| Library / Tipiṭaka / திபிடக • Tipiṭaka / மஹாவிப⁴ங்க³ • Mahāvibhaṅga |
7. விஹாரகாரஸிக்கா²பத³ங்
7. Vihārakārasikkhāpadaṃ
365. தேன ஸமயேன பு³த்³தோ⁴ ப⁴க³வா கோஸம்பி³யங் விஹரதி கோ⁴ஸிதாராமே. தேன கோ² பன ஸமயேன ஆயஸ்மதோ ச²ன்னஸ்ஸ உபட்டா²கோ க³ஹபதி ஆயஸ்மந்தங் ச²ன்னங் ஏதத³வோச – ‘‘விஹாரவத்து²ங், ப⁴ந்தே, ஜானாஹி அய்யஸ்ஸ விஹாரங் காராபெஸ்ஸாமீ’’தி. அத² கோ² ஆயஸ்மா ச²ன்னோ விஹாரவத்து²ங் ஸோதெ⁴ந்தோ அஞ்ஞதரங் சேதியருக்க²ங் சே²தா³பேஸி கா³மபூஜிதங் நிக³மபூஜிதங் நக³ரபூஜிதங் ஜனபத³பூஜிதங் ரட்ட²பூஜிதங். மனுஸ்ஸா உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம ஸமணா ஸக்யபுத்தியா சேதியருக்க²ங் சே²தா³பெஸ்ஸந்தி கா³மபூஜிதங் நிக³மபூஜிதங் நக³ரபூஜிதங் ஜனபத³பூஜிதங் ரட்ட²பூஜிதங்! ஏகிந்த்³ரியங் ஸமணா ஸக்யபுத்தியா ஜீவங் விஹேடெ²ந்தீ’’ 1 தி. அஸ்ஸோஸுங் கோ² பி⁴க்கூ² தேஸங் மனுஸ்ஸானங் உஜ்ஜா²யந்தானங் கி²ய்யந்தானங் விபாசெந்தானங். யே தே பி⁴க்கூ² அப்பிச்சா²…பே॰… தே உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம ஆயஸ்மா ச²ன்னோ சேதியருக்க²ங் சே²தா³பெஸ்ஸதி கா³மபூஜிதங்…பே॰… ரட்ட²பூஜித’’ந்தி! அத² கோ² தே பி⁴க்கூ² ஆயஸ்மந்தங் ச²ன்னங் அனேகபரியாயேன விக³ரஹித்வா ப⁴க³வதோ ஏதமத்த²ங் ஆரோசேஸுங்…பே॰… ‘‘ஸச்சங் கிர த்வங், ச²ன்ன, சேதியருக்க²ங் சே²தா³பேஸி கா³மபூஜிதங்…பே॰… ரட்ட²பூஜித’’ந்தி? ‘‘ஸச்சங், ப⁴க³வா’’தி. விக³ரஹி பு³த்³தோ⁴ ப⁴க³வா…பே॰… ‘‘கத²ஞ்ஹி நாம த்வங், மோக⁴புரிஸ, சேதியருக்க²ங் சே²தா³பெஸ்ஸஸி கா³மபூஜிதங் நிக³மபூஜிதங் நக³ரபூஜிதங் ஜனபத³பூஜிதங் ரட்ட²பூஜிதங்! ஜீவஸஞ்ஞினோ ஹி, மோக⁴புரிஸ, மனுஸ்ஸா ருக்க²ஸ்மிங். நேதங், மோக⁴புரிஸ , அப்பஸன்னானங் வா பஸாதா³ய…பே॰… ஏவஞ்ச பன, பி⁴க்க²வே, இமங் ஸிக்கா²பத³ங் உத்³தி³ஸெய்யாத² –
365. Tena samayena buddho bhagavā kosambiyaṃ viharati ghositārāme. Tena kho pana samayena āyasmato channassa upaṭṭhāko gahapati āyasmantaṃ channaṃ etadavoca – ‘‘vihāravatthuṃ, bhante, jānāhi ayyassa vihāraṃ kārāpessāmī’’ti. Atha kho āyasmā channo vihāravatthuṃ sodhento aññataraṃ cetiyarukkhaṃ chedāpesi gāmapūjitaṃ nigamapūjitaṃ nagarapūjitaṃ janapadapūjitaṃ raṭṭhapūjitaṃ. Manussā ujjhāyanti khiyyanti vipācenti – ‘‘kathañhi nāma samaṇā sakyaputtiyā cetiyarukkhaṃ chedāpessanti gāmapūjitaṃ nigamapūjitaṃ nagarapūjitaṃ janapadapūjitaṃ raṭṭhapūjitaṃ! Ekindriyaṃ samaṇā sakyaputtiyā jīvaṃ viheṭhentī’’ 2 ti. Assosuṃ kho bhikkhū tesaṃ manussānaṃ ujjhāyantānaṃ khiyyantānaṃ vipācentānaṃ. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma āyasmā channo cetiyarukkhaṃ chedāpessati gāmapūjitaṃ…pe… raṭṭhapūjita’’nti! Atha kho te bhikkhū āyasmantaṃ channaṃ anekapariyāyena vigarahitvā bhagavato etamatthaṃ ārocesuṃ…pe… ‘‘saccaṃ kira tvaṃ, channa, cetiyarukkhaṃ chedāpesi gāmapūjitaṃ…pe… raṭṭhapūjita’’nti? ‘‘Saccaṃ, bhagavā’’ti. Vigarahi buddho bhagavā…pe… ‘‘kathañhi nāma tvaṃ, moghapurisa, cetiyarukkhaṃ chedāpessasi gāmapūjitaṃ nigamapūjitaṃ nagarapūjitaṃ janapadapūjitaṃ raṭṭhapūjitaṃ! Jīvasaññino hi, moghapurisa, manussā rukkhasmiṃ. Netaṃ, moghapurisa , appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
366. ‘‘மஹல்லகங் பன பி⁴க்கு²னா விஹாரங் காரயமானேன ஸஸ்ஸாமிகங் அத்துத்³தே³ஸங் பி⁴க்கூ² அபி⁴னேதப்³பா³ வத்து²தே³ஸனாய. தேஹி பி⁴க்கூ²ஹி வத்து² தே³ஸேதப்³ப³ங் அனாரம்ப⁴ங் ஸபரிக்கமனங். ஸாரம்பே⁴ சே பி⁴க்கு² வத்து²ஸ்மிங் அபரிக்கமனே மஹல்லகங் விஹாரங் காரெய்ய பி⁴க்கூ² வா அனபி⁴னெய்ய வத்து²தே³ஸனாய, ஸங்கா⁴தி³ஸேஸோ’’தி.
