Library / Tipiṭaka / ཏིཔིཊཀ • Tipiṭaka / ནེཏྟིཔྤཀརཎཔཱལི༹ • Nettippakaraṇapāḷi

༢. ཝིཙཡཧཱརཝིབྷངྒོ

2. Vicayahāravibhaṅgo

༡༡. ཏཏྠ ཀཏམོ ཝིཙཡོ ཧཱརོ? ‘‘ཡཾ པུཙྪིཏཉྩ ཝིསྶཛྫིཏཉྩཱ’’ཏི གཱཐཱ, ཨཡཾ ཝིཙཡོ ཧཱརོ།

11. Tattha katamo vicayo hāro? ‘‘Yaṃ pucchitañca vissajjitañcā’’ti gāthā, ayaṃ vicayo hāro.

ཀིཾ ཝིཙིནཏི? པདཾ ཝིཙིནཏི, པཉྷཾ ཝིཙིནཏི, ཝིསཛྫནཾ ¹ ཝིཙིནཏི, པུབྦཱཔརཾ ཝིཙིནཏི, ཨསྶཱདཾ ཝིཙིནཏི, ཨཱདཱིནཝཾ ཝིཙིནཏི, ནིསྶརཎཾ ཝིཙིནཏི, ཕལཾ ཝིཙིནཏི, ཨུཔཱཡཾ ཝིཙིནཏི, ཨཱཎཏྟིཾ ཝིཙིནཏི, ཨནུགཱིཏིཾ ཝིཙིནཏི, སབྦེ ནཝ སུཏྟནྟེ ཝིཙིནཏི། ཡཐཱ ཀིཾ བྷཝེ, ཡཐཱ ཨཱཡསྨཱ ཨཛིཏོ པཱརཱཡནེ བྷགཝནྟཾ པཉྷཾ པུཙྪཏི –

Kiṃ vicinati? Padaṃ vicinati, pañhaṃ vicinati, visajjanaṃ ² vicinati, pubbāparaṃ vicinati, assādaṃ vicinati, ādīnavaṃ vicinati, nissaraṇaṃ vicinati, phalaṃ vicinati, upāyaṃ vicinati, āṇattiṃ vicinati, anugītiṃ vicinati, sabbe nava suttante vicinati. Yathā kiṃ bhave, yathā āyasmā ajito pārāyane bhagavantaṃ pañhaṃ pucchati –

‘‘ཀེནསྶུ ³ ནིཝུཏོ ལོཀོ, [ཨིཙྩཱཡསྨཱ ཨཛིཏོ,]

‘‘Kenassu ⁴ nivuto loko, [iccāyasmā ajito,]

ཀེནསྶུ ནཔྤཀཱསཏི།

Kenassu nappakāsati;

ཀིསྶཱབྷིལེཔནཾ བྲཱུསི, ཀིཾ སུ ཏསྶ མཧབྦྷཡ’’ནྟི༎

Kissābhilepanaṃ brūsi, kiṃ su tassa mahabbhaya’’nti.

ཨིམཱནི ཙཏྟཱརི པདཱནི པུཙྪིཏཱནི, སོ ཨེཀོ པཉྷོ། ཀསྨཱ? ཨེཀཝཏྠུ པརིགྒཧཱ, ཨེཝཉྷི ཨཱཧ ‘‘ཀེནསྶུ ནིཝུཏོ ལོཀོ’’ཏི ལོཀཱདྷིཊྛཱནཾ པུཙྪཏི, ‘‘ཀེནསྶུ ནཔྤཀཱསཏཱི’’ཏི ལོཀསྶ ཨཔྤཀཱསནཾ པུཙྪཏི, ‘‘ཀིསྶཱབྷིལེཔནཾ བྲཱུསཱི’’ཏི ལོཀསྶ ཨབྷིལེཔནཾ པུཙྪཏི, ‘‘ཀིཾསུ ཏསྶ མཧབྦྷཡ’’ནྟི ཏསྶེཝ ལོཀསྶ མཧཱབྷཡཾ པུཙྪཏི། ལོཀོ ཏིཝིདྷོ ཀིལེསལོཀོ བྷཝལོཀོ ཨིནྡྲིཡལོཀོ།

Imāni cattāri padāni pucchitāni, so eko pañho. Kasmā? Ekavatthu pariggahā, evañhi āha ‘‘kenassu nivuto loko’’ti lokādhiṭṭhānaṃ pucchati, ‘‘kenassu nappakāsatī’’ti lokassa appakāsanaṃ pucchati, ‘‘kissābhilepanaṃ brūsī’’ti lokassa abhilepanaṃ pucchati, ‘‘kiṃsu tassa mahabbhaya’’nti tasseva lokassa mahābhayaṃ pucchati. Loko tividho kilesaloko bhavaloko indriyaloko.

ཏཏྠ ཝིསཛྫནཱ –

Tattha visajjanā –

‘‘ཨཝིཛྫཱཡ ནིཝུཏོ ལོཀོ, [ཨཛིཏཱཏི བྷགཝཱ,]

‘‘Avijjāya nivuto loko, [ajitāti bhagavā,]

ཝིཝིཙྪཱ ⁵ པམཱདཱ ནཔྤཀཱསཏི།

Vivicchā ⁶ pamādā nappakāsati;

ཛཔྤཱབྷིལེཔནཾ བྲཱུམི, དུཀྑམསྶ མཧབྦྷཡ’’ནྟི༎

Jappābhilepanaṃ brūmi, dukkhamassa mahabbhaya’’nti.

ཨིམཱནི ཙཏྟཱརི པདཱནི ཨིམེཧི ཙཏཱུཧི པདེཧི ཝིསཛྫིཏཱནི པཋམཾ པཋམེན, དུཏིཡཾ དུཏིཡེན, ཏཏིཡཾ ཏཏིཡེན, ཙཏུཏྠཾ ཙཏུཏྠེན།

Imāni cattāri padāni imehi catūhi padehi visajjitāni paṭhamaṃ paṭhamena, dutiyaṃ dutiyena, tatiyaṃ tatiyena, catutthaṃ catutthena.

‘‘ཀེནསྶུ ནིཝུཏོ ལོཀོ’’ཏི པཉྷེ ‘‘ཨཝིཛྫཱཡ ནིཝུཏོ ལོཀོ’’ཏི ཝིསཛྫནཱ། ནཱིཝརཎེཧི ནིཝུཏོ ལོཀོ, ཨཝིཛྫཱནཱིཝརཎཱ ཧི སབྦེ སཏྟཱ། ཡཐཱཧ བྷགཝཱ ‘‘སབྦསཏྟཱནཾ, བྷིཀྑཝེ, སབྦཔཱཎཱནཾ སབྦབྷཱུཏཱནཾ པརིཡཱཡཏོ ཨེཀམེཝ ནཱིཝརཎཾ ཝདཱམི ཡདིདཾ ཨཝིཛྫཱ, ཨཝིཛྫཱནཱིཝརཎཱ ཧི སབྦེ སཏྟཱ། སབྦསོཝ, བྷིཀྑཝེ, ཨཝིཛྫཱཡ ནིརོདྷཱ ཙཱགཱ པཊིནིསྶགྒཱ ནཏྠི སཏྟཱནཾ ནཱིཝརཎནྟི ཝདཱམཱི’’ཏི། ཏེན ཙ པཋམསྶ པདསྶ ཝིསཛྫནཱ ཡུཏྟཱ།

‘‘Kenassu nivuto loko’’ti pañhe ‘‘avijjāya nivuto loko’’ti visajjanā. Nīvaraṇehi nivuto loko, avijjānīvaraṇā hi sabbe sattā. Yathāha bhagavā ‘‘sabbasattānaṃ, bhikkhave, sabbapāṇānaṃ sabbabhūtānaṃ pariyāyato ekameva nīvaraṇaṃ vadāmi yadidaṃ avijjā, avijjānīvaraṇā hi sabbe sattā. Sabbasova, bhikkhave, avijjāya nirodhā cāgā paṭinissaggā natthi sattānaṃ nīvaraṇanti vadāmī’’ti. Tena ca paṭhamassa padassa visajjanā yuttā.

‘‘ཀེནསྶུ ནཔྤཀཱསཏཱི’’ཏི པཉྷེ ‘‘ཝིཝིཙྪཱ པམཱདཱ ནཔྤཀཱསཏཱི’’ཏི ཝིསཛྫནཱ། ཡོ པུགྒལོ ནཱིཝརཎེཧི ནིཝུཏོ, སོ ཝིཝིཙྪཏི། ཝིཝིཙྪཱ ནཱམ ཝུཙྩཏི ཝིཙིཀིཙྪཱ། སོ ཝིཙིཀིཙྪནྟོ ནཱབྷིསདྡཧཏི, ན ཨབྷིསདྡཧནྟོ ཝཱིརིཡཾ ནཱརབྷཏི ཨཀུསལཱནཾ དྷམྨཱནཾ པཧཱནཱཡ ཀུསལཱནཾ དྷམྨཱནཾ སཙྪིཀིརིཡཱཡ། སོ ཨིདྷཔྤམཱདམནུཡུཏྟོ ཝིཧརཏི པམཏྟོ, སུཀྐེ དྷམྨེ ན ཨུཔྤཱདིཡཏི, ཏསྶ ཏེ ཨནུཔྤཱདིཡམཱནཱ ནཔྤཀཱསནྟི, ཡཐཱཧ བྷགཝཱ –

‘‘Kenassu nappakāsatī’’ti pañhe ‘‘vivicchā pamādā nappakāsatī’’ti visajjanā. Yo puggalo nīvaraṇehi nivuto, so vivicchati. Vivicchā nāma vuccati vicikicchā. So vicikicchanto nābhisaddahati, na abhisaddahanto vīriyaṃ nārabhati akusalānaṃ dhammānaṃ pahānāya kusalānaṃ dhammānaṃ sacchikiriyāya. So idhappamādamanuyutto viharati pamatto, sukke dhamme na uppādiyati, tassa te anuppādiyamānā nappakāsanti, yathāha bhagavā –

‘‘དཱུརེ སནྟོ པཀཱསནྟི ⁷, ཧིམཝནྟོཝ པབྦཏོ།

‘‘Dūre santo pakāsanti ⁸, himavantova pabbato;

ཨསནྟེཏྠ ན དིསྶནྟི, རཏྟིཾ ཁིཏྟཱ ⁹ ཡཐཱ སརཱ།

Asantettha na dissanti, rattiṃ khittā ¹⁰ yathā sarā;

ཏེ གུཎེཧི པཀཱསནྟི, ཀིཏྟིཡཱ ཙ ཡསེན ཙཱ’’ཏི༎

Te guṇehi pakāsanti, kittiyā ca yasena cā’’ti.

