ৰিহারানুজাননকথাৰণ্ণনা

Vihārānujānanakathāvaṇṇanā

২৯৫. সেনাসনক্খন্ধকে সিসিরেতি সিসিরকালে হিমপাতৰসেন সত্তাহৰদ্দলিকাদিৰস্সপাতৰস্সেন চ উপ্পন্নো খরো সীতসম্ফস্সো অধিপ্পেতোতি আহ ‘‘সম্ফুসিতকো’’তি। ‘‘ততো’’তি ইদং কত্তুঅত্থে নিস্সক্কৰচনং, তেন চ ৰিহারেন ৰাতাতপো পটিহঞ্ঞতীতি অত্থোতি আহ ‘‘ৰিহারেন পটিহঞ্ঞতী’’তি।

295. Senāsanakkhandhake sisireti sisirakāle himapātavasena sattāhavaddalikādivassapātavassena ca uppanno kharo sītasamphasso adhippetoti āha ‘‘samphusitako’’ti. ‘‘Tato’’ti idaṃ kattuatthe nissakkavacanaṃ, tena ca vihārena vātātapo paṭihaññatīti atthoti āha ‘‘vihārena paṭihaññatī’’ti.

২৯৬. আৰিঞ্ছনছিদ্দন্তি যত্থ অঙ্গুলিং ৰা রজ্জুসঙ্খলিকাদিং ৰা পৰেসেত্ৰা কৰাটং আকড্ঢন্তা দ্ৰারবাহং ফুসাপেন্তি, তস্সেতং অধিৰচনং। সেনাসনপরিভোগে অকপ্পিযং নাম নত্থীতি দস্সনত্থং ‘‘সচেপি দীপিনঙ্গুট্ঠেনা’’তিআদি ৰুত্তং। চেতিযে ৰেদিকাসদিসন্তি ৰাতপানদারুং ৰা জালং ৰা অট্ঠপেত্ৰা দারুট্ঠানে চেতিযে ৰেদিকায পট্টাদীনি ৰিয ইট্ঠকাদীহি উদ্ধং, তিরিযঞ্চ পট্টিকাদযো দস্সেত্ৰা চতুছিদ্দযুত্তং কতং। থম্ভকৰাতপানং নাম তিরিযং দারূনি অদত্ৰা উদ্ধং ঠপিতদারূহি এৰ কতং। চোল়কপাদপুঞ্ছনং বন্ধিতুন্তি ৰাতপানপ্পমাণেন পাদপুঞ্ছনসদিসং চোল়কাদিনা বন্ধিত্ৰা ৰগ্গুলিআদিপ্পৰেসননিৰারণত্থং, কথেতুন্তি অত্থো। মিড্ঢকন্তি মঞ্চাকারেন কট্ঠমত্তিকাদীহি কতৰেদিকাকারং।

296.Āviñchanachiddanti yattha aṅguliṃ vā rajjusaṅkhalikādiṃ vā pavesetvā kavāṭaṃ ākaḍḍhantā dvārabāhaṃ phusāpenti, tassetaṃ adhivacanaṃ. Senāsanaparibhoge akappiyaṃ nāma natthīti dassanatthaṃ ‘‘sacepi dīpinaṅguṭṭhenā’’tiādi vuttaṃ. Cetiye vedikāsadisanti vātapānadāruṃ vā jālaṃ vā aṭṭhapetvā dāruṭṭhāne cetiye vedikāya paṭṭādīni viya iṭṭhakādīhi uddhaṃ, tiriyañca paṭṭikādayo dassetvā catuchiddayuttaṃ kataṃ. Thambhakavātapānaṃ nāma tiriyaṃ dārūni adatvā uddhaṃ ṭhapitadārūhi eva kataṃ. Coḷakapādapuñchanaṃ bandhitunti vātapānappamāṇena pādapuñchanasadisaṃ coḷakādinā bandhitvā vagguliādippavesananivāraṇatthaṃ, kathetunti attho. Miḍḍhakanti mañcākārena kaṭṭhamattikādīhi katavedikākāraṃ.

