| Library / Tipiṭaka / திபிடக • Tipiṭaka / ஸாரத்த²தீ³பனீ-டீகா • Sāratthadīpanī-ṭīkā |
6. ஸேனாஸனக்க²ந்த⁴கங்
6. Senāsanakkhandhakaṃ
விஹாரானுஜானநகதா²வண்ணனா
Vihārānujānanakathāvaṇṇanā
294. ஸேனாஸனக்க²ந்த⁴கே ஸேனாஸனங் அபஞ்ஞத்தங் ஹோதீதி விஹாரஸேனாஸனங் ஸந்தா⁴ய வுத்தங். சதுப்³பி³த⁴ஞ்ஹி (ம॰ நி॰ அட்ட॰ 1.296) ஸேனாஸனங் விஹாரஸேனாஸனங் மஞ்சபீட²ஸேனாஸனங் ஸந்த²தஸேனாஸனங் ஓகாஸஸேனாஸனந்தி. தத்த² ‘‘மஞ்சோபி ஸேனாஸனங், பீட²ம்பி பி⁴ஸிபி பி³ம்போ³ஹனம்பி விஹாரோபி அட்³ட⁴யோகோ³பி பாஸாதோ³பி ஹம்மியம்பி கு³ஹாபி அட்டோபி மாளோபி லேணம்பி வேளுகு³ம்போ³பி ருக்க²மூலம்பி மண்ட³போபி ஸேனாஸனங். யத்த² வா பன பி⁴க்கூ² படிக்கமந்தி, ஸப்³ப³மேதங் ஸேனாஸன’’ந்தி (விப⁴॰ 527) வசனதோ விஹாரோ அட்³ட⁴யோகோ³ பாஸாதோ³ ஹம்மியங் கு³ஹாதி இத³ங் விஹாரஸேனாஸனங் நாம. மஞ்சோ பீட²ங் பி⁴ஸி பி³ம்போ³ஹனந்தி இத³ங் மஞ்சபீட²ஸேனாஸனங் நாம. சிமிலிகா சம்மக²ண்டோ³ திணஸந்தா²ரோ பண்ணஸந்தா²ரோதி இத³ங் ஸந்த²தஸேனாஸனங் நாம. யத்த² வா பன பி⁴க்கூ² படிக்கமந்தீதி இத³ங் ஓகாஸஸேனாஸனங் நாம.
294. Senāsanakkhandhake senāsanaṃ apaññattaṃ hotīti vihārasenāsanaṃ sandhāya vuttaṃ. Catubbidhañhi (ma. ni. aṭṭa. 1.296) senāsanaṃ vihārasenāsanaṃ mañcapīṭhasenāsanaṃ santhatasenāsanaṃ okāsasenāsananti. Tattha ‘‘mañcopi senāsanaṃ, pīṭhampi bhisipi bimbohanampi vihāropi aḍḍhayogopi pāsādopi hammiyampi guhāpi aṭṭopi māḷopi leṇampi veḷugumbopi rukkhamūlampi maṇḍapopi senāsanaṃ. Yattha vā pana bhikkhū paṭikkamanti, sabbametaṃ senāsana’’nti (vibha. 527) vacanato vihāro aḍḍhayogo pāsādo hammiyaṃ guhāti idaṃ vihārasenāsanaṃ nāma. Mañco pīṭhaṃ bhisi bimbohananti idaṃ mañcapīṭhasenāsanaṃ nāma. Cimilikā cammakhaṇḍo tiṇasanthāro paṇṇasanthāroti idaṃ santhatasenāsanaṃ nāma. Yattha vā pana bhikkhū paṭikkamantīti idaṃ okāsasenāsanaṃ nāma.
