விஹாரானுஜானநகதா²வண்ணனா

Vihārānujānanakathāvaṇṇanā

295. ஸேனாஸனக்க²ந்த⁴கே ஸிஸிரேதி ஸிஸிரகாலே ஹிமபாதவஸேன ஸத்தாஹவத்³த³லிகாதி³வஸ்ஸபாதவஸ்ஸேன ச உப்பன்னோ க²ரோ ஸீதஸம்ப²ஸ்ஸோ அதி⁴ப்பேதோதி ஆஹ ‘‘ஸம்பு²ஸிதகோ’’தி. ‘‘ததோ’’தி இத³ங் கத்துஅத்தே² நிஸ்ஸக்கவசனங், தேன ச விஹாரேன வாதாதபோ படிஹஞ்ஞதீதி அத்தோ²தி ஆஹ ‘‘விஹாரேன படிஹஞ்ஞதீ’’தி.

295. Senāsanakkhandhake sisireti sisirakāle himapātavasena sattāhavaddalikādivassapātavassena ca uppanno kharo sītasamphasso adhippetoti āha ‘‘samphusitako’’ti. ‘‘Tato’’ti idaṃ kattuatthe nissakkavacanaṃ, tena ca vihārena vātātapo paṭihaññatīti atthoti āha ‘‘vihārena paṭihaññatī’’ti.

296. ஆவிஞ்ச²னசி²த்³த³ந்தி யத்த² அங்கு³லிங் வா ரஜ்ஜுஸங்க²லிகாதி³ங் வா பவேஸெத்வா கவாடங் ஆகட்³ட⁴ந்தா த்³வாரபா³ஹங் பு²ஸாபெந்தி, தஸ்ஸேதங் அதி⁴வசனங். ஸேனாஸனபரிபோ⁴கே³ அகப்பியங் நாம நத்தீ²தி த³ஸ்ஸனத்த²ங் ‘‘ஸசேபி தீ³பினங்கு³ட்டே²னா’’திஆதி³ வுத்தங். சேதியே வேதி³காஸதி³ஸந்தி வாதபானதா³ருங் வா ஜாலங் வா அட்ட²பெத்வா தா³ருட்டா²னே சேதியே வேதி³காய பட்டாதீ³னி விய இட்ட²காதீ³ஹி உத்³த⁴ங், திரியஞ்ச பட்டிகாத³யோ த³ஸ்ஸெத்வா சதுசி²த்³த³யுத்தங் கதங். த²ம்ப⁴கவாதபானங் நாம திரியங் தா³ரூனி அத³த்வா உத்³த⁴ங் ட²பிததா³ரூஹி ஏவ கதங். சோளகபாத³புஞ்ச²னங் ப³ந்தி⁴துந்தி வாதபானப்பமாணேன பாத³புஞ்ச²னஸதி³ஸங் சோளகாதி³னா ப³ந்தி⁴த்வா வக்³கு³லிஆதி³ப்பவேஸனநிவாரணத்த²ங், கதே²துந்தி அத்தோ². மிட்³ட⁴கந்தி மஞ்சாகாரேன கட்ட²மத்திகாதீ³ஹி கதவேதி³காகாரங்.

296.Āviñchanachiddanti yattha aṅguliṃ vā rajjusaṅkhalikādiṃ vā pavesetvā kavāṭaṃ ākaḍḍhantā dvārabāhaṃ phusāpenti, tassetaṃ adhivacanaṃ. Senāsanaparibhoge akappiyaṃ nāma natthīti dassanatthaṃ ‘‘sacepi dīpinaṅguṭṭhenā’’tiādi vuttaṃ. Cetiye vedikāsadisanti vātapānadāruṃ vā jālaṃ vā aṭṭhapetvā dāruṭṭhāne cetiye vedikāya paṭṭādīni viya iṭṭhakādīhi uddhaṃ, tiriyañca paṭṭikādayo dassetvā catuchiddayuttaṃ kataṃ. Thambhakavātapānaṃ nāma tiriyaṃ dārūni adatvā uddhaṃ ṭhapitadārūhi eva kataṃ. Coḷakapādapuñchanaṃ bandhitunti vātapānappamāṇena pādapuñchanasadisaṃ coḷakādinā bandhitvā vagguliādippavesananivāraṇatthaṃ, kathetunti attho. Miḍḍhakanti mañcākārena kaṭṭhamattikādīhi katavedikākāraṃ.

