| Library / Tipiṭaka / திபிடக • Tipiṭaka / பாசித்யாதி³யோஜனாபாளி • Pācityādiyojanāpāḷi |
7. விகாலபோ⁴ஜனஸிக்கா²பத³ங்
7. Vikālabhojanasikkhāpadaṃ
247. ஸத்தமே கி³ரிம்ஹீதி பப்³ப³தம்ஹி. ஸோ ஹி ஹிமவமனாதி³வஸேன ஜலங், ஸாரபூ⁴தானி ச பே⁴ஸஜ்ஜாதி³வத்தூ²னி கி³ரதி நிக்³கி³ரதீதி கி³ரீதி வுச்சதி. அக்³க³ஸமஜ்ஜோதி உத்தமஸமஜ்ஜோ. இமேஹி பதே³ஹி அக்³கோ³ ஸமஜ்ஜோ அக்³க³ஸமஜ்ஜோ, கி³ரிம்ஹி பவத்தோ அக்³க³ஸமஜ்ஜோ கி³ரக்³க³ஸமஜ்ஜோதி அத்த²ங் த³ஸ்ஸேதி. ஸமஜ்ஜோதி ச ஸபா⁴. ஸா ஹி ஸமாக³மங் அஜந்தி க³ச்ச²ந்தி ஜனா எத்தா²தி ஸமஜ்ஜோதி வுச்சதி. ‘‘கி³ரிஸ்ஸ வா’’திஆதி³னா கி³ரிஸ்ஸ அக்³கோ³ கோடி கி³ரக்³கோ³, தஸ்மிங் பவத்தோ ஸமஜ்ஜோ கி³ரக்³க³ஸமஜ்ஜோதி அத்தோ² த³ஸ்ஸிதோ. ஸோதி கி³ரக்³க³ஸமஜ்ஜோ. ப⁴விஸ்ஸதி கிராதி யோஜனா. பூ⁴மிபா⁴கே³தி அவயவிஆதா⁴ரோ, ஸன்னிபததீதி ஸம்ப³ந்தோ⁴. நடஞ்ச நாடகஞ்ச நடனாடகானி. ‘‘நச்சங் கீ³தங் வாதி³தஞ்சா’’தி இத³ங் தயங் ‘‘நாடக’’ந்தி வுச்சதி. தேஸந்தி நடனாடகானங். த³ஸ்ஸனத்த²ந்தி த³ஸ்ஸனாய ச ஸவனாய ச. ஸவனம்பி ஹி த³ஸ்ஸனேனேவ ஸங்க³ஹிதங். அபஞ்ஞத்தே ஸிக்கா²பதே³தி ஊனவீஸதிவஸ்ஸஸிக்கா²பத³ஸ்ஸ தாவ அபஞ்ஞத்தத்தா. தேதி ஸத்தரஸவக்³கி³யா. தத்தா²தி கி³ரக்³க³ஸமஜ்ஜங். அதா²தி தஸ்மிங் காலே. நேஸந்தி ஸத்தரஸவக்³கி³யானங் அத³ங்ஸூதி ஸம்ப³ந்தோ⁴. விலிம்பெத்வாதி விலேபனேஹி விவிதா⁴காரேன லிம்பெத்வா.
247. Sattame girimhīti pabbatamhi. So hi himavamanādivasena jalaṃ, sārabhūtāni ca bhesajjādivatthūni girati niggiratīti girīti vuccati. Aggasamajjoti uttamasamajjo. Imehi padehi aggo samajjo aggasamajjo, girimhi pavatto aggasamajjo giraggasamajjoti atthaṃ dasseti. Samajjoti ca sabhā. Sā hi samāgamaṃ ajanti gacchanti janā etthāti samajjoti vuccati. ‘‘Girissa vā’’tiādinā girissa aggo koṭi giraggo, tasmiṃ pavatto samajjo giraggasamajjoti attho dassito. Soti giraggasamajjo. Bhavissati kirāti yojanā. Bhūmibhāgeti avayaviādhāro, sannipatatīti sambandho. Naṭañca nāṭakañca naṭanāṭakāni. ‘‘Naccaṃ gītaṃ vāditañcā’’ti idaṃ tayaṃ ‘‘nāṭaka’’nti vuccati. Tesanti naṭanāṭakānaṃ. Dassanatthanti dassanāya ca savanāya ca. Savanampi hi dassaneneva saṅgahitaṃ. Apaññattesikkhāpadeti ūnavīsativassasikkhāpadassa tāva apaññattattā. Teti sattarasavaggiyā. Tatthāti giraggasamajjaṃ. Athāti tasmiṃ kāle. Nesanti sattarasavaggiyānaṃ adaṃsūti sambandho. Vilimpetvāti vilepanehi vividhākārena limpetvā.
