| Library / Tipiṭaka / തിപിടക • Tipiṭaka / അങ്ഗുത്തരനികായ (ടീകാ) • Aṅguttaranikāya (ṭīkā) |
൫. വിജ്ജാഭാഗിയസുത്തവണ്ണനാ
5. Vijjābhāgiyasuttavaṇṇanā
൩൫. പഞ്ചമേ സമ്പയോഗവസേന വിജ്ജം ഭജന്തി, സഹജാതഅഞ്ഞമഞ്ഞനിസ്സയസമ്പയുത്തഅത്ഥിഅവിഗതാദിപച്ചയവസേന തായ സഹ ഏകീഭാവം ഗച്ഛന്തീതി വിജ്ജാഭാഗിയാ. അഥ വാ വിജ്ജാഭാഗേ വിജ്ജാകോട്ഠാസേ വത്തന്തി വിജ്ജാസഭാഗതായ തദേകദേസേ വിജ്ജാകോട്ഠാസേ പവത്തന്തീതി വിജ്ജാഭാഗിയാ. തത്ഥ വിപസ്സനാഞാണം, മനോമയിദ്ധി, ഛ അഭിഞ്ഞാതി അട്ഠ വിജ്ജാ. പുരിമേന അത്ഥേന താഹി സമ്പയുത്തധമ്മാ വിജ്ജാഭാഗിയാ. പച്ഛിമേന അത്ഥേന താസു യാ കാചി ഏകാവ വിജ്ജാ വിജ്ജാ, സേസാ വിജ്ജാഭാഗിയാ. ഏവം വിജ്ജാപി വിജ്ജായ സമ്പയുത്തധമ്മാപി ‘‘വിജ്ജാഭാഗിയാ’’ത്വേവ വേദിതബ്ബാ. ഇധ പന വിപസ്സനാഞാണസമ്പയുത്താ സഞ്ഞാവ വിജ്ജാഭാഗിയാതി ആഗതാ, സഞ്ഞാസീസേന സേസസമ്പയുത്തധമ്മാപി വുത്താ ഏവാതി ദട്ഠബ്ബം. അനിച്ചാനുപസ്സനാഞാണേതി അനിച്ചാനുപസ്സനാഞാണേ നിസ്സയപച്ചയഭൂതേ ഉപ്പന്നസഞ്ഞാ, തേന സഹഗതാതി അത്ഥോ. സേസേസുപി ഏസേവ നയോ.
35. Pañcame sampayogavasena vijjaṃ bhajanti, sahajātaaññamaññanissayasampayuttaatthiavigatādipaccayavasena tāya saha ekībhāvaṃ gacchantīti vijjābhāgiyā. Atha vā vijjābhāge vijjākoṭṭhāse vattanti vijjāsabhāgatāya tadekadese vijjākoṭṭhāse pavattantīti vijjābhāgiyā. Tattha vipassanāñāṇaṃ, manomayiddhi, cha abhiññāti aṭṭha vijjā. Purimena atthena tāhi sampayuttadhammā vijjābhāgiyā. Pacchimena atthena tāsu yā kāci ekāva vijjā vijjā, sesā vijjābhāgiyā. Evaṃ vijjāpi vijjāya sampayuttadhammāpi ‘‘vijjābhāgiyā’’tveva veditabbā. Idha pana vipassanāñāṇasampayuttā saññāva vijjābhāgiyāti āgatā, saññāsīsena sesasampayuttadhammāpi vuttā evāti daṭṭhabbaṃ. Aniccānupassanāñāṇeti aniccānupassanāñāṇe nissayapaccayabhūte uppannasaññā, tena sahagatāti attho. Sesesupi eseva nayo.
വിജ്ജാഭാഗിയസുത്തവണ്ണനാ നിട്ഠിതാ.
Vijjābhāgiyasuttavaṇṇanā niṭṭhitā.
Related texts:
തിപിടക (മൂല) • Tipiṭaka (Mūla) / സുത്തപിടക • Suttapiṭaka / അങ്ഗുത്തരനികായ • Aṅguttaranikāya / ൫. വിജ്ജാഭാഗിയസുത്തം • 5. Vijjābhāgiyasuttaṃ
അട്ഠകഥാ • Aṭṭhakathā / സുത്തപിടക (അട്ഠകഥാ) • Suttapiṭaka (aṭṭhakathā) / അങ്ഗുത്തരനികായ (അട്ഠകഥാ) • Aṅguttaranikāya (aṭṭhakathā) / ൫. വിജ്ജാഭാഗിയസുത്തവണ്ണനാ • 5. Vijjābhāgiyasuttavaṇṇanā