366.‘‘Mahallakaṃ pana bhikkhunā vihāraṃ kārayamānena sassāmikaṃ attuddesaṃ bhikkhū abhinetabbā vatthudesanāya. Tehi bhikkhūhi vatthu desetabbaṃ anārambhaṃ saparikkamanaṃ. Sārambhe ce bhikkhu vatthusmiṃ aparikkamane mahallakaṃ vihāraṃ kāreyya bhikkhū vā anabhineyya vatthudesanāya, saṅghādiseso’’ti.
367. மஹல்லகோ நாம விஹாரோ ஸஸ்ஸாமிகோ வுச்சதி.
367.Mahallako nāma vihāro sassāmiko vuccati.
விஹாரோ நாம உல்லித்தோ வா ஹோதி அவலித்தோ வா உல்லித்தாவலித்தோ வா.
Vihāro nāma ullitto vā hoti avalitto vā ullittāvalitto vā.
காரயமானேனாதி கரொந்தோ வா காராபெந்தோ வா.
Kārayamānenāti karonto vā kārāpento vā.
ஸஸ்ஸாமிகந்தி அஞ்ஞோ கோசி ஸாமிகோ ஹோதி இத்தீ² வா புரிஸோ வா க³ஹட்டோ² வா பப்³ப³ஜிதோ வா.
Sassāmikanti añño koci sāmiko hoti itthī vā puriso vā gahaṭṭho vā pabbajito vā.
அத்துத்³தே³ஸந்தி அத்தனோ அத்தா²ய.
Attuddesanti attano atthāya.
பி⁴க்கூ² அபி⁴னேதப்³பா³ வத்து²தே³ஸனாயாதி தேன விஹாரகாரகேன பி⁴க்கு²னா விஹாரவத்து²ங் ஸோதெ⁴த்வா ஸங்க⁴ங் உபஸங்கமித்வா ஏகங்ஸங் உத்தராஸங்க³ங் கரித்வா வுட்³டா⁴னங் பி⁴க்கூ²னங் பாதே³ வந்தி³த்வா உக்குடிகங் நிஸீதி³த்வா அஞ்ஜலிங் பக்³க³ஹெத்வா ஏவமஸ்ஸ வசனீயோ – ‘‘அஹங், ப⁴ந்தே, மஹல்லகங் விஹாரங் கத்துகாமோ ஸஸ்ஸாமிகங் அத்துத்³தே³ஸங். ஸோஹங், ப⁴ந்தே, ஸங்க⁴ங் விஹாரவத்து²ஓலோகனங் யாசாமீ’’தி. து³தியம்பி யாசிதப்³பா³. ததியம்பி யாசிதப்³பா³. ஸசே ஸப்³போ³ ஸங்கோ⁴ உஸ்ஸஹதி விஹாரவத்து²ங் ஓலோகேதுங் ஸப்³பே³ன ஸங்கே⁴ன ஓலோகேதப்³ப³ங். நோ சே ஸப்³போ³ ஸங்கோ⁴ உஸ்ஸஹதி விஹாரவத்து²ங் ஓலோகேதுங், யே தத்த² ஹொந்தி பி⁴க்கூ² ப்³யத்தா படிப³லா ஸாரம்ப⁴ங் அனாரம்ப⁴ங் ஸபரிக்கமனங் அபரிக்கமனங் ஜானிதுங் தே யாசித்வா ஸம்மன்னிதப்³பா³. ஏவஞ்ச பன, பி⁴க்க²வே, ஸம்மன்னிதப்³பா³. ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³ –
Bhikkhū abhinetabbā vatthudesanāyāti tena vihārakārakena bhikkhunā vihāravatthuṃ sodhetvā saṅghaṃ upasaṅkamitvā ekaṃsaṃ uttarāsaṅgaṃ karitvā vuḍḍhānaṃ bhikkhūnaṃ pāde vanditvā ukkuṭikaṃ nisīditvā añjaliṃ paggahetvā evamassa vacanīyo – ‘‘ahaṃ, bhante, mahallakaṃ vihāraṃ kattukāmo sassāmikaṃ attuddesaṃ. Sohaṃ, bhante, saṅghaṃ vihāravatthuolokanaṃ yācāmī’’ti. Dutiyampi yācitabbā. Tatiyampi yācitabbā. Sace sabbo saṅgho ussahati vihāravatthuṃ oloketuṃ sabbena saṅghena oloketabbaṃ. No ce sabbo saṅgho ussahati vihāravatthuṃ oloketuṃ, ye tattha honti bhikkhū byattā paṭibalā sārambhaṃ anārambhaṃ saparikkamanaṃ aparikkamanaṃ jānituṃ te yācitvā sammannitabbā. Evañca pana, bhikkhave, sammannitabbā. Byattena bhikkhunā paṭibalena saṅgho ñāpetabbo –
368. ‘‘ஸுணாது மே, ப⁴ந்தே, ஸங்கோ⁴. அயங் இத்த²ன்னாமோ பி⁴க்கு² மஹல்லகங் விஹாரங் கத்துகாமோ ஸஸ்ஸாமிகங் அத்துத்³தே³ஸங். ஸோ ஸங்க⁴ங் விஹாரவத்து²ஓலோகனங் யாசதி. யதி³ ஸங்க⁴ஸ்ஸ பத்தகல்லங், ஸங்கோ⁴ இத்த²ன்னாமஞ்ச இத்த²ன்னாமஞ்ச பி⁴க்கு² ஸம்மன்னெய்ய இத்த²ன்னாமஸ்ஸ பி⁴க்கு²னோ விஹாரவத்து²ங் ஓலோகேதுங். ஏஸா ஞத்தி.
368. ‘‘Suṇātu me, bhante, saṅgho. Ayaṃ itthannāmo bhikkhu mahallakaṃ vihāraṃ kattukāmo sassāmikaṃ attuddesaṃ. So saṅghaṃ vihāravatthuolokanaṃ yācati. Yadi saṅghassa pattakallaṃ, saṅgho itthannāmañca itthannāmañca bhikkhu sammanneyya itthannāmassa bhikkhuno vihāravatthuṃ oloketuṃ. Esā ñatti.
