| Library / Tipiṭaka / திபிடக • Tipiṭaka / விமதிவினோத³னீ-டீகா • Vimativinodanī-ṭīkā |
7. விகாலபோ⁴ஜனஸிக்கா²பத³வண்ணனா
7. Vikālabhojanasikkhāpadavaṇṇanā
247. ஸத்தமே நடானங் நாடகாதி நடனாடகா, ஸீதாஹரணாதீ³னி.
247. Sattame naṭānaṃ nāṭakāti naṭanāṭakā, sītāharaṇādīni.
248-9. கா²த³னீயே கா²த³னீயத்த²ந்தி பூவாதி³கா²த³னீயே விஜ்ஜமானகா²த³னீயகிச்சங் கா²த³னீயேஹி காதப்³ப³ங் ஜிக⁴ச்சா²ஹரணஸங்கா²தங் அத்த²ங் பயோஜனங் நேவ ப²ரந்தி ந நிப்பா²தெ³ந்தி. ஏகஸ்மிங் தே³ஸே ஆஹாரகிச்சங் ஸாதெ⁴ந்தங் வா அஞ்ஞஸ்மிங் தே³ஸே உட்டி²தபூ⁴மிரஸாதி³பே⁴தே³ன ஆஹாரகிச்சங் அஸாதெ⁴ந்தம்பி வா ஸம்ப⁴வெய்யாதி ஆஹ ‘‘தேஸு தேஸு ஜனபதே³ஸூ’’திஆதி³. கேசி பன ‘‘ஏகஸ்மிங் ஜனபதே³ ஆஹாரகிச்சங் ஸாதெ⁴ந்தங் ஸேஸஜனபதே³ஸுபி விகாலே ந கப்பதி ஏவாதி த³ஸ்ஸனத்த²ங் இத³ங் வுத்த’’ந்திபி (ஸாரத்த²॰ டீ॰ பாசித்தியகண்ட³ 3.248-249) வத³ந்தி. பகதிஆஹாரவஸேனாதி அஞ்ஞேஹி யாவகாலிகேஹி அயோஜிதங் அத்தனோ பகதியாவ ஆஹாரகிச்சகரணவஸேன. ஸம்மோஹோயேவ ஹோதீதி அனேகத்தா²னங் நாமானங், அப்பஸித்³தா⁴னஞ்ச ஸம்ப⁴வதோ ஸம்மோஹோ ஏவ ஸியா. தேனேவெத்த² மயம்பி மூலகமூலாதீ³னங் பரியாயந்தரத³ஸ்ஸனேன அத³ஸ்ஸனங் கரிம்ஹ உபதே³ஸதோவ க³ஹேதப்³ப³தோ.
248-9.Khādanīye khādanīyatthanti pūvādikhādanīye vijjamānakhādanīyakiccaṃ khādanīyehi kātabbaṃ jighacchāharaṇasaṅkhātaṃ atthaṃ payojanaṃ neva pharanti na nipphādenti. Ekasmiṃ dese āhārakiccaṃ sādhentaṃ vā aññasmiṃ dese uṭṭhitabhūmirasādibhedena āhārakiccaṃ asādhentampi vā sambhaveyyāti āha ‘‘tesu tesu janapadesū’’tiādi. Keci pana ‘‘ekasmiṃ janapade āhārakiccaṃ sādhentaṃ sesajanapadesupi vikāle na kappati evāti dassanatthaṃ idaṃ vutta’’ntipi (sārattha. ṭī. pācittiyakaṇḍa 3.248-249) vadanti. Pakatiāhāravasenāti aññehi yāvakālikehi ayojitaṃ attano pakatiyāva āhārakiccakaraṇavasena. Sammohoyeva hotīti anekatthānaṃ nāmānaṃ, appasiddhānañca sambhavato sammoho eva siyā. Tenevettha mayampi mūlakamūlādīnaṃ pariyāyantaradassanena adassanaṃ karimha upadesatova gahetabbato.