ཏེན ཙ དུཏིཡསྶ པདསྶ ཝིསཛྫནཱ ཡུཏྟཱ།

Tena ca dutiyassa padassa visajjanā yuttā.

‘‘ཀིསྶཱབྷིལེཔནཾ བྲཱུསཱི’’ཏི པཉྷེ ‘‘ཛཔྤཱབྷིལེཔནཾ བྲཱུམཱི’’ཏི ཝིསཛྫནཱ། ཛཔྤཱ ནཱམ ཝུཙྩཏི ཏཎྷཱ། སཱ ཀཐཾ ཨབྷིལིམྤཏི? ཡཐཱཧ བྷགཝཱ –

‘‘Kissābhilepanaṃ brūsī’’ti pañhe ‘‘jappābhilepanaṃ brūmī’’ti visajjanā. Jappā nāma vuccati taṇhā. Sā kathaṃ abhilimpati? Yathāha bhagavā –

‘‘རཏྟོ ཨཏྠཾ ན ཛཱནཱཏི, རཏྟོ དྷམྨཾ ན པསྶཏི།

‘‘Ratto atthaṃ na jānāti, ratto dhammaṃ na passati;

ཨནྡྷནྟམཾ ¹¹ ཏདཱ ཧོཏི, ཡཾ རཱགོ སཧཏེ ནར’’ནྟི༎

Andhantamaṃ ¹² tadā hoti, yaṃ rāgo sahate nara’’nti.

སཱཡཾ ཏཎྷཱ ཨཱསཏྟིབཧུལསྶ པུགྒལསྶ ‘‘ཨེཝཾ ཨབྷིཛཔྤཱ’’ཏི ཀརིཏྭཱ ཏཏྠ ལོཀོ ཨབྷིལིཏྟོ ནཱམ བྷཝཏི, ཏེན ཙ ཏཏིཡསྶ པདསྶ ཝིསཛྫནཱ ཡུཏྟཱ།

Sāyaṃ taṇhā āsattibahulassa puggalassa ‘‘evaṃ abhijappā’’ti karitvā tattha loko abhilitto nāma bhavati, tena ca tatiyassa padassa visajjanā yuttā.

‘‘ཀིཾ སུ ཏསྶ མཧབྦྷཡ’’ནྟི པཉྷེ ‘‘དུཀྑམསྶ མཧབྦྷཡ’’ནྟི ཝིསཛྫནཱ། དུཝིདྷཾ དུཀྑཾ – ཀཱཡིཀཉྩ ཙེཏསིཀཉྩ། ཡཾ ཀཱཡིཀཾ ཨིདཾ དུཀྑཾ, ཡཾ ཙེཏསིཀཾ ཨིདཾ དོམནསྶཾ། སབྦེ སཏྟཱ ཧི དུཀྑསྶ ཨུབྦིཛྫནྟི, ནཏྠི བྷཡཾ དུཀྑེན སམསམཾ, ཀུཏོ ཝཱ པན ཏསྶ ཨུཏྟརིཏརཾ? ཏིསྶོ དུཀྑཏཱ – དུཀྑདུཀྑཏཱ སངྑཱརདུཀྑཏཱ ཝིཔརིཎཱམདུཀྑཏཱ། ཏཏྠ ལོཀོ ཨོདྷསོ ཀདཱཙི ཀརཧཙི དུཀྑདུཀྑཏཱཡ མུཙྩཏི། ཏཐཱ ཝིཔརིཎཱམདུཀྑཏཱཡ། ཏཾ ཀིསྶ ཧེཏུ? ཧོནྟི ལོཀེ ཨཔྤཱབཱདྷཱཔི དཱིགྷཱཡུཀཱཔི། སངྑཱརདུཀྑཏཱཡ པན ལོཀོ ཨནུཔཱདིསེསཱཡ ནིབྦཱནདྷཱཏུཡཱ མུཙྩཏི, ཏསྨཱ སངྑཱརདུཀྑཏཱ དུཀྑཾ ལོཀསྶཱཏི ཀཏྭཱ དུཀྑམསྶ མཧབྦྷཡནྟི། ཏེན ཙ ཙཏུཏྠསྶ པདསྶ ཝིསཛྫནཱ ཡུཏྟཱ། ཏེནཱཧ བྷགཝཱ ‘‘ཨཝིཛྫཱཡ ནིཝུཏོ ལོཀོ’’ཏི།

‘‘Kiṃ su tassa mahabbhaya’’nti pañhe ‘‘dukkhamassa mahabbhaya’’nti visajjanā. Duvidhaṃ dukkhaṃ – kāyikañca cetasikañca. Yaṃ kāyikaṃ idaṃ dukkhaṃ, yaṃ cetasikaṃ idaṃ domanassaṃ. Sabbe sattā hi dukkhassa ubbijjanti, natthi bhayaṃ dukkhena samasamaṃ, kuto vā pana tassa uttaritaraṃ? Tisso dukkhatā – dukkhadukkhatā saṅkhāradukkhatā vipariṇāmadukkhatā. Tattha loko odhaso kadāci karahaci dukkhadukkhatāya muccati. Tathā vipariṇāmadukkhatāya. Taṃ kissa hetu? Honti loke appābādhāpi dīghāyukāpi. Saṅkhāradukkhatāya pana loko anupādisesāya nibbānadhātuyā muccati, tasmā saṅkhāradukkhatā dukkhaṃ lokassāti katvā dukkhamassa mahabbhayanti. Tena ca catutthassa padassa visajjanā yuttā. Tenāha bhagavā ‘‘avijjāya nivuto loko’’ti.

སཝནྟི སབྦདྷི སོཏཱ, [ཨིཙྩཱཡསྨཱ ཨཛིཏོ,]

Savanti sabbadhi sotā, [iccāyasmā ajito,]

སོཏཱནཾ ཀིཾ ནིཝཱརཎཾ།

Sotānaṃ kiṃ nivāraṇaṃ;

སོཏཱནཾ སཾཝརཾ བྲཱུཧི, ཀེན སོཏཱ པིདྷཱིཡརེ ¹³༎

Sotānaṃ saṃvaraṃ brūhi, kena sotā pidhīyare ¹⁴.

ཨིམཱནི ཙཏྟཱརི པདཱནི པུཙྪིཏཱནི། ཏེ དྭེ པཉྷཱ། ཀསྨཱ? ཨིམེཧི བཏྭཱདྷིཝཙནེན པུཙྪིཏཱ། ཨེཝཾ སམཱཔནྣསྶ ལོཀསྶ ཨེཝཾ སཾཀིལིཊྛསྶ ཀིཾ ལོཀསྶ ཝོདཱནཾ ཝུཊྛཱནམིཏི, ཨེཝཉྷི ཨཱཧ།

Imāni cattāri padāni pucchitāni. Te dve pañhā. Kasmā? Imehi batvādhivacanena pucchitā. Evaṃ samāpannassa lokassa evaṃ saṃkiliṭṭhassa kiṃ lokassa vodānaṃ vuṭṭhānamiti, evañhi āha.

སཝནྟི སབྦདྷི སོཏཱཏི། ཨསམཱཧིཏསྶ སཝནྟི ཨབྷིཛ྄ཛྷཱབྱཱཔཱདཔྤམཱདབཧུལསྶ། ཏཏྠ ཡཱ ཨབྷིཛ྄ཛྷཱ ཨཡཾ ལོབྷོ ཨཀུསལམཱུལཾ, ཡོ བྱཱཔཱདོ ཨཡཾ དོསོ ཨཀུསལམཱུལཾ, ཡོ པམཱདོ ཨཡཾ མོཧོ ཨཀུསལམཱུལཾ། ཏསྶེཝཾ ཨསམཱཧིཏསྶ ཚསུ ཨཱཡཏནེསུ ཏཎྷཱ སཝནྟི རཱུཔཏཎྷཱ སདྡཏཎྷཱ གནྡྷཏཎྷཱ རསཏཎྷཱ ཕོཊྛབྦཏཎྷཱ དྷམྨཏཎྷཱ, ཡཐཱཧ བྷགཝཱ –

Savantisabbadhi sotāti. Asamāhitassa savanti abhijjhābyāpādappamādabahulassa. Tattha yā abhijjhā ayaṃ lobho akusalamūlaṃ, yo byāpādo ayaṃ doso akusalamūlaṃ, yo pamādo ayaṃ moho akusalamūlaṃ. Tassevaṃ asamāhitassa chasu āyatanesu taṇhā savanti rūpataṇhā saddataṇhā gandhataṇhā rasataṇhā phoṭṭhabbataṇhā dhammataṇhā, yathāha bhagavā –

‘‘སཝཏཱི’’ཏི ཙ ཁོ, བྷིཀྑཝེ, ཚནྣེཏཾ ཨཛ྄ཛྷཏྟིཀཱནཾ ཨཱཡཏནཱནཾ ཨདྷིཝཙནཾ། ཙཀྑུ སཝཏི མནཱཔིཀེསུ རཱུཔེསུ, ཨམནཱཔིཀེསུ ¹⁵ པཊིཧཉྙཏཱིཏི། སོཏཾ…པེ॰… གྷཱནཾ… ཛིཝ྄ཧཱ… ཀཱཡོ… མནོ སཝཏི མནཱཔིཀེསུ དྷམྨེསུ ཨམནཱཔིཀེསུ པཊིཧཉྙཏཱིཏི། ཨིཏི སབྦཱ ཙ སཝཏི, སབྦཐཱ ཙ སཝཏི། ཏེནཱཧ ‘‘སཝནྟི སབྦདྷི སོཏཱ’’ཏི།

‘‘Savatī’’ti ca kho, bhikkhave, channetaṃ ajjhattikānaṃ āyatanānaṃ adhivacanaṃ. Cakkhu savati manāpikesu rūpesu, amanāpikesu ¹⁶ paṭihaññatīti. Sotaṃ…pe… ghānaṃ… jivhā… kāyo… mano savati manāpikesu dhammesu amanāpikesu paṭihaññatīti. Iti sabbā ca savati, sabbathā ca savati. Tenāha ‘‘savanti sabbadhi sotā’’ti.