‘‘ஸுணாது மே, ப⁴ந்தே, ஸங்கோ⁴. அயங் இத்த²ன்னாமோ பி⁴க்கு² மஹல்லகங் விஹாரங் கத்துகாமோ ஸஸ்ஸாமிகங் அத்துத்³தே³ஸங். ஸோ ஸங்க⁴ங் விஹாரவத்து²ஓலோகனங் யாசதி. ஸங்கோ⁴ இத்த²ன்னாமஞ்ச இத்த²ன்னாமஞ்ச பி⁴க்கூ² ஸம்மன்னதி இத்த²ன்னாமஸ்ஸ பி⁴க்கு²னோ விஹாரவத்து²ங் ஓலோகேதுங். யஸ்ஸாயஸ்மதோ க²மதி இத்த²ன்னாமஸ்ஸ ச இத்த²ன்னாமஸ்ஸ ச பி⁴க்கூ²னங் ஸம்முதி இத்த²ன்னாமஸ்ஸ பி⁴க்கு²னோ விஹாரவத்து²ங் ஓலோகேதுங், ஸோ துண்ஹஸ்ஸ; யஸ்ஸ நக்க²மதி, ஸோ பா⁴ஸெய்ய.
‘‘Suṇātu me, bhante, saṅgho. Ayaṃ itthannāmo bhikkhu mahallakaṃ vihāraṃ kattukāmo sassāmikaṃ attuddesaṃ. So saṅghaṃ vihāravatthuolokanaṃ yācati. Saṅgho itthannāmañca itthannāmañca bhikkhū sammannati itthannāmassa bhikkhuno vihāravatthuṃ oloketuṃ. Yassāyasmato khamati itthannāmassa ca itthannāmassa ca bhikkhūnaṃ sammuti itthannāmassa bhikkhuno vihāravatthuṃ oloketuṃ, so tuṇhassa; yassa nakkhamati, so bhāseyya.
‘‘ஸம்மதா ஸங்கே⁴ன இத்த²ன்னாமோ ச இத்த²ன்னாமோ ச பி⁴க்கூ² இத்த²ன்னாமஸ்ஸ பி⁴க்கு²னோ விஹாரவத்து²ங் ஓலோகேதுங். க²மதி ஸங்க⁴ஸ்ஸ, தஸ்மா துண்ஹீ, ஏவமேதங் தா⁴ரயாமீ’’தி.
‘‘Sammatā saṅghena itthannāmo ca itthannāmo ca bhikkhū itthannāmassa bhikkhuno vihāravatthuṃ oloketuṃ. Khamati saṅghassa, tasmā tuṇhī, evametaṃ dhārayāmī’’ti.
369. தேஹி ஸம்மதேஹி பி⁴க்கூ²ஹி தத்த² க³ந்த்வா விஹாரவத்து² ஓலோகேதப்³ப³ங்; ஸாரம்ப⁴ங் அனாரம்ப⁴ங் ஸபரிக்கமனங் அபரிக்கமனங் ஜானிதப்³ப³ங். ஸசே ஸாரம்ப⁴ங் ஹோதி அபரிக்கமனங், ‘மாயித⁴ கரீ’தி வத்தப்³போ³. ஸசே அனாரம்ப⁴ங் ஹோதி ஸபரிக்கமனங், ஸங்க⁴ஸ்ஸ ஆரோசேதப்³ப³ங் – ‘அனாரம்ப⁴ங் ஸபரிக்கமன’ந்தி . தேன விஹாரகாரகேன பி⁴க்கு²னா ஸங்க⁴ங் உபஸங்கமித்வா ஏகங்ஸங் உத்தராஸங்க³ங் கரித்வா வுட்³டா⁴னங் பி⁴க்கூ²னங் பாதே³ வந்தி³த்வா உக்குடிகங் நிஸீதி³த்வா அஞ்ஜலிங் பக்³க³ஹெத்வா ஏவமஸ்ஸ வசனீயோ – ‘‘அஹங், ப⁴ந்தே, மஹல்லகங் விஹாரங் கத்துகாமோ ஸஸ்ஸாமிகங் அத்துத்³தே³ஸங் . ஸோஹங், ப⁴ந்தே, ஸங்க⁴ங் விஹாரவத்து²தே³ஸனங் யாசாமீ’’தி. து³தியம்பி யாசிதப்³பா³. ததியம்பி யாசிதப்³பா³. ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³ –
369. Tehi sammatehi bhikkhūhi tattha gantvā vihāravatthu oloketabbaṃ; sārambhaṃ anārambhaṃ saparikkamanaṃ aparikkamanaṃ jānitabbaṃ. Sace sārambhaṃ hoti aparikkamanaṃ, ‘māyidha karī’ti vattabbo. Sace anārambhaṃ hoti saparikkamanaṃ, saṅghassa ārocetabbaṃ – ‘anārambhaṃ saparikkamana’nti . Tena vihārakārakena bhikkhunā saṅghaṃ upasaṅkamitvā ekaṃsaṃ uttarāsaṅgaṃ karitvā vuḍḍhānaṃ bhikkhūnaṃ pāde vanditvā ukkuṭikaṃ nisīditvā añjaliṃ paggahetvā evamassa vacanīyo – ‘‘ahaṃ, bhante, mahallakaṃ vihāraṃ kattukāmo sassāmikaṃ attuddesaṃ . Sohaṃ, bhante, saṅghaṃ vihāravatthudesanaṃ yācāmī’’ti. Dutiyampi yācitabbā. Tatiyampi yācitabbā. Byattena bhikkhunā paṭibalena saṅgho ñāpetabbo –
370. ‘‘ஸுணாது மே, ப⁴ந்தே, ஸங்கோ⁴. அயங் இத்த²ன்னாமோ பி⁴க்கு² மஹல்லகங் விஹாரங் கத்துகாமோ ஸஸ்ஸாமிகங் அத்துத்³தே³ஸங். ஸோ ஸங்க⁴ங் விஹாரவத்து²தே³ஸனங் யாசதி. யதி³ ஸங்க⁴ஸ்ஸ பத்தகல்லங், ஸங்கோ⁴ இத்த²ன்னாமஸ்ஸ பி⁴க்கு²னோ விஹாரவத்து²ங் தே³ஸெய்ய. ஏஸா ஞத்தி.
370. ‘‘Suṇātu me, bhante, saṅgho. Ayaṃ itthannāmo bhikkhu mahallakaṃ vihāraṃ kattukāmo sassāmikaṃ attuddesaṃ. So saṅghaṃ vihāravatthudesanaṃ yācati. Yadi saṅghassa pattakallaṃ, saṅgho itthannāmassa bhikkhuno vihāravatthuṃ deseyya. Esā ñatti.
