| Library / Tipiṭaka / তিপিটক • Tipiṭaka / নেত্তিপ্পকরণপাল়ি • Nettippakaraṇapāḷi |
২. ৰিচযহারৰিভঙ্গো
2. Vicayahāravibhaṅgo
১১. তত্থ কতমো ৰিচযো হারো? ‘‘যং পুচ্ছিতঞ্চ ৰিস্সজ্জিতঞ্চা’’তি গাথা, অযং ৰিচযো হারো।
11. Tattha katamo vicayo hāro? ‘‘Yaṃ pucchitañca vissajjitañcā’’ti gāthā, ayaṃ vicayo hāro.
কিং ৰিচিনতি? পদং ৰিচিনতি, পঞ্হং ৰিচিনতি, ৰিসজ্জনং 1 ৰিচিনতি, পুব্বাপরং ৰিচিনতি, অস্সাদং ৰিচিনতি, আদীনৰং ৰিচিনতি, নিস্সরণং ৰিচিনতি, ফলং ৰিচিনতি, উপাযং ৰিচিনতি, আণত্তিং ৰিচিনতি, অনুগীতিং ৰিচিনতি, সব্বে নৰ সুত্তন্তে ৰিচিনতি। যথা কিং ভৰে, যথা আযস্মা অজিতো পারাযনে ভগৰন্তং পঞ্হং পুচ্ছতি –
Kiṃ vicinati? Padaṃ vicinati, pañhaṃ vicinati, visajjanaṃ 2 vicinati, pubbāparaṃ vicinati, assādaṃ vicinati, ādīnavaṃ vicinati, nissaraṇaṃ vicinati, phalaṃ vicinati, upāyaṃ vicinati, āṇattiṃ vicinati, anugītiṃ vicinati, sabbe nava suttante vicinati. Yathā kiṃ bhave, yathā āyasmā ajito pārāyane bhagavantaṃ pañhaṃ pucchati –
কেনস্সু নপ্পকাসতি।
Kenassu nappakāsati;
কিস্সাভিলেপনং ব্রূসি, কিং সু তস্স মহব্ভয’’ন্তি॥
Kissābhilepanaṃ brūsi, kiṃ su tassa mahabbhaya’’nti.
ইমানি চত্তারি পদানি পুচ্ছিতানি, সো একো পঞ্হো। কস্মা? একৰত্থু পরিগ্গহা, এৰঞ্হি আহ ‘‘কেনস্সু নিৰুতো লোকো’’তি লোকাধিট্ঠানং পুচ্ছতি, ‘‘কেনস্সু নপ্পকাসতী’’তি লোকস্স অপ্পকাসনং পুচ্ছতি, ‘‘কিস্সাভিলেপনং ব্রূসী’’তি লোকস্স অভিলেপনং পুচ্ছতি, ‘‘কিংসু তস্স মহব্ভয’’ন্তি তস্সেৰ লোকস্স মহাভযং পুচ্ছতি। লোকো তিৰিধো কিলেসলোকো ভৰলোকো ইন্দ্রিযলোকো।
Imāni cattāri padāni pucchitāni, so eko pañho. Kasmā? Ekavatthu pariggahā, evañhi āha ‘‘kenassu nivuto loko’’ti lokādhiṭṭhānaṃ pucchati, ‘‘kenassu nappakāsatī’’ti lokassa appakāsanaṃ pucchati, ‘‘kissābhilepanaṃ brūsī’’ti lokassa abhilepanaṃ pucchati, ‘‘kiṃsu tassa mahabbhaya’’nti tasseva lokassa mahābhayaṃ pucchati. Loko tividho kilesaloko bhavaloko indriyaloko.
তত্থ ৰিসজ্জনা –
Tattha visajjanā –
‘‘অৰিজ্জায নিৰুতো লোকো, [অজিতাতি ভগৰা,]
‘‘Avijjāya nivuto loko, [ajitāti bhagavā,]
জপ্পাভিলেপনং ব্রূমি, দুক্খমস্স মহব্ভয’’ন্তি॥
Jappābhilepanaṃ brūmi, dukkhamassa mahabbhaya’’nti.
ইমানি চত্তারি পদানি ইমেহি চতূহি পদেহি ৰিসজ্জিতানি পঠমং পঠমেন, দুতিযং দুতিযেন, ততিযং ততিযেন, চতুত্থং চতুত্থেন।
Imāni cattāri padāni imehi catūhi padehi visajjitāni paṭhamaṃ paṭhamena, dutiyaṃ dutiyena, tatiyaṃ tatiyena, catutthaṃ catutthena.
‘‘কেনস্সু নিৰুতো লোকো’’তি পঞ্হে ‘‘অৰিজ্জায নিৰুতো লোকো’’তি ৰিসজ্জনা। নীৰরণেহি নিৰুতো লোকো, অৰিজ্জানীৰরণা হি সব্বে সত্তা। যথাহ ভগৰা ‘‘সব্বসত্তানং, ভিক্খৰে, সব্বপাণানং সব্বভূতানং পরিযাযতো একমেৰ নীৰরণং ৰদামি যদিদং অৰিজ্জা, অৰিজ্জানীৰরণা হি সব্বে সত্তা। সব্বসোৰ, ভিক্খৰে, অৰিজ্জায নিরোধা চাগা পটিনিস্সগ্গা নত্থি সত্তানং নীৰরণন্তি ৰদামী’’তি। তেন চ পঠমস্স পদস্স ৰিসজ্জনা যুত্তা।
‘‘Kenassu nivuto loko’’ti pañhe ‘‘avijjāya nivuto loko’’ti visajjanā. Nīvaraṇehi nivuto loko, avijjānīvaraṇā hi sabbe sattā. Yathāha bhagavā ‘‘sabbasattānaṃ, bhikkhave, sabbapāṇānaṃ sabbabhūtānaṃ pariyāyato ekameva nīvaraṇaṃ vadāmi yadidaṃ avijjā, avijjānīvaraṇā hi sabbe sattā. Sabbasova, bhikkhave, avijjāya nirodhā cāgā paṭinissaggā natthi sattānaṃ nīvaraṇanti vadāmī’’ti. Tena ca paṭhamassa padassa visajjanā yuttā.
‘‘কেনস্সু নপ্পকাসতী’’তি পঞ্হে ‘‘ৰিৰিচ্ছা পমাদা নপ্পকাসতী’’তি ৰিসজ্জনা। যো পুগ্গলো নীৰরণেহি নিৰুতো, সো ৰিৰিচ্ছতি। ৰিৰিচ্ছা নাম ৰুচ্চতি ৰিচিকিচ্ছা। সো ৰিচিকিচ্ছন্তো নাভিসদ্দহতি, ন অভিসদ্দহন্তো ৰীরিযং নারভতি অকুসলানং ধম্মানং পহানায কুসলানং ধম্মানং সচ্ছিকিরিযায। সো ইধপ্পমাদমনুযুত্তো ৰিহরতি পমত্তো, সুক্কে ধম্মে ন উপ্পাদিযতি, তস্স তে অনুপ্পাদিযমানা নপ্পকাসন্তি, যথাহ ভগৰা –
‘‘Kenassu nappakāsatī’’ti pañhe ‘‘vivicchā pamādā nappakāsatī’’ti visajjanā. Yo puggalo nīvaraṇehi nivuto, so vivicchati. Vivicchā nāma vuccati vicikicchā. So vicikicchanto nābhisaddahati, na abhisaddahanto vīriyaṃ nārabhati akusalānaṃ dhammānaṃ pahānāya kusalānaṃ dhammānaṃ sacchikiriyāya. So idhappamādamanuyutto viharati pamatto, sukke dhamme na uppādiyati, tassa te anuppādiyamānā nappakāsanti, yathāha bhagavā –
অসন্তেত্থ ন দিস্সন্তি, রত্তিং খিত্তা 9 যথা সরা।
Asantettha na dissanti, rattiṃ khittā 10 yathā sarā;
তে গুণেহি পকাসন্তি, কিত্তিযা চ যসেন চা’’তি॥
Te guṇehi pakāsanti, kittiyā ca yasena cā’’ti.
