| Library / Tipiṭaka / திபிடக • Tipiṭaka / கங்கா²விதரணீ-அபி⁴னவ-டீகா • Kaṅkhāvitaraṇī-abhinava-ṭīkā |
7. விகாலபோ⁴ஜனஸிக்கா²பத³வண்ணனா
7. Vikālabhojanasikkhāpadavaṇṇanā
விகாலேதி எத்த² அருணுக்³க³மனதோ பட்டா²ய யாவ மஜ்ஜ²ன்ஹிகோ, அயங் பு³த்³தா⁴தீ³னங் அரியானங் ஆசிண்ணஸமாசிண்ணோ போ⁴ஜனஸ்ஸ காலோ நாம. தத³ஞ்ஞோ விகாலோ ‘‘விக³தோ காலோ’’தி கத்வா. தேனாஹ ‘‘விக³தே காலே’’திஆதி³. டி²தமஜ்ஜ²ன்ஹிகோபி (பாசி॰ அட்ட²॰ 248-249) காலஸங்க³ஹங் க³ச்ச²தி. ததோ பட்டா²ய பன கா²தி³துங் வா பு⁴ஞ்ஜிதுங் வா ந ஸக்கா. ஸஹஸா பிவிதுங் ஸக்கா ப⁴வெய்ய, குக்குச்சகேன பன ந காதப்³ப³ங். காலபரிச்சே²த³ஜானநத்த²ஞ்ச காலத்த²ம்போ⁴ யோஜேதப்³போ³. காலப்³ப⁴ந்தரேவ ப⁴த்தகிச்சங் காதப்³ப³ங். ‘‘யங் கிஞ்சி…பே॰… கா²த³னீயங் வா’’தி இமினா யங் தாவ ஸக்க²லிமோத³காதி³ புப்³ப³ண்ணாபரண்ணமயங், தத்த² வத்தப்³ப³மேவ நத்தீ²தி த³ஸ்ஸேதி. போ⁴ஜனீயங் நாம பஞ்ச போ⁴ஜனானி.
Vikāleti ettha aruṇuggamanato paṭṭhāya yāva majjhanhiko, ayaṃ buddhādīnaṃ ariyānaṃ āciṇṇasamāciṇṇo bhojanassa kālo nāma. Tadañño vikālo ‘‘vigato kālo’’ti katvā. Tenāha ‘‘vigate kāle’’tiādi. Ṭhitamajjhanhikopi (pāci. aṭṭha. 248-249) kālasaṅgahaṃ gacchati. Tato paṭṭhāya pana khādituṃ vā bhuñjituṃ vā na sakkā. Sahasā pivituṃ sakkā bhaveyya, kukkuccakena pana na kātabbaṃ. Kālaparicchedajānanatthañca kālatthambho yojetabbo. Kālabbhantareva bhattakiccaṃ kātabbaṃ. ‘‘Yaṃ kiñci…pe… khādanīyaṃ vā’’ti iminā yaṃ tāva sakkhalimodakādi pubbaṇṇāparaṇṇamayaṃ, tattha vattabbameva natthīti dasseti. Bhojanīyaṃ nāma pañca bhojanāni.
ஸதி பச்சயேதி பிபாஸாதி³காரணே விஜ்ஜமானே. ரோமட்ட²கஸ்ஸாதி ரோமட்ட²கஸ்ஸ பி⁴க்கு²னோ அஜ்ஜோ²ஹரித்வா உக்³கி³ரித்வா முகே²வ ட²பிதோ ப³ஹி முக²த்³வாரா வினிக்³க³தோ போ⁴ஜனஸ்ஸ மக்³கா³ ப³ஹி நிக்³க³தோ ‘‘ரோமட்டோ²’’தி பவுச்சதி. இத⁴ பன அஜ்ஜோ²ஹரித்வா உக்³கி³ரித்வா முகே²வ ட²பிதோதி அதி⁴ப்பேதோ. தேனாஹ ‘‘ந ச, பி⁴க்க²வே’’திஆதி³. ட²பெத்வா ரோமட்ட²கங் ஸேஸானங் ஆக³தங் உக்³கா³ரங் முகே² ஸந்தா⁴ரெத்வா கி³லந்தானங் ஆபத்தி. ஸசே பன அஸந்தா⁴ரெந்தமேவ பரக³லங் க³ச்ச²தி, வட்டதி.
Sati paccayeti pipāsādikāraṇe vijjamāne. Romaṭṭhakassāti romaṭṭhakassa bhikkhuno ajjhoharitvā uggiritvā mukheva ṭhapito bahi mukhadvārā viniggato bhojanassa maggā bahi niggato ‘‘romaṭṭho’’ti pavuccati. Idha pana ajjhoharitvā uggiritvā mukheva ṭhapitoti adhippeto. Tenāha ‘‘na ca, bhikkhave’’tiādi. Ṭhapetvā romaṭṭhakaṃ sesānaṃ āgataṃ uggāraṃ mukhe sandhāretvā gilantānaṃ āpatti. Sace pana asandhārentameva paragalaṃ gacchati, vaṭṭati.
விகாலபோ⁴ஜனஸிக்கா²பத³வண்ணனா நிட்டி²தா.
Vikālabhojanasikkhāpadavaṇṇanā niṭṭhitā.
