧོཏཱིཏི ཚནྡསམཱདྷི…པེ॰… ཨིདྡྷིཔཱདནྟི ཨེཏྠ ནིསྶཡཏྠེཔི པཱདསདྡེན ཨུཔཱཡཏྠེན ཚནྡཱདཱིནཾ ཨིདྡྷིཔཱདཏཱ ཝུཏྟཱ ཧོཏི། ཏཐཱ ཧི ཨབྷིདྷམྨེ ཨུཏྟརཙཱུལ༹བྷཱཛནཱིཡེ ‘‘ཙཏྟཱརོ ཨིདྡྷིཔཱདཱ ཚནྡིདྡྷིཔཱདོ’’ཏིཨཱདིནཱ (ཝིབྷ॰ ༤༥༧) ཚནྡཱདཱིནམེཝ ཨིདྡྷིཔཱདཏཱ ཝུཏྟཱ། པཉྷཱཔུཙྪཀེ ཙ ‘‘ཙཏྟཱརོ ཨིདྡྷིཔཱདཱ – ཨིདྷ བྷིཀྑུ ཚནྡསམཱདྷཱི’’ཏི (ཝིབྷ॰ ༤༦༢) ཨཱརབྷིཏྭཱཔི པུན ཚནྡཱདཱིནཾཡེཝ ཀུསལཱདིབྷཱཝོ ཝིབྷཏྟོ། ཨུཔཱཡིདྡྷིཔཱདདསྶནཏྠམེཝ ཧི ནིསྶཡིདྡྷིཔཱདདསྶནཾ ཀཏཾ། ཨཉྙཐཱ ཙཏུབྦིདྷཏཱཝ ན ཧོཏཱིཏི། ཨཡམེཏྠ པཱལི༹ཝསེན ཨཏྠཝིནིཙྪཡོ ཝེདིཏབྦོ།
Vīriyiddhipādaniddese ‘‘vīriyasamādhippadhānasaṅkhārasamannāgata’’nti (vibha. 435) dvikkhattuṃ vīriyaṃ āgataṃ. Tattha purimaṃ samādhivisesanaṃ ‘‘vīriyādhipati samādhi vīriyasamādhī’’ti, dutiyaṃ samannāgamaṅgadassanatthaṃ. Dve eva hi sabbattha samannāgamaṅgāni samādhi, padhānasaṅkhāro ca. Chandādayo samādhivisesanāni. Padhānasaṅkhāro pana padhānavacaneneva visesito, na chandādīhīti na idha vīriyādhipatitā padhānasaṅkhārassa vuttā hoti. Vīriyañca samādhiṃ visesetvā ṭhitameva samannāgamaṅgavasena padhānasaṅkhāravacanena vuttanti nāpi dvīhi vīriyehi samannāgamo vutto hoti. Yasmā pana chandādīhi visiṭṭho samādhi tathā visiṭṭheneva tena sampayutto padhānasaṅkhāro, sesadhammā ca, tasmā samādhivisesanānaṃ vasena ‘‘cattāro iddhipādā’’ti vuttā. Visesanabhāvo ca chandādīnaṃ taṃtaṃapassayanavasena hotīti chandasamādhi…pe… iddhipādanti ettha nissayatthepi pādasaddena upāyatthena chandādīnaṃ iddhipādatā vuttā hoti. Tathā hi abhidhamme uttaracūḷabhājanīye ‘‘cattāro iddhipādā chandiddhipādo’’tiādinā (vibha. 457) chandādīnameva iddhipādatā vuttā. Pañhāpucchake ca ‘‘cattāro iddhipādā – idha bhikkhu chandasamādhī’’ti (vibha. 462) ārabhitvāpi puna chandādīnaṃyeva kusalādibhāvo vibhatto. Upāyiddhipādadassanatthameva hi nissayiddhipādadassanaṃ kataṃ. Aññathā catubbidhatāva na hotīti. Ayamettha pāḷivasena atthavinicchayo veditabbo.