‘‘ஸுணாது மே, ப⁴ந்தே, ஸங்கோ⁴. அயங் இத்த²ன்னாமோ பி⁴க்கு² மஹல்லகங் விஹாரங் கத்துகாமோ ஸஸ்ஸாமிகங் அத்துத்³தே³ஸங். ஸோ ஸங்க⁴ங் விஹாரவத்து²தே³ஸனங் யாசதி. ஸங்கோ⁴ இத்த²ன்னாமஸ்ஸ பி⁴க்கு²னோ விஹாரவத்து²ங் தே³ஸேதி. யஸ்ஸாயஸ்மதோ க²மதி இத்த²ன்னாமஸ்ஸ பி⁴க்கு²னோ விஹாரவத்து²ஸ்ஸ தே³ஸனா, ஸோ துண்ஹஸ்ஸ; யஸ்ஸ நக்க²மதி, ஸோ பா⁴ஸெய்ய.
‘‘Suṇātu me, bhante, saṅgho. Ayaṃ itthannāmo bhikkhu mahallakaṃ vihāraṃ kattukāmo sassāmikaṃ attuddesaṃ. So saṅghaṃ vihāravatthudesanaṃ yācati. Saṅgho itthannāmassa bhikkhuno vihāravatthuṃ deseti. Yassāyasmato khamati itthannāmassa bhikkhuno vihāravatthussa desanā, so tuṇhassa; yassa nakkhamati, so bhāseyya.
‘‘தே³ஸிதங் ஸங்கே⁴ன இத்த²ன்னாமஸ்ஸ பி⁴க்கு²னோ விஹாரவத்து²ங். க²மதி ஸங்க⁴ஸ்ஸ, தஸ்மா துண்ஹீ, ஏவமேதங் தா⁴ரயாமீ’’தி.
‘‘Desitaṃ saṅghena itthannāmassa bhikkhuno vihāravatthuṃ. Khamati saṅghassa, tasmā tuṇhī, evametaṃ dhārayāmī’’ti.
371. ஸாரம்ப⁴ங் நாம கிபில்லிகானங் வா ஆஸயோ ஹோதி, உபசிகானங் வா ஆஸயோ ஹோதி, உந்தூ³ரானங் வா…பே॰… அஹீனங் வா விச்சி²கானங் வா ஸதபதீ³னங் வா ஹத்தீ²னங் வா அஸ்ஸானங் வா ஸீஹானங் வா ப்³யக்³கா⁴னங் வா தீ³பீனங் வா அச்சா²னங் வா தரச்சா²னங் வா ஆஸயோ ஹோதி, யேஸங் கேஸஞ்சி திரச்சா²னக³தானங் பாணானங் ஆஸயோ ஹோதி, புப்³ப³ண்ணனிஸ்ஸிதங் வா ஹோதி, அபரண்ணனிஸ்ஸிதங் வா ஹோதி, அப்³பா⁴கா⁴தனிஸ்ஸிதங் வா ஹோதி, ஆகா⁴தனநிஸ்ஸிதங் வா ஹோதி, ஸுஸானநிஸ்ஸிதங் வா ஹோதி, உய்யானநிஸ்ஸிதங் வா ஹோதி, ராஜவத்து²னிஸ்ஸிதங் வா ஹோதி, ஹத்தி²ஸாலானிஸ்ஸிதங் வா ஹோதி, அஸ்ஸஸாலானிஸ்ஸிதங் வா ஹோதி, ப³ந்த⁴னாகா³ரனிஸ்ஸிதங் வா ஹோதி, பானாகா³ரனிஸ்ஸிதங் வா ஹோதி, ஸூனநிஸ்ஸிதங் வா ஹோதி, ரச்சா²னிஸ்ஸிதங் வா ஹோதி, சச்சரனிஸ்ஸிதங் வா ஹோதி, ஸபா⁴னிஸ்ஸிதங் வா ஹோதி, ஸங்ஸரணனிஸ்ஸிதங் வா ஹோதி. ஏதங் ஸாரம்ப⁴ங் நாம.
371.Sārambhaṃ nāma kipillikānaṃ vā āsayo hoti, upacikānaṃ vā āsayo hoti, undūrānaṃ vā…pe… ahīnaṃ vā vicchikānaṃ vā satapadīnaṃ vā hatthīnaṃ vā assānaṃ vā sīhānaṃ vā byagghānaṃ vā dīpīnaṃ vā acchānaṃ vā taracchānaṃ vā āsayo hoti, yesaṃ kesañci tiracchānagatānaṃ pāṇānaṃ āsayo hoti, pubbaṇṇanissitaṃ vā hoti, aparaṇṇanissitaṃ vā hoti, abbhāghātanissitaṃ vā hoti, āghātananissitaṃ vā hoti, susānanissitaṃ vā hoti, uyyānanissitaṃ vā hoti, rājavatthunissitaṃ vā hoti, hatthisālānissitaṃ vā hoti, assasālānissitaṃ vā hoti, bandhanāgāranissitaṃ vā hoti, pānāgāranissitaṃ vā hoti, sūnanissitaṃ vā hoti, racchānissitaṃ vā hoti, caccaranissitaṃ vā hoti, sabhānissitaṃ vā hoti, saṃsaraṇanissitaṃ vā hoti. Etaṃ sārambhaṃ nāma.
அபரிக்கமனங் நாம ந ஸக்கா ஹோதி யதா²யுத்தேன ஸகடேன அனுபரிக³ந்துங், ஸமந்தா நிஸ்ஸேணியா அனுபரிக³ந்துங். ஏதங் அபரிக்கமனங் நாம.
Aparikkamanaṃ nāma na sakkā hoti yathāyuttena sakaṭena anuparigantuṃ, samantā nisseṇiyā anuparigantuṃ. Etaṃ aparikkamanaṃ nāma.
அனாரம்ப⁴ங் நாம ந கிபில்லிகானங் வா ஆஸயோ ஹோதி…பே॰… ந ஸங்ஸரணனிஸ்ஸிதங் வா ஹோதி. ஏதங் அனாரம்ப⁴ங் நாம.
Anārambhaṃ nāma na kipillikānaṃ vā āsayo hoti…pe… na saṃsaraṇanissitaṃ vā hoti. Etaṃ anārambhaṃ nāma.