297. சதுரஸ்ஸபீட²ந்தி ஸமசதுரஸ்ஸங். அட்ட²ங்கு³லபாத³கங் வட்டதீதி அட்ட²ங்கு³லபாத³கமேவ வட்டதி. பமாணாதிக்கந்தோபி வட்டதீதி ஸமசதுரஸ்ஸமேவ ஸந்தா⁴ய வுத்தங். ஆயதசதுரஸ்ஸா பன ஸத்தங்க³பஞ்சங்கா³பி உச்சபாதா³ ந வட்டந்தி. வெத்தேஹேவ சதுரஸ்ஸாதி³ஆகாரேன கதங் ப⁴த்³த³பீட²ந்தி ஆஹ ‘‘வெத்தமயங் பீட²’’ந்தி. தா³ருபட்டிகாய உபரீதி அடனிஆகாரேன டி²ததா³ருபடலஸ்ஸ ஹெட்டா² உத்³த⁴ங் பாத³ங் கத்வா. பவேஸனகாலஞ்ஹி ஸந்தா⁴ய ‘‘உபரீ’’தி வுத்தங். ஏளகஸ்ஸ பச்சி²மபாத³த்³வயங் விய வங்காகாரேன டி²தத்தா பனேதங் ‘‘ஏளகபாத³பீட²’’ந்தி வுத்தங். பலோடெ²ந்தீதி ஸஹ மஞ்சேஹி பவட்டெந்தி. ருக்கே² , லதா ச முஞ்சித்வா அவஸேஸங் க³ச்சா²தி³கங் ஸப்³ப³ம்பி திணஜாதி ஏவாதி ஆஹ ‘‘யேஸங் கேஸஞ்சி திணஜாதிகான’’ந்திஆதி³.

297.Caturassapīṭhanti samacaturassaṃ. Aṭṭhaṅgulapādakaṃ vaṭṭatīti aṭṭhaṅgulapādakameva vaṭṭati. Pamāṇātikkantopi vaṭṭatīti samacaturassameva sandhāya vuttaṃ. Āyatacaturassā pana sattaṅgapañcaṅgāpi uccapādā na vaṭṭanti. Vetteheva caturassādiākārena kataṃ bhaddapīṭhanti āha ‘‘vettamayaṃ pīṭha’’nti. Dārupaṭṭikāya uparīti aṭaniākārena ṭhitadārupaṭalassa heṭṭhā uddhaṃ pādaṃ katvā. Pavesanakālañhi sandhāya ‘‘uparī’’ti vuttaṃ. Eḷakassa pacchimapādadvayaṃ viya vaṅkākārena ṭhitattā panetaṃ ‘‘eḷakapādapīṭha’’nti vuttaṃ. Paloṭhentīti saha mañcehi pavaṭṭenti. Rukkhe , latā ca muñcitvā avasesaṃ gacchādikaṃ sabbampi tiṇajāti evāti āha ‘‘yesaṃ kesañci tiṇajātikāna’’ntiādi.