তেন চ দুতিযস্স পদস্স ৰিসজ্জনা যুত্তা।
Tena ca dutiyassa padassa visajjanā yuttā.
‘‘কিস্সাভিলেপনং ব্রূসী’’তি পঞ্হে ‘‘জপ্পাভিলেপনং ব্রূমী’’তি ৰিসজ্জনা। জপ্পা নাম ৰুচ্চতি তণ্হা। সা কথং অভিলিম্পতি? যথাহ ভগৰা –
‘‘Kissābhilepanaṃ brūsī’’ti pañhe ‘‘jappābhilepanaṃ brūmī’’ti visajjanā. Jappā nāma vuccati taṇhā. Sā kathaṃ abhilimpati? Yathāha bhagavā –
‘‘রত্তো অত্থং ন জানাতি, রত্তো ধম্মং ন পস্সতি।
‘‘Ratto atthaṃ na jānāti, ratto dhammaṃ na passati;
সাযং তণ্হা আসত্তিবহুলস্স পুগ্গলস্স ‘‘এৰং অভিজপ্পা’’তি করিত্ৰা তত্থ লোকো অভিলিত্তো নাম ভৰতি, তেন চ ততিযস্স পদস্স ৰিসজ্জনা যুত্তা।
Sāyaṃ taṇhā āsattibahulassa puggalassa ‘‘evaṃ abhijappā’’ti karitvā tattha loko abhilitto nāma bhavati, tena ca tatiyassa padassa visajjanā yuttā.
‘‘কিং সু তস্স মহব্ভয’’ন্তি পঞ্হে ‘‘দুক্খমস্স মহব্ভয’’ন্তি ৰিসজ্জনা। দুৰিধং দুক্খং – কাযিকঞ্চ চেতসিকঞ্চ। যং কাযিকং ইদং দুক্খং, যং চেতসিকং ইদং দোমনস্সং। সব্বে সত্তা হি দুক্খস্স উব্বিজ্জন্তি, নত্থি ভযং দুক্খেন সমসমং, কুতো ৰা পন তস্স উত্তরিতরং? তিস্সো দুক্খতা – দুক্খদুক্খতা সঙ্খারদুক্খতা ৰিপরিণামদুক্খতা। তত্থ লোকো ওধসো কদাচি করহচি দুক্খদুক্খতায মুচ্চতি। তথা ৰিপরিণামদুক্খতায। তং কিস্স হেতু? হোন্তি লোকে অপ্পাবাধাপি দীঘাযুকাপি। সঙ্খারদুক্খতায পন লোকো অনুপাদিসেসায নিব্বানধাতুযা মুচ্চতি, তস্মা সঙ্খারদুক্খতা দুক্খং লোকস্সাতি কত্ৰা দুক্খমস্স মহব্ভযন্তি। তেন চ চতুত্থস্স পদস্স ৰিসজ্জনা যুত্তা। তেনাহ ভগৰা ‘‘অৰিজ্জায নিৰুতো লোকো’’তি।
‘‘Kiṃ su tassa mahabbhaya’’nti pañhe ‘‘dukkhamassa mahabbhaya’’nti visajjanā. Duvidhaṃ dukkhaṃ – kāyikañca cetasikañca. Yaṃ kāyikaṃ idaṃ dukkhaṃ, yaṃ cetasikaṃ idaṃ domanassaṃ. Sabbe sattā hi dukkhassa ubbijjanti, natthi bhayaṃ dukkhena samasamaṃ, kuto vā pana tassa uttaritaraṃ? Tisso dukkhatā – dukkhadukkhatā saṅkhāradukkhatā vipariṇāmadukkhatā. Tattha loko odhaso kadāci karahaci dukkhadukkhatāya muccati. Tathā vipariṇāmadukkhatāya. Taṃ kissa hetu? Honti loke appābādhāpi dīghāyukāpi. Saṅkhāradukkhatāya pana loko anupādisesāya nibbānadhātuyā muccati, tasmā saṅkhāradukkhatā dukkhaṃ lokassāti katvā dukkhamassa mahabbhayanti. Tena ca catutthassa padassa visajjanā yuttā. Tenāha bhagavā ‘‘avijjāya nivuto loko’’ti.
সৰন্তি সব্বধি সোতা, [ইচ্চাযস্মা অজিতো,]
Savanti sabbadhi sotā, [iccāyasmā ajito,]
সোতানং কিং নিৰারণং।
Sotānaṃ kiṃ nivāraṇaṃ;
ইমানি চত্তারি পদানি পুচ্ছিতানি। তে দ্ৰে পঞ্হা। কস্মা? ইমেহি বত্ৰাধিৰচনেন পুচ্ছিতা। এৰং সমাপন্নস্স লোকস্স এৰং সংকিলিট্ঠস্স কিং লোকস্স ৰোদানং ৰুট্ঠানমিতি, এৰঞ্হি আহ।
Imāni cattāri padāni pucchitāni. Te dve pañhā. Kasmā? Imehi batvādhivacanena pucchitā. Evaṃ samāpannassa lokassa evaṃ saṃkiliṭṭhassa kiṃ lokassa vodānaṃ vuṭṭhānamiti, evañhi āha.
সৰন্তি সব্বধি সোতাতি। অসমাহিতস্স সৰন্তি অভিজ্ঝাব্যাপাদপ্পমাদবহুলস্স। তত্থ যা অভিজ্ঝা অযং লোভো অকুসলমূলং, যো ব্যাপাদো অযং দোসো অকুসলমূলং, যো পমাদো অযং মোহো অকুসলমূলং। তস্সেৰং অসমাহিতস্স ছসু আযতনেসু তণ্হা সৰন্তি রূপতণ্হা সদ্দতণ্হা গন্ধতণ্হা রসতণ্হা ফোট্ঠব্বতণ্হা ধম্মতণ্হা, যথাহ ভগৰা –
Savantisabbadhi sotāti. Asamāhitassa savanti abhijjhābyāpādappamādabahulassa. Tattha yā abhijjhā ayaṃ lobho akusalamūlaṃ, yo byāpādo ayaṃ doso akusalamūlaṃ, yo pamādo ayaṃ moho akusalamūlaṃ. Tassevaṃ asamāhitassa chasu āyatanesu taṇhā savanti rūpataṇhā saddataṇhā gandhataṇhā rasataṇhā phoṭṭhabbataṇhā dhammataṇhā, yathāha bhagavā –
‘‘সৰতী’’তি চ খো, ভিক্খৰে, ছন্নেতং অজ্ঝত্তিকানং আযতনানং অধিৰচনং। চক্খু সৰতি মনাপিকেসু রূপেসু, অমনাপিকেসু 15 পটিহঞ্ঞতীতি। সোতং…পে॰… ঘানং… জিৰ্হা… কাযো… মনো সৰতি মনাপিকেসু ধম্মেসু অমনাপিকেসু পটিহঞ্ঞতীতি। ইতি সব্বা চ সৰতি, সব্বথা চ সৰতি। তেনাহ ‘‘সৰন্তি সব্বধি সোতা’’তি।
‘‘Savatī’’ti ca kho, bhikkhave, channetaṃ ajjhattikānaṃ āyatanānaṃ adhivacanaṃ. Cakkhu savati manāpikesu rūpesu, amanāpikesu 16 paṭihaññatīti. Sotaṃ…pe… ghānaṃ… jivhā… kāyo… mano savati manāpikesu dhammesu amanāpikesu paṭihaññatīti. Iti sabbā ca savati, sabbathā ca savati. Tenāha ‘‘savanti sabbadhi sotā’’ti.