ஸபரிக்கமனங் நாம ஸக்கா ஹோதி யதா²யுத்தேன ஸகடேன அனுபரிக³ந்துங், ஸமந்தா நிஸ்ஸேணியா அனுபரிக³ந்துங். ஏதங் ஸபரிக்கமனங் நாம.
Saparikkamanaṃ nāma sakkā hoti yathāyuttena sakaṭena anuparigantuṃ, samantā nisseṇiyā anuparigantuṃ. Etaṃ saparikkamanaṃ nāma.
மஹல்லகோ நாம விஹாரோ ஸஸ்ஸாமிகோ வுச்சதி.
Mahallako nāma vihāro sassāmiko vuccati.
விஹாரோ நாம உல்லித்தோ வா ஹோதி அவலித்தோ வா உல்லித்தாவலித்தோ வா.
Vihāro nāma ullitto vā hoti avalitto vā ullittāvalitto vā.
காரெய்யாதி கரோதி வா காராபேதி வா.
Kāreyyāti karoti vā kārāpeti vā.
பி⁴க்கூ² வா அனபி⁴னெய்ய வத்து²தே³ஸனாயாதி ஞத்திது³தியேன கம்மேன விஹாரவத்து²ங் ந தே³ஸாபெத்வா கரோதி வா காராபேதி வா, பயோகே³ து³க்கடங். ஏகங் பிண்ட³ங் அனாக³தே, ஆபத்தி து²ல்லச்சயஸ்ஸ . தஸ்மிங் பிண்டே³ ஆக³தே, ஆபத்தி ஸங்கா⁴தி³ஸேஸஸ்ஸ.
Bhikkhū vā anabhineyya vatthudesanāyāti ñattidutiyena kammena vihāravatthuṃ na desāpetvā karoti vā kārāpeti vā, payoge dukkaṭaṃ. Ekaṃ piṇḍaṃ anāgate, āpatti thullaccayassa . Tasmiṃ piṇḍe āgate, āpatti saṅghādisesassa.
ஸங்கா⁴தி³ஸேஸோதி…பே॰… தேனபி வுச்சதி – ‘ஸங்கா⁴தி³ஸேஸோ’தி.
Saṅghādisesoti…pe… tenapi vuccati – ‘saṅghādiseso’ti.
372. பி⁴க்கு² விஹாரங் கரோதி அதே³ஸிதவத்து²கங் ஸாரம்ப⁴ங் அபரிக்கமனங், ஆபத்தி ஸங்கா⁴தி³ஸேஸேன த்³வின்னங் து³க்கடானங். பி⁴க்கு² விஹாரங் கரோதி அதே³ஸிதவத்து²கங் ஸாரம்ப⁴ங் ஸபரிக்கமனங், ஆபத்தி ஸங்கா⁴தி³ஸேஸேன து³க்கடஸ்ஸ. பி⁴க்கு² விஹாரங் கரோதி அதே³ஸிதவத்து²கங் அனாரம்ப⁴ங் அபரிக்கமனங், ஆபத்தி ஸங்கா⁴தி³ஸேஸேன து³க்கடஸ்ஸ. பி⁴க்கு² விஹாரங் கரோதி அதே³ஸிதவத்து²கங் அனாரம்ப⁴ங் ஸபரிக்கமனங், ஆபத்தி ஸங்கா⁴தி³ஸேஸஸ்ஸ.
372. Bhikkhu vihāraṃ karoti adesitavatthukaṃ sārambhaṃ aparikkamanaṃ, āpatti saṅghādisesena dvinnaṃ dukkaṭānaṃ. Bhikkhu vihāraṃ karoti adesitavatthukaṃ sārambhaṃ saparikkamanaṃ, āpatti saṅghādisesena dukkaṭassa. Bhikkhu vihāraṃ karoti adesitavatthukaṃ anārambhaṃ aparikkamanaṃ, āpatti saṅghādisesena dukkaṭassa. Bhikkhu vihāraṃ karoti adesitavatthukaṃ anārambhaṃ saparikkamanaṃ, āpatti saṅghādisesassa.
பி⁴க்கு² விஹாரங் கரோதி தே³ஸிதவத்து²கங் ஸாரம்ப⁴ங் அபரிக்கமனங், ஆபத்தி த்³வின்னங் து³க்கடானங். பி⁴க்கு² விஹாரங் கரோதி தே³ஸிதவத்து²கங் ஸாரம்ப⁴ங் ஸபரிக்கமனங், ஆபத்தி து³க்கடஸ்ஸ. பி⁴க்கு² விஹாரங் கரோதி தே³ஸிதவத்து²கங் அனாரம்ப⁴ங் அபரிக்கமனங், ஆபத்தி து³க்கடஸ்ஸ. பி⁴க்கு² விஹாரங் கரோதி தே³ஸிதவத்து²கங் அனாரம்ப⁴ங் ஸபரிக்கமனங், அனாபத்தி.
Bhikkhu vihāraṃ karoti desitavatthukaṃ sārambhaṃ aparikkamanaṃ, āpatti dvinnaṃ dukkaṭānaṃ. Bhikkhu vihāraṃ karoti desitavatthukaṃ sārambhaṃ saparikkamanaṃ, āpatti dukkaṭassa. Bhikkhu vihāraṃ karoti desitavatthukaṃ anārambhaṃ aparikkamanaṃ, āpatti dukkaṭassa. Bhikkhu vihāraṃ karoti desitavatthukaṃ anārambhaṃ saparikkamanaṃ, anāpatti.
373. பி⁴க்கு² ஸமாதி³ஸதி – ‘‘விஹாரங் மே கரோதா²’’தி. தஸ்ஸ விஹாரங் கரொந்தி அதே³ஸிதவத்து²கங் ஸாரம்ப⁴ங் அபரிக்கமனங், ஆபத்தி ஸங்கா⁴தி³ஸேஸேன த்³வின்னங் து³க்கடானங்…பே॰… ஸாரம்ப⁴ங் ஸபரிக்கமனங், ஆபத்தி ஸங்கா⁴தி³ஸேஸேன து³க்கடஸ்ஸ…பே॰… அனாரம்ப⁴ங் அபரிக்கமனங், ஆபத்தி ஸங்கா⁴தி³ஸேஸேன து³க்கடஸ்ஸ…பே॰… அனாரம்ப⁴ங் ஸபரிக்கமனங், ஆபத்தி ஸங்கா⁴தி³ஸேஸஸ்ஸ.
