ཝིཧཱརཱནུཛཱནནཀཐཱཝཎྞནཱ

Vihārānujānanakathāvaṇṇanā

༢༩༥. སེནཱསནཀྑནྡྷཀེ སིསིརེཏི སིསིརཀཱལེ ཧིམཔཱཏཝསེན སཏྟཱཧཝདྡལིཀཱདིཝསྶཔཱཏཝསྶེན ཙ ཨུཔྤནྣོ ཁརོ སཱིཏསམྥསྶོ ཨདྷིཔྤེཏོཏི ཨཱཧ ‘‘སམྥུསིཏཀོ’’ཏི། ‘‘ཏཏོ’’ཏི ཨིདཾ ཀཏྟུཨཏྠེ ནིསྶཀྐཝཙནཾ, ཏེན ཙ ཝིཧཱརེན ཝཱཏཱཏཔོ པཊིཧཉྙཏཱིཏི ཨཏྠོཏི ཨཱཧ ‘‘ཝིཧཱརེན པཊིཧཉྙཏཱི’’ཏི།

295. Senāsanakkhandhake sisireti sisirakāle himapātavasena sattāhavaddalikādivassapātavassena ca uppanno kharo sītasamphasso adhippetoti āha ‘‘samphusitako’’ti. ‘‘Tato’’ti idaṃ kattuatthe nissakkavacanaṃ, tena ca vihārena vātātapo paṭihaññatīti atthoti āha ‘‘vihārena paṭihaññatī’’ti.

༢༩༦. ཨཱཝིཉྪནཚིདྡནྟི ཡཏྠ ཨངྒུལིཾ ཝཱ རཛྫུསངྑལིཀཱདིཾ ཝཱ པཝེསེཏྭཱ ཀཝཱཊཾ ཨཱཀཌྜྷནྟཱ དྭཱརབཱཧཾ ཕུསཱཔེནྟི, ཏསྶེཏཾ ཨདྷིཝཙནཾ། སེནཱསནཔརིབྷོགེ ཨཀཔྤིཡཾ ནཱམ ནཏྠཱིཏི དསྶནཏྠཾ ‘‘སཙེཔི དཱིཔིནངྒུཊྛེནཱ’’ཏིཨཱདི ཝུཏྟཾ། ཙེཏིཡེ ཝེདིཀཱསདིསནྟི ཝཱཏཔཱནདཱརུཾ ཝཱ ཛཱལཾ ཝཱ ཨཊྛཔེཏྭཱ དཱརུཊྛཱནེ ཙེཏིཡེ ཝེདིཀཱཡ པཊྚཱདཱིནི ཝིཡ ཨིཊྛཀཱདཱིཧི ཨུདྡྷཾ, ཏིརིཡཉྩ པཊྚིཀཱདཡོ དསྶེཏྭཱ ཙཏུཚིདྡཡུཏྟཾ ཀཏཾ། ཐམྦྷཀཝཱཏཔཱནཾ ནཱམ ཏིརིཡཾ དཱརཱུནི ཨདཏྭཱ ཨུདྡྷཾ ཋཔིཏདཱརཱུཧི ཨེཝ ཀཏཾ། ཙོལ༹ཀཔཱདཔུཉྪནཾ བནྡྷིཏུནྟི ཝཱཏཔཱནཔྤམཱཎེན པཱདཔུཉྪནསདིསཾ ཙོལ༹ཀཱདིནཱ བནྡྷིཏྭཱ ཝགྒུལིཨཱདིཔྤཝེསནནིཝཱརཎཏྠཾ, ཀཐེཏུནྟི ཨཏྠོ། མིཌྜྷཀནྟི མཉྩཱཀཱརེན ཀཊྛམཏྟིཀཱདཱིཧི ཀཏཝེདིཀཱཀཱརཾ།