‘‘সোতানং কিং নিৰারণ’’ন্তি পরিযুট্ঠানৰিঘাতং পুচ্ছতি, ইদং ৰোদানং। ‘‘সোতানং সংৰরং ব্রূহি, কেন সোতা পিধীযরে’’তি অনুসযসমুগ্ঘাতং পুচ্ছতি, ইদং ৰুট্ঠানং।
‘‘Sotānaṃ kiṃ nivāraṇa’’nti pariyuṭṭhānavighātaṃ pucchati, idaṃ vodānaṃ. ‘‘Sotānaṃ saṃvaraṃ brūhi, kena sotā pidhīyare’’ti anusayasamugghātaṃ pucchati, idaṃ vuṭṭhānaṃ.
তত্থ ৰিসজ্জনা –
Tattha visajjanā –
‘‘যানি সোতানি লোকস্মিং, [অজিতাতি ভগৰা,]
‘‘Yāni sotāni lokasmiṃ, [ajitāti bhagavā,]
সতি তেসং নিৰারণং।
Sati tesaṃ nivāraṇaṃ;
সোতানং সংৰরং ব্রূমি, পঞ্ঞাযেতে পিধীযরে’’তি॥
Sotānaṃ saṃvaraṃ brūmi, paññāyete pidhīyare’’ti.
কাযগতায সতিযা ভাৰিতায বহুলীকতায চক্খু নাৰিঞ্ছতি মনাপিকেসু রূপেসু, অমনাপিকেসু ন পটিহঞ্ঞতি, সোতং…পে॰… ঘানং… জিৰ্হা… কাযো… মনো নাৰিঞ্ছতি মনাপিকেসু ধম্মেসু, অমনাপিকেসু ন পটিহঞ্ঞতি। কেন কারণেন? সংৰুতনিৰারিতত্তা ইন্দ্রিযানং । কেন তে সংৰুতনিৰারিতা? সতিআরক্খেন। তেনাহ ভগৰা – ‘‘সতি তেসং নিৰারণ’’ন্তি।
Kāyagatāya satiyā bhāvitāya bahulīkatāya cakkhu nāviñchati manāpikesu rūpesu, amanāpikesu na paṭihaññati, sotaṃ…pe… ghānaṃ… jivhā… kāyo… mano nāviñchati manāpikesu dhammesu, amanāpikesu na paṭihaññati. Kena kāraṇena? Saṃvutanivāritattā indriyānaṃ . Kena te saṃvutanivāritā? Satiārakkhena. Tenāha bhagavā – ‘‘sati tesaṃ nivāraṇa’’nti.
পঞ্ঞায অনুসযা পহীযন্তি, অনুসযেসু পহীনেসু পরিযুট্ঠানা পহীযন্তি। কিস্স 17, অনুসযস্স পহীনত্তা? তং যথা খন্ধৰন্তস্স রুক্খস্স অনৰসেসমূলুদ্ধরণে কতে পুপ্ফফলপল্লৰঙ্কুরসন্ততি সমুচ্ছিন্না ভৰতি। এৰং অনুসযেসু পহীনেসু পরিযুট্ঠানসন্ততি সমুচ্ছিন্না ভৰতি পিদহিতা পটিচ্ছন্না। কেন? পঞ্ঞায। তেনাহ ভগৰা ‘‘পঞ্ঞাযেতে পিধীযরে’’তি।
Paññāya anusayā pahīyanti, anusayesu pahīnesu pariyuṭṭhānā pahīyanti. Kissa 18, anusayassa pahīnattā? Taṃ yathā khandhavantassa rukkhassa anavasesamūluddharaṇe kate pupphaphalapallavaṅkurasantati samucchinnā bhavati. Evaṃ anusayesu pahīnesu pariyuṭṭhānasantati samucchinnā bhavati pidahitā paṭicchannā. Kena? Paññāya. Tenāha bhagavā ‘‘paññāyete pidhīyare’’ti.
‘‘পঞ্ঞা চেৰ সতি চ, [ইচ্চাযস্মা অজিতো,]
‘‘Paññā ceva sati ca, [iccāyasmā ajito,]
নামরূপঞ্চ মারিস।
Nāmarūpañca mārisa;
এতং মে পুট্ঠো পব্রূহি, কত্থেতং উপরুজ্ঝতী’’তি॥
Etaṃ me puṭṭho pabrūhi, katthetaṃ uparujjhatī’’ti.
যত্থ নামঞ্চ রূপঞ্চ, অসেসং উপরুজ্ঝতি।
Yattha nāmañca rūpañca, asesaṃ uparujjhati;
ৰিঞ্ঞাণস্স নিরোধেন, এত্থেতং উপরুজ্ঝতী’’তি॥
Viññāṇassa nirodhena, etthetaṃ uparujjhatī’’ti.
অযং পঞ্হে 21 অনুসন্ধিং পুচ্ছতি। অনুসন্ধিং পুচ্ছন্তো কিং পুচ্ছতি? অনুপাদিসেসং নিব্বানধাতুং। তীণি চ সচ্চানি সঙ্খতানি নিরোধধম্মানি দুক্খং সমুদযো মগ্গো, নিরোধো অসঙ্খতো। তত্থ সমুদযো দ্ৰীসু ভূমীসু পহীযতি দস্সনভূমিযা চ ভাৰনাভূমিযা চ। দস্সনেন তীণি সংযোজনানি পহীযন্তি সক্কাযদিট্ঠি ৰিচিকিচ্ছা সীলব্বতপরামাসো, ভাৰনায সত্ত সংযোজনানি পহীযন্তি কামচ্ছন্দো ব্যাপাদো রূপরাগো অরূপরাগো মানো উদ্ধচ্চং অৰিজ্জাৰসেসা 22। তেধাতুকে ইমানি দস সংযোজনানি পঞ্চোরম্ভাগিযানি পঞ্চুদ্ধম্ভাগিযানি।
Ayaṃ pañhe 23 anusandhiṃ pucchati. Anusandhiṃ pucchanto kiṃ pucchati? Anupādisesaṃ nibbānadhātuṃ. Tīṇi ca saccāni saṅkhatāni nirodhadhammāni dukkhaṃ samudayo maggo, nirodho asaṅkhato. Tattha samudayo dvīsu bhūmīsu pahīyati dassanabhūmiyā ca bhāvanābhūmiyā ca. Dassanena tīṇi saṃyojanāni pahīyanti sakkāyadiṭṭhi vicikicchā sīlabbataparāmāso, bhāvanāya satta saṃyojanāni pahīyanti kāmacchando byāpādo rūparāgo arūparāgo māno uddhaccaṃ avijjāvasesā 24. Tedhātuke imāni dasa saṃyojanāni pañcorambhāgiyāni pañcuddhambhāgiyāni.
