| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
6. பீ³ஜனிவக்³கோ³
6. Bījanivaggo
1. விதூ⁴பனதா³யகத்தே²ரஅபதா³னவண்ணனா
1. Vidhūpanadāyakattheraapadānavaṇṇanā
பது³முத்தரபு³த்³த⁴ஸ்ஸாதிஆதி³கங் ஆயஸ்மதோ விதூ⁴பனதா³யகத்தே²ரஸ்ஸ அபதா³னங். அயம்பி புரிமஜினவரேஸு பூரிதபுஞ்ஞஸம்பா⁴ரோ தத்த² தத்த² ப⁴வே விவட்டூபனிஸ்ஸயானி புஞ்ஞானி உபசினந்தோ பது³முத்தரஸ்ஸ ப⁴க³வதோ காலே ஏகஸ்மிங் குலகே³ஹே நிப்³ப³த்தோ விஞ்ஞுதங் பத்தோ விப⁴வஸம்பன்னோ ஸத்³தா⁴ஜாதோ ப⁴க³வதி பஸன்னோ கி³ம்ஹகாலே ஸுவண்ணரஜதமுத்தாமணிமயங் பீ³ஜனிங் காரெத்வா ப⁴க³வதோ அதா³ஸி. ஸோ தேன புஞ்ஞகம்மேன தே³வேஸு ச மனுஸ்ஸேஸு ச ஸங்ஸரந்தோ த்³வே ஸம்பத்தியோ அனுப⁴வித்வா இமஸ்ஸ அம்ஹாகங் ஸம்மாஸம்பு³த்³த⁴ஸ்ஸ உப்பன்னகாலே ஏகஸ்மிங் குலகே³ஹே நிப்³ப³த்தோ க⁴ரப³ந்த⁴னேன ப³ந்தி⁴த்வா க⁴ராவாஸே ஆதீ³னவங் தி³ஸ்வா பப்³ப³ஜ்ஜாய ச ஆனிஸங்ஸங் தி³ஸ்வா ஸத்³தா⁴ஸம்பன்னோ ஸாஸனே பப்³ப³ஜித்வா விபஸ்ஸனங் வட்³டெ⁴த்வா நசிரஸ்ஸேவ அரஹா அஹோஸி.
Padumuttarabuddhassātiādikaṃ āyasmato vidhūpanadāyakattherassa apadānaṃ. Ayampi purimajinavaresu pūritapuññasambhāro tattha tattha bhave vivaṭṭūpanissayāni puññāni upacinanto padumuttarassa bhagavato kāle ekasmiṃ kulagehe nibbatto viññutaṃ patto vibhavasampanno saddhājāto bhagavati pasanno gimhakāle suvaṇṇarajatamuttāmaṇimayaṃ bījaniṃ kāretvā bhagavato adāsi. So tena puññakammena devesu ca manussesu ca saṃsaranto dve sampattiyo anubhavitvā imassa amhākaṃ sammāsambuddhassa uppannakāle ekasmiṃ kulagehe nibbatto gharabandhanena bandhitvā gharāvāse ādīnavaṃ disvā pabbajjāya ca ānisaṃsaṃ disvā saddhāsampanno sāsane pabbajitvā vipassanaṃ vaḍḍhetvā nacirasseva arahā ahosi.
1. ஸோ ‘‘கேன மயா புஞ்ஞகம்மேன அயங் லோகுத்தரஸம்பத்தி லத்³தா⁴’’தி அத்தனோ புப்³ப³கம்மங் அனுஸ்ஸரந்தோ தங் பச்சக்க²தோ ஞத்வா புப்³ப³சரிதாபதா³னங் பகாஸெந்தோ பது³முத்தரபு³த்³த⁴ஸ்ஸாதிஆதி³மாஹ. தங் ஹெட்டா² வுத்தத்த²மேவ. பீ³ஜனிகா மயா தி³ன்னாதி விஸேஸேன ஸந்தாபயந்தானங் ஸத்தானங் ஸந்தாபங் நிப்³பா³பெந்தி ஸீதலங் வாதங் ஜனேதீதி பீ³ஜனீ, பீ³ஜனீயேவ பீ³ஜனிகா, ஸா ஸத்தரதனமயா விஜ்ஜோதமானா பீ³ஜனிகா மயா காராபெத்வா தி³ன்னாதி அத்தோ².
1. So ‘‘kena mayā puññakammena ayaṃ lokuttarasampatti laddhā’’ti attano pubbakammaṃ anussaranto taṃ paccakkhato ñatvā pubbacaritāpadānaṃ pakāsento padumuttarabuddhassātiādimāha. Taṃ heṭṭhā vuttatthameva. Bījanikā mayā dinnāti visesena santāpayantānaṃ sattānaṃ santāpaṃ nibbāpenti sītalaṃ vātaṃ janetīti bījanī, bījanīyeva bījanikā, sā sattaratanamayā vijjotamānā bījanikā mayā kārāpetvā dinnāti attho.
விதூ⁴பனதா³யகத்தே²ரஅபதா³னவண்ணனா ஸமத்தா.
Vidhūpanadāyakattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 1. விதூ⁴பனதா³யகத்தே²ரஅபதா³னங் • 1. Vidhūpanadāyakattheraapadānaṃ