ருக்க²மூலேதிஆதீ³ஸு ருக்க²மூலஸேனாஸனங் நாம யங்கிஞ்சி ஸந்த³ச்சா²யங் விவித்தங் ருக்க²மூலங். பப்³ப³தோ நாம ஸேலோ. தத்த² ஹி உத³கஸொண்டீ³ஸு உத³ககிச்சங் கத்வா ஸீதாய ருக்க²ச்சா²யாய நிஸின்னா நானாதி³ஸாஸு கா²யமானாஸு ஸீதேன வாதேன பீ³ஜியமானா ஸமணத⁴ம்மங் கரொந்தி. கந்த³ரேதி கங் வுச்சதி உத³கங், தேன தா³ரிதோ உத³கேன பி⁴ன்னோ பப்³ப³தப்பதே³ஸோ கந்த³ரங். யங் ‘‘நிதம்ப³’’ந்திபி ‘‘நதீ³குஞ்ஜ’’ந்திபி வத³ந்தி. தத்த² ஹி ரஜதபட்டஸதி³ஸா வாலிகா ஹோதி, மத்த²கே மணிவிதானங் விய வனக³ஹனங், மணிக்க²ந்த⁴ஸதி³ஸங் உத³கங் ஸந்த³தி, ஏவரூபங் கந்த³ரங் ஓருய்ஹ பானீயங் பிவித்வா க³த்தானி ஸீதங் கத்வா வாலிகங் உஸ்ஸாபெத்வா பங்ஸுகூலசீவரங் பஞ்ஞபெத்வா தத்த² நிஸின்னா தே பி⁴க்கூ² ஸமணத⁴ம்மங் கரொந்தி. கி³ரிகு³ஹா நாம த்³வின்னங் பப்³ப³தானங் அந்தரா, ஏகஸ்மிங்யேவ வா உமங்க³ஸதி³ஸங் மஹாவிவரங்.
Rukkhamūletiādīsu rukkhamūlasenāsanaṃ nāma yaṃkiñci sandacchāyaṃ vivittaṃ rukkhamūlaṃ. Pabbato nāma selo. Tattha hi udakasoṇḍīsu udakakiccaṃ katvā sītāya rukkhacchāyāya nisinnā nānādisāsu khāyamānāsu sītena vātena bījiyamānā samaṇadhammaṃ karonti. Kandareti kaṃ vuccati udakaṃ, tena dārito udakena bhinno pabbatappadeso kandaraṃ. Yaṃ ‘‘nitamba’’ntipi ‘‘nadīkuñja’’ntipi vadanti. Tattha hi rajatapaṭṭasadisā vālikā hoti, matthake maṇivitānaṃ viya vanagahanaṃ, maṇikkhandhasadisaṃ udakaṃ sandati, evarūpaṃ kandaraṃ oruyha pānīyaṃ pivitvā gattāni sītaṃ katvā vālikaṃ ussāpetvā paṃsukūlacīvaraṃ paññapetvā tattha nisinnā te bhikkhū samaṇadhammaṃ karonti. Giriguhā nāma dvinnaṃ pabbatānaṃ antarā, ekasmiṃyeva vā umaṅgasadisaṃ mahāvivaraṃ.
‘‘வனபத்த²ந்தி தூ³ரானமேதங் ஸேனாஸனானங் அதி⁴வசன’’ந்திஆதி³வசனதோ (விப⁴॰ 531) யத்த² ந கஸந்தி ந வபந்தி, தாதி³ஸங் மனுஸ்ஸானங் உபசாரட்டா²னங் அதிக்கமித்வா டி²தங் அரஞ்ஞகஸேனாஸனங் ‘‘வனபத்த²’’ந்தி வுச்சதி. அஜ்ஜோ²காஸோ நாம கேனசி அச்ச²ன்னோ பதே³ஸோ. ஆகங்க²மானா பனெத்த² சீவரகுடிங் கத்வா வஸந்தி. பலாலபுஞ்ஜேதி பலாலராஸிம்ஹி. மஹாபலாலபுஞ்ஜதோ ஹி பலாலங் நிக்கட்³டி⁴த்வா பப்³பா⁴ரலேணஸதி³ஸே ஆலயே கரொந்தி, க³ச்ச²கு³ம்பா³தீ³னம்பி உபரி பலாலங் பரிக்கி²பித்வா ஹெட்டா² நிஸின்னா ஸமணத⁴ம்மங் கரொந்தி, தங் ஸந்தா⁴யேதங் வுத்தங். பஞ்ச லேணானீதி பஞ்ச லீயனட்டா²னானி. நிலீயந்தி எத்த² பி⁴க்கூ²தி லேணானி, விஹாராதீ³னமேதங் அதி⁴வசனங். ஸுபண்ணவங்ககே³ஹந்தி க³ருளபக்க²ஸண்டா²னேன கதகே³ஹங்.