১২. তত্থ তীণি সংযোজনানি সক্কাযদিট্ঠি ৰিচিকিচ্ছা সীলব্বতপরামাসো অনঞ্ঞাতঞ্ঞস্সামীতিন্দ্রিযং অধিট্ঠায নিরুজ্ঝন্তি। সত্ত সংযোজনানি কামচ্ছন্দো ব্যাপাদো রূপরাগো অরূপরাগো মানো উদ্ধচ্চং অৰিজ্জাৰসেসা অঞ্ঞিন্দ্রিযং অধিট্ঠায নিরুজ্ঝন্তি। যং পন এৰং জানাতি ‘‘খীণা মে জাতী’’তি, ইদং খযে ঞাণং। ‘‘নাপরং ইত্থত্তাযা’’তি পজানাতি, ইদং অনুপ্পাদে ঞাণং। ইমানি দ্ৰে ঞাণানি অঞ্ঞাতাৰিন্দ্রিযং। তত্থ যঞ্চ অনঞ্ঞাতঞ্ঞস্সামীতিন্দ্রিযং যঞ্চ অঞ্ঞিন্দ্রিযং, ইমানি অগ্গফলং অরহত্তং পাপুণন্তস্স নিরুজ্ঝন্তি, তত্থ যঞ্চ খযে ঞাণং যঞ্চ অনুপ্পাদে ঞাণং, ইমানি দ্ৰে ঞাণানি একপঞ্ঞা।
12. Tattha tīṇi saṃyojanāni sakkāyadiṭṭhi vicikicchā sīlabbataparāmāso anaññātaññassāmītindriyaṃ adhiṭṭhāya nirujjhanti. Satta saṃyojanāni kāmacchando byāpādo rūparāgo arūparāgo māno uddhaccaṃ avijjāvasesā aññindriyaṃ adhiṭṭhāya nirujjhanti. Yaṃ pana evaṃ jānāti ‘‘khīṇā me jātī’’ti, idaṃ khaye ñāṇaṃ. ‘‘Nāparaṃ itthattāyā’’ti pajānāti, idaṃ anuppāde ñāṇaṃ. Imāni dve ñāṇāni aññātāvindriyaṃ. Tattha yañca anaññātaññassāmītindriyaṃ yañca aññindriyaṃ, imāni aggaphalaṃ arahattaṃ pāpuṇantassa nirujjhanti, tattha yañca khaye ñāṇaṃ yañca anuppāde ñāṇaṃ, imāni dve ñāṇāni ekapaññā.
অপি চ আরম্মণসঙ্কেতেন দ্ৰে নামানি লব্ভন্তি, ‘‘খীণা মে জাতী’’তি পজানন্তস্স খযে ঞাণন্তি নামং লভতি, ‘‘নাপরং ইত্থত্তাযা’’তি পজানন্তস্স অনুপ্পাদে ঞাণন্তি নামং লভতি। সা পজাননট্ঠেন পঞ্ঞা, যথাদিট্ঠং অপিলাপনট্ঠেন সতি।
Api ca ārammaṇasaṅketena dve nāmāni labbhanti, ‘‘khīṇā me jātī’’ti pajānantassa khaye ñāṇanti nāmaṃ labhati, ‘‘nāparaṃ itthattāyā’’ti pajānantassa anuppāde ñāṇanti nāmaṃ labhati. Sā pajānanaṭṭhena paññā, yathādiṭṭhaṃ apilāpanaṭṭhena sati.
১৩. তত্থ যে পঞ্চুপাদানক্খন্ধা, ইদং নামরূপং। তত্থ যে ফস্সপঞ্চমকা ধম্মা, ইদং নামং। যানি পঞ্চিন্দ্রিযানি রূপানি, ইদং রূপং। তদুভযং নামরূপং ৰিঞ্ঞাণসম্পযুত্তং তস্স নিরোধং ভগৰন্তং পুচ্ছন্তো আযস্মা অজিতো পারাযনে এৰমাহ –
13. Tattha ye pañcupādānakkhandhā, idaṃ nāmarūpaṃ. Tattha ye phassapañcamakā dhammā, idaṃ nāmaṃ. Yāni pañcindriyāni rūpāni, idaṃ rūpaṃ. Tadubhayaṃ nāmarūpaṃ viññāṇasampayuttaṃ tassa nirodhaṃ bhagavantaṃ pucchanto āyasmā ajito pārāyane evamāha –
‘‘পঞ্ঞা চেৰ সতি চ, নামরূপঞ্চ মারিস।
‘‘Paññā ceva sati ca, nāmarūpañca mārisa;
এতং মে পুট্ঠো পব্রূহি, কত্থেতং উপরুজ্ঝতী’’তি॥
Etaṃ me puṭṭho pabrūhi, katthetaṃ uparujjhatī’’ti.
তত্থ সতি চ পঞ্ঞা চ চত্তারি ইন্দ্রিযানি, সতি দ্ৰে ইন্দ্রিযানি সতিন্দ্রিযঞ্চ সমাধিন্দ্রিযঞ্চ, পঞ্ঞা দ্ৰে ইন্দ্রিযানি পঞ্ঞিন্দ্রিযঞ্চ ৰীরিযিন্দ্রিযঞ্চ। যা ইমেসু চতূসু ইন্দ্রিযেসু সদ্দহনা ওকপ্পনা, ইদং সদ্ধিন্দ্রিযং। তত্থ যা সদ্ধাধিপতেয্যা চিত্তেকগ্গতা, অযং ছন্দসমাধি। সমাহিতে চিত্তে কিলেসানং ৰিক্খম্ভনতায পটিসঙ্খানবলেন ৰা ভাৰনাবলেন ৰা, ইদং পহানং। তত্থ যে অস্সাসপস্সাসা ৰিতক্কৰিচারা সঞ্ঞাৰেদযিতা সরসঙ্কপ্পা, ইমে সঙ্খারা। ইতি পুরিমকো চ ছন্দসমাধি, কিলেসৰিক্খম্ভনতায চ পহানং ইমে চ সঙ্খারা, তদুভযং ছন্দসমাধিপ্পধানসঙ্খারসমন্নাগতং ইদ্ধিপাদং ভাৰেতি ৰিৰেকনিস্সিতং ৰিরাগনিস্সিতং নিরোধনিস্সিতং ৰোস্সগ্গপরিণামিং। তত্থ যা ৰীরিযাধিপতেয্যা চিত্তেকগ্গতা, অযং ৰীরিযসমাধি…পে॰… তত্থ যা চিত্তাধিপতেয্যা চিত্তেকগ্গতা, অযং চিত্তসমাধি…পে॰… তত্থ যা ৰীমংসাধিপতেয্যা চিত্তেকগ্গতা, অযং ৰীমংসাসমাধি। সমাহিতে চিত্তে কিলেসানং ৰিক্খম্ভনতায পটিসঙ্খানবলেন ৰা ভাৰনাবলেন ৰা, ইদং পহানং। তত্থ যে অস্সাসপস্সাসা ৰিতক্কৰিচারা সঞ্ঞাৰেদযিতা সরসঙ্কপ্পা, ইমে সঙ্খারা। ইতি পুরিমকো চ ৰীমংসাসমাধি, কিলেসৰিক্খম্ভনতায চ পহানং ইমে চ সঙ্খারা, তদুভযং ৰীমংসাসমাধিপ্পধানসঙ্খারসমন্নাগতং ইদ্ধিপাদং ভাৰেতি ৰিৰেকনিস্সিতং ৰিরাগনিস্সিতং নিরোধনিস্সিতং ৰোস্সগ্গপরিণামিং।