உபத³ஹந்தீதி ட²பெந்தி. ஸீஸப்பமாணங் நாம யத்த² கீ³வாய ஸஹ ஸகலங் ஸீஸங் ட²பேதுங் ஸக்கா, தஸ்ஸ ச முட்டி²ரதனங் வித்தா²ரப்பமாணந்தி த³ஸ்ஸெந்தோ ‘‘வித்தா²ரதோ’’திஆதி³மாஹ. இத³ஞ்ச பி³ம்போ³ஹனஸ்ஸ உபோ⁴ஸு அந்தேஸு ட²பேதப்³ப³சோளப்பமாணத³ஸ்ஸனங். தஸ்ஸ வஸேன பி³ம்போ³ஹனஸ்ஸ வித்தா²ரப்பமாணங் பரிச்சி²ஜ்ஜதி, தங் வட்டங் வா சதுரஸ்ஸங் வா கத்வா ஸிப்³பி³தங் யதா² கோடிதோ கோடி வித்தா²ரதோ புது²லட்டா²னங் முட்டி²ரதனப்பமாணங் ஹோதி, ஏவங் ஸிப்³பி³தப்³ப³ங். இதோ அதி⁴கங் ந வட்டதி, தங் பன அந்தேஸு ட²பிதசோளங் கோடியா கோடிங் ஆஹச்ச தி³கு³ணங் கதங் திகண்ணங் ஹோதி. தேஸு தீஸு கண்ணேஸு த்³வின்னங் கண்ணானமந்தரங் வித³த்தி²சதுரங்கு³லங் ஹோதி, மஜ்ஜ²ட்டா²னங் கோடிதோ கோடிங் ஆஹச்ச முட்டி²ரதனங் ஹோதி, இத³மஸ்ஸ உக்கட்ட²ப்பமாணங். தேனாஹ ‘‘தீஸு கண்ணேஸூ’’திஆதி³.

Upadahantīti ṭhapenti. Sīsappamāṇaṃ nāma yattha gīvāya saha sakalaṃ sīsaṃ ṭhapetuṃ sakkā, tassa ca muṭṭhiratanaṃ vitthārappamāṇanti dassento ‘‘vitthārato’’tiādimāha. Idañca bimbohanassa ubhosu antesu ṭhapetabbacoḷappamāṇadassanaṃ. Tassa vasena bimbohanassa vitthārappamāṇaṃ paricchijjati, taṃ vaṭṭaṃ vā caturassaṃ vā katvā sibbitaṃ yathā koṭito koṭi vitthārato puthulaṭṭhānaṃ muṭṭhiratanappamāṇaṃ hoti, evaṃ sibbitabbaṃ. Ito adhikaṃ na vaṭṭati, taṃ pana antesu ṭhapitacoḷaṃ koṭiyā koṭiṃ āhacca diguṇaṃ kataṃ tikaṇṇaṃ hoti. Tesu tīsu kaṇṇesu dvinnaṃ kaṇṇānamantaraṃ vidatthicaturaṅgulaṃ hoti, majjhaṭṭhānaṃ koṭito koṭiṃ āhacca muṭṭhiratanaṃ hoti, idamassa ukkaṭṭhappamāṇaṃ. Tenāha ‘‘tīsu kaṇṇesū’’tiādi.

‘‘கம்ப³லமேவ…பே॰… உண்ணபி⁴ஸிஸங்க்²யமேவ க³ச்ச²தீ’’தி ஸாமஞ்ஞதோ வுத்தத்தா கோ³னகாதி³அகப்பியம்பி உண்ணமயத்த²ரணங் பி⁴ஸியங் பக்கி²பித்வா ஸயிதுங் வட்டதீதி த³ட்ட²ப்³ப³ங்.

‘‘Kambalameva…pe… uṇṇabhisisaṅkhyameva gacchatī’’ti sāmaññato vuttattā gonakādiakappiyampi uṇṇamayattharaṇaṃ bhisiyaṃ pakkhipitvā sayituṃ vaṭṭatīti daṭṭhabbaṃ.

மஸூரகேதி சம்மமயபி⁴ஸியங். சம்மமயங் பன பி³ம்போ³ஹனங் தூலபுண்ணம்பி ந வட்டதி. பாளியங் ஸேனாஸனபரிக்கா²ரது³ஸ்ஸந்தி ஸேனாஸனபரிக்கா²ரகரணத்தா²ய து³ஸ்ஸங். பி⁴ஸிங் ஓனந்தி⁴துந்தி பி⁴ஸித்த²விகாய பக்கி²பித்வா ப³ந்தி⁴துங். பரிபி⁴ஜ்ஜதீதி மஞ்சாதி³தோ ஸாரியமானா பீட²கோடிஆதீ³ஸு நிஸீத³ந்தேஹி க⁴ங்ஸியமானா பி⁴ஸி பரிபி⁴ஜ்ஜதி. ஓனத்³த⁴மஞ்சந்தி பி⁴ஸிங் ஏகாப³த்³த⁴ங் கத்வா ப³த்³த⁴மஞ்சங். பாளியங் ச²விங் உப்பாடெத்வா ஹரந்தீதி பி⁴ஸிச்ச²விங் சோரா ஹரந்தி. போ²ஸிதுந்தி சோரேஹி ஹரிதஸ்ஸ பச்சா² ஹரிதஸஞ்ஞாணபு²ஸிதபி³ந்தூ³னி தா³துங். பி⁴த்திகம்மந்தி நானாவண்ணேஹி விபி⁴த்திராஜிகரணங். ஹத்த²கம்மந்தி ஹத்தே²ன யங் கிஞ்சி ஸஞ்ஞாகரணங்.

