| Library / Tipiṭaka / တိပိဋက • Tipiṭaka / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) |
၄. ဝိဇယာသုတ္တဝဏ္ဏနာ
4. Vijayāsuttavaṇṇanā
၁၆၅. စတုတ္ထေ ပဉ္စင္ဂိကေနာတိ အာတတံ ဝိတတံ အာတတဝိတတံ ဃနံ သုသိရန္တိ ဧဝံ ပဉ္စင္ဂသမန္နာဂတေန။ နိယ္ယာတယာမိ တုယ္ဟေဝာတိ သဗ္ဗေ တုယ္ဟံယေဝ ဒေမိ။ နာဟံ တေနတ္ထိကာတိ နာဟံ တေန အတ္ထိကာ။ ပူတိကာယေနာတိ သုဝဏ္ဏဝဏ္ဏောပိ ကာယော နိစ္စံ ဥဂ္ဃရိတပဂ္ဃရိတဋ္ဌေန ပူတိကာယောဝ, တသ္မာ ဧဝမာဟ။ ဘိန္ဒနေနာတိ ဘိဇ္ဇနသဘာဝေန။ ပဘင္ဂုနာတိ စုဏ္ဏဝိစုဏ္ဏံ အာပဇ္ဇနဓမ္မေန။ အဋ္ဋီယာမီတိ အဋ္ဋာ ပီဠိတာ ဟောမိ။ ဟရာယာမီတိ လဇ္ဇာမိ။ သန္တာ သမာပတ္တီတိ အဋ္ဌဝိဓာ လောကိယသမာပတ္တိ အာရမ္မဏသန္တတာယ အင္ဂသန္တတာယ စ သန္တာတိ ဝုတ္တာ။ သဗ္ဗတ္ထာတိ သဗ္ဗေသု ရူပာရူပဘဝေသု, တေသံ ဒ္ဝိန္နံ ဘဝာနံ ဂဟိတတ္တာ ဂဟိတေ ကာမဘဝေ အဋ္ဌသု စ သမာပတ္တီသူတိ ဧတေသု သဗ္ဗေသု ဌာနေသု မယ္ဟံ အဝိဇ္ဇာတမော ဝိဟတောတိ ဝဒတိ။ စတုတ္ထံ။
165. Catutthe pañcaṅgikenāti ātataṃ vitataṃ ātatavitataṃ ghanaṃ susiranti evaṃ pañcaṅgasamannāgatena. Niyyātayāmi tuyhevāti sabbe tuyhaṃyeva demi. Nāhaṃ tenatthikāti nāhaṃ tena atthikā. Pūtikāyenāti suvaṇṇavaṇṇopi kāyo niccaṃ uggharitapaggharitaṭṭhena pūtikāyova, tasmā evamāha. Bhindanenāti bhijjanasabhāvena. Pabhaṅgunāti cuṇṇavicuṇṇaṃ āpajjanadhammena. Aṭṭīyāmīti aṭṭā pīḷitā homi. Harāyāmīti lajjāmi. Santā samāpattīti aṭṭhavidhā lokiyasamāpatti ārammaṇasantatāya aṅgasantatāya ca santāti vuttā. Sabbatthāti sabbesu rūpārūpabhavesu, tesaṃ dvinnaṃ bhavānaṃ gahitattā gahite kāmabhave aṭṭhasu ca samāpattīsūti etesu sabbesu ṭhānesu mayhaṃ avijjātamo vihatoti vadati. Catutthaṃ.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၄. ဝိဇယာသုတ္တံ • 4. Vijayāsuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၄. ဝိဇယာသုတ္တဝဏ္ဏနာ • 4. Vijayāsuttavaṇṇanā
