| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ • Saṃyuttanikāya |
༥. ཙཀྐཝཏྟིཝགྒོ
5. Cakkavattivaggo
༡. ཝིདྷཱསུཏྟཾ
1. Vidhāsuttaṃ
༢༢༢. སཱཝཏྠིནིདཱནཾ ། ‘‘ཡེ ཧི ཀེཙི, བྷིཀྑཝེ, ཨཏཱིཏམདྡྷཱནཾ སམཎཱ ཝཱ བྲཱཧྨཎཱ ཝཱ ཏིསྶོ ཝིདྷཱ པཛཧིཾསུ, སབྦེ ཏེ སཏྟནྣཾ བོཛ྄ཛྷངྒཱནཾ བྷཱཝིཏཏྟཱ བཧུལཱིཀཏཏྟཱ། ཡེ ཧི ཀེཙི, བྷིཀྑཝེ, ཨནཱགཏམདྡྷཱནཾ སམཎཱ ཝཱ བྲཱཧྨཎཱ ཝཱ ཏིསྶོ ཝིདྷཱ པཛཧིསྶནྟི, སབྦེ ཏེ སཏྟནྣཾ བོཛ྄ཛྷངྒཱནཾ བྷཱཝིཏཏྟཱ བཧུལཱིཀཏཏྟཱ། ཡེ ཧི ཀེཙི, བྷིཀྑཝེ, ཨེཏརཧི སམཎཱ ཝཱ བྲཱཧྨཎཱ ཝཱ ཏིསྶོ ཝིདྷཱ པཛཧནྟི, སབྦེ ཏེ སཏྟནྣཾ བོཛ྄ཛྷངྒཱནཾ བྷཱཝིཏཏྟཱ བཧུལཱིཀཏཏྟཱ། ཀཏམེསཾ སཏྟནྣཾ བོཛ྄ཛྷངྒཱནཾ? སཏིསམྦོཛ྄ཛྷངྒསྶ…པེ॰… ཨུཔེཀྑཱསམྦོཛ྄ཛྷངྒསྶ། ཡེ ཧི ཀེཙི, བྷིཀྑཝེ, ཨཏཱིཏམདྡྷཱནཾ སམཎཱ ཝཱ བྲཱཧྨཎཱ ཝཱ ཏིསྶོ ཝིདྷཱ པཛཧིཾསུ…པེ॰… པཛཧིསྶནྟི…པེ॰… པཛཧནྟི, སབྦེ ཏེ ཨིམེསཾཡེཝ སཏྟནྣཾ བོཛ྄ཛྷངྒཱནཾ བྷཱཝིཏཏྟཱ བཧུལཱིཀཏཏྟཱ’’ཏི། པཋམཾ།
222. Sāvatthinidānaṃ . ‘‘Ye hi keci, bhikkhave, atītamaddhānaṃ samaṇā vā brāhmaṇā vā tisso vidhā pajahiṃsu, sabbe te sattannaṃ bojjhaṅgānaṃ bhāvitattā bahulīkatattā. Ye hi keci, bhikkhave, anāgatamaddhānaṃ samaṇā vā brāhmaṇā vā tisso vidhā pajahissanti, sabbe te sattannaṃ bojjhaṅgānaṃ bhāvitattā bahulīkatattā. Ye hi keci, bhikkhave, etarahi samaṇā vā brāhmaṇā vā tisso vidhā pajahanti, sabbe te sattannaṃ bojjhaṅgānaṃ bhāvitattā bahulīkatattā. Katamesaṃ sattannaṃ bojjhaṅgānaṃ? Satisambojjhaṅgassa…pe… upekkhāsambojjhaṅgassa. Ye hi keci, bhikkhave, atītamaddhānaṃ samaṇā vā brāhmaṇā vā tisso vidhā pajahiṃsu…pe… pajahissanti…pe… pajahanti, sabbe te imesaṃyeva sattannaṃ bojjhaṅgānaṃ bhāvitattā bahulīkatattā’’ti. Paṭhamaṃ.
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) / ༡. ཝིདྷཱསུཏྟཝཎྞནཱ • 1. Vidhāsuttavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) / ༡. ཝིདྷཱསུཏྟཝཎྞནཱ • 1. Vidhāsuttavaṇṇanā
