| Library / Tipiṭaka / д̇ибидага • Tipiṭaka / т̇зраг̇аат̇аа-адтагат̇аа • Theragāthā-aṭṭhakathā |
9. виж̇ид̇асзнад̇т̇зраг̇аат̇ааван̣н̣анаа
9. Vijitasenattheragāthāvaṇṇanā
олаг̇г̇зссаамийд̇иаад̣̇игаа ааяасмад̇о виж̇ид̇асзнад̇т̇зрасса г̇аат̇аа. гаа уббад̇д̇и? аяамби буримаб̣уд̣̇д̇хзсу гад̇аад̇хигааро д̇ад̇т̇а д̇ад̇т̇а бхавз виваддуубаниссаяам̣ гусалам̣ убажинанд̇о ад̇т̇ад̣̇ассисса бхаг̇авад̇о гаалз гулаг̇зхз ниб̣б̣ад̇д̇ид̇ваа вин̃н̃уд̇ам̣ бад̇д̇о гхарааваасам̣ бахааяа исибаб̣б̣аж̇ж̇ам̣ баб̣б̣аж̇ид̇ваа аран̃н̃з вихаранд̇о аагаасзна г̇ажчанд̇ам̣ бхаг̇аванд̇ам̣ д̣̇исваа басаннамаанасо басаннаагаарам̣ д̣̇ассзнд̇о ан̃ж̇алим̣ баг̇г̇аяха адтааси. сад̇т̇аа д̇асса аж̇жхаасаяам̣ н̃ад̇ваа аагаасад̇о од̇ари. со бхаг̇авад̇о манохараани мад̇хураани палаани убанзси, бадиг̇г̇ахзси бхаг̇аваа анугамбам̣ убаад̣̇ааяа. со д̇зна бун̃н̃агаммзна д̣̇звамануссзсу сам̣саранд̇о имасмим̣ б̣уд̣̇д̇хуббаад̣̇з госаларадтз хад̇т̇аажарияагулз ниб̣б̣ад̇д̇ид̇ваа виж̇ид̇асзнод̇и лад̣̇д̇ханаамо вин̃н̃уд̇ам̣ баабун̣и. д̇асса маад̇улаа сзно жа убасзно жаад̇и д̣̇вз хад̇т̇аажарияаа сад̇т̇у санд̇игз д̇хаммам̣ суд̇ваа бадилад̣̇д̇хасад̣̇д̇хаа баб̣б̣аж̇ид̇ваа ваасад̇хурам̣ буурзнд̇аа арахад̇д̇ам̣ баабун̣им̣су. виж̇ид̇асзноби хад̇т̇исиббз нибпад̇д̇им̣ г̇ад̇о ниссаран̣аж̇жхаасаяад̇ааяа гхарааваасз алаг̇г̇амаанасо сад̇т̇у яамагабаадихаарияам̣ д̣̇исваа бадилад̣̇д̇хасад̣̇д̇хо маад̇улад̇т̇зраанам̣ санд̇игз баб̣б̣аж̇ид̇ваа д̇зсам̣ оваад̣̇аанусаасанияаа вибассанааяа гаммам̣ гаронд̇о вибассанаавийт̇им̣ лан̇гхид̇ваа б̣ахид̣̇д̇хаа наанаарамман̣з вид̇хааванд̇ам̣ ад̇д̇ано жид̇д̇ам̣ овад̣̇анд̇о –
Olaggessāmītiādikā āyasmato vijitasenattherassa gāthā. Kā uppatti? Ayampi purimabuddhesu katādhikāro tattha tattha bhave vivaṭṭūpanissayaṃ kusalaṃ upacinanto atthadassissa bhagavato kāle kulagehe nibbattitvā viññutaṃ patto gharāvāsaṃ pahāya isipabbajjaṃ pabbajitvā araññe viharanto ākāsena gacchantaṃ bhagavantaṃ disvā pasannamānaso pasannākāraṃ dassento añjaliṃ paggayha aṭṭhāsi. Satthā tassa ajjhāsayaṃ ñatvā ākāsato otari. So bhagavato manoharāni madhurāni phalāni upanesi, paṭiggahesi bhagavā anukampaṃ upādāya. So tena puññakammena devamanussesu saṃsaranto imasmiṃ buddhuppāde kosalaraṭṭhe hatthācariyakule nibbattitvā vijitasenoti laddhanāmo viññutaṃ pāpuṇi. Tassa mātulā seno ca upaseno cāti dve hatthācariyā satthu santike dhammaṃ sutvā paṭiladdhasaddhā pabbajitvā vāsadhuraṃ pūrentā arahattaṃ pāpuṇiṃsu. Vijitasenopi hatthisippe nipphattiṃ gato nissaraṇajjhāsayatāya gharāvāse alaggamānaso satthu yamakapāṭihāriyaṃ disvā paṭiladdhasaddho mātulattherānaṃ santike pabbajitvā tesaṃ ovādānusāsaniyā vipassanāya kammaṃ karonto vipassanāvīthiṃ laṅghitvā bahiddhā nānārammaṇe vidhāvantaṃ attano cittaṃ ovadanto –
355.
