| Library / Tipiṭaka / ติปิฎก • Tipiṭaka / ปาจิตฺยาทิโยชนาปาฬิ • Pācityādiyojanāpāḷi |
๗. วิกาลโภชนสิกฺขาปทํ
7. Vikālabhojanasikkhāpadaṃ
๒๔๗. สตฺตเม คิริมฺหีติ ปพฺพตมฺหิฯ โส หิ หิมวมนาทิวเสน ชลํ, สารภูตานิ จ เภสชฺชาทิวตฺถูนิ คิรติ นิคฺคิรตีติ คิรีติ วุจฺจติฯ อคฺคสมโชฺชติ อุตฺตมสมโชฺชฯ อิเมหิ ปเทหิ อโคฺค สมโชฺช อคฺคสมโชฺช, คิริมฺหิ ปวโตฺต อคฺคสมโชฺช คิรคฺคสมโชฺชติ อตฺถํ ทเสฺสติฯ สมโชฺชติ จ สภาฯ สา หิ สมาคมํ อชนฺติ คจฺฉนฺติ ชนา เอตฺถาติ สมโชฺชติ วุจฺจติฯ ‘‘คิริสฺส วา’’ติอาทินา คิริสฺส อโคฺค โกฎิ คิรโคฺค, ตสฺมิํ ปวโตฺต สมโชฺช คิรคฺคสมโชฺชติ อโตฺถ ทสฺสิโตฯ โสติ คิรคฺคสมโชฺชฯ ภวิสฺสติ กิราติ โยชนาฯ ภูมิภาเคติ อวยวิอาธาโร, สนฺนิปตตีติ สมฺพโนฺธฯ นฎญฺจ นาฎกญฺจ นฎนาฎกานิฯ ‘‘นจฺจํ คีตํ วาทิตญฺจา’’ติ อิทํ ตยํ ‘‘นาฎก’’นฺติ วุจฺจติฯ เตสนฺติ นฎนาฎกานํฯ ทสฺสนตฺถนฺติ ทสฺสนาย จ สวนาย จฯ สวนมฺปิ หิ ทสฺสเนเนว สงฺคหิตํฯ อปญฺญเตฺต สิกฺขาปเทติ อูนวีสติวสฺสสิกฺขาปทสฺส ตาว อปญฺญตฺตตฺตาฯ เตติ สตฺตรสวคฺคิยาฯ ตตฺถาติ คิรคฺคสมชฺชํฯ อถาติ ตสฺมิํ กาเลฯ เนสนฺติ สตฺตรสวคฺคิยานํ อทํสูติ สมฺพโนฺธฯ วิลิเมฺปตฺวาติ วิเลปเนหิ วิวิธากาเรน ลิเมฺปตฺวาฯ
247. Sattame girimhīti pabbatamhi. So hi himavamanādivasena jalaṃ, sārabhūtāni ca bhesajjādivatthūni girati niggiratīti girīti vuccati. Aggasamajjoti uttamasamajjo. Imehi padehi aggo samajjo aggasamajjo, girimhi pavatto aggasamajjo giraggasamajjoti atthaṃ dasseti. Samajjoti ca sabhā. Sā hi samāgamaṃ ajanti gacchanti janā etthāti samajjoti vuccati. ‘‘Girissa vā’’tiādinā girissa aggo koṭi giraggo, tasmiṃ pavatto samajjo giraggasamajjoti attho dassito. Soti giraggasamajjo. Bhavissati kirāti yojanā. Bhūmibhāgeti avayaviādhāro, sannipatatīti sambandho. Naṭañca nāṭakañca naṭanāṭakāni. ‘‘Naccaṃ gītaṃ vāditañcā’’ti idaṃ tayaṃ ‘‘nāṭaka’’nti vuccati. Tesanti naṭanāṭakānaṃ. Dassanatthanti dassanāya ca savanāya ca. Savanampi hi dassaneneva saṅgahitaṃ. Apaññattesikkhāpadeti ūnavīsativassasikkhāpadassa tāva apaññattattā. Teti sattarasavaggiyā. Tatthāti giraggasamajjaṃ. Athāti tasmiṃ kāle. Nesanti sattarasavaggiyānaṃ adaṃsūti sambandho. Vilimpetvāti vilepanehi vividhākārena limpetvā.