296.Āviñchanachiddanti yattha aṅguliṃ vā rajjusaṅkhalikādiṃ vā pavesetvā kavāṭaṃ ākaḍḍhantā dvārabāhaṃ phusāpenti, tassetaṃ adhivacanaṃ. Senāsanaparibhoge akappiyaṃ nāma natthīti dassanatthaṃ ‘‘sacepi dīpinaṅguṭṭhenā’’tiādi vuttaṃ. Cetiye vedikāsadisanti vātapānadāruṃ vā jālaṃ vā aṭṭhapetvā dāruṭṭhāne cetiye vedikāya paṭṭādīni viya iṭṭhakādīhi uddhaṃ, tiriyañca paṭṭikādayo dassetvā catuchiddayuttaṃ kataṃ. Thambhakavātapānaṃ nāma tiriyaṃ dārūni adatvā uddhaṃ ṭhapitadārūhi eva kataṃ. Coḷakapādapuñchanaṃ bandhitunti vātapānappamāṇena pādapuñchanasadisaṃ coḷakādinā bandhitvā vagguliādippavesananivāraṇatthaṃ, kathetunti attho. Miḍḍhakanti mañcākārena kaṭṭhamattikādīhi katavedikākāraṃ.

༢༩༧. ཙཏུརསྶཔཱིཋནྟི སམཙཏུརསྶཾ། ཨཊྛངྒུལཔཱདཀཾ ཝཊྚཏཱིཏི ཨཊྛངྒུལཔཱདཀམེཝ ཝཊྚཏི། པམཱཎཱཏིཀྐནྟོཔི ཝཊྚཏཱིཏི སམཙཏུརསྶམེཝ སནྡྷཱཡ ཝུཏྟཾ། ཨཱཡཏཙཏུརསྶཱ པན སཏྟངྒཔཉྩངྒཱཔི ཨུཙྩཔཱདཱ ན ཝཊྚནྟི། ཝེཏྟེཧེཝ ཙཏུརསྶཱདིཨཱཀཱརེན ཀཏཾ བྷདྡཔཱིཋནྟི ཨཱཧ ‘‘ཝེཏྟམཡཾ པཱིཋ’’ནྟི། དཱརུཔཊྚིཀཱཡ ཨུཔརཱིཏི ཨཊནིཨཱཀཱརེན ཋིཏདཱརུཔཊལསྶ ཧེཊྛཱ ཨུདྡྷཾ པཱདཾ ཀཏྭཱ། པཝེསནཀཱལཉྷི སནྡྷཱཡ ‘‘ཨུཔརཱི’’ཏི ཝུཏྟཾ། ཨེལ༹ཀསྶ པཙྪིམཔཱདདྭཡཾ ཝིཡ ཝངྐཱཀཱརེན ཋིཏཏྟཱ པནེཏཾ ‘‘ཨེལ༹ཀཔཱདཔཱིཋ’’ནྟི ཝུཏྟཾ། པལོཋེནྟཱིཏི སཧ མཉྩེཧི པཝཊྚེནྟི། རུཀྑེ , ལཏཱ ཙ མུཉྩིཏྭཱ ཨཝསེསཾ གཙྪཱདིཀཾ སབྦམྤི ཏིཎཛཱཏི ཨེཝཱཏི ཨཱཧ ‘‘ཡེསཾ ཀེསཉྩི ཏིཎཛཱཏིཀཱན’’ནྟིཨཱདི།

297.Caturassapīṭhanti samacaturassaṃ. Aṭṭhaṅgulapādakaṃ vaṭṭatīti aṭṭhaṅgulapādakameva vaṭṭati. Pamāṇātikkantopi vaṭṭatīti samacaturassameva sandhāya vuttaṃ. Āyatacaturassā pana sattaṅgapañcaṅgāpi uccapādā na vaṭṭanti. Vetteheva caturassādiākārena kataṃ bhaddapīṭhanti āha ‘‘vettamayaṃ pīṭha’’nti. Dārupaṭṭikāya uparīti aṭaniākārena ṭhitadārupaṭalassa heṭṭhā uddhaṃ pādaṃ katvā. Pavesanakālañhi sandhāya ‘‘uparī’’ti vuttaṃ. Eḷakassa pacchimapādadvayaṃ viya vaṅkākārena ṭhitattā panetaṃ ‘‘eḷakapādapīṭha’’nti vuttaṃ. Paloṭhentīti saha mañcehi pavaṭṭenti. Rukkhe , latā ca muñcitvā avasesaṃ gacchādikaṃ sabbampi tiṇajāti evāti āha ‘‘yesaṃ kesañci tiṇajātikāna’’ntiādi.