‘‘Vanapatthanti dūrānametaṃ senāsanānaṃ adhivacana’’ntiādivacanato (vibha. 531) yattha na kasanti na vapanti, tādisaṃ manussānaṃ upacāraṭṭhānaṃ atikkamitvā ṭhitaṃ araññakasenāsanaṃ ‘‘vanapattha’’nti vuccati. Ajjhokāso nāma kenaci acchanno padeso. Ākaṅkhamānā panettha cīvarakuṭiṃ katvā vasanti. Palālapuñjeti palālarāsimhi. Mahāpalālapuñjato hi palālaṃ nikkaḍḍhitvā pabbhāraleṇasadise ālaye karonti, gacchagumbādīnampi upari palālaṃ parikkhipitvā heṭṭhā nisinnā samaṇadhammaṃ karonti, taṃ sandhāyetaṃ vuttaṃ. Pañca leṇānīti pañca līyanaṭṭhānāni. Nilīyanti ettha bhikkhūti leṇāni, vihārādīnametaṃ adhivacanaṃ. Supaṇṇavaṅkagehanti garuḷapakkhasaṇṭhānena katagehaṃ.
295. அனுமோத³னகா³தா²ஸு ஸீதந்தி அஜ்ஜ²த்ததா⁴துக்கோ²ப⁴வஸேன வா ப³ஹித்³த⁴உதுவிபரிணாமவஸஏன வா உப்பஜ்ஜனகஸீதங். உண்ஹந்தி அக்³கி³ஸந்தாபங், தஸ்ஸ வனதா³ஹாதீ³ஸு வா ஸம்ப⁴வோ த³ட்ட²ப்³போ³. படிஹந்தீதி பா³த⁴தி. யதா² தது³ப⁴யவஸேன காயசித்தானங் பா³த⁴னங் ந ஹோதி, ஏவங் கரோதி. ஸீதுண்ஹப்³பா⁴ஹதே ஹி ஸரீரே விக்கி²த்தசித்தோ பி⁴க்கு² யோனிஸோ பத³ஹிதுங் ந ஸக்கோதி. வாளமிகா³னீதி ஸீஹப்³யக்³கா⁴தி³வாளமிகே³. கு³த்தஸேனாஸனஞ்ஹி பவிஸித்வா த்³வாரங் பிதா⁴ய நிஸின்னஸ்ஸ தே பரிஸ்ஸயா ந ஹொந்தி. ஸரீஸபேதி யே கேசி ஸரந்தே க³ச்ச²ந்தே தீ³க⁴ஜாதிகே. மகஸேதி நித³ஸ்ஸனமத்தமேதங், ட³ங்ஸாதீ³னம்பி ஏதேனேவ ஸங்க³ஹோ த³ட்ட²ப்³போ³. ஸிஸிரேதி ஸிஸிரகாலவஸேன ஸத்தாஹவத்³த⁴லிகாதி³வஸேன ச உப்பன்னே ஸிஸிரஸம்ப²ஸ்ஸே. வுட்டி²யோதி யதா³ ததா³ உப்பன்னா வஸ்ஸவுட்டி²யோ.
295. Anumodanagāthāsu sītanti ajjhattadhātukkhobhavasena vā bahiddhautuvipariṇāmavasaena vā uppajjanakasītaṃ. Uṇhanti aggisantāpaṃ, tassa vanadāhādīsu vā sambhavo daṭṭhabbo. Paṭihantīti bādhati. Yathā tadubhayavasena kāyacittānaṃ bādhanaṃ na hoti, evaṃ karoti. Sītuṇhabbhāhate hi sarīre vikkhittacitto bhikkhu yoniso padahituṃ na sakkoti. Vāḷamigānīti sīhabyagghādivāḷamige. Guttasenāsanañhi pavisitvā dvāraṃ pidhāya nisinnassa te parissayā na honti. Sarīsapeti ye keci sarante gacchante dīghajātike. Makaseti nidassanamattametaṃ, ḍaṃsādīnampi eteneva saṅgaho daṭṭhabbo. Sisireti sisirakālavasena sattāhavaddhalikādivasena ca uppanne sisirasamphasse. Vuṭṭhiyoti yadā tadā uppannā vassavuṭṭhiyo.