๒๔๙. ‘‘วิกาเล’’ติ สามเญฺญน วุเตฺตปิ วิเสสกาโลว คเหตโพฺพติ อาห ‘‘กาโล’’ติอาทิฯ โส จาติ โภชนกาโล จฯ มชฺฌนฺหิโก โหตีติ โยชนาฯ เตเนวาติ โภชนกาลสฺส อธิเปฺปตตฺตา เอวฯ อสฺสาติ ‘‘วิกาเล’’ติปทสฺสฯ ‘‘วิกาโล นาม…เป.… อรุณุคฺคมนา’’ติ ปทภาชเนน อรุณุคฺคมนโต ยาว มชฺฌนฺหิกา กาโล นามาติ อโตฺถ นเยน ทสฺสิโต โหติฯ ตโตติ ฐิตมชฺฌนฺหิกโตฯ สูริยสฺส อติสีฆตฺตา เวเคน ฐิตมชฺฌนฺหิกํ วีติวเตฺตยฺยาติ อาห ‘‘กุกฺกุจฺจเกน ปน น กตฺตพฺพ’’นฺติฯ กาลตฺถโมฺภติ กาลสฺส ชานนตฺถาย ถูโณฯ กาลนฺตเรติ กาลสฺส อพฺภนฺตเรฯ
249. ‘‘Vikāle’’ti sāmaññena vuttepi visesakālova gahetabboti āha ‘‘kālo’’tiādi. So cāti bhojanakālo ca. Majjhanhiko hotīti yojanā. Tenevāti bhojanakālassa adhippetattā eva. Assāti ‘‘vikāle’’tipadassa. ‘‘Vikālo nāma…pe… aruṇuggamanā’’ti padabhājanena aruṇuggamanato yāva majjhanhikā kālo nāmāti attho nayena dassito hoti. Tatoti ṭhitamajjhanhikato. Sūriyassa atisīghattā vegena ṭhitamajjhanhikaṃ vītivatteyyāti āha ‘‘kukkuccakena pana na kattabba’’nti. Kālatthambhoti kālassa jānanatthāya thūṇo. Kālantareti kālassa abbhantare.
อวเสสํ ขาทนียํ นามาติ เอตฺถ วินิจฺฉโย เอวํ เวทิตโพฺพติ โยชนาฯ ยนฺติ ขาทนียํ อตฺถีติ สมฺพโนฺธฯ วนมูลาทิปเภทํ ยมฺปิ ขาทนียํ อตฺถิ, ตมฺปิ อามิสคติกํ โหตีติ โยชนาฯ เสยฺยถิทนฺติ ปุจฺฉาวาจกนิปาตสมุทาโยฯ อิทํ ขาทนียํ เสยฺยถา กตมนฺติ อโตฺถฯ อิทมฺปีติ อิทํ ทฺวาทสวิธมฺปิฯ ปิสเทฺทน น ปูวาทิเยวาติ ทเสฺสติฯ
Avasesaṃ khādanīyaṃ nāmāti ettha vinicchayo evaṃ veditabboti yojanā. Yanti khādanīyaṃ atthīti sambandho. Vanamūlādipabhedaṃ yampi khādanīyaṃ atthi, tampi āmisagatikaṃ hotīti yojanā. Seyyathidanti pucchāvācakanipātasamudāyo. Idaṃ khādanīyaṃ seyyathā katamanti attho. Idampīti idaṃ dvādasavidhampi. Pisaddena na pūvādiyevāti dasseti.