ཨུཔདཧནྟཱིཏི ཋཔེནྟི། སཱིསཔྤམཱཎཾ ནཱམ ཡཏྠ གཱིཝཱཡ སཧ སཀལཾ སཱིསཾ ཋཔེཏུཾ སཀྐཱ, ཏསྶ ཙ མུཊྛིརཏནཾ ཝིཏྠཱརཔྤམཱཎནྟི དསྶེནྟོ ‘‘ཝིཏྠཱརཏོ’’ཏིཨཱདིམཱཧ། ཨིདཉྩ བིམྦོཧནསྶ ཨུབྷོསུ ཨནྟེསུ ཋཔེཏབྦཙོལ༹པྤམཱཎདསྶནཾ། ཏསྶ ཝསེན བིམྦོཧནསྶ ཝིཏྠཱརཔྤམཱཎཾ པརིཙྪིཛྫཏི, ཏཾ ཝཊྚཾ ཝཱ ཙཏུརསྶཾ ཝཱ ཀཏྭཱ སིབྦིཏཾ ཡཐཱ ཀོཊིཏོ ཀོཊི ཝིཏྠཱརཏོ པུཐུལཊྛཱནཾ མུཊྛིརཏནཔྤམཱཎཾ ཧོཏི, ཨེཝཾ སིབྦིཏབྦཾ། ཨིཏོ ཨདྷིཀཾ ན ཝཊྚཏི, ཏཾ པན ཨནྟེསུ ཋཔིཏཙོལ༹ཾ ཀོཊིཡཱ ཀོཊིཾ ཨཱཧཙྩ དིགུཎཾ ཀཏཾ ཏིཀཎྞཾ ཧོཏི། ཏེསུ ཏཱིསུ ཀཎྞེསུ དྭིནྣཾ ཀཎྞཱནམནྟརཾ ཝིདཏྠིཙཏུརངྒུལཾ ཧོཏི, མཛ྄ཛྷཊྛཱནཾ ཀོཊིཏོ ཀོཊིཾ ཨཱཧཙྩ མུཊྛིརཏནཾ ཧོཏི, ཨིདམསྶ ཨུཀྐཊྛཔྤམཱཎཾ། ཏེནཱཧ ‘‘ཏཱིསུ ཀཎྞེསཱུ’’ཏིཨཱདི།

Upadahantīti ṭhapenti. Sīsappamāṇaṃ nāma yattha gīvāya saha sakalaṃ sīsaṃ ṭhapetuṃ sakkā, tassa ca muṭṭhiratanaṃ vitthārappamāṇanti dassento ‘‘vitthārato’’tiādimāha. Idañca bimbohanassa ubhosu antesu ṭhapetabbacoḷappamāṇadassanaṃ. Tassa vasena bimbohanassa vitthārappamāṇaṃ paricchijjati, taṃ vaṭṭaṃ vā caturassaṃ vā katvā sibbitaṃ yathā koṭito koṭi vitthārato puthulaṭṭhānaṃ muṭṭhiratanappamāṇaṃ hoti, evaṃ sibbitabbaṃ. Ito adhikaṃ na vaṭṭati, taṃ pana antesu ṭhapitacoḷaṃ koṭiyā koṭiṃ āhacca diguṇaṃ kataṃ tikaṇṇaṃ hoti. Tesu tīsu kaṇṇesu dvinnaṃ kaṇṇānamantaraṃ vidatthicaturaṅgulaṃ hoti, majjhaṭṭhānaṃ koṭito koṭiṃ āhacca muṭṭhiratanaṃ hoti, idamassa ukkaṭṭhappamāṇaṃ. Tenāha ‘‘tīsu kaṇṇesū’’tiādi.