373. Bhikkhu samādisati – ‘‘vihāraṃ me karothā’’ti. Tassa vihāraṃ karonti adesitavatthukaṃ sārambhaṃ aparikkamanaṃ, āpatti saṅghādisesena dvinnaṃ dukkaṭānaṃ…pe… sārambhaṃ saparikkamanaṃ, āpatti saṅghādisesena dukkaṭassa…pe… anārambhaṃ aparikkamanaṃ, āpatti saṅghādisesena dukkaṭassa…pe… anārambhaṃ saparikkamanaṃ, āpatti saṅghādisesassa.
பி⁴க்கு² ஸமாதி³ஸதி – ‘‘விஹாரங் மே கரோதா²’’தி. தஸ்ஸ விஹாரங் கரொந்தி தே³ஸிதவத்து²கங் ஸாரம்ப⁴ங் அபரிக்கமனங், ஆபத்தி த்³வின்னங் து³க்கடானங்…பே॰… ஸாரம்ப⁴ங் ஸபரிக்கமனங், ஆபத்தி து³க்கடஸ்ஸ…பே॰… அனாரம்ப⁴ங் அபரிக்கமனங், ஆபத்தி து³க்கடஸ்ஸ…பே॰… அனாரம்ப⁴ங் ஸபரிக்கமனங், அனாபத்தி.
Bhikkhu samādisati – ‘‘vihāraṃ me karothā’’ti. Tassa vihāraṃ karonti desitavatthukaṃ sārambhaṃ aparikkamanaṃ, āpatti dvinnaṃ dukkaṭānaṃ…pe… sārambhaṃ saparikkamanaṃ, āpatti dukkaṭassa…pe… anārambhaṃ aparikkamanaṃ, āpatti dukkaṭassa…pe… anārambhaṃ saparikkamanaṃ, anāpatti.
374. பி⁴க்கு² ஸமாதி³ஸித்வா பக்கமதி – ‘‘விஹாரங் மே கரோதா²’’தி. ந ச ஸமாதி³ஸதி – ‘‘தே³ஸிதவத்து²கோ ச ஹோது அனாரம்போ⁴ ச ஸபரிக்கமனோ சா’’தி. தஸ்ஸ விஹாரங் கரொந்தி அதே³ஸிதவத்து²கங் ஸாரம்ப⁴ங் அபரிக்கமனங், ஆபத்தி ஸங்கா⁴தி³ஸேஸேன த்³வின்னங் து³க்கடானங்…பே॰… ஸாரம்ப⁴ங் ஸபரிக்கமனங், ஆபத்தி ஸங்கா⁴தி³ஸேஸேன து³க்கடஸ்ஸ…பே॰… அனாரம்ப⁴ங் அபரிக்கமனங், ஆபத்தி ஸங்கா⁴தி³ஸேஸேன து³க்கடஸ்ஸ…பே॰… அனாரம்ப⁴ங் ஸபரிக்கமனங், ஆபத்தி ஸங்கா⁴தி³ஸேஸஸ்ஸ.
374. Bhikkhu samādisitvā pakkamati – ‘‘vihāraṃ me karothā’’ti. Na ca samādisati – ‘‘desitavatthuko ca hotu anārambho ca saparikkamano cā’’ti. Tassa vihāraṃ karonti adesitavatthukaṃ sārambhaṃ aparikkamanaṃ, āpatti saṅghādisesena dvinnaṃ dukkaṭānaṃ…pe… sārambhaṃ saparikkamanaṃ, āpatti saṅghādisesena dukkaṭassa…pe… anārambhaṃ aparikkamanaṃ, āpatti saṅghādisesena dukkaṭassa…pe… anārambhaṃ saparikkamanaṃ, āpatti saṅghādisesassa.
பி⁴க்கு² ஸமாதி³ஸித்வா பக்கமதி – ‘‘விஹாரங் மே கரோதா²’’தி. ந ச ஸமாதி³ஸதி – ‘‘தே³ஸிதவத்து²கோ ச ஹோது அனாரம்போ⁴ ச ஸபரிக்கமனோ சா’’தி. தஸ்ஸ விஹாரங் கரொந்தி தே³ஸிதவத்து²கங் ஸாரம்ப⁴ங் அபரிக்கமனங், ஆபத்தி த்³வின்னங் து³க்கடானங்…பே॰… ஸாரம்ப⁴ங் ஸபரிக்கமனங், ஆபத்தி து³க்கடஸ்ஸ…பே॰… அனாரம்ப⁴ங் அபரிக்கமனங், ஆபத்தி து³க்கடஸ்ஸ…பே॰… அனாரம்ப⁴ங் ஸபரிக்கமனங், அனாபத்தி.
Bhikkhu samādisitvā pakkamati – ‘‘vihāraṃ me karothā’’ti. Na ca samādisati – ‘‘desitavatthuko ca hotu anārambho ca saparikkamano cā’’ti. Tassa vihāraṃ karonti desitavatthukaṃ sārambhaṃ aparikkamanaṃ, āpatti dvinnaṃ dukkaṭānaṃ…pe… sārambhaṃ saparikkamanaṃ, āpatti dukkaṭassa…pe… anārambhaṃ aparikkamanaṃ, āpatti dukkaṭassa…pe… anārambhaṃ saparikkamanaṃ, anāpatti.
375. பி⁴க்கு² ஸமாதி³ஸித்வா பக்கமதி – ‘‘விஹாரங் மே கரோதா²’’தி. ஸமாதி³ஸதி ச – ‘‘தே³ஸிதவத்து²கோ ச ஹோது அனாரம்போ⁴ ச ஸபரிக்கமனோ சா’’தி. தஸ்ஸ விஹாரங் கரொந்தி அதே³ஸிதவத்து²கங் ஸாரம்ப⁴ங் அபரிக்கமனங். ஸோ ஸுணாதி – ‘‘விஹாரோ கிர மே கயிரதி அதே³ஸிதவத்து²கோ ஸாரம்போ⁴ அபரிக்கமனோ’’தி. தேன பி⁴க்கு²னா ஸாமங் வா க³ந்தப்³ப³ங் தூ³தோ வா பாஹேதப்³போ³ – ‘‘தே³ஸிதவத்து²கோ ச ஹோது அனாரம்போ⁴ ச ஸபரிக்கமனோ சா’’தி …பே॰… ‘‘தே³ஸிதவத்து²கோ ச ஹோது அனாரம்போ⁴ சா’’தி…பே॰… ‘‘தே³ஸிதவத்து²கோ ச ஹோது ஸபரிக்கமனோ சா’’தி …பே॰… ‘‘தே³ஸிதவத்து²கோ ஹோதூ’’தி. நோ சே ஸாமங் வா க³ச்செ²ய்ய தூ³தங் வா பஹிணெய்ய, ஆபத்தி து³க்கடஸ்ஸ.