ตตฺถาติ ทฺวาทสสุ ขาทนีเยสุ, อาธาเร ภุมฺมํฯ มูลติ ปติฎฺฐาติ เอตฺถ, เอเตนาติ วา มูลํฯ ขาทิตพฺพนฺติ ขาทนียํฯ มูลเมว ขาทนียํ มูลขาทนียํ, ตสฺมิํ วินิจฺฉโย เอวํ เวทิตโพฺพติ โยชนาฯ มูลกมูลาทีนิ โลกสเงฺกโต ปเทสโตเยว เวทิตพฺพานิฯ ตํ ตญฺหิ นามํ อชานนฺตานํ อติสมฺมูฬฺหการณตฺตา สห ปริยายนฺตเรน วจนตฺถํ วกฺขามฯ สูปสฺส หิตํ สูเปยฺยํ, สูเปยฺยํ ปณฺณํ เอเตสนฺติ สูเปยฺยปณฺณา, เตสํ มูลานิ สูเปยฺยปณฺณมูลานิฯ อามียติ อโนฺต ปเวสียตีติ อามิโส, อากาโร อโนฺตกรณโตฺถ, อามิสสฺส คติ วิย คติ เอเตสนฺติ อามิสคติกานิ ฯ เอตฺถาติ มูเลสุฯ ชรฑฺฒนฺติ ชรภูตํ อุปฑฺฒํฯ อญฺญมฺปีติ วชกลิมูลโต อญฺญมฺปิฯ
Tatthāti dvādasasu khādanīyesu, ādhāre bhummaṃ. Mūlati patiṭṭhāti ettha, etenāti vā mūlaṃ. Khāditabbanti khādanīyaṃ. Mūlameva khādanīyaṃ mūlakhādanīyaṃ, tasmiṃ vinicchayo evaṃ veditabboti yojanā. Mūlakamūlādīni lokasaṅketo padesatoyeva veditabbāni. Taṃ tañhi nāmaṃ ajānantānaṃ atisammūḷhakāraṇattā saha pariyāyantarena vacanatthaṃ vakkhāma. Sūpassa hitaṃ sūpeyyaṃ, sūpeyyaṃ paṇṇaṃ etesanti sūpeyyapaṇṇā, tesaṃ mūlāni sūpeyyapaṇṇamūlāni. Āmīyati anto pavesīyatīti āmiso, ākāro antokaraṇattho, āmisassa gati viya gati etesanti āmisagatikāni. Etthāti mūlesu. Jaraḍḍhanti jarabhūtaṃ upaḍḍhaṃ. Aññampīti vajakalimūlato aññampi.
ยานิ ปน มูลานิ วุตฺตานิ, ตานิ ยาวชีวิกานีติ โยชนาฯ ปาฬิยํ วุตฺตานีติ สมฺพโนฺธฯ ขาทนียตฺถนฺติ ขาทนียสฺส, ขาทนีเย วา วิชฺชมานํ, ขาทนีเยน วา กาตพฺพํ กิจฺจํ, ปโยชนํ วาติ ขาทนียตฺถํฯ ‘‘ขาทนีเย’’ติอิมินา ‘‘ตตฺถ วุตฺตาภิธมฺมตฺถา’’ติอาทีสุ วิย ขาทนียตฺถปทสฺส อุตฺตรปทตฺถปธานภาวํ ทเสฺสติฯ ตตฺถ ขาทนียสฺส, ขาทนีเย วา วิชฺชมานํ, ขาทนีเยน วา กาตพฺพํ กิจฺจํ นาม ชิฆจฺฉาหรณเมวฯ ยญฺหิ ปูวาทิขาทนียํ ขาทิตฺวา ชิฆจฺฉาหรณํ โหติ, ตสฺส กิจฺจํ กิจฺจํ นามาติ วุตฺตํ โหติฯ ตํ กิจฺจํ, ปโยชนํ วา เนว ผรนฺติ, เนว นิปฺผาเทนฺติฯ เอเสว นโย ‘‘น โภชนีเย โภชนียตฺถํ ผรนฺตี’’ติเอตฺถาปิฯ
Yāni pana mūlāni vuttāni, tāni yāvajīvikānīti yojanā. Pāḷiyaṃ vuttānīti sambandho. Khādanīyatthanti khādanīyassa, khādanīye vā vijjamānaṃ, khādanīyena vā kātabbaṃ kiccaṃ, payojanaṃ vāti khādanīyatthaṃ. ‘‘Khādanīye’’tiiminā ‘‘tattha vuttābhidhammatthā’’tiādīsu viya khādanīyatthapadassa uttarapadatthapadhānabhāvaṃ dasseti. Tattha khādanīyassa, khādanīye vā vijjamānaṃ, khādanīyena vā kātabbaṃ kiccaṃ nāma jighacchāharaṇameva. Yañhi pūvādikhādanīyaṃ khāditvā jighacchāharaṇaṃ hoti, tassa kiccaṃ kiccaṃ nāmāti vuttaṃ hoti. Taṃ kiccaṃ, payojanaṃ vā neva pharanti, neva nipphādenti. Eseva nayo ‘‘na bhojanīye bhojanīyatthaṃ pharantī’’tietthāpi.
