| Library / Tipiṭaka / තිපිටක • Tipiṭaka / වජිරබුද්‌ධි-ටීකා • Vajirabuddhi-ṭīkā |
6. සෙනාසනක්‌ඛන්‌ධකවණ්‌ණනා
6. Senāsanakkhandhakavaṇṇanā
විහාරානුජානනකථාවණ්‌ණනා
Vihārānujānanakathāvaṇṇanā
294. නිලීයන්‌ති භික්‌ඛූ එත්‌ථාති විහාරාදයො ලෙණානි නාම. ආගත-වචනෙන තස්‌සාගතසඞ්‌ඝොව සාමී, න අනාගතොති කෙචි, තං න යුජ්‌ජති සමානලාභකතිකාය සිද්‌ධත්‌තා.
294. Nilīyanti bhikkhū etthāti vihārādayo leṇāni nāma. Āgata-vacanena tassāgatasaṅghova sāmī, na anāgatoti keci, taṃ na yujjati samānalābhakatikāya siddhattā.
296-7. දීපිනඞ්‌ගුට්‌ඨෙනාති එත්‌ථ ‘‘දීපිනා අකප්‌පියචම්‌මං දස්‌සෙතී’’ති ලිඛිතං. ථම්‌භකවාතපානං නාම තිරියං දාරූනි අදත්‌වා උජුකං ඨිතෙහෙව දාරූහි කත්‌තබ්‌බං. භිසීනං අනුඤ්‌ඤාතං වට්‌ටතීති බිම්‌බොහනෙ වට්‌ටතීති අත්‌ථො. තූලපූරිතං භිසිං අපස්‌සයිතුං න වට්‌ටති උණ්‌ණාදීනංයෙව අනුඤ්‌ඤාතත්‌තා. නිසීදනනිපජ්‌ජනං සන්‌ධාය වුත්‌තං, තස්‌මා අපස්‌සයිතුං වට්‌ටතීති චෙ? අකප්‌පියන්‌ති න වට්‌ටතීති කෙචි. යදි එවං අකප්‌පියමඤ්‌චඤ්‌ච අපස්‌සයිතුං න වට්‌ටෙය්‍ය. යස්‌මා වට්‌ටති, තස්‌මා දොසො නත්‌ථි. අපිච ගිලානස්‌ස බිම්‌බොහනං නිපජ්‌ජිතුම්‌පි අනුඤ්‌ඤාතං, තස්‌මා භිසිපි වට්‌ටති අපස්‌සයිතුං. ආචරියා ච අනුජානන්‌ති, වළඤ්‌ජෙන්‌ති චාති එකෙ. සිම්‌බලිතූලසුත්‌තෙන සිබ්‌බිතං චීවරං වට්‌ටති. කස්‌මා? කප්‌පාසස්‌ස අනුලොමතො. ‘‘අක්‌කඵලසුත්‌තමයම්‌පි අක්‌කවාකමයමෙව පටික්‌ඛිත්‌ත’’න්‌ති තෙ එව වදන්‌ති.
296-7.Dīpinaṅguṭṭhenāti ettha ‘‘dīpinā akappiyacammaṃ dassetī’’ti likhitaṃ. Thambhakavātapānaṃ nāma tiriyaṃ dārūni adatvā ujukaṃ ṭhiteheva dārūhi kattabbaṃ. Bhisīnaṃ anuññātaṃ vaṭṭatīti bimbohane vaṭṭatīti attho. Tūlapūritaṃ bhisiṃ apassayituṃ na vaṭṭati uṇṇādīnaṃyeva anuññātattā. Nisīdananipajjanaṃ sandhāya vuttaṃ, tasmā apassayituṃ vaṭṭatīti ce? Akappiyanti na vaṭṭatīti keci. Yadi evaṃ akappiyamañcañca apassayituṃ na vaṭṭeyya. Yasmā vaṭṭati, tasmā doso natthi. Apica gilānassa bimbohanaṃ nipajjitumpi anuññātaṃ, tasmā bhisipi vaṭṭati apassayituṃ. Ācariyā ca anujānanti, vaḷañjenti cāti eke. Simbalitūlasuttena sibbitaṃ cīvaraṃ vaṭṭati. Kasmā? Kappāsassa anulomato. ‘‘Akkaphalasuttamayampi akkavākamayameva paṭikkhitta’’nti te eva vadanti.
298. අනිබන්‌ධනීයො අලග්‌ගො. පටිබාහෙත්‌වාති මට්‌ඨං කත්‌වා. ‘‘සෙතවණ්‌ණාදීනං යථාසඞ්‌ඛ්‍යං ඉක්‌කාසාදයො බන්‌ධනත්‌ථං වුත්‌තා’’ති ලිඛිතං.
