| Library / Tipiṭaka / তিপিটক • Tipiṭaka / থেরীগাথা-অট্ঠকথা • Therīgāthā-aṭṭhakathā |
৮. ৰিজযাথেরীগাথাৰণ্ণনা
8. Vijayātherīgāthāvaṇṇanā
চতুক্খত্তুন্তিআদিকা ৰিজযায থেরিযা গাথা। অযম্পি পুরিমবুদ্ধেসু কতাধিকারা তত্থ তত্থ ভৰে ৰিৰট্টূপনিস্সযং কুসলং উপচিনন্তী, অনুক্কমেন পরিব্রূহিতকুসলমূলা দেৰমনুস্সেসু সংসরন্তী, ইমস্মিং বুদ্ধুপ্পাদে রাজগহে অঞ্ঞতরস্মিং কুলগেহে নিব্বত্তিত্ৰা ৰিঞ্ঞুতং পত্ৰা খেমায থেরিযা গিহিকালে সহাযিকা অহোসি। সা তস্সা পব্বজিতভাৰং সুত্ৰা ‘‘সাপি নাম রাজমহেসী পব্বজিস্সতি কিমঙ্গং পনাহ’’ন্তি পব্বজিতুকামাযেৰ হুত্ৰা খেমাথেরিযা সন্তিকং উপসঙ্কমি। থেরী তস্সা অজ্ঝাসযং ঞত্ৰা তথা ধম্মং দেসেসি, যথা সংসারে সংৰিগ্গমানসা সাসনে সা অভিপ্পসন্না ভৰিস্সতি। সা তং ধম্মং সুত্ৰা সংৰেগজাতা পটিলদ্ধসদ্ধা চ হুত্ৰা পব্বজ্জং যাচি। থেরী তং পব্বাজেসি। সা পব্বজিত্ৰা কতপুব্বকিচ্চা ৰিপস্সনং পট্ঠপেত্ৰা হেতুসম্পন্নতায, ন চিরস্সেৰ সহ পটিসম্ভিদাহি অরহত্তং পত্ৰা অত্তনো পটিপত্তিং পচ্চৰেক্খিত্ৰা উদানৰসেন –
Catukkhattuntiādikā vijayāya theriyā gāthā. Ayampi purimabuddhesu katādhikārā tattha tattha bhave vivaṭṭūpanissayaṃ kusalaṃ upacinantī, anukkamena paribrūhitakusalamūlā devamanussesu saṃsarantī, imasmiṃ buddhuppāde rājagahe aññatarasmiṃ kulagehe nibbattitvā viññutaṃ patvā khemāya theriyā gihikāle sahāyikā ahosi. Sā tassā pabbajitabhāvaṃ sutvā ‘‘sāpi nāma rājamahesī pabbajissati kimaṅgaṃ panāha’’nti pabbajitukāmāyeva hutvā khemātheriyā santikaṃ upasaṅkami. Therī tassā ajjhāsayaṃ ñatvā tathā dhammaṃ desesi, yathā saṃsāre saṃviggamānasā sāsane sā abhippasannā bhavissati. Sā taṃ dhammaṃ sutvā saṃvegajātā paṭiladdhasaddhā ca hutvā pabbajjaṃ yāci. Therī taṃ pabbājesi. Sā pabbajitvā katapubbakiccā vipassanaṃ paṭṭhapetvā hetusampannatāya, na cirasseva saha paṭisambhidāhi arahattaṃ patvā attano paṭipattiṃ paccavekkhitvā udānavasena –
১৬৯.
169.
‘‘চতুক্খত্তুং পঞ্চক্খত্তুং, ৰিহারা উপনিক্খমিং।
‘‘Catukkhattuṃ pañcakkhattuṃ, vihārā upanikkhamiṃ;
অলদ্ধা চেতসো সন্তিং, চিত্তে অৰসৰত্তিনী॥
Aladdhā cetaso santiṃ, citte avasavattinī.
১৭০.
170.
‘‘ভিক্খুনিং উপসঙ্কম্ম, সক্কচ্চং পরিপুচ্ছহং।
‘‘Bhikkhuniṃ upasaṅkamma, sakkaccaṃ paripucchahaṃ;
সা মে ধম্মমদেসেসি, ধাতুআযতনানি চ॥
Sā me dhammamadesesi, dhātuāyatanāni ca.
১৭১.
171.