Tattha sati ca paññā ca cattāri indriyāni, sati dve indriyāni satindriyañca samādhindriyañca, paññā dve indriyāni paññindriyañca vīriyindriyañca. Yā imesu catūsu indriyesu saddahanā okappanā, idaṃ saddhindriyaṃ. Tattha yā saddhādhipateyyā cittekaggatā, ayaṃ chandasamādhi. Samāhite citte kilesānaṃ vikkhambhanatāya paṭisaṅkhānabalena vā bhāvanābalena vā, idaṃ pahānaṃ. Tattha ye assāsapassāsā vitakkavicārā saññāvedayitā sarasaṅkappā, ime saṅkhārā. Iti purimako ca chandasamādhi, kilesavikkhambhanatāya ca pahānaṃ ime ca saṅkhārā, tadubhayaṃ chandasamādhippadhānasaṅkhārasamannāgataṃ iddhipādaṃ bhāveti vivekanissitaṃ virāganissitaṃ nirodhanissitaṃ vossaggapariṇāmiṃ. Tattha yā vīriyādhipateyyā cittekaggatā, ayaṃ vīriyasamādhi…pe… tattha yā cittādhipateyyā cittekaggatā, ayaṃ cittasamādhi…pe… tattha yā vīmaṃsādhipateyyā cittekaggatā, ayaṃ vīmaṃsāsamādhi. Samāhite citte kilesānaṃ vikkhambhanatāya paṭisaṅkhānabalena vā bhāvanābalena vā, idaṃ pahānaṃ. Tattha ye assāsapassāsā vitakkavicārā saññāvedayitā sarasaṅkappā, ime saṅkhārā. Iti purimako ca vīmaṃsāsamādhi, kilesavikkhambhanatāya ca pahānaṃ ime ca saṅkhārā, tadubhayaṃ vīmaṃsāsamādhippadhānasaṅkhārasamannāgataṃ iddhipādaṃ bhāveti vivekanissitaṃ virāganissitaṃ nirodhanissitaṃ vossaggapariṇāmiṃ.
১৪. সব্বো সমাধি ঞাণমূলকো ঞাণপুব্বঙ্গমো ঞাণানুপরিৰত্তি।
14. Sabbo samādhi ñāṇamūlako ñāṇapubbaṅgamo ñāṇānuparivatti.
যথা পুরে তথা পচ্ছা, যথা পচ্ছা তথা পুরে।
Yathā pure tathā pacchā, yathā pacchā tathā pure;
ইতি ৰিৰটেন চেতসা অপরিযোনদ্ধেন সপ্পভাসং চিত্তং ভাৰেতি। পঞ্চিন্দ্রিযানি কুসলানি চিত্তসহভূনি চিত্তে উপ্পজ্জমানে উপ্পজ্জন্তি, চিত্তে নিরুজ্ঝমানে নিরুজ্ঝন্তি। নামরূপঞ্চ ৰিঞ্ঞাণহেতুকং ৰিঞ্ঞাণপচ্চযা নিব্বত্তং, তস্স মগ্গেন হেতু উপচ্ছিন্নো, ৰিঞ্ঞাণং অনাহারং অনভিনন্দিতং অপ্পটিসন্ধিকং তং নিরুজ্ঝতি। নামরূপমপি অহেতু অপ্পচ্চযং পুনব্ভৰং ন নিব্বত্তযতি 27। এৰং ৰিঞ্ঞাণস্স নিরোধা পঞ্ঞা চ সতি চ নামরূপঞ্চ নিরুজ্ঝতি। তেনাহ ভগৰা –
Iti vivaṭena cetasā apariyonaddhena sappabhāsaṃ cittaṃ bhāveti. Pañcindriyāni kusalāni cittasahabhūni citte uppajjamāne uppajjanti, citte nirujjhamāne nirujjhanti. Nāmarūpañca viññāṇahetukaṃ viññāṇapaccayā nibbattaṃ, tassa maggena hetu upacchinno, viññāṇaṃ anāhāraṃ anabhinanditaṃ appaṭisandhikaṃ taṃ nirujjhati. Nāmarūpamapi ahetu appaccayaṃ punabbhavaṃ na nibbattayati 28. Evaṃ viññāṇassa nirodhā paññā ca sati ca nāmarūpañca nirujjhati. Tenāha bhagavā –
‘‘যমেতং পঞ্হং অপুচ্ছি, অজিত তং ৰদামি তে।
‘‘Yametaṃ pañhaṃ apucchi, ajita taṃ vadāmi te;
যত্থ নামঞ্চ রূপঞ্চ, অসেসং উপরুজ্ঝতি।
Yattha nāmañca rūpañca, asesaṃ uparujjhati;
ৰিঞ্ঞাণস্স নিরোধেন, এত্থেতং উপরুজ্ঝতী’’তি॥
Viññāṇassa nirodhena, etthetaṃ uparujjhatī’’ti.
যে চ সেক্খা পুথূ ইধ।
Ye ca sekkhā puthū idha;
তেসং মে নিপকো ইরিযং, পুট্ঠো পব্রূহি মারিসা’’তি॥
Tesaṃ me nipako iriyaṃ, puṭṭho pabrūhi mārisā’’ti.
১৫. ইমানি তীণি পদানি পুচ্ছিতানি, তে তযো পঞ্হা। কিস্স? সেখাসেখৰিপস্সনাপুব্বঙ্গমপ্পহানযোগেন, এৰঞ্হি আহ। ‘‘যে চ সঙ্খাতধম্মাসে’’তি অরহত্তং পুচ্ছতি, ‘‘যে চ সেখা পুথূ ইধা’’তি সেখং পুচ্ছতি, ‘‘তেসং মে নিপকো ইরিযং, পুট্ঠো পব্রূহি মারিসা’’তি ৰিপস্সনাপুব্বঙ্গমং পহানং পুচ্ছতি।
15. Imāni tīṇi padāni pucchitāni, te tayo pañhā. Kissa? Sekhāsekhavipassanāpubbaṅgamappahānayogena, evañhi āha. ‘‘Ye ca saṅkhātadhammāse’’ti arahattaṃ pucchati, ‘‘ye ca sekhā puthū idhā’’ti sekhaṃ pucchati, ‘‘tesaṃ me nipako iriyaṃ, puṭṭho pabrūhi mārisā’’ti vipassanāpubbaṅgamaṃ pahānaṃ pucchati.
তত্থ ৰিসজ্জনা –
Tattha visajjanā –
‘‘কামেসু নাভিগিজ্ঝেয্য, [অজিতাতি ভগৰা]
‘‘Kāmesu nābhigijjheyya, [ajitāti bhagavā]
মনসানাৰিলো সিযা।
Manasānāvilo siyā;
কুসলো সব্বধম্মানং, সতো ভিক্খু পরিব্বজে’’তি॥
Kusalo sabbadhammānaṃ, sato bhikkhu paribbaje’’ti.