২৯৭. চতুরস্সপীঠন্তি সমচতুরস্সং। অট্ঠঙ্গুলপাদকং ৰট্টতীতি অট্ঠঙ্গুলপাদকমেৰ ৰট্টতি। পমাণাতিক্কন্তোপি ৰট্টতীতি সমচতুরস্সমেৰ সন্ধায ৰুত্তং। আযতচতুরস্সা পন সত্তঙ্গপঞ্চঙ্গাপি উচ্চপাদা ন ৰট্টন্তি। ৰেত্তেহেৰ চতুরস্সাদিআকারেন কতং ভদ্দপীঠন্তি আহ ‘‘ৰেত্তমযং পীঠ’’ন্তি। দারুপট্টিকায উপরীতি অটনিআকারেন ঠিতদারুপটলস্স হেট্ঠা উদ্ধং পাদং কত্ৰা। পৰেসনকালঞ্হি সন্ধায ‘‘উপরী’’তি ৰুত্তং। এল়কস্স পচ্ছিমপাদদ্ৰযং ৰিয ৰঙ্কাকারেন ঠিতত্তা পনেতং ‘‘এল়কপাদপীঠ’’ন্তি ৰুত্তং। পলোঠেন্তীতি সহ মঞ্চেহি পৰট্টেন্তি। রুক্খে , লতা চ মুঞ্চিত্ৰা অৰসেসং গচ্ছাদিকং সব্বম্পি তিণজাতি এৰাতি আহ ‘‘যেসং কেসঞ্চি তিণজাতিকান’’ন্তিআদি।

297.Caturassapīṭhanti samacaturassaṃ. Aṭṭhaṅgulapādakaṃ vaṭṭatīti aṭṭhaṅgulapādakameva vaṭṭati. Pamāṇātikkantopi vaṭṭatīti samacaturassameva sandhāya vuttaṃ. Āyatacaturassā pana sattaṅgapañcaṅgāpi uccapādā na vaṭṭanti. Vetteheva caturassādiākārena kataṃ bhaddapīṭhanti āha ‘‘vettamayaṃ pīṭha’’nti. Dārupaṭṭikāya uparīti aṭaniākārena ṭhitadārupaṭalassa heṭṭhā uddhaṃ pādaṃ katvā. Pavesanakālañhi sandhāya ‘‘uparī’’ti vuttaṃ. Eḷakassa pacchimapādadvayaṃ viya vaṅkākārena ṭhitattā panetaṃ ‘‘eḷakapādapīṭha’’nti vuttaṃ. Paloṭhentīti saha mañcehi pavaṭṭenti. Rukkhe , latā ca muñcitvā avasesaṃ gacchādikaṃ sabbampi tiṇajāti evāti āha ‘‘yesaṃ kesañci tiṇajātikāna’’ntiādi.

উপদহন্তীতি ঠপেন্তি। সীসপ্পমাণং নাম যত্থ গীৰায সহ সকলং সীসং ঠপেতুং সক্কা, তস্স চ মুট্ঠিরতনং ৰিত্থারপ্পমাণন্তি দস্সেন্তো ‘‘ৰিত্থারতো’’তিআদিমাহ। ইদঞ্চ বিম্বোহনস্স উভোসু অন্তেসু ঠপেতব্বচোল়প্পমাণদস্সনং। তস্স ৰসেন বিম্বোহনস্স ৰিত্থারপ্পমাণং পরিচ্ছিজ্জতি, তং ৰট্টং ৰা চতুরস্সং ৰা কত্ৰা সিব্বিতং যথা কোটিতো কোটি ৰিত্থারতো পুথুলট্ঠানং মুট্ঠিরতনপ্পমাণং হোতি, এৰং সিব্বিতব্বং। ইতো অধিকং ন ৰট্টতি, তং পন অন্তেসু ঠপিতচোল়ং কোটিযা কোটিং আহচ্চ দিগুণং কতং তিকণ্ণং হোতি। তেসু তীসু কণ্ণেসু দ্ৰিন্নং কণ্ণানমন্তরং ৰিদত্থিচতুরঙ্গুলং হোতি, মজ্ঝট্ঠানং কোটিতো কোটিং আহচ্চ মুট্ঠিরতনং হোতি, ইদমস্স উক্কট্ঠপ্পমাণং। তেনাহ ‘‘তীসু কণ্ণেসূ’’তিআদি।

