| Library / Tipiṭaka / திபிடக • Tipiṭaka / விமதிவினோத³னீ-டீகா • Vimativinodanī-ṭīkā |
3. விகாலகா³மப்பவிஸனஸிக்கா²பத³வண்ணனா
3. Vikālagāmappavisanasikkhāpadavaṇṇanā
508. ததியே பாளியங் ப⁴யகத²ந்தி ராஜசோராதி³ப⁴யங் வா ரோகா³மனுஸ்ஸது³ப்³பி⁴க்க²கந்தாராதி³ப⁴யங் வா ஆரப்³ப⁴ பவத்தங். விஸிகா²கத²ந்தி ஸுனிவிட்டா²தி³வீதி²கத²ங். கும்ப⁴ட்டா²னகத²ந்தி உத³கதித்த²கத²ங், கும்ப⁴தா³ஸீகத²ங் வா. புப்³ப³பேதகத²ந்தி அதீதஞாதிகத²ங். நானத்தகத²ந்தி வுத்தாஹி, வக்க²மானாஹி ச விமுத்தங் நானாஸபா⁴வங் நிரத்த²ககத²ங். லோகக்கா²யிகந்தி ‘‘அயங் லோகோ கேன நிம்மிதோ’’திஆதி³னா லோகஸபா⁴வக்கா²னவஸேன பவத்தனகதா². ஏவங் ஸமுத்³த³க்கா²யிகா வேதி³தப்³பா³. இதி ப⁴வோ இதி அப⁴வோதி யங் வா தங் வா நிரத்த²ககாரணங் வத்வா பவத்திதகதா² இதிப⁴வாப⁴வகதா². எத்த² ச ப⁴வோ ஸஸ்ஸதங், வுட்³டி⁴, காமஸுக²ஞ்சாதி திவிதோ⁴, அப⁴வோ தப்³பி³பரீதவஸேன. இதி இமாய ச²ப்³பி³தா⁴ய இதிப⁴வாப⁴வகதா²ய ஸத்³தி⁴ங் த்³வத்திங்ஸதிரச்சா²னகதா² நாம ஹொந்தி. அத² வா பாளியங் ஸரூபதோ அனாக³தாபி அரஞ்ஞபப்³ப³தனதீ³தீ³பகதா² இதி-ஸத்³தே³ன ஸங்க³ஹெத்வா த்³வத்திங்ஸதிரச்சா²னகதா²தி வுச்சந்தி. இதி வாதி எத்த² இதி-ஸத்³தோ³ பகாரத்தே². வா-ஸத்³தோ³ விகப்பத்தே². தஸ்மா ஏவங் பகாரங் இதோ அஞ்ஞங் வா தாதி³ஸங் நிரத்த²ககத²ங் கதே²தீதி அத்தோ² க³ஹேதப்³போ³.
508. Tatiye pāḷiyaṃ bhayakathanti rājacorādibhayaṃ vā rogāmanussadubbhikkhakantārādibhayaṃ vā ārabbha pavattaṃ. Visikhākathanti suniviṭṭhādivīthikathaṃ. Kumbhaṭṭhānakathanti udakatitthakathaṃ, kumbhadāsīkathaṃ vā. Pubbapetakathanti atītañātikathaṃ. Nānattakathanti vuttāhi, vakkhamānāhi ca vimuttaṃ nānāsabhāvaṃ niratthakakathaṃ. Lokakkhāyikanti ‘‘ayaṃ loko kena nimmito’’tiādinā lokasabhāvakkhānavasena pavattanakathā. Evaṃ samuddakkhāyikā veditabbā. Iti bhavo iti abhavoti yaṃ vā taṃ vā niratthakakāraṇaṃ vatvā pavattitakathā itibhavābhavakathā. Ettha ca bhavo sassataṃ, vuḍḍhi, kāmasukhañcāti tividho, abhavo tabbiparītavasena. Iti imāya chabbidhāya itibhavābhavakathāya saddhiṃ dvattiṃsatiracchānakathā nāma honti. Atha vā pāḷiyaṃ sarūpato anāgatāpi araññapabbatanadīdīpakathā iti-saddena saṅgahetvā dvattiṃsatiracchānakathāti vuccanti. Iti vāti ettha iti-saddo pakāratthe. Vā-saddo vikappatthe. Tasmā evaṃ pakāraṃ ito aññaṃ vā tādisaṃ niratthakakathaṃ kathetīti attho gahetabbo.
512. உஸ்ஸாஹங் படிப்பஸ்ஸம்பெ⁴த்வா விஹாரங் க³ச்ச²ந்தாதி எத்த² கா³மூபசாரதோ ப³ஹி நிக்க²ந்தே அந்தராராமாதீ³னமுபசாரங் பவிட்டே² ஸந்தா⁴ய வுத்தங். கா³மூபசாரப்³ப⁴ந்தரே பன படிபஸ்ஸத்³து⁴ஸ்ஸாஹானம்பி புன தமேவ வா அஞ்ஞங் வா கா³மங் பவிஸிதுகாமதாய ஸதி ஆபுச்ச²னகிச்சங் நத்தி². ‘‘குலக⁴ரே வா…பே॰… க³ந்தப்³ப³’’ந்தி இத³ங் பன புரேப⁴த்தங் பவிட்டா²னங் விகாலே ஸஞ்ஜாதே விகாலே கா³மப்பவேஸஸ்ஸ ஆபுச்சி²தப்³ப³தாய வுத்தங். அதி³ன்னாதா³னே வுத்தனயேனாதி து³தியலெட்³டு³பாதங் ஸந்தா⁴ய வுத்தங்.