ভগৰতো সব্বং কাযকম্মং ঞাণপুব্বঙ্গমং ঞাণানুপরিৰত্তি, সব্বং ৰচীকম্মং ঞাণপুব্বঙ্গমং ঞাণানুপরিৰত্তি, সব্বং মনোকম্মং ঞাণপুব্বঙ্গমং ঞাণানুপরিৰত্তি। অতীতে অংসে অপ্পটিহতঞাণদস্সনং, অনাগতে অংসে অপ্পটিহতঞাণদস্সনং, পচ্চুপ্পন্নে অংসে অপ্পটিহতঞাণদস্সনং।
Bhagavato sabbaṃ kāyakammaṃ ñāṇapubbaṅgamaṃ ñāṇānuparivatti, sabbaṃ vacīkammaṃ ñāṇapubbaṅgamaṃ ñāṇānuparivatti, sabbaṃ manokammaṃ ñāṇapubbaṅgamaṃ ñāṇānuparivatti. Atīte aṃse appaṭihatañāṇadassanaṃ, anāgate aṃse appaṭihatañāṇadassanaṃ, paccuppanne aṃse appaṭihatañāṇadassanaṃ.
কো চ ঞাণদস্সনস্স পটিঘাতো? যং অনিচ্চে দুক্খে অনত্তনি চ অঞ্ঞাণং অদস্সনং, অযং ঞাণদস্সনস্স পটিঘাতো। যথা ইধ পুরিসো তারকরূপানি পস্সেয্য, নো চ গণনসঙ্কেতেন জানেয্য, অযং ঞাণদস্সনস্স পটিঘাতো।
Ko ca ñāṇadassanassa paṭighāto? Yaṃ anicce dukkhe anattani ca aññāṇaṃ adassanaṃ, ayaṃ ñāṇadassanassa paṭighāto. Yathā idha puriso tārakarūpāni passeyya, no ca gaṇanasaṅketena jāneyya, ayaṃ ñāṇadassanassa paṭighāto.
ভগৰতো পন অপ্পটিহতঞাণদস্সনং, অনাৰরণঞাণদস্সনা হি বুদ্ধা ভগৰন্তো। তত্থ সেখেন দ্ৰীসু ধম্মেসু চিত্তং রক্খিতব্বং গেধা চ রজনীযেসু ধম্মেসু, দোসা চ পরিযুট্ঠানীযেসু। তত্থ যা ইচ্ছা মুচ্ছা পত্থনা পিযাযনা কীল়না, তং ভগৰা নিৰারেন্তো এৰমাহ ‘‘কামেসু নাভিগিজ্ঝেয্যা’’তি।
Bhagavato pana appaṭihatañāṇadassanaṃ, anāvaraṇañāṇadassanā hi buddhā bhagavanto. Tattha sekhena dvīsu dhammesu cittaṃ rakkhitabbaṃ gedhā ca rajanīyesu dhammesu, dosā ca pariyuṭṭhānīyesu. Tattha yā icchā mucchā patthanā piyāyanā kīḷanā, taṃ bhagavā nivārento evamāha ‘‘kāmesu nābhigijjheyyā’’ti.
‘‘মনসানাৰিলো সিযা’’তি পরিযুট্ঠানৰিঘাতং আহ। তথা হি সেখো অভিগিজ্ঝন্তো অসমুপ্পন্নঞ্চ কিলেসং উপ্পাদেতি, উপ্পন্নঞ্চ কিলেসং ফাতিং করোতি। যো পন অনাৰিলসঙ্কপ্পো অনভিগিজ্ঝন্তো ৰাযমতি, সো অনুপ্পন্নানং পাপকানং অকুসলানং ধম্মানং অনুপ্পাদায ছন্দং জনেতি ৰাযমতি ৰীরিযং আরভতি চিত্তং পগ্গণ্হাতি পদহতি। সো উপ্পন্নানং পাপকানং অকুসলানং ধম্মানং পহানায ছন্দং জনেতি ৰাযমতি ৰীরিযং আরভতি চিত্তং পগ্গণ্হাতি পদহতি। সো অনুপ্পন্নানং কুসলানং ধম্মানং উপ্পাদায ছন্দং জনেতি ৰাযমতি ৰীরিযং আরভতি চিত্তং পগ্গণ্হাতি পদহতি। সো উপ্পন্নানং কুসলানং ধম্মানং ঠিতিযা অসম্মোসায ভিয্যোভাৰায ৰেপুল্লায ভাৰনায পারিপূরিযা ছন্দং জনেতি ৰাযমতি ৰীরিযং আরভতি চিত্তং পগ্গণ্হাতি পদহতি।
‘‘Manasānāvilo siyā’’ti pariyuṭṭhānavighātaṃ āha. Tathā hi sekho abhigijjhanto asamuppannañca kilesaṃ uppādeti, uppannañca kilesaṃ phātiṃ karoti. Yo pana anāvilasaṅkappo anabhigijjhanto vāyamati, so anuppannānaṃ pāpakānaṃ akusalānaṃ dhammānaṃ anuppādāya chandaṃ janeti vāyamati vīriyaṃ ārabhati cittaṃ paggaṇhāti padahati. So uppannānaṃ pāpakānaṃ akusalānaṃ dhammānaṃ pahānāya chandaṃ janeti vāyamati vīriyaṃ ārabhati cittaṃ paggaṇhāti padahati. So anuppannānaṃ kusalānaṃ dhammānaṃ uppādāya chandaṃ janeti vāyamati vīriyaṃ ārabhati cittaṃ paggaṇhāti padahati. So uppannānaṃ kusalānaṃ dhammānaṃ ṭhitiyā asammosāya bhiyyobhāvāya vepullāya bhāvanāya pāripūriyā chandaṃ janeti vāyamati vīriyaṃ ārabhati cittaṃ paggaṇhāti padahati.
১৬. কতমে 31 অনুপ্পন্না পাপকা অকুসলা ধম্মা? কামৰিতক্কো ব্যাপাদৰিতক্কো ৰিহিংসাৰিতক্কো, ইমে অনুপ্পন্না পাপকা অকুসলা ধম্মা। কতমে উপ্পন্না পাপকা অকুসলা ধম্মা? অনুসযা অকুসলমূলানি, ইমে উপ্পন্না পাপকা অকুসলা ধম্মা। কতমে অনুপ্পন্না কুসলা ধম্মা? যানি সোতাপন্নস্স ইন্দ্রিযানি, ইমে অনুপ্পন্না কুসলা ধম্মা। কতমে উপ্পন্না কুসলা ধম্মা? যানি অট্ঠমকস্স ইন্দ্রিযানি, ইমে উপ্পন্না কুসলা ধম্মা।
16. Katame 32 anuppannā pāpakā akusalā dhammā? Kāmavitakko byāpādavitakko vihiṃsāvitakko, ime anuppannā pāpakā akusalā dhammā. Katame uppannā pāpakā akusalā dhammā? Anusayā akusalamūlāni, ime uppannā pāpakā akusalā dhammā. Katame anuppannā kusalā dhammā? Yāni sotāpannassa indriyāni, ime anuppannā kusalā dhammā. Katame uppannā kusalā dhammā? Yāni aṭṭhamakassa indriyāni, ime uppannā kusalā dhammā.
