| Library / Tipiṭaka / திபிடக • Tipiṭaka / ஸாரத்த²தீ³பனீ-டீகா • Sāratthadīpanī-ṭīkā |
7. விகாலபோ⁴ஜனஸிக்கா²பத³வண்ணனா
7. Vikālabhojanasikkhāpadavaṇṇanā
247. ஸத்தமே அக்³க³ஸமஜ்ஜோதி உத்தமங் நச்சங். தங் கிர பப்³ப³தமத்த²கே ட²த்வா ஏகங் தே³வதங் உத்³தி³ஸ்ஸ கரொந்தி. நடானங் நாடகானி நடனாடகானி, ஸீதாஹரணாதீ³னி. அபஞ்ஞத்தே ஸிக்கா²பதே³தி ஊனவீஸதிவஸ்ஸஸிக்கா²பதே³ அபஞ்ஞத்தே. அத³ங்ஸூதி ‘‘விஹாரங் நெத்வா கா²தி³ஸ்ஸதா²’’தி அத³ங்ஸு.
247. Sattame aggasamajjoti uttamaṃ naccaṃ. Taṃ kira pabbatamatthake ṭhatvā ekaṃ devataṃ uddissa karonti. Naṭānaṃ nāṭakāni naṭanāṭakāni, sītāharaṇādīni. Apaññatte sikkhāpadeti ūnavīsativassasikkhāpade apaññatte. Adaṃsūti ‘‘vihāraṃ netvā khādissathā’’ti adaṃsu.
248-249. மூலகமூலாதீ³னி உபதே³ஸதோயேவ வேதி³தப்³பா³னி. ந ஹி தானி பரியாயந்தரேன வுச்சமானானிபி ஸக்கா விஞ்ஞாதுங். பரியாயந்தரேபி ஹி வுச்சமானே தங் தங் நாமங் அஜானந்தானங் ஸம்மோஹோயேவ ஸியா, தஸ்மா தத்த² ந கிஞ்சி வக்கா²ம. கா²த³னீயத்த²ந்தி கா²த³னீயேன கத்தப்³ப³கிச்சங். நேவ ப²ரந்தீதி ந நிப்பா²தெ³ந்தி. தேஸு தேஸு ஜனபதே³ஸூதி எத்த² ‘‘ஏகஸ்மிங் ஜனபதே³ ஆஹாரகிச்சங் ஸாதெ⁴ந்தங் ஸேஸஜனபதே³ஸுபி ந கப்பதீ’’தி வத³ந்தி. ருக்க²வல்லிஆதீ³னந்தி ஹெட்டா² வுத்தமேவ ஸம்பிண்டெ³த்வா வுத்தங். அந்தோபத²வீக³தோதி ஸாலகல்யாணீக²ந்த⁴ங் ஸந்தா⁴ய வுத்தங். ஸப்³ப³கப்பியானீதி மூலக²ந்த⁴தசபத்தாதி³வஸேன ஸப்³ப³ஸோ கப்பியானி. தேஸம்பி நாமவஸேன ந ஸக்கா பரியந்தங் த³ஸ்ஸேதுந்தி ஸம்ப³ந்தோ⁴. அச்சி²வாதீ³னங் அபரிபக்கானேவ ப²லானி யாவஜீவிகானீதி த³ஸ்ஸேதுங் ‘‘அபரிபக்கானீ’’தி வுத்தங்.
248-249. Mūlakamūlādīni upadesatoyeva veditabbāni. Na hi tāni pariyāyantarena vuccamānānipi sakkā viññātuṃ. Pariyāyantarepi hi vuccamāne taṃ taṃ nāmaṃ ajānantānaṃ sammohoyeva siyā, tasmā tattha na kiñci vakkhāma. Khādanīyatthanti khādanīyena kattabbakiccaṃ. Neva pharantīti na nipphādenti. Tesu tesu janapadesūti ettha ‘‘ekasmiṃ janapade āhārakiccaṃ sādhentaṃ sesajanapadesupi na kappatī’’ti vadanti. Rukkhavalliādīnanti heṭṭhā vuttameva sampiṇḍetvā vuttaṃ. Antopathavīgatoti sālakalyāṇīkhandhaṃ sandhāya vuttaṃ. Sabbakappiyānīti mūlakhandhatacapattādivasena sabbaso kappiyāni. Tesampi nāmavasena na sakkā pariyantaṃ dassetunti sambandho. Acchivādīnaṃ aparipakkāneva phalāni yāvajīvikānīti dassetuṃ ‘‘aparipakkānī’’ti vuttaṃ.
