| Library / Tipiṭaka / තිපිටක • Tipiṭaka / විමතිවිනොදනී-ටීකා • Vimativinodanī-ṭīkā |
7. විකාලභොජනසික්‌ඛාපදවණ්‌ණනා
7. Vikālabhojanasikkhāpadavaṇṇanā
247. සත්‌තමෙ නටානං නාටකාති නටනාටකා, සීතාහරණාදීනි.
247. Sattame naṭānaṃ nāṭakāti naṭanāṭakā, sītāharaṇādīni.
248-9. ඛාදනීයෙ ඛාදනීයත්‌ථන්‌ති පූවාදිඛාදනීයෙ විජ්‌ජමානඛාදනීයකිච්‌චං ඛාදනීයෙහි කාතබ්‌බං ජිඝච්‌ඡාහරණසඞ්‌ඛාතං අත්‌ථං පයොජනං නෙව ඵරන්‌ති න නිප්‌ඵාදෙන්‌ති. එකස්‌මිං දෙසෙ ආහාරකිච්‌චං සාධෙන්‌තං වා අඤ්‌ඤස්‌මිං දෙසෙ උට්‌ඨිතභූමිරසාදිභෙදෙන ආහාරකිච්‌චං අසාධෙන්‌තම්‌පි වා සම්‌භවෙය්‍යාති ආහ ‘‘තෙසු තෙසු ජනපදෙසූ’’තිආදි. කෙචි පන ‘‘එකස්‌මිං ජනපදෙ ආහාරකිච්‌චං සාධෙන්‌තං සෙසජනපදෙසුපි විකාලෙ න කප්‌පති එවාති දස්‌සනත්‌ථං ඉදං වුත්‌ත’’න්‌තිපි (සාරත්‌ථ. ටී. පාචිත්‌තියකණ්‌ඩ 3.248-249) වදන්‌ති. පකතිආහාරවසෙනාති අඤ්‌ඤෙහි යාවකාලිකෙහි අයොජිතං අත්‌තනො පකතියාව ආහාරකිච්‌චකරණවසෙන. සම්‌මොහොයෙව හොතීති අනෙකත්‌ථානං නාමානං, අප්‌පසිද්‌ධානඤ්‌ච සම්‌භවතො සම්‌මොහො එව සියා. තෙනෙවෙත්‌ථ මයම්‌පි මූලකමූලාදීනං පරියායන්‌තරදස්‌සනෙන අදස්‌සනං කරිම්‌හ උපදෙසතොව ගහෙතබ්‌බතො.
248-9.Khādanīye khādanīyatthanti pūvādikhādanīye vijjamānakhādanīyakiccaṃ khādanīyehi kātabbaṃ jighacchāharaṇasaṅkhātaṃ atthaṃ payojanaṃ neva pharanti na nipphādenti. Ekasmiṃ dese āhārakiccaṃ sādhentaṃ vā aññasmiṃ dese uṭṭhitabhūmirasādibhedena āhārakiccaṃ asādhentampi vā sambhaveyyāti āha ‘‘tesu tesu janapadesū’’tiādi. Keci pana ‘‘ekasmiṃ janapade āhārakiccaṃ sādhentaṃ sesajanapadesupi vikāle na kappati evāti dassanatthaṃ idaṃ vutta’’ntipi (sārattha. ṭī. pācittiyakaṇḍa 3.248-249) vadanti. Pakatiāhāravasenāti aññehi yāvakālikehi ayojitaṃ attano pakatiyāva āhārakiccakaraṇavasena. Sammohoyeva hotīti anekatthānaṃ nāmānaṃ, appasiddhānañca sambhavato sammoho eva siyā. Tenevettha mayampi mūlakamūlādīnaṃ pariyāyantaradassanena adassanaṃ karimha upadesatova gahetabbato.