যেন কামৰিতক্কং ৰারেতি, ইদং সতিন্দ্রিযং। যেন ব্যাপাদৰিতক্কং ৰারেতি, ইদং সমাধিন্দ্রিযং। যেন ৰিহিংসাৰিতক্কং ৰারেতি, ইদং ৰীরিযিন্দ্রিযং।
Yena kāmavitakkaṃ vāreti, idaṃ satindriyaṃ. Yena byāpādavitakkaṃ vāreti, idaṃ samādhindriyaṃ. Yena vihiṃsāvitakkaṃ vāreti, idaṃ vīriyindriyaṃ.
যেন উপ্পন্নুপ্পন্নে পাপকে অকুসলে ধম্মে পজহতি ৰিনোদেতি ব্যন্তীকরোতি অনভাৰং গমেতি নাধিৰাসেতি, ইদং পঞ্ঞিন্দ্রিযং। যা ইমেসু চতূসু ইন্দ্রিযেসু সদ্দহনা ওকপ্পনা, ইদং সদ্ধিন্দ্রিযং।
Yena uppannuppanne pāpake akusale dhamme pajahati vinodeti byantīkaroti anabhāvaṃ gameti nādhivāseti, idaṃ paññindriyaṃ. Yā imesu catūsu indriyesu saddahanā okappanā, idaṃ saddhindriyaṃ.
তত্থ সদ্ধিন্দ্রিযং কত্থ দট্ঠব্বং? চতূসু সোতাপত্তিযঙ্গেসু। ৰীরিযিন্দ্রিযং কত্থ দট্ঠব্বং? চতূসু সম্মপ্পধানেসু। সতিন্দ্রিযং কত্থ দট্ঠব্বং? চতূসু সতিপট্ঠানেসু। সমাধিন্দ্রিযং কত্থ দট্ঠব্বং? চতূসু ঝানেসু। পঞ্ঞিন্দ্রিযং কত্থ দট্ঠব্বং? চতূসু অরিযসচ্চেসু। এৰং সেখো সব্বেহি কুসলেহি ধম্মেহি অপ্পমত্তো ৰুত্তো ভগৰতা অনাৰিলতায মনসা। তেনাহ ভগৰা ‘‘মনসানাৰিলোসিযা’’তি।
Tattha saddhindriyaṃ kattha daṭṭhabbaṃ? Catūsu sotāpattiyaṅgesu. Vīriyindriyaṃ kattha daṭṭhabbaṃ? Catūsu sammappadhānesu. Satindriyaṃ kattha daṭṭhabbaṃ? Catūsu satipaṭṭhānesu. Samādhindriyaṃ kattha daṭṭhabbaṃ? Catūsu jhānesu. Paññindriyaṃ kattha daṭṭhabbaṃ? Catūsu ariyasaccesu. Evaṃ sekho sabbehi kusalehi dhammehi appamatto vutto bhagavatā anāvilatāya manasā. Tenāha bhagavā ‘‘manasānāvilosiyā’’ti.
১৭. ‘‘কুসলো সব্বধম্মান’’ন্তি লোকো নাম তিৰিধো কিলেসলোকো ভৰলোকো ইন্দ্রিযলোকো। তত্থ কিলেসলোকেন ভৰলোকো সমুদাগচ্ছতি, সো ইন্দ্রিযানি নিব্বত্তেতি, ইন্দ্রিযেসু ভাৰিযমানেসু নেয্যস্স পরিঞ্ঞা ভৰতি। সা দুৰিধেন উপপরিক্খিতব্বা দস্সনপরিঞ্ঞায চ ভাৰনাপরিঞ্ঞায চ। যদা হি সেখো ঞেয্যং পরিজানাতি, তদা নিব্বিদাসহগতেহি সঞ্ঞামনসিকারেহি নেয্যং পরিঞ্ঞাতং ভৰতি। তস্স দ্ৰে ধম্মা কোসল্লং গচ্ছন্তি – দস্সনকোসল্লঞ্চ ভাৰনাকোসল্লঞ্চ।
17. ‘‘Kusalo sabbadhammāna’’nti loko nāma tividho kilesaloko bhavaloko indriyaloko. Tattha kilesalokena bhavaloko samudāgacchati, so indriyāni nibbatteti, indriyesu bhāviyamānesu neyyassa pariññā bhavati. Sā duvidhena upaparikkhitabbā dassanapariññāya ca bhāvanāpariññāya ca. Yadā hi sekho ñeyyaṃ parijānāti, tadā nibbidāsahagatehi saññāmanasikārehi neyyaṃ pariññātaṃ bhavati. Tassa dve dhammā kosallaṃ gacchanti – dassanakosallañca bhāvanākosallañca.
তং ঞাণং পঞ্চৰিধেন ৰেদিতব্বংः অভিঞ্ঞা পরিঞ্ঞা পহানং ভাৰনা সচ্ছিকিরিযা। তত্থ কতমা অভিঞ্ঞা? যং ধম্মানং সলক্খণে ঞাণং ধম্মপটিসম্ভিদা চ অত্থপটিসম্ভিদা চ, অযং অভিঞ্ঞা।
Taṃ ñāṇaṃ pañcavidhena veditabbaṃः abhiññā pariññā pahānaṃ bhāvanā sacchikiriyā. Tattha katamā abhiññā? Yaṃ dhammānaṃ salakkhaṇe ñāṇaṃ dhammapaṭisambhidā ca atthapaṭisambhidā ca, ayaṃ abhiññā.
তত্থ কতমা পরিঞ্ঞা? এৰং অভিজানিত্ৰা যা পরিজাননা ‘‘ইদং কুসলং, ইদং অকুসলং, ইদং সাৰজ্জং, ইদং অনৰজ্জং, ইদং কণ্হং, ইদং সুক্কং, ইদং সেৰিতব্বং, ইদং ন সেৰিতব্বং, ইমে ধম্মা এৰংগহিতা, ইদং ফলং নিব্বত্তেন্তি 33, তেসং এৰংগহিতানং অযং অত্থো’’তি, অযং পরিঞ্ঞা।
Tattha katamā pariññā? Evaṃ abhijānitvā yā parijānanā ‘‘idaṃ kusalaṃ, idaṃ akusalaṃ, idaṃ sāvajjaṃ, idaṃ anavajjaṃ, idaṃ kaṇhaṃ, idaṃ sukkaṃ, idaṃ sevitabbaṃ, idaṃ na sevitabbaṃ, ime dhammā evaṃgahitā, idaṃ phalaṃ nibbattenti 34, tesaṃ evaṃgahitānaṃ ayaṃ attho’’ti, ayaṃ pariññā.
