| Library / Tipiṭaka / तिपिटक • Tipiṭaka / अङ्गुत्तरनिकाय (टीका) • Aṅguttaranikāya (ṭīkā) |
५. विज्जाभागियसुत्तवण्णना
5. Vijjābhāgiyasuttavaṇṇanā
३५. पञ्चमे सम्पयोगवसेन विज्जं भजन्ति, सहजातअञ्ञमञ्ञनिस्सयसम्पयुत्तअत्थिअविगतादिपच्चयवसेन ताय सह एकीभावं गच्छन्तीति विज्जाभागिया। अथ वा विज्जाभागे विज्जाकोट्ठासे वत्तन्ति विज्जासभागताय तदेकदेसे विज्जाकोट्ठासे पवत्तन्तीति विज्जाभागिया। तत्थ विपस्सनाञाणं, मनोमयिद्धि, छ अभिञ्ञाति अट्ठ विज्जा। पुरिमेन अत्थेन ताहि सम्पयुत्तधम्मा विज्जाभागिया। पच्छिमेन अत्थेन तासु या काचि एकाव विज्जा विज्जा, सेसा विज्जाभागिया। एवं विज्जापि विज्जाय सम्पयुत्तधम्मापि ‘‘विज्जाभागिया’’त्वेव वेदितब्बा। इध पन विपस्सनाञाणसम्पयुत्ता सञ्ञाव विज्जाभागियाति आगता, सञ्ञासीसेन सेससम्पयुत्तधम्मापि वुत्ता एवाति दट्ठब्बं। अनिच्चानुपस्सनाञाणेति अनिच्चानुपस्सनाञाणे निस्सयपच्चयभूते उप्पन्नसञ्ञा, तेन सहगताति अत्थो। सेसेसुपि एसेव नयो।
35. Pañcame sampayogavasena vijjaṃ bhajanti, sahajātaaññamaññanissayasampayuttaatthiavigatādipaccayavasena tāya saha ekībhāvaṃ gacchantīti vijjābhāgiyā. Atha vā vijjābhāge vijjākoṭṭhāse vattanti vijjāsabhāgatāya tadekadese vijjākoṭṭhāse pavattantīti vijjābhāgiyā. Tattha vipassanāñāṇaṃ, manomayiddhi, cha abhiññāti aṭṭha vijjā. Purimena atthena tāhi sampayuttadhammā vijjābhāgiyā. Pacchimena atthena tāsu yā kāci ekāva vijjā vijjā, sesā vijjābhāgiyā. Evaṃ vijjāpi vijjāya sampayuttadhammāpi ‘‘vijjābhāgiyā’’tveva veditabbā. Idha pana vipassanāñāṇasampayuttā saññāva vijjābhāgiyāti āgatā, saññāsīsena sesasampayuttadhammāpi vuttā evāti daṭṭhabbaṃ. Aniccānupassanāñāṇeti aniccānupassanāñāṇe nissayapaccayabhūte uppannasaññā, tena sahagatāti attho. Sesesupi eseva nayo.
विज्जाभागियसुत्तवण्णना निट्ठिता।
Vijjābhāgiyasuttavaṇṇanā niṭṭhitā.
Related texts:
तिपिटक (मूल) • Tipiṭaka (Mūla) / सुत्तपिटक • Suttapiṭaka / अङ्गुत्तरनिकाय • Aṅguttaranikāya / ५. विज्जाभागियसुत्तं • 5. Vijjābhāgiyasuttaṃ
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / अङ्गुत्तरनिकाय (अट्ठकथा) • Aṅguttaranikāya (aṭṭhakathā) / ५. विज्जाभागियसुत्तवण्णना • 5. Vijjābhāgiyasuttavaṇṇanā