249. ‘‘விகாலே’’தி ஸாமஞ்ஞேன வுத்தேபி விஸேஸகாலோவ க³ஹேதப்³போ³தி ஆஹ ‘‘காலோ’’திஆதி³. ஸோ சாதி போ⁴ஜனகாலோ ச. மஜ்ஜ²ன்ஹிகோ ஹோதீதி யோஜனா. தேனேவாதி போ⁴ஜனகாலஸ்ஸ அதி⁴ப்பேதத்தா ஏவ. அஸ்ஸாதி ‘‘விகாலே’’திபத³ஸ்ஸ. ‘‘விகாலோ நாம…பே॰… அருணுக்³க³மனா’’தி பத³பா⁴ஜனேன அருணுக்³க³மனதோ யாவ மஜ்ஜ²ன்ஹிகா காலோ நாமாதி அத்தோ² நயேன த³ஸ்ஸிதோ ஹோதி. ததோதி டி²தமஜ்ஜ²ன்ஹிகதோ. ஸூரியஸ்ஸ அதிஸீக⁴த்தா வேகே³ன டி²தமஜ்ஜ²ன்ஹிகங் வீதிவத்தெய்யாதி ஆஹ ‘‘குக்குச்சகேன பன ந கத்தப்³ப³’’ந்தி. காலத்த²ம்போ⁴தி காலஸ்ஸ ஜானநத்தா²ய தூ²ணோ. காலந்தரேதி காலஸ்ஸ அப்³ப⁴ந்தரே.
249. ‘‘Vikāle’’ti sāmaññena vuttepi visesakālova gahetabboti āha ‘‘kālo’’tiādi. So cāti bhojanakālo ca. Majjhanhiko hotīti yojanā. Tenevāti bhojanakālassa adhippetattā eva. Assāti ‘‘vikāle’’tipadassa. ‘‘Vikālo nāma…pe… aruṇuggamanā’’ti padabhājanena aruṇuggamanato yāva majjhanhikā kālo nāmāti attho nayena dassito hoti. Tatoti ṭhitamajjhanhikato. Sūriyassa atisīghattā vegena ṭhitamajjhanhikaṃ vītivatteyyāti āha ‘‘kukkuccakena pana na kattabba’’nti. Kālatthambhoti kālassa jānanatthāya thūṇo. Kālantareti kālassa abbhantare.
அவஸேஸங் கா²த³னீயங் நாமாதி எத்த² வினிச்ச²யோ ஏவங் வேதி³தப்³போ³தி யோஜனா. யந்தி கா²த³னீயங் அத்தீ²தி ஸம்ப³ந்தோ⁴. வனமூலாதி³பபே⁴த³ங் யம்பி கா²த³னீயங் அத்தி², தம்பி ஆமிஸக³திகங் ஹோதீதி யோஜனா. ஸெய்யதி²த³ந்தி புச்சா²வாசகனிபாதஸமுதா³யோ. இத³ங் கா²த³னீயங் ஸெய்யதா² கதமந்தி அத்தோ². இத³ம்பீதி இத³ங் த்³வாத³ஸவித⁴ம்பி. பிஸத்³தே³ன ந பூவாதி³யேவாதி த³ஸ்ஸேதி.
Avasesaṃ khādanīyaṃ nāmāti ettha vinicchayo evaṃ veditabboti yojanā. Yanti khādanīyaṃ atthīti sambandho. Vanamūlādipabhedaṃ yampi khādanīyaṃ atthi, tampi āmisagatikaṃ hotīti yojanā. Seyyathidanti pucchāvācakanipātasamudāyo. Idaṃ khādanīyaṃ seyyathā katamanti attho. Idampīti idaṃ dvādasavidhampi. Pisaddena na pūvādiyevāti dasseti.
