| Library / Tipiṭaka / তিপিটক • Tipiṭaka / সংযুত্তনিকায (অট্ঠকথা) • Saṃyuttanikāya (aṭṭhakathā) |
৪. ৰিজযাসুত্তৰণ্ণনা
4. Vijayāsuttavaṇṇanā
১৬৫. চতুত্থে পঞ্চঙ্গিকেনাতি আততং ৰিততং আততৰিততং ঘনং সুসিরন্তি এৰং পঞ্চঙ্গসমন্নাগতেন। নিয্যাতযামি তুয্হেৰাতি সব্বে তুয্হংযেৰ দেমি। নাহং তেনত্থিকাতি নাহং তেন অত্থিকা। পূতিকাযেনাতি সুৰণ্ণৰণ্ণোপি কাযো নিচ্চং উগ্ঘরিতপগ্ঘরিতট্ঠেন পূতিকাযোৰ, তস্মা এৰমাহ। ভিন্দনেনাতি ভিজ্জনসভাৰেন। পভঙ্গুনাতি চুণ্ণৰিচুণ্ণং আপজ্জনধম্মেন। অট্টীযামীতি অট্টা পীল়িতা হোমি। হরাযামীতি লজ্জামি। সন্তা সমাপত্তীতি অট্ঠৰিধা লোকিযসমাপত্তি আরম্মণসন্ততায অঙ্গসন্ততায চ সন্তাতি ৰুত্তা। সব্বত্থাতি সব্বেসু রূপারূপভৰেসু, তেসং দ্ৰিন্নং ভৰানং গহিতত্তা গহিতে কামভৰে অট্ঠসু চ সমাপত্তীসূতি এতেসু সব্বেসু ঠানেসু ময্হং অৰিজ্জাতমো ৰিহতোতি ৰদতি। চতুত্থং।
165. Catutthe pañcaṅgikenāti ātataṃ vitataṃ ātatavitataṃ ghanaṃ susiranti evaṃ pañcaṅgasamannāgatena. Niyyātayāmi tuyhevāti sabbe tuyhaṃyeva demi. Nāhaṃ tenatthikāti nāhaṃ tena atthikā. Pūtikāyenāti suvaṇṇavaṇṇopi kāyo niccaṃ uggharitapaggharitaṭṭhena pūtikāyova, tasmā evamāha. Bhindanenāti bhijjanasabhāvena. Pabhaṅgunāti cuṇṇavicuṇṇaṃ āpajjanadhammena. Aṭṭīyāmīti aṭṭā pīḷitā homi. Harāyāmīti lajjāmi. Santā samāpattīti aṭṭhavidhā lokiyasamāpatti ārammaṇasantatāya aṅgasantatāya ca santāti vuttā. Sabbatthāti sabbesu rūpārūpabhavesu, tesaṃ dvinnaṃ bhavānaṃ gahitattā gahite kāmabhave aṭṭhasu ca samāpattīsūti etesu sabbesu ṭhānesu mayhaṃ avijjātamo vihatoti vadati. Catutthaṃ.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ৪. ৰিজযাসুত্তং • 4. Vijayāsuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৪. ৰিজযাসুত্তৰণ্ণনা • 4. Vijayāsuttavaṇṇanā