ཏདངྒསམུཙྪེདནིསྶརཎཝིཝེཀནིསྶིཏཏྟཾ ཝཏྭཱ པཊིཔྤསྶདྡྷིཝིཝེཀནིསྶིཏསྶ ཨཝཙནཾ ‘‘ཚནྡསམཱདྷི…པེ॰… ཨིདྡྷིཔཱདཾ བྷཱཝེཏཱི’’ཏི (ཝིབྷ॰ ༤༣༢) བྷཱཝེཏབྦཱནཾ ཨིདྡྷིཔཱདཱནཾ ཝུཏྟཏྟཱ། བྷཱཝིཏིདྡྷིཔཱདསྶ ཧི སཙྪིཀཱཏབྦཱ ཕལཔརིཡཱཔནྣཱ ཨིདྡྷིཔཱདཱཏི།
Tadaṅgasamucchedanissaraṇavivekanissitattaṃ vatvā paṭippassaddhivivekanissitassa avacanaṃ ‘‘chandasamādhi…pe… iddhipādaṃ bhāvetī’’ti (vibha. 432) bhāvetabbānaṃ iddhipādānaṃ vuttattā. Bhāvitiddhipādassa hi sacchikātabbā phalapariyāpannā iddhipādāti.
ཝོསྶགྒསདྡོ པརིཙྩཱགཏྠོ, པཀྑནྡནཏྠོ ཙཱཏི ཝོསྶགྒསྶ དུཝིདྷཏཱ ཝུཏྟཱ། ཡཐཱཝུཏྟེན པཀཱརེནཱཏི ཏདངྒསམུཙྪེདཔྤཀཱརེན, ཏནྣིནྣབྷཱཝཱརམྨཎཔྤཀཱརེན ཙ། པརིཎམནྟཾ ཝིཔསྶནཀྑཎེ།
Vossaggasaddo pariccāgattho, pakkhandanattho cāti vossaggassa duvidhatā vuttā. Yathāvuttena pakārenāti tadaṅgasamucchedappakārena, tanninnabhāvārammaṇappakārena ca. Pariṇamantaṃ vipassanakkhaṇe.
༡༤. པུབྦབྷཱགཔཉྙཱཡཱཏི ཨེཀཱཝཛྫནནཱནཱཝཛྫནཝཱིཐཱིསུ པཝཏྟཨུཔཙཱརཔཉྙཱཡ། ཨདྷིགམཔཉྙཱཡཱཏི ཨཔྤནཱཔཉྙཱཡ། པུན པུབྦབྷཱགཔཉྙཱཡཱཏི ནཱནཱཝཛྫནུཔཙཱརཔཉྙཱཡ, པཊིསནྡྷིཔཉྙཱཡ ཝཱ། ཨུཔཙཱརཔཉྙཱཡཱཏི ཨེཀཱཝཛྫནེ, སབྦཏྠ ཝཱ པཝཏྟཨུཔཙཱརཔཉྙཱཡ།
14.Pubbabhāgapaññāyāti ekāvajjananānāvajjanavīthīsu pavattaupacārapaññāya. Adhigamapaññāyāti appanāpaññāya. Puna pubbabhāgapaññāyāti nānāvajjanupacārapaññāya, paṭisandhipaññāya vā. Upacārapaññāyāti ekāvajjane, sabbattha vā pavattaupacārapaññāya.
པུཙྪཱཝིསྶཛྫནཝིཙཡོཔཱིཏི ཡཐཱཝུཏྟཱཡ པུཙྪཱཡ ཝིསྶཛྫནཝིཙཡོཔི། ཝུཏྟནཡཱནུསཱརེནཱཏི ཨདིཊྛཛོཏནཱ, ཝིམཏིཙྪེདནཱ ཙཱཏི ཧེཊྛཱ ཝུཏྟནཡཱནུགམནེན།
Pucchāvissajjanavicayopīti yathāvuttāya pucchāya vissajjanavicayopi. Vuttanayānusārenāti adiṭṭhajotanā, vimaticchedanā cāti heṭṭhā vuttanayānugamanena.