‘‘ཀམྦལམེཝ…པེ॰… ཨུཎྞབྷིསིསངྑྱམེཝ གཙྪཏཱི’’ཏི སཱམཉྙཏོ ཝུཏྟཏྟཱ གོནཀཱདིཨཀཔྤིཡམྤི ཨུཎྞམཡཏྠརཎཾ བྷིསིཡཾ པཀྑིཔིཏྭཱ སཡིཏུཾ ཝཊྚཏཱིཏི དཊྛབྦཾ།

‘‘Kambalameva…pe… uṇṇabhisisaṅkhyameva gacchatī’’ti sāmaññato vuttattā gonakādiakappiyampi uṇṇamayattharaṇaṃ bhisiyaṃ pakkhipitvā sayituṃ vaṭṭatīti daṭṭhabbaṃ.

མསཱུརཀེཏི ཙམྨམཡབྷིསིཡཾ། ཙམྨམཡཾ པན བིམྦོཧནཾ ཏཱུལཔུཎྞམྤི ན ཝཊྚཏི། པཱལི༹ཡཾ སེནཱསནཔརིཀྑཱརདུསྶནྟི སེནཱསནཔརིཀྑཱརཀརཎཏྠཱཡ དུསྶཾ། བྷིསིཾ ཨོནནྡྷིཏུནྟི བྷིསིཏྠཝིཀཱཡ པཀྑིཔིཏྭཱ བནྡྷིཏུཾ། པརིབྷིཛྫཏཱིཏི མཉྩཱདིཏོ སཱརིཡམཱནཱ པཱིཋཀོཊིཨཱདཱིསུ ནིསཱིདནྟེཧི གྷཾསིཡམཱནཱ བྷིསི པརིབྷིཛྫཏི། ཨོནདྡྷམཉྩནྟི བྷིསིཾ ཨེཀཱབདྡྷཾ ཀཏྭཱ བདྡྷམཉྩཾ། པཱལི༹ཡཾ ཚཝིཾ ཨུཔྤཱཊེཏྭཱ ཧརནྟཱིཏི བྷིསིཙྪཝིཾ ཙོརཱ ཧརནྟི། ཕོསིཏུནྟི ཙོརེཧི ཧརིཏསྶ པཙྪཱ ཧརིཏསཉྙཱཎཕུསིཏབིནྡཱུནི དཱཏུཾ། བྷིཏྟིཀམྨནྟི ནཱནཱཝཎྞེཧི ཝིབྷིཏྟིརཱཛིཀརཎཾ། ཧཏྠཀམྨནྟི ཧཏྠེན ཡཾ ཀིཉྩི སཉྙཱཀརཎཾ།

Masūraketi cammamayabhisiyaṃ. Cammamayaṃ pana bimbohanaṃ tūlapuṇṇampi na vaṭṭati. Pāḷiyaṃ senāsanaparikkhāradussanti senāsanaparikkhārakaraṇatthāya dussaṃ. Bhisiṃ onandhitunti bhisitthavikāya pakkhipitvā bandhituṃ. Paribhijjatīti mañcādito sāriyamānā pīṭhakoṭiādīsu nisīdantehi ghaṃsiyamānā bhisi paribhijjati. Onaddhamañcanti bhisiṃ ekābaddhaṃ katvā baddhamañcaṃ. Pāḷiyaṃ chaviṃ uppāṭetvā harantīti bhisicchaviṃ corā haranti. Phositunti corehi haritassa pacchā haritasaññāṇaphusitabindūni dātuṃ. Bhittikammanti nānāvaṇṇehi vibhittirājikaraṇaṃ. Hatthakammanti hatthena yaṃ kiñci saññākaraṇaṃ.