Masūraketi cammamayabhisiyaṃ. Cammamayaṃ pana bimbohanaṃ tūlapuṇṇampi na vaṭṭati. Pāḷiyaṃ senāsanaparikkhāradussanti senāsanaparikkhārakaraṇatthāya dussaṃ. Bhisiṃ onandhitunti bhisitthavikāya pakkhipitvā bandhituṃ. Paribhijjatīti mañcādito sāriyamānā pīṭhakoṭiādīsu nisīdantehi ghaṃsiyamānā bhisi paribhijjati. Onaddhamañcanti bhisiṃ ekābaddhaṃ katvā baddhamañcaṃ. Pāḷiyaṃ chaviṃ uppāṭetvā harantīti bhisicchaviṃ corā haranti. Phositunti corehi haritassa pacchā haritasaññāṇaphusitabindūni dātuṃ. Bhittikammanti nānāvaṇṇehi vibhittirājikaraṇaṃ. Hatthakammanti hatthena yaṃ kiñci saññākaraṇaṃ.

298. பாளியங் ந நிபததீதி ந அல்லீயதி. படிபா³ஹெத்வாதி க⁴ங்ஸித்வா. ந நிப³ந்த⁴தீதி அனிப³ந்த⁴னீயோ, ந லக்³க³னகோதி அத்தோ².

298. Pāḷiyaṃ na nipatatīti na allīyati. Paṭibāhetvāti ghaṃsitvā. Na nibandhatīti anibandhanīyo, na lagganakoti attho.

299. ‘‘கரோஹீ’’தி வத்தும்பி ந லப்³ப⁴தீதி ஆணத்தியா ஏவ படிக்கி²த்தத்தா த்³வாரபாலங் ‘‘கிங் ந கரோஸீ’’திஆதி³னா பரியாயேன வத்துங் வட்டதி. ஜாதகபகரணந்தி ஜாதகபடிஸங்யுத்தங் இத்தி²புரிஸாதி³ யங் கிஞ்சி ரூபங் அதி⁴ப்பேதங். ‘‘பரேஹி காராபேது’’ந்தி வுத்தத்தா பு³த்³த⁴ரூபம்பி ஸயங் காதுங் ந லப⁴தி. பாளியங் பஞ்சபடிகந்தி ஜாதிஆதி³பஞ்சப்பகாரவண்ணமட்ட²ங்.

299.‘‘Karohī’’ti vattumpi na labbhatīti āṇattiyā eva paṭikkhittattā dvārapālaṃ ‘‘kiṃ na karosī’’tiādinā pariyāyena vattuṃ vaṭṭati. Jātakapakaraṇanti jātakapaṭisaṃyuttaṃ itthipurisādi yaṃ kiñci rūpaṃ adhippetaṃ. ‘‘Parehi kārāpetu’’nti vuttattā buddharūpampi sayaṃ kātuṃ na labhati. Pāḷiyaṃ pañcapaṭikanti jātiādipañcappakāravaṇṇamaṭṭhaṃ.