தத்தா²தி த்³வாத³ஸஸு கா²த³னீயேஸு, ஆதா⁴ரே பு⁴ம்மங். மூலதி பதிட்டா²தி எத்த², ஏதேனாதி வா மூலங். கா²தி³தப்³ப³ந்தி கா²த³னீயங். மூலமேவ கா²த³னீயங் மூலகா²த³னீயங், தஸ்மிங் வினிச்ச²யோ ஏவங் வேதி³தப்³போ³தி யோஜனா. மூலகமூலாதீ³னி லோகஸங்கேதோ பதே³ஸதோயேவ வேதி³தப்³பா³னி. தங் தஞ்ஹி நாமங் அஜானந்தானங் அதிஸம்மூள்ஹகாரணத்தா ஸஹ பரியாயந்தரேன வசனத்த²ங் வக்கா²ம. ஸூபஸ்ஸ ஹிதங் ஸூபெய்யங், ஸூபெய்யங் பண்ணங் ஏதேஸந்தி ஸூபெய்யபண்ணா, தேஸங் மூலானி ஸூபெய்யபண்ணமூலானி. ஆமீயதி அந்தோ பவேஸீயதீதி ஆமிஸோ, ஆகாரோ அந்தோகரணத்தோ², ஆமிஸஸ்ஸ க³தி விய க³தி ஏதேஸந்தி ஆமிஸக³திகானி . எத்தா²தி மூலேஸு. ஜரட்³ட⁴ந்தி ஜரபூ⁴தங் உபட்³ட⁴ங். அஞ்ஞம்பீதி வஜகலிமூலதோ அஞ்ஞம்பி.
Tatthāti dvādasasu khādanīyesu, ādhāre bhummaṃ. Mūlati patiṭṭhāti ettha, etenāti vā mūlaṃ. Khāditabbanti khādanīyaṃ. Mūlameva khādanīyaṃ mūlakhādanīyaṃ, tasmiṃ vinicchayo evaṃ veditabboti yojanā. Mūlakamūlādīni lokasaṅketo padesatoyeva veditabbāni. Taṃ tañhi nāmaṃ ajānantānaṃ atisammūḷhakāraṇattā saha pariyāyantarena vacanatthaṃ vakkhāma. Sūpassa hitaṃ sūpeyyaṃ, sūpeyyaṃ paṇṇaṃ etesanti sūpeyyapaṇṇā, tesaṃ mūlāni sūpeyyapaṇṇamūlāni. Āmīyati anto pavesīyatīti āmiso, ākāro antokaraṇattho, āmisassa gati viya gati etesanti āmisagatikāni. Etthāti mūlesu. Jaraḍḍhanti jarabhūtaṃ upaḍḍhaṃ. Aññampīti vajakalimūlato aññampi.
யானி பன மூலானி வுத்தானி, தானி யாவஜீவிகானீதி யோஜனா. பாளியங் வுத்தானீதி ஸம்ப³ந்தோ⁴. கா²த³னீயத்த²ந்தி கா²த³னீயஸ்ஸ, கா²த³னீயே வா விஜ்ஜமானங், கா²த³னீயேன வா காதப்³ப³ங் கிச்சங், பயோஜனங் வாதி கா²த³னீயத்த²ங். ‘‘கா²த³னீயே’’திஇமினா ‘‘தத்த² வுத்தாபி⁴த⁴ம்மத்தா²’’திஆதீ³ஸு விய கா²த³னீயத்த²பத³ஸ்ஸ உத்தரபத³த்த²பதா⁴னபா⁴வங் த³ஸ்ஸேதி. தத்த² கா²த³னீயஸ்ஸ, கா²த³னீயே வா விஜ்ஜமானங், கா²த³னீயேன வா காதப்³ப³ங் கிச்சங் நாம ஜிக⁴ச்சா²ஹரணமேவ. யஞ்ஹி பூவாதி³கா²த³னீயங் கா²தி³த்வா ஜிக⁴ச்சா²ஹரணங் ஹோதி, தஸ்ஸ கிச்சங் கிச்சங் நாமாதி வுத்தங் ஹோதி. தங் கிச்சங், பயோஜனங் வா நேவ ப²ரந்தி, நேவ நிப்பா²தெ³ந்தி. ஏஸேவ நயோ ‘‘ந போ⁴ஜனீயே போ⁴ஜனீயத்த²ங் ப²ரந்தீ’’திஎத்தா²பி.