༢༩༨. པཱལི༹ཡཾ ན ནིཔཏཏཱིཏི ན ཨལླཱིཡཏི། པཊིབཱཧེཏྭཱཏི གྷཾསིཏྭཱ། ན ནིབནྡྷཏཱིཏི ཨནིབནྡྷནཱིཡོ, ན ལགྒནཀོཏི ཨཏྠོ།

298. Pāḷiyaṃ na nipatatīti na allīyati. Paṭibāhetvāti ghaṃsitvā. Na nibandhatīti anibandhanīyo, na lagganakoti attho.

༢༩༩. ‘‘ཀརོཧཱི’’ཏི ཝཏྟུམྤི ན ལབྦྷཏཱིཏི ཨཱཎཏྟིཡཱ ཨེཝ པཊིཀྑིཏྟཏྟཱ དྭཱརཔཱལཾ ‘‘ཀིཾ ན ཀརོསཱི’’ཏིཨཱདིནཱ པརིཡཱཡེན ཝཏྟུཾ ཝཊྚཏི། ཛཱཏཀཔཀརཎནྟི ཛཱཏཀཔཊིསཾཡུཏྟཾ ཨིཏྠིཔུརིསཱདི ཡཾ ཀིཉྩི རཱུཔཾ ཨདྷིཔྤེཏཾ། ‘‘པརེཧི ཀཱརཱཔེཏུ’’ནྟི ཝུཏྟཏྟཱ བུདྡྷརཱུཔམྤི སཡཾ ཀཱཏུཾ ན ལབྷཏི། པཱལི༹ཡཾ པཉྩཔཊིཀནྟི ཛཱཏིཨཱདིཔཉྩཔྤཀཱརཝཎྞམཊྛཾ།

299.‘‘Karohī’’ti vattumpi na labbhatīti āṇattiyā eva paṭikkhittattā dvārapālaṃ ‘‘kiṃ na karosī’’tiādinā pariyāyena vattuṃ vaṭṭati. Jātakapakaraṇanti jātakapaṭisaṃyuttaṃ itthipurisādi yaṃ kiñci rūpaṃ adhippetaṃ. ‘‘Parehi kārāpetu’’nti vuttattā buddharūpampi sayaṃ kātuṃ na labhati. Pāḷiyaṃ pañcapaṭikanti jātiādipañcappakāravaṇṇamaṭṭhaṃ.

༣༠༠. ཨུཔཙཱརོ ན ཧོཏཱིཏི གབྦྷསྶ བཧི སམནྟཱ ཨནུཔརིགམནསྶ ཨོཀཱསོ ནཔྤཧོཏི། རུཀྑཾ ཝིཛ྄ཛྷིཏྭཱཏི ཏཙྪིཏསཱརདཱརུཾ ཨགྒསམཱིཔེ ཝིཛ྄ཛྷིཏྭཱ། ཀཏྭཱཏི ཚིདྡེ ཀཏྭཱ། ཀཔྤཀཏཾ ཝིཡ སཱརཁཱཎུཀེ ཨཱཀོཊེཏྭཱ ཨེཝཾ ཀཏམེཝ ‘‘ཨཱཧརིམཾ བྷིཏྟིཔཱད’’ནྟི ཝུཏྟཾ། ཨུཔཏྠམྦྷནཏྠཾ བྷཱུམིཡཾ པཏིཊྛཱཔེཏུནྟི ཛིཎྞབྷིཏྟིཔཱདེན བཧི སམཱནབྷཱརཾ ཁཱཎུཀཔྤསཱིསེན ཨུསྶཱཔེཏྭཱ མཱུལེན བྷཱུམིཡཾ པཏིཊྛཱཔེཏུཾ། པརིཏྟཱཎཏྠནྟི ཨུལླིཏྟཱཝལིཏྟཀུཊིཡཱ ཨོཝསྶནཊྛཱནསྶ པརིཏྟཱཎཏྠཾ། ཀིཊིཀནྟི ཏཱལཔཎྞཱདཱིཧི ཀཏཔདལཾ། མདྡིཏམཏྟིཀནྟི ཨོཝསྶནཚིདྡསྶ པིདཧནཏྠཾ ཝུཏྟཾ།

300.Upacārona hotīti gabbhassa bahi samantā anuparigamanassa okāso nappahoti. Rukkhaṃ vijjhitvāti tacchitasāradāruṃ aggasamīpe vijjhitvā. Katvāti chidde katvā. Kappakataṃ viya sārakhāṇuke ākoṭetvā evaṃ katameva ‘‘āharimaṃ bhittipāda’’nti vuttaṃ. Upatthambhanatthaṃ bhūmiyaṃ patiṭṭhāpetunti jiṇṇabhittipādena bahi samānabhāraṃ khāṇukappasīsena ussāpetvā mūlena bhūmiyaṃ patiṭṭhāpetuṃ. Parittāṇatthanti ullittāvalittakuṭiyā ovassanaṭṭhānassa parittāṇatthaṃ. Kiṭikanti tālapaṇṇādīhi katapadalaṃ. Madditamattikanti ovassanachiddassa pidahanatthaṃ vuttaṃ.

