| Library / Tipiṭaka / तिपिटक • Tipiṭaka / कङ्खावितरणी-अभिनव-टीका • Kaṅkhāvitaraṇī-abhinava-ṭīkā |
३. विकालगामप्पवेसनसिक्खापदवण्णना
3. Vikālagāmappavesanasikkhāpadavaṇṇanā
चारित्तेति चारित्तसिक्खापदे। उपचारन्ति दुतियलेड्डुपातं। अञ्ञं गामं गच्छन्तानं पुन आपुच्छनकिच्चं नत्थीति उस्साहं अप्पटिप्पस्सम्भेत्वा अञ्ञं गामं गच्छन्तानं गामसतम्पि होतु, पुन आपुच्छनकिच्चं नत्थीति अत्थो। तेनाह ‘‘सचे पना’’तिआदि। उस्साहन्ति गामप्पविसनुस्साहं। अन्तरारामादीसु (पाचि॰ अट्ठ॰ ५१५) न केवलं अनापुच्छा गच्छन्तस्सेव, कायबन्धनं अबन्धित्वा सङ्घाटिं अपारुपित्वा गच्छन्तस्सापि अनापत्ति। आपदासूति सीहो वा ब्यग्घो वा आगच्छति, मेघो वा उट्ठेति, अञ्ञो वा कोचि उपद्दवो उप्पज्जति , अनापत्ति। एवरूपासु आपदासु बहिगामतो अन्तोगामं पविसितुं वट्टति।
Cāritteti cārittasikkhāpade. Upacāranti dutiyaleḍḍupātaṃ. Aññaṃ gāmaṃ gacchantānaṃ puna āpucchanakiccaṃ natthīti ussāhaṃ appaṭippassambhetvā aññaṃ gāmaṃ gacchantānaṃ gāmasatampi hotu, puna āpucchanakiccaṃ natthīti attho. Tenāha ‘‘sace panā’’tiādi. Ussāhanti gāmappavisanussāhaṃ. Antarārāmādīsu (pāci. aṭṭha. 515) na kevalaṃ anāpucchā gacchantasseva, kāyabandhanaṃ abandhitvā saṅghāṭiṃ apārupitvā gacchantassāpi anāpatti. Āpadāsūti sīho vā byaggho vā āgacchati, megho vā uṭṭheti, añño vā koci upaddavo uppajjati , anāpatti. Evarūpāsu āpadāsu bahigāmato antogāmaṃ pavisituṃ vaṭṭati.
विकालगामप्पवेसनसिक्खापदवण्णना निट्ठिता।
Vikālagāmappavesanasikkhāpadavaṇṇanā niṭṭhitā.
