| Library / Tipiṭaka / តិបិដក • Tipiṭaka / សំយុត្តនិកាយ (អដ្ឋកថា) • Saṃyuttanikāya (aṭṭhakathā) |
៤. វិជយាសុត្តវណ្ណនា
4. Vijayāsuttavaṇṇanā
១៦៥. ចតុត្ថេ បញ្ចង្គិកេនាតិ អាតតំ វិតតំ អាតតវិតតំ ឃនំ សុសិរន្តិ ឯវំ បញ្ចង្គសមន្នាគតេន។ និយ្យាតយាមិ តុយ្ហេវាតិ សព្ពេ តុយ្ហំយេវ ទេមិ។ នាហំ តេនត្ថិកាតិ នាហំ តេន អត្ថិកា។ បូតិកាយេនាតិ សុវណ្ណវណ្ណោបិ កាយោ និច្ចំ ឧគ្ឃរិតបគ្ឃរិតដ្ឋេន បូតិកាយោវ, តស្មា ឯវមាហ។ ភិន្ទនេនាតិ ភិជ្ជនសភាវេន។ បភង្គុនាតិ ចុណ្ណវិចុណ្ណំ អាបជ្ជនធម្មេន។ អដ្ដីយាមីតិ អដ្ដា បីឡិតា ហោមិ។ ហរាយាមីតិ លជ្ជាមិ។ សន្តា សមាបត្តីតិ អដ្ឋវិធា លោកិយសមាបត្តិ អារម្មណសន្តតាយ អង្គសន្តតាយ ច សន្តាតិ វុត្តា។ សព្ពត្ថាតិ សព្ពេសុ រូបារូបភវេសុ, តេសំ ទ្វិន្នំ ភវានំ គហិតត្តា គហិតេ កាមភវេ អដ្ឋសុ ច សមាបត្តីសូតិ ឯតេសុ សព្ពេសុ ឋានេសុ មយ្ហំ អវិជ្ជាតមោ វិហតោតិ វទតិ។ ចតុត្ថំ។
165. Catutthe pañcaṅgikenāti ātataṃ vitataṃ ātatavitataṃ ghanaṃ susiranti evaṃ pañcaṅgasamannāgatena. Niyyātayāmi tuyhevāti sabbe tuyhaṃyeva demi. Nāhaṃ tenatthikāti nāhaṃ tena atthikā. Pūtikāyenāti suvaṇṇavaṇṇopi kāyo niccaṃ uggharitapaggharitaṭṭhena pūtikāyova, tasmā evamāha. Bhindanenāti bhijjanasabhāvena. Pabhaṅgunāti cuṇṇavicuṇṇaṃ āpajjanadhammena. Aṭṭīyāmīti aṭṭā pīḷitā homi. Harāyāmīti lajjāmi. Santā samāpattīti aṭṭhavidhā lokiyasamāpatti ārammaṇasantatāya aṅgasantatāya ca santāti vuttā. Sabbatthāti sabbesu rūpārūpabhavesu, tesaṃ dvinnaṃ bhavānaṃ gahitattā gahite kāmabhave aṭṭhasu ca samāpattīsūti etesu sabbesu ṭhānesu mayhaṃ avijjātamo vihatoti vadati. Catutthaṃ.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / សំយុត្តនិកាយ • Saṃyuttanikāya / ៤. វិជយាសុត្តំ • 4. Vijayāsuttaṃ
ដីកា • Tīkā / សុត្តបិដក (ដីកា) • Suttapiṭaka (ṭīkā) / សំយុត្តនិកាយ (ដីកា) • Saṃyuttanikāya (ṭīkā) / ៤. វិជយាសុត្តវណ្ណនា • 4. Vijayāsuttavaṇṇanā