ཨུབྷཏོཀུཊྚཾ ནཱིཧརིཏྭཱ ཀཏཔདེསསྶཱཏི ཡཐཱ བཧི ཋིཏཱ ཨུཛུཀཾ ཨནྟོ ནིསིནྣེ ན པསྶནྟི, ཨེཝཾ དྭཱརཱབྷིམུཁཾ པིདཧནཝསེན བྷིཏྟིཉྩ ཨཉྙཏོ དྭཱརཉྩ ཡོཛེཏྭཱ ཀཏཊྛཱནཾ ཝདཏི། སམནྟཱ པརིཡཱགཱརོཏི སམནྟཏོ ཨཱཝིདྡྷཔམུཁཾ། ཝཾསཾ དཏྭཱཏི པུརིསཔྤམཱཎེ པཱདེ ནིཁཎིཏྭཱ ཏེསཾ ཨུཔརི པིཊྛིཝཾསསདིསཾ པསྶཝཾསཾ ཋཔེཏྭཱ ཨོསཱརེཏྭཱ། ཨེཀཾ དཎྜཀོཊིཾ ཨཏིཨུཙྩཱཡ ཝིཧཱརབྷིཏྟིཀོཊིཡཱ ཨེཀཾ ཀོཊིཾ ནཱིཙེ ཝཾསཔིཊྛིཡཾ ཋཔནཝསེན དཎྜཀེ པསཱརེཏྭཱ། ཙཀྐལཡུཏྟོ ཀིཊིཀོཏི ཀཝཱཊཾ ཝིཡ ཝིཝརཎཐཀནསུཁཏྠཾ ཙཀྐལབནྡྷཀིཊིཀཾ། པཱལི༹ཡཾ ཨུགྒྷཱཊནཀིཊིཀནྟི ཨཱཔཎཱདཱིསུ ཨནཏྠིཀཀཱལེ ཨུཀྑིཔིཏྭཱ, ཨུཔརི ཙ བནྡྷིཏྭཱ པཙྪཱ ཨོཏརཎཀིཊིཀཾ, ཀཔྤསཱིསེཧི ཝཱ ཨུཔཏྠམྦྷནཱིཧི ཨུཀྑིཔིཏྭཱ པཙྪཱ ཨོཏརཎཀིཊིཀམྤི།

Ubhatokuṭṭaṃ nīharitvā katapadesassāti yathā bahi ṭhitā ujukaṃ anto nisinne na passanti, evaṃ dvārābhimukhaṃ pidahanavasena bhittiñca aññato dvārañca yojetvā kataṭṭhānaṃ vadati. Samantā pariyāgāroti samantato āviddhapamukhaṃ. Vaṃsaṃ datvāti purisappamāṇe pāde nikhaṇitvā tesaṃ upari piṭṭhivaṃsasadisaṃ passavaṃsaṃ ṭhapetvā osāretvā. Ekaṃ daṇḍakoṭiṃ atiuccāya vihārabhittikoṭiyā ekaṃ koṭiṃ nīce vaṃsapiṭṭhiyaṃ ṭhapanavasena daṇḍake pasāretvā. Cakkalayutto kiṭikoti kavāṭaṃ viya vivaraṇathakanasukhatthaṃ cakkalabandhakiṭikaṃ. Pāḷiyaṃ ugghāṭanakiṭikanti āpaṇādīsu anatthikakāle ukkhipitvā, upari ca bandhitvā pacchā otaraṇakiṭikaṃ, kappasīsehi vā upatthambhanīhi ukkhipitvā pacchā otaraṇakiṭikampi.