Yāni pana mūlāni vuttāni, tāni yāvajīvikānīti yojanā. Pāḷiyaṃ vuttānīti sambandho. Khādanīyatthanti khādanīyassa, khādanīye vā vijjamānaṃ, khādanīyena vā kātabbaṃ kiccaṃ, payojanaṃ vāti khādanīyatthaṃ. ‘‘Khādanīye’’tiiminā ‘‘tattha vuttābhidhammatthā’’tiādīsu viya khādanīyatthapadassa uttarapadatthapadhānabhāvaṃ dasseti. Tattha khādanīyassa, khādanīye vā vijjamānaṃ, khādanīyena vā kātabbaṃ kiccaṃ nāma jighacchāharaṇameva. Yañhi pūvādikhādanīyaṃ khāditvā jighacchāharaṇaṃ hoti, tassa kiccaṃ kiccaṃ nāmāti vuttaṃ hoti. Taṃ kiccaṃ, payojanaṃ vā neva pharanti, neva nipphādenti. Eseva nayo ‘‘na bhojanīye bhojanīyatthaṃ pharantī’’tietthāpi.
தேஸந்தி மூலானங் அந்தோ, லக்க²ணந்தி வா ஸம்ப³ந்தோ⁴. ஏகஸ்மிங் ஜனபதே³ கா²த³னீயத்த²போ⁴ஜனீயத்தே²ஸு ப²ரமானேஸு அஞ்ஞேஸுபி ஜனபதே³ஸு ப²ரந்தியேவாதி த³ஸ்ஸனத்த²ங் ‘‘தேஸு தேஸு ஜனபதே³ஸூ’’தி விச்சா²பத³ங் வுத்தங். கிஞ்சாபி ஹி ப³ஹூஸு ஜனபதே³ஸு பத²வீரஸஆபோரஸஸம்பத்திவஸேன கா²த³னீயத்த²போ⁴ஜனீயத்த²ங் ப²ரமானம்பி ஏகஸ்மிங் ஜனபதே³ பத²வீரஸஆபோரஸவிபத்திவஸேன அப²ரமானங் ப⁴வெய்ய, விகாரவஸேன பன தத்த² பவத்தத்தா தங் ஜனபத³ங் பமாணங் ந காதப்³ப³ங், க³ஹேதப்³ப³மேவாதி வுத்தங் ஹோதி. பகதிஆஹாரவஸேனாதி அஞ்ஞேஹி யாவகாலிக, ஸத்தாஹகாலிகேஹி அமிஸ்ஸிதங் அத்தனோ பகதியாவ ஆஹாரகிச்சகரணவஸேன. ‘‘மனுஸ்ஸான’’ந்திஇமினா அஞ்ஞேஸங் திரச்சா²னாதீ³னங் கா²த³னீயத்த²போ⁴ஜனீயத்த²ங் ப²ரமானம்பி ந பமாணந்தி த³ஸ்ஸேதி. தந்தி மூலங். ஹீதி ஸச்சங். நாமஸஞ்ஞாஸூதி நாமஸங்கா²தாஸு ஸஞ்ஞாஸு.
Tesanti mūlānaṃ anto, lakkhaṇanti vā sambandho. Ekasmiṃ janapade khādanīyatthabhojanīyatthesu pharamānesu aññesupi janapadesu pharantiyevāti dassanatthaṃ ‘‘tesu tesu janapadesū’’ti vicchāpadaṃ vuttaṃ. Kiñcāpi hi bahūsu janapadesu pathavīrasaāporasasampattivasena khādanīyatthabhojanīyatthaṃ pharamānampi ekasmiṃ janapade pathavīrasaāporasavipattivasena apharamānaṃ bhaveyya, vikāravasena pana tattha pavattattā taṃ janapadaṃ pamāṇaṃ na kātabbaṃ, gahetabbamevāti vuttaṃ hoti. Pakatiāhāravasenāti aññehi yāvakālika, sattāhakālikehi amissitaṃ attano pakatiyāva āhārakiccakaraṇavasena. ‘‘Manussāna’’ntiiminā aññesaṃ tiracchānādīnaṃ khādanīyatthabhojanīyatthaṃ pharamānampi na pamāṇanti dasseti. Tanti mūlaṃ. Hīti saccaṃ. Nāmasaññāsūti nāmasaṅkhātāsu saññāsu.