355.
‘‘олаг̇г̇зссаами д̇з жид̇д̇а, аан̣ид̣̇ваарзва хад̇т̇инам̣;
‘‘Olaggessāmi te citta, āṇidvāreva hatthinaṃ;
на д̇ам̣ баабз нияож̇зссам̣, гаамаж̇аалам̣ сарийраж̇ам̣.
Na taṃ pāpe niyojessaṃ, kāmajālaṃ sarīrajaṃ.
356.
356.
‘‘д̇вам̣ олаг̇г̇о на г̇ажчаси, д̣̇вааравиварам̣ г̇аж̇ова алабханд̇о;
‘‘Tvaṃ olaggo na gacchasi, dvāravivaraṃ gajova alabhanto;
на жа жид̇д̇агали бунаббунам̣, басагга баабарад̇о жариссаси.
Na ca cittakali punappunaṃ, pasakka pāparato carissasi.
357.
357.
‘‘яат̇аа гун̃ж̇арам̣ ад̣̇анд̇ам̣, наваг̇г̇ахаман̇гусаг̇г̇ахо;
‘‘Yathā kuñjaraṃ adantaṃ, navaggahamaṅkusaggaho;
б̣алаваа аавад̇д̇зд̇и агаамам̣, звам̣ аавад̇д̇аяиссам̣ д̇ам̣.
Balavā āvatteti akāmaṃ, evaṃ āvattayissaṃ taṃ.
358.
358.
‘‘яат̇аа варахаяад̣̇амагусало, саарат̇ибаваро д̣̇амзд̇и ааж̇ан̃н̃ам̣;
‘‘Yathā varahayadamakusalo, sārathipavaro dameti ājaññaṃ;
звам̣ д̣̇амаяиссам̣ д̇ам̣, бад̇идтид̇о бан̃жасу б̣алзсу.
Evaṃ damayissaṃ taṃ, patiṭṭhito pañcasu balesu.
359.
359.
‘‘сад̇ияаа д̇ам̣ ниб̣анд̇хиссам̣, баяуд̇д̇о д̇з д̣̇амзссаами;
‘‘Satiyā taṃ nibandhissaṃ, payutto te damessāmi;
вийрияад̇хураниг̇г̇ахид̇о, на яид̇о д̣̇уурам̣ г̇амиссасз жид̇д̇аа’’д̇и. –
Vīriyadhuraniggahito, na yito dūraṃ gamissase cittā’’ti. –
г̇аат̇аа абхааси.
Gāthā abhāsi.
