| Library / Tipiṭaka / तिपिटक • Tipiṭaka / वजिरबुद्धि-टीका • Vajirabuddhi-ṭīkā |
६. सेनासनक्खन्धकवण्णना
6. Senāsanakkhandhakavaṇṇanā
विहारानुजाननकथावण्णना
Vihārānujānanakathāvaṇṇanā
२९४. निलीयन्ति भिक्खू एत्थाति विहारादयो लेणानि नाम। आगत-वचनेन तस्सागतसङ्घोव सामी, न अनागतोति केचि, तं न युज्जति समानलाभकतिकाय सिद्धत्ता।
294. Nilīyanti bhikkhū etthāti vihārādayo leṇāni nāma. Āgata-vacanena tassāgatasaṅghova sāmī, na anāgatoti keci, taṃ na yujjati samānalābhakatikāya siddhattā.
२९६-७. दीपिनङ्गुट्ठेनाति एत्थ ‘‘दीपिना अकप्पियचम्मं दस्सेती’’ति लिखितं। थम्भकवातपानं नाम तिरियं दारूनि अदत्वा उजुकं ठितेहेव दारूहि कत्तब्बं। भिसीनं अनुञ्ञातं वट्टतीति बिम्बोहने वट्टतीति अत्थो। तूलपूरितं भिसिं अपस्सयितुं न वट्टति उण्णादीनंयेव अनुञ्ञातत्ता। निसीदननिपज्जनं सन्धाय वुत्तं, तस्मा अपस्सयितुं वट्टतीति चे? अकप्पियन्ति न वट्टतीति केचि। यदि एवं अकप्पियमञ्चञ्च अपस्सयितुं न वट्टेय्य। यस्मा वट्टति, तस्मा दोसो नत्थि। अपिच गिलानस्स बिम्बोहनं निपज्जितुम्पि अनुञ्ञातं, तस्मा भिसिपि वट्टति अपस्सयितुं। आचरिया च अनुजानन्ति, वळञ्जेन्ति चाति एके। सिम्बलितूलसुत्तेन सिब्बितं चीवरं वट्टति। कस्मा? कप्पासस्स अनुलोमतो। ‘‘अक्कफलसुत्तमयम्पि अक्कवाकमयमेव पटिक्खित्त’’न्ति ते एव वदन्ति।
296-7.Dīpinaṅguṭṭhenāti ettha ‘‘dīpinā akappiyacammaṃ dassetī’’ti likhitaṃ. Thambhakavātapānaṃ nāma tiriyaṃ dārūni adatvā ujukaṃ ṭhiteheva dārūhi kattabbaṃ. Bhisīnaṃ anuññātaṃ vaṭṭatīti bimbohane vaṭṭatīti attho. Tūlapūritaṃ bhisiṃ apassayituṃ na vaṭṭati uṇṇādīnaṃyeva anuññātattā. Nisīdananipajjanaṃ sandhāya vuttaṃ, tasmā apassayituṃ vaṭṭatīti ce? Akappiyanti na vaṭṭatīti keci. Yadi evaṃ akappiyamañcañca apassayituṃ na vaṭṭeyya. Yasmā vaṭṭati, tasmā doso natthi. Apica gilānassa bimbohanaṃ nipajjitumpi anuññātaṃ, tasmā bhisipi vaṭṭati apassayituṃ. Ācariyā ca anujānanti, vaḷañjenti cāti eke. Simbalitūlasuttena sibbitaṃ cīvaraṃ vaṭṭati. Kasmā? Kappāsassa anulomato. ‘‘Akkaphalasuttamayampi akkavākamayameva paṭikkhitta’’nti te eva vadanti.
२९८. अनिबन्धनीयो अलग्गो। पटिबाहेत्वाति मट्ठं कत्वा। ‘‘सेतवण्णादीनं यथासङ्ख्यं इक्कासादयो बन्धनत्थं वुत्ता’’ति लिखितं।
298.Anibandhanīyo alaggo. Paṭibāhetvāti maṭṭhaṃ katvā. ‘‘Setavaṇṇādīnaṃ yathāsaṅkhyaṃ ikkāsādayo bandhanatthaṃ vuttā’’ti likhitaṃ.
३००. पकुट्टं समन्ततो आविद्धपमुखं।
300.Pakuṭṭaṃ samantato āviddhapamukhaṃ.