‘‘སོཏཱནཾ ཀིཾ ནིཝཱརཎ’’ནྟི པརིཡུཊྛཱནཝིགྷཱཏཾ པུཙྪཏི, ཨིདཾ ཝོདཱནཾ། ‘‘སོཏཱནཾ སཾཝརཾ བྲཱུཧི, ཀེན སོཏཱ པིདྷཱིཡརེ’’ཏི ཨནུསཡསམུགྒྷཱཏཾ པུཙྪཏི, ཨིདཾ ཝུཊྛཱནཾ།

‘‘Sotānaṃ kiṃ nivāraṇa’’nti pariyuṭṭhānavighātaṃ pucchati, idaṃ vodānaṃ. ‘‘Sotānaṃ saṃvaraṃ brūhi, kena sotā pidhīyare’’ti anusayasamugghātaṃ pucchati, idaṃ vuṭṭhānaṃ.

ཏཏྠ ཝིསཛྫནཱ –

Tattha visajjanā –

‘‘ཡཱནི སོཏཱནི ལོཀསྨིཾ, [ཨཛིཏཱཏི བྷགཝཱ,]

‘‘Yāni sotāni lokasmiṃ, [ajitāti bhagavā,]

སཏི ཏེསཾ ནིཝཱརཎཾ།

Sati tesaṃ nivāraṇaṃ;

སོཏཱནཾ སཾཝརཾ བྲཱུམི, པཉྙཱཡེཏེ པིདྷཱིཡརེ’’ཏི༎

Sotānaṃ saṃvaraṃ brūmi, paññāyete pidhīyare’’ti.

ཀཱཡགཏཱཡ སཏིཡཱ བྷཱཝིཏཱཡ བཧུལཱིཀཏཱཡ ཙཀྑུ ནཱཝིཉྪཏི མནཱཔིཀེསུ རཱུཔེསུ, ཨམནཱཔིཀེསུ ན པཊིཧཉྙཏི, སོཏཾ…པེ॰… གྷཱནཾ… ཛིཝ྄ཧཱ… ཀཱཡོ… མནོ ནཱཝིཉྪཏི མནཱཔིཀེསུ དྷམྨེསུ, ཨམནཱཔིཀེསུ ན པཊིཧཉྙཏི། ཀེན ཀཱརཎེན? སཾཝུཏནིཝཱརིཏཏྟཱ ཨིནྡྲིཡཱནཾ ། ཀེན ཏེ སཾཝུཏནིཝཱརིཏཱ? སཏིཨཱརཀྑེན། ཏེནཱཧ བྷགཝཱ – ‘‘སཏི ཏེསཾ ནིཝཱརཎ’’ནྟི།

Kāyagatāya satiyā bhāvitāya bahulīkatāya cakkhu nāviñchati manāpikesu rūpesu, amanāpikesu na paṭihaññati, sotaṃ…pe… ghānaṃ… jivhā… kāyo… mano nāviñchati manāpikesu dhammesu, amanāpikesu na paṭihaññati. Kena kāraṇena? Saṃvutanivāritattā indriyānaṃ . Kena te saṃvutanivāritā? Satiārakkhena. Tenāha bhagavā – ‘‘sati tesaṃ nivāraṇa’’nti.

པཉྙཱཡ ཨནུསཡཱ པཧཱིཡནྟི, ཨནུསཡེསུ པཧཱིནེསུ པརིཡུཊྛཱནཱ པཧཱིཡནྟི། ཀིསྶ ¹⁷, ཨནུསཡསྶ པཧཱིནཏྟཱ? ཏཾ ཡཐཱ ཁནྡྷཝནྟསྶ རུཀྑསྶ ཨནཝསེསམཱུལུདྡྷརཎེ ཀཏེ པུཔྥཕལཔལླཝངྐུརསནྟཏི སམུཙྪིནྣཱ བྷཝཏི། ཨེཝཾ ཨནུསཡེསུ པཧཱིནེསུ པརིཡུཊྛཱནསནྟཏི སམུཙྪིནྣཱ བྷཝཏི པིདཧིཏཱ པཊིཙྪནྣཱ། ཀེན? པཉྙཱཡ། ཏེནཱཧ བྷགཝཱ ‘‘པཉྙཱཡེཏེ པིདྷཱིཡརེ’’ཏི།

Paññāya anusayā pahīyanti, anusayesu pahīnesu pariyuṭṭhānā pahīyanti. Kissa ¹⁸, anusayassa pahīnattā? Taṃ yathā khandhavantassa rukkhassa anavasesamūluddharaṇe kate pupphaphalapallavaṅkurasantati samucchinnā bhavati. Evaṃ anusayesu pahīnesu pariyuṭṭhānasantati samucchinnā bhavati pidahitā paṭicchannā. Kena? Paññāya. Tenāha bhagavā ‘‘paññāyete pidhīyare’’ti.

‘‘པཉྙཱ ཙེཝ སཏི ཙ, [ཨིཙྩཱཡསྨཱ ཨཛིཏོ,]

‘‘Paññā ceva sati ca, [iccāyasmā ajito,]

ནཱམརཱུཔཉྩ མཱརིས།

Nāmarūpañca mārisa;

ཨེཏཾ མེ པུཊྛོ པབྲཱུཧི, ཀཏྠེཏཾ ཨུཔརུཛ྄ཛྷཏཱི’’ཏི༎

Etaṃ me puṭṭho pabrūhi, katthetaṃ uparujjhatī’’ti.

‘‘ཡམེཏཾ པཉྷཾ ཨཔུཙྪི ¹⁹, ཨཛིཏ ཏཾ ཝདཱམི ཏེ།

‘‘Yametaṃ pañhaṃ apucchi ²⁰, ajita taṃ vadāmi te;

ཡཏྠ ནཱམཉྩ རཱུཔཉྩ, ཨསེསཾ ཨུཔརུཛ྄ཛྷཏི།

Yattha nāmañca rūpañca, asesaṃ uparujjhati;

ཝིཉྙཱཎསྶ ནིརོདྷེན, ཨེཏྠེཏཾ ཨུཔརུཛ྄ཛྷཏཱི’’ཏི༎

Viññāṇassa nirodhena, etthetaṃ uparujjhatī’’ti.

ཨཡཾ པཉྷེ ²¹ ཨནུསནྡྷིཾ པུཙྪཏི། ཨནུསནྡྷིཾ པུཙྪནྟོ ཀིཾ པུཙྪཏི? ཨནུཔཱདིསེསཾ ནིབྦཱནདྷཱཏུཾ། ཏཱིཎི ཙ སཙྩཱནི སངྑཏཱནི ནིརོདྷདྷམྨཱནི དུཀྑཾ སམུདཡོ མགྒོ, ནིརོདྷོ ཨསངྑཏོ། ཏཏྠ སམུདཡོ དྭཱིསུ བྷཱུམཱིསུ པཧཱིཡཏི དསྶནབྷཱུམིཡཱ ཙ བྷཱཝནཱབྷཱུམིཡཱ ཙ། དསྶནེན ཏཱིཎི སཾཡོཛནཱནི པཧཱིཡནྟི སཀྐཱཡདིཊྛི ཝིཙིཀིཙྪཱ སཱིལབྦཏཔརཱམཱསོ, བྷཱཝནཱཡ སཏྟ སཾཡོཛནཱནི པཧཱིཡནྟི ཀཱམཙྪནྡོ བྱཱཔཱདོ རཱུཔརཱགོ ཨརཱུཔརཱགོ མཱནོ ཨུདྡྷཙྩཾ ཨཝིཛྫཱཝསེསཱ ²²། ཏེདྷཱཏུཀེ ཨིམཱནི དས སཾཡོཛནཱནི པཉྩོརམྦྷཱགིཡཱནི པཉྩུདྡྷམྦྷཱགིཡཱནི།

Ayaṃ pañhe ²³ anusandhiṃ pucchati. Anusandhiṃ pucchanto kiṃ pucchati? Anupādisesaṃ nibbānadhātuṃ. Tīṇi ca saccāni saṅkhatāni nirodhadhammāni dukkhaṃ samudayo maggo, nirodho asaṅkhato. Tattha samudayo dvīsu bhūmīsu pahīyati dassanabhūmiyā ca bhāvanābhūmiyā ca. Dassanena tīṇi saṃyojanāni pahīyanti sakkāyadiṭṭhi vicikicchā sīlabbataparāmāso, bhāvanāya satta saṃyojanāni pahīyanti kāmacchando byāpādo rūparāgo arūparāgo māno uddhaccaṃ avijjāvasesā ²⁴. Tedhātuke imāni dasa saṃyojanāni pañcorambhāgiyāni pañcuddhambhāgiyāni.

