| Library / Tipiṭaka / д̇ибидага • Tipiṭaka / т̇зраг̇аат̇аа-адтагат̇аа • Theragāthā-aṭṭhakathā |
2. виж̇аяад̇т̇зраг̇аат̇ааван̣н̣анаа
2. Vijayattheragāthāvaṇṇanā
яассаасаваа баригкийн̣аад̇и ааяасмад̇о виж̇аяад̇т̇зрасса г̇аат̇аа. гаа уббад̇д̇и? аяамби буримаб̣уд̣̇д̇хзсу гад̇аад̇хигааро бияад̣̇ассисса бхаг̇авад̇о гаалз вибхавасамбаннз гулз ниб̣б̣ад̇д̇ид̇ваа вин̃н̃уд̇ам̣ бад̇д̇о сад̇т̇ари бариниб̣б̣уд̇з д̇асса т̇уубасса рад̇анакажид̇ам̣ взд̣̇игам̣ гаарзд̇ваа д̇ад̇т̇а ул̣аарам̣ взд̣̇игаамахам̣ гаарзси. со д̇зна бун̃н̃агаммзна анзгасад̇з ад̇д̇абхаавз ман̣иобхаасзна вижари. звам̣ д̣̇звамануссзсу сам̣саранд̇о имасмим̣ б̣уд̣̇д̇хуббаад̣̇з саавад̇т̇ияам̣ б̣раахман̣агулз ниб̣б̣ад̇д̇и, виж̇аяод̇исса наамам̣ ахоси. со ваяаббад̇д̇о б̣раахман̣авиж̇ж̇аасу нибпад̇д̇им̣ г̇ад̇о д̇аабасабаб̣б̣аж̇ж̇ам̣ баб̣б̣аж̇ид̇ваа аран̃н̃ааяад̇анз жхааналаабхий худ̇ваа вихаранд̇о б̣уд̣̇д̇хуббаад̣̇ам̣ суд̇ваа уббаннаббасаад̣̇о сад̇т̇у санд̇игам̣ убасан̇гамид̇ваа сад̇т̇аарам̣ ванд̣̇ид̇ваа згаманд̇ам̣ нисийд̣̇и. д̇асса сад̇т̇аа д̇хаммам̣ д̣̇зсзси. со д̇хаммам̣ суд̇ваа баб̣б̣аж̇ид̇ваа вибассанам̣ бадтабзд̇ваа нажирассзва арахад̇д̇ам̣ баабун̣и. д̇зна вуд̇д̇ам̣ абад̣̇аанз (аба. т̇зра 1.15.10-14) –
Yassāsavāparikkhīṇāti āyasmato vijayattherassa gāthā. Kā uppatti? Ayampi purimabuddhesu katādhikāro piyadassissa bhagavato kāle vibhavasampanne kule nibbattitvā viññutaṃ patto satthari parinibbute tassa thūpassa ratanakhacitaṃ vedikaṃ kāretvā tattha uḷāraṃ vedikāmahaṃ kāresi. So tena puññakammena anekasate attabhāve maṇiobhāsena vicari. Evaṃ devamanussesu saṃsaranto imasmiṃ buddhuppāde sāvatthiyaṃ brāhmaṇakule nibbatti, vijayotissa nāmaṃ ahosi. So vayappatto brāhmaṇavijjāsu nipphattiṃ gato tāpasapabbajjaṃ pabbajitvā araññāyatane jhānalābhī hutvā viharanto buddhuppādaṃ sutvā uppannappasādo satthu santikaṃ upasaṅkamitvā satthāraṃ vanditvā ekamantaṃ nisīdi. Tassa satthā dhammaṃ desesi. So dhammaṃ sutvā pabbajitvā vipassanaṃ paṭṭhapetvā nacirasseva arahattaṃ pāpuṇi. Tena vuttaṃ apadāne (apa. thera 1.15.10-14) –
‘‘ниб̣б̣уд̇з логанаат̇амхи, бияад̣̇ассийнаруд̇д̇амз;
‘‘Nibbute lokanāthamhi, piyadassīnaruttame;
басаннажид̇д̇о сумано, муд̇д̇аавзд̣̇имагаасахам̣.
Pasannacitto sumano, muttāvedimakāsahaṃ.
‘‘ман̣ийхи бариваарзд̇ваа, агаасим̣ взд̣̇имуд̇д̇амам̣;
‘‘Maṇīhi parivāretvā, akāsiṃ vedimuttamaṃ;
взд̣̇игааяа махам̣ гад̇ваа, д̇ад̇т̇а гаалан̇гад̇о ахам̣.
Vedikāya mahaṃ katvā, tattha kālaṅkato ahaṃ.
‘‘яам̣ яам̣ яонубабаж̇ж̇аами, д̣̇звад̇д̇ам̣ ат̇а маанусам̣;
‘‘Yaṃ yaṃ yonupapajjāmi, devattaṃ atha mānusaṃ;
ман̣ий д̇хаарзнд̇и аагаасз, бун̃н̃агаммассид̣̇ам̣ палам̣.
Maṇī dhārenti ākāse, puññakammassidaṃ phalaṃ.
‘‘сол̣асид̇о габбасад̇з, ман̣иббабхаасанаамагаа;
‘‘Soḷasito kappasate, maṇippabhāsanāmakā;
чад̇д̇им̣саасим̣су рааж̇аано, жаггавад̇д̇ий махаб̣б̣алаа.
Chattiṃsāsiṃsu rājāno, cakkavattī mahabbalā.