Upadahantīti ṭhapenti. Sīsappamāṇaṃ nāma yattha gīvāya saha sakalaṃ sīsaṃ ṭhapetuṃ sakkā, tassa ca muṭṭhiratanaṃ vitthārappamāṇanti dassento ‘‘vitthārato’’tiādimāha. Idañca bimbohanassa ubhosu antesu ṭhapetabbacoḷappamāṇadassanaṃ. Tassa vasena bimbohanassa vitthārappamāṇaṃ paricchijjati, taṃ vaṭṭaṃ vā caturassaṃ vā katvā sibbitaṃ yathā koṭito koṭi vitthārato puthulaṭṭhānaṃ muṭṭhiratanappamāṇaṃ hoti, evaṃ sibbitabbaṃ. Ito adhikaṃ na vaṭṭati, taṃ pana antesu ṭhapitacoḷaṃ koṭiyā koṭiṃ āhacca diguṇaṃ kataṃ tikaṇṇaṃ hoti. Tesu tīsu kaṇṇesu dvinnaṃ kaṇṇānamantaraṃ vidatthicaturaṅgulaṃ hoti, majjhaṭṭhānaṃ koṭito koṭiṃ āhacca muṭṭhiratanaṃ hoti, idamassa ukkaṭṭhappamāṇaṃ. Tenāha ‘‘tīsu kaṇṇesū’’tiādi.

‘‘কম্বলমেৰ…পে॰… উণ্ণভিসিসঙ্খ্যমেৰ গচ্ছতী’’তি সামঞ্ঞতো ৰুত্তত্তা গোনকাদিঅকপ্পিযম্পি উণ্ণমযত্থরণং ভিসিযং পক্খিপিত্ৰা সযিতুং ৰট্টতীতি দট্ঠব্বং।

‘‘Kambalameva…pe… uṇṇabhisisaṅkhyameva gacchatī’’ti sāmaññato vuttattā gonakādiakappiyampi uṇṇamayattharaṇaṃ bhisiyaṃ pakkhipitvā sayituṃ vaṭṭatīti daṭṭhabbaṃ.

মসূরকেতি চম্মমযভিসিযং। চম্মমযং পন বিম্বোহনং তূলপুণ্ণম্পি ন ৰট্টতি। পাল়িযং সেনাসনপরিক্খারদুস্সন্তি সেনাসনপরিক্খারকরণত্থায দুস্সং। ভিসিং ওনন্ধিতুন্তি ভিসিত্থৰিকায পক্খিপিত্ৰা বন্ধিতুং। পরিভিজ্জতীতি মঞ্চাদিতো সারিযমানা পীঠকোটিআদীসু নিসীদন্তেহি ঘংসিযমানা ভিসি পরিভিজ্জতি। ওনদ্ধমঞ্চন্তি ভিসিং একাবদ্ধং কত্ৰা বদ্ধমঞ্চং। পাল়িযং ছৰিং উপ্পাটেত্ৰা হরন্তীতি ভিসিচ্ছৰিং চোরা হরন্তি। ফোসিতুন্তি চোরেহি হরিতস্স পচ্ছা হরিতসঞ্ঞাণফুসিতবিন্দূনি দাতুং। ভিত্তিকম্মন্তি নানাৰণ্ণেহি ৰিভিত্তিরাজিকরণং। হত্থকম্মন্তি হত্থেন যং কিঞ্চি সঞ্ঞাকরণং।

Masūraketi cammamayabhisiyaṃ. Cammamayaṃ pana bimbohanaṃ tūlapuṇṇampi na vaṭṭati. Pāḷiyaṃ senāsanaparikkhāradussanti senāsanaparikkhārakaraṇatthāya dussaṃ. Bhisiṃ onandhitunti bhisitthavikāya pakkhipitvā bandhituṃ. Paribhijjatīti mañcādito sāriyamānā pīṭhakoṭiādīsu nisīdantehi ghaṃsiyamānā bhisi paribhijjati. Onaddhamañcanti bhisiṃ ekābaddhaṃ katvā baddhamañcaṃ. Pāḷiyaṃ chaviṃ uppāṭetvā harantīti bhisicchaviṃ corā haranti. Phositunti corehi haritassa pacchā haritasaññāṇaphusitabindūni dātuṃ. Bhittikammanti nānāvaṇṇehi vibhittirājikaraṇaṃ. Hatthakammanti hatthena yaṃ kiñci saññākaraṇaṃ.