යන්‌ති වට්‌ටකන්‌දං. මුළාලන්‌ති ථූලතරුණමූලමෙව, රුක්‌ඛවල්‌ලිආදීනං මත්‌ථකොති හෙට්‌ඨා වුත්‌තමෙව සම්‌පිණ්‌ඩෙත්‌වා වුත්‌තං. අච්‌ඡිවාදීනං අපරිපක්‌කානෙව ඵලානි යාවජීවිකානීති දස්‌සෙතුං ‘‘අපරිපක්‌කානී’’ති වුත්‌තං. හරීතකාදීනං අට්‌ඨීනීති එත්‌ථ මිඤ්‌ජං යාවකාලිකන්‌ති කෙචි වදන්‌ති, තං න යුත්‌තං අට්‌ඨකථායං අවුත්‌තත්‌තා.
Yanti vaṭṭakandaṃ. Muḷālanti thūlataruṇamūlameva, rukkhavalliādīnaṃ matthakoti heṭṭhā vuttameva sampiṇḍetvā vuttaṃ. Acchivādīnaṃ aparipakkāneva phalāni yāvajīvikānīti dassetuṃ ‘‘aparipakkānī’’ti vuttaṃ. Harītakādīnaṃ aṭṭhīnīti ettha miñjaṃ yāvakālikanti keci vadanti, taṃ na yuttaṃ aṭṭhakathāyaṃ avuttattā.
හිඞ්‌ගුරුක්‌ඛතො පග්‌ඝරිතනිය්‍යාසො හිඞ්‌ගු නාම. හිඞ්‌ගුජතුආදයො ච හිඞ්‌ගුවිකතියොව. තත්‌ථ හිඞ්‌ගුජතු නාම හිඞ්‌ගුරුක්‌ඛස්‌ස දණ්‌ඩපත්‌තානි පචිත්‌වා කතනිය්‍යාසො. හිඞ්‌ගුසිපාටිකා නාම හිඞ්‌ගුපත්‌තානි පචිත්‌වා කතනිය්‍යාසො. අඤ්‌ඤෙන මිස්‌සෙත්‌වා කතොතිපි වදන්‌ති. තකන්‌ති අග්‌ගකොටියා නික්‌ඛන්‌තසිලෙසො. තකපත්‌තින්‌ති පත්‌තතො නික්‌ඛන්‌තසිලෙසො. තකපණ්‌ණින්‌ති පලාසෙ භජ්‌ජිත්‌වා කතසිලෙසො. දණ්‌ඩතො නික්‌ඛන්‌තසිලෙසොතිපි වදන්‌ති. විකාලතා, යාවකාලිකතා, අජ්‌ඣොහරණන්‌ති ඉමානෙත්‌ථ තීණි අඞ්‌ගානි.
Hiṅgurukkhato paggharitaniyyāso hiṅgu nāma. Hiṅgujatuādayo ca hiṅguvikatiyova. Tattha hiṅgujatu nāma hiṅgurukkhassa daṇḍapattāni pacitvā kataniyyāso. Hiṅgusipāṭikā nāma hiṅgupattāni pacitvā kataniyyāso. Aññena missetvā katotipi vadanti. Takanti aggakoṭiyā nikkhantasileso. Takapattinti pattato nikkhantasileso. Takapaṇṇinti palāse bhajjitvā katasileso. Daṇḍato nikkhantasilesotipi vadanti. Vikālatā, yāvakālikatā, ajjhoharaṇanti imānettha tīṇi aṅgāni.
විකාලභොජනසික්‌ඛාපදවණ්‌ණනා නිට්‌ඨිතා.
Vikālabhojanasikkhāpadavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / මහාවිභඞ්‌ග • Mahāvibhaṅga / 4. භොජනවග්‌ගො • 4. Bhojanavaggo
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / මහාවිභඞ්‌ග-අට්‌ඨකථා • Mahāvibhaṅga-aṭṭhakathā / 7. විකාලභොජනසික්‌ඛාපදවණ්‌ණනා • 7. Vikālabhojanasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / 7. විකාලභොජනසික්‌ඛාපදවණ්‌ණනා • 7. Vikālabhojanasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / 7. විකාලභොජනසික්‌ඛාපදවණ්‌ණනා • 7. Vikālabhojanasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 7. විකාලභොජනසික්‌ඛාපදං • 7. Vikālabhojanasikkhāpadaṃ