யதா² மூலே லக்க²ணங் த³ஸ்ஸிதங், ஏவங் கந்தா³தீ³ஸுபி யங் லக்க²ணங் த³ஸ்ஸிதந்தி யோஜனா. ந கேவலங் பாளியங் ஆக³தானங் ஹலித்³தா³தீ³னங் மூலங்யேவ யாவஜீவிகங் ஹோதி, அத² கோ² தசாத³யோபீதி ஆஹ ‘‘யஞ்சேத’’ந்திஆதி³. யங் ஏதங் அட்ட²வித⁴ந்தி ஸம்ப³ந்தோ⁴.
Yathā mūle lakkhaṇaṃ dassitaṃ, evaṃ kandādīsupi yaṃ lakkhaṇaṃ dassitanti yojanā. Na kevalaṃ pāḷiyaṃ āgatānaṃ haliddādīnaṃ mūlaṃyeva yāvajīvikaṃ hoti, atha kho tacādayopīti āha ‘‘yañceta’’ntiādi. Yaṃ etaṃ aṭṭhavidhanti sambandho.
ஏவங் மூலகா²த³னீயே வினிச்ச²யங் த³ஸ்ஸெத்வா இதா³னி கந்த³கா²த³னீயே தங் த³ஸ்ஸெந்தோ ஆஹ ‘‘கந்த³கா²த³னீயே’’திஆதி³. தத்த² கந்த³கா²த³னீயேதி கங் ஸுக²ங் த³தா³தீதி கந்தோ³, பது³மாதி³கந்தோ³, ஸுக²ஸ்ஸ அதா³யகா பன கந்தா³ ருள்ஹீவஸேன கந்தா³தி வுச்சந்தி, கந்தோ³ ஏவ கா²த³னீயங் கந்த³கா²த³னீயங், தஸ்மிங் வினிச்ச²யோ ஏவங் வேதி³தப்³போ³தி யோஜனா. ஏஸேவ நயோ உபரிபி. யந்தி கந்த³ங். இமினா தங்ஸத்³தா³னபெக்கோ² யங்ஸத்³தோ³பி அத்தீ²தி ஞாபேதி. தத்தா²தி கந்த³கா²த³னீயே. தருணோ, ஸுக²கா²த³னீயோதி விஸேஸனபதா³னி யதா²வசனங் உபரிபி யோஜேதப்³பா³னி. ஏவமாத³யோ ப²ரணககந்தா³ யாவகாலிகாதி ஸம்ப³ந்தோ⁴.
Evaṃ mūlakhādanīye vinicchayaṃ dassetvā idāni kandakhādanīye taṃ dassento āha ‘‘kandakhādanīye’’tiādi. Tattha kandakhādanīyeti kaṃ sukhaṃ dadātīti kando, padumādikando, sukhassa adāyakā pana kandā ruḷhīvasena kandāti vuccanti, kando eva khādanīyaṃ kandakhādanīyaṃ, tasmiṃ vinicchayo evaṃ veditabboti yojanā. Eseva nayo uparipi. Yanti kandaṃ. Iminā taṃsaddānapekkho yaṃsaddopi atthīti ñāpeti. Tatthāti kandakhādanīye. Taruṇo, sukhakhādanīyoti visesanapadāni yathāvacanaṃ uparipi yojetabbāni. Evamādayo pharaṇakakandā yāvakālikāti sambandho.
அதோ⁴தோதி விஸரஸோ உத³கேன அதூ⁴னிதோ. தேதி கந்தா³ ஸங்க³ஹிதாதி ஸம்ப³ந்தோ⁴.
Adhototi visaraso udakena adhūnito. Teti kandā saṅgahitāti sambandho.
மூலே அலதி பவத்ததீதி முளாலோ, உத³கதோ வா உத்³த⁴டமத்தே மிலதி நிமிலதீதி முளாலங். ஏவமாதி³ ப²ரணகமுளாலங் யாவகாலிகந்தி யோஜனா. தங் ஸப்³ப³ம்பீதி ஸப்³ப³ம்பி தங் முளாலங் ஸங்க³ஹிதந்தி ஸம்ப³ந்தோ⁴.