༡༥. སེཁེ ཨསེཁེཏི སེཀྑེ ཨརིཡཔུགྒལེ, ཨསེཀྑེ ཨརིཡཔུགྒལེ། ཝིཔསྶནཱཔུབྦངྒམཔྤཧཱནེཏི ཝིཔསྶནཾ པུརེཙཱརིཀཾ ཀཏྭཱ པཝཏྟཀིལེསཔྤཧཱནེ, པཧཱནཱབྷིསམཡེཏི ཨཏྠོ།
15.Sekheasekheti sekkhe ariyapuggale, asekkhe ariyapuggale. Vipassanāpubbaṅgamappahāneti vipassanaṃ purecārikaṃ katvā pavattakilesappahāne, pahānābhisamayeti attho.
‘‘ཡཾ ཨནིཙྩཾ དུཀྑཾ ཨནཏྟཱ’’ཏི པཱལི༹ཾ དསྶེཏྭཱ པུན ‘‘ཡཾ ཨནིཙྩེ དུཀྑེ ཨནཏྟནཱི’’ཏི ཝཙནཾ ཨེཝམྤེཏྠ པཋནྟཱིཏི དསྶེཏུཾ།
‘‘Yaṃ aniccaṃ dukkhaṃ anattā’’ti pāḷiṃ dassetvā puna ‘‘yaṃ anicce dukkhe anattanī’’ti vacanaṃ evampettha paṭhantīti dassetuṃ.
སེསསཾཀིལེསཝོདཱནདྷམྨཱཏི གེདྷཏོ ཨཝསིཊྛསཾཀིལེསདྷམྨཱ ཙ སབྦཝོདཱནདྷམྨཱ ཙ། ཨབྷཱཝེནཱཏི ཨབྷཱཝནེན ཨབྷཱཝཀརཎེན།
Sesasaṃkilesavodānadhammāti gedhato avasiṭṭhasaṃkilesadhammā ca sabbavodānadhammā ca. Abhāvenāti abhāvanena abhāvakaraṇena.
པཡོགཔརཀྐམནྟི བྷུསཾ ཡོགོ པཡོགོ, པཡོགོཝ པརཀྐམོ པཡོགཔརཀྐམོ, ཙིཏྟཾ། ཨུཀྑིཔཏཱིཏི ཀོསཛྫཔཀྑེ པཏིཏུཾ ཨདེནྟོ ཀུསལཔཀྑེ ཨུདྡྷཾ ཁིཔེནྟོ ཝིཡ པཝཏྟཏི། པདྷཱནཝཱིརིཡནྟི ཨཀུསལཱནཾ ཨནུཔྤཱདནཊྛེན ཨུཏྟམཝཱིརིཡཾ། ཡོཛེཏབྦཱནཱིཏི ‘‘ཨཱསེཝམཱནོ ཝཱཡམཏཱི’’ཏིཨཱདིནཱ ཡོཛེཏབྦཱནི། ཨནུཔྤནྣཱཏི ཨཝཏྟབྦཏཾ ཨཱཔནྣཱནནྟི བྷཱུམིལདྡྷཱརམྨཎཱདྷིགྒཧིཏཱཝིཀྑམྦྷིཏཱསམུགྒྷཱཊིཏུཔྤནྣཱནཾ།
Payogaparakkamanti bhusaṃ yogo payogo, payogova parakkamo payogaparakkamo, cittaṃ. Ukkhipatīti kosajjapakkhe patituṃ adento kusalapakkhe uddhaṃ khipento viya pavattati. Padhānavīriyanti akusalānaṃ anuppādanaṭṭhena uttamavīriyaṃ. Yojetabbānīti ‘‘āsevamāno vāyamatī’’tiādinā yojetabbāni. Anuppannāti avattabbataṃ āpannānanti bhūmiladdhārammaṇādhiggahitāvikkhambhitāsamugghāṭituppannānaṃ.
