| Library / Tipiṭaka / တိပိဋက • Tipiṭaka / ကင္ခာဝိတရဏီ-အဘိနဝ-ဋီကာ • Kaṅkhāvitaraṇī-abhinava-ṭīkā |
၃. ဝိကာလဂာမပ္ပဝေသနသိက္ခာပဒဝဏ္ဏနာ
3. Vikālagāmappavesanasikkhāpadavaṇṇanā
စာရိတ္တေတိ စာရိတ္တသိက္ခာပဒေ။ ဥပစာရန္တိ ဒုတိယလေဍ္ဍုပာတံ။ အညံ ဂာမံ ဂစ္ဆန္တာနံ ပုန အာပုစ္ဆနကိစ္စံ နတ္ထီတိ ဥသ္သာဟံ အပ္ပဋိပ္ပသ္သမ္ဘေတ္ဝာ အညံ ဂာမံ ဂစ္ဆန္တာနံ ဂာမသတမ္ပိ ဟောတု, ပုန အာပုစ္ဆနကိစ္စံ နတ္ထီတိ အတ္ထော။ တေနာဟ ‘‘သစေ ပနာ’’တိအာဒိ။ ဥသ္သာဟန္တိ ဂာမပ္ပဝိသနုသ္သာဟံ။ အန္တရာရာမာဒီသု (ပာစိ. အဋ္ဌ. ၅၁၅) န ကေဝလံ အနာပုစ္ဆာ ဂစ္ဆန္တသ္သေဝ, ကာယဗန္ဓနံ အဗန္ဓိတ္ဝာ သင္ဃာဋိံ အပာရုပိတ္ဝာ ဂစ္ဆန္တသ္သာပိ အနာပတ္တိ။ အာပဒာသူတိ သီဟော ဝာ ဗ္ယဂ္ဃော ဝာ အာဂစ္ဆတိ, မေဃော ဝာ ဥဋ္ဌေတိ, အညော ဝာ ကောစိ ဥပဒ္ဒဝော ဥပ္ပဇ္ဇတိ , အနာပတ္တိ။ ဧဝရူပာသု အာပဒာသု ဗဟိဂာမတော အန္တောဂာမံ ပဝိသိတုံ ဝဋ္ဋတိ။
Cāritteti cārittasikkhāpade. Upacāranti dutiyaleḍḍupātaṃ. Aññaṃ gāmaṃ gacchantānaṃ puna āpucchanakiccaṃ natthīti ussāhaṃ appaṭippassambhetvā aññaṃ gāmaṃ gacchantānaṃ gāmasatampi hotu, puna āpucchanakiccaṃ natthīti attho. Tenāha ‘‘sace panā’’tiādi. Ussāhanti gāmappavisanussāhaṃ. Antarārāmādīsu (pāci. aṭṭha. 515) na kevalaṃ anāpucchā gacchantasseva, kāyabandhanaṃ abandhitvā saṅghāṭiṃ apārupitvā gacchantassāpi anāpatti. Āpadāsūti sīho vā byaggho vā āgacchati, megho vā uṭṭheti, añño vā koci upaddavo uppajjati , anāpatti. Evarūpāsu āpadāsu bahigāmato antogāmaṃ pavisituṃ vaṭṭati.
ဝိကာလဂာမပ္ပဝေသနသိက္ခာပဒဝဏ္ဏနာ နိဋ္ဌိတာ။
Vikālagāmappavesanasikkhāpadavaṇṇanā niṭṭhitā.