Mūle alati pavattatīti muḷālo, udakato vā uddhaṭamatte milati nimilatīti muḷālaṃ. Evamādi pharaṇakamuḷālaṃ yāvakālikanti yojanā. Taṃ sabbampīti sabbampi taṃ muḷālaṃ saṅgahitanti sambandho.
மஸதி விஜ்ஜ²தீதி மத்த²கோ. ஏவமாதி³ மத்த²கோ யாவகாலிகோதி யோஜனா. ஜரட்³ட⁴பு³ந்தோ³தி ஜரபூ⁴தஅட்³ட⁴ஸங்கா²தோ பாதோ³.
Masati vijjhatīti matthako. Evamādi matthako yāvakālikoti yojanā. Jaraḍḍhabundoti jarabhūtaaḍḍhasaṅkhāto pādo.
க²னீயதி அவதா³ரீயதீதி க²ந்தோ⁴, கா²யதீதி வா க²ந்தோ⁴. ‘‘அந்தோபத²வீக³தோ’’திபத³ங் ‘‘ஸாலகல்யாணிக²ந்தோ⁴’’திபதே³னேவ யோஜேதப்³ப³ங், ந அஞ்ஞேஹி. ஏவமாதி³ க²ந்தோ⁴ யாவகாலிகோதி யோஜனா. அவஸேஸாதி தீஹி த³ண்ட³காதீ³ஹி அவஸேஸா.
Khanīyati avadārīyatīti khandho, khāyatīti vā khandho. ‘‘Antopathavīgato’’tipadaṃ ‘‘sālakalyāṇikhandho’’tipadeneva yojetabbaṃ, na aññehi. Evamādi khandho yāvakālikoti yojanā. Avasesāti tīhi daṇḍakādīhi avasesā.
தசதி ஸங்வரதி படிச்சா²தே³தீதி தசோ. ஸரஸோதி எத்த² ஏவகாரோ யோஜேதப்³போ³, ஸரஸோ ஏவாதி அத்தோ². தேஸங் ஸங்க³ஹோதி ஸம்ப³ந்தோ⁴. ஹீதி ஸச்சங். ஏதந்தி கஸாவபே⁴ஸஜ்ஜங், ‘‘அனுஜானாமி …பே॰… போ⁴ஜனீயத்த²’’ந்தி வசனங் வா. எத்தா²தி கஸாவபே⁴ஸஜ்ஜே. ஏதேஸம்பீதி மத்த²கக²ந்த⁴த்தசானம்பி.
Tacati saṃvarati paṭicchādetīti taco. Sarasoti ettha evakāro yojetabbo, saraso evāti attho. Tesaṃ saṅgahoti sambandho. Hīti saccaṃ. Etanti kasāvabhesajjaṃ, ‘‘anujānāmi …pe… bhojanīyattha’’nti vacanaṃ vā. Etthāti kasāvabhesajje. Etesampīti matthakakhandhattacānampi.
பததீதி பத்தங். ஏதேஸந்தி மூலகாதீ³னங். ஏவரூபானி பத்தானி ச ஏகங்ஸேன யாவகாலிகானீதி யோஜனா. யா லோணீ ஆரோஹதி, தஸ்ஸா லோணியா பத்தங் யாவஜீவிகந்தி யோஜனா. தீ³பவாஸினோதி தம்ப³பண்ணிதீ³பவாஸினோ , ஜம்பு³தீ³பவாஸினோ வா. யானி வா ப²ரந்தீதி வுத்தானீதி ஸம்ப³ந்தோ⁴. தேஸந்தி நிம்பா³தீ³னங். இத³ங் பத³ங் புப்³ப³பராபெக்க²கங், தஸ்மா த்³வின்னங் மஜ்ஜே² வுத்தந்தி த³ட்ட²ப்³ப³ங். பண்ணானங் அந்தோ நத்தீ²தி ஸம்ப³ந்தோ⁴.
Patatīti pattaṃ. Etesanti mūlakādīnaṃ. Evarūpāni pattāni ca ekaṃsena yāvakālikānīti yojanā. Yā loṇī ārohati, tassā loṇiyā pattaṃ yāvajīvikanti yojanā. Dīpavāsinoti tambapaṇṇidīpavāsino , jambudīpavāsino vā. Yāni vā pharantīti vuttānīti sambandho. Tesanti nimbādīnaṃ. Idaṃ padaṃ pubbaparāpekkhakaṃ, tasmā dvinnaṃ majjhe vuttanti daṭṭhabbaṃ. Paṇṇānaṃ anto natthīti sambandho.
