| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
2. විධාසුත්‌තං
2. Vidhāsuttaṃ
162. ‘‘තිස්‌සො ඉමා, භික්‌ඛවෙ, විධා. කතමා තිස්‌සො? ‘සෙය්‍යොහමස්‌මී’ති විධා, ‘සදිසොහමස්‌මී’ති විධා, ‘හීනොහමස්‌මී’ති විධා – ඉමා ඛො, භික්‌ඛවෙ, තිස්‌සො විධා. ඉමාසං ඛො, භික්‌ඛවෙ, තිස්‌සන්‌නං විධානං අභිඤ්‌ඤාය පරිඤ්‌ඤාය පරික්‌ඛයාය පහානාය අරියො අට්‌ඨඞ්‌ගිකො මග්‌ගො භාවෙතබ්‌බො. කතමො අරියො අට්‌ඨඞ්‌ගිකො මග්‌ගො? ඉධ, භික්‌ඛවෙ, භික්‌ඛු සම්‌මාදිට්‌ඨිං භාවෙති…පෙ.… සම්‌මාසමාධිං භාවෙති විවෙකනිස්‌සිතං විරාගනිස්‌සිතං නිරොධනිස්‌සිතං වොස්‌සග්‌ගපරිණාමිං…පෙ.… ඉමාසං ඛො, භික්‌ඛවෙ තිස්‌සන්‌නං විධානං අභිඤ්‌ඤාය පරිඤ්‌ඤාය පරික්‌ඛයාය පහානාය අයං අරියො අට්‌ඨඞ්‌ගිකො මග්‌ගො භාවෙතබ්‌බො’’ති. (යථා එසනා, එවං විත්‌ථාරෙතබ්‌බං). දුතියං.
162. ‘‘Tisso imā, bhikkhave, vidhā. Katamā tisso? ‘Seyyohamasmī’ti vidhā, ‘sadisohamasmī’ti vidhā, ‘hīnohamasmī’ti vidhā – imā kho, bhikkhave, tisso vidhā. Imāsaṃ kho, bhikkhave, tissannaṃ vidhānaṃ abhiññāya pariññāya parikkhayāya pahānāya ariyo aṭṭhaṅgiko maggo bhāvetabbo. Katamo ariyo aṭṭhaṅgiko maggo? Idha, bhikkhave, bhikkhu sammādiṭṭhiṃ bhāveti…pe… sammāsamādhiṃ bhāveti vivekanissitaṃ virāganissitaṃ nirodhanissitaṃ vossaggapariṇāmiṃ…pe… imāsaṃ kho, bhikkhave tissannaṃ vidhānaṃ abhiññāya pariññāya parikkhayāya pahānāya ayaṃ ariyo aṭṭhaṅgiko maggo bhāvetabbo’’ti. (Yathā esanā, evaṃ vitthāretabbaṃ). Dutiyaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 2-11. විධාසුත්‌තාදිවණ්‌ණනා • 2-11. Vidhāsuttādivaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 2-11. විධාසුත්‌තාදිවණ්‌ණනා • 2-11. Vidhāsuttādivaṇṇanā
