| Library / Tipiṭaka / তিপিটক • Tipiṭaka / সারত্থদীপনী-টীকা • Sāratthadīpanī-ṭīkā |
৭. ৰিকালভোজনসিক্খাপদৰণ্ণনা
7. Vikālabhojanasikkhāpadavaṇṇanā
২৪৭. সত্তমে অগ্গসমজ্জোতি উত্তমং নচ্চং। তং কির পব্বতমত্থকে ঠত্ৰা একং দেৰতং উদ্দিস্স করোন্তি। নটানং নাটকানি নটনাটকানি, সীতাহরণাদীনি। অপঞ্ঞত্তে সিক্খাপদেতি ঊনৰীসতিৰস্সসিক্খাপদে অপঞ্ঞত্তে। অদংসূতি ‘‘ৰিহারং নেত্ৰা খাদিস্সথা’’তি অদংসু।
247. Sattame aggasamajjoti uttamaṃ naccaṃ. Taṃ kira pabbatamatthake ṭhatvā ekaṃ devataṃ uddissa karonti. Naṭānaṃ nāṭakāni naṭanāṭakāni, sītāharaṇādīni. Apaññatte sikkhāpadeti ūnavīsativassasikkhāpade apaññatte. Adaṃsūti ‘‘vihāraṃ netvā khādissathā’’ti adaṃsu.
২৪৮-২৪৯. মূলকমূলাদীনি উপদেসতোযেৰ ৰেদিতব্বানি। ন হি তানি পরিযাযন্তরেন ৰুচ্চমানানিপি সক্কা ৰিঞ্ঞাতুং। পরিযাযন্তরেপি হি ৰুচ্চমানে তং তং নামং অজানন্তানং সম্মোহোযেৰ সিযা, তস্মা তত্থ ন কিঞ্চি ৰক্খাম। খাদনীযত্থন্তি খাদনীযেন কত্তব্বকিচ্চং। নেৰ ফরন্তীতি ন নিপ্ফাদেন্তি। তেসু তেসু জনপদেসূতি এত্থ ‘‘একস্মিং জনপদে আহারকিচ্চং সাধেন্তং সেসজনপদেসুপি ন কপ্পতী’’তি ৰদন্তি। রুক্খৰল্লিআদীনন্তি হেট্ঠা ৰুত্তমেৰ সম্পিণ্ডেত্ৰা ৰুত্তং। অন্তোপথৰীগতোতি সালকল্যাণীখন্ধং সন্ধায ৰুত্তং। সব্বকপ্পিযানীতি মূলখন্ধতচপত্তাদিৰসেন সব্বসো কপ্পিযানি। তেসম্পি নামৰসেন ন সক্কা পরিযন্তং দস্সেতুন্তি সম্বন্ধো। অচ্ছিৰাদীনং অপরিপক্কানেৰ ফলানি যাৰজীৰিকানীতি দস্সেতুং ‘‘অপরিপক্কানী’’তি ৰুত্তং।
248-249. Mūlakamūlādīni upadesatoyeva veditabbāni. Na hi tāni pariyāyantarena vuccamānānipi sakkā viññātuṃ. Pariyāyantarepi hi vuccamāne taṃ taṃ nāmaṃ ajānantānaṃ sammohoyeva siyā, tasmā tattha na kiñci vakkhāma. Khādanīyatthanti khādanīyena kattabbakiccaṃ. Neva pharantīti na nipphādenti. Tesu tesu janapadesūti ettha ‘‘ekasmiṃ janapade āhārakiccaṃ sādhentaṃ sesajanapadesupi na kappatī’’ti vadanti. Rukkhavalliādīnanti heṭṭhā vuttameva sampiṇḍetvā vuttaṃ. Antopathavīgatoti sālakalyāṇīkhandhaṃ sandhāya vuttaṃ. Sabbakappiyānīti mūlakhandhatacapattādivasena sabbaso kappiyāni. Tesampi nāmavasena na sakkā pariyantaṃ dassetunti sambandho. Acchivādīnaṃ aparipakkāneva phalāni yāvajīvikānīti dassetuṃ ‘‘aparipakkānī’’ti vuttaṃ.
হরীতকাদীনং অট্ঠীনীতি এত্থ মিঞ্জং পটিচ্ছাদেত্ৰা ঠিতকপালানি যাৰজীৰিকানীতি আচরিযা। মিঞ্জম্পি যাৰজীৰিকন্তি একে। হিঙ্গূতি হিঙ্গুরুক্খতো পগ্ঘরিতনিয্যাসো। হিঙ্গুজতুআদযোপি হিঙ্গুৰিকতিযো এৰ। তত্থ হিঙ্গুজতু নাম হিঙ্গুরুক্খস্স দণ্ডপত্তানি পচিত্ৰা কতনিয্যাসো, হিঙ্গুসিপাটিকং নাম হিঙ্গুপত্তানি পচিত্ৰা কতনিয্যাসো। ‘‘অঞ্ঞেন মিস্সেত্ৰা কতো’’তিপি ৰদন্তি। তকন্তি অগ্গকোটিযা নিক্খন্তসিলেসো। তকপত্তিন্তি পত্ততো নিক্খন্তসিলেসো। তকপণ্ণিন্তি পলাসে ভজ্জিত্ৰা কতসিলেসো। ‘‘দণ্ডতো নিক্খন্তসিলেসো তিপি ৰদন্তি। সেসমেত্থ উত্তানমেৰ। ৰিকালতা, যাৰকালিকতা, অজ্ঝোহরণন্তি ইমানি পনেত্থ তীণি অঙ্গানি।
Harītakādīnaṃ aṭṭhīnīti ettha miñjaṃ paṭicchādetvā ṭhitakapālāni yāvajīvikānīti ācariyā. Miñjampi yāvajīvikanti eke. Hiṅgūti hiṅgurukkhato paggharitaniyyāso. Hiṅgujatuādayopi hiṅguvikatiyo eva. Tattha hiṅgujatu nāma hiṅgurukkhassa daṇḍapattāni pacitvā kataniyyāso, hiṅgusipāṭikaṃ nāma hiṅgupattāni pacitvā kataniyyāso. ‘‘Aññena missetvā kato’’tipi vadanti. Takanti aggakoṭiyā nikkhantasileso. Takapattinti pattato nikkhantasileso. Takapaṇṇinti palāse bhajjitvā katasileso. ‘‘Daṇḍato nikkhantasileso tipi vadanti. Sesamettha uttānameva. Vikālatā, yāvakālikatā, ajjhoharaṇanti imāni panettha tīṇi aṅgāni.
ৰিকালভোজনসিক্খাপদৰণ্ণনা নিট্ঠিতা।
Vikālabhojanasikkhāpadavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰিভঙ্গ • Mahāvibhaṅga / ৪. ভোজনৰগ্গো • 4. Bhojanavaggo
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰিভঙ্গ-অট্ঠকথা • Mahāvibhaṅga-aṭṭhakathā / ৭. ৰিকালভোজনসিক্খাপদৰণ্ণনা • 7. Vikālabhojanasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ৭. ৰিকালভোজনসিক্খাপদৰণ্ণনা • 7. Vikālabhojanasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ৭. ৰিকালভোজনসিক্খাপদৰণ্ণনা • 7. Vikālabhojanasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ৭. ৰিকালভোজনসিক্খাপদং • 7. Vikālabhojanasikkhāpadaṃ