д̇ад̇т̇а олаг̇г̇зссаамийд̇и сам̣вариссаами ниваарзссаами. д̇зд̇и д̇ам̣. убаяог̇ад̇т̇з хи ид̣̇ам̣ саамиважанам̣ . д̇з г̇амананд̇и ваа важанасзсо. хад̇т̇инанд̇и жа хад̇т̇инд̇и ад̇т̇о. жид̇д̇аад̇и ад̇д̇ано жид̇д̇ам̣ аалабад̇и. яат̇аа д̇ам̣ ваарзд̇угаамо, д̇ам̣ д̣̇ассзнд̇о ‘‘аан̣ид̣̇ваарзва хад̇т̇ина’’нд̇и ааха. аан̣ид̣̇ваарам̣ наама баагаараб̣ад̣̇д̇хасса наг̇арасса куд̣̇д̣̇агад̣̇ваарам̣, яам̣ гхадигаачид̣̇д̣̇з аан̣имхи багкид̇д̇з яанд̇зна винаа аб̣бханд̇арз тид̇зхиби виварид̇ум̣ на саггаа. язна мануссаг̇авассамахим̣саад̣̇аяо на ниг̇г̇анд̇ум̣ саггаа. наг̇арад̇о б̣ахи ниг̇г̇анд̇угаамамби хад̇т̇им̣ яад̇о балобхзд̇ваа хад̇т̇аажарияо г̇аманам̣ ниваарзси. ат̇а ваа аан̣ид̣̇ваарам̣ наама балигхад̣̇ваарам̣. д̇ад̇т̇а хи д̇ирияам̣ балигхам̣ табзд̇ваа ругкасуужисан̇каад̇ам̣ аан̣им̣ балигхасийсз аавун̣анд̇и. баабзд̇и руубаад̣̇ийсу уббаж̇ж̇анагаабхиж̇жхаад̣̇ибаабад̇хаммз д̇ам̣ на нияож̇зссам̣ на нияож̇иссаами. гаамаж̇аалаад̇и гаамасса ж̇аалабхууд̇ам̣. яат̇аа хи мажчаб̣анд̇хамиг̇алуд̣̇д̣̇аанам̣ ж̇аалам̣ наама мажчаад̣̇ийнам̣ д̇зсам̣ яат̇аагаамагаарасаад̇ханам̣, звам̣ аяонисоманасигаараанубаад̇ид̇ам̣ жид̇д̇ам̣ маарасса гаамагаарасаад̇ханам̣. д̇зна хи со сад̇д̇з анад̇т̇зсу баад̇зд̇и. сарийраж̇аад̇и сарийрзсу уббаж̇ж̇анага. бан̃жавогаарабхавз хи жид̇д̇ам̣ руубабадиб̣ад̣̇д̇хавуд̇д̇ид̇ааяа ‘‘сарийраж̇а’’нд̇и вужжад̇и.
Tattha olaggessāmīti saṃvarissāmi nivāressāmi. Teti taṃ. Upayogatthe hi idaṃ sāmivacanaṃ . Te gamananti vā vacanaseso. Hatthinanti ca hatthinti attho. Cittāti attano cittaṃ ālapati. Yathā taṃ vāretukāmo, taṃ dassento ‘‘āṇidvāreva hatthina’’nti āha. Āṇidvāraṃ nāma pākārabaddhassa nagarassa khuddakadvāraṃ, yaṃ ghaṭikāchidde āṇimhi pakkhitte yantena vinā abbhantare ṭhitehipi vivarituṃ na sakkā. Yena manussagavassamahiṃsādayo na niggantuṃ sakkā. Nagarato bahi niggantukāmampi hatthiṃ yato palobhetvā hatthācariyo gamanaṃ nivāresi. Atha vā āṇidvāraṃ nāma palighadvāraṃ. Tattha hi tiriyaṃ palighaṃ ṭhapetvā rukkhasūcisaṅkhātaṃ āṇiṃ palighasīse āvuṇanti. Pāpeti rūpādīsu uppajjanakaabhijjhādipāpadhamme taṃ na niyojessaṃ na niyojissāmi. Kāmajālāti kāmassa jālabhūtaṃ. Yathā hi macchabandhamigaluddānaṃ jālaṃ nāma macchādīnaṃ tesaṃ yathākāmakārasādhanaṃ, evaṃ ayonisomanasikārānupātitaṃ cittaṃ mārassa kāmakārasādhanaṃ. Tena hi so satte anatthesu pāteti. Sarīrajāti sarīresu uppajjanaka. Pañcavokārabhave hi cittaṃ rūpapaṭibaddhavuttitāya ‘‘sarīraja’’nti vuccati.