298.Anibandhanīyo alaggo. Paṭibāhetvāti maṭṭhaṃ katvā. ‘‘Setavaṇṇādīnaṃ yathāsaṅkhyaṃ ikkāsādayo bandhanatthaṃ vuttā’’ti likhitaṃ.
300. පකුට්‌ටං සමන්‌තතො ආවිද්‌ධපමුඛං.
300.Pakuṭṭaṃ samantato āviddhapamukhaṃ.
303. සුධාලෙපොති සුධාමත්‌තිකාලෙපො.
303.Sudhālepoti sudhāmattikālepo.
305. ආසත්‌ති තණ්‌හා. සන්‌තිං අදරං.
305.Āsatti taṇhā. Santiṃ adaraṃ.
307. කෙතුන්‌ති කයෙන ගහෙතුං.
307.Ketunti kayena gahetuṃ.
308. චිතාති ඉට්‌ඨකායො කබළෙන නිද්‌ධමනවසෙන ඡින්‌දිත්‌වා කතාති අත්‌ථො.
308.Citāti iṭṭhakāyo kabaḷena niddhamanavasena chinditvā katāti attho.
310. ඡබ්‌බග්‌ගියානං භික්‌ඛූනං අන්‌තෙවාසිකාති එත්‌ථ වීසතිවස්‌සං අතික්‌කමිත්‌වා ඡබ්‌බග්‌ගියා උප්‌පන්‌නා. ‘‘ආරාධයිංසු මෙ භික්‌ඛූ චිත්‌ත’’න්‌ති (ම. නි. 1.225) වුත්‌තත්‌තා අඤ්‌ඤස්‌මිං කාලෙ සාවත්‌ථිගමනෙ උප්‌පන්‌නං වත්‌ථුං ඉධ ආපත්‌තිදස්‌සනත්‌ථං ආහරිත්‌වා වුත්‌තන්‌ති යුත්‌තං විය, විචාරෙත්‌වා ගහෙතබ්‌බං. වුද්‌ධන්‌ති වුද්‌ධතරං.
310.Chabbaggiyānaṃbhikkhūnaṃ antevāsikāti ettha vīsativassaṃ atikkamitvā chabbaggiyā uppannā. ‘‘Ārādhayiṃsu me bhikkhū citta’’nti (ma. ni. 1.225) vuttattā aññasmiṃ kāle sāvatthigamane uppannaṃ vatthuṃ idha āpattidassanatthaṃ āharitvā vuttanti yuttaṃ viya, vicāretvā gahetabbaṃ. Vuddhanti vuddhataraṃ.
313. සන්‌ථරෙති තිණසන්‌ථරාදයො.
313.Santhareti tiṇasantharādayo.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / චූළවග්‌ගපාළි • Cūḷavaggapāḷi
විහාරානුජානනං • Vihārānujānanaṃ
මඤ්‌චපීඨාදිඅනුජානනං • Mañcapīṭhādianujānanaṃ
සෙතවණ්‌ණාදිඅනුජානනං • Setavaṇṇādianujānanaṃ
ඉට්‌ඨකාචයාදිඅනුජානනං • Iṭṭhakācayādianujānanaṃ
ආරාමපරික්‌ඛෙපඅනුජානනං • Ārāmaparikkhepaanujānanaṃ
අනාථපිණ්‌ඩිකවත්‌ථු • Anāthapiṇḍikavatthu
නවකම්‌මදානං • Navakammadānaṃ
අග්‌ගාසනාදිඅනුජානනං • Aggāsanādianujānanaṃ
ආසනප්‌පටිබාහනපටික්‌ඛෙපං • Āsanappaṭibāhanapaṭikkhepaṃ
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / චූළවග්‌ග-අට්‌ඨකථා • Cūḷavagga-aṭṭhakathā / විහාරානුජානනකථා • Vihārānujānanakathā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā
විහාරානුජානනකථාවණ්‌ණනා • Vihārānujānanakathāvaṇṇanā
මඤ්‌චපීඨාදිඅනුජානනකථාවණ්‌ණනා • Mañcapīṭhādianujānanakathāvaṇṇanā
ඉට්‌ඨකාචයාදිඅනුජානනකථාවණ්‌ණනා • Iṭṭhakācayādianujānanakathāvaṇṇanā
අනාථපිණ්‌ඩිකවත්‌ථුකථාවණ්‌ණනා • Anāthapiṇḍikavatthukathāvaṇṇanā
අග්‌ගාසනාදිඅනුජානනකථාවණ්‌ණනා • Aggāsanādianujānanakathāvaṇṇanā
ආසනප්‌පටිබාහනාදිකථාවණ්‌ණනා • Āsanappaṭibāhanādikathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / විහාරානුජානනකථාවණ්‌ණනා • Vihārānujānanakathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / විහාරානුජානනකථා • Vihārānujānanakathā
