| Library / Tipiṭaka / তিপিটক • Tipiṭaka / থেরগাথা-অট্ঠকথা • Theragāthā-aṭṭhakathā |
৯. ৰিজিতসেনত্থেরগাথাৰণ্ণনা
9. Vijitasenattheragāthāvaṇṇanā
ওলগ্গেস্সামীতিআদিকা আযস্মতো ৰিজিতসেনত্থেরস্স গাথা। কা উপ্পত্তি? অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযং কুসলং উপচিনন্তো অত্থদস্সিস্স ভগৰতো কালে কুলগেহে নিব্বত্তিত্ৰা ৰিঞ্ঞুতং পত্তো ঘরাৰাসং পহায ইসিপব্বজ্জং পব্বজিত্ৰা অরঞ্ঞে ৰিহরন্তো আকাসেন গচ্ছন্তং ভগৰন্তং দিস্ৰা পসন্নমানসো পসন্নাকারং দস্সেন্তো অঞ্জলিং পগ্গয্হ অট্ঠাসি। সত্থা তস্স অজ্ঝাসযং ঞত্ৰা আকাসতো ওতরি। সো ভগৰতো মনোহরানি মধুরানি ফলানি উপনেসি, পটিগ্গহেসি ভগৰা অনুকম্পং উপাদায। সো তেন পুঞ্ঞকম্মেন দেৰমনুস্সেসু সংসরন্তো ইমস্মিং বুদ্ধুপ্পাদে কোসলরট্ঠে হত্থাচরিযকুলে নিব্বত্তিত্ৰা ৰিজিতসেনোতি লদ্ধনামো ৰিঞ্ঞুতং পাপুণি। তস্স মাতুলা সেনো চ উপসেনো চাতি দ্ৰে হত্থাচরিযা সত্থু সন্তিকে ধম্মং সুত্ৰা পটিলদ্ধসদ্ধা পব্বজিত্ৰা ৰাসধুরং পূরেন্তা অরহত্তং পাপুণিংসু। ৰিজিতসেনোপি হত্থিসিপ্পে নিপ্ফত্তিং গতো নিস্সরণজ্ঝাসযতায ঘরাৰাসে অলগ্গমানসো সত্থু যমকপাটিহারিযং দিস্ৰা পটিলদ্ধসদ্ধো মাতুলত্থেরানং সন্তিকে পব্বজিত্ৰা তেসং ওৰাদানুসাসনিযা ৰিপস্সনায কম্মং করোন্তো ৰিপস্সনাৰীথিং লঙ্ঘিত্ৰা বহিদ্ধা নানারম্মণে ৰিধাৰন্তং অত্তনো চিত্তং ওৰদন্তো –
Olaggessāmītiādikā āyasmato vijitasenattherassa gāthā. Kā uppatti? Ayampi purimabuddhesu katādhikāro tattha tattha bhave vivaṭṭūpanissayaṃ kusalaṃ upacinanto atthadassissa bhagavato kāle kulagehe nibbattitvā viññutaṃ patto gharāvāsaṃ pahāya isipabbajjaṃ pabbajitvā araññe viharanto ākāsena gacchantaṃ bhagavantaṃ disvā pasannamānaso pasannākāraṃ dassento añjaliṃ paggayha aṭṭhāsi. Satthā tassa ajjhāsayaṃ ñatvā ākāsato otari. So bhagavato manoharāni madhurāni phalāni upanesi, paṭiggahesi bhagavā anukampaṃ upādāya. So tena puññakammena devamanussesu saṃsaranto imasmiṃ buddhuppāde kosalaraṭṭhe hatthācariyakule nibbattitvā vijitasenoti laddhanāmo viññutaṃ pāpuṇi. Tassa mātulā seno ca upaseno cāti dve hatthācariyā satthu santike dhammaṃ sutvā paṭiladdhasaddhā pabbajitvā vāsadhuraṃ pūrentā arahattaṃ pāpuṇiṃsu. Vijitasenopi hatthisippe nipphattiṃ gato nissaraṇajjhāsayatāya gharāvāse alaggamānaso satthu yamakapāṭihāriyaṃ disvā paṭiladdhasaddho mātulattherānaṃ santike pabbajitvā tesaṃ ovādānusāsaniyā vipassanāya kammaṃ karonto vipassanāvīthiṃ laṅghitvā bahiddhā nānārammaṇe vidhāvantaṃ attano cittaṃ ovadanto –
৩৫৫.