375. Bhikkhu samādisitvā pakkamati – ‘‘vihāraṃ me karothā’’ti. Samādisati ca – ‘‘desitavatthuko ca hotu anārambho ca saparikkamano cā’’ti. Tassa vihāraṃ karonti adesitavatthukaṃ sārambhaṃ aparikkamanaṃ. So suṇāti – ‘‘vihāro kira me kayirati adesitavatthuko sārambho aparikkamano’’ti. Tena bhikkhunā sāmaṃ vā gantabbaṃ dūto vā pāhetabbo – ‘‘desitavatthuko ca hotu anārambho ca saparikkamano cā’’ti …pe… ‘‘desitavatthuko ca hotu anārambho cā’’ti…pe… ‘‘desitavatthuko ca hotu saparikkamano cā’’ti …pe… ‘‘desitavatthuko hotū’’ti. No ce sāmaṃ vā gaccheyya dūtaṃ vā pahiṇeyya, āpatti dukkaṭassa.
பி⁴க்கு² ஸமாதி³ஸித்வா பக்கமதி – ‘‘விஹாரங் மே கரோதா²’’தி. ஸமாதி³ஸதி ச – ‘‘தே³ஸிதவத்து²கோ ச ஹோது அனாரம்போ⁴ ச ஸபரிக்கமனோ சா’’தி. தஸ்ஸ விஹாரங் கரொந்தி தே³ஸிதவத்து²கங் ஸாரம்ப⁴ங் அபரிக்கமனங். ஸோ ஸுணாதி – ‘‘விஹாரோ கிர மே கயிரதி தே³ஸிதவத்து²கோ ஸாரம்போ⁴ அபரிக்கமனோ’’தி. தேன பி⁴க்கு²னா ஸாமங் வா க³ந்தப்³ப³ங் தூ³தோ வா பாஹேதப்³போ³ – ‘‘அனாரம்போ⁴ ச ஹோது ஸபரிக்கமனோ சா’’தி…பே॰… ‘‘அனாரம்போ⁴ ஹோதூ’’தி ‘‘ஸபரிக்கமனோ ஹோதூ’’தி, அனாபத்தி.
Bhikkhu samādisitvā pakkamati – ‘‘vihāraṃ me karothā’’ti. Samādisati ca – ‘‘desitavatthuko ca hotu anārambho ca saparikkamano cā’’ti. Tassa vihāraṃ karonti desitavatthukaṃ sārambhaṃ aparikkamanaṃ. So suṇāti – ‘‘vihāro kira me kayirati desitavatthuko sārambho aparikkamano’’ti. Tena bhikkhunā sāmaṃ vā gantabbaṃ dūto vā pāhetabbo – ‘‘anārambho ca hotu saparikkamano cā’’ti…pe… ‘‘anārambho hotū’’ti ‘‘saparikkamano hotū’’ti, anāpatti.
376. பி⁴க்கு² ஸமாதி³ஸித்வா பக்கமதி – ‘‘விஹாரங் மே கரோதா²’’தி. ஸமாதி³ஸதி ச – ‘‘தே³ஸிதவத்து²கோ ச ஹோது அனாரம்போ⁴ ச ஸபரிக்கமனோ சா’’தி. தஸ்ஸ விஹாரங் கரொந்தி அதே³ஸிதவத்து²கங் ஸாரம்ப⁴ங் அபரிக்கமனங், ஆபத்தி காருகானங் திண்ணங் து³க்கடானங்…பே॰… ஸாரம்ப⁴ங் ஸபரிக்கமனங், ஆபத்தி காருகானங் த்³வின்னங் து³க்கடானங்…பே॰… அனாரம்ப⁴ங் அபரிக்கமனங், ஆபத்தி காருகானங் த்³வின்னங் து³க்கடானங்…பே॰… அனாரம்ப⁴ங் ஸபரிக்கமனங், ஆபத்தி காருகானங் து³க்கடஸ்ஸ.
376. Bhikkhu samādisitvā pakkamati – ‘‘vihāraṃ me karothā’’ti. Samādisati ca – ‘‘desitavatthuko ca hotu anārambho ca saparikkamano cā’’ti. Tassa vihāraṃ karonti adesitavatthukaṃ sārambhaṃ aparikkamanaṃ, āpatti kārukānaṃ tiṇṇaṃ dukkaṭānaṃ…pe… sārambhaṃ saparikkamanaṃ, āpatti kārukānaṃ dvinnaṃ dukkaṭānaṃ…pe… anārambhaṃ aparikkamanaṃ, āpatti kārukānaṃ dvinnaṃ dukkaṭānaṃ…pe… anārambhaṃ saparikkamanaṃ, āpatti kārukānaṃ dukkaṭassa.
பி⁴க்கு² ஸமாதி³ஸித்வா பக்கமதி – ‘‘விஹாரங் மே கரோதா²’’தி. ஸமாதி³ஸதி ச – ‘‘தே³ஸிதவத்து²கோ ச ஹோது அனாரம்போ⁴ ச ஸபரிக்கமனோ சா’’தி. தஸ்ஸ விஹாரங் கரொந்தி தே³ஸிதவத்து²கங் ஸாரம்ப⁴ங் அபரிக்கமனங் , ஆபத்தி காருகானங் த்³வின்னங் து³க்கடானங்…பே॰… ஸாரம்ப⁴ங் ஸபரிக்கமனங், ஆபத்தி காருகானங் து³க்கடஸ்ஸ…பே॰… அனாரம்ப⁴ங் அபரிக்கமனங், ஆபத்தி காருகானங் து³க்கடஸ்ஸ…பே॰… அனாரம்ப⁴ங் ஸபரிக்கமனங், அனாபத்தி.
Bhikkhu samādisitvā pakkamati – ‘‘vihāraṃ me karothā’’ti. Samādisati ca – ‘‘desitavatthuko ca hotu anārambho ca saparikkamano cā’’ti. Tassa vihāraṃ karonti desitavatthukaṃ sārambhaṃ aparikkamanaṃ , āpatti kārukānaṃ dvinnaṃ dukkaṭānaṃ…pe… sārambhaṃ saparikkamanaṃ, āpatti kārukānaṃ dukkaṭassa…pe… anārambhaṃ aparikkamanaṃ, āpatti kārukānaṃ dukkaṭassa…pe… anārambhaṃ saparikkamanaṃ, anāpatti.