३०३. सुधालेपोति सुधामत्तिकालेपो।
303.Sudhālepoti sudhāmattikālepo.
३०५. आसत्ति तण्हा। सन्तिं अदरं।
305.Āsatti taṇhā. Santiṃ adaraṃ.
३०७. केतुन्ति कयेन गहेतुं।
307.Ketunti kayena gahetuṃ.
३०८. चिताति इट्ठकायो कबळेन निद्धमनवसेन छिन्दित्वा कताति अत्थो।
308.Citāti iṭṭhakāyo kabaḷena niddhamanavasena chinditvā katāti attho.
३१०. छब्बग्गियानं भिक्खूनं अन्तेवासिकाति एत्थ वीसतिवस्सं अतिक्कमित्वा छब्बग्गिया उप्पन्ना। ‘‘आराधयिंसु मे भिक्खू चित्त’’न्ति (म॰ नि॰ १.२२५) वुत्तत्ता अञ्ञस्मिं काले सावत्थिगमने उप्पन्नं वत्थुं इध आपत्तिदस्सनत्थं आहरित्वा वुत्तन्ति युत्तं विय, विचारेत्वा गहेतब्बं। वुद्धन्ति वुद्धतरं।
310.Chabbaggiyānaṃbhikkhūnaṃ antevāsikāti ettha vīsativassaṃ atikkamitvā chabbaggiyā uppannā. ‘‘Ārādhayiṃsu me bhikkhū citta’’nti (ma. ni. 1.225) vuttattā aññasmiṃ kāle sāvatthigamane uppannaṃ vatthuṃ idha āpattidassanatthaṃ āharitvā vuttanti yuttaṃ viya, vicāretvā gahetabbaṃ. Vuddhanti vuddhataraṃ.
३१३. सन्थरेति तिणसन्थरादयो।
313.Santhareti tiṇasantharādayo.
Related texts:
तिपिटक (मूल) • Tipiṭaka (Mūla) / विनयपिटक • Vinayapiṭaka / चूळवग्गपाळि • Cūḷavaggapāḷi
विहारानुजाननं • Vihārānujānanaṃ
मञ्चपीठादिअनुजाननं • Mañcapīṭhādianujānanaṃ
सेतवण्णादिअनुजाननं • Setavaṇṇādianujānanaṃ
इट्ठकाचयादिअनुजाननं • Iṭṭhakācayādianujānanaṃ
आरामपरिक्खेपअनुजाननं • Ārāmaparikkhepaanujānanaṃ
अनाथपिण्डिकवत्थु • Anāthapiṇḍikavatthu
नवकम्मदानं • Navakammadānaṃ
अग्गासनादिअनुजाननं • Aggāsanādianujānanaṃ
आसनप्पटिबाहनपटिक्खेपं • Āsanappaṭibāhanapaṭikkhepaṃ
अट्ठकथा • Aṭṭhakathā / विनयपिटक (अट्ठकथा) • Vinayapiṭaka (aṭṭhakathā) / चूळवग्ग-अट्ठकथा • Cūḷavagga-aṭṭhakathā / विहारानुजाननकथा • Vihārānujānanakathā
टीका • Tīkā / विनयपिटक (टीका) • Vinayapiṭaka (ṭīkā) / सारत्थदीपनी-टीका • Sāratthadīpanī-ṭīkā
विहारानुजाननकथावण्णना • Vihārānujānanakathāvaṇṇanā
मञ्चपीठादिअनुजाननकथावण्णना • Mañcapīṭhādianujānanakathāvaṇṇanā
इट्ठकाचयादिअनुजाननकथावण्णना • Iṭṭhakācayādianujānanakathāvaṇṇanā
अनाथपिण्डिकवत्थुकथावण्णना • Anāthapiṇḍikavatthukathāvaṇṇanā
अग्गासनादिअनुजाननकथावण्णना • Aggāsanādianujānanakathāvaṇṇanā
आसनप्पटिबाहनादिकथावण्णना • Āsanappaṭibāhanādikathāvaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / विमतिविनोदनी-टीका • Vimativinodanī-ṭīkā / विहारानुजाननकथावण्णना • Vihārānujānanakathāvaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / पाचित्यादियोजनापाळि • Pācityādiyojanāpāḷi / विहारानुजाननकथा • Vihārānujānanakathā