355.
‘‘ওলগ্গেস্সামি তে চিত্ত, আণিদ্ৰারেৰ হত্থিনং।
‘‘Olaggessāmi te citta, āṇidvāreva hatthinaṃ;
ন তং পাপে নিযোজেস্সং, কামজালং সরীরজং॥
Na taṃ pāpe niyojessaṃ, kāmajālaṃ sarīrajaṃ.
৩৫৬.
356.
‘‘ত্ৰং ওলগ্গো ন গচ্ছসি, দ্ৰারৰিৰরং গজোৰ অলভন্তো।
‘‘Tvaṃ olaggo na gacchasi, dvāravivaraṃ gajova alabhanto;
ন চ চিত্তকলি পুনপ্পুনং, পসক্ক পাপরতো চরিস্সসি॥
Na ca cittakali punappunaṃ, pasakka pāparato carissasi.
৩৫৭.
357.
‘‘যথা কুঞ্জরং অদন্তং, নৰগ্গহমঙ্কুসগ্গহো।
‘‘Yathā kuñjaraṃ adantaṃ, navaggahamaṅkusaggaho;
বলৰা আৰত্তেতি অকামং, এৰং আৰত্তযিস্সং তং॥
Balavā āvatteti akāmaṃ, evaṃ āvattayissaṃ taṃ.
৩৫৮.
358.
‘‘যথা ৰরহযদমকুসলো, সারথিপৰরো দমেতি আজঞ্ঞং।
‘‘Yathā varahayadamakusalo, sārathipavaro dameti ājaññaṃ;
এৰং দমযিস্সং তং, পতিট্ঠিতো পঞ্চসু বলেসু॥
Evaṃ damayissaṃ taṃ, patiṭṭhito pañcasu balesu.
৩৫৯.
359.
‘‘সতিযা তং নিবন্ধিস্সং, পযুত্তো তে দমেস্সামি।
‘‘Satiyā taṃ nibandhissaṃ, payutto te damessāmi;
ৰীরিযধুরনিগ্গহিতো, ন যিতো দূরং গমিস্সসে চিত্তা’’তি॥ –
Vīriyadhuraniggahito, na yito dūraṃ gamissase cittā’’ti. –
গাথা অভাসি।
Gāthā abhāsi.
তত্থ ওলগ্গেস্সামীতি সংৰরিস্সামি নিৰারেস্সামি। তেতি তং। উপযোগত্থে হি ইদং সামিৰচনং । তে গমনন্তি ৰা ৰচনসেসো। হত্থিনন্তি চ হত্থিন্তি অত্থো। চিত্তাতি অত্তনো চিত্তং আলপতি। যথা তং ৰারেতুকামো, তং দস্সেন্তো ‘‘আণিদ্ৰারেৰ হত্থিন’’ন্তি আহ। আণিদ্ৰারং নাম পাকারবদ্ধস্স নগরস্স খুদ্দকদ্ৰারং, যং ঘটিকাছিদ্দে আণিম্হি পক্খিত্তে যন্তেন ৰিনা অব্ভন্তরে ঠিতেহিপি ৰিৰরিতুং ন সক্কা। যেন মনুস্সগৰস্সমহিংসাদযো ন নিগ্গন্তুং সক্কা। নগরতো বহি নিগ্গন্তুকামম্পি হত্থিং যতো পলোভেত্ৰা হত্থাচরিযো গমনং নিৰারেসি। অথ ৰা আণিদ্ৰারং নাম পলিঘদ্ৰারং। তত্থ হি তিরিযং পলিঘং ঠপেত্ৰা রুক্খসূচিসঙ্খাতং আণিং পলিঘসীসে আৰুণন্তি। পাপেতি রূপাদীসু উপ্পজ্জনকঅভিজ্ঝাদিপাপধম্মে তং ন নিযোজেস্সং ন নিযোজিস্সামি। কামজালাতি কামস্স জালভূতং। যথা হি মচ্ছবন্ধমিগলুদ্দানং জালং নাম মচ্ছাদীনং তেসং যথাকামকারসাধনং, এৰং অযোনিসোমনসিকারানুপাতিতং চিত্তং মারস্স কামকারসাধনং। তেন হি সো সত্তে অনত্থেসু পাতেতি। সরীরজাতি সরীরেসু উপ্পজ্জনক। পঞ্চৰোকারভৰে হি চিত্তং রূপপটিবদ্ধৰুত্তিতায ‘‘সরীরজ’’ন্তি ৰুচ্চতি।
