| Library / Tipiṭaka / ติปิฎก • Tipiṭaka / วชิรพุทฺธิ-ฎีกา • Vajirabuddhi-ṭīkā |
๖. เสนาสนกฺขนฺธกวณฺณนา
6. Senāsanakkhandhakavaṇṇanā
วิหารานุชานนกถาวณฺณนา
Vihārānujānanakathāvaṇṇanā
๒๙๔. นิลียนฺติ ภิกฺขู เอตฺถาติ วิหาราทโย เลณานิ นามฯ อาคต-วจเนน ตสฺสาคตสโงฺฆว สามี, น อนาคโตติ เกจิ, ตํ น ยุชฺชติ สมานลาภกติกาย สิทฺธตฺตาฯ
294. Nilīyanti bhikkhū etthāti vihārādayo leṇāni nāma. Āgata-vacanena tassāgatasaṅghova sāmī, na anāgatoti keci, taṃ na yujjati samānalābhakatikāya siddhattā.
๒๙๖-๗. ทีปินงฺคุเฎฺฐนาติ เอตฺถ ‘‘ทีปินา อกปฺปิยจมฺมํ ทเสฺสตี’’ติ ลิขิตํฯ ถมฺภกวาตปานํ นาม ติริยํ ทารูนิ อทตฺวา อุชุกํ ฐิเตเหว ทารูหิ กตฺตพฺพํฯ ภิสีนํ อนุญฺญาตํ วฎฺฎตีติ พิโมฺพหเน วฎฺฎตีติ อโตฺถฯ ตูลปูริตํ ภิสิํ อปสฺสยิตุํ น วฎฺฎติ อุณฺณาทีนํเยว อนุญฺญาตตฺตาฯ นิสีทนนิปชฺชนํ สนฺธาย วุตฺตํ, ตสฺมา อปสฺสยิตุํ วฎฺฎตีติ เจ? อกปฺปิยนฺติ น วฎฺฎตีติ เกจิฯ ยทิ เอวํ อกปฺปิยมญฺจญฺจ อปสฺสยิตุํ น วเฎฺฎยฺยฯ ยสฺมา วฎฺฎติ, ตสฺมา โทโส นตฺถิฯ อปิจ คิลานสฺส พิโมฺพหนํ นิปชฺชิตุมฺปิ อนุญฺญาตํ, ตสฺมา ภิสิปิ วฎฺฎติ อปสฺสยิตุํฯ อาจริยา จ อนุชานนฺติ, วฬเญฺชนฺติ จาติ เอเกฯ สิมฺพลิตูลสุเตฺตน สิพฺพิตํ จีวรํ วฎฺฎติฯ กสฺมา? กปฺปาสสฺส อนุโลมโตฯ ‘‘อกฺกผลสุตฺตมยมฺปิ อกฺกวากมยเมว ปฎิกฺขิตฺต’’นฺติ เต เอว วทนฺติฯ
296-7.Dīpinaṅguṭṭhenāti ettha ‘‘dīpinā akappiyacammaṃ dassetī’’ti likhitaṃ. Thambhakavātapānaṃ nāma tiriyaṃ dārūni adatvā ujukaṃ ṭhiteheva dārūhi kattabbaṃ. Bhisīnaṃ anuññātaṃ vaṭṭatīti bimbohane vaṭṭatīti attho. Tūlapūritaṃ bhisiṃ apassayituṃ na vaṭṭati uṇṇādīnaṃyeva anuññātattā. Nisīdananipajjanaṃ sandhāya vuttaṃ, tasmā apassayituṃ vaṭṭatīti ce? Akappiyanti na vaṭṭatīti keci. Yadi evaṃ akappiyamañcañca apassayituṃ na vaṭṭeyya. Yasmā vaṭṭati, tasmā doso natthi. Apica gilānassa bimbohanaṃ nipajjitumpi anuññātaṃ, tasmā bhisipi vaṭṭati apassayituṃ. Ācariyā ca anujānanti, vaḷañjenti cāti eke. Simbalitūlasuttena sibbitaṃ cīvaraṃ vaṭṭati. Kasmā? Kappāsassa anulomato. ‘‘Akkaphalasuttamayampi akkavākamayameva paṭikkhitta’’nti te eva vadanti.
๒๙๘. อนิพนฺธนีโย อลโคฺคฯ ปฎิพาเหตฺวาติ มฎฺฐํ กตฺวาฯ ‘‘เสตวณฺณาทีนํ ยถาสงฺขฺยํ อิกฺกาสาทโย พนฺธนตฺถํ วุตฺตา’’ติ ลิขิตํฯ
298.Anibandhanīyo alaggo. Paṭibāhetvāti maṭṭhaṃ katvā. ‘‘Setavaṇṇādīnaṃ yathāsaṅkhyaṃ ikkāsādayo bandhanatthaṃ vuttā’’ti likhitaṃ.