‘‘гилзсаа жхаабид̇аа маяхам̣…бз… гад̇ам̣ б̣уд̣̇д̇хасса саасана’’нд̇и.
‘‘Kilesā jhāpitā mayhaṃ…pe… kataṃ buddhassa sāsana’’nti.
арахад̇д̇ам̣ бана бад̇ваа ан̃н̃ам̣ б̣яаагаронд̇о ‘‘яассаасаваа баригкийн̣аа’’д̇и г̇аат̇ам̣ абхааси.
Arahattaṃ pana patvā aññaṃ byākaronto ‘‘yassāsavā parikkhīṇā’’ti gāthaṃ abhāsi.
92. д̇ад̇т̇а яассаасаваа баригкийн̣аад̇и яасса уд̇д̇амабуг̇г̇аласса гаамаасаваад̣̇аяо жад̇д̇ааро аасаваа саб̣б̣асо кийн̣аа арияамаг̇г̇зна кзбид̇аа. аахаарз жа аниссид̇од̇и яо жа аахаарз д̇ан̣хаад̣̇идтиниссаязхи аниссид̇о аг̇ад̇хид̇о анаж̇жхаабанно, нид̣̇ассанамад̇д̇ам̣, аахаарасийсзнзд̇т̇а жад̇д̇аароби бажжаяаа г̇ахид̇аад̇и д̣̇адтаб̣б̣ам̣. бажжаяабарияааяо ваа ид̇ха аахаара-сад̣̇д̣̇о взд̣̇ид̇аб̣б̣о. ‘‘сун̃н̃ад̇о анимид̇д̇о жаа’’д̇и зд̇т̇а аббан̣ихид̇авимогкоби г̇ахид̇оязва, д̇ийн̣иби жзд̇аани ниб̣б̣аанассзва наамаани. ниб̣б̣аанан̃хи рааг̇аад̣̇ийнам̣ абхаавзна сун̃н̃ам̣, д̇зхи вимуд̇д̇ан̃жаад̇и сун̃н̃ад̇авимогко, д̇ат̇аа рааг̇аад̣̇инимид̇д̇аабхаавзна сан̇кааранимид̇д̇аабхаавзна жа анимид̇д̇ам̣ , д̇зхи вимуд̇д̇ан̃жаад̇и анимид̇д̇авимогко, рааг̇аад̣̇ибан̣ид̇хийнам̣ абхаавзна аббан̣ихид̇ам̣, д̇зхи вимуд̇д̇ан̃жаад̇и аббан̣ихид̇о вимогкод̇и вужжад̇и. паласамаабад̇д̇ивасзна д̇ам̣ аарамман̣ам̣ гад̇ваа вихаранд̇асса аяамби д̇ивид̇хо вимогко яасса г̇ожаро, аагаасзва сагунд̇аанам̣, бад̣̇ам̣ д̇асса д̣̇ураннаяанд̇и яат̇аа аагаасз г̇ажчанд̇аанам̣ сагун̣аанам̣ ‘‘имасмим̣ таанз баад̣̇зхи аггамид̇ваа г̇ад̇аа, ид̣̇ам̣ таанам̣ урзна бахарид̇ваа г̇ад̇аа, ид̣̇ам̣ сийсзна, ид̣̇ам̣ багкзхий’’д̇и на саггаа н̃аад̇ум̣, звамзва зваруубасса бхигкуно ‘‘нираяабад̣̇аад̣̇ийсу иминаа наама бад̣̇зна г̇ад̇о’’д̇и н̃аабзд̇ун̃жа на саггаад̇и.
92. Tattha yassāsavā parikkhīṇāti yassa uttamapuggalassa kāmāsavādayo cattāro āsavā sabbaso khīṇā ariyamaggena khepitā. Āhāre ca anissitoti yo ca āhāre taṇhādiṭṭhinissayehi anissito agadhito anajjhāpanno, nidassanamattaṃ, āhārasīsenettha cattāropi paccayā gahitāti daṭṭhabbaṃ. Paccayapariyāyo vā idha āhāra-saddo veditabbo. ‘‘Suññato animitto cā’’ti ettha appaṇihitavimokkhopi gahitoyeva, tīṇipi cetāni nibbānasseva nāmāni. Nibbānañhi rāgādīnaṃ abhāvena suññaṃ, tehi vimuttañcāti suññatavimokkho, tathā rāgādinimittābhāvena saṅkhāranimittābhāvena ca animittaṃ , tehi vimuttañcāti animittavimokkho, rāgādipaṇidhīnaṃ abhāvena appaṇihitaṃ, tehi vimuttañcāti appaṇihito vimokkhoti vuccati. Phalasamāpattivasena taṃ ārammaṇaṃ katvā viharantassa ayampi tividho vimokkho yassa gocaro, ākāseva sakuntānaṃ, padaṃ tassa durannayanti yathā ākāse gacchantānaṃ sakuṇānaṃ ‘‘imasmiṃ ṭhāne pādehi akkamitvā gatā, idaṃ ṭhānaṃ urena paharitvā gatā, idaṃ sīsena, idaṃ pakkhehī’’ti na sakkā ñātuṃ, evameva evarūpassa bhikkhuno ‘‘nirayapadādīsu iminā nāma padena gato’’ti ñāpetuñca na sakkāti.
виж̇аяад̇т̇зраг̇аат̇ааван̣н̣анаа нидтид̇аа.
Vijayattheragāthāvaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / т̇зраг̇аат̇аабаал̣и • Theragāthāpāḷi / 2. виж̇аяад̇т̇зраг̇аат̇аа • 2. Vijayattheragāthā
