| Library / Tipiṭaka / තිපිටක • Tipiṭaka / ඉතිවුත්‌තක-අට්‌ඨකථා • Itivuttaka-aṭṭhakathā |
3. විජ්‌ජාසුත්‌තවණ්‌ණනා
3. Vijjāsuttavaṇṇanā
40. තතියෙ පුබ්‌බඞ්‌ගමාති සහජාතවසෙන, උපනිස්‌සයවසෙන චාති ද්‌වීහි ආකාරෙහි පුබ්‌බඞ්‌ගමා පුරස්‌සරා පධානකාරණං. න හි අවිජ්‌ජාය විනා අකුසලුප්‌පත්‌ති අත්‌ථි. සමාපත්‌තියාති සමාපජ්‌ජනාය සභාවපටිලාභාය, පවත්‌තියාති අත්‌ථො. තත්‌ථ අකුසලප්‌පවත්‌තියා ආදීනවප්‌පටිච්‌ඡාදනෙන අයොනිසොමනසිකාරස්‌ස පච්‌චයභාවෙන අප්‌පහීනභාවෙන ච අකුසලධම්‌මානං උපනිස්‌සයභාවො දිස්‌සති.
40. Tatiye pubbaṅgamāti sahajātavasena, upanissayavasena cāti dvīhi ākārehi pubbaṅgamā purassarā padhānakāraṇaṃ. Na hi avijjāya vinā akusaluppatti atthi. Samāpattiyāti samāpajjanāya sabhāvapaṭilābhāya, pavattiyāti attho. Tattha akusalappavattiyā ādīnavappaṭicchādanena ayonisomanasikārassa paccayabhāvena appahīnabhāvena ca akusaladhammānaṃ upanissayabhāvo dissati.
එවං බ්‍යාධිමරණාදිදුක්‌ඛස්‌ස අධිට්‌ඨානභාවතො සබ්‌බාපි ගතියො ඉධ දුග්‌ගතියො. අථ වා රාගාදිකිලෙසෙහි දූසිතා ගතියො කායවචීචිත්‌තානං පවත්‌තියොති දුග්‌ගතියො, කායවචීමනොදුච්‌චරිතානි. අස්‌මිං ලොකෙති ඉධ ලොකෙ මනුස්‌සගතියං වා. පරම්‌හි චාති තතො අඤ්‌ඤාසු ගතීසු. අවිජ්‌ජාමූලිකා සබ්‌බාති තා සබ්‌බාපි දුච්‌චරිතස්‌ස විපත්‌තියො වුත්‌තනයෙන අවිජ්‌ජාපුබ්‌බඞ්‌ගමත්‌තා අවිජ්‌ජාමූලිකා එව. ඉච්‌ඡාලොභසමුස්‌සයාති අසම්‌පත්‌තවිසයපරියෙසනලක්‌ඛණාය ඉච්‌ඡාය, සම්‌පත්‌තවිසයලුබ්‌භනලක්‌ඛණෙන ලොභෙන ච සමුස්‌සිතා උපචිතාති ඉච්‌ඡාලොභසමුස්‌සයා.
Evaṃ byādhimaraṇādidukkhassa adhiṭṭhānabhāvato sabbāpi gatiyo idha duggatiyo. Atha vā rāgādikilesehi dūsitā gatiyo kāyavacīcittānaṃ pavattiyoti duggatiyo, kāyavacīmanoduccaritāni. Asmiṃ loketi idha loke manussagatiyaṃ vā. Paramhi cāti tato aññāsu gatīsu. Avijjāmūlikā sabbāti tā sabbāpi duccaritassa vipattiyo vuttanayena avijjāpubbaṅgamattā avijjāmūlikā eva. Icchālobhasamussayāti asampattavisayapariyesanalakkhaṇāya icchāya, sampattavisayalubbhanalakkhaṇena lobhena ca samussitā upacitāti icchālobhasamussayā.