เตสนฺติ มูลานํ อโนฺต, ลกฺขณนฺติ วา สมฺพโนฺธฯ เอกสฺมิํ ชนปเท ขาทนียตฺถโภชนียเตฺถสุ ผรมาเนสุ อเญฺญสุปิ ชนปเทสุ ผรนฺติเยวาติ ทสฺสนตฺถํ ‘‘เตสุ เตสุ ชนปเทสู’’ติ วิจฺฉาปทํ วุตฺตํฯ กิญฺจาปิ หิ พหูสุ ชนปเทสุ ปถวีรสอาโปรสสมฺปตฺติวเสน ขาทนียตฺถโภชนียตฺถํ ผรมานมฺปิ เอกสฺมิํ ชนปเท ปถวีรสอาโปรสวิปตฺติวเสน อผรมานํ ภเวยฺย, วิการวเสน ปน ตตฺถ ปวตฺตตฺตา ตํ ชนปทํ ปมาณํ น กาตพฺพํ, คเหตพฺพเมวาติ วุตฺตํ โหติฯ ปกติอาหารวเสนาติ อเญฺญหิ ยาวกาลิก, สตฺตาหกาลิเกหิ อมิสฺสิตํ อตฺตโน ปกติยาว อาหารกิจฺจกรณวเสนฯ ‘‘มนุสฺสาน’’นฺติอิมินา อเญฺญสํ ติรจฺฉานาทีนํ ขาทนียตฺถโภชนียตฺถํ ผรมานมฺปิ น ปมาณนฺติ ทเสฺสติฯ ตนฺติ มูลํฯ หีติ สจฺจํฯ นามสญฺญาสูติ นามสงฺขาตาสุ สญฺญาสุฯ
Tesanti mūlānaṃ anto, lakkhaṇanti vā sambandho. Ekasmiṃ janapade khādanīyatthabhojanīyatthesu pharamānesu aññesupi janapadesu pharantiyevāti dassanatthaṃ ‘‘tesu tesu janapadesū’’ti vicchāpadaṃ vuttaṃ. Kiñcāpi hi bahūsu janapadesu pathavīrasaāporasasampattivasena khādanīyatthabhojanīyatthaṃ pharamānampi ekasmiṃ janapade pathavīrasaāporasavipattivasena apharamānaṃ bhaveyya, vikāravasena pana tattha pavattattā taṃ janapadaṃ pamāṇaṃ na kātabbaṃ, gahetabbamevāti vuttaṃ hoti. Pakatiāhāravasenāti aññehi yāvakālika, sattāhakālikehi amissitaṃ attano pakatiyāva āhārakiccakaraṇavasena. ‘‘Manussāna’’ntiiminā aññesaṃ tiracchānādīnaṃ khādanīyatthabhojanīyatthaṃ pharamānampi na pamāṇanti dasseti. Tanti mūlaṃ. Hīti saccaṃ. Nāmasaññāsūti nāmasaṅkhātāsu saññāsu.
ยถา มูเล ลกฺขณํ ทสฺสิตํ, เอวํ กนฺทาทีสุปิ ยํ ลกฺขณํ ทสฺสิตนฺติ โยชนาฯ น เกวลํ ปาฬิยํ อาคตานํ หลิทฺทาทีนํ มูลํเยว ยาวชีวิกํ โหติ, อถ โข ตจาทโยปีติ อาห ‘‘ยเญฺจต’’นฺติอาทิฯ ยํ เอตํ อฎฺฐวิธนฺติ สมฺพโนฺธฯ
Yathā mūle lakkhaṇaṃ dassitaṃ, evaṃ kandādīsupi yaṃ lakkhaṇaṃ dassitanti yojanā. Na kevalaṃ pāḷiyaṃ āgatānaṃ haliddādīnaṃ mūlaṃyeva yāvajīvikaṃ hoti, atha kho tacādayopīti āha ‘‘yañceta’’ntiādi. Yaṃ etaṃ aṭṭhavidhanti sambandho.
