| Library / Tipiṭaka / திபிடக • Tipiṭaka / மஹாவிப⁴ங்க³-அட்ட²கதா² • Mahāvibhaṅga-aṭṭhakathā |
7. விஹாரகாரஸிக்கா²பத³வண்ணனா
7. Vihārakārasikkhāpadavaṇṇanā
365. தேன ஸமயேனாதி விஹாரகாரஸிக்கா²பத³ங். தத்த² கோஸம்பி³யந்தி ஏவங்னாமகே நக³ரே. கோ⁴ஸிதாராமேதி கோ⁴ஸிதஸ்ஸ ஆராமே. கோ⁴ஸிதனாமகேன கிர ஸெட்டி²னா ஸோ காரிதோ, தஸ்மா ‘‘கோ⁴ஸிதாராமோ’’தி வுச்சதி. ச²ன்னஸ்ஸாதி போ³தி⁴ஸத்தகாலே உபட்டா²கச²ன்னஸ்ஸ. விஹாரவத்து²ங், ப⁴ந்தே, ஜானாஹீதி விஹாரஸ்ஸ பதிட்டா²னட்டா²னங், ப⁴ந்தே, ஜானாஹி. எத்த² ச விஹாரோதி ந ஸகலவிஹாரோ, ஏகோ ஆவாஸோ, தேனேவாஹ – ‘‘அய்யஸ்ஸ விஹாரங் காராபெஸ்ஸாமீ’’தி.
365.Tena samayenāti vihārakārasikkhāpadaṃ. Tattha kosambiyanti evaṃnāmake nagare. Ghositārāmeti ghositassa ārāme. Ghositanāmakena kira seṭṭhinā so kārito, tasmā ‘‘ghositārāmo’’ti vuccati. Channassāti bodhisattakāle upaṭṭhākachannassa. Vihāravatthuṃ, bhante, jānāhīti vihārassa patiṭṭhānaṭṭhānaṃ, bhante, jānāhi. Ettha ca vihāroti na sakalavihāro, eko āvāso, tenevāha – ‘‘ayyassa vihāraṃ kārāpessāmī’’ti.
சேதியருக்க²ந்தி எத்த² சித்தீகதட்டே²ன சேதியங், பூஜாரஹானங் தே³வட்டா²னானமேதங் அதி⁴வசனங், ‘‘சேதிய’’ந்தி ஸம்மதங் ருக்க²ங் சேதியருக்க²ங். கா³மேன பூஜிதங் கா³மஸ்ஸ வா பூஜிதந்தி கா³மபூஜிதங். ஏஸேவ நயோ ஸேஸபதே³ஸுபி. அபிசெத்த² ஜனபதோ³தி ஏகஸ்ஸ ரஞ்ஞோ ரஜ்ஜே ஏகேகோ கொட்டா²ஸோ. ரட்ட²ந்தி ஸகலரஜ்ஜங் வேதி³தப்³ப³ங், ஸகலரஜ்ஜம்பி ஹி கதா³சி கதா³சி தஸ்ஸ ருக்க²ஸ்ஸ பூஜங் கரோதி, தேன வுத்தங் ‘‘ரட்ட²பூஜித’’ந்தி. ஏகிந்த்³ரியந்தி காயிந்த்³ரியங் ஸந்தா⁴ய வத³ந்தி. ஜீவஸஞ்ஞினோதி ஸத்தஸஞ்ஞினோ.
Cetiyarukkhanti ettha cittīkataṭṭhena cetiyaṃ, pūjārahānaṃ devaṭṭhānānametaṃ adhivacanaṃ, ‘‘cetiya’’nti sammataṃ rukkhaṃ cetiyarukkhaṃ. Gāmena pūjitaṃ gāmassa vā pūjitanti gāmapūjitaṃ. Eseva nayo sesapadesupi. Apicettha janapadoti ekassa rañño rajje ekeko koṭṭhāso. Raṭṭhanti sakalarajjaṃ veditabbaṃ, sakalarajjampi hi kadāci kadāci tassa rukkhassa pūjaṃ karoti, tena vuttaṃ ‘‘raṭṭhapūjita’’nti. Ekindriyanti kāyindriyaṃ sandhāya vadanti. Jīvasaññinoti sattasaññino.
366. மஹல்லகந்தி ஸஸ்ஸாமிகபா⁴வேன ஸங்யாசிககுடிதோ மஹந்தபா⁴வோ ஏதஸ்ஸ அத்தீ²தி மஹல்லகோ. யஸ்மா வா வத்து²ங் தே³ஸாபெத்வா பமாணாதிக்கமேனபி காதுங் வட்டதி, தஸ்மா பமாணமஹந்ததாயபி மஹல்லகோ , தங் மஹல்லகங். யஸ்மா பனஸ்ஸ தங் பமாணமஹத்தங் ஸஸ்ஸாமிகத்தாவ லப்³ப⁴தி, தஸ்மா தத³த்த²த³ஸ்ஸனத்த²ங் ‘‘மஹல்லகோ நாம விஹாரோ ஸஸ்ஸாமிகோ வுச்சதீ’’தி பத³பா⁴ஜனங் வுத்தங். ஸேஸங் ஸப்³ப³ங் குடிகாரஸிக்கா²பதே³ வுத்தனயேனேவ வேதி³தப்³ப³ங் ஸத்³தி⁴ங் ஸமுட்டா²னாதீ³ஹி. ஸஸ்ஸாமிகபா⁴வமத்தமேவ ஹி எத்த² கிரியதோ ஸமுட்டா²னாபா⁴வோ பமாணனியமாபா⁴வோ ச விஸேஸோ, பமாணனியமாபா⁴வா ச சதுக்கபாரிஹானீதி.
366.Mahallakanti sassāmikabhāvena saṃyācikakuṭito mahantabhāvo etassa atthīti mahallako. Yasmā vā vatthuṃ desāpetvā pamāṇātikkamenapi kātuṃ vaṭṭati, tasmā pamāṇamahantatāyapi mahallako , taṃ mahallakaṃ. Yasmā panassa taṃ pamāṇamahattaṃ sassāmikattāva labbhati, tasmā tadatthadassanatthaṃ ‘‘mahallako nāma vihāro sassāmiko vuccatī’’ti padabhājanaṃ vuttaṃ. Sesaṃ sabbaṃ kuṭikārasikkhāpade vuttanayeneva veditabbaṃ saddhiṃ samuṭṭhānādīhi. Sassāmikabhāvamattameva hi ettha kiriyato samuṭṭhānābhāvo pamāṇaniyamābhāvo ca viseso, pamāṇaniyamābhāvā ca catukkapārihānīti.
விஹாரகாரஸிக்கா²பத³வண்ணனா நிட்டி²தா.
Vihārakārasikkhāpadavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 7. விஹாரகாரஸிக்கா²பத³ங் • 7. Vihārakārasikkhāpadaṃ
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 7. விஹாரகாரஸிக்கா²பத³வண்ணனா • 7. Vihārakārasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 7. விஹாரகாரஸிக்கா²பத³வண்ணனா • 7. Vihārakārasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 7. விஹாரகாரஸிக்கா²பத³வண்ணனா • 7. Vihārakārasikkhāpadavaṇṇanā