༡༦. ‘‘ཨཊྛམཀསྶ ཨིནྡྲིཡཱནཱི’’ཏི ཝུཏྟཏྟཱ ‘‘པཋམམགྒེ སདྡྷཱདཡོ’’ཏིཨཱདི ཝུཏྟཾ། ཨིནྡྲིཡགྒཧཎཉྩ པཱལི༹ཡཾ ནིདསྶནམཏྟཾ དཊྛབྦཾ།
16. ‘‘Aṭṭhamakassa indriyānī’’ti vuttattā ‘‘paṭhamamagge saddhādayo’’tiādi vuttaṃ. Indriyaggahaṇañca pāḷiyaṃ nidassanamattaṃ daṭṭhabbaṃ.
ཨསུབྷཱནུཔསྶནཱ ཀཱཡཱནུཔསྶནཱསཏིཔཊྛཱནནྟི ཨཱཧ ‘‘སཏིཔཊྛཱནབྷཱཝནཱཡ སུནིགྒཧིཏོ ཀཱམཝིཏཀྐོ’’ཏི། སམཱདྷི ཨུཔྤཛྫམཱནོ ཀཱམཝིཏཀྐམྤི ནིགྒཧེཏྭཱ ཨེཝ ཨུཔྤཛྫཏཱིཏི དསྶེནྟོ ‘‘ཨནཝཛྫསུཁཔདཊྛཱནེནཱ’’ཏིཨཱདིམཱཧ། ‘‘ཀུསལེསུ དྷམྨེསུ ཨཱརདྡྷཝཱིརིཡོ’’ཏིཨཱདིནཱ དྷམྨཙྪནྡཏོ ཨུཔྤཛྫམཱནོ ཝཱིརིཡཙྪནྡོ ཁནྟིཾ པརིབྲཱུཧེཏཱིཏི དསྶེཏི། ཨནཝཛྫདྷམྨཱནཾ ཨུཔཀཱརཀདྷམྨཱསེཝནཾ ཝིཡ ཨནུཔཀཱརཀདྷམྨཔརིཝཛྫནམྤི པཉྙཱནིསེཝནེནེཝ ཧོཏཱིཏི ཨཱཧ ‘‘སམཱདྷིཨཱདཱིན’’ནྟིཨཱདི།
Asubhānupassanā kāyānupassanāsatipaṭṭhānanti āha ‘‘satipaṭṭhānabhāvanāya suniggahito kāmavitakko’’ti. Samādhi uppajjamāno kāmavitakkampi niggahetvā eva uppajjatīti dassento ‘‘anavajjasukhapadaṭṭhānenā’’tiādimāha. ‘‘Kusalesu dhammesu āraddhavīriyo’’tiādinā dhammacchandato uppajjamāno vīriyacchando khantiṃ paribrūhetīti dasseti. Anavajjadhammānaṃ upakārakadhammāsevanaṃ viya anupakārakadhammaparivajjanampi paññānisevaneneva hotīti āha ‘‘samādhiādīna’’ntiādi.
༡༧. སབྦདྷམྨཱདྷིཊྛཱནཾ དེསནཾ པུགྒལཱདྷིཊྛཱནེན ཝིབྷཛིཏུཾ ‘‘ལོཀོ ནཱམཱ’’ཏིཨཱདི ཝུཏྟནྟི དསྶེནྟོ ‘‘སབྦདྷམྨཱནནྟི…པེ॰… དསྶེཏུ’’ནྟི ཨཱཧ། མཧགྒཏདྷམྨེསུ ཋཱནཾ ཏཾསམྤཱདནཱཝ། ཏཐཱ སེསེསུ། ཝཌྜྷིཡམཱནེསཱུཏི ཡཐཱ ཝིམུཏྟིཾ པརིཔཱཙཡནྟི, ཨེཝཾ བྲཱུཧིཡམཱནེསུ།
17. Sabbadhammādhiṭṭhānaṃ desanaṃ puggalādhiṭṭhānena vibhajituṃ ‘‘loko nāmā’’tiādi vuttanti dassento ‘‘sabbadhammānanti…pe… dassetu’’nti āha. Mahaggatadhammesu ṭhānaṃ taṃsampādanāva. Tathā sesesu. Vaḍḍhiyamānesūti yathā vimuttiṃ paripācayanti, evaṃ brūhiyamānesu.