২৯৮. পাল়িযং ন নিপততীতি ন অল্লীযতি। পটিবাহেত্ৰাতি ঘংসিত্ৰা। ন নিবন্ধতীতি অনিবন্ধনীযো, ন লগ্গনকোতি অত্থো।

298. Pāḷiyaṃ na nipatatīti na allīyati. Paṭibāhetvāti ghaṃsitvā. Na nibandhatīti anibandhanīyo, na lagganakoti attho.

২৯৯. ‘‘করোহী’’তি ৰত্তুম্পি ন লব্ভতীতি আণত্তিযা এৰ পটিক্খিত্তত্তা দ্ৰারপালং ‘‘কিং ন করোসী’’তিআদিনা পরিযাযেন ৰত্তুং ৰট্টতি। জাতকপকরণন্তি জাতকপটিসংযুত্তং ইত্থিপুরিসাদি যং কিঞ্চি রূপং অধিপ্পেতং। ‘‘পরেহি কারাপেতু’’ন্তি ৰুত্তত্তা বুদ্ধরূপম্পি সযং কাতুং ন লভতি। পাল়িযং পঞ্চপটিকন্তি জাতিআদিপঞ্চপ্পকারৰণ্ণমট্ঠং।

299.‘‘Karohī’’ti vattumpi na labbhatīti āṇattiyā eva paṭikkhittattā dvārapālaṃ ‘‘kiṃ na karosī’’tiādinā pariyāyena vattuṃ vaṭṭati. Jātakapakaraṇanti jātakapaṭisaṃyuttaṃ itthipurisādi yaṃ kiñci rūpaṃ adhippetaṃ. ‘‘Parehi kārāpetu’’nti vuttattā buddharūpampi sayaṃ kātuṃ na labhati. Pāḷiyaṃ pañcapaṭikanti jātiādipañcappakāravaṇṇamaṭṭhaṃ.

৩০০. উপচারো ন হোতীতি গব্ভস্স বহি সমন্তা অনুপরিগমনস্স ওকাসো নপ্পহোতি। রুক্খং ৰিজ্ঝিত্ৰাতি তচ্ছিতসারদারুং অগ্গসমীপে ৰিজ্ঝিত্ৰা। কত্ৰাতি ছিদ্দে কত্ৰা। কপ্পকতং ৰিয সারখাণুকে আকোটেত্ৰা এৰং কতমেৰ ‘‘আহরিমং ভিত্তিপাদ’’ন্তি ৰুত্তং। উপত্থম্ভনত্থং ভূমিযং পতিট্ঠাপেতুন্তি জিণ্ণভিত্তিপাদেন বহি সমানভারং খাণুকপ্পসীসেন উস্সাপেত্ৰা মূলেন ভূমিযং পতিট্ঠাপেতুং। পরিত্তাণত্থন্তি উল্লিত্তাৰলিত্তকুটিযা ওৰস্সনট্ঠানস্স পরিত্তাণত্থং। কিটিকন্তি তালপণ্ণাদীহি কতপদলং। মদ্দিতমত্তিকন্তি ওৰস্সনছিদ্দস্স পিদহনত্থং ৰুত্তং।

300.Upacārona hotīti gabbhassa bahi samantā anuparigamanassa okāso nappahoti. Rukkhaṃ vijjhitvāti tacchitasāradāruṃ aggasamīpe vijjhitvā. Katvāti chidde katvā. Kappakataṃ viya sārakhāṇuke ākoṭetvā evaṃ katameva ‘‘āharimaṃ bhittipāda’’nti vuttaṃ. Upatthambhanatthaṃ bhūmiyaṃ patiṭṭhāpetunti jiṇṇabhittipādena bahi samānabhāraṃ khāṇukappasīsena ussāpetvā mūlena bhūmiyaṃ patiṭṭhāpetuṃ. Parittāṇatthanti ullittāvalittakuṭiyā ovassanaṭṭhānassa parittāṇatthaṃ. Kiṭikanti tālapaṇṇādīhi katapadalaṃ. Madditamattikanti ovassanachiddassa pidahanatthaṃ vuttaṃ.