д̇вам̣ олаг̇г̇о на г̇ажчасийд̇и д̇вам̣, жид̇д̇агали, маяаа сад̇ибан̃н̃аабад̇од̣̇аан̇гусзхи ваарид̇о на д̣̇аани яат̇ааружим̣ г̇амиссаси, аяонисоманасигааравасзна яат̇аагаамам̣ вад̇д̇ид̇ум̣ на лабхиссаси. яат̇аа гим̣? д̣̇вааравиварам̣ г̇аж̇ова алабханд̇о наг̇арад̇о г̇аж̇анирод̇хад̇о ваа ниг̇г̇аманааяа д̣̇вааравиварагам̣ алабхамаано хад̇т̇ий вияа. жид̇д̇агалийд̇и жид̇д̇агаал̣аган̣н̣и. бунаббунанд̇и абараабарам̣. басаггаад̇и саран̣асамбассаасавасзна. баабарад̇од̇и баабагамманирад̇о буб̣б̣з вияа ид̣̇аани на жариссаси д̇ат̇аа жарид̇ум̣ на д̣̇ассаамийд̇и ад̇т̇о.
Tvaṃ olaggo na gacchasīti tvaṃ, cittakali, mayā satipaññāpatodaaṅkusehi vārito na dāni yathāruciṃ gamissasi, ayonisomanasikāravasena yathākāmaṃ vattituṃ na labhissasi. Yathā kiṃ? Dvāravivaraṃ gajova alabhanto nagarato gajanirodhato vā niggamanāya dvāravivarakaṃ alabhamāno hatthī viya. Cittakalīti cittakāḷakaṇṇi. Punappunanti aparāparaṃ. Pasakkāti saraṇasampassāsavasena. Pāparatoti pāpakammanirato pubbe viya idāni na carissasi tathā carituṃ na dassāmīti attho.
ад̣̇анд̇анд̇и ад̣̇амид̇ам̣ хад̇т̇исигкам̣ асигкид̇ам̣. наваг̇г̇аханд̇и ажираг̇ахид̇ам̣. ан̇гусаг̇г̇аход̇и хад̇т̇аажарияо. б̣алаваад̇и гааяаб̣алзна н̃аан̣аб̣алзна жа б̣алаваа. аавад̇д̇зд̇и агааманд̇и анижчанд̇амзва нисзд̇ханад̇о нивад̇д̇зд̇и. звам̣ аавад̇д̇аяиссанд̇и яат̇аа яат̇аавуд̇д̇ам̣ хад̇т̇им̣ хад̇т̇аажарияо, звам̣ д̇ам̣ жид̇д̇ам̣ жид̇д̇агалим̣ д̣̇ужжарид̇анисзд̇ханад̇о нивад̇д̇аяиссаами.
Adantanti adamitaṃ hatthisikkhaṃ asikkhitaṃ. Navaggahanti aciragahitaṃ. Aṅkusaggahoti hatthācariyo. Balavāti kāyabalena ñāṇabalena ca balavā. Āvatteti akāmanti anicchantameva nisedhanato nivatteti. Evaṃ āvattayissanti yathā yathāvuttaṃ hatthiṃ hatthācariyo, evaṃ taṃ cittaṃ cittakaliṃ duccaritanisedhanato nivattayissāmi.