এৰং পরিজানিত্ৰা তযো ধম্মা অৰসিট্ঠা ভৰন্তি পহাতব্বা ভাৰেতব্বা সচ্ছিকাতব্বা চ। তত্থ কতমে ধম্মা পহাতব্বা? যে অকুসলা। তত্থ কতমে ধম্মা ভাৰেতব্বা? যে কুসলা। তত্থ কতমে ধম্মা সচ্ছিকাতব্বা? যং অসঙ্খতং। যো এৰং জানাতি অযং ৰুচ্চতি অত্থকুসলো ধম্মকুসলো কল্যাণতাকুসলো ফলতাকুসলো, আযকুসলো অপাযকুসলো উপাযকুসলো মহতা কোসল্লেন সমন্নাগতোতি, তেনাহ ভগৰা ‘‘কুসলো সব্বধম্মান’’ন্তি।
Evaṃ parijānitvā tayo dhammā avasiṭṭhā bhavanti pahātabbā bhāvetabbā sacchikātabbā ca. Tattha katame dhammā pahātabbā? Ye akusalā. Tattha katame dhammā bhāvetabbā? Ye kusalā. Tattha katame dhammā sacchikātabbā? Yaṃ asaṅkhataṃ. Yo evaṃ jānāti ayaṃ vuccati atthakusalo dhammakusalo kalyāṇatākusalo phalatākusalo, āyakusalo apāyakusalo upāyakusalo mahatā kosallena samannāgatoti, tenāha bhagavā ‘‘kusalo sabbadhammāna’’nti.
‘‘সতো ভিক্খু পরিব্বজে’’তি তেন দিট্ঠধম্মসুখৰিহারত্থং অভিক্কন্তে পটিক্কন্তে আলোকিতে ৰিলোকিতে সমিঞ্জিতে 35 পসারিতে সঙ্ঘাটিপত্তচীৰরধারণে অসিতে পীতে খাযিতে সাযিতে উচ্চারপস্সাৰকম্মে গতে ঠিতে নিসিন্নে সুত্তে জাগরিতে ভাসিতে তুণ্হিভাৰে সতেন সম্পজানেন ৰিহাতব্বং। ইমা দ্ৰে চরিযা অনুঞ্ঞাতা ভগৰতা একা ৰিসুদ্ধানং, একা ৰিসুজ্ঝন্তানং। কে ৰিসুদ্ধা? অরহন্তো। কে ৰিসুজ্ঝন্তা? সেক্খা। কতকিচ্চানি হি অরহতো ইন্দ্রিযানি। যং বোজ্ঝং, তং চতুব্বিধং দুক্খস্স পরিঞ্ঞাভিসমযেন সমুদযস্স পহানাভিসমযেন মগ্গস্স ভাৰনাভিসমযেন নিরোধস্স সচ্ছিকিরিযাভিসমযেন, ইদং চতুব্বিধং বোজ্ঝং যো এৰং জানাতি, অযং ৰুচ্চতি সতো অভিক্কমতি সতো পটিক্কমতি খযা রাগস্স খযা দোসস্স খযা মোহস্স। তেনাহ ভগৰা ‘‘সতো ভিক্খু পরিব্বজে’’তি, তেনাহ –
‘‘Sato bhikkhu paribbaje’’ti tena diṭṭhadhammasukhavihāratthaṃ abhikkante paṭikkante ālokite vilokite samiñjite 36 pasārite saṅghāṭipattacīvaradhāraṇe asite pīte khāyite sāyite uccārapassāvakamme gate ṭhite nisinne sutte jāgarite bhāsite tuṇhibhāve satena sampajānena vihātabbaṃ. Imā dve cariyā anuññātā bhagavatā ekā visuddhānaṃ, ekā visujjhantānaṃ. Ke visuddhā? Arahanto. Ke visujjhantā? Sekkhā. Katakiccāni hi arahato indriyāni. Yaṃ bojjhaṃ, taṃ catubbidhaṃ dukkhassa pariññābhisamayena samudayassa pahānābhisamayena maggassa bhāvanābhisamayena nirodhassa sacchikiriyābhisamayena, idaṃ catubbidhaṃ bojjhaṃ yo evaṃ jānāti, ayaṃ vuccati sato abhikkamati sato paṭikkamati khayā rāgassa khayā dosassa khayā mohassa. Tenāha bhagavā ‘‘sato bhikkhu paribbaje’’ti, tenāha –
‘‘কামেসু নাভিগিজ্ঝেয্য, [অজিতাতি ভগৰা]
‘‘Kāmesu nābhigijjheyya, [ajitāti bhagavā]
মনসানাৰিলো সিযা।
Manasānāvilo siyā;
কুসলো সব্বধম্মানং, সতো ভিক্খু পরিব্বজে’’তি॥
Kusalo sabbadhammānaṃ, sato bhikkhu paribbaje’’ti.
এৰং পুচ্ছিতব্বং, এৰং ৰিসজ্জিতব্বং। সুত্তস্স চ অনুগীতি অত্থতো চ ব্যঞ্জনতো চ সমানেতব্বা 37। অত্থাপগতং হি ব্যঞ্জনং সম্ফপ্পলাপং ভৰতি। দুন্নিক্খিত্তস্স পদব্যঞ্জনস্স অত্থোপি দুন্নযো ভৰতি, তস্মা অত্থব্যঞ্জনূপেতং সঙ্গাযিতব্বং। সুত্তঞ্চ পৰিচিনিতব্বং। কিং ইদং সুত্তং আহচ্চ ৰচনং অনুসন্ধিৰচনং নীতত্থং নেয্যত্থং সংকিলেসভাগিযং নিব্বেধভাগিযং অসেক্খভাগিযং? কুহিং ইমস্স সুত্তস্স সব্বানি সচ্চানি পস্সিতব্বানি, আদিমজ্ঝপরিযোসানেতি? এৰং সুত্তং পৰিচেতব্বং। তেনাহ আযস্মা মহাকচ্চাযনো – ‘‘যং পুচ্ছিতঞ্চ ৰিস্সজ্জিতঞ্চ, সুত্তস্স যা চ অনুগীতী’’তি।
Evaṃ pucchitabbaṃ, evaṃ visajjitabbaṃ. Suttassa ca anugīti atthato ca byañjanato ca samānetabbā 38. Atthāpagataṃ hi byañjanaṃ samphappalāpaṃ bhavati. Dunnikkhittassa padabyañjanassa atthopi dunnayo bhavati, tasmā atthabyañjanūpetaṃ saṅgāyitabbaṃ. Suttañca pavicinitabbaṃ. Kiṃ idaṃ suttaṃ āhacca vacanaṃ anusandhivacanaṃ nītatthaṃ neyyatthaṃ saṃkilesabhāgiyaṃ nibbedhabhāgiyaṃ asekkhabhāgiyaṃ? Kuhiṃ imassa suttassa sabbāni saccāni passitabbāni, ādimajjhapariyosāneti? Evaṃ suttaṃ pavicetabbaṃ. Tenāha āyasmā mahākaccāyano – ‘‘yaṃ pucchitañca vissajjitañca, suttassa yā ca anugītī’’ti.
নিযুত্তো ৰিচযো হারো।
Niyutto vicayo hāro.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / নেত্তিপ্পকরণ-অট্ঠকথা • Nettippakaraṇa-aṭṭhakathā / ২. ৰিচযহারৰিভঙ্গৰণ্ণনা • 2. Vicayahāravibhaṅgavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / খুদ্দকনিকায (টীকা) • Khuddakanikāya (ṭīkā) / নেত্তিপ্পকরণ-টীকা • Nettippakaraṇa-ṭīkā / ২. ৰিচযহারৰিভঙ্গৰণ্ণনা • 2. Vicayahāravibhaṅgavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / খুদ্দকনিকায (টীকা) • Khuddakanikāya (ṭīkā) / নেত্তিৰিভাৰিনী • Nettivibhāvinī / ২. ৰিচযহারৰিভঙ্গৰিভাৰনা • 2. Vicayahāravibhaṅgavibhāvanā