512.Ussāhaṃ paṭippassambhetvā vihāraṃ gacchantāti ettha gāmūpacārato bahi nikkhante antarārāmādīnamupacāraṃ paviṭṭhe sandhāya vuttaṃ. Gāmūpacārabbhantare pana paṭipassaddhussāhānampi puna tameva vā aññaṃ vā gāmaṃ pavisitukāmatāya sati āpucchanakiccaṃ natthi. ‘‘Kulaghare vā…pe… gantabba’’nti idaṃ pana purebhattaṃ paviṭṭhānaṃ vikāle sañjāte vikāle gāmappavesassa āpucchitabbatāya vuttaṃ. Adinnādāne vuttanayenāti dutiyaleḍḍupātaṃ sandhāya vuttaṃ.
515. அந்தராராமந்திஆதீ³ஸூதி எத்த² உஸ்ஸவதி³வஸாதீ³ஸு மனுஸ்ஸேஹி கா³மே பத³க்கி²ணங் காரெந்தங் ஜினபி³ம்பா³தி³ங் பூஜேதுகாமேஹி வா ரோக³வூபஸமாதி³யத்த²ங் மனுஸ்ஸேஹி யாசிதேஹி வா பி⁴க்கூ²ஹி ஸுப்படிச்ச²ன்னாதி³விதி⁴ங் அகத்வாபி வீதி²மஜ்ஜே²னேவ கா³மங் பத³க்கி²ணங் காதுங் வட்டதீதி வத³ந்தி, தங் ந க³ஹேதப்³ப³ங் அனாபத்திவாரே அவுத்தத்தா, ‘‘மக்³கா³ அனோக்கமித்வா…பே॰… பாசித்திய’’ந்தி (கங்கா²॰ அட்ட²॰ விகாலகா³மப்பவேஸனஸிக்கா²பத³வண்ணனா) படிக்கி²த்தத்தா ச. வேஸாலிங் அனுபரியாயித்வா பரித்தங் கரொந்தேனாபி ஆனந்த³த்தே²ரேன ஸுப்படிச்ச²ன்னதாதி³ங் அகோபெந்தேனேவ, அபஞ்ஞத்தே வா ஸிக்கா²பதே³ கதந்தி த³ட்ட²ப்³ப³ங். கேசி பன ‘‘அந்தராராமாதி³கா³மந்தரே டி²தேஹி க³ருட்டா²னீயானங் பச்சுக்³க³மனானுக்³க³மனாதி³வஸேன கா³மவீதி²ங் ஓதரிதுங் வட்டதீ’’தி வத³ந்தி, தம்பி அந்தரக⁴ரங் பவிஸந்தங் பதி காதுங் ந வட்டதி ஏவ. அந்தராராமாதி³கப்பியபூ⁴மிங் பன உத்³தி³ஸ்ஸ க³ச்ச²ந்தங் பதி காதுங் வட்டதீதி கா²யதி, வீமங்ஸிதப்³ப³ங். ஸந்தங் பி⁴க்கு²ங் அனாபுச்ச²னா , அனநுஞ்ஞாதகாரணா விகாலே கா³மப்பவேஸோதி த்³வே அங்கா³னி.
515.Antarārāmantiādīsūti ettha ussavadivasādīsu manussehi gāme padakkhiṇaṃ kārentaṃ jinabimbādiṃ pūjetukāmehi vā rogavūpasamādiyatthaṃ manussehi yācitehi vā bhikkhūhi suppaṭicchannādividhiṃ akatvāpi vīthimajjheneva gāmaṃ padakkhiṇaṃ kātuṃ vaṭṭatīti vadanti, taṃ na gahetabbaṃ anāpattivāre avuttattā, ‘‘maggā anokkamitvā…pe… pācittiya’’nti (kaṅkhā. aṭṭha. vikālagāmappavesanasikkhāpadavaṇṇanā) paṭikkhittattā ca. Vesāliṃ anupariyāyitvā parittaṃ karontenāpi ānandattherena suppaṭicchannatādiṃ akopenteneva, apaññatte vā sikkhāpade katanti daṭṭhabbaṃ. Keci pana ‘‘antarārāmādigāmantare ṭhitehi garuṭṭhānīyānaṃ paccuggamanānuggamanādivasena gāmavīthiṃ otarituṃ vaṭṭatī’’ti vadanti, tampi antaragharaṃ pavisantaṃ pati kātuṃ na vaṭṭati eva. Antarārāmādikappiyabhūmiṃ pana uddissa gacchantaṃ pati kātuṃ vaṭṭatīti khāyati, vīmaṃsitabbaṃ. Santaṃ bhikkhuṃ anāpucchanā , ananuññātakāraṇā vikāle gāmappavesoti dve aṅgāni.
விகாலகா³மப்பவிஸனஸிக்கா²பத³வண்ணனா நிட்டி²தா.
Vikālagāmappavisanasikkhāpadavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 9. ரதனவக்³கோ³ • 9. Ratanavaggo
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 3. விகாலகா³மப்பவிஸனஸிக்கா²பத³வண்ணனா • 3. Vikālagāmappavisanasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 3. விகாலகா³மப்பவிஸனஸிக்கா²பத³வண்ணனா • 3. Vikālagāmappavisanasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 3. விகாலகா³மப்பவிஸனஸிக்கா²பத³வண்ணனா • 3. Vikālagāmappavisanasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 3. விகாலகா³மப்பவிஸனஸிக்கா²பத³ங் • 3. Vikālagāmappavisanasikkhāpadaṃ