புப்ப²தி விகஸதீதி புப்ப²ங். ஏவமாதி³ புப்ப²ங் யாவகாலிகந்தி யோஜனா. தஸ்ஸாதி புப்ப²ஸ்ஸ. அஸ்ஸாதி ஏவமேவ.
Pupphati vikasatīti pupphaṃ. Evamādi pupphaṃ yāvakālikanti yojanā. Tassāti pupphassa. Assāti evameva.
ப²லதீதி ப²லங். யானீதி ப²லானி. ப²ரந்தீதி ஸம்ப³ந்தோ⁴. நேஸந்தி ப²லானங் பரியந்தந்தி ஸம்ப³ந்தோ⁴. யானி வுத்தானி, தானி யாவஜீவிகானீதி யோஜனா. தேஸம்பீதி ப²லானம்பி பரியந்தந்தி ஸம்ப³ந்தோ⁴.
Phalatīti phalaṃ. Yānīti phalāni. Pharantīti sambandho. Nesanti phalānaṃ pariyantanti sambandho. Yāni vuttāni, tāni yāvajīvikānīti yojanā. Tesampīti phalānampi pariyantanti sambandho.
அஸீயதி கி²பீயதி, ச²ட்³டீ³யதீதி வா அட்டி². ஏவமாதீ³னி ப²ரணகானி அட்டீ²னி யாவகாலிகானீதி யோஜனா. தேஸந்தி அட்டீ²னங்.
Asīyati khipīyati, chaḍḍīyatīti vā aṭṭhi. Evamādīni pharaṇakāni aṭṭhīni yāvakālikānīti yojanā. Tesanti aṭṭhīnaṃ.
பிஸீயதி சுண்ணங் கரீயதீதி பிட்ட²ங். ஏவமாதீ³னி ப²ரணகானி பிட்டா²னி யாவகாலிகானீதி யோஜனா. அதோ⁴தகந்தி உத³கேன அதூ⁴னிதங். தேஸந்தி பிட்டா²னங்.
Pisīyati cuṇṇaṃ karīyatīti piṭṭhaṃ. Evamādīni pharaṇakāni piṭṭhāni yāvakālikānīti yojanā. Adhotakanti udakena adhūnitaṃ. Tesanti piṭṭhānaṃ.
நிரந்தரங் அஸதி ஸம்ப³ஜ்ஜ²தீதி நிய்யாஸோ. ஸேஸாதி உச்சு²னிய்யாஸதோ ஸேஸா. பாளியங் வுத்தனிய்யாஸாதி ஸம்ப³ந்தோ⁴. தத்தா²தி நிய்யாஸகா²த³னீயே. ஸங்க³ஹிதானங் நிய்யாஸானங் பரியந்தந்தி யோஜனா. ஏவந்திஆதி³ நிக³மனங்.
Nirantaraṃ asati sambajjhatīti niyyāso. Sesāti ucchuniyyāsato sesā. Pāḷiyaṃ vuttaniyyāsāti sambandho. Tatthāti niyyāsakhādanīye. Saṅgahitānaṃ niyyāsānaṃ pariyantanti yojanā. Evantiādi nigamanaṃ.
வுத்தமேவாதி ஹெட்டா² பட²மபவாரணஸிக்கா²பதே³ வுத்தமேவாதி. ஸத்தமங்.
Vuttamevāti heṭṭhā paṭhamapavāraṇasikkhāpade vuttamevāti. Sattamaṃ.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 4. போ⁴ஜனவக்³கோ³ • 4. Bhojanavaggo
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 7. விகாலபோ⁴ஜனஸிக்கா²பத³வண்ணனா • 7. Vikālabhojanasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 7. விகாலபோ⁴ஜனஸிக்கா²பத³வண்ணனா • 7. Vikālabhojanasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 7. விகாலபோ⁴ஜனஸிக்கா²பத³வண்ணனா • 7. Vikālabhojanasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 7. விகாலபோ⁴ஜனஸிக்கா²பத³வண்ணனா • 7. Vikālabhojanasikkhāpadavaṇṇanā