300. உபசாரோ ந ஹோதீதி க³ப்³ப⁴ஸ்ஸ ப³ஹி ஸமந்தா அனுபரிக³மனஸ்ஸ ஓகாஸோ நப்பஹோதி. ருக்க²ங் விஜ்ஜி²த்வாதி தச்சி²தஸாரதா³ருங் அக்³க³ஸமீபே விஜ்ஜி²த்வா. கத்வாதி சி²த்³தே³ கத்வா. கப்பகதங் விய ஸாரகா²ணுகே ஆகோடெத்வா ஏவங் கதமேவ ‘‘ஆஹரிமங் பி⁴த்திபாத³’’ந்தி வுத்தங். உபத்த²ம்ப⁴னத்த²ங் பூ⁴மியங் பதிட்டா²பேதுந்தி ஜிண்ணபி⁴த்திபாதே³ன ப³ஹி ஸமானபா⁴ரங் கா²ணுகப்பஸீஸேன உஸ்ஸாபெத்வா மூலேன பூ⁴மியங் பதிட்டா²பேதுங். பரித்தாணத்த²ந்தி உல்லித்தாவலித்தகுடியா ஓவஸ்ஸனட்டா²னஸ்ஸ பரித்தாணத்த²ங். கிடிகந்தி தாலபண்ணாதீ³ஹி கதபத³லங். மத்³தி³தமத்திகந்தி ஓவஸ்ஸனசி²த்³த³ஸ்ஸ பித³ஹனத்த²ங் வுத்தங்.

300.Upacārona hotīti gabbhassa bahi samantā anuparigamanassa okāso nappahoti. Rukkhaṃ vijjhitvāti tacchitasāradāruṃ aggasamīpe vijjhitvā. Katvāti chidde katvā. Kappakataṃ viya sārakhāṇuke ākoṭetvā evaṃ katameva ‘‘āharimaṃ bhittipāda’’nti vuttaṃ. Upatthambhanatthaṃ bhūmiyaṃ patiṭṭhāpetunti jiṇṇabhittipādena bahi samānabhāraṃ khāṇukappasīsena ussāpetvā mūlena bhūmiyaṃ patiṭṭhāpetuṃ. Parittāṇatthanti ullittāvalittakuṭiyā ovassanaṭṭhānassa parittāṇatthaṃ. Kiṭikanti tālapaṇṇādīhi katapadalaṃ. Madditamattikanti ovassanachiddassa pidahanatthaṃ vuttaṃ.

உப⁴தோகுட்டங் நீஹரித்வா கதபதே³ஸஸ்ஸாதி யதா² ப³ஹி டி²தா உஜுகங் அந்தோ நிஸின்னே ந பஸ்ஸந்தி, ஏவங் த்³வாராபி⁴முக²ங் பித³ஹனவஸேன பி⁴த்திஞ்ச அஞ்ஞதோ த்³வாரஞ்ச யோஜெத்வா கதட்டா²னங் வத³தி. ஸமந்தா பரியாகா³ரோதி ஸமந்ததோ ஆவித்³த⁴பமுக²ங். வங்ஸங் த³த்வாதி புரிஸப்பமாணே பாதே³ நிக²ணித்வா தேஸங் உபரி பிட்டி²வங்ஸஸதி³ஸங் பஸ்ஸவங்ஸங் ட²பெத்வா ஓஸாரெத்வா. ஏகங் த³ண்ட³கோடிங் அதிஉச்சாய விஹாரபி⁴த்திகோடியா ஏகங் கோடிங் நீசே வங்ஸபிட்டி²யங் ட²பனவஸேன த³ண்ட³கே பஸாரெத்வா. சக்கலயுத்தோ கிடிகோதி கவாடங் விய விவரணத²கனஸுக²த்த²ங் சக்கலப³ந்த⁴கிடிகங். பாளியங் உக்³கா⁴டனகிடிகந்தி ஆபணாதீ³ஸு அனத்தி²ககாலே உக்கி²பித்வா, உபரி ச ப³ந்தி⁴த்வா பச்சா² ஓதரணகிடிகங், கப்பஸீஸேஹி வா உபத்த²ம்ப⁴னீஹி உக்கி²பித்வா பச்சா² ஓதரணகிடிகம்பி.