வாதாதபோ கோ⁴ரோதி ருக்க²க³ச்சா²தீ³னங் உம்மூலப⁴ஞ்ஜனாதி³வஸேன பவத்தியா கோ⁴ரோ ஸரஜஅரஜாதி³பே⁴தோ³ வாதோ சேவ கி³ம்ஹபரிளாஹஸமயேஸு உப்பத்தியா கோ⁴ரோ ஸூரியாதபோ ச படிஹஞ்ஞதி படிபா³ஹீயதி. லேணத்த²ந்தி நானாரம்மணதோ சித்தங் நிவத்தெத்வா படிஸல்லானாராமத்த²ங். ஸுக²த்த²ந்தி வுத்தபரிஸ்ஸயாபா⁴வேன பா²ஸுவிஹாரத்த²ங். ஜா²யிதுந்தி அட்ட²திங்ஸாரம்மணேஸு யத்த² கத்த²சி சித்தங் உபனிஜ்ஜா²யிதுங். விபஸ்ஸிதுந்தி அனிச்சாதி³தோ ஸங்கா²ரே ஸம்மஸிதுங்.
Vātātapo ghoroti rukkhagacchādīnaṃ ummūlabhañjanādivasena pavattiyā ghoro sarajaarajādibhedo vāto ceva gimhapariḷāhasamayesu uppattiyā ghoro sūriyātapo ca paṭihaññati paṭibāhīyati. Leṇatthanti nānārammaṇato cittaṃ nivattetvā paṭisallānārāmatthaṃ. Sukhatthanti vuttaparissayābhāvena phāsuvihāratthaṃ. Jhāyitunti aṭṭhatiṃsārammaṇesu yattha katthaci cittaṃ upanijjhāyituṃ. Vipassitunti aniccādito saṅkhāre sammasituṃ.
விஹாரேதி பதிஸ்ஸயே. காரயேதி காராபெய்ய. ரம்மேதி மனோரமே நிவாஸஸுகே². வாஸயெத்த² ப³ஹுஸ்ஸுதேதி காரெத்வா பன எத்த² விஹாரேஸு ப³ஹுஸ்ஸுதே ஸீலவந்தே கல்யாணத⁴ம்மே நிவாஸெய்ய. தே நிவாஸெந்தோ பன தேஸங் ப³ஹுஸ்ஸுதானங் யதா² பச்சயேஹி கிலமதோ² ந ஹோதி, ஏவங் அன்னஞ்ச பானஞ்ச வத்த²ஸேனாஸனானி ச த³தெ³ய்ய உஜுபூ⁴தேஸு அஜ்ஜா²ஸயஸம்பன்னேஸு கம்மப²லானங் ரதனத்தயகு³ணானஞ்ச ஸத்³த³ஹனேன விப்பஸன்னேன சேதஸா.
Vihāreti patissaye. Kārayeti kārāpeyya. Rammeti manorame nivāsasukhe. Vāsayettha bahussuteti kāretvā pana ettha vihāresu bahussute sīlavante kalyāṇadhamme nivāseyya. Te nivāsento pana tesaṃ bahussutānaṃ yathā paccayehi kilamatho na hoti, evaṃ annañca pānañca vatthasenāsanāni ca dadeyya ujubhūtesu ajjhāsayasampannesu kammaphalānaṃ ratanattayaguṇānañca saddahanena vippasannena cetasā.
இதா³னி க³ஹட்ட²பப்³ப³ஜிதானங் அஞ்ஞமஞ்ஞுபகாரிதங் த³ஸ்ஸேதுங் ‘‘தே தஸ்ஸா’’தி கா³த²மாஹ. தத்த² தேதி தே ப³ஹுஸ்ஸுதா. தஸ்ஸாதி உபாஸகஸ்ஸ. த⁴ம்மங் தே³ஸெந்தீதி ஸகலவட்டது³க்கா²பனூத³னங் ஸத்³த⁴ம்மங் தே³ஸெந்தி. யங் ஸோ த⁴ம்மங் இத⁴ஞ்ஞாயாதி ஸோ புக்³க³லோ யங் ஸத்³த⁴ம்மங் இமஸ்மிங் ஸாஸனே ஸம்மா படிபஜ்ஜனேன ஜானித்வா அக்³க³மக்³கா³தி⁴க³மேன அனாஸவோ ஹுத்வா பரினிப்³பா³யதி.