เอวํ มูลขาทนีเย วินิจฺฉยํ ทเสฺสตฺวา อิทานิ กนฺทขาทนีเย ตํ ทเสฺสโนฺต อาห ‘‘กนฺทขาทนีเย’’ติอาทิฯ ตตฺถ กนฺทขาทนีเยติ กํ สุขํ ททาตีติ กโนฺท, ปทุมาทิกโนฺท, สุขสฺส อทายกา ปน กนฺทา รุฬฺหีวเสน กนฺทาติ วุจฺจนฺติ, กโนฺท เอว ขาทนียํ กนฺทขาทนียํ, ตสฺมิํ วินิจฺฉโย เอวํ เวทิตโพฺพติ โยชนาฯ เอเสว นโย อุปริปิฯ ยนฺติ กนฺทํฯ อิมินา ตํสทฺทานเปโกฺข ยํสโทฺทปิ อตฺถีติ ญาเปติฯ ตตฺถาติ กนฺทขาทนีเยฯ ตรุโณ, สุขขาทนีโยติ วิเสสนปทานิ ยถาวจนํ อุปริปิ โยเชตพฺพานิฯ เอวมาทโย ผรณกกนฺทา ยาวกาลิกาติ สมฺพโนฺธฯ
Evaṃ mūlakhādanīye vinicchayaṃ dassetvā idāni kandakhādanīye taṃ dassento āha ‘‘kandakhādanīye’’tiādi. Tattha kandakhādanīyeti kaṃ sukhaṃ dadātīti kando, padumādikando, sukhassa adāyakā pana kandā ruḷhīvasena kandāti vuccanti, kando eva khādanīyaṃ kandakhādanīyaṃ, tasmiṃ vinicchayo evaṃ veditabboti yojanā. Eseva nayo uparipi. Yanti kandaṃ. Iminā taṃsaddānapekkho yaṃsaddopi atthīti ñāpeti. Tatthāti kandakhādanīye. Taruṇo, sukhakhādanīyoti visesanapadāni yathāvacanaṃ uparipi yojetabbāni. Evamādayo pharaṇakakandā yāvakālikāti sambandho.
อโธโตติ วิสรโส อุทเกน อธูนิโตฯ เตติ กนฺทา สงฺคหิตาติ สมฺพโนฺธฯ
Adhototi visaraso udakena adhūnito. Teti kandā saṅgahitāti sambandho.
มูเล อลติ ปวตฺตตีติ มุฬาโล, อุทกโต วา อุทฺธฎมเตฺต มิลติ นิมิลตีติ มุฬาลํฯ เอวมาทิ ผรณกมุฬาลํ ยาวกาลิกนฺติ โยชนาฯ ตํ สพฺพมฺปีติ สพฺพมฺปิ ตํ มุฬาลํ สงฺคหิตนฺติ สมฺพโนฺธฯ
Mūle alati pavattatīti muḷālo, udakato vā uddhaṭamatte milati nimilatīti muḷālaṃ. Evamādi pharaṇakamuḷālaṃ yāvakālikanti yojanā. Taṃ sabbampīti sabbampi taṃ muḷālaṃ saṅgahitanti sambandho.
มสติ วิชฺฌตีติ มตฺถโกฯ เอวมาทิ มตฺถโก ยาวกาลิโกติ โยชนาฯ ชรฑฺฒพุโนฺทติ ชรภูตอฑฺฒสงฺขาโต ปาโทฯ
Masati vijjhatīti matthako. Evamādi matthako yāvakālikoti yojanā. Jaraḍḍhabundoti jarabhūtaaḍḍhasaṅkhāto pādo.
