| Library / Tipiṭaka / তিপিটক • Tipiṭaka / কঙ্খাৰিতরণী-অভিনৰ-টীকা • Kaṅkhāvitaraṇī-abhinava-ṭīkā |
৭. ৰিহারকারসিক্খাপদৰণ্ণনা
7. Vihārakārasikkhāpadavaṇṇanā
মহন্তং লাতি গণ্হাতীতি মহল্লকো, তং মহল্লকং। যো চ যং গণ্হাতি, সো তস্স অত্থীতি আহ ‘‘মহন্তভাৰো এতস্স অত্থীতি মহল্লকো’’তি। সো চ মহন্তভাৰো কেন, কুতো চাতি আহ ‘‘সসামিকভাৰেনা’’তিআদি। ন কেৰলং সসামিকভাৰেনেৰাতি আহ ‘‘যস্মা ৰা’’তিআদি। যদি এৰং অথ কস্মা ‘‘মহল্লকো নাম ৰিহারো সসামিকো ৰুচ্চতী’’তি (পারা॰ ৩৬৭) এত্তকমেৰ পদভাজনে ৰুত্তন্তি আহ ‘‘যস্মা পনা’’তিআদি। ৰিহরন্তি এত্থাতি ৰিহারো, আৰাসো। মাতিকাযং ভিক্খূ ৰা অনভিনেয্যাতি এত্থ ৰা-সদ্দো ‘‘অযং ৰা সো মহানাগো’’তিআদীসু ৰিয অৰধারণত্থো।
Mahantaṃ lāti gaṇhātīti mahallako, taṃ mahallakaṃ. Yo ca yaṃ gaṇhāti, so tassa atthīti āha ‘‘mahantabhāvo etassa atthīti mahallako’’ti. So ca mahantabhāvo kena, kuto cāti āha ‘‘sasāmikabhāvenā’’tiādi. Na kevalaṃ sasāmikabhāvenevāti āha ‘‘yasmā vā’’tiādi. Yadi evaṃ atha kasmā ‘‘mahallako nāma vihāro sasāmiko vuccatī’’ti (pārā. 367) ettakameva padabhājane vuttanti āha ‘‘yasmā panā’’tiādi. Viharanti etthāti vihāro, āvāso. Mātikāyaṃ bhikkhū vā anabhineyyāti ettha vā-saddo ‘‘ayaṃ vā so mahānāgo’’tiādīsu viya avadhāraṇattho.
কোসম্বিযন্তি (সারত্থ॰ টী॰ ২.৩৬৫) এৰংনামকে নগরে। তস্স কির নগরস্স আরামপোক্খরণিআদীসু তেসু তেসু ঠানেসু কোসম্বরুক্খাৰ উস্সন্না অহেসুং, তস্মা তং ‘‘কোসম্বী’’তি সঙ্খং গচ্ছতি। ‘‘কুসুম্বস্স নাম ইসিনো অস্সমতো অৰিদূরে মাপিতত্তা’’তি একে। ছন্নত্থেরং আরব্ভাতি যো অভিনিক্খমনকালে সদ্ধিং নিক্খন্তো, যস্স চ সত্থারা পরিনিব্বানকালে ব্রহ্মদণ্ডো (চূল়ৰ॰ ৪৪৫) আণত্তো, তং ছন্নত্থেরং আরব্ভ। চেতিযরুক্খন্তি চিত্তীকতট্ঠেন চেতিযং, পূজারহানং দেৰট্ঠানানমেতং অধিৰচনং, ‘‘চেতিয’’ন্তি সম্মতং রুক্খং চেতিযরুক্খং। ৰত্থুনো অদেসনায আপজ্জনতো ‘‘অকিরিযমত্ততো সমুট্ঠানভাৰো’’তি ৰুত্তং। মত্ত-সদ্দেন কিরিযতো সমুট্ঠানতং পটিক্খিপতি। কেচি পন ‘‘ৰত্থুঅদেসনায, কুটিকরণেন চ সমুট্ঠানতো কিরিযাকিরিযতো সমুট্ঠাতী’’তি ৰদন্তি। পমাণনিযমাভাৰোৰ ৰিসেসো।
Kosambiyanti (sārattha. ṭī. 2.365) evaṃnāmake nagare. Tassa kira nagarassa ārāmapokkharaṇiādīsu tesu tesu ṭhānesu kosambarukkhāva ussannā ahesuṃ, tasmā taṃ ‘‘kosambī’’ti saṅkhaṃ gacchati. ‘‘Kusumbassa nāma isino assamato avidūre māpitattā’’ti eke. Channattheraṃ ārabbhāti yo abhinikkhamanakāle saddhiṃ nikkhanto, yassa ca satthārā parinibbānakāle brahmadaṇḍo (cūḷava. 445) āṇatto, taṃ channattheraṃ ārabbha. Cetiyarukkhanti cittīkataṭṭhena cetiyaṃ, pūjārahānaṃ devaṭṭhānānametaṃ adhivacanaṃ, ‘‘cetiya’’nti sammataṃ rukkhaṃ cetiyarukkhaṃ. Vatthuno adesanāya āpajjanato ‘‘akiriyamattato samuṭṭhānabhāvo’’ti vuttaṃ. Matta-saddena kiriyato samuṭṭhānataṃ paṭikkhipati. Keci pana ‘‘vatthuadesanāya, kuṭikaraṇena ca samuṭṭhānato kiriyākiriyato samuṭṭhātī’’ti vadanti. Pamāṇaniyamābhāvova viseso.
ৰিহারকারসিক্খাপদৰণ্ণনা নিট্ঠিতা।
Vihārakārasikkhāpadavaṇṇanā niṭṭhitā.