Idāni gahaṭṭhapabbajitānaṃ aññamaññupakāritaṃ dassetuṃ ‘‘te tassā’’ti gāthamāha. Tattha teti te bahussutā. Tassāti upāsakassa. Dhammaṃ desentīti sakalavaṭṭadukkhāpanūdanaṃ saddhammaṃ desenti. Yaṃ so dhammaṃ idhaññāyāti so puggalo yaṃ saddhammaṃ imasmiṃ sāsane sammā paṭipajjanena jānitvā aggamaggādhigamena anāsavo hutvā parinibbāyati.
ஸோ ச ஸப்³ப³த³தோ³ ஹோதீதி ஆவாஸதா³னஸ்மிங் தி³ன்னே ஸப்³ப³தா³னங் தி³ன்னமேவ ஹோதீதி கத்வா வுத்தங். ததா² ஹி (ஸங்॰ நி॰ அட்ட²॰ 1.1.42) த்³வே தயோ கா³மே பிண்டா³ய சரித்வா கிஞ்சி அலத்³தா⁴ ஆக³தஸ்ஸபி சா²யூத³கஸம்பன்னங் ஆராமங் பவிஸித்வா நஹாயித்வா பதிஸ்ஸயே முஹுத்தங் நிபஜ்ஜித்வா உட்டா²ய நிஸின்னஸ்ஸ காயே ப³லங் ஆஹரித்வா பக்கி²த்தங் விய ஹோதி, ப³ஹி விசரந்தஸ்ஸ ச காயே வண்ணதா⁴து வாதாதபேஹி கிலமதி, பதிஸ்ஸயங் பவிஸித்வா த்³வாரங் பிதா⁴ய முஹுத்தங் நிபன்னஸ்ஸ விஸபா⁴க³ஸந்ததி வூபஸம்மதி, ஸபா⁴க³ஸந்ததி பதிட்டா²தி, வண்ணதா⁴து ஆஹரித்வா பக்கி²த்தா விய ஹோதி, ப³ஹி விசரந்தஸ்ஸ ச பாதே³ கண்டகோ விஜ்ஜ²தி, கா²ணு பஹரதி, ஸரீஸபாதி³பரிஸ்ஸயா சேவ சோரப⁴யஞ்ச உப்பஜ்ஜதி, பதிஸ்ஸயங் பவிஸித்வா த்³வாரங் பிதா⁴ய நிபன்னஸ்ஸ ஸப்³பே³ பரிஸ்ஸயா ந ஹொந்தி, ஸஜ்ஜா²யந்தஸ்ஸ த⁴ம்மபீதிஸுக²ங், கம்மட்டா²னங் மனஸிகரொந்தஸ்ஸ உபஸமஸுக²ஞ்ச உப்பஜ்ஜதி ப³ஹித்³தா⁴விக்கே²பாபா⁴வதோ, ப³ஹி விசரந்தஸ்ஸ ச ஸேதா³ முச்சந்தி, அக்கீ²னி ப²ந்த³ந்தி, ஸேனாஸனங் பவிஸனக்க²ணே மஞ்சபீடா²னி ந பஞ்ஞாயந்தி, முஹுத்தங் நிஸின்னஸ்ஸ பன அக்கி²பஸாதோ³ ஆஹரித்வா பக்கி²த்தோ விய ஹோதி, த்³வாரவாதபானமஞ்சபீடா²தீ³னி பஞ்ஞாயந்தி, ஏதஸ்மிஞ்ச ஆவாஸே வஸந்தங் தி³ஸ்வா மனுஸ்ஸா சதூஹி பச்சயேஹி ஸக்கச்சங் உபட்ட²ஹந்தி. தேன வுத்தங் ‘‘ஸோ ச ஸப்³ப³த³தோ³ ஹோதி, யோ த³தா³தி உபஸ்ஸய’’ந்தி.