Ubhatokuṭṭaṃ nīharitvā katapadesassāti yathā bahi ṭhitā ujukaṃ anto nisinne na passanti, evaṃ dvārābhimukhaṃ pidahanavasena bhittiñca aññato dvārañca yojetvā kataṭṭhānaṃ vadati. Samantā pariyāgāroti samantato āviddhapamukhaṃ. Vaṃsaṃ datvāti purisappamāṇe pāde nikhaṇitvā tesaṃ upari piṭṭhivaṃsasadisaṃ passavaṃsaṃ ṭhapetvā osāretvā. Ekaṃ daṇḍakoṭiṃ atiuccāya vihārabhittikoṭiyā ekaṃ koṭiṃ nīce vaṃsapiṭṭhiyaṃ ṭhapanavasena daṇḍake pasāretvā. Cakkalayutto kiṭikoti kavāṭaṃ viya vivaraṇathakanasukhatthaṃ cakkalabandhakiṭikaṃ. Pāḷiyaṃ ugghāṭanakiṭikanti āpaṇādīsu anatthikakāle ukkhipitvā, upari ca bandhitvā pacchā otaraṇakiṭikaṃ, kappasīsehi vā upatthambhanīhi ukkhipitvā pacchā otaraṇakiṭikampi.

301. பானீயங் ஓதப்பதீதி பானீயபா⁴ஜனேஸு ட²பிதபானீயங் ஆதபேன ஸந்தப்பதி.

301.Pānīyaṃ otappatīti pānīyabhājanesu ṭhapitapānīyaṃ ātapena santappati.

303. தயோ வாடேதி தயோ பரிக்கே²பே. வேளுவாடந்தி ஸப்³ப³ங் தா³ருபரிக்கே²பங் ஸங்க³ண்ஹாதி. கண்டகவாடந்தி ஸப்³ப³ஸாகா²பரிக்கே²பங்.

303.Tayo vāṭeti tayo parikkhepe. Veḷuvāṭanti sabbaṃ dāruparikkhepaṃ saṅgaṇhāti. Kaṇṭakavāṭanti sabbasākhāparikkhepaṃ.

305. ஆலோகோ அந்தரதா⁴யீதி யோ பு³த்³தா⁴ரம்மணாய பீதியா ஆனுபா⁴வேன மஹந்தோ ஓபா⁴ஸோ அஹோஸி, யேன சஸ்ஸ பதீ³பஸஹஸ்ஸேன விய விக³தந்த⁴காரோ மக்³கோ³ அஹோஸி, ஸோ ப³ஹினக³ரே ச²வஸரீரஸமாகுலங் து³க்³க³ந்த⁴ங் பீ³ப⁴ச்ச²ங் ஆமகஸுஸானங் பத்தஸ்ஸ ப⁴யேன பீதிவேகே³ மந்தீ³பூ⁴தே அந்தரதா⁴யி.

305.Āloko antaradhāyīti yo buddhārammaṇāya pītiyā ānubhāvena mahanto obhāso ahosi, yena cassa padīpasahassena viya vigatandhakāro maggo ahosi, so bahinagare chavasarīrasamākulaṃ duggandhaṃ bībhacchaṃ āmakasusānaṃ pattassa bhayena pītivege mandībhūte antaradhāyi.

ஸதங் ஹத்தீ²தி கா³தா²ய ஹத்தி²னோ ஸதஸஹஸ்ஸானீதி ஏவங் பச்சேகங் ஸஹஸ்ஸ-ஸத்³தே³ன யோஜெத்வா அத்தோ² ஞாதப்³போ³. பத³வீதிஹாரஸ்ஸாதி ‘‘பு³த்³த⁴ங் வந்தி³ஸ்ஸாமீ’’தி ரதனத்தயங் உத்³தி³ஸ்ஸ க³ச்ச²தோ ஏகபத³வீதிஹாரஸ்ஸ , தப்பச்சயகுஸலப²லஸ்ஸாதி அத்தோ². தஸ்ஸ ஸோளஸமோ பா⁴கோ³ கலங் நாம, தங் ஸோளஸிங் கலங் யதா²வுத்தா ஹத்தி²ஆத³யோ ஸப்³பே³ நாக்³க⁴ந்தி நாரஹந்தி, நித³ஸ்ஸனமத்தஞ்சேதங். அனேகஸதஸஹஸ்ஸபா⁴க³ம்பி நாக்³க⁴ந்தி.