উভতোকুট্টং নীহরিত্ৰা কতপদেসস্সাতি যথা বহি ঠিতা উজুকং অন্তো নিসিন্নে ন পস্সন্তি, এৰং দ্ৰারাভিমুখং পিদহনৰসেন ভিত্তিঞ্চ অঞ্ঞতো দ্ৰারঞ্চ যোজেত্ৰা কতট্ঠানং ৰদতি। সমন্তা পরিযাগারোতি সমন্ততো আৰিদ্ধপমুখং। ৰংসং দত্ৰাতি পুরিসপ্পমাণে পাদে নিখণিত্ৰা তেসং উপরি পিট্ঠিৰংসসদিসং পস্সৰংসং ঠপেত্ৰা ওসারেত্ৰা। একং দণ্ডকোটিং অতিউচ্চায ৰিহারভিত্তিকোটিযা একং কোটিং নীচে ৰংসপিট্ঠিযং ঠপনৰসেন দণ্ডকে পসারেত্ৰা। চক্কলযুত্তো কিটিকোতি কৰাটং ৰিয ৰিৰরণথকনসুখত্থং চক্কলবন্ধকিটিকং। পাল়িযং উগ্ঘাটনকিটিকন্তি আপণাদীসু অনত্থিককালে উক্খিপিত্ৰা, উপরি চ বন্ধিত্ৰা পচ্ছা ওতরণকিটিকং, কপ্পসীসেহি ৰা উপত্থম্ভনীহি উক্খিপিত্ৰা পচ্ছা ওতরণকিটিকম্পি।

Ubhatokuṭṭaṃ nīharitvā katapadesassāti yathā bahi ṭhitā ujukaṃ anto nisinne na passanti, evaṃ dvārābhimukhaṃ pidahanavasena bhittiñca aññato dvārañca yojetvā kataṭṭhānaṃ vadati. Samantā pariyāgāroti samantato āviddhapamukhaṃ. Vaṃsaṃ datvāti purisappamāṇe pāde nikhaṇitvā tesaṃ upari piṭṭhivaṃsasadisaṃ passavaṃsaṃ ṭhapetvā osāretvā. Ekaṃ daṇḍakoṭiṃ atiuccāya vihārabhittikoṭiyā ekaṃ koṭiṃ nīce vaṃsapiṭṭhiyaṃ ṭhapanavasena daṇḍake pasāretvā. Cakkalayutto kiṭikoti kavāṭaṃ viya vivaraṇathakanasukhatthaṃ cakkalabandhakiṭikaṃ. Pāḷiyaṃ ugghāṭanakiṭikanti āpaṇādīsu anatthikakāle ukkhipitvā, upari ca bandhitvā pacchā otaraṇakiṭikaṃ, kappasīsehi vā upatthambhanīhi ukkhipitvā pacchā otaraṇakiṭikampi.

৩০১. পানীযং ওতপ্পতীতি পানীযভাজনেসু ঠপিতপানীযং আতপেন সন্তপ্পতি।

301.Pānīyaṃ otappatīti pānīyabhājanesu ṭhapitapānīyaṃ ātapena santappati.

৩০৩. তযো ৰাটেতি তযো পরিক্খেপে। ৰেল়ুৰাটন্তি সব্বং দারুপরিক্খেপং সঙ্গণ্হাতি। কণ্টকৰাটন্তি সব্বসাখাপরিক্খেপং।

303.Tayo vāṭeti tayo parikkhepe. Veḷuvāṭanti sabbaṃ dāruparikkhepaṃ saṅgaṇhāti. Kaṇṭakavāṭanti sabbasākhāparikkhepaṃ.

৩০৫. আলোকো অন্তরধাযীতি যো বুদ্ধারম্মণায পীতিযা আনুভাৰেন মহন্তো ওভাসো অহোসি, যেন চস্স পদীপসহস্সেন ৰিয ৰিগতন্ধকারো মগ্গো অহোসি, সো বহিনগরে ছৰসরীরসমাকুলং দুগ্গন্ধং বীভচ্ছং আমকসুসানং পত্তস্স ভযেন পীতিৰেগে মন্দীভূতে অন্তরধাযি।

305.Āloko antaradhāyīti yo buddhārammaṇāya pītiyā ānubhāvena mahanto obhāso ahosi, yena cassa padīpasahassena viya vigatandhakāro maggo ahosi, so bahinagare chavasarīrasamākulaṃ duggandhaṃ bībhacchaṃ āmakasusānaṃ pattassa bhayena pītivege mandībhūte antaradhāyi.

