| Library / Tipiṭaka / д̇ибидага • Tipiṭaka / т̇зрийг̇аат̇аа-адтагат̇аа • Therīgāthā-aṭṭhakathā |
8. виж̇аяаат̇зрийг̇аат̇ааван̣н̣анаа
8. Vijayātherīgāthāvaṇṇanā
жад̇угкад̇д̇унд̇иаад̣̇игаа виж̇аяааяа т̇зрияаа г̇аат̇аа. аяамби буримаб̣уд̣̇д̇хзсу гад̇аад̇хигаараа д̇ад̇т̇а д̇ад̇т̇а бхавз виваддуубаниссаяам̣ гусалам̣ убажинанд̇ий, ануггамзна бариб̣руухид̇агусаламуулаа д̣̇звамануссзсу сам̣саранд̇ий, имасмим̣ б̣уд̣̇д̇хуббаад̣̇з рааж̇аг̇ахз ан̃н̃ад̇арасмим̣ гулаг̇зхз ниб̣б̣ад̇д̇ид̇ваа вин̃н̃уд̇ам̣ бад̇ваа кзмааяа т̇зрияаа г̇ихигаалз сахааяигаа ахоси. саа д̇ассаа баб̣б̣аж̇ид̇абхаавам̣ суд̇ваа ‘‘сааби наама рааж̇амахзсий баб̣б̣аж̇иссад̇и гиман̇г̇ам̣ банааха’’нд̇и баб̣б̣аж̇ид̇угаамааязва худ̇ваа кзмаат̇зрияаа санд̇игам̣ убасан̇гами. т̇зрий д̇ассаа аж̇жхаасаяам̣ н̃ад̇ваа д̇ат̇аа д̇хаммам̣ д̣̇зсзси, яат̇аа сам̣саарз сам̣виг̇г̇амаанасаа саасанз саа абхиббасаннаа бхависсад̇и. саа д̇ам̣ д̇хаммам̣ суд̇ваа сам̣взг̇аж̇аад̇аа бадилад̣̇д̇хасад̣̇д̇хаа жа худ̇ваа баб̣б̣аж̇ж̇ам̣ яаажи. т̇зрий д̇ам̣ баб̣б̣ааж̇зси. саа баб̣б̣аж̇ид̇ваа гад̇абуб̣б̣агижжаа вибассанам̣ бадтабзд̇ваа хзд̇усамбаннад̇ааяа, на жирассзва саха бадисамбхид̣̇аахи арахад̇д̇ам̣ бад̇ваа ад̇д̇ано бадибад̇д̇им̣ бажжавзгкид̇ваа уд̣̇аанавасзна –
Catukkhattuntiādikā vijayāya theriyā gāthā. Ayampi purimabuddhesu katādhikārā tattha tattha bhave vivaṭṭūpanissayaṃ kusalaṃ upacinantī, anukkamena paribrūhitakusalamūlā devamanussesu saṃsarantī, imasmiṃ buddhuppāde rājagahe aññatarasmiṃ kulagehe nibbattitvā viññutaṃ patvā khemāya theriyā gihikāle sahāyikā ahosi. Sā tassā pabbajitabhāvaṃ sutvā ‘‘sāpi nāma rājamahesī pabbajissati kimaṅgaṃ panāha’’nti pabbajitukāmāyeva hutvā khemātheriyā santikaṃ upasaṅkami. Therī tassā ajjhāsayaṃ ñatvā tathā dhammaṃ desesi, yathā saṃsāre saṃviggamānasā sāsane sā abhippasannā bhavissati. Sā taṃ dhammaṃ sutvā saṃvegajātā paṭiladdhasaddhā ca hutvā pabbajjaṃ yāci. Therī taṃ pabbājesi. Sā pabbajitvā katapubbakiccā vipassanaṃ paṭṭhapetvā hetusampannatāya, na cirasseva saha paṭisambhidāhi arahattaṃ patvā attano paṭipattiṃ paccavekkhitvā udānavasena –
169.
169.
‘‘жад̇угкад̇д̇ум̣ бан̃жагкад̇д̇ум̣, вихаараа убанигкамим̣;
‘‘Catukkhattuṃ pañcakkhattuṃ, vihārā upanikkhamiṃ;
алад̣̇д̇хаа жзд̇асо санд̇им̣, жид̇д̇з авасавад̇д̇иний.
Aladdhā cetaso santiṃ, citte avasavattinī.
170.
170.
‘‘бхигкуним̣ убасан̇гамма, саггажжам̣ барибужчахам̣;
‘‘Bhikkhuniṃ upasaṅkamma, sakkaccaṃ paripucchahaṃ;
саа мз д̇хаммамад̣̇зсзси, д̇хаад̇уааяад̇анаани жа.
Sā me dhammamadesesi, dhātuāyatanāni ca.
171.
171.