варахаяад̣̇амагусалод̇и уд̇д̇амаанам̣ ассад̣̇аммаанам̣ д̣̇аманз гусало. д̇ад̇о зва саарат̇ибаваро ассад̣̇аммасаарат̇ийсу висидто д̣̇амзд̇и ааж̇ан̃н̃ам̣ ааж̇аанийяам̣ ассад̣̇аммам̣ д̣̇зсагаалаануруубам̣ сан̣хапарусзхи д̣̇амзд̇и винзд̇и ниб̣б̣исзванам̣ гарод̇и. бад̇идтид̇о бан̃жасу б̣алзсууд̇и сад̣̇д̇хаад̣̇ийсу бан̃жасу б̣алзсу бад̇идтид̇о худ̇ваа ассад̣̇д̇хияаад̣̇инисзд̇ханад̇о д̇ам̣ д̣̇амаяиссам̣ д̣̇амзссаамийд̇и ад̇т̇о.
Varahayadamakusaloti uttamānaṃ assadammānaṃ damane kusalo. Tato eva sārathipavaro assadammasārathīsu visiṭṭho dameti ājaññaṃ ājānīyaṃ assadammaṃ desakālānurūpaṃ saṇhapharusehi dameti vineti nibbisevanaṃ karoti. Patiṭṭhito pañcasu balesūti saddhādīsu pañcasu balesu patiṭṭhito hutvā assaddhiyādinisedhanato taṃ damayissaṃ damessāmīti attho.
сад̇ияаа д̇ам̣ ниб̣анд̇хиссанд̇и г̇ожараж̇жхад̇д̇ад̇о б̣ахи г̇анд̇ум̣ ад̣̇знд̇о сад̇ияод̇д̇зна гаммадтаанат̇амбхз, жид̇д̇агали, д̇ам̣ ниб̣анд̇хиссаами нияамзссаами. баяуд̇д̇о д̇з д̣̇амзссаамийд̇и д̇ад̇т̇а ниб̣анд̇ханд̇о зва яуд̇д̇аббаяуд̇д̇о худ̇ваа д̇з д̣̇амзссаами, сам̣гилзсамалад̇о д̇ам̣ висод̇хзссаами. вийрияад̇хураниг̇г̇ахид̇од̇и яат̇аавуд̇д̇о чзгзна сусаарат̇инаа яуг̇з яож̇ид̇о яуг̇аниг̇г̇ахид̇о яуг̇анд̇араг̇ад̇о д̇ам̣ наад̇иггамад̇и, звам̣ д̇вамби жид̇д̇а, мама вийрияад̇хурз ниг̇г̇ахид̇о саггажжагаарид̇ааяа саад̇ажжагаарид̇ааяа ан̃н̃ат̇аа вад̇д̇ид̇ум̣ алабханд̇о ид̇о г̇ожараж̇жхад̇д̇ад̇о д̣̇уурам̣ б̣ахи на г̇амиссаси. бхааванаануяуд̇д̇асса хи гаммадтаанад̇о ан̃н̃ам̣ аасаннамби лагкан̣ад̇о д̣̇уурамзваад̇и звам̣ т̇зро имаахи г̇аат̇аахи ад̇д̇ано жид̇д̇ам̣ ниг̇г̇ан̣ханд̇ова вибассанам̣ вад̣дхзд̇ваа арахад̇д̇ам̣ баабун̣и. д̇зна вуд̇д̇ам̣ абад̣̇аанз (аба. т̇зра 2.45.22-30) –
Satiyātaṃ nibandhissanti gocarajjhattato bahi gantuṃ adento satiyottena kammaṭṭhānathambhe, cittakali, taṃ nibandhissāmi niyamessāmi. Payutto te damessāmīti tattha nibandhanto eva yuttappayutto hutvā te damessāmi, saṃkilesamalato taṃ visodhessāmi. Vīriyadhuraniggahitoti yathāvutto chekena susārathinā yuge yojito yuganiggahito yugantaragato taṃ nātikkamati, evaṃ tvampi citta, mama vīriyadhure niggahito sakkaccakāritāya sātaccakāritāya aññathā vattituṃ alabhanto ito gocarajjhattato dūraṃ bahi na gamissasi. Bhāvanānuyuttassa hi kammaṭṭhānato aññaṃ āsannampi lakkhaṇato dūramevāti evaṃ thero imāhi gāthāhi attano cittaṃ niggaṇhantova vipassanaṃ vaḍḍhetvā arahattaṃ pāpuṇi. Tena vuttaṃ apadāne (apa. thera 2.45.22-30) –
‘‘суван̣н̣аван̣н̣ам̣ самб̣уд̣̇д̇хам̣, д̣̇вад̇д̇им̣саваралагкан̣ам̣;
‘‘Suvaṇṇavaṇṇaṃ sambuddhaṃ, dvattiṃsavaralakkhaṇaṃ;
вибинаг̇г̇зна г̇ажчанд̇ам̣, сааларааж̇ам̣ва пуллид̇ам̣.