๓๐๐. ปกุฎฺฎํ สมนฺตโต อาวิทฺธปมุขํฯ
300.Pakuṭṭaṃ samantato āviddhapamukhaṃ.
๓๐๓. สุธาเลโปติ สุธามตฺติกาเลโปฯ
303.Sudhālepoti sudhāmattikālepo.
๓๐๕. อาสตฺติ ตณฺหาฯ สนฺติํ อทรํฯ
305.Āsatti taṇhā. Santiṃ adaraṃ.
๓๐๗. เกตุนฺติ กเยน คเหตุํฯ
307.Ketunti kayena gahetuṃ.
๓๐๘. จิตาติ อิฎฺฐกาโย กพเฬน นิทฺธมนวเสน ฉินฺทิตฺวา กตาติ อโตฺถฯ
308.Citāti iṭṭhakāyo kabaḷena niddhamanavasena chinditvā katāti attho.
๓๑๐. ฉพฺพคฺคิยานํ ภิกฺขูนํ อเนฺตวาสิกาติ เอตฺถ วีสติวสฺสํ อติกฺกมิตฺวา ฉพฺพคฺคิยา อุปฺปนฺนาฯ ‘‘อาราธยิํสุ เม ภิกฺขู จิตฺต’’นฺติ (ม. นิ. ๑.๒๒๕) วุตฺตตฺตา อญฺญสฺมิํ กาเล สาวตฺถิคมเน อุปฺปนฺนํ วตฺถุํ อิธ อาปตฺติทสฺสนตฺถํ อาหริตฺวา วุตฺตนฺติ ยุตฺตํ วิย, วิจาเรตฺวา คเหตพฺพํฯ วุทฺธนฺติ วุทฺธตรํฯ
310.Chabbaggiyānaṃbhikkhūnaṃ antevāsikāti ettha vīsativassaṃ atikkamitvā chabbaggiyā uppannā. ‘‘Ārādhayiṃsu me bhikkhū citta’’nti (ma. ni. 1.225) vuttattā aññasmiṃ kāle sāvatthigamane uppannaṃ vatthuṃ idha āpattidassanatthaṃ āharitvā vuttanti yuttaṃ viya, vicāretvā gahetabbaṃ. Vuddhanti vuddhataraṃ.
๓๑๓. สนฺถเรติ ติณสนฺถราทโยฯ
313.Santhareti tiṇasantharādayo.
Related texts:
ติปิฎก (มูล) • Tipiṭaka (Mūla) / วินยปิฎก • Vinayapiṭaka / จูฬวคฺคปาฬิ • Cūḷavaggapāḷi
วิหารานุชานนํ • Vihārānujānanaṃ
มญฺจปีฐาทิอนุชานนํ • Mañcapīṭhādianujānanaṃ
เสตวณฺณาทิอนุชานนํ • Setavaṇṇādianujānanaṃ
อิฎฺฐกาจยาทิอนุชานนํ • Iṭṭhakācayādianujānanaṃ
อารามปริเกฺขปอนุชานนํ • Ārāmaparikkhepaanujānanaṃ
อนาถปิณฺฑิกวตฺถุ • Anāthapiṇḍikavatthu
นวกมฺมทานํ • Navakammadānaṃ
อคฺคาสนาทิอนุชานนํ • Aggāsanādianujānanaṃ
อาสนปฺปฎิพาหนปฎิเกฺขปํ • Āsanappaṭibāhanapaṭikkhepaṃ
อฎฺฐกถา • Aṭṭhakathā / วินยปิฎก (อฎฺฐกถา) • Vinayapiṭaka (aṭṭhakathā) / จูฬวคฺค-อฎฺฐกถา • Cūḷavagga-aṭṭhakathā / วิหารานุชานนกถา • Vihārānujānanakathā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / สารตฺถทีปนี-ฎีกา • Sāratthadīpanī-ṭīkā
วิหารานุชานนกถาวณฺณนา • Vihārānujānanakathāvaṇṇanā
มญฺจปีฐาทิอนุชานนกถาวณฺณนา • Mañcapīṭhādianujānanakathāvaṇṇanā
อิฎฺฐกาจยาทิอนุชานนกถาวณฺณนา • Iṭṭhakācayādianujānanakathāvaṇṇanā
อนาถปิณฺฑิกวตฺถุกถาวณฺณนา • Anāthapiṇḍikavatthukathāvaṇṇanā
อคฺคาสนาทิอนุชานนกถาวณฺณนา • Aggāsanādianujānanakathāvaṇṇanā
อาสนปฺปฎิพาหนาทิกถาวณฺณนา • Āsanappaṭibāhanādikathāvaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / วิมติวิโนทนี-ฎีกา • Vimativinodanī-ṭīkā / วิหารานุชานนกถาวณฺณนา • Vihārānujānanakathāvaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / ปาจิตฺยาทิโยชนาปาฬิ • Pācityādiyojanāpāḷi / วิหารานุชานนกถา • Vihārānujānanakathā