377. பி⁴க்கு² ஸமாதி³ஸித்வா பக்கமதி – ‘‘விஹாரங் மே கரோதா²’’தி. தஸ்ஸ விஹாரங் கரொந்தி அதே³ஸிதவத்து²கங் ஸாரம்ப⁴ங் அபரிக்கமனங். ஸோ சே விப்பகதே ஆக³ச்ச²தி, தேன பி⁴க்கு²னா ஸோ விஹாரோ அஞ்ஞஸ்ஸ வா தா³தப்³போ³ பி⁴ந்தி³த்வா வா புன காதப்³போ³. நோ சே அஞ்ஞஸ்ஸ வா த³தெ³ய்ய பி⁴ந்தி³த்வா வா புன காரெய்ய, ஆபத்தி ஸங்கா⁴தி³ஸேஸேன த்³வின்னங் து³க்கடானங்…பே॰… ஸாரம்ப⁴ங் ஸபரிக்கமனங், ஆபத்தி ஸங்கா⁴தி³ஸேஸேன து³க்கடஸ்ஸ…பே॰… அனாரம்ப⁴ங் அபரிக்கமனங், ஆபத்தி ஸங்கா⁴தி³ஸேஸேன து³க்கடஸ்ஸ…பே॰… அனாரம்ப⁴ங் ஸபரிக்கமனங், ஆபத்தி ஸங்கா⁴தி³ஸேஸஸ்ஸ.
377. Bhikkhu samādisitvā pakkamati – ‘‘vihāraṃ me karothā’’ti. Tassa vihāraṃ karonti adesitavatthukaṃ sārambhaṃ aparikkamanaṃ. So ce vippakate āgacchati, tena bhikkhunā so vihāro aññassa vā dātabbo bhinditvā vā puna kātabbo. No ce aññassa vā dadeyya bhinditvā vā puna kāreyya, āpatti saṅghādisesena dvinnaṃ dukkaṭānaṃ…pe… sārambhaṃ saparikkamanaṃ, āpatti saṅghādisesena dukkaṭassa…pe… anārambhaṃ aparikkamanaṃ, āpatti saṅghādisesena dukkaṭassa…pe… anārambhaṃ saparikkamanaṃ, āpatti saṅghādisesassa.
பி⁴க்கு² ஸமாதி³ஸித்வா பக்கமதி – ‘‘விஹாரங் மே கரோதா²’’தி. தஸ்ஸ விஹாரங் கரொந்தி தே³ஸிதவத்து²கங் ஸாரம்ப⁴ங் அபரிக்கமனங். ஸோ சே விப்பகதே ஆக³ச்ச²தி, தேன பி⁴க்கு²னா ஸோ விஹாரோ அஞ்ஞஸ்ஸ வா தா³தப்³போ³ பி⁴ந்தி³த்வா வா புன காதப்³போ³. நோ சே அஞ்ஞஸ்ஸ வா த³தெ³ய்ய பி⁴ந்தி³த்வா வா புன காரெய்ய, ஆபத்தி த்³வின்னங் து³க்கடானங்…பே॰… ஸாரம்ப⁴ங் ஸபரிக்கமனங், ஆபத்தி து³க்கடஸ்ஸ…பே॰… அனாரம்ப⁴ங் அபரிக்கமனங், ஆபத்தி து³க்கடஸ்ஸ…பே॰… அனாரம்ப⁴ங் ஸபரிக்கமனங், அனாபத்தி.
Bhikkhu samādisitvā pakkamati – ‘‘vihāraṃ me karothā’’ti. Tassa vihāraṃ karonti desitavatthukaṃ sārambhaṃ aparikkamanaṃ. So ce vippakate āgacchati, tena bhikkhunā so vihāro aññassa vā dātabbo bhinditvā vā puna kātabbo. No ce aññassa vā dadeyya bhinditvā vā puna kāreyya, āpatti dvinnaṃ dukkaṭānaṃ…pe… sārambhaṃ saparikkamanaṃ, āpatti dukkaṭassa…pe… anārambhaṃ aparikkamanaṃ, āpatti dukkaṭassa…pe… anārambhaṃ saparikkamanaṃ, anāpatti.
378. அத்தனா விப்பகதங் அத்தனா பரியோஸாபேதி, ஆபத்தி ஸங்கா⁴தி³ஸேஸஸ்ஸ .
378. Attanā vippakataṃ attanā pariyosāpeti, āpatti saṅghādisesassa .
அத்தனா விப்பகதங் பரேஹி பரியோஸாபேதி, ஆபத்தி ஸங்கா⁴தி³ஸேஸஸ்ஸ.
Attanā vippakataṃ parehi pariyosāpeti, āpatti saṅghādisesassa.
பரேஹி விப்பகதங் அத்தனா பரியோஸாபேதி, ஆபத்தி ஸங்கா⁴தி³ஸேஸஸ்ஸ.
Parehi vippakataṃ attanā pariyosāpeti, āpatti saṅghādisesassa.
பரேஹி விப்பகதங் பரேஹி பரியோஸாபேதி, ஆபத்தி ஸங்கா⁴தி³ஸேஸஸ்ஸ.
Parehi vippakataṃ parehi pariyosāpeti, āpatti saṅghādisesassa.
379. அனாபத்தி லேணே கு³ஹாய திணகுடிகாய அஞ்ஞஸ்ஸத்தா²ய வாஸாகா³ரங் ட²பெத்வா ஸப்³ப³த்த². அனாபத்தி உம்மத்தகஸ்ஸ, ஆதி³கம்மிகஸ்ஸாதி.
379. Anāpatti leṇe guhāya tiṇakuṭikāya aññassatthāya vāsāgāraṃ ṭhapetvā sabbattha. Anāpatti ummattakassa, ādikammikassāti.
விஹாரகாரஸிக்கா²பத³ங் நிட்டி²தங் ஸத்தமங்.
Vihārakārasikkhāpadaṃ niṭṭhitaṃ sattamaṃ.
Footnotes:
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 7. விஹாரகாரஸிக்கா²பத³வண்ணனா • 7. Vihārakārasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 7. விஹாரகாரஸிக்கா²பத³வண்ணனா • 7. Vihārakārasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 7. விஹாரகாரஸிக்கா²பத³வண்ணனா • 7. Vihārakārasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 7. விஹாரகாரஸிக்கா²பத³வண்ணனா • 7. Vihārakārasikkhāpadavaṇṇanā