‘‘жад̇д̇аари арияасажжаани, инд̣̇рияаани б̣алаани жа;
‘‘Cattāri ariyasaccāni, indriyāni balāni ca;
б̣ож̇жхан̇г̇адтан̇г̇игам̣ маг̇г̇ам̣, уд̇д̇амад̇т̇асса бад̇д̇ияаа.
Bojjhaṅgaṭṭhaṅgikaṃ maggaṃ, uttamatthassa pattiyā.
172.
172.
‘‘д̇ассаахам̣ важанам̣ суд̇ваа, гаронд̇ий анусаасаним̣;
‘‘Tassāhaṃ vacanaṃ sutvā, karontī anusāsaniṃ;
рад̇д̇ияаа буримз яаамз, буб̣б̣аж̇аад̇имануссарим̣.
Rattiyā purime yāme, pubbajātimanussariṃ.
173.
173.
‘‘рад̇д̇ияаа маж̇жхимз яаамз, д̣̇иб̣б̣ажагкум̣ висод̇хаяим̣;
‘‘Rattiyā majjhime yāme, dibbacakkhuṃ visodhayiṃ;
рад̇д̇ияаа бажчимз яаамз, д̇амоканд̇хам̣ бад̣̇аалаяим̣.
Rattiyā pacchime yāme, tamokhandhaṃ padālayiṃ.
174.
174.
‘‘бийд̇исукзна жа гааяам̣, парид̇ваа вихарим̣ д̇ад̣̇аа;
‘‘Pītisukhena ca kāyaṃ, pharitvā vihariṃ tadā;
сад̇д̇амияаа баад̣̇з басаарзсим̣, д̇амоканд̇хам̣ бад̣̇аалияаа’’д̇и. –
Sattamiyā pāde pasāresiṃ, tamokhandhaṃ padāliyā’’ti. –
имаа г̇аат̇аа абхааси.
Imā gāthā abhāsi.
д̇ад̇т̇а бхигкунинд̇и кзмаат̇зрим̣ санд̇хааяа вад̣̇ад̇и.
Tattha bhikkhuninti khemātheriṃ sandhāya vadati.
б̣ож̇жхан̇г̇адтан̇г̇игам̣ маг̇г̇анд̇и сад̇д̇аб̣ож̇жхан̇г̇ан̃жа адтан̇г̇иган̃жа арияамаг̇г̇ам̣. уд̇д̇амад̇т̇асса бад̇д̇ияаад̇и арахад̇д̇асса ниб̣б̣аанассзва ваа бад̇д̇ияаа ад̇хиг̇амааяа.
Bojjhaṅgaṭṭhaṅgikaṃ magganti sattabojjhaṅgañca aṭṭhaṅgikañca ariyamaggaṃ. Uttamatthassa pattiyāti arahattassa nibbānasseva vā pattiyā adhigamāya.
бийд̇исукзнаад̇и паласамаабад̇д̇ибарияаабаннааяа бийд̇ияаа сукзна жа. гааяанд̇и д̇ам̣самбаяуд̇д̇ам̣ наамагааяам̣ д̇ад̣̇анусаарзна руубагааяан̃жа. парид̇ваад̇и пусид̇ваа б̣яаабзд̇ваа ваа. сад̇д̇амияаа баад̣̇з басаарзсинд̇и вибассанааяа аарад̣̇д̇хад̣̇ивасад̇о сад̇д̇амияам̣ баллан̇гам̣ бхинд̣̇ид̇ваа баад̣̇з басаарзсим̣. гат̇ам̣? д̇амоканд̇хам̣ бад̣̇аалияа, аббад̣̇аалид̇абуб̣б̣ам̣ мохагканд̇хам̣ аг̇г̇амаг̇г̇ан̃аан̣аасинаа бад̣̇аалзд̇ваа. сзсам̣ хздтаа вуд̇д̇анаяамзва.
Pītisukhenāti phalasamāpattipariyāpannāya pītiyā sukhena ca. Kāyanti taṃsampayuttaṃ nāmakāyaṃ tadanusārena rūpakāyañca. Pharitvāti phusitvā byāpetvā vā. Sattamiyā pāde pasāresinti vipassanāya āraddhadivasato sattamiyaṃ pallaṅkaṃ bhinditvā pāde pasāresiṃ. Kathaṃ? Tamokhandhaṃ padāliya, appadālitapubbaṃ mohakkhandhaṃ aggamaggañāṇāsinā padāletvā. Sesaṃ heṭṭhā vuttanayameva.
виж̇аяаат̇зрийг̇аат̇ааван̣н̣анаа нидтид̇аа.
Vijayātherīgāthāvaṇṇanā niṭṭhitā.
чагганибаад̇аван̣н̣анаа нидтид̇аа.
Chakkanipātavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / т̇зрийг̇аат̇аабаал̣и • Therīgāthāpāḷi / 8. виж̇аяаат̇зрийг̇аат̇аа • 8. Vijayātherīgāthā