யந்தி வட்டகந்த³ங். முளாலந்தி தூ²லதருணமூலமேவ, ருக்க²வல்லிஆதீ³னங் மத்த²கோதி ஹெட்டா² வுத்தமேவ ஸம்பிண்டெ³த்வா வுத்தங். அச்சி²வாதீ³னங் அபரிபக்கானேவ ப²லானி யாவஜீவிகானீதி த³ஸ்ஸேதுங் ‘‘அபரிபக்கானீ’’தி வுத்தங். ஹரீதகாதீ³னங் அட்டீ²னீதி எத்த² மிஞ்ஜங் யாவகாலிகந்தி கேசி வத³ந்தி, தங் ந யுத்தங் அட்ட²கதா²யங் அவுத்தத்தா.
Yanti vaṭṭakandaṃ. Muḷālanti thūlataruṇamūlameva, rukkhavalliādīnaṃ matthakoti heṭṭhā vuttameva sampiṇḍetvā vuttaṃ. Acchivādīnaṃ aparipakkāneva phalāni yāvajīvikānīti dassetuṃ ‘‘aparipakkānī’’ti vuttaṃ. Harītakādīnaṃ aṭṭhīnīti ettha miñjaṃ yāvakālikanti keci vadanti, taṃ na yuttaṃ aṭṭhakathāyaṃ avuttattā.
ஹிங்கு³ருக்க²தோ பக்³க⁴ரிதனிய்யாஸோ ஹிங்கு³ நாம. ஹிங்கு³ஜதுஆத³யோ ச ஹிங்கு³விகதியோவ. தத்த² ஹிங்கு³ஜது நாம ஹிங்கு³ருக்க²ஸ்ஸ த³ண்ட³பத்தானி பசித்வா கதனிய்யாஸோ. ஹிங்கு³ஸிபாடிகா நாம ஹிங்கு³பத்தானி பசித்வா கதனிய்யாஸோ. அஞ்ஞேன மிஸ்ஸெத்வா கதோதிபி வத³ந்தி. தகந்தி அக்³க³கோடியா நிக்க²ந்தஸிலேஸோ. தகபத்திந்தி பத்ததோ நிக்க²ந்தஸிலேஸோ. தகபண்ணிந்தி பலாஸே ப⁴ஜ்ஜித்வா கதஸிலேஸோ. த³ண்ட³தோ நிக்க²ந்தஸிலேஸோதிபி வத³ந்தி. விகாலதா, யாவகாலிகதா, அஜ்ஜோ²ஹரணந்தி இமானெத்த² தீணி அங்கா³னி.
Hiṅgurukkhato paggharitaniyyāso hiṅgu nāma. Hiṅgujatuādayo ca hiṅguvikatiyova. Tattha hiṅgujatu nāma hiṅgurukkhassa daṇḍapattāni pacitvā kataniyyāso. Hiṅgusipāṭikā nāma hiṅgupattāni pacitvā kataniyyāso. Aññena missetvā katotipi vadanti. Takanti aggakoṭiyā nikkhantasileso. Takapattinti pattato nikkhantasileso. Takapaṇṇinti palāse bhajjitvā katasileso. Daṇḍato nikkhantasilesotipi vadanti. Vikālatā, yāvakālikatā, ajjhoharaṇanti imānettha tīṇi aṅgāni.
விகாலபோ⁴ஜனஸிக்கா²பத³வண்ணனா நிட்டி²தா.
Vikālabhojanasikkhāpadavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 4. போ⁴ஜனவக்³கோ³ • 4. Bhojanavaggo
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 7. விகாலபோ⁴ஜனஸிக்கா²பத³வண்ணனா • 7. Vikālabhojanasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 7. விகாலபோ⁴ஜனஸிக்கா²பத³வண்ணனா • 7. Vikālabhojanasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 7. விகாலபோ⁴ஜனஸிக்கா²பத³வண்ணனா • 7. Vikālabhojanasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 7. விகாலபோ⁴ஜனஸிக்கா²பத³ங் • 7. Vikālabhojanasikkhāpadaṃ