So ca sabbadado hotīti āvāsadānasmiṃ dinne sabbadānaṃ dinnameva hotīti katvā vuttaṃ. Tathā hi (saṃ. ni. aṭṭha. 1.1.42) dve tayo gāme piṇḍāya caritvā kiñci aladdhā āgatassapi chāyūdakasampannaṃ ārāmaṃ pavisitvā nahāyitvā patissaye muhuttaṃ nipajjitvā uṭṭhāya nisinnassa kāye balaṃ āharitvā pakkhittaṃ viya hoti, bahi vicarantassa ca kāye vaṇṇadhātu vātātapehi kilamati, patissayaṃ pavisitvā dvāraṃ pidhāya muhuttaṃ nipannassa visabhāgasantati vūpasammati, sabhāgasantati patiṭṭhāti, vaṇṇadhātu āharitvā pakkhittā viya hoti, bahi vicarantassa ca pāde kaṇṭako vijjhati, khāṇu paharati, sarīsapādiparissayā ceva corabhayañca uppajjati, patissayaṃ pavisitvā dvāraṃ pidhāya nipannassa sabbe parissayā na honti, sajjhāyantassa dhammapītisukhaṃ, kammaṭṭhānaṃ manasikarontassa upasamasukhañca uppajjati bahiddhāvikkhepābhāvato, bahi vicarantassa ca sedā muccanti, akkhīni phandanti, senāsanaṃ pavisanakkhaṇe mañcapīṭhāni na paññāyanti, muhuttaṃ nisinnassa pana akkhipasādo āharitvā pakkhitto viya hoti, dvāravātapānamañcapīṭhādīni paññāyanti, etasmiñca āvāse vasantaṃ disvā manussā catūhi paccayehi sakkaccaṃ upaṭṭhahanti. Tena vuttaṃ ‘‘so ca sabbadado hoti, yo dadāti upassaya’’nti.
296. ஆவிஞ்ச²னச்சி²த்³த³ந்தி யத்த² அங்கு³லிங் பவேஸெத்வா த்³வாரங் ஆகட்³ட⁴ந்தா த்³வாரபா³ஹங் பு²ஸாபெந்தி, தஸ்ஸேதங் அதி⁴வசனங். ஆவிஞ்ச²னரஜ்ஜுந்தி கவாடேயேவ சி²த்³த³ங் கத்வா தத்த² பவேஸெத்வா யேன ரஜ்ஜுகேன கட்³ட⁴ந்தா த்³வாரங் பு²ஸாபெந்தி, தங் ஆவிஞ்ச²னரஜ்ஜுகங். ஸேனாஸனபரிபோ⁴கே³ அகப்பியசம்மங் நாம நத்தீ²தி த³ஸ்ஸனத்த²ங் ‘‘ஸசேபி தீ³பினங்கு³ட்டே²ன கதா ஹோதி, வட்டதியேவா’’தி வுத்தங். சேதியே வேதி³காஸதி³ஸந்தி வாதபானபா³ஹாஸு சேதியே வேதி³காய விய பட்டிகாதீ³ஹி த³ஸ்ஸெத்வா கதங். த²ம்ப⁴கவாதபானங் நாம திரியங் தா³ரூனி அத³த்வா உஜுகங் டி²தேஹி ஏவ வேணுஸலாகாதீ³ஹி கதங்.
296.Āviñchanacchiddanti yattha aṅguliṃ pavesetvā dvāraṃ ākaḍḍhantā dvārabāhaṃ phusāpenti, tassetaṃ adhivacanaṃ. Āviñchanarajjunti kavāṭeyeva chiddaṃ katvā tattha pavesetvā yena rajjukena kaḍḍhantā dvāraṃ phusāpenti, taṃ āviñchanarajjukaṃ. Senāsanaparibhoge akappiyacammaṃ nāma natthīti dassanatthaṃ ‘‘sacepi dīpinaṅguṭṭhena katā hoti, vaṭṭatiyevā’’ti vuttaṃ. Cetiye vedikāsadisanti vātapānabāhāsu cetiye vedikāya viya paṭṭikādīhi dassetvā kataṃ. Thambhakavātapānaṃ nāma tiriyaṃ dārūni adatvā ujukaṃ ṭhitehi eva veṇusalākādīhi kataṃ.
விஹாரானுஜானநகதா²வண்ணனா நிட்டி²தா.
Vihārānujānanakathāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / சூளவக்³க³பாளி • Cūḷavaggapāḷi / விஹாரானுஜானநங் • Vihārānujānanaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / சூளவக்³க³-அட்ட²கதா² • Cūḷavagga-aṭṭhakathā / விஹாரானுஜானநகதா² • Vihārānujānanakathā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / விஹாரானுஜானநகதா²வண்ணனா • Vihārānujānanakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / விஹாரானுஜானநகதா²வண்ணனா • Vihārānujānanakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / விஹாரானுஜானநகதா² • Vihārānujānanakathā