༡༢. ཏཏྠ ཏཱིཎི སཾཡོཛནཱནི སཀྐཱཡདིཊྛི ཝིཙིཀིཙྪཱ སཱིལབྦཏཔརཱམཱསོ ཨནཉྙཱཏཉྙསྶཱམཱིཏིནྡྲིཡཾ ཨདྷིཊྛཱཡ ནིརུཛ྄ཛྷནྟི། སཏྟ སཾཡོཛནཱནི ཀཱམཙྪནྡོ བྱཱཔཱདོ རཱུཔརཱགོ ཨརཱུཔརཱགོ མཱནོ ཨུདྡྷཙྩཾ ཨཝིཛྫཱཝསེསཱ ཨཉྙིནྡྲིཡཾ ཨདྷིཊྛཱཡ ནིརུཛ྄ཛྷནྟི། ཡཾ པན ཨེཝཾ ཛཱནཱཏི ‘‘ཁཱིཎཱ མེ ཛཱཏཱི’’ཏི, ཨིདཾ ཁཡེ ཉཱཎཾ། ‘‘ནཱཔརཾ ཨིཏྠཏྟཱཡཱ’’ཏི པཛཱནཱཏི, ཨིདཾ ཨནུཔྤཱདེ ཉཱཎཾ། ཨིམཱནི དྭེ ཉཱཎཱནི ཨཉྙཱཏཱཝིནྡྲིཡཾ། ཏཏྠ ཡཉྩ ཨནཉྙཱཏཉྙསྶཱམཱིཏིནྡྲིཡཾ ཡཉྩ ཨཉྙིནྡྲིཡཾ, ཨིམཱནི ཨགྒཕལཾ ཨརཧཏྟཾ པཱཔུཎནྟསྶ ནིརུཛ྄ཛྷནྟི, ཏཏྠ ཡཉྩ ཁཡེ ཉཱཎཾ ཡཉྩ ཨནུཔྤཱདེ ཉཱཎཾ, ཨིམཱནི དྭེ ཉཱཎཱནི ཨེཀཔཉྙཱ།

12. Tattha tīṇi saṃyojanāni sakkāyadiṭṭhi vicikicchā sīlabbataparāmāso anaññātaññassāmītindriyaṃ adhiṭṭhāya nirujjhanti. Satta saṃyojanāni kāmacchando byāpādo rūparāgo arūparāgo māno uddhaccaṃ avijjāvasesā aññindriyaṃ adhiṭṭhāya nirujjhanti. Yaṃ pana evaṃ jānāti ‘‘khīṇā me jātī’’ti, idaṃ khaye ñāṇaṃ. ‘‘Nāparaṃ itthattāyā’’ti pajānāti, idaṃ anuppāde ñāṇaṃ. Imāni dve ñāṇāni aññātāvindriyaṃ. Tattha yañca anaññātaññassāmītindriyaṃ yañca aññindriyaṃ, imāni aggaphalaṃ arahattaṃ pāpuṇantassa nirujjhanti, tattha yañca khaye ñāṇaṃ yañca anuppāde ñāṇaṃ, imāni dve ñāṇāni ekapaññā.

ཨཔི ཙ ཨཱརམྨཎསངྐེཏེན དྭེ ནཱམཱནི ལབྦྷནྟི, ‘‘ཁཱིཎཱ མེ ཛཱཏཱི’’ཏི པཛཱནནྟསྶ ཁཡེ ཉཱཎནྟི ནཱམཾ ལབྷཏི, ‘‘ནཱཔརཾ ཨིཏྠཏྟཱཡཱ’’ཏི པཛཱནནྟསྶ ཨནུཔྤཱདེ ཉཱཎནྟི ནཱམཾ ལབྷཏི། སཱ པཛཱནནཊྛེན པཉྙཱ, ཡཐཱདིཊྛཾ ཨཔིལཱཔནཊྛེན སཏི།

Api ca ārammaṇasaṅketena dve nāmāni labbhanti, ‘‘khīṇā me jātī’’ti pajānantassa khaye ñāṇanti nāmaṃ labhati, ‘‘nāparaṃ itthattāyā’’ti pajānantassa anuppāde ñāṇanti nāmaṃ labhati. Sā pajānanaṭṭhena paññā, yathādiṭṭhaṃ apilāpanaṭṭhena sati.

༡༣. ཏཏྠ ཡེ པཉྩུཔཱདཱནཀྑནྡྷཱ, ཨིདཾ ནཱམརཱུཔཾ། ཏཏྠ ཡེ ཕསྶཔཉྩམཀཱ དྷམྨཱ, ཨིདཾ ནཱམཾ། ཡཱནི པཉྩིནྡྲིཡཱནི རཱུཔཱནི, ཨིདཾ རཱུཔཾ། ཏདུབྷཡཾ ནཱམརཱུཔཾ ཝིཉྙཱཎསམྤཡུཏྟཾ ཏསྶ ནིརོདྷཾ བྷགཝནྟཾ པུཙྪནྟོ ཨཱཡསྨཱ ཨཛིཏོ པཱརཱཡནེ ཨེཝམཱཧ –

13. Tattha ye pañcupādānakkhandhā, idaṃ nāmarūpaṃ. Tattha ye phassapañcamakā dhammā, idaṃ nāmaṃ. Yāni pañcindriyāni rūpāni, idaṃ rūpaṃ. Tadubhayaṃ nāmarūpaṃ viññāṇasampayuttaṃ tassa nirodhaṃ bhagavantaṃ pucchanto āyasmā ajito pārāyane evamāha –

‘‘པཉྙཱ ཙེཝ སཏི ཙ, ནཱམརཱུཔཉྩ མཱརིས།

‘‘Paññā ceva sati ca, nāmarūpañca mārisa;

ཨེཏཾ མེ པུཊྛོ པབྲཱུཧི, ཀཏྠེཏཾ ཨུཔརུཛ྄ཛྷཏཱི’’ཏི༎

Etaṃ me puṭṭho pabrūhi, katthetaṃ uparujjhatī’’ti.

ཏཏྠ སཏི ཙ པཉྙཱ ཙ ཙཏྟཱརི ཨིནྡྲིཡཱནི, སཏི དྭེ ཨིནྡྲིཡཱནི སཏིནྡྲིཡཉྩ སམཱདྷིནྡྲིཡཉྩ, པཉྙཱ དྭེ ཨིནྡྲིཡཱནི པཉྙིནྡྲིཡཉྩ ཝཱིརིཡིནྡྲིཡཉྩ། ཡཱ ཨིམེསུ ཙཏཱུསུ ཨིནྡྲིཡེསུ སདྡཧནཱ ཨོཀཔྤནཱ, ཨིདཾ སདྡྷིནྡྲིཡཾ། ཏཏྠ ཡཱ སདྡྷཱདྷིཔཏེཡྻཱ ཙིཏྟེཀགྒཏཱ, ཨཡཾ ཚནྡསམཱདྷི། སམཱཧིཏེ ཙིཏྟེ ཀིལེསཱནཾ ཝིཀྑམྦྷནཏཱཡ པཊིསངྑཱནབལེན ཝཱ བྷཱཝནཱབལེན ཝཱ, ཨིདཾ པཧཱནཾ། ཏཏྠ ཡེ ཨསྶཱསཔསྶཱསཱ ཝིཏཀྐཝིཙཱརཱ སཉྙཱཝེདཡིཏཱ སརསངྐཔྤཱ, ཨིམེ སངྑཱརཱ། ཨིཏི པུརིམཀོ ཙ ཚནྡསམཱདྷི, ཀིལེསཝིཀྑམྦྷནཏཱཡ ཙ པཧཱནཾ ཨིམེ ཙ སངྑཱརཱ, ཏདུབྷཡཾ ཚནྡསམཱདྷིཔྤདྷཱནསངྑཱརསམནྣཱགཏཾ ཨིདྡྷིཔཱདཾ བྷཱཝེཏི ཝིཝེཀནིསྶིཏཾ ཝིརཱགནིསྶིཏཾ ནིརོདྷནིསྶིཏཾ ཝོསྶགྒཔརིཎཱམིཾ། ཏཏྠ ཡཱ ཝཱིརིཡཱདྷིཔཏེཡྻཱ ཙིཏྟེཀགྒཏཱ, ཨཡཾ ཝཱིརིཡསམཱདྷི…པེ॰… ཏཏྠ ཡཱ ཙིཏྟཱདྷིཔཏེཡྻཱ ཙིཏྟེཀགྒཏཱ, ཨཡཾ ཙིཏྟསམཱདྷི…པེ॰… ཏཏྠ ཡཱ ཝཱིམཾསཱདྷིཔཏེཡྻཱ ཙིཏྟེཀགྒཏཱ, ཨཡཾ ཝཱིམཾསཱསམཱདྷི། སམཱཧིཏེ ཙིཏྟེ ཀིལེསཱནཾ ཝིཀྑམྦྷནཏཱཡ པཊིསངྑཱནབལེན ཝཱ བྷཱཝནཱབལེན ཝཱ, ཨིདཾ པཧཱནཾ། ཏཏྠ ཡེ ཨསྶཱསཔསྶཱསཱ ཝིཏཀྐཝིཙཱརཱ སཉྙཱཝེདཡིཏཱ སརསངྐཔྤཱ, ཨིམེ སངྑཱརཱ། ཨིཏི པུརིམཀོ ཙ ཝཱིམཾསཱསམཱདྷི, ཀིལེསཝིཀྑམྦྷནཏཱཡ ཙ པཧཱནཾ ཨིམེ ཙ སངྑཱརཱ, ཏདུབྷཡཾ ཝཱིམཾསཱསམཱདྷིཔྤདྷཱནསངྑཱརསམནྣཱགཏཾ ཨིདྡྷིཔཱདཾ བྷཱཝེཏི ཝིཝེཀནིསྶིཏཾ ཝིརཱགནིསྶིཏཾ ནིརོདྷནིསྶིཏཾ ཝོསྶགྒཔརིཎཱམིཾ།