དསྶནཔརིཉྙཱཏི རཱུཔཱརཱུཔདྷམྨཱནཾ སལཀྑཎཏོ, པཙྩཡཏོ ཙ པརིཛཱནནཱ། ཏེནཱཧ ‘‘ཉཱཏཔརིཉྙཱ’’ཏི། པཊིཔཀྑཝིདྷམནེན སདྡྷིཾ ལཀྑཎཏྟཡཝིབྷཱཝནཱ ཨིདྷ ‘‘བྷཱཝནཱཔརིཉྙཱ’’ཏི ཨདྷིཔྤེཏཱཏི ཨཱཧ ‘‘བྷཱཝནཱ…པེ॰… པརིཉྙཱ ཙཱ’’ཏི ། དསྶནཏྠཱ པརིཉྙཱ དསྶནཔརིཉྙཱ, བྷཱཝནཏྠཱ པརིཉྙཱ བྷཱཝནཱཔརིཉྙཱཏི ཨེཝཾ ཝཱ ཨེཏྠ ཨཏྠོ དཊྛབྦོ།
Dassanapariññāti rūpārūpadhammānaṃ salakkhaṇato, paccayato ca parijānanā. Tenāha ‘‘ñātapariññā’’ti. Paṭipakkhavidhamanena saddhiṃ lakkhaṇattayavibhāvanā idha ‘‘bhāvanāpariññā’’ti adhippetāti āha ‘‘bhāvanā…pe… pariññā cā’’ti . Dassanatthā pariññā dassanapariññā, bhāvanatthā pariññā bhāvanāpariññāti evaṃ vā ettha attho daṭṭhabbo.
ཀཀྑལ༹ཕུསནཱདཱིཏི ཀཀྑལཱ༹དིཕུསནཱདི། ཨབྷིཛཱནིཏྭཱཏི ཨབྷིཉྙཱཡ པཉྙཱཡ ཛཱནིཏྭཱ, ཋིཏསྶ ཨབྷིཛཱནནཧེཏུ ཝཱཏི ཨཏྠོ། ཨཏྠོཏི ཕལཾ། ནཡོཏི ཝུཏྟནཡོ།
Kakkhaḷaphusanādīti kakkhaḷādiphusanādi. Abhijānitvāti abhiññāya paññāya jānitvā, ṭhitassa abhijānanahetu vāti attho. Atthoti phalaṃ. Nayoti vuttanayo.
‘‘ཡཾ ཨསངྑཏ’’ནྟིཔི པཋནྟི། ཙཏུནཡཀོཝིདོཏི ཨེཀཏྟནཱནཏྟཱདིནཡཙཏུཀྐེ ནིཔུཎོ། དེསནཱཡུཏྟིཀུསལོཏི དྷམྨཱནཾ དེསནཱཝིདྷིམྷི ཀུསལོ།
‘‘Yaṃ asaṅkhata’’ntipi paṭhanti. Catunayakovidoti ekattanānattādinayacatukke nipuṇo. Desanāyuttikusaloti dhammānaṃ desanāvidhimhi kusalo.