༣༠༡. པཱནཱིཡཾ ཨོཏཔྤཏཱིཏི པཱནཱིཡབྷཱཛནེསུ ཋཔིཏཔཱནཱིཡཾ ཨཱཏཔེན སནྟཔྤཏི།

301.Pānīyaṃ otappatīti pānīyabhājanesu ṭhapitapānīyaṃ ātapena santappati.

༣༠༣. ཏཡོ ཝཱཊེཏི ཏཡོ པརིཀྑེཔེ། ཝེལུ༹ཝཱཊནྟི སབྦཾ དཱརུཔརིཀྑེཔཾ སངྒཎྷཱཏི། ཀཎྚཀཝཱཊནྟི སབྦསཱཁཱཔརིཀྑེཔཾ།

303.Tayo vāṭeti tayo parikkhepe. Veḷuvāṭanti sabbaṃ dāruparikkhepaṃ saṅgaṇhāti. Kaṇṭakavāṭanti sabbasākhāparikkhepaṃ.

༣༠༥. ཨཱལོཀོ ཨནྟརདྷཱཡཱིཏི ཡོ བུདྡྷཱརམྨཎཱཡ པཱིཏིཡཱ ཨཱནུབྷཱཝེན མཧནྟོ ཨོབྷཱསོ ཨཧོསི, ཡེན ཙསྶ པདཱིཔསཧསྶེན ཝིཡ ཝིགཏནྡྷཀཱརོ མགྒོ ཨཧོསི, སོ བཧིནགརེ ཚཝསརཱིརསམཱཀུལཾ དུགྒནྡྷཾ བཱིབྷཙྪཾ ཨཱམཀསུསཱནཾ པཏྟསྶ བྷཡེན པཱིཏིཝེགེ མནྡཱིབྷཱུཏེ ཨནྟརདྷཱཡི།

305.Āloko antaradhāyīti yo buddhārammaṇāya pītiyā ānubhāvena mahanto obhāso ahosi, yena cassa padīpasahassena viya vigatandhakāro maggo ahosi, so bahinagare chavasarīrasamākulaṃ duggandhaṃ bībhacchaṃ āmakasusānaṃ pattassa bhayena pītivege mandībhūte antaradhāyi.

སཏཾ ཧཏྠཱིཏི གཱཐཱཡ ཧཏྠིནོ སཏསཧསྶཱནཱིཏི ཨེཝཾ པཙྩེཀཾ སཧསྶ-སདྡེན ཡོཛེཏྭཱ ཨཏྠོ ཉཱཏབྦོ། པདཝཱིཏིཧཱརསྶཱཏི ‘‘བུདྡྷཾ ཝནྡིསྶཱམཱི’’ཏི རཏནཏྟཡཾ ཨུདྡིསྶ གཙྪཏོ ཨེཀཔདཝཱིཏིཧཱརསྶ , ཏཔྤཙྩཡཀུསལཕལསྶཱཏི ཨཏྠོ། ཏསྶ སོལ༹སམོ བྷཱགོ ཀལཾ ནཱམ, ཏཾ སོལ༹སིཾ ཀལཾ ཡཐཱཝུཏྟཱ ཧཏྠིཨཱདཡོ སབྦེ ནཱགྒྷནྟི ནཱརཧནྟི, ནིདསྶནམཏྟཉྩེཏཾ། ཨནེཀསཏསཧསྶབྷཱགམྤི ནཱགྒྷནྟི།

Sataṃhatthīti gāthāya hatthino satasahassānīti evaṃ paccekaṃ sahassa-saddena yojetvā attho ñātabbo. Padavītihārassāti ‘‘buddhaṃ vandissāmī’’ti ratanattayaṃ uddissa gacchato ekapadavītihārassa , tappaccayakusalaphalassāti attho. Tassa soḷasamo bhāgo kalaṃ nāma, taṃ soḷasiṃ kalaṃ yathāvuttā hatthiādayo sabbe nāgghanti nārahanti, nidassanamattañcetaṃ. Anekasatasahassabhāgampi nāgghanti.