সতং হত্থীতি গাথায হত্থিনো সতসহস্সানীতি এৰং পচ্চেকং সহস্স-সদ্দেন যোজেত্ৰা অত্থো ঞাতব্বো। পদৰীতিহারস্সাতি ‘‘বুদ্ধং ৰন্দিস্সামী’’তি রতনত্তযং উদ্দিস্স গচ্ছতো একপদৰীতিহারস্স , তপ্পচ্চযকুসলফলস্সাতি অত্থো। তস্স সোল়সমো ভাগো কলং নাম, তং সোল়সিং কলং যথাৰুত্তা হত্থিআদযো সব্বে নাগ্ঘন্তি নারহন্তি, নিদস্সনমত্তঞ্চেতং। অনেকসতসহস্সভাগম্পি নাগ্ঘন্তি।

Sataṃhatthīti gāthāya hatthino satasahassānīti evaṃ paccekaṃ sahassa-saddena yojetvā attho ñātabbo. Padavītihārassāti ‘‘buddhaṃ vandissāmī’’ti ratanattayaṃ uddissa gacchato ekapadavītihārassa , tappaccayakusalaphalassāti attho. Tassa soḷasamo bhāgo kalaṃ nāma, taṃ soḷasiṃ kalaṃ yathāvuttā hatthiādayo sabbe nāgghanti nārahanti, nidassanamattañcetaṃ. Anekasatasahassabhāgampi nāgghanti.

অন্ধকারো অন্তরধাযীতি পুন বলৰপীতিযা আলোকে সমুপ্পন্নে অন্তরধাযি। আসত্তিযোতি তণ্হাযো। ৰযকরণন্তি দেয্যধম্মমূলং নৰকম্মং।

Andhakāro antaradhāyīti puna balavapītiyā āloke samuppanne antaradhāyi. Āsattiyoti taṇhāyo. Vayakaraṇanti deyyadhammamūlaṃ navakammaṃ.

৩০৯. দদেয্যাতি নৰকম্মং অধিট্ঠাতুং ৰিহারে ইস্সরিযং দদেয্যাতি অত্থো। দিন্নোতি নৰকম্মং কাতুং ৰিহারো দিন্নো, ৰিহারে নৰকম্মং দিন্নন্তি ৰা অত্থো।

309.Dadeyyāti navakammaṃ adhiṭṭhātuṃ vihāre issariyaṃ dadeyyāti attho. Dinnoti navakammaṃ kātuṃ vihāro dinno, vihāre navakammaṃ dinnanti vā attho.

৩১৩-৪. সন্থাগারেতি সন্নিপাতমণ্ডপে। ওকাসেতি নিৰাসোকাসে। উদ্দিস্স কতন্তি সঙ্ঘং উদ্দিস্স কতং। গিহিৰিকটন্তি গিহীহি কতং পঞ্ঞত্তং, গিহিসন্তকন্তি অত্থো।

313-4.Santhāgāreti sannipātamaṇḍape. Okāseti nivāsokāse. Uddissa katanti saṅghaṃ uddissa kataṃ. Gihivikaṭanti gihīhi kataṃ paññattaṃ, gihisantakanti attho.

ৰিহারানুজাননকথাৰণ্ণনা নিট্ঠিতা।

Vihārānujānanakathāvaṇṇanā niṭṭhitā.

Next: সেনাসনগ্গাহকথাৰণ্ণনা • Senāsanaggāhakathāvaṇṇanā

অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / চূল়ৰগ্গ-অট্ঠকথা • Cūḷavagga-aṭṭhakathā / ৰিহারানুজাননকথা • Vihārānujānanakathā

টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā
ৰিহারানুজাননকথাৰণ্ণনা • Vihārānujānanakathāvaṇṇanā
মঞ্চপীঠাদিঅনুজাননকথাৰণ্ণনা • Mañcapīṭhādianujānanakathāvaṇṇanā
ইট্ঠকাচযাদিঅনুজাননকথাৰণ্ণনা • Iṭṭhakācayādianujānanakathāvaṇṇanā
অনাথপিণ্ডিকৰত্থুকথাৰণ্ণনা • Anāthapiṇḍikavatthukathāvaṇṇanā
আসনপ্পটিবাহনাদিকথাৰণ্ণনা • Āsanappaṭibāhanādikathāvaṇṇanā

টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ৰিহারানুজাননকথাৰণ্ণনা • Vihārānujānanakathāvaṇṇanā

টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ৰিহারানুজাননকথা • Vihārānujānanakathā

© 1991-2023 The Titi Tudorancea Bulletin | Titi Tudorancea^® is a Registered Trademark | Terms of use and privacy policy
Contact