Tattha sati ca paññā ca cattāri indriyāni, sati dve indriyāni satindriyañca samādhindriyañca, paññā dve indriyāni paññindriyañca vīriyindriyañca. Yā imesu catūsu indriyesu saddahanā okappanā, idaṃ saddhindriyaṃ. Tattha yā saddhādhipateyyā cittekaggatā, ayaṃ chandasamādhi. Samāhite citte kilesānaṃ vikkhambhanatāya paṭisaṅkhānabalena vā bhāvanābalena vā, idaṃ pahānaṃ. Tattha ye assāsapassāsā vitakkavicārā saññāvedayitā sarasaṅkappā, ime saṅkhārā. Iti purimako ca chandasamādhi, kilesavikkhambhanatāya ca pahānaṃ ime ca saṅkhārā, tadubhayaṃ chandasamādhippadhānasaṅkhārasamannāgataṃ iddhipādaṃ bhāveti vivekanissitaṃ virāganissitaṃ nirodhanissitaṃ vossaggapariṇāmiṃ. Tattha yā vīriyādhipateyyā cittekaggatā, ayaṃ vīriyasamādhi…pe… tattha yā cittādhipateyyā cittekaggatā, ayaṃ cittasamādhi…pe… tattha yā vīmaṃsādhipateyyā cittekaggatā, ayaṃ vīmaṃsāsamādhi. Samāhite citte kilesānaṃ vikkhambhanatāya paṭisaṅkhānabalena vā bhāvanābalena vā, idaṃ pahānaṃ. Tattha ye assāsapassāsā vitakkavicārā saññāvedayitā sarasaṅkappā, ime saṅkhārā. Iti purimako ca vīmaṃsāsamādhi, kilesavikkhambhanatāya ca pahānaṃ ime ca saṅkhārā, tadubhayaṃ vīmaṃsāsamādhippadhānasaṅkhārasamannāgataṃ iddhipādaṃ bhāveti vivekanissitaṃ virāganissitaṃ nirodhanissitaṃ vossaggapariṇāmiṃ.

༡༤. སབྦོ སམཱདྷི ཉཱཎམཱུལཀོ ཉཱཎཔུབྦངྒམོ ཉཱཎཱནུཔརིཝཏྟི།

14. Sabbo samādhi ñāṇamūlako ñāṇapubbaṅgamo ñāṇānuparivatti.

ཡཐཱ པུརེ ཏཐཱ པཙྪཱ, ཡཐཱ པཙྪཱ ཏཐཱ པུརེ།

Yathā pure tathā pacchā, yathā pacchā tathā pure;

ཡཐཱ དིཝཱ ཏཐཱ རཏྟིཾ ²⁵, ཡཐཱ རཏྟིཾ ཏཐཱ དིཝཱ༎

Yathā divā tathā rattiṃ ²⁶, yathā rattiṃ tathā divā.

ཨིཏི ཝིཝཊེན ཙེཏསཱ ཨཔརིཡོནདྡྷེན སཔྤབྷཱསཾ ཙིཏྟཾ བྷཱཝེཏི། པཉྩིནྡྲིཡཱནི ཀུསལཱནི ཙིཏྟསཧབྷཱུནི ཙིཏྟེ ཨུཔྤཛྫམཱནེ ཨུཔྤཛྫནྟི, ཙིཏྟེ ནིརུཛ྄ཛྷམཱནེ ནིརུཛ྄ཛྷནྟི། ནཱམརཱུཔཉྩ ཝིཉྙཱཎཧེཏུཀཾ ཝིཉྙཱཎཔཙྩཡཱ ནིབྦཏྟཾ, ཏསྶ མགྒེན ཧེཏུ ཨུཔཙྪིནྣོ, ཝིཉྙཱཎཾ ཨནཱཧཱརཾ ཨནབྷིནནྡིཏཾ ཨཔྤཊིསནྡྷིཀཾ ཏཾ ནིརུཛ྄ཛྷཏི། ནཱམརཱུཔམཔི ཨཧེཏུ ཨཔྤཙྩཡཾ པུནབྦྷཝཾ ན ནིབྦཏྟཡཏི ²⁷། ཨེཝཾ ཝིཉྙཱཎསྶ ནིརོདྷཱ པཉྙཱ ཙ སཏི ཙ ནཱམརཱུཔཉྩ ནིརུཛ྄ཛྷཏི། ཏེནཱཧ བྷགཝཱ –

Iti vivaṭena cetasā apariyonaddhena sappabhāsaṃ cittaṃ bhāveti. Pañcindriyāni kusalāni cittasahabhūni citte uppajjamāne uppajjanti, citte nirujjhamāne nirujjhanti. Nāmarūpañca viññāṇahetukaṃ viññāṇapaccayā nibbattaṃ, tassa maggena hetu upacchinno, viññāṇaṃ anāhāraṃ anabhinanditaṃ appaṭisandhikaṃ taṃ nirujjhati. Nāmarūpamapi ahetu appaccayaṃ punabbhavaṃ na nibbattayati ²⁸. Evaṃ viññāṇassa nirodhā paññā ca sati ca nāmarūpañca nirujjhati. Tenāha bhagavā –

‘‘ཡམེཏཾ པཉྷཾ ཨཔུཙྪི, ཨཛིཏ ཏཾ ཝདཱམི ཏེ།

‘‘Yametaṃ pañhaṃ apucchi, ajita taṃ vadāmi te;

ཡཏྠ ནཱམཉྩ རཱུཔཉྩ, ཨསེསཾ ཨུཔརུཛ྄ཛྷཏི།

Yattha nāmañca rūpañca, asesaṃ uparujjhati;

ཝིཉྙཱཎསྶ ནིརོདྷེན, ཨེཏྠེཏཾ ཨུཔརུཛ྄ཛྷཏཱི’’ཏི༎

Viññāṇassa nirodhena, etthetaṃ uparujjhatī’’ti.

‘‘ཡེ ཙ ²⁹ སངྑཱཏདྷམྨཱསེ, [ཨིཙྩཱཡསྨཱ ཨཛིཏོ]

‘‘Ye ca ³⁰ saṅkhātadhammāse, [iccāyasmā ajito]

ཡེ ཙ སེཀྑཱ པུཐཱུ ཨིདྷ།

Ye ca sekkhā puthū idha;

ཏེསཾ མེ ནིཔཀོ ཨིརིཡཾ, པུཊྛོ པབྲཱུཧི མཱརིསཱ’’ཏི༎

Tesaṃ me nipako iriyaṃ, puṭṭho pabrūhi mārisā’’ti.

༡༥. ཨིམཱནི ཏཱིཎི པདཱནི པུཙྪིཏཱནི, ཏེ ཏཡོ པཉྷཱ། ཀིསྶ? སེཁཱསེཁཝིཔསྶནཱཔུབྦངྒམཔྤཧཱནཡོགེན, ཨེཝཉྷི ཨཱཧ། ‘‘ཡེ ཙ སངྑཱཏདྷམྨཱསེ’’ཏི ཨརཧཏྟཾ པུཙྪཏི, ‘‘ཡེ ཙ སེཁཱ པུཐཱུ ཨིདྷཱ’’ཏི སེཁཾ པུཙྪཏི, ‘‘ཏེསཾ མེ ནིཔཀོ ཨིརིཡཾ, པུཊྛོ པབྲཱུཧི མཱརིསཱ’’ཏི ཝིཔསྶནཱཔུབྦངྒམཾ པཧཱནཾ པུཙྪཏི།

15. Imāni tīṇi padāni pucchitāni, te tayo pañhā. Kissa? Sekhāsekhavipassanāpubbaṅgamappahānayogena, evañhi āha. ‘‘Ye ca saṅkhātadhammāse’’ti arahattaṃ pucchati, ‘‘ye ca sekhā puthū idhā’’ti sekhaṃ pucchati, ‘‘tesaṃ me nipako iriyaṃ, puṭṭho pabrūhi mārisā’’ti vipassanāpubbaṅgamaṃ pahānaṃ pucchati.

ཏཏྠ ཝིསཛྫནཱ –

Tattha visajjanā –

‘‘ཀཱམེསུ ནཱབྷིགིཛ྄ཛྷེཡྻ, [ཨཛིཏཱཏི བྷགཝཱ]

‘‘Kāmesu nābhigijjheyya, [ajitāti bhagavā]

མནསཱནཱཝིལོ སིཡཱ།

Manasānāvilo siyā;

ཀུསལོ སབྦདྷམྨཱནཾ, སཏོ བྷིཀྑུ པརིབྦཛེ’’ཏི༎

Kusalo sabbadhammānaṃ, sato bhikkhu paribbaje’’ti.

བྷགཝཏོ སབྦཾ ཀཱཡཀམྨཾ ཉཱཎཔུབྦངྒམཾ ཉཱཎཱནུཔརིཝཏྟི, སབྦཾ ཝཙཱིཀམྨཾ ཉཱཎཔུབྦངྒམཾ ཉཱཎཱནུཔརིཝཏྟི, སབྦཾ མནོཀམྨཾ ཉཱཎཔུབྦངྒམཾ ཉཱཎཱནུཔརིཝཏྟི། ཨཏཱིཏེ ཨཾསེ ཨཔྤཊིཧཏཉཱཎདསྶནཾ, ཨནཱགཏེ ཨཾསེ ཨཔྤཊིཧཏཉཱཎདསྶནཾ, པཙྩུཔྤནྣེ ཨཾསེ ཨཔྤཊིཧཏཉཱཎདསྶནཾ།

Bhagavato sabbaṃ kāyakammaṃ ñāṇapubbaṅgamaṃ ñāṇānuparivatti, sabbaṃ vacīkammaṃ ñāṇapubbaṅgamaṃ ñāṇānuparivatti, sabbaṃ manokammaṃ ñāṇapubbaṅgamaṃ ñāṇānuparivatti. Atīte aṃse appaṭihatañāṇadassanaṃ, anāgate aṃse appaṭihatañāṇadassanaṃ, paccuppanne aṃse appaṭihatañāṇadassanaṃ.