ขนียติ อวทารียตีติ ขโนฺธ, ขายตีติ วา ขโนฺธฯ ‘‘อโนฺตปถวีคโต’’ติปทํ ‘‘สาลกลฺยาณิขโนฺธ’’ติปเทเนว โยเชตพฺพํ, น อเญฺญหิฯ เอวมาทิ ขโนฺธ ยาวกาลิโกติ โยชนาฯ อวเสสาติ ตีหิ ทณฺฑกาทีหิ อวเสสาฯ
Khanīyati avadārīyatīti khandho, khāyatīti vā khandho. ‘‘Antopathavīgato’’tipadaṃ ‘‘sālakalyāṇikhandho’’tipadeneva yojetabbaṃ, na aññehi. Evamādi khandho yāvakālikoti yojanā. Avasesāti tīhi daṇḍakādīhi avasesā.
ตจติ สํวรติ ปฎิจฺฉาเทตีติ ตโจฯ สรโสติ เอตฺถ เอวกาโร โยเชตโพฺพ, สรโส เอวาติ อโตฺถฯ เตสํ สงฺคโหติ สมฺพโนฺธฯ หีติ สจฺจํฯ เอตนฺติ กสาวเภสชฺชํ, ‘‘อนุชานามิ …เป.… โภชนียตฺถ’’นฺติ วจนํ วาฯ เอตฺถาติ กสาวเภสเชฺชฯ เอเตสมฺปีติ มตฺถกขนฺธตฺตจานมฺปิฯ
Tacati saṃvarati paṭicchādetīti taco. Sarasoti ettha evakāro yojetabbo, saraso evāti attho. Tesaṃ saṅgahoti sambandho. Hīti saccaṃ. Etanti kasāvabhesajjaṃ, ‘‘anujānāmi …pe… bhojanīyattha’’nti vacanaṃ vā. Etthāti kasāvabhesajje. Etesampīti matthakakhandhattacānampi.
ปตตีติ ปตฺตํฯ เอเตสนฺติ มูลกาทีนํฯ เอวรูปานิ ปตฺตานิ จ เอกํเสน ยาวกาลิกานีติ โยชนาฯ ยา โลณี อาโรหติ, ตสฺสา โลณิยา ปตฺตํ ยาวชีวิกนฺติ โยชนาฯ ทีปวาสิโนติ ตมฺพปณฺณิทีปวาสิโน , ชมฺพุทีปวาสิโน วาฯ ยานิ วา ผรนฺตีติ วุตฺตานีติ สมฺพโนฺธฯ เตสนฺติ นิมฺพาทีนํฯ อิทํ ปทํ ปุพฺพปราเปกฺขกํ, ตสฺมา ทฺวินฺนํ มเชฺฌ วุตฺตนฺติ ทฎฺฐพฺพํฯ ปณฺณานํ อโนฺต นตฺถีติ สมฺพโนฺธฯ
Patatīti pattaṃ. Etesanti mūlakādīnaṃ. Evarūpāni pattāni ca ekaṃsena yāvakālikānīti yojanā. Yā loṇī ārohati, tassā loṇiyā pattaṃ yāvajīvikanti yojanā. Dīpavāsinoti tambapaṇṇidīpavāsino , jambudīpavāsino vā. Yāni vā pharantīti vuttānīti sambandho. Tesanti nimbādīnaṃ. Idaṃ padaṃ pubbaparāpekkhakaṃ, tasmā dvinnaṃ majjhe vuttanti daṭṭhabbaṃ. Paṇṇānaṃ anto natthīti sambandho.
ปุปฺผติ วิกสตีติ ปุปฺผํฯ เอวมาทิ ปุปฺผํ ยาวกาลิกนฺติ โยชนาฯ ตสฺสาติ ปุปฺผสฺสฯ อสฺสาติ เอวเมวฯ
Pupphati vikasatīti pupphaṃ. Evamādi pupphaṃ yāvakālikanti yojanā. Tassāti pupphassa. Assāti evameva.