Sataṃhatthīti gāthāya hatthino satasahassānīti evaṃ paccekaṃ sahassa-saddena yojetvā attho ñātabbo. Padavītihārassāti ‘‘buddhaṃ vandissāmī’’ti ratanattayaṃ uddissa gacchato ekapadavītihārassa , tappaccayakusalaphalassāti attho. Tassa soḷasamo bhāgo kalaṃ nāma, taṃ soḷasiṃ kalaṃ yathāvuttā hatthiādayo sabbe nāgghanti nārahanti, nidassanamattañcetaṃ. Anekasatasahassabhāgampi nāgghanti.

அந்த⁴காரோ அந்தரதா⁴யீதி புன ப³லவபீதியா ஆலோகே ஸமுப்பன்னே அந்தரதா⁴யி. ஆஸத்தியோதி தண்ஹாயோ. வயகரணந்தி தெ³ய்யத⁴ம்மமூலங் நவகம்மங்.

Andhakāro antaradhāyīti puna balavapītiyā āloke samuppanne antaradhāyi. Āsattiyoti taṇhāyo. Vayakaraṇanti deyyadhammamūlaṃ navakammaṃ.

309. த³தெ³ய்யாதி நவகம்மங் அதி⁴ட்டா²துங் விஹாரே இஸ்ஸரியங் த³தெ³ய்யாதி அத்தோ². தி³ன்னோதி நவகம்மங் காதுங் விஹாரோ தி³ன்னோ, விஹாரே நவகம்மங் தி³ன்னந்தி வா அத்தோ².

309.Dadeyyāti navakammaṃ adhiṭṭhātuṃ vihāre issariyaṃ dadeyyāti attho. Dinnoti navakammaṃ kātuṃ vihāro dinno, vihāre navakammaṃ dinnanti vā attho.

313-4. ஸந்தா²கா³ரேதி ஸன்னிபாதமண்ட³பே. ஓகாஸேதி நிவாஸோகாஸே. உத்³தி³ஸ்ஸ கதந்தி ஸங்க⁴ங் உத்³தி³ஸ்ஸ கதங். கி³ஹிவிகடந்தி கி³ஹீஹி கதங் பஞ்ஞத்தங், கி³ஹிஸந்தகந்தி அத்தோ².

313-4.Santhāgāreti sannipātamaṇḍape. Okāseti nivāsokāse. Uddissa katanti saṅghaṃ uddissa kataṃ. Gihivikaṭanti gihīhi kataṃ paññattaṃ, gihisantakanti attho.

விஹாரானுஜானநகதா²வண்ணனா நிட்டி²தா.

Vihārānujānanakathāvaṇṇanā niṭṭhitā.

Next: ஸேனாஸனக்³கா³ஹகதா²வண்ணனா • Senāsanaggāhakathāvaṇṇanā

அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / சூளவக்³க³-அட்ட²கதா² • Cūḷavagga-aṭṭhakathā / விஹாரானுஜானநகதா² • Vihārānujānanakathā

டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā
விஹாரானுஜானநகதா²வண்ணனா • Vihārānujānanakathāvaṇṇanā
மஞ்சபீடா²தி³அனுஜானநகதா²வண்ணனா • Mañcapīṭhādianujānanakathāvaṇṇanā
இட்ட²காசயாதி³அனுஜானநகதா²வண்ணனா • Iṭṭhakācayādianujānanakathāvaṇṇanā
அனாத²பிண்டி³கவத்து²கதா²வண்ணனா • Anāthapiṇḍikavatthukathāvaṇṇanā
ஆஸனப்படிபா³ஹனாதி³கதா²வண்ணனா • Āsanappaṭibāhanādikathāvaṇṇanā

டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / விஹாரானுஜானநகதா²வண்ணனா • Vihārānujānanakathāvaṇṇanā

டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / விஹாரானுஜானநகதா² • Vihārānujānanakathā

© 1991-2023 The Titi Tudorancea Bulletin | Titi Tudorancea^® is a Registered Trademark | Terms of use and privacy policy
Contact