Tattha olaggessāmīti saṃvarissāmi nivāressāmi. Teti taṃ. Upayogatthe hi idaṃ sāmivacanaṃ . Te gamananti vā vacanaseso. Hatthinanti ca hatthinti attho. Cittāti attano cittaṃ ālapati. Yathā taṃ vāretukāmo, taṃ dassento ‘‘āṇidvāreva hatthina’’nti āha. Āṇidvāraṃ nāma pākārabaddhassa nagarassa khuddakadvāraṃ, yaṃ ghaṭikāchidde āṇimhi pakkhitte yantena vinā abbhantare ṭhitehipi vivarituṃ na sakkā. Yena manussagavassamahiṃsādayo na niggantuṃ sakkā. Nagarato bahi niggantukāmampi hatthiṃ yato palobhetvā hatthācariyo gamanaṃ nivāresi. Atha vā āṇidvāraṃ nāma palighadvāraṃ. Tattha hi tiriyaṃ palighaṃ ṭhapetvā rukkhasūcisaṅkhātaṃ āṇiṃ palighasīse āvuṇanti. Pāpeti rūpādīsu uppajjanakaabhijjhādipāpadhamme taṃ na niyojessaṃ na niyojissāmi. Kāmajālāti kāmassa jālabhūtaṃ. Yathā hi macchabandhamigaluddānaṃ jālaṃ nāma macchādīnaṃ tesaṃ yathākāmakārasādhanaṃ, evaṃ ayonisomanasikārānupātitaṃ cittaṃ mārassa kāmakārasādhanaṃ. Tena hi so satte anatthesu pāteti. Sarīrajāti sarīresu uppajjanaka. Pañcavokārabhave hi cittaṃ rūpapaṭibaddhavuttitāya ‘‘sarīraja’’nti vuccati.
ত্ৰং ওলগ্গো ন গচ্ছসীতি ত্ৰং, চিত্তকলি, মযা সতিপঞ্ঞাপতোদঅঙ্কুসেহি ৰারিতো ন দানি যথারুচিং গমিস্সসি, অযোনিসোমনসিকারৰসেন যথাকামং ৰত্তিতুং ন লভিস্সসি। যথা কিং? দ্ৰারৰিৰরং গজোৰ অলভন্তো নগরতো গজনিরোধতো ৰা নিগ্গমনায দ্ৰারৰিৰরকং অলভমানো হত্থী ৰিয। চিত্তকলীতি চিত্তকাল়কণ্ণি। পুনপ্পুনন্তি অপরাপরং। পসক্কাতি সরণসম্পস্সাসৰসেন। পাপরতোতি পাপকম্মনিরতো পুব্বে ৰিয ইদানি ন চরিস্সসি তথা চরিতুং ন দস্সামীতি অত্থো।
Tvaṃ olaggo na gacchasīti tvaṃ, cittakali, mayā satipaññāpatodaaṅkusehi vārito na dāni yathāruciṃ gamissasi, ayonisomanasikāravasena yathākāmaṃ vattituṃ na labhissasi. Yathā kiṃ? Dvāravivaraṃ gajova alabhanto nagarato gajanirodhato vā niggamanāya dvāravivarakaṃ alabhamāno hatthī viya. Cittakalīti cittakāḷakaṇṇi. Punappunanti aparāparaṃ. Pasakkāti saraṇasampassāsavasena. Pāparatoti pāpakammanirato pubbe viya idāni na carissasi tathā carituṃ na dassāmīti attho.