ཀོ ཙ ཉཱཎདསྶནསྶ པཊིགྷཱཏོ? ཡཾ ཨནིཙྩེ དུཀྑེ ཨནཏྟནི ཙ ཨཉྙཱཎཾ ཨདསྶནཾ, ཨཡཾ ཉཱཎདསྶནསྶ པཊིགྷཱཏོ། ཡཐཱ ཨིདྷ པུརིསོ ཏཱརཀརཱུཔཱནི པསྶེཡྻ, ནོ ཙ གཎནསངྐེཏེན ཛཱནེཡྻ, ཨཡཾ ཉཱཎདསྶནསྶ པཊིགྷཱཏོ།

Ko ca ñāṇadassanassa paṭighāto? Yaṃ anicce dukkhe anattani ca aññāṇaṃ adassanaṃ, ayaṃ ñāṇadassanassa paṭighāto. Yathā idha puriso tārakarūpāni passeyya, no ca gaṇanasaṅketena jāneyya, ayaṃ ñāṇadassanassa paṭighāto.

བྷགཝཏོ པན ཨཔྤཊིཧཏཉཱཎདསྶནཾ, ཨནཱཝརཎཉཱཎདསྶནཱ ཧི བུདྡྷཱ བྷགཝནྟོ། ཏཏྠ སེཁེན དྭཱིསུ དྷམྨེསུ ཙིཏྟཾ རཀྑིཏབྦཾ གེདྷཱ ཙ རཛནཱིཡེསུ དྷམྨེསུ, དོསཱ ཙ པརིཡུཊྛཱནཱིཡེསུ། ཏཏྠ ཡཱ ཨིཙྪཱ མུཙྪཱ པཏྠནཱ པིཡཱཡནཱ ཀཱིལ༹ནཱ, ཏཾ བྷགཝཱ ནིཝཱརེནྟོ ཨེཝམཱཧ ‘‘ཀཱམེསུ ནཱབྷིགིཛ྄ཛྷེཡྻཱ’’ཏི།

Bhagavato pana appaṭihatañāṇadassanaṃ, anāvaraṇañāṇadassanā hi buddhā bhagavanto. Tattha sekhena dvīsu dhammesu cittaṃ rakkhitabbaṃ gedhā ca rajanīyesu dhammesu, dosā ca pariyuṭṭhānīyesu. Tattha yā icchā mucchā patthanā piyāyanā kīḷanā, taṃ bhagavā nivārento evamāha ‘‘kāmesu nābhigijjheyyā’’ti.

‘‘མནསཱནཱཝིལོ སིཡཱ’’ཏི པརིཡུཊྛཱནཝིགྷཱཏཾ ཨཱཧ། ཏཐཱ ཧི སེཁོ ཨབྷིགིཛ྄ཛྷནྟོ ཨསམུཔྤནྣཉྩ ཀིལེསཾ ཨུཔྤཱདེཏི, ཨུཔྤནྣཉྩ ཀིལེསཾ ཕཱཏིཾ ཀརོཏི། ཡོ པན ཨནཱཝིལསངྐཔྤོ ཨནབྷིགིཛ྄ཛྷནྟོ ཝཱཡམཏི, སོ ཨནུཔྤནྣཱནཾ པཱཔཀཱནཾ ཨཀུསལཱནཾ དྷམྨཱནཾ ཨནུཔྤཱདཱཡ ཚནྡཾ ཛནེཏི ཝཱཡམཏི ཝཱིརིཡཾ ཨཱརབྷཏི ཙིཏྟཾ པགྒཎྷཱཏི པདཧཏི། སོ ཨུཔྤནྣཱནཾ པཱཔཀཱནཾ ཨཀུསལཱནཾ དྷམྨཱནཾ པཧཱནཱཡ ཚནྡཾ ཛནེཏི ཝཱཡམཏི ཝཱིརིཡཾ ཨཱརབྷཏི ཙིཏྟཾ པགྒཎྷཱཏི པདཧཏི། སོ ཨནུཔྤནྣཱནཾ ཀུསལཱནཾ དྷམྨཱནཾ ཨུཔྤཱདཱཡ ཚནྡཾ ཛནེཏི ཝཱཡམཏི ཝཱིརིཡཾ ཨཱརབྷཏི ཙིཏྟཾ པགྒཎྷཱཏི པདཧཏི། སོ ཨུཔྤནྣཱནཾ ཀུསལཱནཾ དྷམྨཱནཾ ཋིཏིཡཱ ཨསམྨོསཱཡ བྷིཡྻོབྷཱཝཱཡ ཝེཔུལླཱཡ བྷཱཝནཱཡ པཱརིཔཱུརིཡཱ ཚནྡཾ ཛནེཏི ཝཱཡམཏི ཝཱིརིཡཾ ཨཱརབྷཏི ཙིཏྟཾ པགྒཎྷཱཏི པདཧཏི།

‘‘Manasānāvilo siyā’’ti pariyuṭṭhānavighātaṃ āha. Tathā hi sekho abhigijjhanto asamuppannañca kilesaṃ uppādeti, uppannañca kilesaṃ phātiṃ karoti. Yo pana anāvilasaṅkappo anabhigijjhanto vāyamati, so anuppannānaṃ pāpakānaṃ akusalānaṃ dhammānaṃ anuppādāya chandaṃ janeti vāyamati vīriyaṃ ārabhati cittaṃ paggaṇhāti padahati. So uppannānaṃ pāpakānaṃ akusalānaṃ dhammānaṃ pahānāya chandaṃ janeti vāyamati vīriyaṃ ārabhati cittaṃ paggaṇhāti padahati. So anuppannānaṃ kusalānaṃ dhammānaṃ uppādāya chandaṃ janeti vāyamati vīriyaṃ ārabhati cittaṃ paggaṇhāti padahati. So uppannānaṃ kusalānaṃ dhammānaṃ ṭhitiyā asammosāya bhiyyobhāvāya vepullāya bhāvanāya pāripūriyā chandaṃ janeti vāyamati vīriyaṃ ārabhati cittaṃ paggaṇhāti padahati.

༡༦. ཀཏམེ ³¹ ཨནུཔྤནྣཱ པཱཔཀཱ ཨཀུསལཱ དྷམྨཱ? ཀཱམཝིཏཀྐོ བྱཱཔཱདཝིཏཀྐོ ཝིཧིཾསཱཝིཏཀྐོ, ཨིམེ ཨནུཔྤནྣཱ པཱཔཀཱ ཨཀུསལཱ དྷམྨཱ། ཀཏམེ ཨུཔྤནྣཱ པཱཔཀཱ ཨཀུསལཱ དྷམྨཱ? ཨནུསཡཱ ཨཀུསལམཱུལཱནི, ཨིམེ ཨུཔྤནྣཱ པཱཔཀཱ ཨཀུསལཱ དྷམྨཱ། ཀཏམེ ཨནུཔྤནྣཱ ཀུསལཱ དྷམྨཱ? ཡཱནི སོཏཱཔནྣསྶ ཨིནྡྲིཡཱནི, ཨིམེ ཨནུཔྤནྣཱ ཀུསལཱ དྷམྨཱ། ཀཏམེ ཨུཔྤནྣཱ ཀུསལཱ དྷམྨཱ? ཡཱནི ཨཊྛམཀསྶ ཨིནྡྲིཡཱནི, ཨིམེ ཨུཔྤནྣཱ ཀུསལཱ དྷམྨཱ།

16. Katame ³² anuppannā pāpakā akusalā dhammā? Kāmavitakko byāpādavitakko vihiṃsāvitakko, ime anuppannā pāpakā akusalā dhammā. Katame uppannā pāpakā akusalā dhammā? Anusayā akusalamūlāni, ime uppannā pāpakā akusalā dhammā. Katame anuppannā kusalā dhammā? Yāni sotāpannassa indriyāni, ime anuppannā kusalā dhammā. Katame uppannā kusalā dhammā? Yāni aṭṭhamakassa indriyāni, ime uppannā kusalā dhammā.

ཡེན ཀཱམཝིཏཀྐཾ ཝཱརེཏི, ཨིདཾ སཏིནྡྲིཡཾ། ཡེན བྱཱཔཱདཝིཏཀྐཾ ཝཱརེཏི, ཨིདཾ སམཱདྷིནྡྲིཡཾ། ཡེན ཝིཧིཾསཱཝིཏཀྐཾ ཝཱརེཏི, ཨིདཾ ཝཱིརིཡིནྡྲིཡཾ།

Yena kāmavitakkaṃ vāreti, idaṃ satindriyaṃ. Yena byāpādavitakkaṃ vāreti, idaṃ samādhindriyaṃ. Yena vihiṃsāvitakkaṃ vāreti, idaṃ vīriyindriyaṃ.

ཡེན ཨུཔྤནྣུཔྤནྣེ པཱཔཀེ ཨཀུསལེ དྷམྨེ པཛཧཏི ཝིནོདེཏི བྱནྟཱིཀརོཏི ཨནབྷཱཝཾ གམེཏི ནཱདྷིཝཱསེཏི, ཨིདཾ པཉྙིནྡྲིཡཾ། ཡཱ ཨིམེསུ ཙཏཱུསུ ཨིནྡྲིཡེསུ སདྡཧནཱ ཨོཀཔྤནཱ, ཨིདཾ སདྡྷིནྡྲིཡཾ།

Yena uppannuppanne pāpake akusale dhamme pajahati vinodeti byantīkaroti anabhāvaṃ gameti nādhivāseti, idaṃ paññindriyaṃ. Yā imesu catūsu indriyesu saddahanā okappanā, idaṃ saddhindriyaṃ.