སདིསཱི ཀཱཏབྦཱ སཾསནྡནཝསེནཱཏི ཨདྷིཔྤཱཡོ། ཨཱནེཏབྦཱ ‘‘ཨཡཾ དེསནཱ ཨིམཱཡ དེསནཱཡ ཨེཝཾ སཾསནྡཏཱི’’ཏི། ཨཏྠཏོ ཨཔེཏནྟི ཨཡུཏྟཏྠཾ། ཨསམྦནྡྷཏྠནྟི ཨཉྙམཉྙཾ ཨསམྦནྡྷཔདཏྠཾ། ནནུ པཊྛཱནཝིཙཱརོ ནཡཝིཙཱརོ ཝིཡ ཧཱརེཧི ཨསམྨིསྶོ ཝིཙཱརཎནྟརོཏི ཙོདནཾ མནསི ཀཏྭཱ ཨཱཧ ‘‘ཡསྨཱ པནཱ’’ཏིཨཱདི། ཨིདྷ ནིཀྑིཏྟོཏི ཨིདྷ སུཏྟཝིཙཡེ སུཏྟཏྠཝིཙཱརབྷཱཝཏོ ནིཀྑིཏྟོ, ཨེཏེན ཝཱ པཊྛཱནསྶ ཧཱརནྟོགདྷབྷཱཝདསྶནེནེཝ མཱུལཔདཱནཾ ཝིཡ པཊྛཱནསྶ པདཏྠནྟརཱབྷཱཝོ དསྶིཏོཏི ཝེདིཏབྦཾ།
Sadisī kātabbā saṃsandanavasenāti adhippāyo. Ānetabbā ‘‘ayaṃ desanā imāya desanāya evaṃ saṃsandatī’’ti. Atthato apetanti ayuttatthaṃ. Asambandhatthanti aññamaññaṃ asambandhapadatthaṃ. Nanu paṭṭhānavicāro nayavicāro viya hārehi asammisso vicāraṇantaroti codanaṃ manasi katvā āha ‘‘yasmā panā’’tiādi. Idha nikkhittoti idha suttavicaye suttatthavicārabhāvato nikkhitto, etena vā paṭṭhānassa hārantogadhabhāvadassaneneva mūlapadānaṃ viya paṭṭhānassa padatthantarābhāvo dassitoti veditabbaṃ.
ཨིམསྶ སུཏྟསྶཱཏི སཾཝཎྞིཡམཱནསུཏྟཾ སནྡྷཱཡཱཧ། ཀསྨིཾ ཝཱ པདེཏི སཾཝཎྞིཡམཱནཾ གཱཐཾ སནྡྷཱཡཱཧ། ཏབྦིཙཡེནཱཏི པུཙྪཱདིཝིཙཡེན, ཨསྶཱདཱདིཝིཙཡེན ཙ།
Imassa suttassāti saṃvaṇṇiyamānasuttaṃ sandhāyāha. Kasmiṃ vā padeti saṃvaṇṇiyamānaṃ gāthaṃ sandhāyāha. Tabbicayenāti pucchādivicayena, assādādivicayena ca.
ཝིཙཡཧཱརཝིབྷངྒཝཎྞནཱ ནིཊྛིཏཱ།
Vicayahāravibhaṅgavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / ཁུདྡཀནིཀཱཡ • Khuddakanikāya / ནེཏྟིཔྤཀརཎཔཱལི༹ • Nettippakaraṇapāḷi / ༢. ཝིཙཡཧཱརཝིབྷངྒོ • 2. Vicayahāravibhaṅgo
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཁུདྡཀནིཀཱཡ (ཨཊྛཀཐཱ) • Khuddakanikāya (aṭṭhakathā) / ནེཏྟིཔྤཀརཎ-ཨཊྛཀཐཱ • Nettippakaraṇa-aṭṭhakathā / ༢. ཝིཙཡཧཱརཝིབྷངྒཝཎྞནཱ • 2. Vicayahāravibhaṅgavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཁུདྡཀནིཀཱཡ (ཊཱིཀཱ) • Khuddakanikāya (ṭīkā) / ནེཏྟིཝིབྷཱཝིནཱི • Nettivibhāvinī / ༢. ཝིཙཡཧཱརཝིབྷངྒཝིབྷཱཝནཱ • 2. Vicayahāravibhaṅgavibhāvanā