ผลตีติ ผลํฯ ยานีติ ผลานิฯ ผรนฺตีติ สมฺพโนฺธฯ เนสนฺติ ผลานํ ปริยนฺตนฺติ สมฺพโนฺธฯ ยานิ วุตฺตานิ, ตานิ ยาวชีวิกานีติ โยชนาฯ เตสมฺปีติ ผลานมฺปิ ปริยนฺตนฺติ สมฺพโนฺธฯ
Phalatīti phalaṃ. Yānīti phalāni. Pharantīti sambandho. Nesanti phalānaṃ pariyantanti sambandho. Yāni vuttāni, tāni yāvajīvikānīti yojanā. Tesampīti phalānampi pariyantanti sambandho.
อสียติ ขิปียติ, ฉฑฺฑียตีติ วา อฎฺฐิฯ เอวมาทีนิ ผรณกานิ อฎฺฐีนิ ยาวกาลิกานีติ โยชนาฯ เตสนฺติ อฎฺฐีนํฯ
Asīyati khipīyati, chaḍḍīyatīti vā aṭṭhi. Evamādīni pharaṇakāni aṭṭhīni yāvakālikānīti yojanā. Tesanti aṭṭhīnaṃ.
ปิสียติ จุณฺณํ กรียตีติ ปิฎฺฐํฯ เอวมาทีนิ ผรณกานิ ปิฎฺฐานิ ยาวกาลิกานีติ โยชนาฯ อโธตกนฺติ อุทเกน อธูนิตํฯ เตสนฺติ ปิฎฺฐานํฯ
Pisīyati cuṇṇaṃ karīyatīti piṭṭhaṃ. Evamādīni pharaṇakāni piṭṭhāni yāvakālikānīti yojanā. Adhotakanti udakena adhūnitaṃ. Tesanti piṭṭhānaṃ.
นิรนฺตรํ อสติ สมฺพชฺฌตีติ นิยฺยาโสฯ เสสาติ อุจฺฉุนิยฺยาสโต เสสาฯ ปาฬิยํ วุตฺตนิยฺยาสาติ สมฺพโนฺธฯ ตตฺถาติ นิยฺยาสขาทนีเยฯ สงฺคหิตานํ นิยฺยาสานํ ปริยนฺตนฺติ โยชนาฯ เอวนฺติอาทิ นิคมนํฯ
Nirantaraṃ asati sambajjhatīti niyyāso. Sesāti ucchuniyyāsato sesā. Pāḷiyaṃ vuttaniyyāsāti sambandho. Tatthāti niyyāsakhādanīye. Saṅgahitānaṃ niyyāsānaṃ pariyantanti yojanā. Evantiādi nigamanaṃ.
วุตฺตเมวาติ เหฎฺฐา ปฐมปวารณสิกฺขาปเท วุตฺตเมวาติฯ สตฺตมํฯ
Vuttamevāti heṭṭhā paṭhamapavāraṇasikkhāpade vuttamevāti. Sattamaṃ.
Related texts:
ติปิฎก (มูล) • Tipiṭaka (Mūla) / วินยปิฎก • Vinayapiṭaka / มหาวิภงฺค • Mahāvibhaṅga / ๔. โภชนวโคฺค • 4. Bhojanavaggo
อฎฺฐกถา • Aṭṭhakathā / วินยปิฎก (อฎฺฐกถา) • Vinayapiṭaka (aṭṭhakathā) / มหาวิภงฺค-อฎฺฐกถา • Mahāvibhaṅga-aṭṭhakathā / ๗. วิกาลโภชนสิกฺขาปทวณฺณนา • 7. Vikālabhojanasikkhāpadavaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / สารตฺถทีปนี-ฎีกา • Sāratthadīpanī-ṭīkā / ๗. วิกาลโภชนสิกฺขาปทวณฺณนา • 7. Vikālabhojanasikkhāpadavaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / วชิรพุทฺธิ-ฎีกา • Vajirabuddhi-ṭīkā / ๗. วิกาลโภชนสิกฺขาปทวณฺณนา • 7. Vikālabhojanasikkhāpadavaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / วิมติวิโนทนี-ฎีกา • Vimativinodanī-ṭīkā / ๗. วิกาลโภชนสิกฺขาปทวณฺณนา • 7. Vikālabhojanasikkhāpadavaṇṇanā