Vipinaggena gacchantaṃ, sālarājaṃva phullitaṃ.
‘‘д̇ин̣ад̇т̇арам̣ бан̃н̃аабзд̇ваа, б̣уд̣̇д̇хасздтам̣ аяаажахам̣;
‘‘Tiṇattharaṃ paññāpetvā, buddhaseṭṭhaṃ ayācahaṃ;
анугамбад̇у мам̣ б̣уд̣̇д̇хо, бхигкам̣ ижчаами д̣̇аад̇авз.
Anukampatu maṃ buddho, bhikkhaṃ icchāmi dātave.
‘‘анугамбаго гаарун̣иго, ад̇т̇ад̣̇ассий махааяасо;
‘‘Anukampako kāruṇiko, atthadassī mahāyaso;
мама сан̇габбаман̃н̃ааяа, оруухи мама ассамз.
Mama saṅkappamaññāya, orūhi mama assame.
‘‘орохид̇ваана самб̣уд̣̇д̇хо, нисийд̣̇и бан̣н̣асант̇арз;
‘‘Orohitvāna sambuddho, nisīdi paṇṇasanthare;
бхаллаад̇агам̣ г̇ахзд̇ваана, б̣уд̣̇д̇хасздтассад̣̇аасахам̣.
Bhallātakaṃ gahetvāna, buddhaseṭṭhassadāsahaṃ.
‘‘мама ниж̇жхааяамаанасса, барибхун̃ж̇и д̇ад̣̇аа ж̇ино;
‘‘Mama nijjhāyamānassa, paribhuñji tadā jino;
д̇ад̇т̇а жид̇д̇ам̣ басаад̣̇зд̇ваа, абхиванд̣̇им̣ д̇ад̣̇аа ж̇инам̣.
Tattha cittaṃ pasādetvā, abhivandiṃ tadā jinaṃ.
‘‘адтаарасз габбасад̇з, яам̣ паламад̣̇ад̣̇им̣ д̇ад̣̇аа;
‘‘Aṭṭhārase kappasate, yaṃ phalamadadiṃ tadā;
д̣̇уг̇г̇ад̇им̣ наабхиж̇аанаами, палад̣̇аанассид̣̇ам̣ палам̣.
Duggatiṃ nābhijānāmi, phaladānassidaṃ phalaṃ.
‘‘гилзсаа жхаабид̇аа маяхам̣…бз… гад̇ам̣ б̣уд̣̇д̇хасса саасана’’нд̇и.
‘‘Kilesā jhāpitā mayhaṃ…pe… kataṃ buddhassa sāsana’’nti.
арахад̇д̇ам̣ бана бад̇ваа ан̃н̃ам̣ б̣яаагаронд̇оби имаа г̇аат̇аа абхааси.
Arahattaṃ pana patvā aññaṃ byākarontopi imā gāthā abhāsi.
виж̇ид̇асзнад̇т̇зраг̇аат̇ааван̣н̣анаа нидтид̇аа.
Vijitasenattheragāthāvaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / т̇зраг̇аат̇аабаал̣и • Theragāthāpāḷi / 9. виж̇ид̇асзнад̇т̇зраг̇аат̇аа • 9. Vijitasenattheragāthā
