| Library / Tipiṭaka / ติปิฎก • Tipiṭaka / สํยุตฺตนิกาย (ฎีกา) • Saṃyuttanikāya (ṭīkā) |
๔. วิชยาสุตฺตวณฺณนา
4. Vijayāsuttavaṇṇanā
๑๖๕. ปญฺจ องฺคานิ เอตสฺสาติ ปญฺจงฺคํ, ปญฺจงฺคเมว ปญฺจงฺคิกํ, เตน ปญฺจงฺคิเกนฯ อาตตนฺติอาทีสุ อาตตํ นาม จมฺมปริโยนเทฺธสุ เภริอาทีสุ เอกตลํ ตูริยํฯ วิตตํ นาม อุภยตลํฯ อาตตวิตตํ นาม ตนฺติพทฺธวีณาทิฯ สุสิรํ วํสาทิฯ ฆนํ สมฺมาทิฯ ตตอาทิวิเสโสปิ อาตตเมวาติ ‘‘จมฺมปริโยนเทฺธสู’’ติ วิเสสนํฯ เอกตลํ กุมฺภถูณททฺทราทิฯ อุภยตลํ เภริมุทิงฺคาทิฯ จมฺมปริโยนทฺธํ เสสํ ตนฺติพทฺธํ สพฺพํ อาตตวิตตํ นาม, โคมุขีอาทีนมฺปิ เอเตฺถว สงฺคโห ทฎฺฐโพฺพฯ วํสาทีติ อาทิสเทฺทน สงฺขสิงฺคานมฺปิ สงฺคโหฯ สมฺมตาฬ-กํสตาฬ-สิลาตาฬ-สลากตาฬาทิ สมฺมาทิ นามฯ ตตฺถ สมฺมตาฬํ นาม ทณฺฑมยตาฬํ, กํสมยตาฬํ กํสตาฬํ, สิลายํ อโยปเตฺตน จ ตาฬนตาฬํฯ สเพฺพ กามคุเณฯ อุคฺฆริตปคฺฆริตเฎฺฐนาติ อุปริ ฆรเณน จ วิสฺสนฺทเนน จฯ เอวนฺติ ‘‘อิมินา ปูติกาเยนา’’ติฯ อรูปฎฺฐายิโนติ สตฺตาธิฎฺฐาเนนายํ ธมฺมเทสนาติ อาห ‘‘สพฺพตฺถาติ สเพฺพสุ รูปารูปภเวสู’’ติฯ เตสํ ทฺวินฺนํ รูปารูปภวานํ คหิตตฺตาฯ ภวภาวสามญฺญโต, ตทธิฎฺฐานโต คหิเต กามภเวฯ อวิชฺชาตโม วิหโต อคฺคมเคฺคน สมุคฺฆาติตตฺตาฯ
165. Pañca aṅgāni etassāti pañcaṅgaṃ, pañcaṅgameva pañcaṅgikaṃ, tena pañcaṅgikena. Ātatantiādīsu ātataṃ nāma cammapariyonaddhesu bheriādīsu ekatalaṃ tūriyaṃ. Vitataṃ nāma ubhayatalaṃ. Ātatavitataṃ nāma tantibaddhavīṇādi. Susiraṃ vaṃsādi. Ghanaṃ sammādi. Tataādivisesopi ātatamevāti ‘‘cammapariyonaddhesū’’ti visesanaṃ. Ekatalaṃ kumbhathūṇadaddarādi. Ubhayatalaṃ bherimudiṅgādi. Cammapariyonaddhaṃ sesaṃ tantibaddhaṃ sabbaṃ ātatavitataṃ nāma, gomukhīādīnampi ettheva saṅgaho daṭṭhabbo. Vaṃsādīti ādisaddena saṅkhasiṅgānampi saṅgaho. Sammatāḷa-kaṃsatāḷa-silātāḷa-salākatāḷādi sammādi nāma. Tattha sammatāḷaṃ nāma daṇḍamayatāḷaṃ, kaṃsamayatāḷaṃ kaṃsatāḷaṃ, silāyaṃ ayopattena ca tāḷanatāḷaṃ. Sabbe kāmaguṇe. Uggharitapaggharitaṭṭhenāti upari gharaṇena ca vissandanena ca. Evanti ‘‘iminā pūtikāyenā’’ti. Arūpaṭṭhāyinoti sattādhiṭṭhānenāyaṃ dhammadesanāti āha ‘‘sabbatthāti sabbesu rūpārūpabhavesū’’ti. Tesaṃ dvinnaṃ rūpārūpabhavānaṃ gahitattā. Bhavabhāvasāmaññato, tadadhiṭṭhānato gahite kāmabhave. Avijjātamo vihato aggamaggena samugghātitattā.
วิชยาสุตฺตวณฺณนา นิฎฺฐิตาฯ
Vijayāsuttavaṇṇanā niṭṭhitā.
Related texts:
ติปิฎก (มูล) • Tipiṭaka (Mūla) / สุตฺตปิฎก • Suttapiṭaka / สํยุตฺตนิกาย • Saṃyuttanikāya / ๔. วิชยาสุตฺตํ • 4. Vijayāsuttaṃ
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / สํยุตฺตนิกาย (อฎฺฐกถา) • Saṃyuttanikāya (aṭṭhakathā) / ๔. วิชยาสุตฺตวณฺณนา • 4. Vijayāsuttavaṇṇanā
