| Library / Tipiṭaka / ཏིཔིཊཀ • Tipiṭaka / ཀངྑཱཝིཏརཎཱི-ཨབྷིནཝ-ཊཱིཀཱ • Kaṅkhāvitaraṇī-abhinava-ṭīkā |
༣. ཝིཀཱལགཱམཔྤཝེསནསིཀྑཱཔདཝཎྞནཱ
3. Vikālagāmappavesanasikkhāpadavaṇṇanā
ཙཱརིཏྟེཏི ཙཱརིཏྟསིཀྑཱཔདེ། ཨུཔཙཱརནྟི དུཏིཡལེཌྜུཔཱཏཾ། ཨཉྙཾ གཱམཾ གཙྪནྟཱནཾ པུན ཨཱཔུཙྪནཀིཙྩཾ ནཏྠཱིཏི ཨུསྶཱཧཾ ཨཔྤཊིཔྤསྶམྦྷེཏྭཱ ཨཉྙཾ གཱམཾ གཙྪནྟཱནཾ གཱམསཏམྤི ཧོཏུ, པུན ཨཱཔུཙྪནཀིཙྩཾ ནཏྠཱིཏི ཨཏྠོ། ཏེནཱཧ ‘‘སཙེ པནཱ’’ཏིཨཱདི། ཨུསྶཱཧནྟི གཱམཔྤཝིསནུསྶཱཧཾ། ཨནྟརཱརཱམཱདཱིསུ (པཱཙི॰ ཨཊྛ॰ ༥༡༥) ན ཀེཝལཾ ཨནཱཔུཙྪཱ གཙྪནྟསྶེཝ, ཀཱཡབནྡྷནཾ ཨབནྡྷིཏྭཱ སངྒྷཱཊིཾ ཨཔཱརུཔིཏྭཱ གཙྪནྟསྶཱཔི ཨནཱཔཏྟི། ཨཱཔདཱསཱུཏི སཱིཧོ ཝཱ བྱགྒྷོ ཝཱ ཨཱགཙྪཏི, མེགྷོ ཝཱ ཨུཊྛེཏི, ཨཉྙོ ཝཱ ཀོཙི ཨུཔདྡཝོ ཨུཔྤཛྫཏི , ཨནཱཔཏྟི། ཨེཝརཱུཔཱསུ ཨཱཔདཱསུ བཧིགཱམཏོ ཨནྟོགཱམཾ པཝིསིཏུཾ ཝཊྚཏི།
Cāritteti cārittasikkhāpade. Upacāranti dutiyaleḍḍupātaṃ. Aññaṃ gāmaṃ gacchantānaṃ puna āpucchanakiccaṃ natthīti ussāhaṃ appaṭippassambhetvā aññaṃ gāmaṃ gacchantānaṃ gāmasatampi hotu, puna āpucchanakiccaṃ natthīti attho. Tenāha ‘‘sace panā’’tiādi. Ussāhanti gāmappavisanussāhaṃ. Antarārāmādīsu (pāci. aṭṭha. 515) na kevalaṃ anāpucchā gacchantasseva, kāyabandhanaṃ abandhitvā saṅghāṭiṃ apārupitvā gacchantassāpi anāpatti. Āpadāsūti sīho vā byaggho vā āgacchati, megho vā uṭṭheti, añño vā koci upaddavo uppajjati , anāpatti. Evarūpāsu āpadāsu bahigāmato antogāmaṃ pavisituṃ vaṭṭati.
ཝིཀཱལགཱམཔྤཝེསནསིཀྑཱཔདཝཎྞནཱ ནིཊྛིཏཱ།
Vikālagāmappavesanasikkhāpadavaṇṇanā niṭṭhitā.