ཨནྡྷཀཱརོ ཨནྟརདྷཱཡཱིཏི པུན བལཝཔཱིཏིཡཱ ཨཱལོཀེ སམུཔྤནྣེ ཨནྟརདྷཱཡི། ཨཱསཏྟིཡོཏི ཏཎྷཱཡོ། ཝཡཀརཎནྟི དེཡྻདྷམྨམཱུལཾ ནཝཀམྨཾ།

Andhakāro antaradhāyīti puna balavapītiyā āloke samuppanne antaradhāyi. Āsattiyoti taṇhāyo. Vayakaraṇanti deyyadhammamūlaṃ navakammaṃ.

༣༠༩. དདེཡྻཱཏི ནཝཀམྨཾ ཨདྷིཊྛཱཏུཾ ཝིཧཱརེ ཨིསྶརིཡཾ དདེཡྻཱཏི ཨཏྠོ། དིནྣོཏི ནཝཀམྨཾ ཀཱཏུཾ ཝིཧཱརོ དིནྣོ, ཝིཧཱརེ ནཝཀམྨཾ དིནྣནྟི ཝཱ ཨཏྠོ།

309.Dadeyyāti navakammaṃ adhiṭṭhātuṃ vihāre issariyaṃ dadeyyāti attho. Dinnoti navakammaṃ kātuṃ vihāro dinno, vihāre navakammaṃ dinnanti vā attho.

༣༡༣-༤. སནྠཱགཱརེཏི སནྣིཔཱཏམཎྜཔེ། ཨོཀཱསེཏི ནིཝཱསོཀཱསེ། ཨུདྡིསྶ ཀཏནྟི སངྒྷཾ ཨུདྡིསྶ ཀཏཾ། གིཧིཝིཀཊནྟི གིཧཱིཧི ཀཏཾ པཉྙཏྟཾ, གིཧིསནྟཀནྟི ཨཏྠོ།

313-4.Santhāgāreti sannipātamaṇḍape. Okāseti nivāsokāse. Uddissa katanti saṅghaṃ uddissa kataṃ. Gihivikaṭanti gihīhi kataṃ paññattaṃ, gihisantakanti attho.

ཝིཧཱརཱནུཛཱནནཀཐཱཝཎྞནཱ ནིཊྛིཏཱ།

Vihārānujānanakathāvaṇṇanā niṭṭhitā.

Next: སེནཱསནགྒཱཧཀཐཱཝཎྞནཱ • Senāsanaggāhakathāvaṇṇanā

ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / ཙཱུལ༹ཝགྒ-ཨཊྛཀཐཱ • Cūḷavagga-aṭṭhakathā / ཝིཧཱརཱནུཛཱནནཀཐཱ • Vihārānujānanakathā

ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā
ཝིཧཱརཱནུཛཱནནཀཐཱཝཎྞནཱ • Vihārānujānanakathāvaṇṇanā
མཉྩཔཱིཋཱདིཨནུཛཱནནཀཐཱཝཎྞནཱ • Mañcapīṭhādianujānanakathāvaṇṇanā
ཨིཊྛཀཱཙཡཱདིཨནུཛཱནནཀཐཱཝཎྞནཱ • Iṭṭhakācayādianujānanakathāvaṇṇanā
ཨནཱཐཔིཎྜིཀཝཏྠུཀཐཱཝཎྞནཱ • Anāthapiṇḍikavatthukathāvaṇṇanā
ཨཱསནཔྤཊིབཱཧནཱདིཀཐཱཝཎྞནཱ • Āsanappaṭibāhanādikathāvaṇṇanā

ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā / ཝིཧཱརཱནུཛཱནནཀཐཱཝཎྞནཱ • Vihārānujānanakathāvaṇṇanā

ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / པཱཙིཏྱཱདིཡོཛནཱཔཱལི༹ • Pācityādiyojanāpāḷi / ཝིཧཱརཱནུཛཱནནཀཐཱ • Vihārānujānanakathā

© 1991-2023 The Titi Tudorancea Bulletin | Titi Tudorancea^® is a Registered Trademark | Terms of use and privacy policy
Contact