অদন্তন্তি অদমিতং হত্থিসিক্খং অসিক্খিতং। নৰগ্গহন্তি অচিরগহিতং। অঙ্কুসগ্গহোতি হত্থাচরিযো। বলৰাতি কাযবলেন ঞাণবলেন চ বলৰা। আৰত্তেতি অকামন্তি অনিচ্ছন্তমেৰ নিসেধনতো নিৰত্তেতি। এৰং আৰত্তযিস্সন্তি যথা যথাৰুত্তং হত্থিং হত্থাচরিযো, এৰং তং চিত্তং চিত্তকলিং দুচ্চরিতনিসেধনতো নিৰত্তযিস্সামি।
Adantanti adamitaṃ hatthisikkhaṃ asikkhitaṃ. Navaggahanti aciragahitaṃ. Aṅkusaggahoti hatthācariyo. Balavāti kāyabalena ñāṇabalena ca balavā. Āvatteti akāmanti anicchantameva nisedhanato nivatteti. Evaṃ āvattayissanti yathā yathāvuttaṃ hatthiṃ hatthācariyo, evaṃ taṃ cittaṃ cittakaliṃ duccaritanisedhanato nivattayissāmi.
ৰরহযদমকুসলোতি উত্তমানং অস্সদম্মানং দমনে কুসলো। ততো এৰ সারথিপৰরো অস্সদম্মসারথীসু ৰিসিট্ঠো দমেতি আজঞ্ঞং আজানীযং অস্সদম্মং দেসকালানুরূপং সণ্হফরুসেহি দমেতি ৰিনেতি নিব্বিসেৰনং করোতি। পতিট্ঠিতো পঞ্চসু বলেসূতি সদ্ধাদীসু পঞ্চসু বলেসু পতিট্ঠিতো হুত্ৰা অস্সদ্ধিযাদিনিসেধনতো তং দমযিস্সং দমেস্সামীতি অত্থো।
Varahayadamakusaloti uttamānaṃ assadammānaṃ damane kusalo. Tato eva sārathipavaro assadammasārathīsu visiṭṭho dameti ājaññaṃ ājānīyaṃ assadammaṃ desakālānurūpaṃ saṇhapharusehi dameti vineti nibbisevanaṃ karoti. Patiṭṭhito pañcasu balesūti saddhādīsu pañcasu balesu patiṭṭhito hutvā assaddhiyādinisedhanato taṃ damayissaṃ damessāmīti attho.
সতিযা তং নিবন্ধিস্সন্তি গোচরজ্ঝত্ততো বহি গন্তুং অদেন্তো সতিযোত্তেন কম্মট্ঠানথম্ভে, চিত্তকলি, তং নিবন্ধিস্সামি নিযমেস্সামি। পযুত্তো তে দমেস্সামীতি তত্থ নিবন্ধন্তো এৰ যুত্তপ্পযুত্তো হুত্ৰা তে দমেস্সামি, সংকিলেসমলতো তং ৰিসোধেস্সামি। ৰীরিযধুরনিগ্গহিতোতি যথাৰুত্তো ছেকেন সুসারথিনা যুগে যোজিতো যুগনিগ্গহিতো যুগন্তরগতো তং নাতিক্কমতি, এৰং ত্ৰম্পি চিত্ত, মম ৰীরিযধুরে নিগ্গহিতো সক্কচ্চকারিতায সাতচ্চকারিতায অঞ্ঞথা ৰত্তিতুং অলভন্তো ইতো গোচরজ্ঝত্ততো দূরং বহি ন গমিস্সসি। ভাৰনানুযুত্তস্স হি কম্মট্ঠানতো অঞ্ঞং আসন্নম্পি লক্খণতো দূরমেৰাতি এৰং থেরো ইমাহি গাথাহি অত্তনো চিত্তং নিগ্গণ্হন্তোৰ ৰিপস্সনং ৰড্ঢেত্ৰা অরহত্তং পাপুণি। তেন ৰুত্তং অপদানে (অপ॰ থের ২.৪৫.২২-৩০) –
