| Library / Tipiṭaka / တိပိဋက • Tipiṭaka / သံယုတ္တနိကာယ (ဋီကာ) • Saṃyuttanikāya (ṭīkā) |
၄. ဝိဇယာသုတ္တဝဏ္ဏနာ
4. Vijayāsuttavaṇṇanā
၁၆၅. ပဉ္စ အင္ဂာနိ ဧတသ္သာတိ ပဉ္စင္ဂံ, ပဉ္စင္ဂမေဝ ပဉ္စင္ဂိကံ, တေန ပဉ္စင္ဂိကေန။ အာတတန္တိအာဒီသု အာတတံ နာမ စမ္မပရိယောနဒ္ဓေသု ဘေရိအာဒီသု ဧကတလံ တူရိယံ။ ဝိတတံ နာမ ဥဘယတလံ။ အာတတဝိတတံ နာမ တန္တိဗဒ္ဓဝီဏာဒိ။ သုသိရံ ဝံသာဒိ။ ဃနံ သမ္မာဒိ။ တတအာဒိဝိသေသောပိ အာတတမေဝာတိ ‘‘စမ္မပရိယောနဒ္ဓေသူ’’တိ ဝိသေသနံ။ ဧကတလံ ကုမ္ဘထူဏဒဒ္ဒရာဒိ။ ဥဘယတလံ ဘေရိမုဒိင္ဂာဒိ။ စမ္မပရိယောနဒ္ဓံ သေသံ တန္တိဗဒ္ဓံ သဗ္ဗံ အာတတဝိတတံ နာမ, ဂောမုခီအာဒီနမ္ပိ ဧတ္ထေဝ သင္ဂဟော ဒဋ္ဌဗ္ဗော။ ဝံသာဒီတိ အာဒိသဒ္ဒေန သင္ခသိင္ဂာနမ္ပိ သင္ဂဟော။ သမ္မတာဠ-ကံသတာဠ-သိလာတာဠ-သလာကတာဠာဒိ သမ္မာဒိ နာမ။ တတ္ထ သမ္မတာဠံ နာမ ဒဏ္ဍမယတာဠံ, ကံသမယတာဠံ ကံသတာဠံ, သိလာယံ အယောပတ္တေန စ တာဠနတာဠံ။ သဗ္ဗေ ကာမဂုဏေ။ ဥဂ္ဃရိတပဂ္ဃရိတဋ္ဌေနာတိ ဥပရိ ဃရဏေန စ ဝိသ္သန္ဒနေန စ။ ဧဝန္တိ ‘‘ဣမိနာ ပူတိကာယေနာ’’တိ။ အရူပဋ္ဌာယိနောတိ သတ္တာဓိဋ္ဌာနေနာယံ ဓမ္မဒေသနာတိ အာဟ ‘‘သဗ္ဗတ္ထာတိ သဗ္ဗေသု ရူပာရူပဘဝေသူ’’တိ။ တေသံ ဒ္ဝိန္နံ ရူပာရူပဘဝာနံ ဂဟိတတ္တာ။ ဘဝဘာဝသာမညတော, တဒဓိဋ္ဌာနတော ဂဟိတေ ကာမဘဝေ။ အဝိဇ္ဇာတမော ဝိဟတော အဂ္ဂမဂ္ဂေန သမုဂ္ဃာတိတတ္တာ။
165. Pañca aṅgāni etassāti pañcaṅgaṃ, pañcaṅgameva pañcaṅgikaṃ, tena pañcaṅgikena. Ātatantiādīsu ātataṃ nāma cammapariyonaddhesu bheriādīsu ekatalaṃ tūriyaṃ. Vitataṃ nāma ubhayatalaṃ. Ātatavitataṃ nāma tantibaddhavīṇādi. Susiraṃ vaṃsādi. Ghanaṃ sammādi. Tataādivisesopi ātatamevāti ‘‘cammapariyonaddhesū’’ti visesanaṃ. Ekatalaṃ kumbhathūṇadaddarādi. Ubhayatalaṃ bherimudiṅgādi. Cammapariyonaddhaṃ sesaṃ tantibaddhaṃ sabbaṃ ātatavitataṃ nāma, gomukhīādīnampi ettheva saṅgaho daṭṭhabbo. Vaṃsādīti ādisaddena saṅkhasiṅgānampi saṅgaho. Sammatāḷa-kaṃsatāḷa-silātāḷa-salākatāḷādi sammādi nāma. Tattha sammatāḷaṃ nāma daṇḍamayatāḷaṃ, kaṃsamayatāḷaṃ kaṃsatāḷaṃ, silāyaṃ ayopattena ca tāḷanatāḷaṃ. Sabbe kāmaguṇe. Uggharitapaggharitaṭṭhenāti upari gharaṇena ca vissandanena ca. Evanti ‘‘iminā pūtikāyenā’’ti. Arūpaṭṭhāyinoti sattādhiṭṭhānenāyaṃ dhammadesanāti āha ‘‘sabbatthāti sabbesu rūpārūpabhavesū’’ti. Tesaṃ dvinnaṃ rūpārūpabhavānaṃ gahitattā. Bhavabhāvasāmaññato, tadadhiṭṭhānato gahite kāmabhave. Avijjātamo vihato aggamaggena samugghātitattā.
ဝိဇယာသုတ္တဝဏ္ဏနာ နိဋ္ဌိတာ။
Vijayāsuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၄. ဝိဇယာသုတ္တံ • 4. Vijayāsuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၄. ဝိဇယာသုတ္တဝဏ္ဏနာ • 4. Vijayāsuttavaṇṇanā