ཏཏྠ སདྡྷིནྡྲིཡཾ ཀཏྠ དཊྛབྦཾ? ཙཏཱུསུ སོཏཱཔཏྟིཡངྒེསུ། ཝཱིརིཡིནྡྲིཡཾ ཀཏྠ དཊྛབྦཾ? ཙཏཱུསུ སམྨཔྤདྷཱནེསུ། སཏིནྡྲིཡཾ ཀཏྠ དཊྛབྦཾ? ཙཏཱུསུ སཏིཔཊྛཱནེསུ། སམཱདྷིནྡྲིཡཾ ཀཏྠ དཊྛབྦཾ? ཙཏཱུསུ ཛྷཱནེསུ། པཉྙིནྡྲིཡཾ ཀཏྠ དཊྛབྦཾ? ཙཏཱུསུ ཨརིཡསཙྩེསུ། ཨེཝཾ སེཁོ སབྦེཧི ཀུསལེཧི དྷམྨེཧི ཨཔྤམཏྟོ ཝུཏྟོ བྷགཝཏཱ ཨནཱཝིལཏཱཡ མནསཱ། ཏེནཱཧ བྷགཝཱ ‘‘མནསཱནཱཝིལོསིཡཱ’’ཏི།

Tattha saddhindriyaṃ kattha daṭṭhabbaṃ? Catūsu sotāpattiyaṅgesu. Vīriyindriyaṃ kattha daṭṭhabbaṃ? Catūsu sammappadhānesu. Satindriyaṃ kattha daṭṭhabbaṃ? Catūsu satipaṭṭhānesu. Samādhindriyaṃ kattha daṭṭhabbaṃ? Catūsu jhānesu. Paññindriyaṃ kattha daṭṭhabbaṃ? Catūsu ariyasaccesu. Evaṃ sekho sabbehi kusalehi dhammehi appamatto vutto bhagavatā anāvilatāya manasā. Tenāha bhagavā ‘‘manasānāvilosiyā’’ti.

༡༧. ‘‘ཀུསལོ སབྦདྷམྨཱན’’ནྟི ལོཀོ ནཱམ ཏིཝིདྷོ ཀིལེསལོཀོ བྷཝལོཀོ ཨིནྡྲིཡལོཀོ། ཏཏྠ ཀིལེསལོཀེན བྷཝལོཀོ སམུདཱགཙྪཏི, སོ ཨིནྡྲིཡཱནི ནིབྦཏྟེཏི, ཨིནྡྲིཡེསུ བྷཱཝིཡམཱནེསུ ནེཡྻསྶ པརིཉྙཱ བྷཝཏི། སཱ དུཝིདྷེན ཨུཔཔརིཀྑིཏབྦཱ དསྶནཔརིཉྙཱཡ ཙ བྷཱཝནཱཔརིཉྙཱཡ ཙ། ཡདཱ ཧི སེཁོ ཉེཡྻཾ པརིཛཱནཱཏི, ཏདཱ ནིབྦིདཱསཧགཏེཧི སཉྙཱམནསིཀཱརེཧི ནེཡྻཾ པརིཉྙཱཏཾ བྷཝཏི། ཏསྶ དྭེ དྷམྨཱ ཀོསལླཾ གཙྪནྟི – དསྶནཀོསལླཉྩ བྷཱཝནཱཀོསལླཉྩ།

17. ‘‘Kusalo sabbadhammāna’’nti loko nāma tividho kilesaloko bhavaloko indriyaloko. Tattha kilesalokena bhavaloko samudāgacchati, so indriyāni nibbatteti, indriyesu bhāviyamānesu neyyassa pariññā bhavati. Sā duvidhena upaparikkhitabbā dassanapariññāya ca bhāvanāpariññāya ca. Yadā hi sekho ñeyyaṃ parijānāti, tadā nibbidāsahagatehi saññāmanasikārehi neyyaṃ pariññātaṃ bhavati. Tassa dve dhammā kosallaṃ gacchanti – dassanakosallañca bhāvanākosallañca.

ཏཾ ཉཱཎཾ པཉྩཝིདྷེན ཝེདིཏབྦཾः ཨབྷིཉྙཱ པརིཉྙཱ པཧཱནཾ བྷཱཝནཱ སཙྪིཀིརིཡཱ། ཏཏྠ ཀཏམཱ ཨབྷིཉྙཱ? ཡཾ དྷམྨཱནཾ སལཀྑཎེ ཉཱཎཾ དྷམྨཔཊིསམྦྷིདཱ ཙ ཨཏྠཔཊིསམྦྷིདཱ ཙ, ཨཡཾ ཨབྷིཉྙཱ།

Taṃ ñāṇaṃ pañcavidhena veditabbaṃः abhiññā pariññā pahānaṃ bhāvanā sacchikiriyā. Tattha katamā abhiññā? Yaṃ dhammānaṃ salakkhaṇe ñāṇaṃ dhammapaṭisambhidā ca atthapaṭisambhidā ca, ayaṃ abhiññā.

ཏཏྠ ཀཏམཱ པརིཉྙཱ? ཨེཝཾ ཨབྷིཛཱནིཏྭཱ ཡཱ པརིཛཱནནཱ ‘‘ཨིདཾ ཀུསལཾ, ཨིདཾ ཨཀུསལཾ, ཨིདཾ སཱཝཛྫཾ, ཨིདཾ ཨནཝཛྫཾ, ཨིདཾ ཀཎྷཾ, ཨིདཾ སུཀྐཾ, ཨིདཾ སེཝིཏབྦཾ, ཨིདཾ ན སེཝིཏབྦཾ, ཨིམེ དྷམྨཱ ཨེཝཾགཧིཏཱ, ཨིདཾ ཕལཾ ནིབྦཏྟེནྟི ³³, ཏེསཾ ཨེཝཾགཧིཏཱནཾ ཨཡཾ ཨཏྠོ’’ཏི, ཨཡཾ པརིཉྙཱ།

Tattha katamā pariññā? Evaṃ abhijānitvā yā parijānanā ‘‘idaṃ kusalaṃ, idaṃ akusalaṃ, idaṃ sāvajjaṃ, idaṃ anavajjaṃ, idaṃ kaṇhaṃ, idaṃ sukkaṃ, idaṃ sevitabbaṃ, idaṃ na sevitabbaṃ, ime dhammā evaṃgahitā, idaṃ phalaṃ nibbattenti ³⁴, tesaṃ evaṃgahitānaṃ ayaṃ attho’’ti, ayaṃ pariññā.

ཨེཝཾ པརིཛཱནིཏྭཱ ཏཡོ དྷམྨཱ ཨཝསིཊྛཱ བྷཝནྟི པཧཱཏབྦཱ བྷཱཝེཏབྦཱ སཙྪིཀཱཏབྦཱ ཙ། ཏཏྠ ཀཏམེ དྷམྨཱ པཧཱཏབྦཱ? ཡེ ཨཀུསལཱ། ཏཏྠ ཀཏམེ དྷམྨཱ བྷཱཝེཏབྦཱ? ཡེ ཀུསལཱ། ཏཏྠ ཀཏམེ དྷམྨཱ སཙྪིཀཱཏབྦཱ? ཡཾ ཨསངྑཏཾ། ཡོ ཨེཝཾ ཛཱནཱཏི ཨཡཾ ཝུཙྩཏི ཨཏྠཀུསལོ དྷམྨཀུསལོ ཀལྱཱཎཏཱཀུསལོ ཕལཏཱཀུསལོ, ཨཱཡཀུསལོ ཨཔཱཡཀུསལོ ཨུཔཱཡཀུསལོ མཧཏཱ ཀོསལླེན སམནྣཱགཏོཏི, ཏེནཱཧ བྷགཝཱ ‘‘ཀུསལོ སབྦདྷམྨཱན’’ནྟི།

Evaṃ parijānitvā tayo dhammā avasiṭṭhā bhavanti pahātabbā bhāvetabbā sacchikātabbā ca. Tattha katame dhammā pahātabbā? Ye akusalā. Tattha katame dhammā bhāvetabbā? Ye kusalā. Tattha katame dhammā sacchikātabbā? Yaṃ asaṅkhataṃ. Yo evaṃ jānāti ayaṃ vuccati atthakusalo dhammakusalo kalyāṇatākusalo phalatākusalo, āyakusalo apāyakusalo upāyakusalo mahatā kosallena samannāgatoti, tenāha bhagavā ‘‘kusalo sabbadhammāna’’nti.

‘‘སཏོ བྷིཀྑུ པརིབྦཛེ’’ཏི ཏེན དིཊྛདྷམྨསུཁཝིཧཱརཏྠཾ ཨབྷིཀྐནྟེ པཊིཀྐནྟེ ཨཱལོཀིཏེ ཝིལོཀིཏེ སམིཉྫིཏེ ³⁵ པསཱརིཏེ སངྒྷཱཊིཔཏྟཙཱིཝརདྷཱརཎེ ཨསིཏེ པཱིཏེ ཁཱཡིཏེ སཱཡིཏེ ཨུཙྩཱརཔསྶཱཝཀམྨེ གཏེ ཋིཏེ ནིསིནྣེ སུཏྟེ ཛཱགརིཏེ བྷཱསིཏེ ཏུཎྷིབྷཱཝེ སཏེན སམྤཛཱནེན ཝིཧཱཏབྦཾ། ཨིམཱ དྭེ ཙརིཡཱ ཨནུཉྙཱཏཱ བྷགཝཏཱ ཨེཀཱ ཝིསུདྡྷཱནཾ, ཨེཀཱ ཝིསུཛ྄ཛྷནྟཱནཾ། ཀེ ཝིསུདྡྷཱ? ཨརཧནྟོ། ཀེ ཝིསུཛ྄ཛྷནྟཱ? སེཀྑཱ། ཀཏཀིཙྩཱནི ཧི ཨརཧཏོ ཨིནྡྲིཡཱནི། ཡཾ བོཛ྄ཛྷཾ, ཏཾ ཙཏུབྦིདྷཾ དུཀྑསྶ པརིཉྙཱབྷིསམཡེན སམུདཡསྶ པཧཱནཱབྷིསམཡེན མགྒསྶ བྷཱཝནཱབྷིསམཡེན ནིརོདྷསྶ སཙྪིཀིརིཡཱབྷིསམཡེན, ཨིདཾ ཙཏུབྦིདྷཾ བོཛ྄ཛྷཾ ཡོ ཨེཝཾ ཛཱནཱཏི, ཨཡཾ ཝུཙྩཏི སཏོ ཨབྷིཀྐམཏི སཏོ པཊིཀྐམཏི ཁཡཱ རཱགསྶ ཁཡཱ དོསསྶ ཁཡཱ མོཧསྶ། ཏེནཱཧ བྷགཝཱ ‘‘སཏོ བྷིཀྑུ པརིབྦཛེ’’ཏི, ཏེནཱཧ –