ஹரீதகாதீ³னங் அட்டீ²னீதி எத்த² மிஞ்ஜங் படிச்சா²தெ³த்வா டி²தகபாலானி யாவஜீவிகானீதி ஆசரியா. மிஞ்ஜம்பி யாவஜீவிகந்தி ஏகே. ஹிங்கூ³தி ஹிங்கு³ருக்க²தோ பக்³க⁴ரிதனிய்யாஸோ. ஹிங்கு³ஜதுஆத³யோபி ஹிங்கு³விகதியோ ஏவ. தத்த² ஹிங்கு³ஜது நாம ஹிங்கு³ருக்க²ஸ்ஸ த³ண்ட³பத்தானி பசித்வா கதனிய்யாஸோ, ஹிங்கு³ஸிபாடிகங் நாம ஹிங்கு³பத்தானி பசித்வா கதனிய்யாஸோ. ‘‘அஞ்ஞேன மிஸ்ஸெத்வா கதோ’’திபி வத³ந்தி. தகந்தி அக்³க³கோடியா நிக்க²ந்தஸிலேஸோ. தகபத்திந்தி பத்ததோ நிக்க²ந்தஸிலேஸோ. தகபண்ணிந்தி பலாஸே ப⁴ஜ்ஜித்வா கதஸிலேஸோ. ‘‘த³ண்ட³தோ நிக்க²ந்தஸிலேஸோ திபி வத³ந்தி. ஸேஸமெத்த² உத்தானமேவ. விகாலதா, யாவகாலிகதா, அஜ்ஜோ²ஹரணந்தி இமானி பனெத்த² தீணி அங்கா³னி.
Harītakādīnaṃ aṭṭhīnīti ettha miñjaṃ paṭicchādetvā ṭhitakapālāni yāvajīvikānīti ācariyā. Miñjampi yāvajīvikanti eke. Hiṅgūti hiṅgurukkhato paggharitaniyyāso. Hiṅgujatuādayopi hiṅguvikatiyo eva. Tattha hiṅgujatu nāma hiṅgurukkhassa daṇḍapattāni pacitvā kataniyyāso, hiṅgusipāṭikaṃ nāma hiṅgupattāni pacitvā kataniyyāso. ‘‘Aññena missetvā kato’’tipi vadanti. Takanti aggakoṭiyā nikkhantasileso. Takapattinti pattato nikkhantasileso. Takapaṇṇinti palāse bhajjitvā katasileso. ‘‘Daṇḍato nikkhantasileso tipi vadanti. Sesamettha uttānameva. Vikālatā, yāvakālikatā, ajjhoharaṇanti imāni panettha tīṇi aṅgāni.
விகாலபோ⁴ஜனஸிக்கா²பத³வண்ணனா நிட்டி²தா.
Vikālabhojanasikkhāpadavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 4. போ⁴ஜனவக்³கோ³ • 4. Bhojanavaggo
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 7. விகாலபோ⁴ஜனஸிக்கா²பத³வண்ணனா • 7. Vikālabhojanasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 7. விகாலபோ⁴ஜனஸிக்கா²பத³வண்ணனா • 7. Vikālabhojanasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 7. விகாலபோ⁴ஜனஸிக்கா²பத³வண்ணனா • 7. Vikālabhojanasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 7. விகாலபோ⁴ஜனஸிக்கா²பத³ங் • 7. Vikālabhojanasikkhāpadaṃ