යතොති යස්‌මා අවිජ්‌ජාහෙතු අවිජ්‌ජාය නිවුතො හුත්‌වා. පාපිච්‌ඡොති අවිජ්‌ජාය පටිච්‌ඡාදිතත්‌තා පාපිච්‌ඡතාය ආදීනවෙ අපස්‌සන්‌තො අසන්‌තගුණසම්‌භාවනවසෙන කොහඤ්‌ඤාදීනි කරොන්‌තො පාපිච්‌ඡො, ලොභෙනෙව අත්‍රිච්‌ඡතාපි ගහිතාති දට්‌ඨබ්‌බා. අනාදරොති ලොකාධිපතිනො ඔත්‌තප්‌පස්‌ස අභාවෙන සබ්‍රහ්‌මචාරීසු ආදරරහිතො. තතොති තස්‌මා අවිජ්‌ජාපාපිච්‌ඡතාඅහිරිකානොත්‌තප්‌පහෙතු . පසවතීති කායදුච්‌චරිතාදිභෙදං පාපං උපචිනති. අපායං තෙන ගච්‌ඡතීති තෙන තථා පසුතෙන පාපෙන නිරයාදිභෙදං අපායං ගච්‌ඡති උපපජ්‌ජති.
Yatoti yasmā avijjāhetu avijjāya nivuto hutvā. Pāpicchoti avijjāya paṭicchāditattā pāpicchatāya ādīnave apassanto asantaguṇasambhāvanavasena kohaññādīni karonto pāpiccho, lobheneva atricchatāpi gahitāti daṭṭhabbā. Anādaroti lokādhipatino ottappassa abhāvena sabrahmacārīsu ādararahito. Tatoti tasmā avijjāpāpicchatāahirikānottappahetu . Pasavatīti kāyaduccaritādibhedaṃ pāpaṃ upacinati. Apāyaṃ tena gacchatīti tena tathā pasutena pāpena nirayādibhedaṃ apāyaṃ gacchati upapajjati.
තස්‌මාති යස්‌මා එතෙ එවං සබ්‌බදුච්‌චරිතමූලභූතා සබ්‌බදුග්‌ගතිපරික්‌කිලෙසහෙතුභූතා ච අවිජ්‌ජාදයො, තස්‌මා ඉච්‌ඡඤ්‌ච, ලොභඤ්‌ච, අවිජ්‌ජඤ්‌ච, චසද්‌දෙන අහිරිකානොත්‌තප්‌පඤ්‌ච විරාජයං සමුච්‌ඡෙදවසෙන පජහං. කථං විරාජෙතීති ආහ? විජ්‌ජං උප්‌පාදයන්‌ති, විපස්‌සනාපටිපාටියා ච, මග්‌ගපටිපාටියා ච, උස්‌සක්‌කිත්‌වා අරහත්‌තමග්‌ගවිජ්‌ජං අත්‌තනො සන්‌තානෙ උප්‌පාදයන්‌තො. සබ්‌බා දුග්‌ගතියොති සබ්‌බාපි දුච්‌චරිතසඞ්‌ඛාතා දුග්‌ගතියො, වට්‌ටදුක්‌ඛස්‌ස වා අධිට්‌ඨානභාවතො දුක්‌ඛා, සබ්‌බා පඤ්‌චපි ගතියො ජහෙ පජහෙය්‍ය සමතික්‌කමෙය්‍ය. කිලෙසවට්‌ටප්‌පහානෙනෙව හි කම්‌මවට්‌ටං විපාකවට්‌ටඤ්‌ච පහීනං හොතීති.
Tasmāti yasmā ete evaṃ sabbaduccaritamūlabhūtā sabbaduggatiparikkilesahetubhūtā ca avijjādayo, tasmā icchañca, lobhañca, avijjañca, casaddena ahirikānottappañca virājayaṃ samucchedavasena pajahaṃ. Kathaṃ virājetīti āha? Vijjaṃ uppādayanti, vipassanāpaṭipāṭiyā ca, maggapaṭipāṭiyā ca, ussakkitvā arahattamaggavijjaṃ attano santāne uppādayanto. Sabbā duggatiyoti sabbāpi duccaritasaṅkhātā duggatiyo, vaṭṭadukkhassa vā adhiṭṭhānabhāvato dukkhā, sabbā pañcapi gatiyo jahe pajaheyya samatikkameyya. Kilesavaṭṭappahāneneva hi kammavaṭṭaṃ vipākavaṭṭañca pahīnaṃ hotīti.
තතියසුත්‌තවණ්‌ණනා නිට්‌ඨිතා.
Tatiyasuttavaṇṇanā niṭṭhitā.
පඨමභාණවාරවණ්‌ණනා නිට්‌ඨිතා.
Paṭhamabhāṇavāravaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / ඛුද්‌දකනිකාය • Khuddakanikāya / ඉතිවුත්‌තකපාළි • Itivuttakapāḷi / 3. විජ්‌ජාසුත්‌තං • 3. Vijjāsuttaṃ