‘‘Sato bhikkhu paribbaje’’ti tena diṭṭhadhammasukhavihāratthaṃ abhikkante paṭikkante ālokite vilokite samiñjite ³⁶ pasārite saṅghāṭipattacīvaradhāraṇe asite pīte khāyite sāyite uccārapassāvakamme gate ṭhite nisinne sutte jāgarite bhāsite tuṇhibhāve satena sampajānena vihātabbaṃ. Imā dve cariyā anuññātā bhagavatā ekā visuddhānaṃ, ekā visujjhantānaṃ. Ke visuddhā? Arahanto. Ke visujjhantā? Sekkhā. Katakiccāni hi arahato indriyāni. Yaṃ bojjhaṃ, taṃ catubbidhaṃ dukkhassa pariññābhisamayena samudayassa pahānābhisamayena maggassa bhāvanābhisamayena nirodhassa sacchikiriyābhisamayena, idaṃ catubbidhaṃ bojjhaṃ yo evaṃ jānāti, ayaṃ vuccati sato abhikkamati sato paṭikkamati khayā rāgassa khayā dosassa khayā mohassa. Tenāha bhagavā ‘‘sato bhikkhu paribbaje’’ti, tenāha –

‘‘ཀཱམེསུ ནཱབྷིགིཛ྄ཛྷེཡྻ, [ཨཛིཏཱཏི བྷགཝཱ]

‘‘Kāmesu nābhigijjheyya, [ajitāti bhagavā]

མནསཱནཱཝིལོ སིཡཱ།

Manasānāvilo siyā;

ཀུསལོ སབྦདྷམྨཱནཾ, སཏོ བྷིཀྑུ པརིབྦཛེ’’ཏི༎

Kusalo sabbadhammānaṃ, sato bhikkhu paribbaje’’ti.

ཨེཝཾ པུཙྪིཏབྦཾ, ཨེཝཾ ཝིསཛྫིཏབྦཾ། སུཏྟསྶ ཙ ཨནུགཱིཏི ཨཏྠཏོ ཙ བྱཉྫནཏོ ཙ སམཱནེཏབྦཱ ³⁷། ཨཏྠཱཔགཏཾ ཧི བྱཉྫནཾ སམྥཔྤལཱཔཾ བྷཝཏི། དུནྣིཀྑིཏྟསྶ པདབྱཉྫནསྶ ཨཏྠོཔི དུནྣཡོ བྷཝཏི, ཏསྨཱ ཨཏྠབྱཉྫནཱུཔེཏཾ སངྒཱཡིཏབྦཾ། སུཏྟཉྩ པཝིཙིནིཏབྦཾ། ཀིཾ ཨིདཾ སུཏྟཾ ཨཱཧཙྩ ཝཙནཾ ཨནུསནྡྷིཝཙནཾ ནཱིཏཏྠཾ ནེཡྻཏྠཾ སཾཀིལེསབྷཱགིཡཾ ནིབྦེདྷབྷཱགིཡཾ ཨསེཀྑབྷཱགིཡཾ? ཀུཧིཾ ཨིམསྶ སུཏྟསྶ སབྦཱནི སཙྩཱནི པསྶིཏབྦཱནི, ཨཱདིམཛ྄ཛྷཔརིཡོསཱནེཏི? ཨེཝཾ སུཏྟཾ པཝིཙེཏབྦཾ། ཏེནཱཧ ཨཱཡསྨཱ མཧཱཀཙྩཱཡནོ – ‘‘ཡཾ པུཙྪིཏཉྩ ཝིསྶཛྫིཏཉྩ, སུཏྟསྶ ཡཱ ཙ ཨནུགཱིཏཱི’’ཏི།

Evaṃ pucchitabbaṃ, evaṃ visajjitabbaṃ. Suttassa ca anugīti atthato ca byañjanato ca samānetabbā ³⁸. Atthāpagataṃ hi byañjanaṃ samphappalāpaṃ bhavati. Dunnikkhittassa padabyañjanassa atthopi dunnayo bhavati, tasmā atthabyañjanūpetaṃ saṅgāyitabbaṃ. Suttañca pavicinitabbaṃ. Kiṃ idaṃ suttaṃ āhacca vacanaṃ anusandhivacanaṃ nītatthaṃ neyyatthaṃ saṃkilesabhāgiyaṃ nibbedhabhāgiyaṃ asekkhabhāgiyaṃ? Kuhiṃ imassa suttassa sabbāni saccāni passitabbāni, ādimajjhapariyosāneti? Evaṃ suttaṃ pavicetabbaṃ. Tenāha āyasmā mahākaccāyano – ‘‘yaṃ pucchitañca vissajjitañca, suttassa yā ca anugītī’’ti.

ནིཡུཏྟོ ཝིཙཡོ ཧཱརོ།

Niyutto vicayo hāro.

Next: ༣. ཡུཏྟིཧཱརཝིབྷངྒོ • 3. Yuttihāravibhaṅgo

Footnotes:

1. ཝིསྶཛྫནཾ (སཱི॰ ཀ॰)

2. vissajjanaṃ (sī. ka.)

3. པསྶ སུ॰ ནི॰ ༡༠༣༨

4. passa su. ni. 1038

5. ཝེཝིཙྪཱ (སུ॰ ནི॰ ༡༠༣༩)

6. vevicchā (su. ni. 1039)

7. པཀཱསེནྟི དྷ॰ པ॰ ༣༠༤

8. pakāsenti dha. pa. 304

9. རཏྟི ཁིཏྟཱ (སཱི॰), པསྶ དྷ॰ པ॰ ༣༠༤

10. ratti khittā (sī.), passa dha. pa. 304

11. ཨནྡྷཏམཾ (ཀ॰)

12. andhatamaṃ (ka.)

13. པིཐཱིཡརེ (སཱི॰), པིདྷིཡྻརེ (ཀ॰), པསྶ སུ॰ ནི॰ ༡༠༤༠

14. pithīyare (sī.), pidhiyyare (ka.), passa su. ni. 1040

15. ཨམནཱཔིཡེསུ (ཀ॰)

16. amanāpiyesu (ka.)

17. ཏསྶ (སཱི॰)

18. tassa (sī.)

19. མཾ པུཙྪི (ཀ॰), པསྶ སུ॰ ནི॰ ༡༠༤༣

20. maṃ pucchi (ka.), passa su. ni. 1043

21. པཉྷོ (སཱི॰ ཀ॰) ནེཏྟིཝིབྷཱཝནཱི པསྶིཏབྦཱ

22. ཨཝིཛྫཱ ཙ ནིརཝསེསཱ (སཱི॰ ཀ॰)

23. pañho (sī. ka.) nettivibhāvanī passitabbā

24. avijjā ca niravasesā (sī. ka.)

25. རཏྟི (ཀ॰) ཨཡཾ གཱཐཱ ཐེརགཱ॰ ༣༩༧ དིསྶཏི

26. ratti (ka.) ayaṃ gāthā theragā. 397 dissati

27. ནིབྦཏྟིཡཏི (ཀ॰)

28. nibbattiyati (ka.)

29. ཨཡཾ གཱཐཱ སུ॰ ནི॰ ༡༠༤༤ ཨཉྙཐཱ དིསྶཏི

30. ayaṃ gāthā su. ni. 1044 aññathā dissati

31. ཀཏམེ ཙ (ཨཊྛ॰)

32. katame ca (aṭṭha.)

33. ནིབྦཏྟཱཔེནྟི (ཀ॰)

34. nibbattāpenti (ka.)

35. སམྨིཉྫིཏེ (སཱི॰)

36. sammiñjite (sī.)

37. སམཱནཡིཏབྦཱ (སཱི॰ ཀ॰)

38. samānayitabbā (sī. ka.)

Related texts:

ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཁུདྡཀནིཀཱཡ (ཨཊྛཀཐཱ) • Khuddakanikāya (aṭṭhakathā) / ནེཏྟིཔྤཀརཎ-ཨཊྛཀཐཱ • Nettippakaraṇa-aṭṭhakathā / ༢. ཝིཙཡཧཱརཝིབྷངྒཝཎྞནཱ • 2. Vicayahāravibhaṅgavaṇṇanā

ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཁུདྡཀནིཀཱཡ (ཊཱིཀཱ) • Khuddakanikāya (ṭīkā) / ནེཏྟིཔྤཀརཎ-ཊཱིཀཱ • Nettippakaraṇa-ṭīkā / ༢. ཝིཙཡཧཱརཝིབྷངྒཝཎྞནཱ • 2. Vicayahāravibhaṅgavaṇṇanā

ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཁུདྡཀནིཀཱཡ (ཊཱིཀཱ) • Khuddakanikāya (ṭīkā) / ནེཏྟིཝིབྷཱཝིནཱི • Nettivibhāvinī / ༢. ཝིཙཡཧཱརཝིབྷངྒཝིབྷཱཝནཱ • 2. Vicayahāravibhaṅgavibhāvanā

© 1991-2023 The Titi Tudorancea Bulletin | Titi Tudorancea^® is a Registered Trademark | Terms of use and privacy policy
Contact