Satiyātaṃ nibandhissanti gocarajjhattato bahi gantuṃ adento satiyottena kammaṭṭhānathambhe, cittakali, taṃ nibandhissāmi niyamessāmi. Payutto te damessāmīti tattha nibandhanto eva yuttappayutto hutvā te damessāmi, saṃkilesamalato taṃ visodhessāmi. Vīriyadhuraniggahitoti yathāvutto chekena susārathinā yuge yojito yuganiggahito yugantaragato taṃ nātikkamati, evaṃ tvampi citta, mama vīriyadhure niggahito sakkaccakāritāya sātaccakāritāya aññathā vattituṃ alabhanto ito gocarajjhattato dūraṃ bahi na gamissasi. Bhāvanānuyuttassa hi kammaṭṭhānato aññaṃ āsannampi lakkhaṇato dūramevāti evaṃ thero imāhi gāthāhi attano cittaṃ niggaṇhantova vipassanaṃ vaḍḍhetvā arahattaṃ pāpuṇi. Tena vuttaṃ apadāne (apa. thera 2.45.22-30) –
‘‘সুৰণ্ণৰণ্ণং সম্বুদ্ধং, দ্ৰত্তিংসৰরলক্খণং।
‘‘Suvaṇṇavaṇṇaṃ sambuddhaṃ, dvattiṃsavaralakkhaṇaṃ;
ৰিপিনগ্গেন গচ্ছন্তং, সালরাজংৰ ফুল্লিতং॥
Vipinaggena gacchantaṃ, sālarājaṃva phullitaṃ.
‘‘তিণত্থরং পঞ্ঞাপেত্ৰা, বুদ্ধসেট্ঠং অযাচহং।
‘‘Tiṇattharaṃ paññāpetvā, buddhaseṭṭhaṃ ayācahaṃ;
অনুকম্পতু মং বুদ্ধো, ভিক্খং ইচ্ছামি দাতৰে॥
Anukampatu maṃ buddho, bhikkhaṃ icchāmi dātave.
‘‘অনুকম্পকো কারুণিকো, অত্থদস্সী মহাযসো।
‘‘Anukampako kāruṇiko, atthadassī mahāyaso;
মম সঙ্কপ্পমঞ্ঞায, ওরূহি মম অস্সমে॥
Mama saṅkappamaññāya, orūhi mama assame.
‘‘ওরোহিত্ৰান সম্বুদ্ধো, নিসীদি পণ্ণসন্থরে।
‘‘Orohitvāna sambuddho, nisīdi paṇṇasanthare;
ভল্লাতকং গহেত্ৰান, বুদ্ধসেট্ঠস্সদাসহং॥
Bhallātakaṃ gahetvāna, buddhaseṭṭhassadāsahaṃ.
‘‘মম নিজ্ঝাযমানস্স, পরিভুঞ্জি তদা জিনো।
‘‘Mama nijjhāyamānassa, paribhuñji tadā jino;
তত্থ চিত্তং পসাদেত্ৰা, অভিৰন্দিং তদা জিনং॥
Tattha cittaṃ pasādetvā, abhivandiṃ tadā jinaṃ.
‘‘অট্ঠারসে কপ্পসতে, যং ফলমদদিং তদা।
‘‘Aṭṭhārase kappasate, yaṃ phalamadadiṃ tadā;
দুগ্গতিং নাভিজানামি, ফলদানস্সিদং ফলং॥
Duggatiṃ nābhijānāmi, phaladānassidaṃ phalaṃ.
‘‘কিলেসা ঝাপিতা ময্হং…পে॰… কতং বুদ্ধস্স সাসন’’ন্তি॥
‘‘Kilesā jhāpitā mayhaṃ…pe… kataṃ buddhassa sāsana’’nti.
অরহত্তং পন পত্ৰা অঞ্ঞং ব্যাকরোন্তোপি ইমা গাথা অভাসি।
Arahattaṃ pana patvā aññaṃ byākarontopi imā gāthā abhāsi.
ৰিজিতসেনত্থেরগাথাৰণ্ণনা নিট্ঠিতা।
Vijitasenattheragāthāvaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / থেরগাথাপাল়ি • Theragāthāpāḷi / ৯. ৰিজিতসেনত্থেরগাথা • 9. Vijitasenattheragāthā