‘‘চত্তারি অরিযসচ্চানি, ইন্দ্রিযানি বলানি চ।
‘‘Cattāri ariyasaccāni, indriyāni balāni ca;
বোজ্ঝঙ্গট্ঠঙ্গিকং মগ্গং, উত্তমত্থস্স পত্তিযা॥
Bojjhaṅgaṭṭhaṅgikaṃ maggaṃ, uttamatthassa pattiyā.
১৭২.
172.
‘‘তস্সাহং ৰচনং সুত্ৰা, করোন্তী অনুসাসনিং।
‘‘Tassāhaṃ vacanaṃ sutvā, karontī anusāsaniṃ;
রত্তিযা পুরিমে যামে, পুব্বজাতিমনুস্সরিং॥
Rattiyā purime yāme, pubbajātimanussariṃ.
১৭৩.
173.
‘‘রত্তিযা মজ্ঝিমে যামে, দিব্বচক্খুং ৰিসোধযিং।
‘‘Rattiyā majjhime yāme, dibbacakkhuṃ visodhayiṃ;
রত্তিযা পচ্ছিমে যামে, তমোখন্ধং পদালযিং॥
Rattiyā pacchime yāme, tamokhandhaṃ padālayiṃ.
১৭৪.
174.
‘‘পীতিসুখেন চ কাযং, ফরিত্ৰা ৰিহরিং তদা।
‘‘Pītisukhena ca kāyaṃ, pharitvā vihariṃ tadā;
সত্তমিযা পাদে পসারেসিং, তমোখন্ধং পদালিযা’’তি॥ –
Sattamiyā pāde pasāresiṃ, tamokhandhaṃ padāliyā’’ti. –
ইমা গাথা অভাসি।
Imā gāthā abhāsi.
তত্থ ভিক্খুনিন্তি খেমাথেরিং সন্ধায ৰদতি।
Tattha bhikkhuninti khemātheriṃ sandhāya vadati.
বোজ্ঝঙ্গট্ঠঙ্গিকং মগ্গন্তি সত্তবোজ্ঝঙ্গঞ্চ অট্ঠঙ্গিকঞ্চ অরিযমগ্গং। উত্তমত্থস্স পত্তিযাতি অরহত্তস্স নিব্বানস্সেৰ ৰা পত্তিযা অধিগমায।
Bojjhaṅgaṭṭhaṅgikaṃ magganti sattabojjhaṅgañca aṭṭhaṅgikañca ariyamaggaṃ. Uttamatthassa pattiyāti arahattassa nibbānasseva vā pattiyā adhigamāya.
পীতিসুখেনাতি ফলসমাপত্তিপরিযাপন্নায পীতিযা সুখেন চ। কাযন্তি তংসম্পযুত্তং নামকাযং তদনুসারেন রূপকাযঞ্চ। ফরিত্ৰাতি ফুসিত্ৰা ব্যাপেত্ৰা ৰা। সত্তমিযা পাদে পসারেসিন্তি ৰিপস্সনায আরদ্ধদিৰসতো সত্তমিযং পল্লঙ্কং ভিন্দিত্ৰা পাদে পসারেসিং। কথং? তমোখন্ধং পদালিয, অপ্পদালিতপুব্বং মোহক্খন্ধং অগ্গমগ্গঞাণাসিনা পদালেত্ৰা। সেসং হেট্ঠা ৰুত্তনযমেৰ।
Pītisukhenāti phalasamāpattipariyāpannāya pītiyā sukhena ca. Kāyanti taṃsampayuttaṃ nāmakāyaṃ tadanusārena rūpakāyañca. Pharitvāti phusitvā byāpetvā vā. Sattamiyā pāde pasāresinti vipassanāya āraddhadivasato sattamiyaṃ pallaṅkaṃ bhinditvā pāde pasāresiṃ. Kathaṃ? Tamokhandhaṃ padāliya, appadālitapubbaṃ mohakkhandhaṃ aggamaggañāṇāsinā padāletvā. Sesaṃ heṭṭhā vuttanayameva.
ৰিজযাথেরীগাথাৰণ্ণনা নিট্ঠিতা।
Vijayātherīgāthāvaṇṇanā niṭṭhitā.
ছক্কনিপাতৰণ্ণনা নিট্ঠিতা।
Chakkanipātavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / থেরীগাথাপাল়ি • Therīgāthāpāḷi / ৮. ৰিজযাথেরীগাথা • 8. Vijayātherīgāthā
